#الليلة_الرابعة
#يا أم البنين

وين يمه بيا محطه
ضعنك المحروس هسه
حسين من كثرت سؤالي
جدم ما عندي احسه
(السلام على من تورمت قدماها لكثرة السؤال على الحسين)
مو مهم بيه شتغير
المهم عبد الله نفسه...؟

امشي فوگ اثار ضعنك..واندل اثارك حنينه
وحافضه اصوات القوافل..واعرف اجراس الضعينه
يا حسين بكد حنانك ..باجية اباب المدينة

شتسوي المشتاگه..واتدور ماكو حسين
شتسوي المتعلمه..شوف تشوفك بالعين
يالكاصد بضعونك..ضعنك مكصوده لوين
__
هذا ليلي السهراني
نمته لو مثلي سهرته
گلبي مربوط بضعونك
تمشي خطوه اتدگ نبضته
ام اخوتك ماهي طيبه
حسين يمه طيب انته..؟

بدارك واشعر غريبة..شلون بيك وانته نازح
يالكصدت اگلوب خشنه..ابيتك اشجم گلب ذابح
حته الاهلاً من لسنهم..تنحسب هم حجي جارح

يا خيمتنه وفيينه..ناصب گالولي اخيام
ومحترگات اخيامك..تطلعلي بالاحلام
واتعوذ من حلمي..واتعوذ من الشام
____
فوگ گلبي امخليه بنتك
يفرق الليلة جرحهه
بليلة ما بين گمرهه
گلبي خايف من صبحهه
خايفه الدنيا تخلي
براس سيدها رمحها

عصبّت راسي ونعيتك..وعيني ما غمض جفنهه
وطر صبح ما شفت مثله..بعيني سوده الشمس جنهه
وتربتك يم راس بتك..فاض دم يحسين منهه

بمجّان البي تكعد..شعلتلك روحي اشموع
غير اسمك يا يمه..بكعدتنه ما مسموع(حسين)
وين الله ترد سالم..اتشاهدنه ومتنه دموع
____
بنعي ما مر عالمدينة
حسين يمه اسمك نعيته
خبر موتك جان عندي
بدارنه بعينك قريته
وطول هالسفره الطويلة
خبر موتك جذبيته

كون بين ضلوعي اضمك..يمه عن لا يغدرونك
شلون ينطيها گلبها..يمه هاي امتك تخونك
ما مصدكه ابدون اخوتك..حاير اتدير بعيونك

اتدير اعيونك حاير..ومالك ناصر يا ماي
كالوا تحجي وصوتك..ما يطلع يا مولاي
ما راح انعه اولادي..انعه اعلحوالك هاي
__

اللهم عجّل لوليك الفرج

#الليلة_الرابعة
يا أم البنين

بموادع ضعن هاشم..دمع كل الضعن سايل
ويودع امه مشه العباس..وتكله ابعد يبوفاضل

ارد اواسي بكلشي واولادي انذور
ولو تجي تودعني لا ما معذور
مستحة امن حسين وتقبلها شلون
مالة ام تودعة ويضل مكسور

خوفي حسين..يذكر الصابنها
وماله اوادع..وماله ام يحضنها
..........................................................
شلون تريد اودعنك..شگل لفاطمه الزهره
وانه اللا منكسر ضلعي..ولا عيني بقت حمره

يمه نار بگلبي شما تدنه اتزيد
يمه روح امودع بس من ابعيد
بيمنتك أاشرلي بس عندي اشروط
لو يرد ضعنك ما ترجع هالايد

يا عباس..ارد اواسي بكلهن
وجفك هاذ..يمه جان اولهن
....................................................
روح ولا تخلي ام عون..يم اي بباب تتنطر
تره بوب الخيام اقماش..حرگتهن تصير اكثر

انه بنت احزام وصرت انته حزام
أنه مأمنه بزودك يا راعي اخيام
بس ييمه البوب تخوفني اهواي
خل كلشي يصير ولا باب الشام

يا كفال..ام واحشمك انه
الا الشام..يا خشب بيبانه
.......................................................
بسرعه اتوكل لضعنك..قبل لا يكبر البسمار
قبل لا يكبر ويصبح..رمح مسموم حاد وحار

يمه هم بحسينك حضرولة ارماح
ورگبتك حضرها لسيف الذباح
روح يبني مودع بس رد مذبوح
حته يا عباس گلب امك يرتاح

رد مذبوح..وذمتك ابريهه
الله وياك..من بعيد احجيهه

#الليلة_الرابعة
يا أم البنين دخيل وفائج

مو ام لا مرت والد..عشت وياك خدامه
يا لذة عبوديتي..كلبي لسلمك اسلامه
شهري الما اخدمك بي..ما معدوده ايامه

گلبي يشرب من حنانك..يالتعطشك مشرعة
اختصر عمري بنضرتك..أنه وولدي الاربعه

يا مولاي
الله حقق امنياتي..من علي اختاراني مرته
ويا حسين وكل دعائي..بنص صلاتي يخصك انته
ربي ما ريدن اجيبن..ولد ما يحضه بخدمته
.....................................................................
طبع كل بدوي ترحالة..وعكست انته الطبع بيه
السفر ما گمت احبنه..عشت جو العبودية
ونسيت اسمي الكُلابيه..صرت هسه الحسينية

واليعيش بجو خدمتك..ياهو يكدر يوصله
يا حسين الحب عذابك..مدري ليش اتدلله

يا مولاي
العلى امحبتك گلبه قابض.. كالذي قابضله جمره
ووقف صار الكم حليبي..يصير خادم ياهو اكبره
والينسبونه الخدمتك..يجل مقامة الله ويقدره
.......................................................................
قريت بسوره الاخلاص..وصبح الاخلاص امنيتي
وحقق امنياتي الله..وانطاني اعلگد نيتي
بالسورة اربعه الايات..واربع ولد ذريتي

الله گدرني ونطاني..لضهرك اخوان وحزم
وسيدي مقصره اعتذرلك..عندي بس اربع زلم

يا مولاي
قل هوه الله هوه احد..وانته الاوحد لله دربه
والمثال اعللحجيته..لليحبك راح اضربة
الله ما يقبل صلاته..الما يحط كصته اعلتربه
...........................................................................
دليِل العاشگ النية..اغمض عيني واندلك
اليدورك كون ينسه اسمه..وسحگت اسمي أنه لاجلك
الغاية والوسيلة انته..اليريدك بيك يوصلك

على ولدي بسمك انعه..يا حسين امن المهد
سيدي الجرب دمعتك..ما يفارگهه بعد
يا مولاي

ضحه ابراهيم بابنه..ويذبح اسماعيله صرّح
وانه احب وردت اضحي..وماكو من التضحيه اوضح
اربع انحور لغلاتك..يا حبيبي بكيفك اذبح

اللهم عجّل لوليك الفرج

#الليلة_الخامسة
يا سفير الحسين دخيلك

بدرب الضعن مجلس عزه جان
وحسين ينعه فراك خوان
عطشان مسلم مات عطشان


من موتت ابن عمه..بدت تنقص زلم ضعنه
الحد ما يوصل العاشر..يبقه الوحده بحزنه

صاح الحميده ومنكسر
واويلاه
طاح الحبيب امن القصر
واويلاه
ودرب البقه درب العسر
_________...
يا دار مسلم نوحي يا دار
ماهي تسر اطروش الاخبار
ما كرمو بكوفان خطار

سدت بابها الكوفه..ومسلم حار باحواله
السفير الهاشمي اتغرب..ويتامه صارت اعياله

مهدوم مسلم منزلة
واويلاه
ذني رسايل كربله
واويلاه
ابن الهلا ماله هله
واويلاه
___________
ربيت خوش اولاد عدك
لحسين كالوا جلمه ولدك
من قبح الله العيش بعدك

منرد لمدينتنه..عزانه ايصير بضعونك
لو بالخيل موتتنه..لو موتتنه بعيونك

ان جان انك بعدك عدل
واويلاه
زلمه اعلزلمه ننجتل
واويلاه
ولمة ذبح لم الشمل
واويلاه
________
لمسلم ضعنهم سار مكصود
وعن مكصده حالت هالجنود
مسدود درب الكوفه مسدود

متغرب گبر مسلم..ما لحك يزوره حسين
رمح زاير رمح باجر..يتلاكون عين بعين

يحنون غصباً عالرمح
واويلاه
منذبح زاير منذبح
واويلاه
واجروح مسلم تنفتح
واويلاه
___________
دار الوكت وحسين هم مات
وسارو مداليل ومضعنات
شوغات مشي الهزله شوغات

كالوا گربت الكوفه..وطاحت طفله من النوك
راس ايلاگي مسبيه..تالي يصير ملكه الشوك

بحبال جفها النايحّه
واويلاه
ولمن نعت مسلم صحه
واويلاه
كلبج حميده شجرحه

اللهم عجّل لوليك الفرج

#الليلة_الخامسة
دخيلك مولاي يابوطاهر

كل ملحمه الصارت دغش..وملحمة مسلم ملحمه
شرارة الطف ابتدت..من شال مسلم صارمه

اول نحر للحب نذر..واول عطش واول ضمه
واول يتيمه ايتيمته..لخاطر حراير فاطمه

مسلم..هاشم يا مسلمها..رد الخيل بدمها..
كض الكوفه ولمها..مسلم
مسلم..حسين والله يزيده..بركان الدم بيده..
سوه كلشي يريده..مسلم

گد ما مسلم عالي الشان..للطف صار اول قربان
تتخورس من يحچي الناس..وابن امه اليطلعله السان
__________
بالكوفه من غار الاسد..بكل بيت خله نايبه
وقصر الاماره شما عله..ينصه اذا كض شاربه

يشيل ايده ما يبقه هوه..اينزل ايده ينجر النفِس
كلهن اگباله اتراجفن..خياله وسيوف وفرس

مسلم..اطول شارب داسه..خيرهم ومداسه
شايل سيفه وراسه..مسلم
مسلم..شراي الدم سيفه..يفرض كلشي بكيفه
ما رد مره بحيفه..مسلم

سيفه خلفة ذو الفقار..يذبح بيهم حار بحار
الما يتحمل چوية صيف..المن يندگ وي النار
_________
الصبّره عالحر والعطش..چي رايح برحلة عشگ
وكرسي الخلافه من ورق..وبنار مسلم يحترگ

عاش السفير الهاشمي..الاسس سفاره فاطمه
قد عبّس وجه العرب..ومسلم شفاهه باسمه

مسلم..من كض بيده اعنانه..حل رزق الدفانه..
ذب الجيش الوانه..مسلم
مسلم..لمّن شاء وكبّر..طگ سنون العسكر..
ضل يعلى اكثر واكثر..مسلم

مسلم من كض بيده اعنان..ضل دمهم فوگ الحيطان
كد ما موت من الجيش..تعبت جفين الدفان
_______
قد قاب قوسين ودنى..من أن يكون حيدره
فارس ينازل هاشمي..ما جابته لهسه مره

حي الله ابو طاهر حضّر..فوگ المنايه معتلي
شكد يشبه بطوله الحسن..شمره اديه شمرة علي

مسلم..وارث خزرة حاجب..عمه الاسد الغالب
عليُ ابن ابي طالب..مسلم
مسلم..شكد حاطوه اذيابه..بس صفاهه الغابه
خزرة وسيف اصحابه..مسلم

من هاشم ويطب اعناد..يصيد الصيده اوية الصياد
يگلب الجيش ايمين اشمال..معزب ويگلب بالزاد
________
اضماير الغابة اتلثگت..والضبع كض كرسي الامر
يا زلمه ترضه امروته..تغدر حياية بالصگر

دارت رحة الدنيا عكس..وفوگ القصر شامخ بقه
شرط اليضحي من گلب..وهالشرط مسلم حققه

مسلم..الكوفه كوفة جده..وضل تاليها لوحده
الگلوله اقدم ضده..مسلم
مسلم..الناس اعيون اتراقب..وهوه الوحده الحاحب..داخل ليها محارب..مسلم

اشما رادو وشميريدون..عالحاجب ما تعله عيون
مسلم نجمه بگلب حسين..من النجمه شيلوحون

#الليلة_الخامسة
دخيلك يابوطاهر

وانه اعللسطح يحسين..صحتلك بيه ما بيه
القصر الما رحم مسلم..ما يرحملة علوية

حسين قصر الكوفه ما يرحم خدرنه
وانه أمجرب هالمصيبة
ارجع ورجع اطفالك والعلاوي
واسم زينب لا تجيبة
مثل ما صرت الغريب بهالمدينة
زينب تصير الغريبة

ويلاه..تجي يغدرونك
ويلاه..بضمه يلاكونك
ويلاه..ابقصرهم تالي
ويلاه..نساء اضعونك
..............................................................
رد رد يا بعد بيتي..نيتّهم يذبحونك
سفيرك عطش ما روو..وما ضنهم يروونك....؟؟

جنت انه اول ضحية لهالرسايل
وماكو مي خوية وراهن
وانته جم ام جم مرضّعه وياك جايب
يجف لبنهن من ضماهن
حسين بس توصل يعطشولك رضيعك
وحرملة اسهامه اشتراهن

ويلاه..واليعطشونه
ويلاه..ايتغير لونه
ويلاه..واليريد الماي
ويلاه..بذبح يسگونه
..................................................................
ثقتك وانه ابن عمك..وصحتلك لاتجي باجر
انوليت وخاف يولونك..ويبقونك بلا ناصر

وحدك تصيّح الا هل من مناصر
وحجيك ايكطعه ذبحهم
مسلم وضگت الخيانة شلون مره
جسمي طايح من سطحهم
أنه اباب الكوفه باجر راسي ينحط
وراسك حسين برمحهم

ويلاه..اليزيد جرحك
ويلاه..تهزهز رمحك
ويلاه..خواتك يبجن
ويلاه..واليهز يضحك
........................................................................
خذوني اعللسطح وانه..كلت شيّرجع الايام
اذا ترحمكم الكوفه..ماترحم سطوح الشام

حسين مو للنضر علويات هاشم
ماكو اعظم من سترهن
خوية كلما تقترب يگرب سبيهن
وخايف يفگدن گمرهن
بس مشيئة الله هيج يصير بينه
وربك اليحفظ خدرهن

ويلاه..ضعنكم هاشم
ويلاه..يرد مو سالم
ويلاه..غريبة اضعونك
ويلاه..وغريبة الوادم

#الليلة_السادسة
من حيلكم يا انصار الحسين

بليل امس انصاره يمه
وحرسوا امخيمه
وهسه ميته انصاره ميته
وحده ابن فاطمة
غربة واخيول ومخيم
كله صابه الضمه

بهداي بهداي المصايب
مو هيج يا فركه الحبايب
بالليل كل اصحابه يمه
وصار الضهر ما ضله صاحب

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
________
ضهري منه احزامي طايح
ويا نعمتي انجفه
ليش اصيح وماكو تبشر
كعدو يهل الوفه
ليش انادي ومحد يرد
مو طبعكم جفه


ماله ضهر ما عده عوان
دار الوكت بحسينكم خان
الراحوله مو حي الله انصار
شجعان  حركوا كلبه شجعان

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
__________
ضل يدير بوجه حاير
عن شماله ويمين
والمخيم كله ينضر
للحسين الحزين
يا حبيب اكعد حبيبي
وحدي مالي معين

ونسوانه صدت ليه محتار
ينخه بنصاره وسكته الانصار
شما طولت هالسكته يصحاب
من خيمتي تتگرب النار

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
__________
مو ضهر بعيونه جانت
بعينه ضلمه الوكت
بمتنه دم اصحابه باقي
وعالنهر يلتفت
محد يقدملة خيلة
وقدمتّه الاخت

زفكم سوه عريس عريس
وافراگكم ما يخطي ويجيس
هاي الخلك جابت هزيلات
تكعدون لو تتبدل العيس

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
___________

اللهم عجّل لوليك الفرج

#الليلة_السادسة
من حيلكم يا أنصار الحسين


خافت وصاحت زينب بشجون
اخشى عليك اخي فرار خؤؤن

هلا اختبرت القوم في نياتهم
ان يتركوك اخي بغير معين

فاجابها اختاه لم ار مثلهم
يستانسون الى المنية دوني

زلم يستانسون بجية الحتوف
يزينب كالوا بوكت الحرب شوف
بركبنه تنعمي شفرات السيوف
ونواياهم مثل شيبي العليه

اترجيتهم يرحون امس..وغبّشو يخوية اعللذبح
يتسابگون اويه الشمس..اول منو يفز الصبح
كتلهم ارماح وسبي..وكالوا رمح يسند رمح
الموت اويه ابن بت النبي..نصر من الله وفتح
___________

نادى حبيب اين ابطال الصفا
او ما سمعتم قول بنت المصطفى

اليوم لانبقي لحرب امية
راسا ولانبقي هنالك مرهفا

فتطالعوا بين الخيام ضياغما
فرآهم قمر الهواشم واكتفى

من دوي العبادة بضلمة الليل
لنغم سحب السيوف وعجه الخيل
ما شايفلي سيل يحزم بسيل
وتبسم كافل اخته الهاشمية

اتحزمو ركضوا صيحو..من الكصص مدري شنزل
عباس واكف يستمع..واصواتهم باذنه غزل
ويبتهل گلب الطاهره..لو گلب كافلها ابتهل
كلالهم موت وحرب..كلوله احله امن العسل
_________
اليوم يوم تسابق الاصحاب
يتسابقون الى عناق حراب

يتقحمون الى الوغى فكأنما
اسد الشرى غارت لصيد كلاب

جعلوا رؤؤس امية كذيولها
مجرورة تبدو بغير رقاب

عكارب ال اميه وروسها ذيول
ومثل ما جيشهم دك بيده الاطبول
دگت روسهم دگ هاي الافحول
هلا بجيثومها الخانگ اميه

مشيتهم بذاك الصبح..مشيّت النار اعللحطب
ركضو على خشوم العدو..وجمّرو واشتد الغضب
صياده البر سلطنت..غيّمو والجيش انرعب
اتلاكو متن يسند متن..وارتعدو ومطرت رگب
_________
حتى هووا بالطف بين طعين
مفلوق هام اوقطيع وتين

مابين شبان كأقمار الدجى
او شيبة كالشمس في التسعين

كانوا يريدون الفداء وقولهم
دون الحسين أيا سيوف خذيني

ضحاية امسطرين تشوف العيون
وفوكاهم حداد اسمر وجه جون
بمذبحهم نشيد العشك يقرون
حب جتال حب ابن الزجية

لا بيش لا رادو سعر..لا سيدي النه شتحط
حب وانذبح حب وانذبح..هذا العشك ما بي شرط
لا لون لا دين وعمر..المهم كلبك يرتبط
ياليتني بهالمنزله..وبس منزلتهم تنغبط
..........
فرآاهم المظلوم فوق رغام
ناداهم هل تسمعون كلامي

ياعابس ياجون اصحاب الوفا
ماذاك يا احباب وقت منام

انا منفرد والقوم الف معسكر
واحير بين قتالهم وخيامي

وراكم من ادي هم راح عباس
وتره بحسينكم ثكلت الانفاس
الا من ناصراً صيحت للناس
اكعدو الناس ما بيهم حمية


يا صحبي من كد الضمه..يقل شوفي بعيوني بده
حسين التعرفونه ذبل..سبعين الف والوحده
اخيول ومشاعلهم علت ..وتالي الشرك حاط النده
تسمعوني ..؟لحكو اعللخيم..لا توصل اخيامي العده

الفصيح
سيد وائل الهندي
الشعبي


اللهم عجّل لوليك الفرج

#الليلة_السادسة
بأسم انصار الحسين روحي فداهم
لمولاتي رقية مُدللة الخيام

سكته الدمع جان..وسط الخرابه
وفزت رقية..صرخت يبابا
وتصيّح
وين حسين وين حسين دلوني
وتصيّح
للعطشان للعطشان ودوني

اخره شوفه اله عطشان
شفته بالخيام يلوع
ما دام بعيوني الماي
جيبو خل اشربه ادموع
بناتك يا حسين تنوح
بخرابة وصوتهن مسموع

بوية اكعد كابلني مشتاكه اهواي
اشرب ماي عيوني يالمالك ماي
انته الخير وعايش ليش بحرمان
بابا بابا بابا عطشان
__________
بحضن العقيلة..تبجي السبية
تحجي بحلمها..لزينب رقية
واتفسر
عمتها عمتها هالحاله
راح يمر
راس حسين راس حسين باطفاله

خرابة وبيهه راس ينوح
تفسير الحلم يقهر
خن نفرش عبي بالكاع
ونهلي بأبو الاكبر
اخر كعده بيهه حسين
عكب هالكعده نتطشر

ينقص ضعن الساده علوية اليوم
فوك الراس وطشته ايطيبلهه النوم
بدمعتهه اتبخ شفته وراسه الذبلان
بابا بابا بابا عطشان
________
كل اب يسكت..بجيتة بناته
وحنية حسين..حته بمماته
اتعنه الهن
ما يمشي ما يمشي بنص طشته
وسكتهن
بس تفرق بس تفرق هالسكته

هاي السكته سكتت موت
بعد ما تحجي هالطفله
دارت روحها اعللراس
مشتاكتلك تكله
كلبها ما تشبها اكلوب
كلب والشوك الي يكتله

ايسكت صدرك ابنك عبد الله هناك
وراسك سكت بتك ماتت فوكاك
يالمجوّي امصابك حته الرضعان
بابا بابا بابا عطشان
__________
تكتلني يحسين..هاي الرجولة
بطشتك تشيع..موت الطفولة
بنص طشتك
واتشيع واتشيع دمعتها
وتوصي
عالطفله عالطفلة عمتها

ناس الشام مو لحسين
ولا هالكاع مالتنه
زينب خوية كلشي يصير
موتي يم رقيتنه
بدلنه الخيم بجروح
وحطينه بخرابتنه

زينب حضري ابنيتي وخليها تنام
الوحدهه هالطفله ما تحمل شام
ما تحمل هالغربة وهذا الهجران
بابا بابا بابا عطشان
_________

#الليلة_السادسة
من وفائكم ساداتي ارزقونا الوفاء



عيش كل يوم بحياتك..جنه اخر يوم خدمه
وماي لا يوصل جمرتك..جمرتك يا كلبي ذمه

دنيا هاي
الموت بيهه ابلا وكت..
وتبدي تحصد شزرعت
وتبقه بس ذكرى وصور

دنيا هاي
والزرع دمعه حصد
بحضن ابو الاكبر كعد
ويحضر بدفنة الكمر

اؤمن يكلبي وابچي لمصابه..تالي مصيرك جوه الترابه
يشفعله ياهو وياهو اليحضره..المامؤمن بدمعات الخرابة

كلشي يموت وكلشي يروح وتبقه دموع العين
وين يضم وجهه امن الزهره الما باجي اعلحسين
__
هواي ناس تموت عدنه..وقلة يبقة بخير ذكرة
وقلة تنخط فوك اسمهم..خادم الزهره اعلگبرة

ما يفيد
لا خليل ولا صديق
بعينك يضيگ الطريق
وكلشي ليحيطك ضلام

ما يفيد
والعمل يبقه مصير
اوية الحرك خيمه تصير
وي اليطفي الخيام

شكد تبقه عايش تاليهه تخلص..امن املاگه ربك ما بيهه مخّلص
تلاكي الاهك كون بدمعتك..يا كلبي لين لموتك ترّبص

شجابه اللاكه الرب بحدقه اوية الناس الباجين
وين يضم وجهه امن الزهره الما باجي اعلحسين
__
خلي يا كلبي طموحك..تموت باجواء العزية
مو بعيده النشغه تكتل..نشغت وماتت رقية

ومايموت
واليحب لا ما يموت
دمعته لمحبوبة قوت
يعيش وي ناعي الجرح

ما يموت
الحبه صادق يبقه ضِل
ايكاسر شموس الهزل
وكل محرم ينذبح

دنيا وابد ما بيهه سلامه..يا گلبي اشري حسين وخيامه
وادعي بحصيرة يشيعوها جثتك..شيهنه بحياته السلبو امامه

باجر ينحط كلشي ونوكف ونتجازه اعللزين
وين يضم وجهه امن الزهره الما باجي اعلحسين
__
اتذكر الطفله العليلة..وخل يموّتك انتظارك
ممر هاي الدنيا النه..وبيدك تحددها دارك

بين اديك
اختار يا دار التريد
حسين واحبابه العبيد
لو جنهم والضياع

بين اديك
لو تصيره بخيره لو
تاكل امن ايد العدو
وتنحشر وي لتباع

سل سيفك لضعنه وتاني ثاره...حب جرحك وبلكي اتطفي ناره
المن وقارك والي تحبه..بسيف الاعادي شيبة ووقاره

والما ذب روحه اعللخدمة باجر يوكف وين
وين يضم وجهه امن الزهره الما باجي اعلحسين

#هذه_القصيدة هدية لروح الشاعر
#زيد_عدنان_الزيدي

اللهم عجّل لوليك الفرج

#الليلة_السابعة
دخيلك يا عباس🙏

عباس
اتعطل عليه
عباس
جن ماله جية
عباس
راح امن اديه
خوية

الرايحلة ضهره ما يستراح
بوية العطش صوتي اطفالي صاح
وكلبي ولا مرتاح

نار العطش ما تشبهه نار
عباس اصيح وتهده الصغار
بأسمك اسكت الصاح

اليجيني يريد الماي
اكله شوي وجاي..اخوي اليسكي

اسكت اطفالي بيك
اسكتهم وابجيك...وانوحن حكي
________
مكسور
بالخيمه اتاني
مكسور
شو ما اجاني
مكسور
ومرت باذاني
خوية

الخوية الاخيره والاولى هاي
نستني هاي الجلمة ضماي
يا خوية روتني

ردت انه ابشر ام الدلال
عباسي خوية بلسانه كال
وادركني ذبحتني

اخوي ينادي شراد
اجيت لصوبه و هاد..شلكيت احوالة

الكبل بعيونه اخيام
لكيت بعينه اسهام..كفيل اعياله
_______
يا ماي
ساگي خيامي
يا ماي
رديته ضامي
يا ماي
ما ضلي حامي

راح انه الم المي يا فرات
لتبده من جود الامنيات
ومايك ارده اعليك


مايك ارجعه ورجع الكفيل
وديته ضامي وردلي قتيل
ارحم اخو يحاجيك


اردلك كل الماي
واريدن منك هاي..ترد جفوفه
مشه مني وعطشان
رجعلي ابلا ذرعان..وبناتي تشوفه
_________
رديت
بالممشه مايل
رديت
بس دمعي سايل
رديت
ما عندي كافل


جبت الدرب اتعثر واميل
شلون انه اگلهن مات الكفيل
بلساني ما تنكال

صحت العلاوي التمن علي
وكمت انه اطيح الخيمه بدي
كافل خدرجن شال

توسطت النسوان
نعيت اعللخوان..بجيت ايتامك

يمن طحت ابلا ماي
اطيّح بيدي هاي..عمود اخيامك

#الليلة_السابعة
يا قمر بني هاشم مدد مولاي

اخر فارس وخيال
من ضهر المهر شو مال
وضهر حسين صار اهلال

طاح ومحد اتلگاه
على العباس واويلاه
_______
ضهر حسين هذا المات
وفيّ اخيام علويات
طاح وشمتت الشمات

المخيم ياهو ضل بحماه
على العباس واويلاه
________
اخر هاشمي ورواي
واخر جربة للسگاي
ترسوهه عطش مو ماي

طاحت جربته والواه
على العباس واويلاه
________
مجبل للضعن بس نوح
كافلهن وراح يروح
مذبوح الوصل مذبوح

يسوه الرايح الاحاه
على العباس واويلاه
________
بس غمض عيونه ونام
ما ضل جف يحامي خيام
وطلعت عين لاهل لشام

وطلعن من خيمهن اه
على العباس واويلاه

اللهم عجّل لوليك الفرج

#الليلة_السابعة
يعباس العطش💔

يعباس العطش..العطش يا ساگي الخيام
يعباس العطش..سمعهن دمّع وگام

كض الجود بيده وباوع هواي
وحته الجود يابس ما شرب ماي
يبجي وبيده رمحه ويمي اجه وگال
خوية ارخصني اخر حمله الي هاي

خوية..بجه عباس كدامي
خوية..وشمرت بدمعتي احزامي

يا جيشي  وحزام الضهر..بس تمشي اعيشنه الضياع
يا سكنه لتصيحن عطش.. صيحن يعباس الوداع
..........................................
مشه احزام الضهر..واحس بضهري ميله
اخو يكفل اخت..ما ضل للعقيلة

العطش بالخيمه يعله صوت الاطفال
بطه العباس عني والضهر مال
يا عباس كاسر ضهر الخيام
يا كسرة ضهرنه المالها اعدال

خوية..بس تبطي اكثر وترحل
((خوية..نوك ضعوني تتبدل))

اسمي اختي سر ما ينحجي..واسم اختي من تالي يُشاع
يا سكنه لتصيحن عطش..صيحن يعباس الوداع
...........................................................................
بالاخيام انتظر..وعلى اذني احجاية مرت
اخي ادركني اخي..واباوع لاختي كبرت

بأول خوية منك شيّب الراس
وطلعت اركض واوخر الخيل والناس
قهروني واجيتك هاد مكسور
يا عباس اجيب امنين عباس

خوية..من الخوية ارد اشبع
خوية..احجي روحي لا تطلع

صيحلي خوية ارد استلذ..يا خوية قدر المستطاع
يا سكنه لتصيحن عطش..صيحن يعباس الوداع
............................................................................
تگابلنه بچي..وضامي يشكي ضامي
يكسران الضهر..بعد ضاعت خيامي

جبت جفينة وبهيده حضنته
وقبل لا اعوف اخوي بعينه بسته
وگلي بالنيابة شوفلي اختي
البعينه سهم ميشوف اخته

خوية..اوكف واوكع وبلكت
خوية..تعين اجدامي ما تثبت

لمن طحت يابوالفضل..ما ثبتت اجدامي اعلكاع
يا سكنه لتصيحن عطش..صيحن يعباس الوداع

#الليلة_السابعة
يا عين الزهراء اصنعني للزهراء🙏


هجيني جرحك..من الالف لللياء
ربيني عاشوراء..اصنعني للزهراء
بجفك يساقي

عين أنته الها..علملي هاي العين
تمطر على الخدين..وبشوفي كون حسين
بس هوه باقي

بمتاهات السنين انضيع مولاي
وانته التنتشلنه بكل متاهه
شدة وما تحلهه انته اشد هاي
اضل فشلان كل عمري وراهه
ومن تحلّي شدّه اتباهه عالناس
أنه العباس حاضرلي و گضاهه

يابوفاضل مشتهي اعمه..حته تمسح على عيوني
ومشتهي يسكت الساني..حته أنتم تحجّوني
كلشي بالدنيا امله...وما امل من الانطوني

تحضره الحمله مايل
دخيلك يابوفاضل
_________..
الزم اديه..هالدنيا بيه تكود
وبيه ترد اردود..ضايع أخاف يعود
گلبي اليودك

جرة جربتك..من بيهه تاخذ ماي
خُذ روحي يا مولاي..أامنلي من دنياي
دمعاتي عندك

يامن تأمر وتنهي على الماي
فجّر عين گلبي وخلهه تجري
انضر ليه صح ما استحق هاي
بس الناس احب عباس تدري
اقبل گدري ينقص بين الاگلوب
ورحمتك مارضه يقللها قدري

انته ما تخطي رحمتك..صيبني وروحي اشتريهه
وخلني كد كلمة أحبك..من (أحبك) احچي بيهه
راح اصرّح بالأحبك..حته أحب واكدر عليهه

أحبك حب يكافل
دخيلك يابوفاضل
___________
خضّر عطاشه..بنص روحي يا منان
بيه التصحر بان..أنخه بگلب ذبلان
الشفه الذَبوله

اختم ثباتي..وأسجني بيك ارجاك
امحلفك بأخت تنخاك..متگاسمه اويه اضماك
يابو الرجوله

جمر رمل الضهاري بيوم عاشور
وحيرة طفلة عمهه اعللنهر طاح
لهسه يمر مصابك بيه مولاي
واسمعنه قصص ما عايشه اجراح
الراحة البيه اكتلها يعباس
مرتاح انته حته المثلي يرتاح...؟

ارزقني لو بس جمره منك..ومو قليل انته قليلك
مو قليل ابلا جفوفك..سيدي امرجف جبيلك
ومو قليل الجنت ضهره..ينكسر ضهره برحيلك

جمر احزان سائل
دخيلك يابوفاضل

اللهم عجّل لوليك الفرج

#الليلة_السابعة
عباس نحن بحماك🙏💔

يابوفاضل اشكي يمك..من مُضلات الفتن
يابوفاضل ارد احبك..وفرصة ما ينطي الزمن

الزمن ما خلالي فرصة..ابخلوتي الوحدي اذكرك
وانته الافضالك جبيره..ساتر الخدام سترك
انته اذا منطيني كلشي..سيدي جا ليش اهجرك

شفتك وطن شفتك عطف شفتك رزق تارس ادي
يجرني الوكت حته انفضح وجفك يجي ويستر علي
وكت العطش صحره الگلب واسمك يمر بگلبي مي

زائل كلشي اخلاف عيونك زائل
اللهم اشغلني بذكر الكافل
_________
المجلس الفرصة الوحيدة..الگلبي بيها يطمئن
وابدي اشكرك وابدي احبك..وابدي انعاك بحزن

الله لا يحرملي گلبي..من كعدتة بتعزياتك
الله لا يحرمني دمعي..اليهل وي طاري بناتك
وما اريدنهه امنياتي..لو تعارض امنياتك

بغير العزه ما حصلت فرصة لمحبتك و الذكر
ساعي ابجي حب ساعه انفجع ساعه ابجي دمعات الشكر
اتوسلك كون الگلب يبقه بعزائك مستقر

غافل لا تجعلني بحبك غافل
اللهم اشغلني بذكر الكافل
_______
گلبي ميت يابوفاضل..وبالنعاوي صحوته
گلبي عيشة بس عزية..لا يرد لموتته

حال حبي وياك يبهت..لو علي تبعد نضرتك
ما اعرف اسباب ضعفي..بس اعرفك كافل اختك
ياهو التريده تغيّره..وحاشه يخطي بيوم بختك

مهما عضم ذنبي وكبر من ذنبي اكبر رحمتك
لتخلي مهرب للگلب حاوطني بس بخدمتك
غرگني ربحان الغرگ من البواچي ودمعتك

هامل جفني بحبك خلي هامل
اللهم اشغلني بذكر الكافل
_______
كل طلب مالي بحياتي..لو لدي جفك لزم
طالب جفوفك تجرني..شما تزل هاي القدم

بلا موعد ارد احبك..وليل ميمرني بصباحك
بعالمك عيشني دمعه..وابجي وي كل گلب ناحك
كون ما يشغلني واحد..وكافي اعيشن بس سماحك

ما استغل لطفك علي كون امشي وي لطفك أدب
اليتعاقب امن ايد الگمر موته عليه يعني انكتب
كون ابقه خايف وانه احب الخوف لدوام الحب سبب

سائل خوف وانته التنطي السائل
اللهم اشغلني بذكر الكافل

#الليلة_الثامنة
لايذ من وكتي بطولك يبن الحسن🙏

ويلاه ويلاه..يمه قاسم جيتك
ويلاه ويلاه..انته شمعه بيتك
_______
اااه..يمه يا جاسم
هاي اول ليلة ليه ثكلى مفجوعه
أاه..وأنه بعرس ابني
شعلو الخيمه علي ما شعلو اشموعه

يا ضامي وشفافك زرگ..يمه
بخور العرس ريحة حرك..يمه
شوباشك الحضرته الك..طايح
وحدر الحوافر منسحگ..يمه

ويلاه ويلاه..بلبن حلفتك
ويلاه ويلاه..بكثر ما كمطتك
((ويلاه ويلاه..جاسم اتلگه امك))
.............................................................
اااه..يمه يا جاسم
غافلت حراسهم يم الحرگ رديت
اااه..ام واريد افرح
جاي ادور حنتك ادريك متحنيت

حنتّك برماد الخيم..راحت
بالگوه بيها انه الم..راحت
لميتها واتوجهت..صوبك
ريحة حرگ بيها انه اشم..راحت

ويلاه ويلاه..يبو عيون الجنه
ويلاه ويلاه..الك حرگوا حنه
((ويلاه ويلاه..جاسم اتلگه امك))
.....................................................
ااه..يمه يا جاسم
دنيا ليل شلون اعرفك انته مو انته
اااه..محبسك جبته
ويمه ما بين الجثث محبسك كدرته

وجف شفته طايح خنصره..ضايع
ويوليدي گلب امك تره..ضايع
ارحمني شيل اجفوفك..اتحرك
بين الجثث جدم المره..ضايع

ويلاه ويلاه..اتلفتت وانه امشي
ويلاه ويلاه..الليل ياخذ كلشي
((ويلاه ويلاه..جاسم اتلگه امك))
.......................................................
ااه..يمه يا جاسم
يمه خاف ا‌لگاك واكثر تكثر البلوه
ااه..واعجّن الحنه
ولاكو ابو لاعم يحني اجفوفك الحلوه

ولا شاب ضل يفرح الك..يبني
خلصوا ذبح خيرة هلك..يبني
يمعرس يطلبك رمح..باجر
ايبدل الحضن الدللك..يبني

ويلاه ويلاه..كل عمامك راحت
ويلاه ويلاه..عالهواشم دارت
((ويلاه ويلاه..جاسم اتلگه امك))
...........................................................
اااه..يمه يا جاسم
راح ارد بالخيل اجوني يا تعب حضني
ااه..خيلهم تفتر
يمه جا ما رجعوني لو وياي ابني

راح ارجع بكسرة ضهر..ويلي
يطلبك حضن امك سهر..ويلي
يالكاطع بگلبي الفرح..يمه
الليل اعله عين امك عبر..ويلي

ويلاه ويلاه..بفشلتي ردوني
ويلاه ويلاه..ولدي متلگوني
((ويلاه ويلاه..جاسم اتلگه امك))

#الليلة_الثامنة
دخيلك يامولاي القاسم ودخيل شبابك😔

يا يمه اللبن وارباي وسهري وتعبي اريدنه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي
_________
ما خلوني افرح بيك ها يكبرتي وضنواي
من حضني لحضن هالخيل ما لحكت الم ارباي
العذب سر الحياة شلون سر ادموعي صار الماي

ها يا خيره الشبان
ذبلان الحِسن ذبلان
جبت اسنيني بيك احجي
من اتوسط النسوان

من اتوسط النسوان احجي بطولك وحسنِه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي
________
شلته ابطني تسع شهور واشبر طولة يومية
بثوب الزفه طالع جان بس اختلفت النية
ذب ثوبه ولبس لحسين ابني ثياب حربية

ما فشل حليبي وگام
من عنده ثلثت انعام
شيّم امه عالنسوان
وگر عيون ابوو جسام

گر عين ابوو جسام من فيض الدمه اتحنه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي
________
ابني اتغذه من احشاي من لب گلبي صار ابني
من دري انفطم جسام ما فاطمته من حضني
ماني امك يبعد الروح امك ليش تهجرني

يبني وما شفت سعدك
ولا شفت الهنه بعدك
جنت امحسبه تملي الدار
يا جسامنه بولدك

يا جسامنه بولدك داري ردت اترسنه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي
_________
شافن يوسف وطوله وخذاهن بالحِسن صفنات
وانته الساحر بحسنك سيف اعداك والشمات
السيف ايغازل بنحرك وانه اتحمل الشوغات

يحلو الطول يمدلل
كلشي ابنحرك اتغزل
احلنّ شعرك بحضني
مو فوك الرمح ينحل

فل اجعودك برمحك شعرك ارد اشمنه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي
_________
السده اعلى امك ولاصاير ولا يسدي اعله حرمه بيوم
اكعّد بيك يا جاسم.. وخوانك خذاهه النوم
البيت اليخله من زلمه عالحرمه يضل مهجوم

مهجوم النزل يا كون
ولا كل الولد يرحون
منو يجابلني بمصابي
اريد اعليكم اعمي عيون

اريد اعليكم اعمي عيون يمه واجلب الونه
بعدك ما يطيب العيش امك بيش تتهنه
يمه الولد يمه الولد يمه الولد يالغالي
ما فرح امك هالعرس هذا العرس جتالي

اللهم عجّل لوليك الفرج

#الليلة_التاسعة
يا علي الاكبر دخيل مروتك

ما كاسرلي احچايه بعمرك..وتالي تموت وتكسر گلبي
انه حسين الاندل كلشي..جيتك بس ما اندل دربي

بوية..تطلع بالگوه امن الساني
بوية..هذا انته الطايح لو اني
بوية..گلب امك بالخيمه ايتاني

ضعت لمّن صحتلي ادركني بوية
وباب الخيمه تيهته ونسيته
لو ما اشرتلي سكنه اختك
جان لهسه حاير ما لگيته

احجيلي كلمه تطيّب خاطري
ابني حبيبي جميلي اكبري
__
جانت راحة عمري عيونك..شيبقالي امن تغمض عينك
لو تفتح يوليدي جفونك..لو تنسد عيون احسينك

يكبر..يا قصة اب عاشگ ابنه
يكبر..يا بسمة كلبي ويا حزنه
يكبر..يا وعدي المنطيك لبتنه


ما يخلف وعد تدري بالحسين..وبأسمك واعدت بتي العليلة
اتجيلك وكوم ووعدي اووفي..ومعروفك ولا انسه جميلة

دمعاتي سري بغيابك تنقري
ابني حبيبي جميلي اكبري
___
ما وخر خدي امن الرملّه..اله تگوم توخر خدك
جرب تخسر واحد مثلك..وشوف شلون الفرگه تهدك

گلبي..وي رمشاتك نبضه ودگته
گلبي..يموت بصفك لو ما بسته
گلبي..گطنه ابنار امچوه وعفته

حصة حضن امك خدك النام..ما ترهم عليه نومه اعللتراب
شيّب راسي من شفت النزف بيك..گوم وخل اردن للخيم شاب

دمعي اعلطلولك ما يوكف جري
ابني حبيبي جميلي اكبري
__
گلي اخر بوية امن السانك..ارحم بيه احچيها واسكت
وانوب الزم گلبي بجفك..واحكم ياهو البينه الميت

يبني..يا كبرة بيتي وذبحوها
يبني..يا سبحت امي وگطعوها
يبني..يا فرحتنه الما خلوها

بمكاني خلي روحك واحكم انته..وشوف السكته هاي شلون تهضم
شيرجعك للخيم تمشي اعلطولك..وهنه البالخيم كلهن گلب ام

بانت فركتك يبوية بمنضري
ابني حبيبي جميلي اكبري
___
شلت الماتو كلهم بيدي..بس حيلي اتفرهد وعيونك
راح انخه بهاشم يالاكبر..بلكت وياي يشيلونك

عونه..بلكي وياي يشيلون ابني
عونه..ماضن اجدامي توصلني
عونه..نومو اخر مرة بحضني

ثالث مرة تطلع روحي وياك..واموت وگوة ترجع روحي يا ماي
ياالاكبر راح اوصي بدفن الاجساد..يدفنوني وعلي يدفنوك وياي

الموته اوية طولك يغالي تنشري
ابني حبيبي جميلي اكبري

اللهم عجّل لوليك الفرج

#الليلة_التاسعة
رجائي وتوسلي بشباب مولاي الاكبر روحي فداه

يم شبابك اشكي واطلب
تغيّر بشبابي
لو علي تمد جفوفك
لو يحل عذابي

الدنيا بگلبي تطلبني..وخدي بدمعي ناكع
واگل للدنيا يا دنيا..بعد ما اعيش ضايع
علي الاكبر اخذ بيدي..وربيت اعللمواجع

گلبي بحسنك كون تذبحه
من هاي الدنيا وخل يصحه
ليش يربي لغيرك جرحه
وانته مصابك حدر الروح

كطّر من ضي وجهك بيه
اشعل جمراتي المطفية
ياهي العدكم ما مسبيه
وياهو العدكم ما مذبوح


أرد احزنلك اكثر واكثر
ادخيل ابابك ياعلي الاكبر
____
ماكو وصفك بقصيدة
ولا يوصفه شاعر
بس توصفك المدامع
التغلب المشاعر

علي الاكبر علي الاكبر..روحي استنجدت بيك
طفل عاثر رفع جفه..انقذه وخل يواسيك
وي عيون ابوك حسين..عيوني تريد تبجيك

حچي الناس يغر امروتك
كون بأذني تسمّي بصوتك
ابختني واجرح مبخوتك
وغذيني دموع وألام

كون اسمع اذانك باجر
بضهرية العاشر يا عاشر
صح مو كدري ولاني الطاهر
بس كدرك مولاي أكرام

علميني ابجيلك حته اطهر
ادخيل ابابك يا علي الاكبر
___
ما اريدن اشكي گلبي
گلبي ما تغيّير
گلبي اريده يشكي مني
وحلها بيد الاكبر

دخيلك يا علي الاكبر..الغلط من عندي مو منه
گلب ابيض رزقتوني..ابيض معدنه وحزنه
بشبابك ارحم البيه..اسود فشله اردنه

مّن يا منان بأحسانك
گلبي اسود لونه بألوانك
ويوسف جرحي ابير احزانك
يتروه وانته بلا ماي

خل جرحي لمجروحك نازف
وابقه بحبك اعمه وخايف
رحت وطف بخيامك عايف
كون تهل دموعي لهاي

بركض اطفالك كون اتأسر
ادخيل بابك يا علي الاكبر
____

أنا لله وأنا اليه راجعون
ولا حول ولا قوة الا بالله