#ثكيل
اين السبيل...بعد السبيل
__________
ابعاد عنك وانته اقرب..النه من حبل الوريد
مو بعيد اعلينه انته..واحنه صيحنه بعيد
انه اريدك يابوصالح..وبعد كلشي ما اريد

اريد وياك يا مولاي..واصيح يابوصالح وين
اصيح براحه يامولاي..وجرحك ما مغمض عين
كالوا فوك باب الدار..مخلي انته قميص حسين

يكطر دم قميص حسين ما ناشف
يالشايف حرك خيمة أنه اشايف
اسف على الراحه اوداعتك اسف
____
قبل لا اتمنه اشوفك..كون اشارك بالعذاب
الماي اتهنه بشرابه..وانته تنشغ بالشراب
يا طفل يبجي تحضره..لا يفز جرح الرباب

صح ما ادري طولك وين..بس اعرف شنو امبجيك
الماي النار ركض الخيل..كلشي لكربله يوديك
شما واست دموعي الناس..اصرخ ياهو اليواسيك

محد مسح دمع عيونك التجري
تبجي بيا ارض مولاي لو ادري
الم كطرات ادمعك ابقه كل عمري
_____
الجمعه اذا ما تبجي عيني..عنك وعن خيمتك
اتعمد اتغيب حبيبي..عن دعاك وندبتك
بعين ما تبجي اعلجرحك..شلون الاگي حضرتك

العين الما تشوف امصاب..ولا تستاهل اتصدّك
الشاب ايعين كون الشاب..وكالولي عنت جدك
مثل خد اكبرك حطيت..يمهدي اعللترب خدك

بأبي وبأمي يا مولاي وبولدي
صدك يمته تصير وياك يا مهدي
ويمته اعللترب مولاي احط خدي
_____
موعد العشاك بسمه..وموعدك كون بنحيب
اليجرح بحجية حبيبة..شما يحب هم مو حبيب
انه تهضمني اعرفك..بس اصيحلك غريب

شنو من ذنب المسوين..واتحّرم لفض اسمك
لانحجيك لا نلگاك..ولارسامنه يرسمك
عشنة بأمل شامة خد..يمته نصدها ونشمك

واگلب امسامر العشاك ما الگه
علاقة انبنت بس عالدمعه والحرگة
شلون انغازلة الخيماته محترگه
__
عاشرك هب عطرك بينه..وكون تترس حزني روح
وين ما مولاتي تحضر..كون اكابلهه وانوح
لياخرابه اوياكم انعه..ليا سبيه ليا جروح

محرم يابوصالح جاي..ادعيلي اضل طاهر
ارزقني كلب مجمور..يحس بحرورة الصاير
باصابع تسعه مثل حسين..ادعي نموت بالعاشر

يالخايف علي وانه ولا خايف
جرحي تروفه يالجرحك بقه نازف
الحافر فوك عينك سيدي شعايف
_____

مرات احب وابتعد
بس خوفي لا انبعد
يجبرني ما اهدة

شچوة عرب خدمتك
تخض بينه خض سيدي
واتطلع الزبدة

يا ابا عبد الله🤲

مقتل راح اروي بگلب مهضوم
عن اصغر امام المات مسموم
وحيد الرضا وهضموه
من السطح شمروه
ومحد شال جثته وكال معصوم
______
الجواد اعلليتم مفطوم ابصغر سنه وفكد والد
لاله اخوان لاله اخوات وتكتل غربة الواحد
فك عينه بسجن مظلوم واثر كيده بدية شاهد
اعلسم جده اويه سم جده بقه مولاي متواعد

الغريب بمولده تضل غربته وياه
الماله اخوان توّلي باجر اعداه
الوحيد وما اله اخوان
باجر ماله دفان
ومحد شال جثته وكال معصوم
_______
اجه لبغداد والغربة اجت وياه مرافگته
سبب موته فقه قوله بقصر المعتصم وآفته
خافو لا تحبه الناس ويحطم طاغية وكته
سمو بالعنب مولاي وتورم شكو بجثته

اليوجع اكثر امن اسموم الجبود
المنه وبي يسمه وهضمته اتزود
يا ناره وهضمته
الدست سمه مرته
ومحد شال جثتنه وكال معصوم
_________
ضل يعالج من السم ومرته السمتّه بكتره
طلب من عدها شربة ماي گالتله ولاگطره
يتحرك ضل يمين ايسار يشهگ مختنگ صدره
وتعالج يمين ايسار ووياه تشهگ الزهره

گلب الزهره يتلوه اويه ابنها
تشربه تريد وتحطه بحضنها
تريد تلولي فوگاه
دللو سمته اعداه
ومحد شال جثتته وكال معصوم
________
شبه الدم طلع منه بكثر الاذى وكثر الصار
السم بجبدته وعطشان وجان الوكت كلش حار
كوه بكوه يزحف كام حد ما وصل سطح الدار
يدورله على عوان ووحيد منين ما يندار

اليدفعوا من سطح هم يكدر يكوم...؟؟
وفوكاهه اندفع مولاي مسموم
زرگه اشفافه مولاي
مات بحسره الماي
ومحد شال جثته وكال معصوم
___________
بس حسين جنه نكول محد غسله وشالاه
ومو بس هوه ما مدفون لا هسه الجواد وياه
لا لا تجفين لا تغسيل لا ضاگت الماي اشفاه
بس الفرق عن حسين ما حرگوا خيم فوگاه

وفرق ما عدنه اخت يسبوها للشام
وما شاف بخرابه ابنيته تنام
صح ما بات برماح
بس ضل مجوي لصفاح
ومحد شال جثته وكال معصوم

الى جواد الائمة
#وارث_امصابين

يالوارث امصابين..من الحسن وحسين
كون تواسيك الشبان
هم مسموم وهم عطشان
يالوارث امصابين
_________
سيد بعمر الشباب..وطاح ذابل مبسمه
بين غربة سم امام..وبين معصوم بضمه
الخمسه والعشرين عام..جروح صابن فاطمة

ما عنده خوات ينوحن اعليه
وحيد اهله بغربته
ومرته ما بجت بمصابه مولاي
السمت جبده مرته
يشبان الجواد يريد عوان
يذب ماي اعلشفته

بعز الشباب ومات..يستاهل الدمعات
متجوي وما عنده اخوان
هم مسموم وهم عطشان
__________
اه من مشهد لموتك..و اه ابد ما تنحبس
انطونه شاب البينه خله..بكاع خده وبالشمس
منو كبلك يالجواد..بخد الاكبر ضل يحس

شبَ اعللجرح وادموع الامصاب
الوكت من صغره خانه
يتيم امن الصبه ويتنفس اهموم
ينزف من حنانه
المثلك خده مو بالكاع واشموس
لا سيد زمانه

براگ العطش والسم..ضل كلبه متحزم
والضامن وياه ذبلان
هم مسموم وهم عطشان
__________
سطح دارك ما بردلك ..حار جن سن الرمح
خضرة السنين العليك..وصوفرن فوك السطح
اشجم ظهر صب حره نار..وجم شماله وجم صبح

يوحيد الرضا يالما ضكت الماي
امك وين عنك
لو ريحانه امك هسه وياك
تغطيك وتحضنك
ثلاّثه اعللسطح وانوب يرموك
وولا واحد يجفنك

سم وعطش واكسور..من السطح مغدور
اكسور البيك بكل امجان
هم مسموم وهم عطشان
__________
على دفنك يبو الهادي..املوك كامت تنجبر
ندّه منك مسك فايح..عطره طاف بكل كتر
هذا عطرك غث قصرهم..وخلو لطولك گبر

من قم النعي يا عمه ويلاه
يا اكبر خساره
يتورم جمالك ليش بالكاع
وانته ابن الطهاره
من نيران معصومه يمولاي
عليك ابجي بحراره

مسلم بجه وينعاك..من قصره طاح وياك
صح طايح بس عالي الشان
هم مسموم وهم عطشان
_________
اتنعمت انه بشبابي..يا مُحمد والثمن
جبدك وخدك وشفتك..بالمصايب يلتقن
بجرحك اتلكة محرم..والهواشم والضعن

حريص وبيه تجرح خايف هواي
الاكي حسين بارد
بمصابك خذتني لريح الاحزان
تهفي لجمري رايد
يا باب المراد اتصب بالگلوب
نيران المواگد

يالغربتّك ضعفين..جرحك جواز حسين
للعاشر جرحك نيشان
هم مسموم وهم عطشان

عظم الله اجورنا واجوركم

بشهادة مولانا الجواد 💔

يا حسين

الخدمة تشري الگلبه طاهر
وانه خايف
خايف تعاتبني باجر
ومن اقر بذنبي افشل
ومن انكرك جرُمي اعظم
وانته شاهد على الصاير
انه خايف لا تمد احبال سفنك
وانه جف ايدي بعيد
صيد يالرايد تصيد
بين جفي وبين جفك مدة ايد
ليش ساعه وياك اصفه
وساعه وي ابليسي اعيشن
وساعة ما ادري شريد
هذا كلبيش البصدري
ما يلين لخاطر اسمك
وانته الملين الحديد
وانه حاير
خايف تعاتبني باجر
شلون جنت تصيح باسمي
وكلبك لعدواني صاير
كون عمري يصير دين
انتم ارباب الطهاره وانه وين
فضل زايد هذا منكم
من اصيّح يا حسين

مدينة مهجورة
مشاعر الجماد بها اصدق من سكانها
الطريق مظلم والنور الساطع الوحيد
هي تلك القطعه السوداء التي كُتب عليها
(لبيك يا حسين)
امي ولبّنها واستكان الشاي الممزوج بصيحات (جاي ابوعلي..جاي ابوعلي) هم الصادقين.
الصادقين التي تبحث عنهم امك الزهراء المثكولة قائلتاً
(ادور بالمجالس مثل المضيعه)
القلوب التي ادعت حمل اسمك
كالصبير يدعي الجمّال ولكن يؤذي كل من اقترب اليه
الوقت يمضي وتذاكر سفينتك على وشك النفاذ
كل الذين ارسلت لهم التذاكر
ضنّو انهم امتلكو النجاة واغتروّ بها على العالمين
حته مزقوا تذاكرهم من شدة الغرور
الذنب كالسيف انه لم نقطعه قطعنا
لا يزال الدين لعق على الالسن
حته انت يا مولاي واسفي على حروف اسمك
الذي اصبح ايضا(لعق على الالسن)
اسماً تنعاه وتتهجاه الزهراء ...؟؟
اصبح غريباً بين الالسن.
الماء يهجر الاراضي بدون ضجيج بكل هدوء
ولكن بين ليلة وضحاها ترى الارض جرداء
الهوان هوه هدوء رحيلك
برضيعك المفطوم دمعاً لا تُذقنا هدوء رحيلك

(الرحيل)
شفاه ذابلة
عينان غائرتان
من اين مكان الرحلات المتجهه لقلبك الغريب
اقترب الرحيل ولا وداع لي لكل مُدعين الحب
العطش باب الوصول
لا يمكن ادعاء العطش
فأين عطاشى الحب....؟؟

رواية القصيدة لمولاي الرضيع صلوات الله عليه

#لمولانا_الطفل_الرضيع
#ثكيل

للخيمه رايح جاي..بجفوفي دم مو ماي
امن اعيالي سالم خذتك
بنحرك سهم رجعتك
بجفوفي دم مو ماي
____
واگف اباب المخيم مدري ارجع مدري اطب
ردت ماي وسهم شمروا و السهم ما ينشرب
انته صح صغير سنّك وعمرك اگماط وگلب
بس صرت اكبر خسارة وابشع افعال الحرب

من مي گصصهم طاح..دمك طلعله جناح
شنهو الاگوله لعمتك
بنحرك سهم رجعتك
___...
مستحي وخسران راجع وارجف وترجف بدي
انه ادور وين اضمك و أمك ادور علي
گوه لازمها رگبتك وامشي من فّي اعلفّي
بيا وكت يشرگ بدمه الطفل من يبچي اعلمي

امن الخيمه گمت ابعد..عبد الله يبني اكعد
مستحي أمن امك وختك
بنحرك سهم رجعتك
__
قبل ساعه اسكينه اجتني تگلي عبد الله كبر
وهسه نحرك صوره وانشگ وجيب اليخيط الصور
يذبحون اوليده بيده الماله ابوفاضل ضهر
اتفرفح اعللدم ولزمك يبني مو مي دم نحر

هزيتك احچي وياي..دم رگبتك مو ماي
اتفطرّت انه وشفتك
بنحرك سهم رجعتك
_____
راح اضمك وره ضهري وبوية ادخل للخيم
وحته لو ضمك يبين من وره اجتافي السهم
نفترض سهمك كسرته شحچي وانه كلي دم
مدري نحرك مدري دمك مدري شمثگل الجدم

جا وين اضم نحرك..لو امك ادورك
لتالي العمر ذاخرتك
بنحرك سهم رجعتك
____
هاي سادس جيه النه راح ادخلك و السلام
موقفك واگماطك ابيض وابيض يموت الحمام
راح ازورك حضن امك وطول شما بيك نام
هاي اخر نومه يمها وتندفن خلف الخيام

ولو شافتك مذبوح..هيه ولبنها تنوح
يحن درها لمكبرتك
بنحرك سهم رجعتك

الولادة الحقيقية لقلب الانسان
عنده سجودة على عتبة المليكة المعصومة...🩷

صفاء كماء قربة العباس.
الوجنتين تشعر باستغراب لم تستشعر من قبل بحرارة هذه الدموع.

اليد تشتري تذاكر الوداع
والقلب يمزقها😭💔

تلك الزيارة هي رحيل
((من عالم خشن بالحب..لعالم بس حنان يصب))

زيارة مشهد هوه تحقيق لامنية شائقة ماتت بشوقها

اضطراب عواصف بكاء بكاء بكاء
اعراض سقوط القلب بخيمة (جايخانة الرؤوف)🍃🩷

احتلال..احتلال
ورفعت تلك الرايا الخضراء وسط المحجرين

مُحتل ينسيك الاطلال والحنين للوطن.
فاصبح دعاء اصحاب القلوب المحتله

ادام الله احتلالك ايها السلطان🙏🩷

ادام الله احتلالك ايها السلطان🙏🩷

3:50 ص

#جزع_ختام_عزاء

ومصابه ما مثلة امصاب
صانع اوساده امن اتراب
يا زهراء يا زهراء
تچيله بلكت يگوم
فوكه الشمر كام يحوم
يا زهراء يا زهراء
ذباحه ما يرحم جان
لحگيله ميت عطشان
يا زهراء يا زهراء

نكطي اعلشفته مي عذب..هالضامي محروم..هالضامي محروم
مو تجوه يا زهره الرمل..تجيلة خيكوم..تجيلة خيكوم

......................................................
مذبوح ابنج مذبوح
ما عنده ام فوكه تنوح
يا زهراء يا زهراء
من عنده راح الذباح
والخيل اجت ما يرتاح
يا زهراء يا زهراء
فزعيلة صيّحي يبني
ويا زهره بيدج جفنّي
يا زهراء يا زهراء

ابنج حبيبيج فاطمة..ما ضنه يرتاح..ما ضنه يرتاح
ما غمضت عينه اهل..جي راسه برماح..جي راسه برماح
.....................................................
يمضيعه خل تبجي العين
محد بجة فوك حسين
يا زهراء يا زهراء
ااه وصدك تسوه الاه
الوحداني محد ينعاه
يا زهراء يا زهراء
ما غسلو ضل عريان
ويمه مجازر شبان

مديوره عينه اعللخيم..وكت الذبح جان..وكت الذبح جان
لافوكه متحزمه زلم .. لا تنعه نسوان..لا تنعه نسوان
...........................................................
ابنج يدور استنصار
لحكي الخيم صارت نار
يا زهراء يا زهراء
وامروة ماكو بهاليوم
اتفزع على اخيامه الگوم
يا زهراء يا زهراء
بس هوه ينهض ويطيح
يشهك هوه وكوه يصيح
يا زهراء يا زهراء

ضل بيه يا عالم نفسِ..عوفوا النساوين..عوفو النساوين
عوفوا المخيم والخدر..كصدو اعللحسين..كصدو اعللحسين
..............................................................

#لمولاتي فاطمة العليلة عليها السلام



حچي اليحب - بعيونه
فاطم بقت. - محزونه
شوگ الگلب - لظعونه
فوگ المرض چملهه الفراگ
بويه صحت - مابيه
گلبك بحر. - حنيه
تمشي واظل - ليليه
أبفيض الدمع لعيونك اشتاگ

وارتاح بس أبشوفتك يا لذة العين
لورايد اتعب بشر بَعده من الحسين
مامش مثل فيك أبد طولك بساتين

بويه عايف. أبنيتك بعمر الود
گلبي خايف لل ألعليله ماترد
ياهو شايف انسان بحساسه برد

ويلاه راح الحسين
ويلاه راح الحسين

_____
مره الحياة. - وغابه
بعين اليعوف - احبابه
هذا الهجر. - واسبابه
ناتج دمع وأمعاگب جروح
انه البقيت. - بحيره
وحدي اون - وزغيره
داري خلت - والديره
راحوا هلي وضليت للنوح

خالي بقه أمضيف البخت راحو زلمنه
ومن صار الوداع أبدمع گلت أنهبنه
وماضن بعد حتى بحلم. يلتم شملنه

خوفي باچر مشيب إيردلي الضعن
وانه اناطر حظن الحسين. الوطن
خوفي عاشر عيوني من هسه بچن

ويلاه راح الحسين
ويلاه راح الحسين

_____
شفت الگمر - ناديته
من صد ألي - بچيته
بعصرة گلب. - زتيته
وداع الله صاح بدمعه عباس
بانت وراه. - الغربه
هنياله جوده - أبگربه
كلمن يروح. - أبدربه
وانه البقيت. ابلايه حراس

موقف بقه بعيني جرح كلش هضمني
حظر محامل كل خواتي. وما حسبني
ميته ولا. عمي المرض. منك. حرمني

يا ابوفاظل. بسمك اندب لو طحت
دمعي سايل. عمي وعليك اتعودت
أنته كافل فرهدك مني الوكت

ويلاه راح الحسين
ويلاه راح الحسين

___
صبح ومسه. - وملاگه
أللمة هلي - مشتاگه
غصني ذبل - واوراگه
كلشي انتهه من صارو أبعيد
جلد وعظم - عافوني
شاخ السهر - بعيوني
جلمة وتحز - بظنوني
مني الحزن. ما أدري شيريد

تمنيت لو ويه الظعن وامشي بدربهم
يدرون بيه انه شكثر والزهره أحبهم
شوغة گلب حنية ظهر. كلهه بسببهم

لل الحبايب. كربله محظره جرح
شرد أعاتب. حسيني لورد برمح
تهل مصايب. حرگ خيمات وذبح

ويلاه راح الحسين
ويلاه راح الحسين

___
زينب ردت. - وياهه
امشي عله - ممشاهه
شگد ناطرت - محچاهه
چنت انه اظن تصيحلي امعون
ثاري البعد - موهين
بس بالحنين - إيبين
وني الحديد - إيلين
ومدري شنزل من بين العيون

ناگه أبظهر ناگه الظعن أبعد عليه
وبين الهوادج عاينت سكنه ورقيه
محد علي دار الوجه واني أشبديه


وادري بيهم محد إيردلي عدل
من حچيهم. أمتاني عبدلله نبل
ظيمي ليهم. زلم. هاشم تنچتل


ويلاه راح الحسين
ويلاه راح الحسين
_____

#قصائد محرم الحرام ١٤٤٥ هجري


سيد عباس الفاضلي