ثگیل لمولاتي العليله (عليها السلام )

وين مسرة النوگ بعد عيوني
فدوه بوية الوحدي لتخلوني
>>>>>>>>>>>>>>>>>>>>>>>
حسين راح وعافني ابصدمه جبيرة
المن اشكي والوجه المن اديرة
بلكي يتراجع يحن گلبه عليه
حيرة اگضي الليل وي دمعي اسيرة



بالضعن ماخذهه كل العيله
من انامن دمعتي تضل سيله
>>>>>>>>>>>>>>>>>>>>>>
ضاگت الدنيه ابعيوني من هجرهم
امگابله الحيطان واتخيل صورهم
اسهر الليل ويظل كل فكري بيهم
وماكو مرسال اليطمني ابخبرهم



ابعتبه الباب انه اظلن واگفه
ويه روحي وسالفه اتجر سالفه
>>>>>>>>>>>>>>>>>>>>>>>>>
بويه صار الليل موحش من عفتني
ليش ماخذ كل خواتي وماخذتني
ماكلت وحشة على ابنيتي العليله
بويه جن  وردة ابرحيلك ذبلتني


بويه باحظانك اضلن نايمه
ماكلت حضرولي محمل فاطمه
>>>>>>>>>>>>>>>>>>>>>>
فارگت ضحكاتي بويه من سفركم
من تجيني المغربيه اشتاگ الكم
ماكو واحد  يفتهمني واشتكيله
بويه لتطول سفرتك تبجي بتكم


تاه فكري وابضعنكم حايره
حاضنه الشباچ اضلن ناطره
>>>>>>>>>>>>>>>>>>>>>>
حسين الفاطمي

#ثكيل
لربيبة الخدر مولاتنا زينب صلوات الله عليها

گلبي يمك راح اعوفه..وبس عبايه الرايحه
وهاي اول مره ناگه..تشيل  جادر فاتحه
ما يتخيط جرحك ماي..ورايح بس راسك وياي
__
اول تالي هيچ اتچافي الگلوب
بوكت شحت الماي وانته ما شاح
الرمح يلچم اذا تندار كلساع
ابغلات امي عباتي موت مرتاح
وكت جابو الشيبك حطو ادموم
و اول مره اشوف الغيم ينلاح

وعكس ممشه السفينه الريح
تشيب اكثر امنن نصيح
وتطيح اويانه من نطيح

عالرمح راسك امشيب..ومن جنت ويانه شاب
الأجه و شافاك ميت..المن يبوگ الثياب
لچمات الطف خوية هواي..ورايح بس راسك وياي
___
بكل مره تبيض وجهي يحسين
بس بيضت راسي بطيحتك هاي
وعشرتنه و لا خربت بالايام
المن طرف ثالث صاير الماي
گبل وياي تمشي انته عباس
وهسه احبال ضلت تمشي وياي

خوية بضعنك يشمتون
نعثر والطريق اعيون
ويم نحرك سبينه يهون

اقرايه فوگ الناگه صارت امناوب انه والرباب
من حضن امك الزهره شجابك لحضن التراب
منك اخذونه ابلا راي..ورايح بس راسك وياي
___
اخياط الزهره كل قمصانكم هاي
وسلبوكم اگبالي شكد هضميه
ومن كثر السلاسل صارت النوگ
سجن والعاشگ الله اكبر جريمه
جنت ام واخت وياكم حسين
ومن متوا صرت ثكلى ويتيمه

حزنك فهه كل دنياي
متّوا وكلشي مات وياي
مات العطش قبل الماي

هوه المفارگ مثيلك الماي يبقه بريجه مر
ردنه كلنه نموت فوگك خوية بس گضنه الستر
وللعثره الشامت شراي..ورايح بس راسك وياي
__
صح يمهم نهر بس ماي جذاب
ولأن طولك الماي الغربه سلبوك
جان الفرح نحرك وانذبح غاد
شجاها الناس كلها تصيح مبروك
احياكه ثوبك المِن فوگك انباگ
دم وتراب فوگك خوية محيوك

جاسوا ضلعك وفزيت
ويم نحرك بچي ادنيت
عگبك ماكو بالطف بيت

من كثر ما جتفونه الناگه صارتلي سجن
هسه بله انذبح نحرك ليش باقي ابلا دفن
صوتك راح وحزنك جاي..ورايح بس راسك وياي
____
وبتنه البقت تنعه وتبچي وتگول
انه جويعده و حمل ضعنكم
لو ويانه اجت جا ونت بصوت
انه جويعده وحرگوا خيمكم
عليلة وعالركض ما بيه يحسين
وسيفه ما عرگ‌ بوية الذبحكم

غربتها ولا هالحال
تتاني اولا تشوف احبال
عليله والجروح اثگال

بالمدينه اهون الها اولا يماشوها الغرب
يابن امي بنومك ابقه الصايم اتفحطه الحرب
فوگك امنه تسوي افياي..ورايح بس راسك وياي

مصطفى صادق اللامي

#شور_فزعه
لمولاي الحسين صلوات الله عليه

بالصحره لوحدك رحت..حاجيت الرب العلي
جايبلك وي الضعن..وين اعزازي العد هلي
كلشي العندي بس الك..ما عندي اي شي الي

ما طفت عالكعبة ولذبحك مشيت
وخيمتك مولاي صارت لله بيت
كلشي ساكت وانته وي ربك حجيت

ياللهي اتخير..
امن ابوفاضل تبدي لوبالاكبر
ياهو التريده يجيك بدمه
واليحب لو ينذبح ما يخسر
____
كل رگبة اتونس الذبح...جايبها انه لخاطرك
ونبلة عبد الله ملح..حته يغزر عاشرك
اخسر كلشي الينخسر...الا انته الما اخسرك

شلت من بيتي ونويت اعللرحيل
واليحب ما تاه جي گلبه الدِليل
وين متريد استقر دمي سبيل

اهواك..
وبيدي دم ابني ودور ملگاك
ياهو التريده اليجيلك منحور
وقبل لا تختاره اصيحلك هاك
_
وجايبلك فوگ الذبح..وين العزيزه اعللگلب
الما طالعه مره بشمس..وتستغرب بكلمه ضرب
الوياي تمشي وتستحي..وباجر يماشوها الغرب

اصعب اجروح الرجولة بهالخوات
واجن نص هودج مهابة امخدرات
من دلال جفوفي للهزلة البنات

لأجلك..
تشتعل خيمه واصير امن اهلك
يعبدن بعز الركض والهيمه
وبالخرابة يباتن ايصلنلك
_
چي عشگك بيه كبّر..من فوگ ميموني طحت
ومن انتشيت بموتتي..صليتلك راس بطشت
وما اركع انه ابحدي..فوگاي جبت ادموع بت

امن الطشت لاحضانك يصير الوفود
وموتت العاشگ عباده ابلا حدود
وين ما عندك سهم بدينه جود

سكته..
زلم نسوان اعلمودك ميته
ياهو اليحبك يموت بحضنك
جذب ليحبك يموت بوكته
__

مصطفى صادق اللامي
اللحن👇👇

#شور_فزعه
#لسيد_العشق


غرتهم اعناب الدنيا..واعناب الجنه بنص حضنك
شربوا كاس الري وفرحوا..وانته الكوثر يشرب منك
جانت امتك تسهر لهواً..وجروح الفقره ايسهرنك

بس انته التصح..غيرك ما يصح
المي ما ينذبح..غشمة اهل الذبح
كسرت حاجبك..كسرت جم رمح


من فيّ عباتك..طول النخل صار
شما درته وجهك..وجه الله يندار
الدنّيا تخلص..وناسك متخلص
من فاضل الطين..خالقلك انصار
__
انته المشكاة المذكورة..والمصباح الما خف ضيه
وانته الشجره التوقد كوكب..اللا شرقيه ولا غربيه
لبيوت الترفع اسم الله..شما گلبها ابيوتك هيه

زينة اعللعرش..اسمك منّحت
الله شما يشاء..يعني انته الشئت
من چنه برحم..انته الصورت

الذات الله قد مس..ذاتك يمنحور
يمحاچي موسى..من شجرة الطور
ربك طعلته..وصرت انته مثله
يا كلشي بينه..يا نفخة الصور
____
تحت الجنه انهاراً تجري..مصدرها الجربة البخيامك
شيّد هذا الكون الباري..وثبت اركانه امن اسهامك
اتذب الثامك صحوة الدنيا..وتغيم وي شدة الثامك

متحجمك ارض..وميحجمك عمر
برباط الحچي ..انته التنذكر
اقماش بخيمتك..اغله امن القصر

اكسير الاديان..دمك يمولاي
دين الله مبيوع..وبس انته شراي
ودرب السباية..درب الهداية
يا مجري الانهار..بس ما الك ماي
___
لازم كلمن يبچي يصلي..والما يبچي المن صلّه
حبل اختك حبل الله الممتد..ولازم نعتصم بحبل الله
يبست كل اغيوم الدنيا..واترون من دم عبد الله

انته وعيلتّك..لله اكبر ونس
يا صاحب فضل..عالچن والانس
يحير الينضرك..عينك لو شمس

كل القرابين ..مصدرها ذاتك
وكل عثرة يحسين..عبرةَ لبناتك
كل دمعه منك..وكل حسره حزنك
تجف كل الابحار..باول صفاتك
___
بحسن الضن بيك اكتب عنك..مو غلواً مني ولا شركاً
ذن ياهو يسويهن غيرك..وياهو المنك مولاي احسن
ولو مآثوم اتحمل اثمي..تسوه اتعذب عن حسن الضن

شمحلاته الذنب..اثم بالعشگ
قابل بالعذاب..وقابل بالحرگ
وما ضن أانثم..چي حاچي الصدك

ولهسه ادور..بس ما عرفتك
كل ذكره حلوه..بيهه خدمتك
ما بالغت بيك..بل قصرت بيك
بس الله يبقه..وتبقه دمعتك

مصطفى صادق اللامي

لطلب اللحن @Mustfa2k

سوف تنشر قصائد محرم قريبا

( اللهم ان كان هذا يرضيك.. فخذ حتى ترضى)
https://t.me/yahuussain

#عشگ_دمعه
لمولاي الحسين علية السلام

حسين عطشان..ليش اليرسمك يفطّر اشفافك..؟؟
حسين ضمأن..الماي ما عنده گلب ما شافك
حسين مولاي..حته بالصورة العطش ما عافك

ارد اشرّب الصورة دمعي..واستحي موجود اصبعي
شما شفت خيل ابقه اصيح..كافي يا خيل وارجعي

افطور بشفتك..حته بصورتك..اتطلبه النهر دين
اشييرويها الصور..من فيض الدمع..لو تنشف العين
وما لوّمه العطش..بشفافك سكن..غير انته الحسين
_
حسين مجروح..كل محرم يبقه ينزف جرحك
حسين مذبوح..فوگ حنيتك الناس تذبحك...؟؟
حسين مولاي..الدنيا وگفت وانته يفتر رمحك

كافي كل عاشر نخسرك..وينترس دم ضهره مهرك
ليش من صحت انصروني..الناس صاحت ما ننصرك

الناس السمعتك..شو ما نصرتك..ما عدهم اگلوب...؟؟
مي ماكو الك..ولماي النهر..مسدودة الدروب
ابحدك والغرب..ووليه اعللخيم..اولا حر اجه يتوب
____
حسين منحور..السيف لو عنده خجل مينحرك
حسين مهجور..تنزلك اهل القرى لحفرة گبرك
حسين مولاي..بلكي هاي السنه الخيل تعبرك

الرمل ما يرحلمه نايم..بلكت الله تگوم سالم
ليش اهل القرى ادفنك..وانتو مو قله الهواشم

اخوة فاطمّه..هاشم بالشدد..بالحگ تشيمون
بس محد فزع..وتالي لوحدك..وغربه اليدفنون
ما صارت قبل..سيد عالعرب..وماله اليشيعون
__
حسين مهضوم..الميت اكرامه دفنته بگبره
حسين محروم..استكثروا بيك الجفن والحفره
حسين مولاي..كل سنه تكسر گلب للزهره

الف عام ومية واكثر..وهيه كل عاشور تحضر
ومو ضلعها الكبراها..دم قمصيمك يابو الاكبر

مكسورة ضلع..بقمصانك تجي..وبالمجلس تنوح
ونة ثاكلّه..ام وعدها ابن..امن المگفه مذبوح
مدري اشچم گلب..عدها ام الحسن..ومتحمله الجروح
_
حسين مهيوب..لهيبتك هابتنه هاي الوادم
حسين مسلوب..خاطر يضل بكرامة الخادم
حسين مولاي..الله دينه برگبتك ضل سالم

لم يلد ربنا وتجلّه..بس حسبكم انتو اهله
امن انفتح يحسين جرحك..سد شكو بدين الله خله

من شيبك بدت..شيبات البخت..يا سيد ال((هاك))
ثوبك بالسمه..امراد لكل نبي..وامراد الاملاك
برمحك منذبح..واطلّع الشمس..وتسير الافلاك

لطلب اللحن @Mustfa2k

#ثكيل
لصاحب الزمان عجل الله فرجه

شوگ..وليل ابلا گمره
شوگ..للغتره الخضره
شوگ..للعين الحمره..التبچي اعللزهراء
___...
يبير الله ليسولف سره يمك
محمد من معزتك اسمه اسمك
يمهدي مر حلم خليني ارسمك..واشبع منك شوف

علت اليفارگ سهر..يضل مدمن اعللصور
وما عندي صورة الك..شيبرده جمر الگلب
سمعني منك هله..بالشام لو كربله
صوتك اسمعه عدل..لو صيحه وبنص حرب

وين..يا شيب الزهره
وين..يا خبز الفقره
وين..يا دين الفطره..گلبي يدورك وين
___
تجي ونبني گبر امك سوية
وندگ قطعه الى صحن الزجية
والاگلوب التحبك هيه هيه..تضل للموت وياك

وتصيّح أم البنين..هيا ادخلوا أمنين
وتترس الجربة لفضل..ويوزع ابن الگمر
سگاي من شمرته..اتحزمه بعلگ جدته
واليخدم بهالصحن..يشّع بجيبنه الفخر

هيج..ويقسمهه الله النه
هيج..انطب بموكبنه
هيج..ندخل وتلمنه..وانته التقره انوب
__..
المواگد تهده بس ما يهده ثارك
شوكت تسگي الهوادچ من خضارك
خشب خليني بيه علي نارك..يا طلاب الثار

بيا نخله لمن تمر..تصلب شيوخ الكفر
مو صار حلم النخل..تعذيب أهل ال (وأن)
ومتفيدهم ام جمل..والجمل وشما حمل
ما يبقه الهم ذكر ..وتنگطع رؤوس الفتن

خوف..واعضام اتناشغ
خوف..فحواهم فارغ
خوف..ادنّگ لبيارغ..يم راية عباس
____
أنه ذاك اليناطر وي شمعته
اليدور عن جمالك وي صفنته
والاوجوه التشبهك انته وانته..بيا مرقد الگاك

ابوجه امي وي كل صبح..شفتك ملامح جرح
ودورتك بكل عزه..بدموع ليحب صدگ
يا شيخنه المبتعد..ارحم بحال العبد
الما عنده غيرك سند..وما ضاگ غيرك عشگ
باب..لكل باب ومرقد
باب..ربنه الما تنسد
باب..بس اسود باسود..حزنك فهه الليل
___
قضيتَ العمر يا مهدي غريبُ
(حبيُبً ليس يعدله حبيبُ
وعن قلبي حبيبي لا يغيبُ)..ارد اقرالك ذن

ابروحي شاعر كبّر..كاتب ادموع وصور
امنحني فرصة لقاء..امحضر لحزنك جديد
كاتبلك اعللضعن..وعالماتن وعالبچن
امنيتي من هالحياة..انه اقره وتگلي عيد

عيد..لذة امن السانك
عيد..وتبچي لصيوانك
عيد..هذا انه انسانك..ناذرلك گلبي
____
مصطفى صادق اللامي
اليريد اللحن 👇👇
@Mustfa2k

#شور_سماعي
للسيدة الزهراء صلوات الله عليها

نضره مولاتي
بعينچ الحمره بقت من المصيّبة
العبدچ الماله بخت لو ما نحيبة
_
حامل بجفي دموعي..وجاي استجدي رضاچ
استوحديتي بعرش گلبي..لا مليكة الا سواچ
والمشي صاراله قيمه..من مشيت انه وراچ

طولچ بقه اينگط شمع من هدت الضلمه
وبصورتچ نلزم عشگ لزمت طفل بأمه
حبچ مثل شيب البخت ما نكدر نضمه

خدمه رزقيني
والصبح خادم صدك طاهر حليبه
العبدچ الماله بخت لو ما نحيبه
_
من لگيت الدنيا غربه..گمت بأحزانچ اعد
والسهر مولاتي صاير..موطن ادموع العبد
الفاتح اجروحه لمصابچ..بالبچي ضل ينسعد

الما حبچ وما يعشگچ هم گلبه عود يحب
و كد ما يحبچ حيدره من دفنچ امشيب
نصد صورتچ كلها حزن بس حلت الموكب

وحچيي ضل يحله
چي بكل سالفتي اسمچ كمت اجيبه
العبدچ الماله بخت لو ما نحيبه
_
چوي گلبي بنار حزنچ..حته لا انسه المُصاب
ومن اغمض كون اذكرچ..رسمي جوه اجفوني باب
انطيني بس اليرضي گلبچ..واخذي ريعان الشباب

يا واهس اسوالف علي يا فرحته وحزنه
بس دمعتچ بيها طعم ما ينشبع منه
افرح دمع احزن دمع وبالدمعه اتحّنه

وما اريد اُجره
امن شوكت يُستأجر الحب للحبيبة
العبدچ الماله بخت لو ما نحيبة
_
وين ما موجود مجلس..مشّي روحي ابلايه راي
وريت ارد لبيتي مُنهك..و تخط دمعاتي وراي
كون كلشي بعيني رايح..وبس حزنكم يبقه جاي

دمچ تناثر عالترب و گلبچ يلم بينه
ما مره منطينچ ابد وبس انتي تنطينه
مدّت امصلاية بعسر مدينه ايادينه

حرگه انطيني
خلي گلبي منچوي وزايد لهيبه
العبدچ الماله بخت لو ما نحيبه
___
من ضجيج الناس يعله..بصف هدوئچ سكته اروح
ساعة اشعل شمعه واصفن..ساعة الطم ساعه انوح
گلبي چن اضماد صاير..عيشتّه بس عالجروح

وصرتي جواز لكربله و بذكرچ نسافر
وابنچ نرسمه ابلا ذبح من نرسم العاشر
لو ردنه نرسم مهرته ما نرسم الحافر

ونرسم الخيمه
وبالرسم منخلي زينبكم غريبه
العبدچ‌ ماله بخت لو ما نحيبه

اليطلب اللحن👇👇
@Mustfa2k

#دكة_ونص_شور
لسيد العشق

اول مره حب وكره ضل بيه
باب الكاسر امن ضلوع جوريه
كرهته وعالمك خلاني اتغير
واحبن طاري بيبان الحسينيه

وبداخلي يابوعلي امنية واحچايه
معروفه كافور وجفن بالكبر ويايه
بس انه خلولي ترب من جدم مشايه
ايها الغريب ايها الغريب
_
ندري الابو كل حنيته لاودلاده
بس انته التحن عالخدم كالعادة
طبع الشيخ ما لفاهه كل الناس
بس انته تلفي العام والساده

كل المشايخ لو حچوا ينكسر محچاهم
ورغم انته ساكت سيدي احچ‌ايتك فوگاهم
شكد طيحولك وانته ابد ما كاعد وياهم
ايها الغريب...ايها الغريب
____
برداً كوني يا نار اقره هالايه
حسب فقه النواعي وفقه القرايه
يعني الله بدّل نار ابراهيم
بحطب وبنار موكب مال مشايه

والخادم المر بضرف يلگاك تچايه
كل هاذ سويته الي احجيلك حجايه
لاجلك اسوي دنيتي من اقرايه لقرايه
ايها الغريب ايها الغريب
__
كأساً زنجبيلاً نسُقى بالجنه
وشراب الكاس كلش زين اعرفنه
شراب الكاس اقسم چاي مشايه
وبس اليدخل امطين شرب منه

طين الترب اقدس دوه للمحترگ گلبه
واليلگه روحه بمجلسك يعني رضه ربه
الما مغتربلك سيدي عمره خلص غربه
إيها الغريب إيها الغريب
_
عشيّق النبي ليعشقه صبح ديته
والرابي بمجالس يعني تربيته
خرز سبحه ويطشرنه الوكت ونطش
ويرد يلمنه كلنه باربعينته

اجتافي وكبرتي وهيبتي من زاد موكبكم
غرگت مراكب هالخلگ وضل يمشي مركبكم
يهل المراجل والهلا امچلب بشاربكم
إيها الغريب إيها الغريب


مصطفى صادق اللامي
@Mustfa2k 👈👈 اللحن

مستعد اخسرها كلها حته اربحك
ليش اصاحب ناس تتچه اعلرمحك
الليله راح اسهرلك وابدي اقرر
(لوجرحلك گلبي لو ابقه اجرحك)

كون ما جامل بدمعي...لو احب لو ما احب
ليش اضحك لليكرهك...وانته بعدك منسلب
اخذ گلبي ويه ضعنك..بلكت الله وينهب

هاك عيني ووكت سهمك بيه شوف
انته جرحك ناس مو جرحك سيّوف
من اسولف بيك كون اعرف شگول
گبلي هم غدروك يحسين بحروف

اخذ ناسي انطيني دمعك
انطيني بس الجاسه ضلعك
كافي اسمع حچي العالم
ارد اگضي الباقي اسمعك
________
گمت احسك بس وجه ماتنطي ضهرك
ما اريد ادعّي بيك انوب اخسرك
ما اريد باسمك امشي وگلبي اسود
العطش هم جان بيك واخذ عمرك

اسري بيه بسمه حزنك..خذني يم سابع دمع
كون اوصل يم خيامك..قاب قوسين وضلع
ووين ما گلبي اطشره..بگصب نعشك ينجمع

كون اصاحب غربتك واندلهه وين
الما نطالك گلبه ما انطيله عين
الما يقدر الحسره من تطلع عليك
شامر احجار اعلضعنك يا حسين

اخسر لخاطر رقيه
اقرب الناس العليه
الدنيا ملك الري حبيبي
ولو محبتك لو امية
__________
وين ما غثتني ناسي اذكر رحمتك
عيني ضيگه ووسعت لخاطر دمعتك
كافي افتّي بخدمتك حته ارضي روحي
كون اقرر لو مزاجي لو خدمتّك

گصب نعشك فييّه فوگي..وانه جواه بس نسيت
وياهو حارگ بيته گبلك..حته يكتب جرحي بيت
طلگتلك شاعريتي..وجية امجدي اجيت

هواي ناسه الحر قبل ما تاب ليك
وعافهم كلهم واجه يدور عليك
شيلني امن الناس خليني وحيد
شلون ما عبد الله شلتّه ابين اديك

شلون اتوب اسنين اسئل
وجاوبتني جروحي بالحل
الناس متوبلي گلبي
الغربه باب التوبة الاول
__________
من اجامل بيك معناها غدرتك
والدليل الماي جامل على شفتك
كافي اهم لحچي الناس وانسه حچيك
خل يكرهوني ولا اخسر محبتك

راح اغربل گلبي كلش..لحد ما اصفه بقرار
انته تخطب بينه كاعد..وكعدتي بصف الانصار
حدي لليل واعوفك..لو احارب بالنهار...؟؟؟

حسك سعدان التلمه هم اگوم وياك الم
لوجمَل اخذ الليل وابقه بالروحه اهم
كون كل موقف اخير روحي هيج
لو من العافوا الخيمة لو بسعين الزلم

الراد يربح روحه الكم
لا يحط شركه اعلحبكم
خل يخير گلبه ويحب
لو دنيته لو حزنكم

مصطفى صادق اللامي