مولانا #أمير_المؤمنين صلوات الله عليه
مخطاباً

سلمان هذا أول جرح...المكابر اعليه ما يصح
بدموعه حيدر ينفضح....لو مر اسمهه ابالي

كدما عزيزه ام الحسن...شديت روحي ويالجفن
وسنينه ذيج المضن...بكل لحضه تتراوالي

سلمان هذا القلب يخفق للحبيب
مالي اناديها وفاطم لا تجيب
حتى أجاب القبر من فرط النحيب
من دونها أصبحتُ مكسَوراً غريب

جرح الترافه شكد صعب..اله بلقاء من يلتئم
هذا انه قتال العرب..ضلوا يتچولي الزلم

جروحي. بيهه أدفنت هذا العشك
جروحي. يواسنّي كلما اختنگ
.............................................................
بيها اغسّل منفجع..ومديت ادي ماكو ضلع
لحية علي انترست دمع..واحوالي لا موهيه

وجفي الابد ما مثله جف..عالزهره مدري شكد رجف
سلمان شيفيد الاسف..وجفوفها مچوية

من أول الليلِ إلى وجههِ الصباحْ
لامؤنساً لي غير أنّاتِ الجراحْ
في ضلعهاِ المكسورِ ألحانُ النياحْ
ذي حرمةِ الزهراء كيف تستباحْ


ميته ام حسن وتحركت..تحضن ولدها بمغتسل
ضجّت بواچي بالسمه..وبدموعه وحي الله نزل

ينادي..يا حيدر الحگ للسمه
ينادي..وخر الولد عن فاطمه
___________
بصعب مواقف من تمر...گبالك حبيبك ينكسر
وما ترفع ايدك تنجبر....نارك تشب بضلوعك

بگراب سيف تنجتف...مكسور بس بلا نزف
كسر الخواطر يختلف...ما ينفهم موضوعك

تبقى جريحاً حائراً بين أثنتين
في أن تجردَ سيِفِك او أن تلين
والقوم قهراً سقطوا منها الجنين
والكلُ يعرف انك الليث البطين

هذه انه قالع خيبره...ابابي تاليتي انفجع
جفي الامس رد الشمس..ما يكدر يطيب الضلع

دفنتهه. وكلبي نسيته اعله الگبر
دفنتهه.ومتأذيه من ذاك الكسر
...........................................................
كاتلني للزهره الحنين..انه امير المؤمنين
تالي اشكي يم بيري وحزين..بنص امتي عايش منفي

ياگبلني كاتل حرمتي..والداس بابي وعتبتي
واتحمله يا غربتي..واعصر فقاري بجفي

البئرُ يدري أيُ حزنٍ في الفؤاد
منفيُ أمسى من هو شيخُ البلاد!!!
أمامُ أبنائي بأحزاني أُقاد
والقوم ياسلمانُ قد لزموا الحياد

امتيش ما حفضوا الي..لا حرمه لا حفضو مقام
انه الامير الطالبي..وما ردو اعليه السلام

غربتي..من غمضت عين ام حسن
غربتي..بنص الوطن مالي وطن
________

حسين حازم البوشي
مصطفى صادق اللامي

دخيلج يا مولاتي#يا_فاطمة


فاطمي..من منشائي لمماتي
فاطمي تخلص ردت حياتي
_____
بتجارات البشر كلها..تطلع يا گلب خسران
وتجارة دمعة عيونك..لو ربحان لو ربحان

ياهوّه تنطي دمعه ويعيشك عمر
ياهوّه بس تنعاله ينطيك الستر
هذا الدلال امن ام حسن ما ينخسر

جابتنه لخيمة عزاهه
وانطتنه حب ووجاهه
مكسورة ورايح ضناهه
فاطمة

فاطمي..بيا فاطمة نجاتي
فاطمي تخلص ردت حياتي
___
جرب تنجرح مره..جرب مرة تبجي الروح
شوف شلون مولاتك..منك تشتري الاجروح

شراية اجروح الخدم بس فاطمة
وهنياله كل خادم يهاجر عالمه
يروح بدمعته لعالم اجروح وضمه

السلم بيد الزهره گلبه
بدرب الدمعه يبدله دربه
الترضاله يرضاله ربه
فاطمة

فاطمي..توحيدي نص صلاتي
فاطمي تخلص ردت حياتي
_
اذا دمعك نشف مره..اطلب دمعه لتكابر
اطلب من گلب فاكد..عاش حرورة العاشر

اطلب جروحك من گلب عاش الرعب
مفجوعه بس صبت على اهل الخدمه حب
بيد ام حسن سلم قرارات الگلب

مولاتك ما يهده ونهه
محزونه شثگله حزنهه
اسِعدها بجرحك لأبنهه
فاطمة

فاطمي..بمجلسهه الكه ذاتي
فاطمي..تخلص ردت حياتي
___
استوطن يا گلب جرحك..واحضر كل عزه تحضره
واذا جرحك برد مره..بالك جرحك تعذرة

ضل فاطمي ولحد يغير هالقرار
ما دامه مكسور الضلع ضل بأنكسار
ما دامه خدهه احمر يجرحي ابقه حار

دمعتها بخدها جرّية
كل مغرب عدها عزية
ابجي لأهات الزجية
فاطمة

فاطمي..تقبلني امنياتي
فاطمي..تخلص ردت حياتي

#لمولاتي_الزهراء صلوات الله عليها

فاطمة..يعني طفل بالدم فطيم
فاطمة..يعني ضلع صابه الزنيم
فاطمة..يعني الحُسين يضل يتيم
__________
فاطمة..يعني قتل عمد وشروع
فاطمة..يعني عقيلة تهل دموع
فاطمة..يعني صدر دامي الضلوع
___________
فاطمه يعني اشتعل منزلها نار
فاطمة يعني وجن ضل بي حمَار
فاطمة.. يعني انهجم للنبي دار
_________
فاطمة يعني الحنان الينحرم
فاطمة يعني الحسن راحتله أم
فاطمة يعني ولا يشفه العضم
_________
فاطمه..يعني ضلع دامي وكسير
فاطمة..يعني جرح غيرة أمير
فاطمة..يعني علي يحجي اويه بير
___________
فاطمة..يعني أمان ايضيّع أمان
فاطمة..يعني طفل يشهگ دُخان
فاطمة..يعني ذبح رحمه الزمان
___________
فاطمة يعني حياة ابلا حياة
فاطمة يعني الجفوف امحرگات
فاطمة يعني علي بمغتسل مات
___________
فاطمة..يعني الرمح جازه يعيل
فاطمة..يعني الجذع كلش ثجيل
فاطمة..يعني گبر ماله دليل
___________
فاطمة يعني ابن طلاّب ثار
فاطمة يعني دمع مال انتظار
فاطمة يعني يمهدينه البدار

كيفية التوسل بالزهراء ،(عليها السلام) روي في كيفية التوسل بالزهراء، أن تصلي ركعتين، فإذا سلمت فكبر الله ثلاثا، وسبح تسبيح الزهراء (عليها السلام) واسجد وقل مائة مرة: يا مولاتي، يا فاطمة أغيثيني،
ثم ضع خدك الأيمن، وقل كذلك، ثم عد إلى السجود وقل كذلك، ثم خدك الأيسر على الأرض وقل كذلك، ثم عد إلى السجود وقل كذلك مائة مرة وعشر مرات، وأذكر حاجتك تقضى.
#العتبة_الحسينية_المقدسة

مولاتي #أم_البنين صلوات الله عليها
عند وداعها مع ضعن حبيبها

من صارت..ساعة رحيلة
بين ايدي..ايد العليلة
اتشهادنه..ونقره العديلة
ومتنه امن الاوداع

وردينه..بممشه ثواكل
فوكانه..اغبار المحامل
العيشنه..صوت القوافل
بلكت يجي ابساع

عكب الضعن عشت العمر
ساعة اصبر وساعة انكسر
وما فارك الساني الشكر

عن ياهي اقدم شكري اله
ليا منزلة ويا منزلة
خلاني اواسي ابنيته
وولدي تواسي بكربله
_______
جي فوكه..اتراب الضعينة
ضمينه..الثوب وبجينه
واترابه..غالي علينه
بي عطر الاحباب

امن اترابه..روحي هواها
ويا أخر ..جلمة حجاها
ما تسمع ..اذني وراها
بس دكة الباب

من احسيني سمعي منترس
بأي كلمه دونه ما احس
شأبذلة وشوية النِفس

شما ربي وشما كبرت
لحسيني احسن قصرت
بت عدي وحده بسفرته
وعوضني خله يمي بت
_________
بغيابه..دمعه شهگنه
ويا ناره..من افترگنه
شما يبعد..احنه احترگنه
وما نطفه بالماي

اعلجروحي..اشكر نعمتي
قرباني..لعينه غربتي
ودم ولدي..واسمي ودمعتي
لعيونه مولاي

جنت انه الولي بيا حسين
متعلقه بي وافضاله دين
وما ادري ضعنه هسه وين

حط رحلة وين بيا كتر
مرتاحه روحه منقهر...؟
متعوده عباس الصبح
يوديله زادي وابتشر
_________
اشتاكينه..نشتم نفسهم
نتجوه..ونتاني حسهم
گابلنه..مربط فرسهم
تانينه خيال

بنص روحي..شمثكل حملهم
يا هاشم..اه يا نزلهم
ضل خالي.. امن اسباع اهلهم
من حالٍ لحال

خالي النزِل منهم هلي
وديوان الاكبر شو خِلي
ابجي وانادي يا علي

كتال اليحب البُعد
بلكت علي لاخته يرد
ولحسين اودي ارسالتي
واتنّشده عن الولد
________
للشايل..هوه وشبابه
راح اذبح..كلبي اعلبابه
بدوية..و أنعه غيابه
وانعه بگلب حار

راح اعگد..عمري وسنينه
ودمعاتي..اباب المدينه
واتنشد..وي كل ضعينه
واتنطر اخبار

شما اسمع اجراس لضعن
اسئل وادور ما اجن
نوگ الخذن گلبي ومشن

عكس الجنت ليه انتظر
جاني وفجع گلبي بشِر
كلي الرمح  شايل ضوه
وسولفلي بضلوع الصدر

#شهيدة_الانتظار
مولاتنا أم البنين

مذبوحه من وداعك.. يوم الرحت
و شهيدة انتظارك..هسه صرت

فكيت حزني بالجفن وحته الجفن بجيته
بمغيسلي و بيه نعي يحسين ما ناعيته
يالنايم برمضه ورمل فضلك ولا وفيته

بالمغتسل واتعذرك..بمصابك انه امقصره
مو يمك بالليل اهدعش..ما كابليت الزهره
متت بس جرحي نارك
شهيدة انتضارك
......................................................
من كد بواجي عيني..عيني انعمت
وبس صورتك حبيبي..بروحي بقت

معمية بس عندي امل ترجع تضوي عيوني
خمسين واكبر بالعمر واطفالك يكودوني
ام البنين بموتتك من النعي يعرفوني

لميت كل نوح البدو..ونحتّه بأثر هجرانك
وبدلته شوفي بالعمه..وما بدلتها احزانك
دمعتي وكلبي دارك
شهيدة انتظارك
............................................................
گبور بأديه ابني..لولدي والك
وكل مغربيه ازورن..واتوسلك

بانيته كبرك وحده ميزتك اعله اولادي
وامرادي اموتلك بجي ومنك اريد مرادي
سكّت شكو بكلبي حجي وخلي حُسين ينادي

لحد ما يرد ثارك الي..خليني هم منتظره
وحته بمماتي استحي..ماريد كبه وحضره
الامر امرك قرارك
شهيدة انتظارك
..............................................................
كالولي عن رقية..من شافتك
ماتت حبيبي فوكك..وي شبگتك

موتها يحسين العشك وهم ردته الك يكتلني
يالحاط جرحك بالگلب اكثر بعد عذبني
يرحولك فدوة الولد وعمري وسهم عيني ابني

من نشغة وحده طفلتك..قهروها بيك وماتت
ولجروحي نار ارقيتك..قدوة بواجي صارت
لدم شيبك ووقارك
شهيدة انتظارك
...............................................................
يم گبري نزلوني..واتذّكرت
محد دفن حبيبي..وانه نحت

لا تحضر بوكت الدفن يالمابقو خوانك
تشييعك اتراب وشمس وكالخشبه باقي السانك
فوكك بناتك بالعبي فيي سون لجثمانك

ام الكمر واسود بقه..كلشي بحياتي اخلافك
المغيسل ومايه جرح..المي ما وصل لشفافك

احتضاري لاحتضارك
شهيدة انتظارك

#أم_البنين


شنو هذا الوفه المامر گبل بينه
شنو هذا الربه من يا ضوه وطينه
مثل ما ولدج اتربو يبدوية
بس لحسين يا مولاتي ربينه

نداء أم البنين..حبيبي يا حسين

نربه
بحصن رباني
بذكر عطشاني
أمان احزاني
هيه ام القمر

نربه
بوفه البدوية
لهضم مسبيه
خدامه ونيه
هيه أم القمر
_______
ما لوليلتي مثل اللولن وربن
تلولين بحسين وعالوجن صبن
منج يا حسين التطلع حرورة
ويا أم جعفر دموعج زلم سون

نداء ام البنين..حبيبي يا حسين

بدمعه
وحزن لولتهم
جمر غيرتهم
منو الربتهم..؟؟
هي أم القمر

بدمعه
بدو مملوحه
وحسين مجروحه
درس واطروحه
هي أم القمر
__
نعيچ ماكو مثله بكل نعي النسوه
بجيتّي المدينة اعليها بالگوه
وعميتي وگلتي فرحانه بعمه عيوني
عيون وما تشوف حسين ما تسوه

نداء ام البنين..حبيبي يا حسين

تنعه
الحجر منزلها
وبجه وقر الها
دخيل بضلها
هي ام القمر

تنعه
وابنها ادخيلة
كفيل العيلة
بحزن توميلة
هي ام القمر
_______
بيدج مگبره شيّدتي لونينج
ورشيتي عليها ماي البعينج
شهيده شلون ما اگولن شهيده اعليج
يالمتي بجي وحسره على احسينج

نداء أم البنين..حبيبي يا حسين


ماتت
شهيده بحسره
على ابن الزهره
بحزن منكسره
هي ام القمر

ماتت
شهيده بونه
شبقه من ضعنه
كتلها حزنه
هي ام القمر

افرح من گلب وأتانق بهاليوم
منو يتقارن بميلادج الطاهر

واهجي الفرحوا وكتبوا لغير اعياد..!!
ومولودج تناسو فرحته الظاهر

اليمه الماي يجري وخير يسبگ خير
المن بالصحاري يدور وحاير

الكتب للدنيا اهل الدنيا تفرح بي
ويخلص موسمه باجر عگب باجر

الكتب للزهره اهل الزهره تفرح بي
الهلچ سميعته شكد يم حسن شاعر

كلمن جاب خيله وكام يمدح بي
وكلمن گال خيلي أمصل ونادر

وبدن يتسابگن واتناسن الميدان
نسن خط النهاية بيا كتر صاير

كد ما عجة صارت خيل تسحك خيل
وخاسر گام  يتبختر على الخاسر

والملاج من عاين طراد الخيل
قرر يترك الخياله ويهاجر

#متباركين

قبس رباني منه اللؤلؤ انصاغ
وزمرد خاص ما موجود مثله

نهر من اللبن وامخضره الاجروف
جرف يتبره والثاني ايتوله

اجت نور وعمت عباد الاصنام
وخير الله نزل بيها وتجله

من راد الله علة لخلق الاكوان
غيرج يم حسن ما شاف عله

تعبد والعرش من تعبد يهيم
السمه كلها بعبادتها اتسلة

خل يفرح محمد كوثر انطاه
منو بهالدنيا جايب زهره مثله

كلمن گال عنك ابتر انعاب
شيخلف بعد ابتر نگله

هلا بهالجية الهاي الفكت اگلوب
هلا ومية هلا يا احلة اطله

محمد يتمه كله بجيّتچ راح
امه وكلشي صرتي وبنته واهله

هلا بالمسّحت دموعك يبوتراب
اجت لترد سلامك يبو الحمله

هلا بالجابتلنه الحسن وحسين
هلا بأم زينب أم الخير كله

هلا بأم محسن وام كل الانوار
بطهارتها ولطفها الدنيا تحله

هلا بالسووت أمن امثالي خدّام
وانه گلبي الردي محد يقبله

هلا بالنزلت دمعات العيون
هلا بالكرمتنه بوكت ذله

هلا بالزهره ام خدام الحسين
اجه الفي النعيش بخير ضله
هلا ومية هلا يا احلة اطله

#مولود


هي بنت من...؟
هي زوج من...؟
هي أم من...؟
هي فاطمة...هي فاطمة
______
يالمن الفرح محروم
افِرح وابتهل هاليوم
ما مولود اي معصوم
لو ما صايره الزهره

افِرح من گلب والسان
نزلت كوثر القرأن
لاهي من انس لا جان
بيهه الدنيا متحيره

ولادتها ولادتها..ولادة طاهرة وعضمى
ولادتها ولادتها..اجت رحمه على الأمه
اجت رحمه
على الامه..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة
_____
علگ زينة المولود
واتعطر وشيل اورود
وأدعي بجية الموعود
واليندعي مقبوله

بهجة ونور واستبشار
فرح اطفالك البّدار
علمهم الليلة شصار
خل مولود يقروله

هلا بيها هلا بيها..هلا بفاطمة القدسية
هلا بيها هلا بيها..اجت للدنيا حنية
هوه ورية
يحنية..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة
________
اجت وابتهجت الاكوان
لؤلؤ ناصع ومرجان
هيه الروح و الريحان
كلمن ما فرح قصّر

هي الزيتون هيّه التين
هي سر سورة الياسين
هي تنزيل هذا الدين
نزلت والزرع خضّر

أمانينه أمانينه..هي تحققهن بجفها
أمانينه أمانينه..عطفها من عطف ربها
عطف ربها
شيوصفها..ولادة فاطمة الزهرة

هي بنت من...؟
هي زوج من...؟
هي أم من...؟
هي فاطمة...هي فاطمة

#موشح
#لمولاتنا_أم_كلثوم عليها السلام

بكثر ما شافت مصاب اعيونهه
تغمّض ام كلثوم گوه جفونهه
__________
گوه تغمض عينها الشافت عذاب
شتنسه ذبح خوانها اوليد الرباب
سنة ما عاشت عگب طف المصاب

شلون تنسه الصار وي ضعونهه
تغمض ام كلثوم گوه جفونهه
__________
مال وي كلثوم حيدر هالوكت
الليلة صوت ادموعها بسكته ايخفت
الليلة نعي حسين ينكص نوح اخت

الليلة ماكو اخوان ويودعونهه
تغمّض ام كلثوم گوه جفونهه
_______
هاي ليلتها الاخيره ويا ختام
اتجبلت وتودي لحسين السلام
خوتك كتلتني ما كاتلني شام

وحِگ حليب امي وملح ماعونها
تغمض ام كلثوم گوه جفونهه
________
اه صاحت بس ذبح محسوبه الاه
بين ازقة الشام واسطوحه وهواه
هنا ضعنها انذبح سكته بمستحاه

اه صاحت وانخطف كل لونهه
تغمض ام كلثوم گوه جفونهه
_______
وندري عالخوان كل عين الخوات
وين الاجفوف الندية الراويات
ما مغمضه اختك يكافل بالممات

امفتشه ماتت بلكي يحضر عونهه
تغمض ام كلثوم گوه جفونهه
___________
اجنازه الغربه غريبة ابلايه لون
بلكي لأم كلثوم هالليلة تجون
بلكي تطوون الطريج وتعتنون

وبلجن اتنزلونها بمدفونها
تغمض ام كلثوم گوه جفونهه