جرحي لجرحج شجابة💔

وبدأت رحلة الدموع مع الغريبة

https://youtu.be/oZwdpOib-O0

وين وين..فاتحتچ
وين وين..ضي گبتچ
وين وين..زوار الصحن
_______
حته من اكعد وي ناسي
تفتر النوگ بنص راسي
وشامچ الما عاف احساسي

واصفن ويطلعلي منظر
چني بالشام ابچي واحضر
امترب بصف بابچ الاخضر

واشوف
حرمه تطب بسوگ
واشوف
تراب وعبايه ونوگ
واشوف
بيدي امن اخوچ اعلوگ

ماي ماي..جايبلچ
ماي ماي..من اهلچ
ماي ماي..مّن العلگمي
______
انه ذاك الخلص عمره
عنده حسره ومو اي حسره
رايد بنص بصحنچ اقره

وارد اسئلچ لمّن اطوفچ
ياهو يفتح حبل جفوفج
الغربه زينب يمته تعوفچ

غريب
حته الصحن وياچ
غريب
كلمن وطن شافاچ
غريب
الما يلزم الشباچ

ليش ليش..هالغربه
ليش ليش..والگبّه
ليش ليش..للمغرب طفت
_________
امنيتي يا مولاتي التهضم
وانته ادره بولدچ گلب ام
جوه باب الساعات الطّم

سهلي امري وليچ اخذيني
وللصحن لو وديتني
اله اشدلچ ذن جفيني

ازور
حلمي الكبر وياي
ازور
كون الله يقسم هاي
ازور
وحبلي يجي بيمناي

جاي جاي.. قبليني
جاي جاي..شديني
جاي جاي..واحبالي بدي
_______
والله لو سهلتي عليه
واوصل لمولاتي رقيه
اله اجي و متروسه اديه

هذا نذري البي ما حاچي
اله اجيبهن الها تراچي
وكون اخلص يمها بواچي

اموت
وي التراچي كون
اموت
لو كلي اصير عيون
اموت
وي صوت الينوحون

نوح نوح..مسبيه
نوح نوح..ترچيه
نوح نوح..ملچومه غفت
_____
ها يزينب اكبر كسره
الماله اخو يون بصف گبره
الماله زوار بنص حضره

يا غريبه بكاع الغربه
الما حرگلچ روحه وگلبه
الدنيا بأول ضحكه تغلبه

غشيم
الما محترگ للشام
غشيم
لبگلبه ماكو اخيام
غشيم
العاف الدموع ونام

ليل ليل..وانه اسهر
ليل ليل..واتنطر
ليل ليل..وبس صحنچ صبح

#شور_فزعه
#دمعه
#لطلب_اللحن

بالكوه غمضت الجفن..بشام المصايب والحزن
هسه يجيني جف اخو..بمغيسلي ميته واحن

لو رادهه الله وبالدفن..فوگي اخوتي
ميته وافزن بالهلا..ويتهنه موتي
يا شام اسكت هالجو..عزي وتجوتي

وتطفه القناديل امن فوت..وبالسوگ ابد ما يعله صوت
وذاك القصر يسكت بعد..واطبوله وافراحه تموت

روحي ميته واتاني
الشام اسكتّه بخواني
ويرجع ابهلي امجاني
__
اخر ليالي بعمري ذن..وتغمض عيوني الساهرن
وما اكطع اعليكم نعي..حته بمماتي والجفن

بعيوني ضلت بس صور..للمصيبة
الخوانهه اعليهه حرس..شو غريبة
گلب العقيلة ما خفت..من لهيبة

التحرسهه اخوه امن الخطر..ويمسح اثرهه جف كمر
بيّن اثرهه بالمشي..وضل ليهه مسموح النضر

يا هلي ردت ناصر
من حرگ خيم عاشر
لهسه زينب تناطر
____
من كربله وذاك العصر..حد نزلتي بلحد الكبر
منتظره خواني تجي..يرجعولي حكي امن القصر

عيوني بمماتي وتنتضر..تربي ليكم
ويا ماي اشربه دمعتي..تصب عليكم
متعلمه اشرب يخوتي.. من اديكم

يهلي بعطش خوة طحت..وشكد وراكم صيحت
هنا يخوتي هنا يخوتي..عدكم بعد بالشام اخت

بموتتي واحشمكم
يرف علم هلي منكم
خوية لحكو زينبكم
__
يال من نخوتي تستحون..يخواني اموتن لو تجون
بموتي يهل زينب ردت..جف كافلي يغمضني كون

البجفوف اخو تصعد..بقت هزايل
ميلة الهزله هالنعش..بيه مايل
زينبكم بعازة صدك..يابوفاضل

من ريحة اهلي انتظر..طارش يهل هاشم يمر
وأنه ادري اخركم ذبح..وعن نخوتي راح اعتذر

انذبحتو بعيوني
وادري ما نسيوتني
بگبري يهلي زوروني

لطلب اللحن
@Safe618

#شور_فزعه
#لمولاي_الرضا صلوات الله عليه

ملامح للوداع تبان
باخر يوم من مشهد
وشريط الذكريات يدور
من قم حد ابو محمد

قبل لا تنوي وتسافر—تسافر بيك ذاكرتك
تعيشك نضرتك لاوله..واخر نضرة ذابحتك
من معصومه للضامن..تصير دموع تذكرتك

وتتذكر صور تهضم
باول خطوة الك وي قم
احساس اليتم تنساه
وتبدي تحس حنان الام
_
ويرد بيه الحنان لردود
يم معصومة الزهره
مثل نومي بحضن امي
نمت بدموعي بالحضره

وجان اول لقاء دموع..ودمعي اعللندم محسوب
ضكت مأواها واتحسف..ما زاير كبل مغلوب
دخيل اخت الرضا السلطان..بس يمها العطايا اكلوب

باول نضرة تسبينه
اتسلينه وتبجينه
وكلبي وكل كلب صوته
ادخيلج لا تهدينه
____
شما يحله السفر وياك
لازم تشعر بغربه
بس السفره للسلطان
تحطك من ذوي القربه

جنت اسمع قصص عشاك..وعشتهن يم صحن سلطان
كلبي الكوه يمشي وياي..ضل يركض ركض غزلان
ولحد اخر وداع وياه..تحس روحك جنت حلمان

انته وجرحك وكبته
ودمعك يحجي مو انته
وكل الامنيات تصير
من صحنه لصحن عمته
_
ويم باب الجواد تحير
وگلبك يمشي متلوّي
ساعة الضامن يفرحك
وساعة بگلبك يجوّي

انيس ايلاگي زواره..وميخلي حمل مطروح
الروؤف يضيفك بصحنه..مدامع مالحه وجروح
ومن جاي الرضا تشربه..يحرك كل ركاد الروح

وتبدي بدمعتك والاه
خطوه ابلا نهاية وياه
من عالم خشن بالحب
لحنية الرضا ومأواه
_
حب كله شغف ودموع
وكلشي يذكرّك يهضمك
ترجع من صحن مولاك
مثل ما ولدتك امك

جمرتك بأيدك وراجع..وفايض كلبك بمي حب
توك واصل لبيتك..وتگابل صورته و تطلب
رجعني اعلشباجك..شوگك يكتل ويغلب

امحلفك بأمك الزهره
لا تحرمني من نضره
ولا تجعلهُ اخر عهد
لدمعة عيني بالحضره

لطلب اللحن

@safe18

#لمولاي_ابوالرضا_صلوات الله عليه
#شور

دلالك كاسر اعيوني..يا موسى ابن جعفر
اكبر من حجي اضنوني..يا موسى اين جعفر

صحنك سيدي ابغداد
كليم اجروح اليخدمون
اهدم كلبي واركض ليك
وانته والرضا وتعمرون

مدة الايد ابابك ترفع شأن
ارزق مخيم كلبي بالنيران
دمعة صدق تكفيني بيوم الدين
تنزّل الكفة وتكسر كل ميزان
_
جبت كلبي وردت منك..ياموسى ابن جعفر
رضاك وجرحك و حزنك..يا موسى ابن جعفر

مو كلمن قريب اعليك
معناهه حضه برضوان
الكيد الضل عمر وياك
قريب وبي عذابك جان

حته بعطيتك تفرق عالينطون
يالغيرّت بمرادك كل قانون
اول سجين بسجنه وينطي امراد
من يمته يكضي الحاجه الضل مسجون
__
عطايه اهل العشك بدعه..يا موسى ابن جعفر
وعطاية اهل الصدك دمعة..يا موسى ابن جعفر

وانتم للصدك نيشان
وما رديتو سائل يوم
حزن كون بطهاره وياك
يبن جعفر اريده يدووم

اسبي دمعتي بگبتك يا مولاي
كلبي ارزقه بجمره وعيني بماي
امن الكاظمية احديني لطف حسين
جمر جمر جويني يالحداي
____
لكيت بدمعي عافيتي..ياموسى ابن جعفر
الحزن غازل هوه ريتي..يا موسى ابن جعفر

اباب القبله اريد اوكف
ونسايم رحمه اتحسس
اريد اشتم عطر صحنك
واشهگك وانسه اتنفس

عشك عشك اتنفس حب مملوح
اينسم هواك بريتي ايرد الروح
ادخيل ابن جعفر حاشه ايرد ادخيل
ما خله عد خدامة هم مطروح

لطلب اللحن @safe618

#شور_سماعي

بكل الملامح سولفت من كتلي بوية نفترگ
والتصبح عيونه حمر معناها بي بادي الحرگ
يابوعلي وداعت علي صرت العليلة من صدك

عفتوني..وصعدن اخت تتبع اخت..بوية الحگ لبتك صحت..طفيلي نيران الهجر

تودوعوني.. تأشرولي من ضهر الهجن..بيتك تره اخلافك سجن..حابسني هجرك وانتظر
___________
امعيشني هجرك انتضر وكتال الي بنفس الوكت
وبيتك حياطينه بدت تصغر علي من سافرت
مشتاگتلكم ياهلي بكد ما وراكم اشرت

كل طفله..من تمرض اتدللها اهل..بس انه ضعن اهلي رحل..شوگ ومرض صارن سوه

مشتعله..طفوني يال كلكم سگه..الضيعكم بروحه شلگه..الضيعكم امضيع هوه
___________
هنيالك باهلي المشو لمتهم اتگصر الدرب
عالعيس شايلك وطن يالذابح ابيتك گلب
مذبوحة اشمر بالدوة عگبك دواي شينشرب

مجروحة..بدمعة رقية ونضرتك..ابيتك عشتها غربتك..گبلك منو الغرب هله

مذبوحة..كل الطفولة البيه امس..وما عندي اخت بيه
تحس..كلهن خذتهن كربلة
__________
بليل انتظار العايلة هالمر علي رابع شهر
وبحسابي عبد الله اختلف وي هزت الهودج كبّر
كبرو هلي وين الوعد الحد هسه لكبر ما حضر

متحضره..محضرة غراضي ابين ادي..امتانيته بس يجبل علي..وبحضن الاكبر انتحب

وبنضره..يحاجيني ويزيح الالم..ايتانن خواتج بالخيم..ويا لم شملجن يقترب
___________
البت التضيع حضن ابو تعيش بگلب ام تنتضر
ويعصرني گلبي بعاشرك (يا كربلاء وصار الضهر)
قارورتي وشم منحرك بس لا سوه صارن حمر

القارورة..فاضت دمه وصار الذبح..ولاني بهزل لاني برمح..واترافگ وياك انجبر
مكسورة..مكسورة من قبل العلم..عطشانه من قبل الخيم..محترگه من قبل الجمر

ولادة الرحمه مولانا الحسين
صلوات الله عليه

ابلا شروط تحل علينه دموع حبك
وفلسفة دمعك علم محد يشرحه
انولدت الرحمه الشفاعه انولد حسنك...؟
مدري كلشي انولد وي طلتك السمحه
هذا قطب الكون بيد امك حبيبي
يفتر شما فرت الزهراء رحه
بخشب بمهدك مسح فطرس بالولاده
وخشب مهدك لله رده وشاف صبحه
كل شي متعلق بأسمك باب لله
اليمسح بخشبات منبركم تصلحه
حته زينه مولدك عندي تشور
وشمعة اعيادك حبيبي بعيني وضحه
وحته توزيع الولادة هم يغزر
مثل ما عاشرك غزر بيه ملحه
بيدي وردة مولدك وبثوبي الابيض
ونزل دمعي ودورت للفرحه فسحه
منين ما انسر حبيبي بخبر جيتك
ويه دمعات الزجية بحسرتي اصحه
يمته اشم عطرك بلّا دخان خيمة
ويمته دمك فوك حسنك ما المحه
يا حسين وياهو كبلك هذا حاله
قبل لا ينولد رسمه انولد جرحه
توك بجف الرسول وهل دمعته
انته التبجي النبي وانته التفرحه

اخاف بحجيي اعرض حبي للناس
وعكس دربك اليعرض حبه خاسر

البضاعه التنعرض ياكلها التراب
ومن تنباع يربح بيهه تاجر

اذا حبي اشتروه شربحي مولاي
اجيب امنين الك حب ومشاعر

واذا حبك عرضته ولاحه التراب
معناها عدت فوكاك عاشر


وفرق بين الكتبلك جرحه مولاي
عالرايد يصير وياك شاعر

شوكت بسمك ادوسن روحي يحسين
شما تنداس تنهاب المنابر

وجذب ذكري وتلفض اسمي وياك
وسبيل الماي لاسمك صدك ذاكر

اليحبك واليكرهك رطب اشفاه
بثواب اشفافك لتكسر الخاطر

متناقض بحزنك شاد انكاب
وسليلك على امصابك يبقه حاسر

بألا هل من مناصر سامع هواي
بس لهسه مو وياك ناصر

فرق بين الفهم درسه وبجه هواي
وفرق بين السمع بس عنده عابر

عندك رحمه ياهو تشوفه تروي
وعدنه اكلوب وي حبك عواجر

عندك نور كلشي اضلم تضوي
وعدنا وياك بس اسود ضماير

اريد وياكم وكل خوفي من هاي
ما عيش المصاب بكلب طاهر

اريد وياكم وكل خوفي من هاي
يجيني المهدي بس ما انصره باجر

اريد وياكم وكل الحجي يهون
وبديكم تطهر وتصفه السرائر

لصاحب العصر والزمان عجّل الله فرجه

راح اعصر مناديلي اوية الغروب
ومنديل المحب محسوب شاهد
وتنزل جمعه جمعه دموع تقصير
لو ما ذنبي جا ويانه كاعد
حته امن ادعي اگلك انه ماريد
ومن ماريد هم معناهه رايد..


اريد وياك..يا اخر نسايم فاطمة الزهره
شما شديتني لطرواك..افك روحي علك حضره
واتقدر لان منك..رخيصة ارواحنه ابلا همك وحزنك
رخيصة واي سعر ما الهه بالمشره
ليش اليكبر بضل شجرتك مولاي..مايه يكطعه عالشجره
وليش اليطك عودة بزادك وماؤواك..
يجي لماعونك يشمره
وهذن بيه وبعد كثرة
انه التكثر اعذاره شما كبر عمره
غربتك مره وانه ذنوبي هم مره
اليعيد الخطاء نفسه ويعتذر كل يوم
هم ينمل بعد عذرة..ويدورن الوجه منه
واخافن مال من عذرني الاعيدنه
وجهك لا تديره ادخيلك اتوسل
اليفارك نضرتك ينذل
وتره عمر الخدم ينحسب بالنضره
اريد وياك ..يا اخر نسايم فاطمة الزهره
انه الكلما ما اعوفك لازم ارجعلك
اذان بمأذنه حضرة
عشرتي وياك حب بخوف
واحب اجروح هالعشره
احبك سيدي بفطره
واخافن التهي بناسي واتيه عيونك الحمره
المسافر لو عبر وكته
السفن ما تبقه تنتضرة
اريد وياك
وانه الكل مره اصيحلك اريد وياك
بس مختلفه هالمره
وردت بدموعي ادورك مو بعين الناس
بلكي الصبخه البروحي الك تطره
واعيش الوحدي كمت اسعه
مثل عيشه بدو بصحره
يا اخر نسايم فاطمة الزهره

#ثكيل

ادعي لامي اعللحليب
ضگتك بدرهه حبيب
جاذبيت الحب لبنهه..اشكر الله صرت ابنهه
...............................................................
ابطن امي وطول اشهرهه التسع
غير القرايات ما عدهه طبع
البچي البيه انگطع وامي تصب دمع
ان شاء الله حبل السبي هم ينگطع

من الثواب البالعزه..ابطن امي تغذيتي
من عالم الذر للرحم..ضل مجلسك بيتي

علمتني ابچي عليك..وانه صارت روحي بيك
خدمتي وارثهه عنهه
اشكر الله صرت ابنهه
.....................................................................
قبل اول شربة اليه امن اللبن
شدت بجفي علگ من الصحن
منهه نذرتني ومدامعها جرن
لكل مره مضيعه ولد من الضعن

وانه اعلدين امي صرت..تحيّني تعزيتك
يحسين رباني اللبن..وحسبوني تربيتك

من وعيت وشفت نور..علمتني الجمعه ازور
الخدمه صارت ديني منهه
اشكر الله صرت ابنهه
.....................................................................
اصغير وجانت تكعدني الفجر
بيدهه تحزمني وانه المبتشر
امن الطفولة لهسه امي اعللنذر
العشره الاولى( بجمرته) يضل الجدر

شما نطبخ نصد صورتك..متعلگه فوگانه
وعدنه عقيدة ومعتقد..بالزهره ويانه

وجنه وي جدرك نفور ..نكابل الصورة ونزور
وچان موكبكم وطنهه
اشكر الله صرت ابنهه
......................................................................
شما كبر زنيجلي وياه اكبرت
وبين نعيي امي ونعي الناعي عشت
من حضنها لحضن مجلسكم رحت
يعني ابنكم وابن دمعتكم صرت

مثل العلگ ياسيدي..يشدني اسمك والتم
واترجه يگرب عاشرك..وقمصانك ابلا دم

وكل سنه تنعاد هاي..تريد ماي وماكو ماي
وامي ما فكت حزنهه
اشكر الله صرت ابنهه
..........................................................
الحمد لله فطرة امي فطرتي
الحمد لله بس مجالس عشِرتي
وياك يربطني الحليب ودمعتي
من هوان الدنيا اعوفن خدمتي

مولاي انه ودمعتي..امن الزهره للزهره
وندري احنه باليحضر عزه...بگبره تجي تحضره

وراح تحضرني واشوف..طولك وما بي سيوف
بفضل امي وفضل ونهه
اشكر الله صرت ابنهه

#ياحسين
#شور


اشربوا الماء هنيئاً..انهُ ماء مباح
ليش محد كلك اشرب بعاشرك ذاك الصباح

وصل بيك العطش يحسين
لغواش وضلمت عيونك
ومن قل شوفك المفروض
هلك ولدك يدلونك
واحد واحد انتخيت
وكلهم ما يسمعونك
النهر ما خله الك عوان
بعزازك بده يخونك

العطش حاوط كلشي بالطف بي جمال
عيونك وولدك واخوتك والمخيم والدلال
من النداوه والترافه للضمه وضيم الحبال
___
اشربو الماء هنيئاً..انه ماءً مباح
وانته كد ما باقي ضامي..حته بلسانك جراح

معناها بطلاع الروح
تطلع منك الكلمة
عطشان وصحت عباس
بحس مبحوح صحت اسمه
والبعينه نهر ذبلان
كلشي اتصحر برسمه
العطش كطّع جفوف الماي
وبعد يا جود الي يلزمه

جوده ضل ينّدي غيره امن السهام
وعكب جفه اقرو عالماي السلام
امن الضمه ضل ماكو مهرب بالخيام
___
اشربوا الماء هنيئاً..انهُ ماءً مباح
وانته من كد ما عطشته..حته لون اشفاك راح

ثوبك لونك ومحچاك
كلشي الناس سالبتك
وابد ما كدرو يسلبون
رحمتك سيدي وبختك
بدت حرب السقايه اعليك
لحد ما فطرّو شفتك
ورغم كل الجروح البيك
الشغل فكرك خيم اختك

اجروح باقي وغيرتك همّت عليك
اقصدوني ضل يصيح كلشي بيك
شباقي منك حته عدوانك تجيك
__
اشربوا الماء هنيئاً...انه ماءً مباح
وانته ضامي وجبدك انفت..امن العطش ما تستراح

بكثر ما حاوطوك اعداك
الهوه ضيع طريقه امنين
النفس مالك تسمعه الناس
من كد الضمة يحسين
العطش كدما مأثر بيك
ضل ينشاف شوف العين
كلشي بشفتّك مرسوم
يا عباس جودك وين

النهر من يمته عليكم عنده راي
حسين وحدك والعده الدارت اهواي
وعطش خوه وعطش نخوه وعطش ماي
___
اشربوا الماء هنيئاً..انهُ ماءً مباح
وانته ما تفطر مثلنه..تفتطر بسن الرماح

نهاية كل ضمه بالماي
ونهاية كل نهر بضماك
عافك كلشي بالطف ليش
بس العطش ما عافاك
وحق جدي انه عطشان
ورحم بالناس ماكو هناك
محد شال بماي بجود
محد كلك اشرب هاك

تحلفلهم عالعطش بس ماكو صوت
محد يلبي نخوتك هايه موت
والنفس من ريجك الضل ما يفوت

#رزقهم

مصطفى صادق اللامي

#شور

مشتاك احبك صدك
مشتاك الك احترك
مشتاك اعيشك عشك
كضني امن اديه..لخاطر رقية
لا تيهه درب البجي

كضني امن اديه وخليني يمك
هالدنيا خاف تنسيني اسمك
تهضمني ناس هواي التخدمك
ووحدهه تبجي مكسوره امك

الزهره اخ الزهره محد يدري بيهه
ياهو سامع بينة المحزونه ونعيهه
ياهو لم دمعتهه وضل يبجي لبجيهه
_
افردني يالمنفرد
رجعني يمك عبد
وللدمعه الاولى ارد
انضرلي نضره..لا دمعي اخسره
ومن عالمك انبعد

هد بيه جونك ربيني عبدك
ماعدي غيرك يالكلشي عندك
احركني موقف بلل وجنتي
خاطر تحط اخدودي اعلخدك

وي خيمكم كلبي خلطه ورزقه ناره
يالي دمك خالط دم جون وسماره
بيه انفخ حبك وانطيني وقاره
_
ارد اوكف لخيمتك
ارد اشعر بغربتك
ارد اربة وي دمعتك
كلبي وضجيجه..قلة حجيجه
وقلة الصدك بالكلب

حته بغفلتي صايرلي همي
شما عنك ابعد تبقه انته يمي
تجرني امن اديه بأربع صابع
ذبلانه شفتك واتصيح اسمي

يا ذبيح و تدعي لكلبي بالهداية
يمته احس بحرورة و اهات الضماية
يا ضحاية ويمته نصيرلكم ضحاية
_
اغفل وروح بذنب
واسمع خيم تنلسب
وتجبرني ابجي واحب
يفجعني سلبك..واجفل واحبك
حبي بألم مرتبط

جرحك يجدد حبي ودمعتي
بحركت خيامك صارت حركتي
كون اهجر اهلي لخاطر خيامك
ضل خالي ضهرك صاحب نعمتي

غيرتك تجرحني وتجبرني اريدك
اوساده بيدك تصنع والدم تارس ايدك
اتنازع اعلخيامك وانته بدم وريدك

لطلب اللحن

#شور_فزعه

بسم الله بسم علي.حِل حبك بوجداني وي اللبن
حب الله حب علي..ولي اباً يهواكَ يابو الحسن

صورة لحضرتك ابيتي ذاك..وبلهفه اصدها واركض اجيك
جنت بفطرتي يمها اروح.. بحب و طفولة اقبّل أديك

علي علي..عبدك وافتخر من يوم الولادة
علي علي..امي صيحت يالذكرك عبادة
علي علي..حرز اهل الصدك ذكر اهل السعاده

ياعلي بمروتك
_________
بسم الله بسم علي..نخوه وشجاعه وغيره خط مذهبك
كف الله كف علي..وكل الرجولة انخلقت من شاربك

يا قالعاً لباب اليهود..العجزت تهزه كل الجفوف
نغمة فقارك احلة امان..بمّضارب الحرب والسيوف

علي علي..يرتاح النبي من يسمع فقارك
علي علي..سيفك سيدي شفراته انتصارك
علي علي..مشيلي العمر بأمرك واختيارك

ياعلي بمروتك
___________
بسم الله بسم علي...حيدر خفايا الباري الما تندرك
دين الله دين علي..الما مؤمن بتنصيبة دينه شرك

اشهد ان حيدر امير..واعللولاية ماله شريك
يابو الحسن لكيتك وجود..وخير الله كله من صُنع اديك

علي علي..دون البوب ابد ما تنطب مدينة
علي علي..بوب الله الوصي وديّان اعلدينة.
علي علي..كنز الرب علي واشيائة الثمينه

ياعلي بمروتك
________
بسم الله بسم علي..كون البرائة اوياكم قول وفعل
فعل الله فعل علي..والسوه فعل اعداكم ما ينقبل

هوه التبري مو بس كلام..كون البرائي دينه التزام
وحبي وقياسه وي الامير..شكد عنه راضي گلب الامام

علي علي..مفتاح السمة بجفوفك مكانة
علي علي..باء البسملة وتنزيلة وبيانة
علي علي..قبل الذر علي مولانه اشترانه

ياعلي بمروتك
_________
بسم الله بسم علي..ما عندي غير عيونك وكت الشدد
عون الله عون علي..بكل شده صاح الساني حيدر مدد

حته النبي بوجوده نخاك..أمن اتأمرت عليه الطغات
وأامر كلتله يا بو تراب..بمجانه ياهو غيرك يبات

علي علي..نخوة فاطمة بكل شده انته حاضر
علي علي..يا شيخ النجف يا در النواضر
علي علي..ترنيمة عشك وتحط عالمشاعر

ياعلي بمروتك

عن سلمان (رضي الله عنه) قال سمعت رسول الله (صلى الله عليه وآله وسلم) يقول: (عليه السلام)الحسن والحسين ابناي، من أحبّهما أحبّني، ومن أحبّني أحبّه الله، ومن أحبه أدخله الجنة، ومن أبغضهما أبغضني، ومن أبغضني أبغضه الله، ومن أبغضه الله أدخله النار.

على حب الكريم🤍🤲