قصائد مصطفى صادق اللامي

{ليلة مسلم ع}

#ثگيل

حميده (ع) تقول

يا مسلم بتك تشتاگ ،،، ومبين ناوي اعله فراگ‌
مرسالك ما مرنه اليوم
وما مر يم عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
لهسه ارسومك فوگ عيوني // كلما اصفن تطلعلي انته
و انشد بيك ومتحاجيني// تدري العاشگ موته السكته
گلبي الحبك حيل يريدك // يا مسلم المن ماخذته
خيط اتمرجح بين امذابح// هيج گليبي معلگ عفته

ضل يزغر گلبي امن الخوف ،،، شگد ضميت لوجهك شوف

وجنازه اعللصفنه تحوم
وما مر يم عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
هذا المغرب يخفگ گلبي // گلي لوجهك ما مش جيه
گمت ارجف سعفه بنص هويه//بايد حيلي ومدري شبيه
و الله اليستر يا و الدنه // من يرجف گلب العلوية
يا مسلم فهمني احوالك // ترد لو ايس شنهي النية

بكل صفنة تبين مصلوب ،،، وبوية نسولف حچيي گلوب

يعلم يا گلب الملجوم
وما مر يم عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
اتغير وجه حسين الليله// اتخوصر شفته امبين فاگد
ما جن كاعد بين خوانه // شو جنه بفاتحتك كاعد
وضل يلجمني اگليبي يگلي// يا بت مسلم راح الوالد
ما ضل دم يسري بشرياني// والزم جفي والگا بارد

و يسولف مخنوگ حسين،،، كل شوي يصفگ جفين

و عباس مبين مالوم
وما مر يمي عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
طفله وكلشي يريدك بيه //كلشي ايصيح بابا الحگلي
وعمي حسين اگبالي مخضب// لا انته ولا هوه الضلي
مو گتلي انتظرج بالكوفه// طبيت الها وبيدي حبلي
ما ماشيت ابنيه ابگدي // بس سوط الطگاني ابحلي

سهله اعللطگ و اعللنوح ،،، حچي الشامت غث الروح

ميذب جلمه يذب اسموم
وما مر يم عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
كل مغرب افرك بجفوفي//واتخيل ايدك تلزمني
واغفه واحلم رايح مني // وأكعد اصرخ لا لتهدني
اخلاف اجفوفك خشنه الوادم//واحبال الناگه تگاودني
شكد دورتك بيه وشفتك // ضايع بيه وضايع مني

المتعوده بحضنك ترتاح ،،، يگوموها وتكعد بصياح

حگ الله ونرضه المقسوم
وما مر يم عيوني النوم
ومبين ناوي اعله فراگ
🔘🔘🔘🔘🔘🔘🔘🔘🔘🔘🔘🔘🔘🔘🔘🔘
مصطفى صادق اللامي

1.77K views13:35