#يافاطمة
#الليلة_الاولى
#محرم

ما عندي اي قضية..بكد دمعي للزجية
ياهو اليهزه كلبه..المتمسك برقية
العاش بدمعته عمره..كل عمره غاضرية

كل اهتمامي بدنيتي..وكل حالي وي حالك
كل غربتي وكل دمعتي..من غربة اعيالك
شما صدلي طير ومنذبح..اتذكر طفالك

بين الركض بين الحرك
عندك برائة تختنك
هذا الصدك يهل الصدك
رايدله بچاية

ركض الكطن فوك الجمر
ركضن خدر لايح خدر
والعنده غيره شيتنضر
ختموته الحجاية
_________
اهِجر شكو مدينه..ما عندي بيها دمعه
اهواي الحچي اليمرني..وبس الجرحني اسمعه
وبالخلوه ناعي اصيرن..وللزهره ابجي وانعه


رحاّل ادور عالجرح..مستوطن بحزنك
خسرني دنيا والمهم..اربح وصل ضعنك
شما هزو اكبالي مهد..يرجعني يم ابنك

توها امه ما تعبت بعد
وما شابع امن امه الولد
بس السهم شو خله حد
لعبد الله ولطوله

لمناغه يبسها الضمه
ورطبها كطّار الدمه
اهل الارض واهل السمه
ينعونه يبجوله
__________
دربي اليدلي كلبي..بجروحي ابقه اقدسه
وكلبي اليبجي عيني..بمنبر نعي احرسه
احرمني من كلشي مهم..بس دمعي لا تحبسه

من دمعي لمصابك نزل..جلوني حته اهلي
وين انطهي وجهي ابلا دمع..وين التجئ گلي
هذا محرم واليحب..نيشان خي يخلي

نيشان اليحبك قهر
شهر الضمه هذا الشهر
المهدي علاوية بخطر
والشام شمّاته

كون الزمن يوكف زمن
المهدي عماته انسبن
راح بأمن هذا الضعن
ورد بجراحاته
_________
كل همي جفني ابدله..ابجفن ابواچي ناكع
للمهدي ولغربته..ولجروحه والمواجع
يومية عده عاشر..يومية عده سابع

كل المصايب والبجي..يا مهدي لجروحك
وجهك تديره بيا كتر..وتنوح مذبوحك
وجود السقايه من وكع..جن واكع بروحك

جود وخيام وعايلة
ودار الوكت بمدلله
وصارت ضمايه كربله
ومي ماكو للساگي

من هدوة الحب للذعر
دورة رحي دار الدهر
حامي الضهر كاسر ضهر
يادمعتي اشباگي

اللهم عجّل لوليك الفرج

#يافاطمة
#الليلة_الاولى
#محرم

بتجارات البشر كلها..تطلع يا گلب خسران
وتجارة دمعة عيونك..لو ربحان لو ربحان

ياهوه تنطي دمعه ويعيشك عمر
ياهوه بس تنحبله ينطيك الستر
هذا الدلال امن ام حسن ما ينخسر

جابتنه لخيمة عزاهه
وانطتنه حب ووجاهه
مكسورة ورايح ضناهه
فاطمة

فاطمي..من منشائي لمماتي
فاطمي تخلص ردت حياتي
___
جرب تنجرح مره..جرب مرة تبجي الروح
شوف شلون مولاتك..منك تشتري الاجروح

شراية اجروح الخدم بس فاطمة
وهنياله كل خادم يهاجر عالمه
يروح بدمعته لعالم اجروح وضمه

السلم بيد الزهره گلبه
بدرب الدمعه يبدله دربه
الترضاله يرضاله ربه
فاطمة

فاطمي..توحيدي نص صلاتي
فاطمي تخلص ردت حياتي
_
اذا دمعك نشف مره..اطلب دمعه لتكابر
اطلب من گلب فاكد..عاش حرورة العاشر

اطلب جروحك من گلب عاش الرعب
مفجوعه بس صبت على اهل الخدمه حب
بيد ام حسن سلم قرارات الگلب

مولاتك ما يهده ونهه
محزونه شثگله حزنهه
اسِعدها بجرحك لأبنهه
فاطمة

فاطمي..بمجلسهه الكه ذاتي
فاطمي..تخلص ردت حياتي
___
استوطن يا گلب جرحك..واحضر كل عزه تحضره
واذا جرحك برد مره..بالك جرحك تعذرة

ضل فاطمي ولحد يغير هالقرار
ما دامه مكسور الضلع ضل بأنكسار
ما دامه خدهه احمر يجرحي ابقه حار

دمعتها بخدها جرّية
كل مغرب عدها عزية
ابجي لأهات الزجية
فاطمة

فاطمي..تقبلني امنياتي
فاطمي..تخلص ردت حياتي

#محرم
#الليلة_الاولى
#يافاطمة

الزهراء يحسين..كل ليل تنعاك
بأحضان امك..مدلول برباك
بتراب عريان..تالي تلگاك

حسين يمه
بين حومة دم اجيت لطولك اركض
حسين يمه
افتح عيونك لأمك لا تغمض
حسين يمه
راح احط ايدي اعله گلبك بلكي ينبض

ويلاه ويلي..ويلي على شبلي
قتلوه..تركوه..في الثرى عُريانا
قلبهُ..اسكتوه..اسكتوا السلطانا
____
مجروح واجروح..فاطم بانت
تغذيك ترويك.. امك جانت
تلكاك عطشان..لا ما هانت

حسين يمه
راح اگطر دمعي فوك اشفاف زرگه
حسين يمه
وين حگ ارباي گلبي يريد حگه
حسين يمه
سهم صدرك حارم الزهراء شبگة

ويلاه ويلي..ويلي على شبلي
عطشّوه..منعوه..من فراتاً يجري
لونهُ..غيروه..بشموس الضهرِ
____
أماه زهراء..اشتاكت تسمع
صوتك لأمك..خلي يطلع
اهلاً گلها..وللسكته ارجع

حسين يمه
هاي اول مره اجيك وماكو اهلاً
حسين يمه
گطعت گلبي وعليك ادموعي صبن
حسين يمه
ارحم جروحي البعدهن دم ينزفن

ويلاه ويلي..ويلي على شبلي
اثقلوه..سلبوه..صوتهُ المحزونِ
للسكوت..اجبروه..ولدي المطعونِ
___
ثوبك محيوك..من جف زهره
تعطره بجفها..اتحرزه وتقره
وهالثوب دموه..وسلبو عطره

حسين يمه
راح اضمن ثوبك المدمي واعطره
حسين يمه
بكل عزاء منصوب الك يوليدي انشره
حسين يمه
وبالنيابه اهل المجالس عني تقره

ويلاه ويلي..ويلي على شبلي
روعوه..مارعوه..لم يرُاعو ابني
بالجراح..قد كسوه..بعداً ثوباً مني

اللهم عجّل لوليك الفرج

#يافاطمة
#الليلة_الاولى
#محرم

والله وسفه..بعطش ليش انحكم غير حسين حاكم
والله وسفه..الماي فرضو رايه تالي اعللهواشم
والله وسفه..حسين سيفه يصير تالي بأيد أاثم

يسمع بجي اطفاله ونعي ام الرضيع
بكل ذني من ندعي يضل النه سميع

يسمع النه ويستجيب
وبس نحيب
اذنه متروسه وداع

صاح محد رد عليه
دك بديه
بتسع اصابع على الكاع

ليش رحتوا الخيام
يا لئام
غير وياي النزاع
___________
ماله ناصر..ينخه بس نخوته محد رد عليها
ماله ناصر..اضطرت اخته اتقدم الخيل بأديها
ماله ناصر..راح حارسها واخوها وما يجيها

خوفي امن احصل فرصه واسمع نخوته
يصيح انصروني وما انصره بغربته

استعد للحضه هاي
ماكو ماي
ولاكو ناس اويه الحسين

يا گلب حدد قرار
وابقه حار
ولدنيتك لا تلين

بكل زمن بعده غريب
الحبيب
وكون لجروحه اعين
___________
الحجر يبجي..وكل وحوش البر بجتله بيوم عاشر
الحجر يبجي..يعني بحسين وخيامه شنو الصاير
الحجر يبجي..وما انهزت للغريب شكد ضماير

يامن على خيامه وبناته بدمعه مات
يامن كسر بمصابه گلب الامهات

حسين ما يكدر ينام
امن السهام
مدري باله اويه الاطفال

يا رمل ابرد يحار
انته نار
ونار بخيام الدلال

ليش اعيش براحه ليش
وحوله جيش
ومات ما مرتاح بال
_________
بالطفوله..بمسجد ويخطب محمد بالخليقه
بالطفوله..وعثر مولانه الحسين بنص طريقه
بالطفوله..وركض جده وحطه باحضانه ويفيقه

ومحد ركضله من وكع يا كربله
ليا اصوب اروحن حته اتچي انه اله

من حضن جده الرسول
للخيول
خان بحسين الوكت

يمته اعيش الحب عذاب
بالشباب
ومن عذابة ما شفت

دمعي لا ينشف حرام
الجاي شام
وابد ما يرحم اخت
__________
كلها ناحت..من وكع راعي الخيم من فوك خيلة
كلها ناحت..والحسين ينوح لخيام العقيلة
كلها ناحت..وانه بارد كلبي كلما اعتنيلة

ميمونه طاح بصفه يمته انه اطيح
اليعشك ذبيح امنيته هم يصبح ذبيح

امدافع اويه الخيل كون
وبجنون
مو براحه براحه احب

حسين طاح حسين طاح
ما ارتاح
ميت وضل منسلب

على خيامه بدمعه مات
وامنيات
كون اموت وانتحب

اللهم عجّل لوليك الفرج

#يافاطمة
#الليلة_الثانية
وصول ضعن الحسين الى كربلاء ونصب الخيام


ذكر الطفوف ويوم عاشوراء...منعا جفوني لذة الاغفاء
لم انسهُ لما سرى من يثرب..بعصابة من رهطه النجباء

طلع من المدينه الضعن جيدوم
وجبير العايلة المتصدر الگوم
رشدت نيه حسين وبده يسوم
وحط انياط گلبه اعللمحامل

بمكه ونوخ اضعونه ويحج رايد
دعائة بدم رضيعة للسمه صاعد
وضل يتشكر المعبود للعابد
__
لله كم قطعوا هنالك مهمهاً..تكبو الرياح به من الاعياء
حتوا اتوا ارض الطفوف بنينوى..ارض الكروب وارض كل بلاء

المناية تسير وي نوك المجبلين
بجثير اهموم وانصاره الجثيرين
بصدر عالي وجلاله ونور بجبين
اسموم البر كطعها وحط الارچاب

بلجي بهايه كاعه ايخضر اشتاله
اجه وبضعونه جاب حسين جتاله
الاقدم والرسايل تارسه ارحاله
___
حطو الرحال فذا محط خيامنا..وهنا تكون مصارع الشهداء
وبهذه يغدو جوادي صاهلاً..مرخى العنان يجول في البيداء

هنا مهري ايتلخط ضهره بدماي
هنانه اخسر الواي وحامل الواي
هنا زرگه الاشفاف ويجتل الماي
هنا حج البواتر فوك النحور

غربَل للمنايا وحط رگب خشنه
شما لله رفع جفه جثر حزنه
هذن جفوفه باجر مذبح لابنه
____
أمجدل الأبطال في يوم الوغى..ومنكس الرايات في الهيجاء
هذا حبيبك في الطفوف مجدل..عار تكفنه يد النكباء

اجبل يا علي ولم شمل الاعيال
خلت هاشم مضاربها امن الابطال
اجبل يبو حسين حسين خيّال
ما ترهم ابين الخيل مطروح

ها يالحاضر اسليمان ما تحضر
ما بين الشمس وابين رمل البر
جثثكم يا علي بتراب تتعفر

الشعر الفصيح
الشيخ محمد الاعسم

#يافاطمة
#الليلة_الثانية
الركب الحسيني ومولانا القاسم ابن الحسن صلوات الله عليه

وي عمي برحلة خلوده
ابنه انه وحارس حدوده
ما شوفن قيمة لحياتي
خالقني الله اعلموده

غمض ابونه..وربانه
نساني يتمي..بحضانه
يا محله بوية..امن السانه
من يكلي بوية حسين

لكبر الحسن رحت اول زياره
ابجي وأبشر گبره ابشاره
راح اربه بوية بحضن التحبه
بس يبقه فكدك تجويني ناره
_______
وي ولد حسين بضعونه
وعباس يصدنه بعيونه
فرحتنه من عمنه يأمر
ونخدم عمتنه الحنونه

يحشمنه عمي..ونتحزم
وتتشيم امي..امن اتحشم
فرحانه ابنها..وولد العم
يحرس خدر واخيام

وصاحتني امي وجابت هدية
ثوب الابوّه امفصّل عليه
ثوب الحسن راويته لعمامي
وصارت فرحتي ادموع وعزيه
________
حط ضعنه ونوخ ركابه
وبخيامه تنصب شبابه
ما عندي من تعبه احله
وماكو احله منه بعذابه

انه واخوتي..التمينه
سور البناته..سوينه
عفنه المدينه..وحطينه
بديره غرب واجناب

اخر خيم حطينه خيمهن
ونحجي بكلبنه من نحجي يمهن
وما كلنه اسمهن مره بلسنّه
خاف الهوه يعرف صوت اسمهن
__________
نتناوب نحرس خيمنه
ويحرسنه فوكانه عمنه
تاسع ليلة ناده لينه
طير ولم ولده اعلحضنه

راد الله اعز شي..من عدي
تهيئوا لذبحكم..يا ولدي
بنصاري باجر..راح ابدي
ونحري الختام يصير

طحت اعليده بدمعه بستها
وغرة جبينه هم قبلتها
خل تفرح امي يزفوني باجر
زفتي بمنية هاي الردتها
________
بنصاره بصبحه بدينه
وراح الاكبر من ادينه
وبدموعي جبت الوصيه
واترجه عيونه الحنينه

اتوجهنه كلنه..للمدينه
زرنه الحسن وات..منينه
بهالشده هايه..يمر بينه
ونكثر بعد خيّال

الحك لاخوك اتكرب مماته
الحك يبوية العالم شماته
الأمنتني بحضنه وحنانه
حاير يأمن عدمن بناته

قصيدة ( رسائل مسلم صلوات الله عليه) ✋
#سيد_امجد_الحسيني
الشاعر #مصطفى_صادق_اللامي
رابط القصيده كامله للمشاهدة على اليوتيوب
https://youtu.be/LM7Nyt2hKzU?si=V4yXT1B0UZLh1fEN
مونتاج حسن عبد الحسين
مكساج حسين غالب
هيئة الزهراء صلوات الله عليها اهالي البصرة بني منصور

خايف وما عيني غمضت
حسين جاي لكربله
ايد شايلها واحذر
وبأيد  الوحله هلا
ساعة افرح يمنه شايل
وساعه اخاف امن الرسايل
ساعه ادعيلك تجينه
وادعي تتعطل علينه
بلكت الله ريح مغبر ايعطلك اعللسفره هاي
بلكت الله النوگ توكف ادعي وانه بمستحاي
وكمت اصيح يا حسين
لا تحل احرام حجك
لا تحل احرام حجك وانته جاي
چفن ماكو
غسل ماكو
رحمه ماكو
وما يبقولك يمجبل حته ماي
دنيا هاي دنيا هاي دنيا هاي

#الليلة_الثالثة
مولاتنا فاطمة العليلة روحي فداها

احبال هجرك فوگ گلبي..عدمن احلامي الزغيره
انته اسير وانه اسيره
يالتسيّر الماي هونك..عني وجهك لا تديره
دامنه بت وابوها..انضرلي بوية نضره أخيره
حته لو تذبحني بيهه
المهم انضرلي يبوية نضره اخيره
بس تعتب باب بيتك
انته اسير وانه اسيره
لكلشي اعطش من تسافر..عطش خوه..وعطش ماي
وعطش حيره
وأعطش لريشات عمي..ويكتل اليعطشله غيره
انته اسير وانه اسيره
بوية يا كسران ضهرك..ابيتي قبل العاشر انه جربيته
ثاري سگف البيت عمنه وسگفي طاح أودعيته
يعينك الله..يعينك الله
باجر بجفك تطيح سكف بيته
باجر الغربه الجبيره..انته اسير وانه اسيره
كلشي عشته وياك بوية
وانذبحلك...
وبله دم ذبح المشاعر
ساعه اعيشك يم عليلة
وساعه اعيشك من تسافر
وخوفي باجر
ساعه اعيشك جوه خيمه
وساعه اعيشك جوه حافر
وينثر صدرك عبيره..انته اسير وانه اسيره
انته مو بس يتمتني..من مشيت بهالضعن
قبر جدك..قبر امك..والجرح قبر الحسن
بوية كلهن..اويه العليلة اتيتمن
اوية العليلة اتيتمن
ياهو يمهن يبجي باجر
ياهو يمهن يلفي زاير..وانته نوگك حملن
الفاتحه اقراها عليهن
وارجع اقراها عليه
الما يفك ريجه بحنانك
عيشته نفسه المنيه
من أاشرلك واودعك..تذبح بگلبي اديه
وهسه وجهي وين اديره
انعدمت احلامي الاخيره
انته اسير وانه اسيره

اللهم عجّل لوليك الفرج

#الليلة_الثالثة
فاطمة العليلة روحي فداها


ادياركم ذبت سعدهه يل لواكم ناشرينه
غبشّوا ضعن الهواشم شايلين امن المدينة
موكد الديوان طافي وخاليه اديار الضعينه
غبشّوا ضعن الهواشم شايلين امن المدينة
بين جمرات الموادع كلب طفله عايفينة
غبشّوا ضعن الهواشم شايلين امن المدينة

حملو عالهوادج طفل سد طفل
وطفلة محد خذاها بقت بالنزل
ما تزيد حملهم خفيفة حمل


جانت الطفلة العليلة وصارت الطفله الحزينة
غبشّوا ضعن الهواشم شايلين امن المدينة
________
حاجت ام عباس بلجن..ابوفاضل يجي لينه
غبشّوا ضعن الهواشم شايلين امن المدينه

محترك گلب العليلة بناره وحده وعايفينه
غبشّوا ضعن الهواشم شايلين امن المدينه

شالوا وبالدار بتهم اصبحت مثل السجينه
غبشّوا ضعن الهواشم شايلين امن المدينة

بجفه صعد بناته جبير البخت
ونوخ الناكه لاخته وعليها اركبت
وناكت الطفله بيده ولا نوخت

جانت الطفلة العليلة وصارت الطفله الحزينة
غبشّوا ضعن الهواشم شايلين امن المدينة
___________
طايح اداوها امن اديهه نايحه وكلش نحيلة
غبشّوا ضعن الهواشم شايلين امن المدينة
اليكتله الشوك لاهله ياهو اليفصله وجبيله
غبشّوا ضعن الهواشم شايلين امن المدينة
والمريض اهله تحيطه مو تشيل بفرد شيله
غبشّوا ضعن الهواشم شايلين امن المدينة

منهجم عالعليلة النزل منهجم
بساعه وحده خله امن النسه والزلم
الاهلاً بدار اهلها بسفر تنعدم


جانت الطفلة العليلة وصارت الطفله الحزينة
غبشّوا ضعن الهواشم شايلين امن المدينة

اللهم عجّل لوليك الفرج

#الليلة_الثالثة
لمولاتي فاطمة العليلة روحي فداها

بكل الملامح سولفت من كتلي بوية نفترگ
والتصبح عيونه حمر معناها بي بادي الحرگ
يابوعلي وداعت علي صرت العليلة من صدك

عفتوني..وصعدن اخت تتبع اخت..بوية الحگ لبتك صحت..طفيلي نيران الهجر

تودعوني.. تأشرولي من ضهر الهجن..بيتك تره اخلافك سجن..حابسني هجرك وانتظر
___
امعيشني هجرك انتضر وكتال الي بنفس الوكت
وبيتك حياطينه بدت تصغر علي من سافرت
مشتاگتلكم ياهلي بكد ما وراكم اشرت

كل طفله..من تمرض اتدللها اهل..بس انه ضعن اهلي رحل..شوگ ومرض صارن سوه

مشتعله..طفوني يال كلكم سگه..الضيعكم بروحه شلگه..الضيعكم امضيع هوه
___
هنيالك باهلي المشو لمتهم اتگصر الدرب
عالعيس شايلك وطن يالذابح ابيتك گلب
مذبوحة اشمر بالدوة عگبك دواي شينشرب

مجروحة..بدمعة رقية ونضرتك..ابيتك عشتها غربتك..گبلك منو الغرب هله

مذبوحة..كل الطفولة البيه امس..وما عندي اخت بيه
تحس..كلهن خذتهن كربلة
__
بليل انتظار العايلة هالمر علي رابع شهر
وبحسابي عبد الله اختلف وي هزت الهودج كبّر
كبرو هلي وين الوعد الحد هسه لكبر ما حضر

متحضره..محضرة غراضي ابين ادي..امتانيته بس يجبل علي..وبحضن الاكبر انتحب

وبنضره..يحاجيني ويزيح الالم..ايتانن خواتج بالخيم..ويا لم شملجن يقترب
___
البت التضيع حضن ابو تعيش بگلب ام تنتضر
ويعصرني گلبي بعاشرك (يا كربلاء وصار الضهر)
قارورتي وشم منحرك بس لا سوه صارن حمر

القارورة..فاضت دمه وصار الذبح..ولاني بهزل لاني برمح..واترافگ وياك انجبر
مكسورة..مكسورة من قبل العلم..عطشانه من قبل الخيم..محترگه من قبل الجمر

#الليلة_الثالثة
لمولاتي فاطمة العليلة روحي فداها

كلب الابو..صعبه لبناته يعتذر
كلب الابو..وي بته يبجي وينكسر
كلب الابو..عنده عليلة تنهجر

بجه من ذكرها..الحسين اشيسكته
بقه حضنه خالي..مشه ابلايه بته
يصيح لرقية..وتجي تمسح دمعته

لازمها ويسولف همس
ايد العليلة بايدي امس
كلبي بوجع بتي يحس
_____
كلب الطفل..بس يم ابوو ما ينهضم
كلب الطفل..من اهله صعبه ينفطم
كلب الطفل..هجروه نسوان وزلم

بده يعد الاصغار..وحجت يمكن نساني
وصل حد الاكبار..وخذاهم ما خذاني
حجت يمكن انه..على احضاني مكاني

شو من مشه ما يلتفت
ما جنه ناسي ابيته بت
هيه الهجر ما حسبت
____
اعيون الزلم..تشوف الحسين ومنوجع
اعيون الزلم..مو بالسهوله تصب دمع
اعيون الزلم..ما تبجي اذا ما تنفجع

الكضه حاجة الناس..واليحل الثكيله
مريضه طفلته..وعليها اعلن رحيلة
واجه كباله عباس..بجو عالعليلة


اليكضي الحوائج للبشر
عايف عليلة ابلا سفر
يهل البجي حسين انقهر
__
خالي النزل..ضعن الحبايب واترحل
خالي النزل..وجف العليلة ما نزل
خالي النزل..واتأشر هنا يالاهل

تأشر بديها..هلي هنا ها يالاحنان
ولا هان عليه..فكدكم بوية ما هان
شيشربونه كلي..العله اخوانه عطشان

انطيني بوية يا دوة
يطيب طفل كلبه انجوه
راح اللوه وكلبي انلوه
__
طفلة وابو..ودار الوكت دورة حبل
طفلة وابو..قصة سبي ابلاية هزل
طفلة وابو..ما بينهم شبگة وصل

الرسايل تجوي..والشوك اكثر يزود
قبل ذبح السيوف..الذبح بالفركة موجود
الوكت من ذبحهم..بلا دم مثل الورود

شوك الابو ما ينحمل
ويذبح ذبح شوك الطفل
مقتوله تنعه منقتل

#الليلة_الرابعة
مولاتي ام البنين صلوات الله عليها

شنو هذا الوفه المامر گبل بينه
شنو هذا الربه من يا ضوه وطينه
مثل ما ولدج اتربو يبدوية
بس لحسين يا مولاتي ربينه

نداء أم البنين..حبيبي يا حسين

نربه
بحصن رباني
بذكر عطشاني
أمان احزاني
هيه ام القمر

نربه
بوفه البدوية
لهضم مسبيه
خدامه ونيه
هيه أم القمر
___
ما لوليتي مثل اللولن وربن
تلولين بحسين وعالوجن صبن
منج يا حسين التطلع حرورة
ويا أم جعفر دموعج زلم سون

نداء ام البنين..حبيبي يا حسين

بدمعه
وحزن لولتهم
جمر غيرتهم
منو الربتهم..؟؟
هي أم القمر

بدمعه
بدو مملوحه
وحسين مجروحه
درس واطروحه
هي أم القمر
__
نعيچ ماكو مثله بكل نعي النسوه
بجيتّي المدينة اعليها بالگوه
وعميتي وگلتي فرحانه بعمه عيوني
عيون وما تشوف حسين ما تسوه

نداء ام البنين..حبيبي يا حسين

تنعه
الحجر منزلها
وبجه وقر الها
دخيل بضلها
هي ام القمر

تنعه
وابنها ادخيلة
كفيل العيلة
بحزن توميلة
هي ام القمر
___
بيدج مگبره شيّدتي لونينج
ورشيتي عليها ماي البعينج
شهيده شلون ما اگولن شهيده اعليج
يالمتي بجي وحسره على احسينج

نداء أم البنين..حبيبي يا حسين


ماتت
شهيده بحسره
على ابن الزهره
بحزن منكسره
هي ام القمر

ماتت
شهيده بونه
شبقه من ضعنه
كتلها حزنه
هي ام القمر

#الليلة_الرابعة
#يا أم البنين

وين يمه بيا محطه
ضعنك المحروس هسه
حسين من كثرت سؤالي
جدم ما عندي احسه
(السلام على من تورمت قدماها لكثرة السؤال على الحسين)
مو مهم بيه شتغير
المهم عبد الله نفسه...؟

امشي فوگ اثار ضعنك..واندل اثارك حنينه
وحافضه اصوات القوافل..واعرف اجراس الضعينه
يا حسين بكد حنانك ..باجية اباب المدينة

شتسوي المشتاگه..واتدور ماكو حسين
شتسوي المتعلمه..شوف تشوفك بالعين
يالكاصد بضعونك..ضعنك مكصوده لوين
__
هذا ليلي السهراني
نمته لو مثلي سهرته
گلبي مربوط بضعونك
تمشي خطوه اتدگ نبضته
ام اخوتك ماهي طيبه
حسين يمه طيب انته..؟

بدارك واشعر غريبة..شلون بيك وانته نازح
يالكصدت اگلوب خشنه..ابيتك اشجم گلب ذابح
حته الاهلاً من لسنهم..تنحسب هم حجي جارح

يا خيمتنه وفيينه..ناصب گالولي اخيام
ومحترگات اخيامك..تطلعلي بالاحلام
واتعوذ من حلمي..واتعوذ من الشام
____
فوگ گلبي امخليه بنتك
يفرق الليلة جرحهه
بليلة ما بين گمرهه
گلبي خايف من صبحهه
خايفه الدنيا تخلي
براس سيدها رمحها

عصبّت راسي ونعيتك..وعيني ما غمض جفنهه
وطر صبح ما شفت مثله..بعيني سوده الشمس جنهه
وتربتك يم راس بتك..فاض دم يحسين منهه

بمجّان البي تكعد..شعلتلك روحي اشموع
غير اسمك يا يمه..بكعدتنه ما مسموع(حسين)
وين الله ترد سالم..اتشاهدنه ومتنه دموع
____
بنعي ما مر عالمدينة
حسين يمه اسمك نعيته
خبر موتك جان عندي
بدارنه بعينك قريته
وطول هالسفره الطويلة
خبر موتك جذبيته

كون بين ضلوعي اضمك..يمه عن لا يغدرونك
شلون ينطيها گلبها..يمه هاي امتك تخونك
ما مصدكه ابدون اخوتك..حاير اتدير بعيونك

اتدير اعيونك حاير..ومالك ناصر يا ماي
كالوا تحجي وصوتك..ما يطلع يا مولاي
ما راح انعه اولادي..انعه اعلحوالك هاي
__

اللهم عجّل لوليك الفرج

#الليلة_الرابعة
يا أم البنين

بموادع ضعن هاشم..دمع كل الضعن سايل
ويودع امه مشه العباس..وتكله ابعد يبوفاضل

ارد اواسي بكلشي واولادي انذور
ولو تجي تودعني لا ما معذور
مستحة امن حسين وتقبلها شلون
مالة ام تودعة ويضل مكسور

خوفي حسين..يذكر الصابنها
وماله اوادع..وماله ام يحضنها
..........................................................
شلون تريد اودعنك..شگل لفاطمه الزهره
وانه اللا منكسر ضلعي..ولا عيني بقت حمره

يمه نار بگلبي شما تدنه اتزيد
يمه روح امودع بس من ابعيد
بيمنتك أاشرلي بس عندي اشروط
لو يرد ضعنك ما ترجع هالايد

يا عباس..ارد اواسي بكلهن
وجفك هاذ..يمه جان اولهن
....................................................
روح ولا تخلي ام عون..يم اي بباب تتنطر
تره بوب الخيام اقماش..حرگتهن تصير اكثر

انه بنت احزام وصرت انته حزام
أنه مأمنه بزودك يا راعي اخيام
بس ييمه البوب تخوفني اهواي
خل كلشي يصير ولا باب الشام

يا كفال..ام واحشمك انه
الا الشام..يا خشب بيبانه
.......................................................
بسرعه اتوكل لضعنك..قبل لا يكبر البسمار
قبل لا يكبر ويصبح..رمح مسموم حاد وحار

يمه هم بحسينك حضرولة ارماح
ورگبتك حضرها لسيف الذباح
روح يبني مودع بس رد مذبوح
حته يا عباس گلب امك يرتاح

رد مذبوح..وذمتك ابريهه
الله وياك..من بعيد احجيهه

#الليلة_الرابعة
يا أم البنين دخيل وفائج

مو ام لا مرت والد..عشت وياك خدامه
يا لذة عبوديتي..كلبي لسلمك اسلامه
شهري الما اخدمك بي..ما معدوده ايامه

گلبي يشرب من حنانك..يالتعطشك مشرعة
اختصر عمري بنضرتك..أنه وولدي الاربعه

يا مولاي
الله حقق امنياتي..من علي اختاراني مرته
ويا حسين وكل دعائي..بنص صلاتي يخصك انته
ربي ما ريدن اجيبن..ولد ما يحضه بخدمته
.....................................................................
طبع كل بدوي ترحالة..وعكست انته الطبع بيه
السفر ما گمت احبنه..عشت جو العبودية
ونسيت اسمي الكُلابيه..صرت هسه الحسينية

واليعيش بجو خدمتك..ياهو يكدر يوصله
يا حسين الحب عذابك..مدري ليش اتدلله

يا مولاي
العلى امحبتك گلبه قابض.. كالذي قابضله جمره
ووقف صار الكم حليبي..يصير خادم ياهو اكبره
والينسبونه الخدمتك..يجل مقامة الله ويقدره
.......................................................................
قريت بسوره الاخلاص..وصبح الاخلاص امنيتي
وحقق امنياتي الله..وانطاني اعلگد نيتي
بالسورة اربعه الايات..واربع ولد ذريتي

الله گدرني ونطاني..لضهرك اخوان وحزم
وسيدي مقصره اعتذرلك..عندي بس اربع زلم

يا مولاي
قل هوه الله هوه احد..وانته الاوحد لله دربه
والمثال اعللحجيته..لليحبك راح اضربة
الله ما يقبل صلاته..الما يحط كصته اعلتربه
...........................................................................
دليِل العاشگ النية..اغمض عيني واندلك
اليدورك كون ينسه اسمه..وسحگت اسمي أنه لاجلك
الغاية والوسيلة انته..اليريدك بيك يوصلك

على ولدي بسمك انعه..يا حسين امن المهد
سيدي الجرب دمعتك..ما يفارگهه بعد
يا مولاي

ضحه ابراهيم بابنه..ويذبح اسماعيله صرّح
وانه احب وردت اضحي..وماكو من التضحيه اوضح
اربع انحور لغلاتك..يا حبيبي بكيفك اذبح

اللهم عجّل لوليك الفرج

#الليلة_الخامسة
يا سفير الحسين دخيلك

بدرب الضعن مجلس عزه جان
وحسين ينعه فراك خوان
عطشان مسلم مات عطشان


من موتت ابن عمه..بدت تنقص زلم ضعنه
الحد ما يوصل العاشر..يبقه الوحده بحزنه

صاح الحميده ومنكسر
واويلاه
طاح الحبيب امن القصر
واويلاه
ودرب البقه درب العسر
_________...
يا دار مسلم نوحي يا دار
ماهي تسر اطروش الاخبار
ما كرمو بكوفان خطار

سدت بابها الكوفه..ومسلم حار باحواله
السفير الهاشمي اتغرب..ويتامه صارت اعياله

مهدوم مسلم منزلة
واويلاه
ذني رسايل كربله
واويلاه
ابن الهلا ماله هله
واويلاه
___________
ربيت خوش اولاد عدك
لحسين كالوا جلمه ولدك
من قبح الله العيش بعدك

منرد لمدينتنه..عزانه ايصير بضعونك
لو بالخيل موتتنه..لو موتتنه بعيونك

ان جان انك بعدك عدل
واويلاه
زلمه اعلزلمه ننجتل
واويلاه
ولمة ذبح لم الشمل
واويلاه
________
لمسلم ضعنهم سار مكصود
وعن مكصده حالت هالجنود
مسدود درب الكوفه مسدود

متغرب گبر مسلم..ما لحك يزوره حسين
رمح زاير رمح باجر..يتلاكون عين بعين

يحنون غصباً عالرمح
واويلاه
منذبح زاير منذبح
واويلاه
واجروح مسلم تنفتح
واويلاه
___________
دار الوكت وحسين هم مات
وسارو مداليل ومضعنات
شوغات مشي الهزله شوغات

كالوا گربت الكوفه..وطاحت طفله من النوك
راس ايلاگي مسبيه..تالي يصير ملكه الشوك

بحبال جفها النايحّه
واويلاه
ولمن نعت مسلم صحه
واويلاه
كلبج حميده شجرحه

اللهم عجّل لوليك الفرج

#الليلة_الخامسة
دخيلك مولاي يابوطاهر

كل ملحمه الصارت دغش..وملحمة مسلم ملحمه
شرارة الطف ابتدت..من شال مسلم صارمه

اول نحر للحب نذر..واول عطش واول ضمه
واول يتيمه ايتيمته..لخاطر حراير فاطمه

مسلم..هاشم يا مسلمها..رد الخيل بدمها..
كض الكوفه ولمها..مسلم
مسلم..حسين والله يزيده..بركان الدم بيده..
سوه كلشي يريده..مسلم

گد ما مسلم عالي الشان..للطف صار اول قربان
تتخورس من يحچي الناس..وابن امه اليطلعله السان
__________
بالكوفه من غار الاسد..بكل بيت خله نايبه
وقصر الاماره شما عله..ينصه اذا كض شاربه

يشيل ايده ما يبقه هوه..اينزل ايده ينجر النفِس
كلهن اگباله اتراجفن..خياله وسيوف وفرس

مسلم..اطول شارب داسه..خيرهم ومداسه
شايل سيفه وراسه..مسلم
مسلم..شراي الدم سيفه..يفرض كلشي بكيفه
ما رد مره بحيفه..مسلم

سيفه خلفة ذو الفقار..يذبح بيهم حار بحار
الما يتحمل چوية صيف..المن يندگ وي النار
_________
الصبّره عالحر والعطش..چي رايح برحلة عشگ
وكرسي الخلافه من ورق..وبنار مسلم يحترگ

عاش السفير الهاشمي..الاسس سفاره فاطمه
قد عبّس وجه العرب..ومسلم شفاهه باسمه

مسلم..من كض بيده اعنانه..حل رزق الدفانه..
ذب الجيش الوانه..مسلم
مسلم..لمّن شاء وكبّر..طگ سنون العسكر..
ضل يعلى اكثر واكثر..مسلم

مسلم من كض بيده اعنان..ضل دمهم فوگ الحيطان
كد ما موت من الجيش..تعبت جفين الدفان
_______
قد قاب قوسين ودنى..من أن يكون حيدره
فارس ينازل هاشمي..ما جابته لهسه مره

حي الله ابو طاهر حضّر..فوگ المنايه معتلي
شكد يشبه بطوله الحسن..شمره اديه شمرة علي

مسلم..وارث خزرة حاجب..عمه الاسد الغالب
عليُ ابن ابي طالب..مسلم
مسلم..شكد حاطوه اذيابه..بس صفاهه الغابه
خزرة وسيف اصحابه..مسلم

من هاشم ويطب اعناد..يصيد الصيده اوية الصياد
يگلب الجيش ايمين اشمال..معزب ويگلب بالزاد
________
اضماير الغابة اتلثگت..والضبع كض كرسي الامر
يا زلمه ترضه امروته..تغدر حياية بالصگر

دارت رحة الدنيا عكس..وفوگ القصر شامخ بقه
شرط اليضحي من گلب..وهالشرط مسلم حققه

مسلم..الكوفه كوفة جده..وضل تاليها لوحده
الگلوله اقدم ضده..مسلم
مسلم..الناس اعيون اتراقب..وهوه الوحده الحاحب..داخل ليها محارب..مسلم

اشما رادو وشميريدون..عالحاجب ما تعله عيون
مسلم نجمه بگلب حسين..من النجمه شيلوحون

#الليلة_الخامسة
دخيلك يابوطاهر

وانه اعللسطح يحسين..صحتلك بيه ما بيه
القصر الما رحم مسلم..ما يرحملة علوية

حسين قصر الكوفه ما يرحم خدرنه
وانه أمجرب هالمصيبة
ارجع ورجع اطفالك والعلاوي
واسم زينب لا تجيبة
مثل ما صرت الغريب بهالمدينة
زينب تصير الغريبة

ويلاه..تجي يغدرونك
ويلاه..بضمه يلاكونك
ويلاه..ابقصرهم تالي
ويلاه..نساء اضعونك
..............................................................
رد رد يا بعد بيتي..نيتّهم يذبحونك
سفيرك عطش ما روو..وما ضنهم يروونك....؟؟

جنت انه اول ضحية لهالرسايل
وماكو مي خوية وراهن
وانته جم ام جم مرضّعه وياك جايب
يجف لبنهن من ضماهن
حسين بس توصل يعطشولك رضيعك
وحرملة اسهامه اشتراهن

ويلاه..واليعطشونه
ويلاه..ايتغير لونه
ويلاه..واليريد الماي
ويلاه..بذبح يسگونه
..................................................................
ثقتك وانه ابن عمك..وصحتلك لاتجي باجر
انوليت وخاف يولونك..ويبقونك بلا ناصر

وحدك تصيّح الا هل من مناصر
وحجيك ايكطعه ذبحهم
مسلم وضگت الخيانة شلون مره
جسمي طايح من سطحهم
أنه اباب الكوفه باجر راسي ينحط
وراسك حسين برمحهم

ويلاه..اليزيد جرحك
ويلاه..تهزهز رمحك
ويلاه..خواتك يبجن
ويلاه..واليهز يضحك
........................................................................
خذوني اعللسطح وانه..كلت شيّرجع الايام
اذا ترحمكم الكوفه..ماترحم سطوح الشام

حسين مو للنضر علويات هاشم
ماكو اعظم من سترهن
خوية كلما تقترب يگرب سبيهن
وخايف يفگدن گمرهن
بس مشيئة الله هيج يصير بينه
وربك اليحفظ خدرهن

ويلاه..ضعنكم هاشم
ويلاه..يرد مو سالم
ويلاه..غريبة اضعونك
ويلاه..وغريبة الوادم

#الليلة_السادسة
من حيلكم يا انصار الحسين

بليل امس انصاره يمه
وحرسوا امخيمه
وهسه ميته انصاره ميته
وحده ابن فاطمة
غربة واخيول ومخيم
كله صابه الضمه

بهداي بهداي المصايب
مو هيج يا فركه الحبايب
بالليل كل اصحابه يمه
وصار الضهر ما ضله صاحب

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
________
ضهري منه احزامي طايح
ويا نعمتي انجفه
ليش اصيح وماكو تبشر
كعدو يهل الوفه
ليش انادي ومحد يرد
مو طبعكم جفه


ماله ضهر ما عده عوان
دار الوكت بحسينكم خان
الراحوله مو حي الله انصار
شجعان  حركوا كلبه شجعان

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
__________
ضل يدير بوجه حاير
عن شماله ويمين
والمخيم كله ينضر
للحسين الحزين
يا حبيب اكعد حبيبي
وحدي مالي معين

ونسوانه صدت ليه محتار
ينخه بنصاره وسكته الانصار
شما طولت هالسكته يصحاب
من خيمتي تتگرب النار

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
__________
مو ضهر بعيونه جانت
بعينه ضلمه الوكت
بمتنه دم اصحابه باقي
وعالنهر يلتفت
محد يقدملة خيلة
وقدمتّه الاخت

زفكم سوه عريس عريس
وافراگكم ما يخطي ويجيس
هاي الخلك جابت هزيلات
تكعدون لو تتبدل العيس

يحشم حسين
اجيبوني اجيبوني انكسر ضهري
يحشم حسين
العده كربت العده كربت خيم خدري
___________

اللهم عجّل لوليك الفرج