ရှမ်းပြည်နယ်ဥပဒေချုပ် ပြည်သူနှင့်အတူ CDM တွင် ပါဝင်လာ
===========================================
.
ရှမ်းပြည်နယ်ဥပဒေချုပ် အဖြစ် စစ်ကောင်စီ၏ တာဝန်ပေးခန့် အပ်ခြင်းခံရသူ ဦးတင်ဦးသည် ပြည်သူနှင့်အတူ ပူးပေါင်းကာအ ကြမ်းမဖက်အာဏာဖီဆန်မှု (Civil DisobedenceMovement) ပါဝင်လျက်ရှိကြောင်း သိရသည်။
.
“စစ်ကောင်စီက သူ့ကိုခန့်ပြီး သိပ်မကြာခင်ပဲ CDM လုပ်သွားတာပါ။ အခုတော့ လုံခြုံတဲ့နေရာမှာ ရှိနေတယ်လို့ ဆိုပါတယ်။ အဆက် အသွယ် မရတာ ကြာပါပြီ” ဟု ဦးတင်ဦးနှင့် နီးစပ်သူတစ်ဦးက ပြောသည်။
.
ရှမ်းပြည်နယ်ဥပဒေချုပ် ဦးတင်ဦး အပါအဝင် တိုင်းဒေသကြီးနှင့် ပြည်နယ်ဥပဒေချုပ် ၁၄ ဦးတို့ကို အာဏာသိမ်း စစ်ကောင်စီက မတ်လ ၄ ရက်တွင် အမိန့်အမှတ် (၁၀၂/၂၀၂၁) ဖြင့် တာဝန်ပေး ခန့်အပ်ခဲ့ခြင်းဖြစ်သည်။
.
ဦးတင်ဦးသည် ရှမ်းပြည်နယ်ဥပဒေချုပ်အဖြစ် ၂၀၁၆ ခုနှစ်၊ ဧပြီလ ၁ ရက်တွင် စတင်တာဝန်ထမ်းဆောင်ခဲ့သူဖြစ်ပြီး ၂၀၂၁ ခုနှစ်၊ ဖေဖော်ဝါရီလ ၁ ရက် စစ်အာဏာသိမ်းစဉ်က ခေတ္တဖမ်းဆီးထိန်းသိမ်းခံခဲ့ရကာ ရက်ပိုင်းအကြာတွင် ပြန်လည်လွတ်မြောက်လာပြီး မတ်လ ၄ ရက်တွင် စစ်ကောင်စီမှ ရှမ်းပြည်နယ်ဥပဒေချုပ်အဖြစ် ပြန်လည်ခန့်အပ် ကြောင်း အမိန့်စာ ထုတ်ပြန်ခဲ့ခြင်းဖြစ်သည်။
.
#KBZTai

■ တောင်ကြီး၌ မီးရှူးမီးပန်း ဗောက်အိုးရှူးဒိုင်းများနှင့် ပတ်သက်၍ ဒေသန္တရအမိန့် ထုတ်ထား
.
ရှမ်းပြည်နယ်၏ မြို့တော် တောင်ကြီးမြို့နယ်တွင် မီးရှူးမီးပန်း၊ ဗောက်အိုးရှူးဒိုင်းများကို ထုတ်လုပ်ခြင်း၊ သယ်‌ဆောင်ဖြန့်ဖြူးခြင်း၊ သိုလှောင်ခြင်း၊ ရောင်းချခြင်း၊ ပစ်ဖောက်ခြင်းများ မပြုလုပ်ရန် ဒေသန္တရအမိန့် ထုတ်ပြန်ထားသည်။
.
တားမြစ်ချက်အား ဖောက်ဖျက်သူများကို တည်ဆဲဥပဒေအရ အရေးယူမည်ဟုလည်း တောင်ကြီးမြို့နယ် အထွေထွေအုပ်ချုပ်ရေးဦးစီးဌာနက အောက်တိုဘာလ ၈ ရက်တွင် ထုတ်ပြန်သော
ယင်းအမိန့်တွင် ဖော်ပြပါရှိသည်။
.
သီတင်းကျွတ် မီးထွန်းပွဲတော်နှင့် တန်ဆောင်တိုင်ပွဲတော် ကာလကို အကြောင်းပြု၍ မီးရှူးမီးပန်းများ ပစ်လွှတ်ခြင်း၊ ဗောက်အိုး ရှူးဒိုင်းများ ပစ်ဖောက်ခြင်းများ ပြုလုပ်လေ့ ရှိသောကြောင့် ယင်းကို အခွင့်ကောင်းယူ၍ အကြမ်းဖက်မှုများ ပိုမို ပြုကျူးလွန်လာနိုင်သည်ဟု အဆိုပါ ဒေသန္တရအမိန့်တွင် ဖော်ပြထားသည်။
.
News Link - http://bit.ly/3iVKFQp
.
#KBZTai #Shan #News13october2021

■ ဆီဆိုင်မြို့တွင် အမှု ရုတ်သိမ်းပေးမည်ဟူသော ကြေညာချက်ကြောင့် နေအိမ်ပြန်သူ အဖမ်းခံရ
.
ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့မှ ဦးစံဝင်းမောင်သည် ယခင်က တိမ်းရှောင်နေသော်လည်း အမှု ရုတ်သိမ်းပေးမည်ဟူသော ကြေညာချက်ကြောင့် နေအိမ်သို့ ပြန်၍ ပရဟိတ လုပ်ငန်းများ လုပ်ကိုင်နေစဉ် အောက်တိုဘာ ၁၁ ရက်၊ ညပိုင်းတွင် ဖမ်းဆီးခံခဲ့ရကြောင်း သိရသည်။
.
" ၁၁ ရက်နေ့ ညက ဖမ်းသွားတာ။ အမှု ပိတ်ပေးလို့ ပြန်လာတာကို လက်ထိတ် ခတ်ပြီး သေနတ်နဲ့ ချိန်၊ ဖမ်းသွားတာ။ ဖိနပ်တောင် မစီးလိုက်ရဘူး။ အခုထိ ဘယ်မှာ ဖမ်းထားမှန်းလည်း မသိရသေးဘူး။" ဟု ၎င်းနှင့် နီးစပ်သူ တစ်ဦးက ပြောသည်။
.
ဆီဆိုင်မြို့ ဆန္ဒပြပွဲများကို ဦးဆောင်သူဟု ဆိုကာ အမှုဖွင့် ခံထားရသဖြင့် ဖေဖော်ဝါရီလ ကတည်းက တိမ်းရှောင် နေသော်လည်း အမှု ရုတ်သိမ်းပေးမည်ဟူသော ကြေညာချက်အရ ရဲတပ်ဖွဲ့ထံ ဆက်သွယ်၍ နေအိမ်သို့ ပြန်ပြီးနောက် မေတ္တာရောင်ခြည် ပရဟိတအသင်း၏ COVID-19 ကပ်ရောဂါဆိုင်ရာ ပရဟိတ လုပ်ငန်းများကို လုပ်ဆောင်နေစဉ် ဖမ်းဆီးခံရခြင်း ဖြစ်သည်ဟု ၎င်းထံမှ သိရသည်။
.
ထို့အတူ ပြီးခဲ့သည့် မတ်လအတွင်းက ဦးစံဝင်းမောင်၏ ဇနီးဖြစ်သူသည်လည်း ဖမ်းဆီး ခံထားရပြီးနောက် ‌ညောင်ရွှေအကျဉ်းထောင် (တောင်လေးလုံးထောင်)၌ ယခုအချိန်ထိ ချုပ်နှောင် ခံထားရဆဲ ဖြစ်ကြောင်း သိရသည်။
.
ဦးစံဝင်းမောင်သည် ဆီဆိုင်မြို့၊ အောင်ချမ်းသာရပ်ကွက် အုပ်ချုပ်ရေးမှူး အဖြစ် တာဝန် ယူခဲ့ဖူးသူ ဖြစ်သည့်အပြင် မေတ္တာရောင်ခြည်ပရဟိတအသင်းတွင် ပရဟိတ လုပ်ငန်းများကို လုပ်ဆောင်နေသူ ဖြစ်သည်။
.
News Link - http://bit.ly/3veycMI
.
#KBZTai #Shan #News13october2021

■ တောင်ကြီးမြို့ လျှပ်စစ်ရုံး အနီးတွင် ပေါက်ကွဲမှု ဖြစ်ပွား
.
တောင်ကြီးမြို့၊ ဗိုလ်ချုပ်လမ်းပေါ်ရှိ လျှပ်စစ်ရုံး အနီး၌ ယနေ့ နိုဝင်ဘာလ ၅ ရက် နံနက်ပိုင်းက ပေါက်ကွဲမှု ဖြစ်ပွားခဲ့ကြောင်း သိရသည်။
.
“ မနက် ၁၀ နာရီ၊ ၁၀ မိနစ်မှာ ဖြစ်ပွားတယ်လို့ ကြားတယ်။ ငါးထပ်‌ဆောင် ဓမ္မာရုံရှေ့ လမ်းလယ်ကျွန်း‌မှာပါ။” ဟု တောင်ကြီးမြို့မှ တာဝန်ရှိသူ တစ်ဦးက အတည်ပြု ပြောဆိုသည်။
.
တောင်ကြီးမြို့နယ် လျှပ်စစ်ဓာတ်အား ဖြန့်ဖြူးရေးရုံး အနီး (ငါးထပ်‌ဆောင်ဓမ္မာရုံရှေ့) လမ်းလယ်ကျွန်း‌မျောတွင် ပေါက်ကွဲခြင်း ဖြစ်ပြီး ပေါက်ကွဲသည့် ဗုံး အမျိုးအစားကို သိရခြင်း မရှိသေးသော်လည်း အသုံးဗုံး ဖြစ်သည်ဟု ပြောဆိုမှုများ ရှိနေကာ ပေါက်ကွဲမှုကြောင့် ထိခိုက်မှု မရှိကြောင်း သိရသည်။
.
ယင်း ပေါက်ကွဲမှုမှာ ၎င်းတို့လက်ချက်ဖြစ်သည်ဟု Special Force 22 က ထုတ်ပြန်ထားပြီး လျှပ်စစ်ဝန်ထမ်းများမှ ပြည်သူများကို အတင်းအကြပ် မီတာခ ပေးဆောင်ရန် ဖိအား ပေးနေခြင်းကြောင့် သတိပေးသည့်အနေဖြင့် ဖောက်ခွဲခြင်း ဖြစ်ကြောင်း ထုတ်ပြန်ချက်တွင် ဖော်ပြထားသည်။
.
News Link - http://bit.ly/3mKRhDq
.
#KBZTai #Shan #News5November2021
.
https://t.me/kbztainews
https://twitter.com/kbztainews
www.kanbawzatainews.com
www.facebook.com/kanbawzatai
www.facebook.com/kbztai

■ ရှမ်းတောင်ရှိ မြို့နယ် ၁၀ ခုကို COVID-19 ကာကွယ်ထိန်းချုပ်ရေး လုပ်ငန်း ဦးစားပေးဆောင်ရွက်မည့် မြို့နယ်များအဖြစ် သတ်မှတ်ထား
.
ရှမ်းပြည်နယ်တောင်ပိုင်းရှိ မြို့နယ် ၁၀ ခုကို COVID-19 ကာကွယ်ထိန်းချုပ်ရေး လုပ်ငန်း ဦးစားပေးဆောင်ရွက်မည့် မြို့နယ်များအဖြစ် သတ်မှတ်ပြီး ဆောင်ရွက်လျက်ရှိကြောင်း သိရသည်။
.
ယင်းမြို့နယ် ၁၀ ခုမှာ တောင်ကြီးခရိုင်မှ တောင်ကြီးမြို့နယ်၊ ရပ်စောက်မြို့နယ်၊ ပအိုဝ်းကိုယ်ပိုင်အုပ်ချုပ်ခွင့်ရဒေသမှ ဟိုပုံးမြို့နယ်၊ ဆီဆိုင်မြို့နယ်၊ ပင်လောင်းမြို့နယ်၊ ဓနုကိုယ်ပိုင်အုပ်ချုပ်ခွင့်ရဒေသမှ ရွာငံမြို့နယ်၊ ပင်းတယမြို့နယ်၊ လွိုင်လင်ခရိုင်မှ လွိုင်လင်မြို့နယ်၊ နမ့်စန်မြို့နယ်၊ လင်းခေးခရိုင်မှ လင်းခေးမြို့နယ်တို့ ဖြစ်သည်။
.
COVID-19 ကူးစက်ပျံ့နှံ့မှု များပြားနေဆဲ ဖြစ်သည့် ရှမ်းပြည်နယ်တောင်ပိုင်းတွင် စစ်ကောင်စီ၏ ကျန်းမာရေးဝန်ကြီးဌာန၊ ဒုဝန်ကြီး ပါမောက္ခ ဒေါက်တာ အေးထွန်း ဦးဆောင်သော အဖွဲ့က အောက်တိုဘာလ ၂၉ ရက်မှ စတင်၍ ကွင်းဆင်း ဆောင်ရွက်နေလျက် ရှိသည်ဟု သိရသည်။
.
ထို့အတူ ရှမ်းပြည်နယ်မြောက်ပိုင်းတွင် ဒုညွှန်ချုပ် ဒေါက်တာ ထွန်းတင် ဦးဆောင်သော ကွင်းဆင်းအဖွဲ့နှင့် ရှမ်းပြည်နယ်အရှေ့ပိုင်းတွင် ဒုညွှန်ချုပ် ဒေါက်တာထွန်းမြင့် ခေါင်းဆောင်သော ကွင်းဆင်းအဖွဲ့တို့က ကွင်းဆင်း ဆောင်ရွက်နေကြောင်းလည်း သိရသည်။
.
မြန်မာ တစ်နိုင်ငံလုံး အတိုင်းအတာဖြင့် COVID-19 ကူးစက်ပျံ့နှံ့မှု လျော့နည်းလာသော်လည်း ရှမ်းပြည်နယ်တွင်မူ သိသာစွာ လျော့နည်းသွားခြင်း မရှိသေးဘဲ လက်ရှိ တတိယလှိုင်းကာလတွင် COVID-19 ပိုးရှိသူ စုစုပေါင်း ၆၇၀၀၀ ဦးကျော် တွေ့ရှိခဲ့ပြီး ယင်းအနက် ၁၇၀၀ ဦးကျော် သေဆုံးခဲ့ရသည်။
.
News Link - http://bit.ly/31NaZ9H
.
#KBZTai #Shan #News10November2021
.
https://t.me/kbztainews
https://twitter.com/kbztainews
www.kanbawzatainews.com
www.facebook.com/kanbawzatai
www.facebook.com/kbztai