كل عام و انتو بخير ...❤️

2025/1/1

اي قرار
تحسه يرضي رب العالمين ويرضي تربيتك وضميرك
سوي بدون ماتسال احد لان صدك مراح تخسر

دير بالك تزعل على الي فات لو على شغله راحت منك وجنت متعشم بيها ومنتظرها اذا جانت بيها نصيب الك راح تجيك حتى لو انت أيست منها واذا ما الك نصيب بيها مستحيل راح تاخذها حتى لو فريت الدنيا وراها متعرف رب العالمين شنو مدبرلك بدون متدري ممكن ياخذ منك نجمة حتى ينطيك بدالها القمر صدكني كل الي راح والي راح يجي من رب العالمين هو خير الك واذا جان الك بي نصيب راح يجي منه "خير" لأنه رب الخير ولا يأتي إلا بالخير، وصدكني صبرك شكد ما طال راح يجيك العوض فوك الجمال وكل متشوف نفسك تعبت كول " يارب اني راضي ومنتظر وكلي ثقه بيك وظني عمره ما خاب ولا راح يخيب " وانتظر ورة فتره راح تشوف الفرح ينزل على قلبك والسعادة الي راح تشوفها والفرح الي راح ينزل على قلبك بسبب يقينك وايمانك برب العالمين

#الكاتب_مستر_عبودي❤️

ﻛﻞ ﺻﺪﻣﺔ بالبدايه تصير كلش صعبه ،
ﺑﺲ ﺑﻌﺪﻳﻦ راح تعرف ﺃﻧﻮ ﺍﻟﺤﻴﺎﺓ ﻣﺴﺘﻤﺮﺓ .. ﻭ ﻣﺎ ﺭاﺡ توكف على ﺷﻲ ﻣﻌﻴﻦ ، ﻭ ﻛﻞ ﺷﻲ ﻣﻜﺘﻮﺏ ﻣﻦ ﻋﻨﺪ رﺏ ﺍﻟﻌﺎﻟﻤﻴﻦ ، ﻣﻤﻜﻦ ﻧﻔﻜﺮ ﺑﺎﻟﺒﺪﺍﻳﺔ ﺃﻧﻮ ﺍﻟﺤﻴﺎﺓ ﺃﻭ ﺍﻟﺤﻆ ظلمونا ، ﺑﺲ ﺑﻌﺪﻳﻦ نكتشف ﺃﻧﻮ ﻛﻞ ﺷﻲ ﻛﺎﻥ ﺿﺪ ﺭﻏﺒﺘﻨﺎ ﻫﻮ ﺧﻴﺮ ﺇﻟﻨﺎ ﻭ ﻟﻸﺣﺴﻦ ب النهاية هاي ﺣﻴﺎﺓ ﻭ ﺭاﺡ ﺗﺴﺘﻤﺮ ﻣﺎ ﺭاﺡ توكف على احد ، ﻭﻋﺴﻰ ﺍﻥ ﺗﻜﺮﻫﻮﺍ ﺷﻴﺌﺎ ﻭﻫﻮ ﺧﻴﺮ ﻟﻜﻢ ﻭﻧﻌﻢ ﺑﺎﻟﻠﻪ ع طول

#الكاتب_مستر_عبودي❤️

الأزمات بمختلف أنواعها راح تعدي .. المشاكل تخلص و تنحل ، والاحتياج يصير فترة وينتهي ، و الحزن ياخذ وكته و يروح ماكو شغله تظل مثل ماهيه غير بس ردود فعل الي داير مدايرك.. منو الي من احتاجيته وكف وياك .. و منو من زعلت اِهتمّ بزعلك و حاول هواي إنه يفرحك بكل الطُرق الممكنه. و الغير مُمكنه .. و منو من وكعت بمشكلة دور وياك على حلّها لحد ما لكيت الحل ، كل الابتلاءات مهما جانت صعبة راح تعدي و أغلبها حتى تعرف منو الي يحبك ومنو مسوي نفسه يحبك ؛ رب العالمين يبتليك محبه بيك حتى ينوّر بصيرتك و تشوف الي داير مدايرك صح.
شكد ما اكو ناس صح بحياتك.. شكد ماانت راح ترتاح نفسياً .

#الكاتب_مستر_عبودي❤️

جنت اگلب بأكثر من موقع ، فيس انستغرام تيك توك ، وركزت على المحتوى مال عراقيين ، استغربت انه الطرح والمحتوى الجيد ماعلّي تفاعل عكس المحتوى التافه الي علّي تفاعل وألي اغلب المجتمع متابعهم بالعراق التفاهة مو بس تنتشر ، تريح لأن العقل المرهق من الصدمات الجماعية يدور على شي (خفيف) شي مايهدد توازنه العقول المرهقة يتعبها التفكير العميق ، تخاف من الذكاء وتصفك للسطحي ، لأن مايطلب منها تفكير بس تفاعل التفاهة بالعراق مو بس خيار هي آلية دفاع ضد الوعي

#الكاتب_مستر_عبودي❤️

اكو هواي اشخاص بمجتمعنه بس شكل من تشوفه حلو ويعجبك ومرتب ما بي اي عيب .. ترسمله صوره بالك كلش حلوه وهذا الشي غلطط ...
بعدين من تتقربله ! تنصدم تلكاه لا يعرف يحجي ولا عنده ثقافه ولا شخصيه ...ذولي صايرين بل ضبط شلون (الفخ ) اله توكع بي يله تعرفه ويبين عندك شنو نوعه

عادي توكع بهيج اشخاص لان هاي دنيا وكلشي تشوف بيها
بس المهم متوكع بيهم مره ثانيه وتعرف الناس شنو .

#الكاتب_مستر_عبودي❤️

ممتن للحياة التي لم تعدني بشيء، لكنها أعطتني كل شيء حين لم أكن أطلب، ممتن للصدمات التي فتحت في قلبي أبواباً ما كنت سأعرفها لولاها، ممتن للذين جاءوا وعبروا وغابوا، لأن أثرهم بقي حتى بعد أن نسيت الوجوه، ممتن للوحدة، حين صنعت لي مكاناً أسمع فيه صوتي، وللألم، حين علمني أن بعض الجراح تفتح داخلك حدائق، ممتن لأنني تعلمت أن أمشي وسط الحطام بابتسامة، أن أحب دون أن أملك، أن أؤمن بالحياة حتى عندما تخونني، ممتن لأنني، رغم كل شيء، ما زلت أختار أن أفتح عيني كل صباح وأقول: نعم، سأعيش

#الكاتب_مستر_عبودي❤️

أكو مرة تحط صورة زوجها بروفايل، مو لأن تحب تفتخر بي كدام الناس، بس لأن صورتها بدون ملامحه تبقى ناقصة.
وأكو رجّال يكتب ابو حيدر على محله، مو حتى الناس تعرف اسمه، بس حتى يذكر روحه بالفرح اللي نزله من السما يوم إجه حيدر للدنيا وأكو أم يوسف وأدهم تسمي حسابها بأسماء جهالها، وكأنهُ تريد تكول للدنيا كلها: هاي أسمائي الجديدة، آني انولدت وياهم من جديد وجد ،يحط صورة حفيده خلفية لتلفونه، وكأنه يريد يحتفظ بلحظة ما تنباك من إيده، لحظة صغيرة، تشبه وردة برية نابتة بين ركام العمر.
بهالزمن التجاري ، زمن المظاهر، يمكن الناس تشوف هاي التصرفات سذاجة، ويمكن تضحك عليها، بس اللي يعرف شلون الروح تحن، يدري هاي الصور مو بس مشاهد ، هاي محاولات يائسة حتى نثبت گلوبنا بهاي الدنيا اللي كلشي بيها يركض وينتهي الحب الحقيقي ما يحتاج شرح، ولا زينة، الحب الحقيقي مثل نَفَس الصبح البارد، تحس بيه بس ما تكدر تلزمه.
واللي بعده يحتفظ بصورة، أو ذكرى ،هو بالحقيقة يحفظ العالم من إنه يبرد أكثر.
شكد حلوة گلوبهم من تمر بيها نسمات هيچ ناس، يحبّون بخوف، ويحلمون بعين مفتوحة، ويحطّون حبهم علامة يمشي بيها العمر كله

#الكاتب_مستر_عبودي❤️

النجاح ❤️
النجاح يبدأ بخطوة والخطوة تأتي بالثقه والثقة تأتي بالإرادة والإرادة يصنعها الطموح والطموح يأتي من الحافز الداخلي والحافز يأتي حين نبدأ بالتفكير النجاح لا يأتي بالصدفة إنه مزيج من العمل الشاق بعد التوكل على الله، المثابرة التعلم الدراسة، التضحية و حب ما تقوم به أو تحاول تعلمه

#الكاتب_مستر_عبودي❤️

كل عام و اني بخير

2025/6/12❤️

@mrab0de1

الحسين مبدأ، مو موسم تنزل بيه تمثيلياتك

من اغرب الاحاسيس الي شفتها بليلة العاشر ، انو انته متحس بالزمن تروح منك فكره ان المعركه صارت قبل الف سنه وان كلشي انتهى وان الامام الحسين عليه السلام استشهد اكو اشياء تهزك و اكو شي بداخلنه غامض ياكدلنه ان المعركة بعدها مصايره ،وان الامام الحسين راح يقاتل باجر ..وياخذ قلوبنا وهو يتقدم نحو الجيش، وهو يتألم لفقد الاصحاب، وهو يعطش، وهو غريب بين جيش جرار راح نكون وياك باجر . وراح نحارب وياك ومراح نصدك انك مبضع بالسيوف. وراح يبقى يرافقنا هذا الاحساس حتى السنه الجاية، والسنوات الجاية وكل العمر الذي يفنى من اجلك

#الكاتب_مستر_عبودي❤️

الفشل من وكت للشباب اعتبره نعمة ، لأن يعرف ببداية الطريق الدنيا مو سهلة ، والنجاح مايتوزع بالعدل ، من تعوف ابنك لو بنتك او شريكك يخوض تجربة ويفشل انت بهالحالة تنطيهم هدية عمرهم .
تكلهم بدون ماتنطق ، جرب بعد ، الطريق مو بس هذا
بس إذا بقيت تحميهم وتحطهم بعلب زجاجية ، بأول مطب يصير كدامهم راح تنهز ثقته ومايعرف يوكف بعد
الفشل مو عيب ، العيب تمنع شخص شاب من التجربة ، والحياة مو كتاب قواعد ، الحياة ورقة بيضة وكل غلطة بسطر وره السطر الثاني يتعلم يكتب احسن .
عوفه يتوجع شوية ، يتعلم الطريق اله بدائل ، والي يوكع ويكوم احسن الف مرة من الما جرب اصلاً .

#الكاتب_مستر_عبودي❤️

الحياة اكبر من فكرة النجاح الك لو لغيرك المساحة البيها تكفي انت تنجح وصاحبك ينجح وحتى اليكرهك ينجح الحياة ماتستاهل تباوع على غيرك بغيرة لو تشيل جواك حقد على شخص فانية وبلحظة صفحتك تنسد اخذها ببساطة وخليك مشغول بنفسك بخطوتك وطريقك والنصيحة هذي لنفسي قبل اي شخص


#الكاتب_مستر_عبودي❤️

بالصورة : ابو فلة، قبل كم سنة بادر وأطلق حملة لجمع أكثر من ١١ مليون دولار للنازحين ،، لا استقبل فلان ولا استقبل علان ولا صارت دعاية ل س و ص، وكدر يجمع مبلغ اكثر من المطلوب ونجحت الحملة مالته .. وياه بالغرفة اصدقاء ٣ يمكن بوقتها واستقبل تبرعات من جهات رسمية حكومية ومنظمات ورجال أعمال ..

اتمنى من الشباب الي بساحة التحرير يلتزمون بمنهج جمع التبرعات بصورة صحيحة وتسلم النية وما ينحرف المشروع للطشة والتسلق على اوجاع الناس .. مشروعهم انساني ومهم ونتمنى ينجح بس لا يخلون احد يجي وتصدر المشهد للطشة ..

⁨ اكثر كلام اسمعه من اهلي هو (ولامره خفنه عليك ندري بيك سبع) اليوم الانسان المتربي تربيه صحيحه واهله واثقين من عنده وفخورين بالجاي يقدمه من شغل، او دراسه، او اي شي ثاني هذا مايخافون عليه يدرون هو سالك الطريق الصح ويدرون بي هو گد المسؤوليه وعليه اعتماد بالاوقات الصعبه بينما الانسان اليمشي عكس هذا الكلام كله اتمنى ينتبه على نفسه ويراجعها ويصحح اغلاطه ويشتغل على نفسه ويراعي اهله ويعاملهم احسن معامله ويترك الطريق الي هو سالكه ويتجه بالطريق الصحيح صدگوني ورا فتره راح يحس ويشوف الفرق هو وين چان ووين صار ، صح احنه مو معصومين وكلنا نغلط بس لازم نتعلم من اغلاطنه، وتحياتي للجميع وبالتوفيق للجميع يارب🤍


#الكاتب_مستر_عبودي

🌙 1 رمضـان | 1447هـ
18 / 2 / 2026
أول يوم رمضـان.. ✨ يا ربي اجعله شهر خير، وجبر، ومغفرة. صياماً مقبولاً وذنباً مغفوراً للجميع.

الحرب ما تقتل الناس بس… الحرب تقتل الحياة كلها!

اليوم مو بس صواريخ تنزل اليوم اكو قطاع كامل ينهار بصمت… شركات السياحة والسفر اللي كانت مصدر رزق لآلاف العوائل، صارت ضحية مباشرة للخوف والدمار.

منو راح يسافر ودوي الانفجارات يُسمع؟
منو يفكر برحلة وهو شايف الأخبار مليانة موت ودم؟

الحجوزات تُلغى، الطيارات تتوقف، الفنادق تفرغ، والمكاتب تغلق أبوابها… وراها عوائل تتضرر، وشباب يفقد شغله، وأحلام تنكسر بدون صوت.

السياحة تحتاج أمان… والحرب تقتل الأمان.
السياحة تحتاج حياة… والحرب تصنع الموت.

والأصعب؟
حتى لو انتهت الحرب، الخوف يبقى… والناس تحتاج وقت طويل حتى ترجع تثق وترجع تسافر.

الحرب مو بس جبهات قتال…
الحرب خراب اقتصاد، وكسر مستقبل، وضياع فرص.

الله يحفظ الناس، ويرجع الأمان لكل مكان