(الى مولى الموحدين)
(شور)

جي احبك
انا لاموني العوذال

جي احبك
لطمي كالو عنه باطل

يلوموني لو ابجي انا ليك
جي مادرو جنه بديك
ارحمهم و اهديهم
بدرب اللطم دليهم
بداعت ستر زينب عليك
..........................................
لغير شخصك
عيوني ما شالت رسم

لغير شخصك
گلبي ما يعشگ اسم

وبروحي زارعلك شمس
المتعوب بجروحك يحس
فقره و رزقنه اللطمه
شمعه الدمع بالضلمه
يا باجر و هسه و امس
..............................................
يا حبيبي
دمعتي تلوگ لضريحك

يا حبيبي
شمحله من ابجي و اصيحك

اول حزن راحه لبشر
يبمجي كل غيمه مطر
امصلايتي امن افرشهه
طيره و الوذ بعشهه
يمحنن گلوب الصخر
..............................................
بصغري أمي
بدرهه حبك رضعتني

ها يحيدر
بخدمتك هل دللتني


قبل اسمي حطولي لقب
كلمه الخادم من ذهب
شمحلاهه لو صاحوني
يا لخادم يسموني
شكد راحه لاجلك التعب
.......................................
شرفتني
و بالمجالس كعدتني

شرفتني
وابجي لجلك وفقتني

شكد نعمه من ترضه علي
و بلمجلس تكضني امن ادي
و تگلي گواگ الله
امن اعثر تگلي اسمله
و بجفوفك توزعلنه مي


مصطفى صادق اللامي

يا حيدر يا حيدر
_________________
(1)
انته سلطان القلوب الحائره
وگلبي حاير رايد يگصدك تره
اقسملي وحدة يا علي من هالاثنين
لو اطوفك لو تضمني المگبره

العاشگ المحتام مثلي
بيك يرسم من يصلي
يبوس بالتربه وتخيلهه الضريح
لو سجد لبيك يا حيدر يصيح

يناجي ربه يگله اشوفنه ردت
بگلبي جم صوره لضريحه علگت
انا لو ماشوفه احسبوني متت

-----------------
(2)
بكل شريايين الگلب خضر عشگ انته لون العافيه ورب للصدگ
وانفتگ ثوب الحزن وسط الگلب
و انته بس خيوطك تروف الفتگ

ارفع جفوفي واسئلك
وما سئلت اي بشر قبلك
گالو اتعناله ويحل الشدد ابيت الله رابي من جان بمهد

ياهو اهله وياهو ابو و ليا نسب
اسمه يم لوح العرش فوگ انكتب
ينطي روحه لون بالشده انجهب

_________________
(3)
سلمت روحي ورجعت ابلايه روح
خاف ارد بيهه وتضل عنك تنوح
شما يمرهه الضيج تندب يا علي
صلفه حيل مغمجه بگليبي الجروح

محني الك بيبان تسعه
مخلي يم كل وحده دمعه
حته المهن من تجيني حاجتي
واجي يمك ابجي دين برگبتي


دموعي لاگت يا حبيبي لگبتك
كون اضلن اخدم بنص حضرتك
الفقره من تجوع حيدر صلتك

_________________
(4)
ربنا گال الواجب نرد السلام
ورافع اليمنه لضريحك يا امام
ادري راح ترد علي عندي يقين
يا امان و يمك ينام الحمام

جامه و تناغيني گطره
الليل ضكني وانته گمره
عيشتي و دنياي كلهه بنعمتك
يعله اسمي شما ازيد بخدمتك

شوگي كل مصباح يتبده نده
الجرح بس صويحبه الي وچده
الگلب مرجع والعقل هل قلده

_________________
(5)
فييك تبوگه الشمس لو اذنبت
اعذرني جم مره اجي و گلتك تبت و انته كل مره تسهلي اﻻمر
و هسه غرگان بأيدينك جلبت

بيدك اغرگ بيدك اطلع
يا كريم بخيرك اطمع
الساني جاهل عثر واطشر ذنب
وطاح دمي اگبالي گتلهم جذب

جذبت دمي ﻻن ما حن عليك
وانا هالتوبه اريدن بين اديك
عني راح احسبهه راضي لو اجيك
_________________
مصطفى صادق اللامي

(نزلة)

يا فارس الميدان يا حاني ضهر الخيل
بيدك تطلع النور بيدك ترد الليل
.............................................................
حيدر علي الكرار يتباهه بي طاهه
الرگبه اليحزهه تصيح هالموته محلاهه
ولو كثرت الشدات بس حط علي وياهه
يردمهه زلم و خيل و يطر ثناياهه

يالمبتشر بالموت يم المنايه تعيل
بيدك تطلع النور بيدك ترد الليل
..................................................................
ثنه اعله وحده ونص وعيونه تخزرهم
ميدانه صار اگماط و اتوكل و شدهم
سنبل يشوف اعداه وحل وكته يحصدهم
الما الهم اي رداد بس حيدره يردهم

ترميهم بخزرات موش بحجر سجيل
بيدك تطلع النور بيدك ترد الليل
.................................................................
ما ضايگ اي گراب فقاره بالشده
شدت علگ شباج كض العده وشده
شمحلاته بالميدان بس الكفو يحصده
وينزل بيان الجيش واجبكم الشرده

لو يخطف اعللضاد بس الدمايه تسيل
بيدك تطلع النور بيدك ترد الليل
....................................................................
اتسرفن لزم شمسين برماحه فصلهن
عاليشرد امن الجيش بيمينه يشمرهن
ما يخطي بس يصيب و عيونه غمضهن
الما خطرن اعللبال بس حيدره اندلهن

عنده الحرب قرأن يا محله هالترتيل
بيدك تطلع النور بيدك ترد الليل
........................................................
خيط لهات الكاع كد ما دفن بيهم
شابع زلم التراب عزب علي اعليهم
بيدينه كضهم ماي يمشي ويبديهم
ردو لاصلهم طين من كد بواجيهم

كاع الله للكرار لو ينوي بيده تميل
بيدك تطلع النور بيدك ترد الليل

مصطفى صادق اللامي

يا عشگ گلبي الجبير
انته يا صوت الضمير
جنت سالوفه نده
شلون لموك بحصير

طشروك....وأذبحوك
وادري بس ما بيدي شيَ
سلبوك.....و عطشوك
و من ازورك بيدي مي

و الف حافر فوك صدرك شو نزل
و صدري سالم كلشي يمه ما وصل


و انا حته ابلطمتي باخل عليك
وانته منطيني شكو يحسين بيك
............................................................
عيوني تتضوه بضواك
وكل هوه بريتي فداك
ابد ما تسوه الحياه
امنيتي استشهد وراك

عالتراب...ابلاثياب
ومن اجيك البس حرير
وانته ضال..عالرمال
و الله ما عندي ضمير

وانا من اتعنه يمك ابتسم
والشمس جاويتك انته ابلا هدم

وانا عايف مجلسك گاعد بدار
ولاجلي حته الخيم مشتعلات نار
..............................................................
فدوه سيرلي بحلم
خلي جرحي ينلجم
كون ما امل من اجيك
وكون ازيدن بالطم

لاكو ماي...لا فياي
وانا ابيتي انترس في
لاجفوف...بالطفوف
وسالمات جفوف ادي

و من اطب لمرقدك اوگف عدل
وجسمك مطرزينه بسهام و نبل

وما اجي للمجلس و عذري البرد
و انته فوگ الغبره باقي ابلا لحد
..................................................................
كون ارد طين واجيك
حته اشبگ دوم بيك
كون ارد للطف خيام
حته لو محبس بديك

يل بگيت..ابلايه بيت
و انا عامر بيتي ذاك
و يا دماك...غرگاك
و انا ما ضايگ ضماك

وانا وجهي ضحكي هوه مصاحبه
و انته وجهك بالدماء امخضبه

شما يصير غروب بيتي ارجع اله
و زينب الوحدهه تبقه بكربله
............................................................

مصطفى صادق اللامي

#شور_سماعي
الحسين (ع)

حط جفه اعلخاصرته
و ضل يباوع لأخته
وگللهه انكسر ضهري
اخوي اعللترب عفته
يهمسلي همس باذني
اسمج خويه سالفته
بغمج بير الحضن يوسف
غمج فطور البشفته

جست شفته بحذر خويه
وقطع ضل يوكعن منهه
الجانت اترف من الماي
صحره وصبخهه شو جنهه
..............................
يحجي و يثكل السانه
هيج الفاكد اخوانه
موذر يا بعد بيتي
وضل بيتي ابله بيبانه
مضيفي سهمه بعيونه
و حزامي ابله ذرعانه
وجهك جان الي امرايه
هسه ابيش اشوف انه

الخليل و كل حطب ناره
يفهن يم جمر گلبي
ما فاگد اخو فاگد
عيني وتيهت دربي
..............................
زمزم نضرت عيونك
و اخيك يعطش الونك
ردت بجتافك اتشيع
مو گربي و يذبحونك
دارت و بحصر تالي
يلموني و يلمونك
گمر ما ﻻزم بحفره
بكوكب من يدفنونك

بكد ما صلبو بعيسه
داس الحافر بصدره
العرش يبجي ﻻن يسمع
اسملله تنشغ الزهره
..............................
شوفي اتبده يم جسمك
و گلبي دنگ يلمك
هواي بكد هوه الله انته
عثرت و مني طاح اسمك
لميته و رحت لاختك
وشفتهه بخيمتي ترسمك
وخذت من دمعتي الوانك
وگالت شو يخط جدمك

راح الجان الج خيمه
احترگ صيوان المروه
من بعدك يبوفاضل
صدگ ما تصح خوه

..............................
طحت و عيونك ابالي
اليجتلك هوه جتالي
تحزمت بعلگ منك
بوكعتك وكعت امالي
مثل گصبه يطگ ضهري
الجان ابجالك ايلالي
بس يله المهم تسوه
وياك الموته احلالي

سويه اعللترب نهوي
ودمك يشبگ بدمي
هاي لحضهه اتانيهه
بصغري وسولفتلي امي

مصطفى صادق اللامي

(عشق مع اﻻمام العباس)

(#شور)

مولاي
اليعشگ اطول صفنته امبين
مولاي
شلون لو مثلك عشگله احنين


فاتح گليبي گبل بيباني
بلكت بطيف و تمرني متاني
اوكعلك مطر
يم ذاك النهر
تلمني بجربتك
شمحلاه هل فخر
.............................
مولاي
دورينه و ضعنه وسط الديره
مولاي
انته اول گمر شايل غيره

العاشگك شيم الف دفانه
خادم العباس گبره هنانه

جن طبع الطفل
لو بيك انسئل
مابطل بجي
ورايدلك وصل
.............................
مولاي
اسئل الحبك ترد جلماته
مولاي
كون شعره وعيشتي بريشاته

حلمه صم تراب يم اجدامك
كون خيط تفصله و بهندامك

الهايم بالعشگ
بالمي يحترگ
جي ما ضاگته
شفافك بالصدگ
.............................
مولاي
ناذر عيوني شمس بطيوفك
مولاي
بالحلم محلاهه گلبي يشوفك



افرش بنص روحي المصلايه
و گصتي للتربه تصير مرايه

(ويحضرني الاسم
و ما عرف الرسم
وﻻ ريدن غرب
يمهم تنرسم)

مصطفى صادق اللامي

#الى_الامام_المهدي💕

يا اخر علگ ابيض بقه لهاشم
يبو انفاسي عسه گليبك يرد سالم
ارسم بيك بعيوني واتيهنك
واضل كل مغرب بگلبي اشبگنك
.................................................
(١)
طبع اليسافر لو رحل
يم اهله يترك ذكره
والمهدي خله بكربله
رايات جده الحمره
وكلمن يرد من السفر
صوغه اعلجفه امخضره
والمهدي ﻻمه صوغته
گبه وضريح وحضره

الفلح تتنطر المطره شكثر يدعون
ينكع ثوبهم من كثر ما يبجون
زليخه التايه بروحي تدورنك
واضل كل مغرب بگلبي اشبگنك
.......................................................... (٢)
الينوي يبعد عالوطن
من كاعه ياخذ تربه
والمهدي اخذ من الوطن
ترجيه رايه و جربه
ادري اليغيب اعللنضر
الوادم ابثار اطلبه
بس انته ابو الثار وعشت
يا مهدي نص الغربه

اليجون امن السفر بس بالبداية اعزاز
اليگلك يا هلا يصبّح الك جناز
سوالفنه هذن هنه اليأخرنك
واضل كل مغرب بگلبي اشبگنك
.........................................................
(٣)
لمطول بنص سفرته
يودي لهله مرساله
والمهدي شيودي لهله
وياهو البقه و يقراله
الديوان اذا ما ينجهب
المن تفور ادلاله
باقيلة ربه وتربته
وبس الصلاه تبراله

بيك انصح اذا واحد يريد يحب
الماكاتب عليكم كون ما يكتب
حد سابع سمة واصل صده حزنك
واضل كل مغرب بگلبي اشبگنك
....................................................

(٤)
الله اليعينك سيدي
المشتاگ جتالة الهجر
اشجم مرة تارس جربتك
و ناوي ترد من الفجر
بس ذنبي يركضلك ركض
يا مهدي ويأخرك عمر
من ذنبي تبجي سيدي
كل مغرب عيونك حمر

أعذرني اگلك روحي مشتاگه
تموت الكاع لو مي يبتدي فراگه
اسف سيدي چي خيبت ضنك
.......................................................
(٥)
الرايد يشوفك سيدي
بگليبة كون عيونة
البلبل كضه عمره بقفص
وسجناته يعشگونة
عالفطرة كون وياك اضل
العالفطرة ياخي عونة
كون اليحب مثل الشمس
كل مغرب يشيعونة

الغيم شما ثگل ما ينصة ضل عالي
غايب يا حبيبي و بيك هنيالي
المدامع و الحزن سيدي اندلنك
و اضل كل مغرب بگلبي اشبگنك
...................................................... .

الشاعر
مصطفى صادق اللامي