الخصائص وما ادراك ما الخصائص

عالم مولاتي فاطمة عليها السلام
#عالم_الزهراء

عالم الزهراء..جوه ما ينوصف
انكسار ونوح..بس حنان وعطف

عالمها يبدي امن الدمعه الاوله
وتشيب وتبقه بحب طفولة
يلم جفها دمعك وترتبه گلبك
وبس يمها تلگه الحب اعلصوله

اتداري الروح..وترحم بأحوالي
كلها اجروح..بس تداوي امثالي
كلشي يروح..وفاطمة تبرالي
.........................................
عالم الزهراء..كلشي بي منفرد
ما يقدر املوك..بس يقدر العبد

حزني الاعرفه يكئب المشاعر
وحزن الزجيه يطيب الخواطر
امعيشتنه حب ورحمه ومحنه
وعيشتها باب وطف وحوافر

باب ونار..وزهره تدفع بيهم
والبسمار..زاد جورة اعليهم
بخدها شصار..الله لا ينطيهم
...............................................
عالم الزهراء..ما يحده سكن
وي كل ادموع..بخد اليحب ضعن

نتسوطن بحبها والمصيبه
غصبو فدكها وضلت غريبة
ومن دار اهلها هم شيلوها
جي تبجي عن والدها الحبيبه

الثاني فلان..تغثه منهه الحسره
ودار احزان..علي حط للزهره
لحد الان..تبجي بي منكسره
...................................................
عالم الزهراء..نادر بكل امر
تجبر المكسور..ام ضلع منكسر

تأمن حياتي الرايح أمنهه
بعالمهه يفرق قدوة حزنهه
شكبره سبيل الماي بخدمته
يذكّر اليجونه بمصاب ابنهه

أشرب ماي..واذكر الما ضاگه
الماله افياي..ويابسات ارياگه
وابجي لهاي..موحنينه الناگه
.............................................
عالم الزهراء..مختلف بالحزن
بي ابن مذبوح..وام كسيره وتحن

اتبدل كساء العدهه وتغير
وشالت قميص امبجيهه واحمر
هذا القميص بجفهه تخيط
يخيول أمية الله اكبر

اقدس عين..انتو شو بجيتي
شجابج وين..يا صدر مسيتي
بطول حسين..كلشي ما خليتي

#شور_فزعة

عيش كل يوم بحياتك..جنه اخر يوم خدمه
وماي لا يوصل جمرتك..جمرتك يا كلبي ذمه

دنيا هاي
الموت بيهه ابلا وكت..
وتبدي تحصد شزرعت
وتبقه بس ذكرى وصور

دنيا هاي
والزرع دمعه حصد
بحضن ابو الاكبر كعد
ويحضر بدفنة الكمر

اؤمن يكلبي وابچي لمصابه..تالي مصيرك جوه الترابه
يشفعله ياهو وياهو اليحضره..المامؤمن بدمعات الخرابة

كلشي يموت وكلشي يروح وتبقه دموع العين
وين يضم وجهه امن الزهره الما باجي اعلحسين
__
هواي ناس تموت عدنه..وقلة يبقة بخير ذكرة
وقلة تنخط فوك اسمهم..خادم الزهره اعلگبرة

ما يفيد
لا خليل ولا صديق
بعينك يضيگ الطريق
وكلشي ليحيطك ضلام

ما يفيد
والعمل يبقه مصير
اوية الحرك خيمه تصير
وي اليطفي الخيام

شكد تبقه عايش تاليهه تخلص..امن املاگه ربك ما بيهه مخّلص
تلاكي الهك كون بدمعتك..يا كلبي لين لموتك ترّبص

شجابه اللاكه ربه بحدقه اوية الناس الباجين
وين يضم وجهه امن الزهره الما باجي اعلحسين
__
خلي يا كلبي طموحك..تموت باجواء العزية
مو بعيده النشغه تكتل..نشغت وماتت رقية

ومايموت
واليحب لا ما يموت
دمعته لمحبوبة قوت
يعيش وي ناعي الجرح

ما يموت
الحبه صادق يبقه ضِل
ايكاسر شموس الهزل
وكل محرم ينذبح

دنيا وابد ما بيهه سلامه..يا گلبي اشري حسين وخيامه
وادعي بحصيرة يشيعوها جثتك..شيهنه بحياته السلبو امامه

باجر ينحط كلشي ونوكف ونتجازه اعللزين
وين يضم وجهه امن الزهره الما باجي اعلحسين
__
اتذكر الطفله العليلة..وخل يموّتك انتظارك
ممر هاي الدنيا النه..وبيدك تحددها دارك

بين اديك
اختار يا دار التريد
حسين واحبابه العبيد
لو جنهم والضياع

بين اديك
لو تصيره بخيره لو
تاكل امن ايد العدو
وتنحشر وي لتباع

سل سيفك لضعنه وتاني ثاره...حب جرحك وبلكي اتطفي ناره
المن وقارك والي تحبه..بسيف الاعادي شيبة ووقاره

والما ذب روحه اعللخدمة باجر يوكف وين
وين يضم وجهه امن الزهره الما باجي اعلحسين

#هذه_القصيدة هدية لروح الشاعر
#زيد_عدنان_الزيدي

@Safe477 لطلب اللحن

لولادة مولاي الرضا صلوات الله عليه

بمولد الضامن وثامن الساده
كل گلب كل گلب اعلن اعياده

الليلة ميلاد الرضا..الليلة ميلاد الرضا
...............................................................
يا أنيس انفوسنا وحبنا وقراره
الفرح مثل الحزن هم بحراره
كون كلمن يفرح ترزقه ابشاره
لمشهدك يا سيدي يحصل الزياره

نبتهج نبتهج بهجة ميلاده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
ليوم ميلاد الرضا انطر واتاني
فرحتي تقربني من صاحب زماني
ابتشارات وهلا ونحسب ثواني
ينولد مولانا ليحقق لااماني

يا هلا يا هلا والمحب ناده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
يا عزيز اختك المعصومه الكريمه
فرح گلبي بمولدك مولاي ديمه
الشمعه من اشعلها الك تنطيني قيمه
ورجعتني رأفتك فطرة سليمة

سيدي سيدي يدلل الراده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
يا شمس طوس الابد ما قل ضواهه
يا روؤف التكرم الحب والوجاهه
يا أنُس روحي وغزلها ومحتواهه
كبتك تحرك مشاعر من هواهه

واليحب واليحب يطلب امراده
كل گلب كل گلب اعلن اعياده
الليلة ميلاد الرضا..الليلة ميلاد الرضا
...............................................................
دمعة الفرحة عزيزه اعلينه تصبح
وگلبي وي سلطان عشگه بدمعه صرح
انه لو ما افرح الكم المن افرح
غلط كلشي بدنيتي وبس انتم الصح

والبجه والبجه دمعه ايفاده
كل گلب كل گلب اعلن اعياده
الليلة ميلاد الرضا..الليلة ميلاد الرضا

الى مولاي انيس القلوب
#يا_شمس_الشموس

حبيبي يالرضا..حجولي اعللدرب
المشه بجوك طهّر.. طريقك كله حب
واوصي الي مشو..يزورولي الگلب

احاجي بالمشو..بدمع عيني واون
يرايح الرضا..طلب عندي بحزن
بمتاعك للسفر..اخذ گلبي اليحن

مشهد حلم ما عافت عيني
طاري اليزوروك ايبجيني
حته البياض الفوگ الگبه
بالصوره انضرله ويجويني..

شما جانت ضروفي اصعب..رحمتّك يالرضا اكبر
أمل عندي يجي هاليوم..وعلى درب الزيارة اكدر
.............................................................
اساهر وانتضر..صورّك سلوتي
واسولف للصور..حبيبي طلبتي
اعلشباجك احط..جبيني بدمعتي

واشم ذاك العطر..ليودي النينوه
اريد استنشقه..وبعد ماشم هوه
واموت وقصتي..گلب حِب وانجوه

اقسملي ازورك كون بنية
بس روحه اريد وانسه الجيه
يا راعي گلبي شوف دموعي
خل گلبي يرجع يم راعيه

بركن شباجك الفضي..اريد استنشق الجنه
وادور عالغبار ادوار..واخذ طلبتي منه
.......................................................
رغم كل البعد..ومسافات الهجر
حنانك سيدي..يمسني وانكسر
حبيبي استعشرك..بكلب كله جمر

واذا ابعد احس ..الهوه بريتي بضنَك
شوكت اهجر هلي..واجيك استوطنك
غزال وصيده حِل..وطمعت بمأمنك

بمعصومتك يا سيد مشهد
حط لجفائي الوي صحنك حد
وثبّت خدمتي ودمعي لحسينك
مو ساعه ابجي وساعات ابرد

اطير وابتعد واغفل..وسهم حبك يصوبني
واطيح امن السمه لعينك..وترجع نضرتك حزني
..............................................................
برياضك سيدي..اريد اصبح عبد
وتعدني اويه الاجو..اذا تبدي تعد
الزرعت بگلبه حب..لفرجكم مستعد

البعينه العطش..بمناره ينروي
التبخته يالرضا..مصيره مهدوي
وانه بارد گلب..واجيت ارد انجوي

اعذب اسم مر اعللساني
اسمك يودي لعالم ثاني
امن اسمع رنين اجراس الگبه
ضجة يتامه يضج وجداني

نغم كردسوك ودكته..اطهر بي كمت سمَعي
وعلى اعتاب اليزورونك..اذب گلبي واذب دمعي
...........................................................

🎥 شاهد | أغرقتني خيرًا

🎙 أداء: صادق السماهيجي
✍🏻 کلمات: السيد علوي الغريفي

🌟 العتبة الرضوية المقدسة
📱 +989903888900

بأسم مولاي الرضا ونحن في ولادته🤍⚘️

رسالة لكل حسيني👇💔

https://youtu.be/pbNgzSMaIeM

#ثكيل
اين السبيل...بعد السبيل
__________
ابعاد عنك وانته اقرب..النه من حبل الوريد
مو بعيد اعلينه انته..واحنه صيحنه بعيد
انه اريدك يابوصالح..وبعد كلشي ما اريد

اريد وياك يا مولاي..واصيح يابوصالح وين
اصيح براحه يامولاي..وجرحك ما مغمض عين
كالوا فوك باب الدار..مخلي انته قميص حسين

يكطر دم قميص حسين ما ناشف
يالشايف حرك خيمة أنه اشايف
اسف على الراحه اوداعتك اسف
____
قبل لا اتمنه اشوفك..كون اشارك بالعذاب
الماي اتهنه بشرابه..وانته تنشغ بالشراب
يا طفل يبجي تحضره..لا يفز جرح الرباب

صح ما ادري طولك وين..بس اعرف شنو امبجيك
الماي النار ركض الخيل..كلشي لكربله يوديك
شما واست دموعي الناس..اصرخ ياهو اليواسيك

محد مسح دمع عيونك التجري
تبجي بيا ارض مولاي لو ادري
الم كطرات ادمعك ابقه كل عمري
_____
الجمعه اذا ما تبجي عيني..عنك وعن خيمتك
اتعمد اتغيب حبيبي..عن دعاك وندبتك
بعين ما تبجي اعلجرحك..شلون الاگي حضرتك

العين الما تشوف امصاب..ولا تستاهل اتصدّك
الشاب ايعين كون الشاب..وكالولي عنت جدك
مثل خد اكبرك حطيت..يمهدي اعللترب خدك

بأبي وبأمي يا مولاي وبولدي
صدك يمته تصير وياك يا مهدي
ويمته اعللترب مولاي احط خدي
_____
موعد العشاك بسمه..وموعدك كون بنحيب
اليجرح بحجية حبيبة..شما يحب هم مو حبيب
انه تهضمني اعرفك..بس اصيحلك غريب

شنو من ذنب المسوين..واتحّرم لفض اسمك
لانحجيك لا نلگاك..ولارسامنه يرسمك
عشنة بأمل شامة خد..يمته نصدها ونشمك

واگلب امسامر العشاك ما الگه
علاقة انبنت بس عالدمعه والحرگة
شلون انغازلة الخيماته محترگه
__
عاشرك هب عطرك بينه..وكون تترس حزني روح
وين ما مولاتي تحضر..كون اكابلهه وانوح
لياخرابه اوياكم انعه..ليا سبيه ليا جروح

محرم يابوصالح جاي..ادعيلي اضل طاهر
ارزقني كلب مجمور..يحس بحرورة الصاير
باصابع تسعه مثل حسين..ادعي نموت بالعاشر

يالخايف علي وانه ولا خايف
جرحي تروفه يالجرحك بقه نازف
الحافر فوك عينك سيدي شعايف
_____

مرات احب وابتعد
بس خوفي لا انبعد
يجبرني ما اهدة

شچوة عرب خدمتك
تخض بينه خض سيدي
واتطلع الزبدة

يا ابا عبد الله🤲

مقتل راح اروي بگلب مهضوم
عن اصغر امام المات مسموم
وحيد الرضا وهضموه
من السطح شمروه
ومحد شال جثته وكال معصوم
______
الجواد اعلليتم مفطوم ابصغر سنه وفكد والد
لاله اخوان لاله اخوات وتكتل غربة الواحد
فك عينه بسجن مظلوم واثر كيده بدية شاهد
اعلسم جده اويه سم جده بقه مولاي متواعد

الغريب بمولده تضل غربته وياه
الماله اخوان توّلي باجر اعداه
الوحيد وما اله اخوان
باجر ماله دفان
ومحد شال جثته وكال معصوم
_______
اجه لبغداد والغربة اجت وياه مرافگته
سبب موته فقه قوله بقصر المعتصم وآفته
خافو لا تحبه الناس ويحطم طاغية وكته
سمو بالعنب مولاي وتورم شكو بجثته

اليوجع اكثر امن اسموم الجبود
المنه وبي يسمه وهضمته اتزود
يا ناره وهضمته
الدست سمه مرته
ومحد شال جثتنه وكال معصوم
_________
ضل يعالج من السم ومرته السمتّه بكتره
طلب من عدها شربة ماي گالتله ولاگطره
يتحرك ضل يمين ايسار يشهگ مختنگ صدره
وتعالج يمين ايسار ووياه تشهگ الزهره

گلب الزهره يتلوه اويه ابنها
تشربه تريد وتحطه بحضنها
تريد تلولي فوگاه
دللو سمته اعداه
ومحد شال جثتته وكال معصوم
________
شبه الدم طلع منه بكثر الاذى وكثر الصار
السم بجبدته وعطشان وجان الوكت كلش حار
كوه بكوه يزحف كام حد ما وصل سطح الدار
يدورله على عوان ووحيد منين ما يندار

اليدفعوا من سطح هم يكدر يكوم...؟؟
وفوكاهه اندفع مولاي مسموم
زرگه اشفافه مولاي
مات بحسره الماي
ومحد شال جثته وكال معصوم
___________
بس حسين جنه نكول محد غسله وشالاه
ومو بس هوه ما مدفون لا هسه الجواد وياه
لا لا تجفين لا تغسيل لا ضاگت الماي اشفاه
بس الفرق عن حسين ما حرگوا خيم فوگاه

وفرق ما عدنه اخت يسبوها للشام
وما شاف بخرابه ابنيته تنام
صح ما بات برماح
بس ضل مجوي لصفاح
ومحد شال جثته وكال معصوم

الى جواد الائمة
#وارث_امصابين

يالوارث امصابين..من الحسن وحسين
كون تواسيك الشبان
هم مسموم وهم عطشان
يالوارث امصابين
_________
سيد بعمر الشباب..وطاح ذابل مبسمه
بين غربة سم امام..وبين معصوم بضمه
الخمسه والعشرين عام..جروح صابن فاطمة

ما عنده خوات ينوحن اعليه
وحيد اهله بغربته
ومرته ما بجت بمصابه مولاي
السمت جبده مرته
يشبان الجواد يريد عوان
يذب ماي اعلشفته

بعز الشباب ومات..يستاهل الدمعات
متجوي وما عنده اخوان
هم مسموم وهم عطشان
__________
اه من مشهد لموتك..و اه ابد ما تنحبس
انطونه شاب البينه خله..بكاع خده وبالشمس
منو كبلك يالجواد..بخد الاكبر ضل يحس

شبَ اعللجرح وادموع الامصاب
الوكت من صغره خانه
يتيم امن الصبه ويتنفس اهموم
ينزف من حنانه
المثلك خده مو بالكاع واشموس
لا سيد زمانه

براگ العطش والسم..ضل كلبه متحزم
والضامن وياه ذبلان
هم مسموم وهم عطشان
__________
سطح دارك ما بردلك ..حار جن سن الرمح
خضرة السنين العليك..وصوفرن فوك السطح
اشجم ظهر صب حره نار..وجم شماله وجم صبح

يوحيد الرضا يالما ضكت الماي
امك وين عنك
لو ريحانه امك هسه وياك
تغطيك وتحضنك
ثلاّثه اعللسطح وانوب يرموك
وولا واحد يجفنك

سم وعطش واكسور..من السطح مغدور
اكسور البيك بكل امجان
هم مسموم وهم عطشان
__________
على دفنك يبو الهادي..املوك كامت تنجبر
ندّه منك مسك فايح..عطره طاف بكل كتر
هذا عطرك غث قصرهم..وخلو لطولك گبر

من قم النعي يا عمه ويلاه
يا اكبر خساره
يتورم جمالك ليش بالكاع
وانته ابن الطهاره
من نيران معصومه يمولاي
عليك ابجي بحراره

مسلم بجه وينعاك..من قصره طاح وياك
صح طايح بس عالي الشان
هم مسموم وهم عطشان
_________
اتنعمت انه بشبابي..يا مُحمد والثمن
جبدك وخدك وشفتك..بالمصايب يلتقن
بجرحك اتلكة محرم..والهواشم والضعن

حريص وبيه تجرح خايف هواي
الاكي حسين بارد
بمصابك خذتني لريح الاحزان
تهفي لجمري رايد
يا باب المراد اتصب بالگلوب
نيران المواگد

يالغربتّك ضعفين..جرحك جواز حسين
للعاشر جرحك نيشان
هم مسموم وهم عطشان

عظم الله اجورنا واجوركم

بشهادة مولانا الجواد 💔

يا حسين

الخدمة تشري الگلبه طاهر
وانه خايف
خايف تعاتبني باجر
ومن اقر بذنبي افشل
ومن انكرك جرُمي اعظم
وانته شاهد على الصاير
انه خايف لا تمد احبال سفنك
وانه جف ايدي بعيد
صيد يالرايد تصيد
بين جفي وبين جفك مدة ايد
ليش ساعه وياك اصفه
وساعه وي ابليسي اعيشن
وساعة ما ادري شريد
هذا كلبيش البصدري
ما يلين لخاطر اسمك
وانته الملين الحديد
وانه حاير
خايف تعاتبني باجر
شلون جنت تصيح باسمي
وكلبك لعدواني صاير
كون عمري يصير دين
انتم ارباب الطهاره وانه وين
فضل زايد هذا منكم
من اصيّح يا حسين

مدينة مهجورة
مشاعر الجماد بها اصدق من سكانها
الطريق مظلم والنور الساطع الوحيد
هي تلك القطعه السوداء التي كُتب عليها
(لبيك يا حسين)
امي ولبّنها واستكان الشاي الممزوج بصيحات (جاي ابوعلي..جاي ابوعلي) هم الصادقين.
الصادقين التي تبحث عنهم امك الزهراء المثكولة قائلتاً
(ادور بالمجالس مثل المضيعه)
القلوب التي ادعت حمل اسمك
كالصبير يدعي الجمّال ولكن يؤذي كل من اقترب اليه
الوقت يمضي وتذاكر سفينتك على وشك النفاذ
كل الذين ارسلت لهم التذاكر
ضنّو انهم امتلكو النجاة واغتروّ بها على العالمين
حته مزقوا تذاكرهم من شدة الغرور
الذنب كالسيف انه لم نقطعه قطعنا
لا يزال الدين لعق على الالسن
حته انت يا مولاي واسفي على حروف اسمك
الذي اصبح ايضا(لعق على الالسن)
اسماً تنعاه وتتهجاه الزهراء ...؟؟
اصبح غريباً بين الالسن.
الماء يهجر الاراضي بدون ضجيج بكل هدوء
ولكن بين ليلة وضحاها ترى الارض جرداء
الهوان هوه هدوء رحيلك
برضيعك المفطوم دمعاً لا تُذقنا هدوء رحيلك

(الرحيل)
شفاه ذابلة
عينان غائرتان
من اين مكان الرحلات المتجهه لقلبك الغريب
اقترب الرحيل ولا وداع لي لكل مُدعين الحب
العطش باب الوصول
لا يمكن ادعاء العطش
فأين عطاشى الحب....؟؟