#مولاتي_الكريمة
السيدة فاطمة المعصومة

اكبر من حدود الخيال
اجمل من معاني الجمال
اكرم من اجاب السؤال..معصومة

اصدق حب يمثله حبيب
متغربه لاخوهه الغريب
الها امن السبايا نصيب..معصومة

جاباها شوگ الرضا جاباها
لمشهد اخوها جان منواها
اندار الدرب بدموع معصومة
جن الدرب للشام وداهه

دمعتهه..السوتنه..العلمتنه
من نشتاگ شلون
نبجي دموع عيون
ونعيش الاهات

متعنيه..بحرگتهه..بشوغتهه
واشباح الاقدار
خلتها تحتار
وكتلتها الحسرات

ماتت من درب يهضم
مولاتي الكريمة بقم
____
بت موسى كليمة جروح
الدمعة اليمها تشفي الروح
اعظم لذة لأهل النوح..معصومة

صح مرقدها عنّه بعيد
واقرب النه من الوريد
ادره بكل نوايا العبيد..معصومه

سحرتنه هيه بنور گبتها
وجذبتنه فوگ الگبه رايتها
شكد باجي گلبي شكد تصب عيني
بس ما لگيت بطعم دمعتها

ودتنه..بگبتهه..برايتهه
لمرقد امها الغاب
للزهراء والباب
ولذيج النيران

زايرهه..يتحير..يتصور
زاير ام حسين
المرقد ضايع وين
عشنه وياه حرمان

للخدام صارت أم
مولاتي الكريمة بقم
___
حرز اهل البجي امن الشر
عاشت للحزن منبر
گلبك يمها يتغير..معصومة

احسان الما يرده احسان
النعمة الما وصفها السان
يم مرقدها اصير انسان..معصومة

مثل الطفل بادي المشي توه
گادتلي گلبي خطوه وي خطوه
اندلينه درب اهل العطش يمها
ويمها عطاشى الرحمه تتروه

برحمتها..كادتنه..وخلتنه
من خدام حسين
امن الناس الباجين
لخيام العطشان

بجتنه..وحبينه..اندلينه
درب اهل العزيات
وعلگنه الرايات
وصرنه اهل احزان

تحكم عالگلب تحكم
مولاتي الكريمة بقم
_
مختصره الطريق الطويل
اليندل حبها اصبح قتيل
عالم حبها ماله مثيل..معصومة

عالم بي خيم واطفال
عالم بي سبي واحبال
اهات وحزن كتال..معصومه

لو تبيس اجروحك دمع تروي
بعز اللطف والشغف بس مچوي
توديك يم خيل وركض عاشر
توديك يم خيمة وسرج ملوي

بالصاير..جوتنه..وربتنه
وصرنه انتاني الثار
وين السيف الحار
وينك يابو الحگ

للمهدي..وثاراته..ودمعاته
اتحسسناها وياه
ندعي يعجل اه
بلكي وياه نلحك

گلبي يشاء اذا شئتم
مولاتي الكريمة بقم

نضرة يا فاطمة
#يا_فاطمة

نضره مولاتي
بعينچ الحمره بقت من المصيّبة
العبدچ الماله بخت لو ما نحيبة
_
حامل بجفي دموعي..وجاي استجدي رضاچ
استوحديتي بعرش گلبي..لا مليكة الا سواچ
والمشي صاراله قيمه..من مشيت انه وراچ

طولچ بقه اينگط شمع من هدت الضلمه
وبصورتچ نلزم عشگ لزمت طفل بأمه
حبچ مثل شيب البخت ما نكدر نضمه

خدمه رزقيني
والصبح خادم صدك طاهر حليبه
العبدچ الماله بخت لو ما نحيبه
_
من لگيت الدنيا غربه..گمت بأحزانچ اعد
والسهر مولاتي صاير..موطن ادموع العبد
الفاتح اجروحه لمصابچ..بالبچي ضل ينسعد

الما حبچ وما يعشگچ هم گلبه عود يحب
و كد ما يحبچ حيدره من دفنچ امشيب
نصد صورتچ كلها حزن بس حلت الموكب

وحچيي ضل يحله
چي بكل سالفتي اسمچ كمت اجيبه
العبدچ الماله بخت لو ما نحيبه
_
چوي گلبي بنار حزنچ..حته لا انسه المُصاب
ومن اغمض كون اذكرچ..رسمي جوه اجفوني باب
انطيني بس اليرضي گلبچ..واخذي ريعان الشباب

يا واهس اسوالف علي يا فرحته وحزنه
بس دمعتچ بيها طعم ما ينشبع منه
افرح دمع احزن دمع وبالدمعه اتحّنه

وما اريد اُجره
امن شوكت يُستأجر الحب للحبيبة
العبدچ الماله بخت لو ما نحيبة
_
وين ما موجود مجلس..مشّي روحي ابلايه راي
وريت ارد لبيتي مُنهك..و تخط دمعاتي وراي
كون كلشي بعيني رايح..وبس حزنكم يبقه جاي

دمچ تناثر عالترب و گلبچ يلم بينه
ما مره منطينچ ابد وبس انتي تنطينه
مدّت امصلاية بعسر مدينه ايادينه

حرگه انطيني
خلي گلبي منچوي وزايد لهيبه
العبدچ الماله بخت لو ما نحيبه
___
من ضجيج الناس يعله..بصف هدوئچ سكته اروح
ساعة اشعل شمعه واصفن..ساعة الطم ساعه انوح
گلبي چن اضماد صاير..عيشتّه بس عالجروح

وصرتي جواز لكربله و بذكرچ نسافر
وابنچ نرسمه ابلا ذبح من نرسم العاشر
لو ردنه نرسم مهرته ما نرسم الحافر

ونرسم الخيمه
وبالرسم منخلي زينبكم غريبه
العبدچ‌ ماله بخت لو ما نحيبه

#جريمة_قتل

بليلٍ ذات يوم..ذهبتُ بلا حياء
بسكِين الذنوب..بحقد وابتغاء
قتلت القلب ذا..بلا فيض الدماء
فلم اترك دليل..لجرمي والبغاء
فعينُ رعيتي..وعين الاصدقاء
حسبتُ حسابها..واتممت الدهاء
ولكن خيبتي..نست عين السماء
قتلت القلب ذا..واجهشت البكاء
فكيف لقاتلاً..يقيم عزا الرثاء
دموعي للحسين..وخطوات العزاء
مسير الاربعين..ومائها والغذاء
كانوا بفعلتي..ضحايا ابرياء
حملتُ ضحيتي..بدمعاً وازدراء
بقلباً ميتا..اكُرر ذا النداء
اتنبض جثتي..؟..اتغدو بالشفاء
وكيف بنضبها..فقتلي ليس داء
بقلباً ميتاً..وامشي باستياء
مررتُ بمجلساً..مرور الاشقياء
فتحرك ميتي..وعاد ليا الرجاء
فحييتُ بيا حسين..وحييتُ بكربلاء


يا حسين يا حسين يا حسين💔😭

#يا_مولاي
يا علي ابن موسى الرضا

برياضك سيدي..اريد اصبح عبد
وتعدني اويه الاجو..اذا تبدي تعد
الزرعت بگلبه حب..لفرجكم مستعد

البعينه العطش..بمناره يرتوي
التبخته الرضا..مصيره مهدوي
وانه بارد گلب..واجيت ارد انجوي

اعذب اسم مر اعللساني
اسمك يودي لعالم ثاني
امن اسمع رنين اجراس الگبه
ضجة يتامه يضج وجداني

نغم كردسوك ودكته..اطهر بي ردت سمعي
وعلى اعتاب اليزورونك..اذب گلبي واذب دمعي
____
رغم كل البعد..ومسافات الهجر
حنانك سيدي..يمسني وانكسر
امن احن واستعشرك..اعيشنك جمر

واذا ابعد احس ..الهوه بريتي اختنك
شوكت اهجر هلي..واجيك استوطنك
غزال وصيده حِل..وطمعت بمأمنك

بمعصومتك يا سيد مشهد
حط لجفائي الوي صحنك حد
وثبّت خدمتي الوي حسينك
مو ساعه ابجي وساعات ابرد

اطير وابتعد واغفل..وسهم حبك يصوبني
واطيح امن السمه لعينك..وترجع نضرتك حزني
_
اساهر وانتضر..وضريحك سلوتي
واسولف للصور..حبيبي طلبتي
اعلشباجك احط..جبيني بدمعتي

واشم ذاك العطر..ليودي النينوه
اريد استنشقه..وبعد ماشم هوه
واموت وقصتي..گلب حب وانجوه

اقسملك ازورك كون بنية
بس روحه اريد وانسه الجيه
يا راعي گلبي شوف دموعي
خل گلبي يرجع يم راعيه

بركن شباجك الفضي..اريد استنشق الجنه
وادور عالغبار ادوار..واخذ طلبتي منه
___
حبيبي يالرضا..حجولي اعللدرب
المشه بجوك طهّر.. طريقك كله حب
واوصي الي مشو..يزورولي الگلب

احاجي بالمشو..بدمع عيني واون
يرايح الرضا..طلب عندي بحزن
بمتاعك للسفر..اخذ گلبي اليحن

مشهد حلم ما عافت عيني
طاري اليزوروك ايبجيني
حته البياض الفوگ الگبه
بالصوره انضرله ويجويني..

شما جانت ضروفي اصعب..رحمتك يالرضا اكبر
أمل عندي يجي هاليوم..وعلى درب الزيارة اكدر
_
مريضك يالرضا..بوحدتي و معتكف
بوحدتي انغلب..واقصر معترف
ولكن ما ردت..احس غيرك عرف

وطن دمعي الصدك..لكيته بوحدتك
هلي بحالي درو..وتهدني گبتك
ودعاء امي صبّح..انول زيارتك

تدعيلي امي ازيارت صحنك
جي تدري احن من عدها حضنك
طير وكسرت اجناحي بايدي
ماريد اطيرن من عش غصنك

احدّي بگلبي واسبيني..لمناهل ريك العذبه
هيج وعيني اغمضها..وافكها بسجده عالعتبه

#يا_فاطمة

ييمه الماله زهره يحير..ابنص ناسه ويحس غربه
مثل ما دگو البسمار..يضل يبچي ويدگ گلبه
يدگ بگلبه يتذكر
ضلع دامي ووجه احمر
يفاطمتي يفاطمتي
__
راعي اليتامه حيدره..بس چن يتيم ويانه
التنتچي اعليه الحرب..ترست دمعته اردانه

بداعت طولي الي تحبينه..گومي ولمينه اعلحضانچ
لا أخت العندچ ونشوفچ..ولا ضلوا ويانه اخوانچ

اذا بس انتي من اهلچ..اروح المن لون حنيت
ويا امي وحلات الام..مو بالمگبره بالبيت
جرحي بذني ضل يكبر
ضلع دامي ووجه احمر
___
ما عايشين اعللهوه..عشنه اعلشمت عطرچ
بصدرچ تلمينه امس..وكسروا ضلع من صدرچ

فرّت خرزه بخيط السبحه..هيچ الاخ افترت بينه
وثوبچ كلما نتدناله..ريحت عطاب اشتمينه

ولا واحد يواسينه..يتعب ليل الامجافه
وعلي فز ولزم بابچ..وكتم غيضه ورجع عافه
علي بفراگچ اتغير
ضلع دامي ووجه احمر
____
بكد الحنان البيچ امس..صاير مكانچ فارغ
وياهوه ما شاف الحرگ..وما رجع منه يناشغ

ولو يوصل مرسال لميت..فوگ الورقه اگلوب نودي
يمته تمرّين بحنية..وجفچ يبقه يلولي لخدي

ييمه وجيتچ شدّه..نضل غربه العمر كله
شيهوّن طيحت المحسن..اذا گلنه البعد سهله
كلشي بروحته اتئثر
ضلع دامي ووجه احمر
__
كلش امغيرنه الهجر..ذبلت الروح الخضره
بشريني انتي بالگبر..ضليتي لو متغيره

ضلينه اعيون امن الفرگه..دمعه تگل لدمعه انه اكبر
زينب ذيچ التغفه بحضنچ..يا ام زينب ضلت تسهر

تغيرنه بجفه اعيونچ..يطيحنه النسيم الهاب
الصفار البوجه يمه..اجانه امن انعصرتي اباب
يفاطمتي وبقيت اسهر
ضلع دامي ووجه احمر
___
يا سالفه انگطعت دفع..يحجابنه الغثاهم
يا يمه ويانه علي..بس همه ياهو وياهم

ايعيش المي كلما يتبده..وانتي شما طحتي تعيشين
ذاك اسمچ يمشي اوي اسم الله..وهوه شما عاشو ميتين

شكد رادو يوصلونه..بس السمه شيلزمها
بحب الله نفخر گمنه..راحلته امنه بدمها
ومشو لله بوجه اصفر
ضلع دامي ووجه احمر

اللهم عجل لوليك الفرج
https://t.me/raad_313

مولانا #أمير_المؤمنين صلوات الله عليه
مخطاباً

سلمان هذا أول جرح...المكابر اعليه ما يصح
بدموعه حيدر ينفضح....لو مر اسمهه ابالي

كدما عزيزه ام الحسن...شديت روحي ويالجفن
وسنينه ذيج المضن...بكل لحضه تتراوالي

سلمان هذا القلب يخفق للحبيب
مالي اناديها وفاطم لا تجيب
حتى أجاب القبر من فرط النحيب
من دونها أصبحتُ مكسَوراً غريب

جرح الترافه شكد صعب..اله بلقاء من يلتئم
هذا انه قتال العرب..ضلوا يتچولي الزلم

جروحي. بيهه أدفنت هذا العشك
جروحي. يواسنّي كلما اختنگ
.............................................................
بيها اغسّل منفجع..ومديت ادي ماكو ضلع
لحية علي انترست دمع..واحوالي لا موهيه

وجفي الابد ما مثله جف..عالزهره مدري شكد رجف
سلمان شيفيد الاسف..وجفوفها مچوية

من أول الليلِ إلى وجههِ الصباحْ
لامؤنساً لي غير أنّاتِ الجراحْ
في ضلعهاِ المكسورِ ألحانُ النياحْ
ذي حرمةِ الزهراء كيف تستباحْ


ميته ام حسن وتحركت..تحضن ولدها بمغتسل
ضجّت بواچي بالسمه..وبدموعه وحي الله نزل

ينادي..يا حيدر الحگ للسمه
ينادي..وخر الولد عن فاطمه
___________
بصعب مواقف من تمر...گبالك حبيبك ينكسر
وما ترفع ايدك تنجبر....نارك تشب بضلوعك

بگراب سيف تنجتف...مكسور بس بلا نزف
كسر الخواطر يختلف...ما ينفهم موضوعك

تبقى جريحاً حائراً بين أثنتين
في أن تجردَ سيِفِك او أن تلين
والقوم قهراً سقطوا منها الجنين
والكلُ يعرف انك الليث البطين

هذه انه قالع خيبره...ابابي تاليتي انفجع
جفي الامس رد الشمس..ما يكدر يطيب الضلع

دفنتهه. وكلبي نسيته اعله الگبر
دفنتهه.ومتأذيه من ذاك الكسر
...........................................................
كاتلني للزهره الحنين..انه امير المؤمنين
تالي اشكي يم بيري وحزين..بنص امتي عايش منفي

ياگبلني كاتل حرمتي..والداس بابي وعتبتي
واتحمله يا غربتي..واعصر فقاري بجفي

البئرُ يدري أيُ حزنٍ في الفؤاد
منفيُ أمسى من هو شيخُ البلاد!!!
أمامُ أبنائي بأحزاني أُقاد
والقوم ياسلمانُ قد لزموا الحياد

امتيش ما حفضوا الي..لا حرمه لا حفضو مقام
انه الامير الطالبي..وما ردو اعليه السلام

غربتي..من غمضت عين ام حسن
غربتي..بنص الوطن مالي وطن
________

حسين حازم البوشي
مصطفى صادق اللامي

دخيلج يا مولاتي#يا_فاطمة


فاطمي..من منشائي لمماتي
فاطمي تخلص ردت حياتي
_____
بتجارات البشر كلها..تطلع يا گلب خسران
وتجارة دمعة عيونك..لو ربحان لو ربحان

ياهوّه تنطي دمعه ويعيشك عمر
ياهوّه بس تنعاله ينطيك الستر
هذا الدلال امن ام حسن ما ينخسر

جابتنه لخيمة عزاهه
وانطتنه حب ووجاهه
مكسورة ورايح ضناهه
فاطمة

فاطمي..بيا فاطمة نجاتي
فاطمي تخلص ردت حياتي
___
جرب تنجرح مره..جرب مرة تبجي الروح
شوف شلون مولاتك..منك تشتري الاجروح

شراية اجروح الخدم بس فاطمة
وهنياله كل خادم يهاجر عالمه
يروح بدمعته لعالم اجروح وضمه

السلم بيد الزهره گلبه
بدرب الدمعه يبدله دربه
الترضاله يرضاله ربه
فاطمة

فاطمي..توحيدي نص صلاتي
فاطمي تخلص ردت حياتي
_
اذا دمعك نشف مره..اطلب دمعه لتكابر
اطلب من گلب فاكد..عاش حرورة العاشر

اطلب جروحك من گلب عاش الرعب
مفجوعه بس صبت على اهل الخدمه حب
بيد ام حسن سلم قرارات الگلب

مولاتك ما يهده ونهه
محزونه شثگله حزنهه
اسِعدها بجرحك لأبنهه
فاطمة

فاطمي..بمجلسهه الكه ذاتي
فاطمي..تخلص ردت حياتي
___
استوطن يا گلب جرحك..واحضر كل عزه تحضره
واذا جرحك برد مره..بالك جرحك تعذرة

ضل فاطمي ولحد يغير هالقرار
ما دامه مكسور الضلع ضل بأنكسار
ما دامه خدهه احمر يجرحي ابقه حار

دمعتها بخدها جرّية
كل مغرب عدها عزية
ابجي لأهات الزجية
فاطمة

فاطمي..تقبلني امنياتي
فاطمي..تخلص ردت حياتي

#لمولاتي_الزهراء صلوات الله عليها

فاطمة..يعني طفل بالدم فطيم
فاطمة..يعني ضلع صابه الزنيم
فاطمة..يعني الحُسين يضل يتيم
__________
فاطمة..يعني قتل عمد وشروع
فاطمة..يعني عقيلة تهل دموع
فاطمة..يعني صدر دامي الضلوع
___________
فاطمه يعني اشتعل منزلها نار
فاطمة يعني وجن ضل بي حمَار
فاطمة.. يعني انهجم للنبي دار
_________
فاطمة يعني الحنان الينحرم
فاطمة يعني الحسن راحتله أم
فاطمة يعني ولا يشفه العضم
_________
فاطمه..يعني ضلع دامي وكسير
فاطمة..يعني جرح غيرة أمير
فاطمة..يعني علي يحجي اويه بير
___________
فاطمة..يعني أمان ايضيّع أمان
فاطمة..يعني طفل يشهگ دُخان
فاطمة..يعني ذبح رحمه الزمان
___________
فاطمة يعني حياة ابلا حياة
فاطمة يعني الجفوف امحرگات
فاطمة يعني علي بمغتسل مات
___________
فاطمة..يعني الرمح جازه يعيل
فاطمة..يعني الجذع كلش ثجيل
فاطمة..يعني گبر ماله دليل
___________
فاطمة يعني ابن طلاّب ثار
فاطمة يعني دمع مال انتظار
فاطمة يعني يمهدينه البدار