أُمي أول ما أصحيها بتقوم مخلوعة مهما كانت طريقتي!

بقول لها أصحيك كيف بياتو طريقة وما تتخلعي لما تقومي ؟

حتى ماما لحنتها و أنا بناديك بها عشان تصحي!

قالت لي : أنا أصلاً كدا ما تشتغلي بالموضوع!

غالباً الحاجة دي دخلت فيها مِن فترة طفولتنا بسببنا نحن كانت لو نامت بتقوم مفزوعة على واحد مِننا خوف يكون حصل ليهو شئ

يا الله ضريبة الأمومة دي الواحدة بتفضل تدفعها عُمرها كلو! 💔

بتأكل مِن عقلها و قلبها و جسمها و كلو عشانك إنتَ و إنتَ بتجادلها فى حاجات تافهة تزعلها .. بترد بإسلوب لمديرك في الشغل ما بترد به - إلًّا مَن رحم ربَّي - ؟!

دينهن علينا كتير قدر ما تعمل ما بتقدر ترده فالله الله في بذل الجهد لهن قبل الطلب و الله الله في الكلمة الطيّبة! 💌

و مِن البر قضآء حاجاتها دون سؤالها 🌸

#ترتيل_الخزين

سيغرك يوماً ما كُنت غاضًا عنه البصر فقوّم خُطاك ولا تلتفت!💌🎀

#ترتيل_الخزين

أمس بالليل كنت بتكلم مع صديقة قالت لي دعيت لك يوم عرفة، ومِن بين الحاجات الدعيت لك بها إنّو ربّنا يقربك أكتر ويثبتك فبتقول لي بقول يارب ما تفتن ترتيل!..
فسبحان الله فرحت شديد بدعائها دا تحديدًا في الوقت الصعب دا، لأنّو الأيام دي أيام فتن والله المستعان! 💔

وأنا أصلًا مِن أمس حاسة بفتور كده في النوافل كنت بصلي الضحى أربع فصليت 2 وزعلت مِن نفسي شديد في التقصير دا وشغالة ألوم في نفسي اليوم كلو، فبقول لنفسي اتقِ الله ياترتيل، اتقِ الله يانفس، يعني عشان عشر ذي الحجة انتهت الواحد يفتر، دي ما أيام فتور يابت! ..

فدعائها لي جاني في جرح والله!

فيأبى إلّا أن أتعلم الدرس كاملا! ..

عندنا جارتنا كل يوم العصر بنجيب تلج منها بنختو عندها في التلاجة عشان البيت ماشاءالله مليان وهي براها جزاها الله خير،فاليوم مِن دون الأيام لظرف مشيت بعد المغرب، لقتيها كانت بره ويادوب جات فصلت متأخر، فلقيتها في المصلاية قلت لها بعد تخلصي اخدي راحتك ودعواتك لنا معاك!..

قالت لي هي ركعتين النافلة المغرب صليتو الحمد لله ف بناولك وبجيهم مافي مشكلة!
وإنتِ الما تنسيني إنت زولة ماشاءالله كمان ماهينة! 💔

فحز في نفسي كلامها شديد، خجلت مِن نفسي واستحرقتها شديد، كلامها حسيت إنّو رسالة مِن ربّنا لي، إنّو لو إنتِ كسلتي غيرك عاضي عليها بالنواجذ! ..

فبترسخ عندي دائمًا قول الله في سورة التوبة وبشوفو والله بأم عيني في كتير حواليني:
{ يآأيها الذين ءامنوا اتقوا الله وكونوا مع الصادقين}

عشان الصادق دا بثبتك، بقويك، بعينك بعون الله على طريق ربّنا، فاتفقدوا أصحابكم في الأيام دي ياجماعة، ذكروهم بأجر الصبر حتى على النفس في الجهاد في الأوضاع الصعبة دي، الناس اللي اجتمعوا على حب الله يخلصوا في هذا الحب ويؤتوه حقه!..
دي أيام فتن وابتلاءات،أيام محن عظيم، فامسك بيد أخيك حتى يرى المنحة فيها، كن معه ولو بالدعاء عن ظهر غيب!..

ربّنا يعفو عنّا هفواتنا والسهوات..
يرحم ضعفنا ويجبر كسرنا ويغفر لنا التقصير ..
أسأل الله أن يثبت قلوبنا ويوفقنا مِن الأعمال لما يحب ويرضى! ..
آمين آمين 🤍..

ولذلك أيضًا كان مِن الدعآء يا اخوانا :
اللهمَّ لا تكلني إلى نفسي ولا إلى أحد سواك طرفة عين ..

فمَن أراد الله أن يخذله أوكله إلى نفسه والله!
نعوذ بالله مِن هكذا حال ..

والسلام!🌹

#ترتيل_الخزين

قُرة عين أهل القرءان في الدَّنيا قيامُ الليل!❤️

#ترتيل_الخزين

الأيام دي لبن البودرة في البلد النوع المتوفر جودته ما كويسة والموضوع دا أول أيام طبعًا كان حقيقي يعني مؤزمني لحدٍ ما، يعني شاي اللبن دا متعة قبل ما يكون مشروب، فتخيل كده طعمه يكون مابنفس المتعة اللي إنت متعود عليها، المهم قبل شوية وأنا بشرب في الشاي لقيت إنّو أنا اتعودت على الطعم الكان قبل كم يوم غير مستساغ دا، قلت ياربّي هو الطعم اتغير؟ لا، طيب أنا ليه استسغتو والمووضوع ما بالسوء الكنت حاسة بيهو أول أيام، دا نفس لبن البودرة أنا كبيتو بيدي ونفس الجودة، لكن الواحد ربّنا أداهو نعمة عظيمة قليل ما ننتبه لها ..

وهي نعمة التعود! ..

النعمة دي بتخليك تتأقلم على أوضاع ممكن تكون ما مريحة بالنسبة لك، في البداية بتحس إنّك ماقادر والدنيا ضايقة بك والجو دا!

لكن سبحان الله لحكمة ربّنا خلاها غير مريحة بالنسبة لك، الموضوع دا ما صدفة، ولا عشان إنت حد كعب ولا دا عقاب ولا كده، لا، لأنو ولا يمكن حياتك تكون كلها مريحة،عشان كده ربّنا سخر لك النعمة دي، لازم ولابد تمر بفترات صعبة، بأيام تقول فيها لا أنجو فإذا برحمةِ الله تنجو، عشان كده طالما هي كده كده حتمر عليك ..
اتعامل معناها بالنعمة العظيمة دي اللي ربّنا سخر قلبك وعقلك عليها ..

أنا ما بقول لك أتعود على أي وضع مهما كان!!

لا ..

أنا بقول لك اتعود على حاجات ما خطيرة، ما تكبر كل حاجة وتعمل منها قصة كئيبة، ما أي موقف ولا ظرف تدق فيه جرس! ..

لأنّو كده بتكون بتصعب على نفسك الحياة ما أكتر ..

دق الجرس دا خليهو للحاجات البتستاهل، ما في كل موقف وأبسط حاجة تدق جرس! ..

سبحان الله اليوم الخطبة كانت عن شرح وتفسير سورة العصر ..

فالإمام اتكلم عن قول الله { وتواصوا بالصّبر} ..
فذكر 3 أنواع للصبر ..
مِنها الصبر على أقدار الله ومنها المصائب ..
والصبر على طاعة الله ..
والصبر على معصية الله ..

فسبحان الله لازم ولابد ربّنا يبتليك بديل عشان تثبت في كل واحد فيهم! ..

فالحياة دي ياجماعة حلوة ببساطتها وبصعوبتها كمان ..
حلوة بالصبر،بإنّك تمشي وتفوت وتحاول تغير مِن الوضع الغير مريح لحد ما تخيله يكون مناسب لك قدر الإمكان، ما بالمستوى الإنت متعود عليه لكن خلي بصمتك الخاصة بالرضا تلمس كل حاجة ..

وحتلقى ربّنا فتحها عليك ..
والامور المعقدة ماشة لإنّها تتحل ..
والحاجات الصعبة شوية شوية بتتحل ..
والأوضاع الغير مريحة ماخدة مسار تكون مناسبة لك لحدٍ ما ..

وهكذا ..

أسي أنا ولا يوم في حياتي كنت متخيلة إنّو حأقيف الوقفة دي وأعمل لي قهوة هنا، مابين البوتجاز والهيتر الواحد اتعلم خبرات جديدة والحمدلله نعمة وفضل مِن الله أتاح ليهو الفرص دي وأداهو الصبر على قدرها ^^

فاللهَ اللهَ في الصبر ..

والسلام! 🌹

#ترتيل_الخزين

ماتزهدوا الناس في قيام الليل بالقيام للصلاة! ..

ماتزهدوا الناس في إنّو الواحد يقوم ويسيب سريره الدافئ والنومة الحلوة ويمشي يتوضأ بالموية الباردة في الليلة شديد البرودة،ويزح عن عيونع النوم ويجي يقيف بينَ يدي الله يصلي ولو ركعتين! ..

أتدري كم ترفع العبد هذه الركعتين؟

وكم تصنع المستحيلات في حياته؟!

كم تصلح وكم تدواي وكم تطيب وكم يتحقق بها مالم يكن بغيرها؟!

ما تستهون بالموضوع وماتتعامل مع القيام إنَّك عايز تكون قائم وتطلع نفسك مِن دائرة الناس المابقيموا الليل، فتصحى وإنت في سريرك تستغفر ولا تدعو وكده وترجع تكمل نومك! ..

دا مقبول بإذن الله لو كتب الله له القبول ..

لكن لو كان مثله مِثل القائم بالصلاة، طيب ليه النبي كان يصلي حتى تتفطر قدماه وهو المغغور له؟!

مش عشان إنت تجاهد نفسك وتقتدي به وتصلي ولو ركعات!!
ليه ربّنا خص تنزله جل شأنه إلى السماء الدنيا كل ليلة في الثلث الأخير طالما الليل كله واحد؟!

أي نعم القيام مِن بعد المغرب!

لكن سبحانه يقول في الثلث الأخير- كما ورد في صحيح البخاري- :

[مَن يدعوني فأستجيب له؟ مَن يسألني فأعطيه؟ مَن يستغفرني فأغفر له؟]

اللي عايزة أقوله ما تزهدوا الناس في قيام الليل كما كان يُقيمه رسول الله وصحابته، لما إنت تكتب نص أقيم الليل في سريرك أذكر مع ذلك فضل القيام بالصلاة وأفضليته على غيره، عشان غيرك اللي حيقرأ النص دا ما يفتكر ذيه وذي أي قائم ليل وكله واحد!!

{ هم درجات عند الله} 👌

وإنَّما أقول قولي هذا مِن باب الواحد مايرضى لنفسه أن يكون الأخير في الطاعات، والأقل فيها!

الواحد أصلًا بصلاته وقيامه دا سابقنو ناس كتار لربّنا فيجي بعد دا يكون حظه أقل حظ وهو راقد في سريره ومدفئ ينافس مع القايمين في المحراب؟!
إلا لو كنت صاحب عذر مِن باب ما تتركه خالص تجاهد بالاستغفار والدعاء ..
لكن وإنت شاب إن لم تستغل عافيتك وشبابك في طاعة الله أسي وإنت شاب تقيم بها الليل طيب حتقوم متين؟!

هو أصلًا الواحد بجاهد في شنو؟! ماياها الصلاة دي والنوافل وحبة مِن هنا وحبة مِن هنا؟! بعد دا يزهد فيها؟!

الله المستعان!

#ترتيل_الخزين

صباح الخير 🌹..

قبل يومين كنت بتكلم مع صحبتي هي مرسلة لي مقطع وصورة HD فبقول لها هاك لوف على الصورة قبل أشوفها عشان ماحأقدر أشوفها أسي لأنّي مامفعلة كتير، ورصيد هنا في البلد مافي عندنا الفترة دي! ..

فبتقول لي في تطبيق بشغل لك النت مجان بصور وفيدهات وريكورد وكلو،لوهلة كده الواحد بفكر ياسلاااام ياخ دا عرض حلو أهو الواحد يوفر قروش في الوضع دا مع عدم الشغل!!

لكن سؤال هو يعني أنا حأسرق مِن ناس الشبكة؟!

قالت لي : ياترتيل أنا ذاتي شاكة فيهو والله وسبحان الله في بالي أسأل الشيخ البدرسنا في الخلوة لكن نسيت!

قلت لها : إنت عارفة حاجة، خليك مِن التطبيق اللي هو أصلًا سرقة حاجة ماتستحقها بدون مقابل والشركات دي كتر خيرهم ناس سوداني في بداية الحرب أكرموا الناس شهور بالنت المجان وهم كانوا عايزين كده وقاصدين جزاهم الله عنّا كل خير، لكن حاليًا هم ماقاصدين يدوني هدية، لا أنا تعديت على حقهم بدون وجه حق!!

وخليك مِن التطبيق إنت عارفة إنّو النت الكان قبل كم يوم وهم قالوا دا عطل منهم يعني ما قاصدين لو هم راضين دي تعتبر حاجة أخدتها برضو بدون وجه حق؟!

فلقيتها بتقول لي ودا كان شبكتنا قطعت خالص يومين لما تجي الشبكة ياترتيل ماتستعجلي تفعلي عشان أنا المرة الفاتت شالوا مني 7 قيقا وهو كان شغال مجان!!

فبسألها: شالوا منك 7 قيقا كيف؟!

قالت لي: عشان كنت منشطة 15 كملت 8 والباقي دخل مع كل الناس في المجان!

طيب بغض النظر عن كل الناس كان شغال عندهم النت، هل شالوا منك بغير وجه حق؟! مش مقابل خدمة أخدتيها واستفدت مِنها؟!

قالت لي : أيوه!

يبقى هم أخدوا حقهم مازادوا عليه!

تعرفي أنا يمكن مبسوطة وممتنة لربّنا شديد إنّو لما حصلت الحاجة دي أنا أصلًا الحمدلله كنت منشطة شهر يادوب وإنّو كنت شغالة بحقي!!

فلقيت نفسي بنصحها بحاجة يمكن أنا تعلمتها مِن الحرب دي بصورة واضحة شديد، وهي إنّو الواحد ما يخت نفسه موضع الضحية أبدًا في أي حاجة يمر بها أو تحصل له!..
وناس سوداني شالوا رصيد وخسارة النشطت وووو...الخ!

لا ماخسارة عشان إنت عايز خدمة يبقى طبيعي تدفع مقابلها قروش، فماتعيش دور الضحية!!

حتى الحرب دي بالمناسبة أي فقدنا وخسرنا فيها كتير كلنا بلااستثناء لكن لعله سُلط علينا بذنوبنا؟!

أنا لي دور فيها بقدر شعور الخسارة والفقد! ..

أنا ماضحية بقدر ماعندي ذنوب محتاجة تتكفر، وعندي نفس محتاجة تتربى وتتهذب ومعروف الشدائد تُعلم المرء مالايتعلمه في غيرها، ودا ابتلاء أسعى يكون لي به رفعة!..

فماتتعامل مع أحداث الحياة حولك والأقدار البتحصل لك يدور الضحية، دي حاجة سيئة شديد وحتخليك تكون مستضعف قدام نفسك قبل أي حد تاني! ..

فبلاش تقول لنفسك عبارات عملوا لي وأنا مااستحق وما استاهل ووو...الخ!
لأنّها حتقلل قيمتك قدام نفسك!

حاليًا في زول حيقرأ البوست ويشوف أنا متشددة، والمووضوع ما مستاهل دا كلو ويعني شنو لو اشتغلنا بتطبيق وأصلًا الناس وضعها صعب حق التنشيط في تعب، وهي جات على دي، الواحد الغلط البعملو كتير ...الخ!..

لكني ..

- أخشى عليك أن تضيع الحقوق عليك، ويلتبس الحرام بالحلال في سائر حياتك مِن استصغار مِثل هذة الامور، وأخشى عليك أن تألف المنكر باعتياد الناس عليه!

- وإنّما هي هذة الصغائر ..
ترفعُ العبد عند الله أو تنزله!

- ومايُدريك ..

لعلك تأتي يومَ يبعثون، فتدخل الجنّة وتُسأل فيها أي عمل كان أرجى عندك لتدخلها؟

فيُقال: كان يتخير الحرام مِن الحلال في شأنه كلّه، ما أقدم على فعلٍ إلّا وقد سأل نفسه قبلها أ حلاال هو أم حرام؟

وكان يتركه مع شديد جوحته له فقط لأجل أنَّه لايرضاه الله!
فكم تركَ لأجلِ الله!

فاللهمَّ علمنا الحلال والحرام..
جنبنا الحرام كلّه، وبارك لنا في الحلال ..

والسلام! 🌹

#ترتيل_الخزين

قادر تعبد ربّنا كويس؟

دا سؤال أي مرحلة حتمر عليك مِن بعد اليوم!..

إنت اتعلقت بالدُّنيا كتير وجريت وراها، وغير التعب مالقيت شئ، في النهاية كنت بتأخد رزقك اللي كاتبه لك ربّنا مِن البداية، في كل شئ في زواج وشغل ووظيفة وبيت وكل شئ حرفيًا كل شئ إنت أخدت نصيبك وبس!..
حلو إنّك تسعى لهدف في حياتك، لكن الفكرة الأرسخ هي إنّك هل إنت بتعبد ربّنا كويس؟!
كل الخيارات والفُرص والابتلاءات دي هي اختيار ربّنا لك، ماشطارة ولافلاحة مِنك،فماتتمسك شديد، ما تجي على حق مِن حقوق ربّنا عليك في سبيل أي حاجة دنيوية!..

لأنّك بس في لحظة تقرر تختار الدنيا حتلقى ربّنا أداك ليها لكن ما بفرحة رغبتك فيها، لا ..
حتلقاها ماعندها طعم، وإن ذقت لذة في بدايتها، لكن قد يعطيك ماقدمت على حقه ف تذوق فيه الوجع بدل الفرح!..

سبحان الله زمان حصل معاي موقف مستحيل أنساه..
كان نفسي في حاجة وبعدين مافي طريق يوصلني لها غير حاجة كده يعملها ربّنا مِن عنده بدون مايكون عندي دور في الموضوع، فشنو كزولة بتاعت يقين كنت متأكدة شديد إنّو ربّنا مع استحالة كل الأسباب الممكنة حيجيبها لي لغاية عندي، كان عندي شعور قوي بكده والله العظيم سبحان الله!..

وسبحان الله قبل ماأدعي حتى والله لقيت ربّنا فعلًا جاب لي الحاجة دي لغاية عندي، القصة كانت فضول أولًا وأخيرًا في تجربة كانت جديدة عليَّ ..
فعارف الشعور بتاع إنّو خلاص تعاملت معاها على إنّها خلاص حقتي، مرات الغرور بتاع إنّك ضامن الشئ يسلب مِنك الشئ دا والله!
فسبحان الله في تفاصيل ماكانت واضحة بالنسبة لي لقيتها ضاعت مني!! ..

طيب كيف؟!

يعني هو ربّنا جابها لي لغاية عندي مِن حول مني ولاقوة!
ليه يأخدها؟!
عشان أديتها أكبر مِن حجمها في حياتي، وعشان ركزت معاها وعشان للحظة الشيطان زيّن لي إنّها مِن المضمونات خلاص بقت حقتك!!..

فلمست فيه شئ مِن قول الله للصحابة رضوان الله عليهم ..
{ ويومَ حُنينٍ إذ أعجبتكم كثرتكم فلم تُغنِ عنكم شيئا}

بالضبط كان الشعور بين {أعجبتكم} و {فلم تُغنِ عنكم شيئًا}! 👌

طبعًا أنا اكتشفت الخير كان وين في إنّو ربّنا أخدها مِني، وحقيقي ظللت ممتنة لله جِدًا إنّو تلطف بي بعد سوء تصرفي بشعور قلبي!..

لكن تعلمت درس عظيم جِدًا ..
أن يكون مافي يد الله أوثق ممافي يدي! 💌..

ما تغتر بحاجة عندك حتى لو بقت في يدك، ربّنا قادر يسلب مِنك كل شئ، الأمان بس في الدنيا دي إنّك تكون جنبه، تاني مافي أي أمان خااالص مش لو بقيت منو ومنو!..

فشينة والله الواحد يكون متعلق بالدّنيا، وبفضلها مرات على حق الله عليه، كان صلاة ولا زكاة ولاغيره..
اللي عندك أداك ليهو ربّنا ..
والشالو مِنك هو أصلًا حقه ورجعه!

دي القاعدة المفروض تتعامل بها مع كل حاجة في حياتك!..

مش إنت قادر تعبده كويس؟ مش بتجاهد في صلاتك، بر بوالديك، في الصدقات والفروض العليك وكذا؟!
يبقى تاني مافي أي شئ مهم!

كلو بمشي وبجي!

سبحان الله في لمة نازحين كده قالت والله تاني مافي عدة بتقعد منظر ولا دي لكده ودي لكده، أسي أها سرقوا بيوتنا، عدتنا السمحة الكنّا لامينها نحن ما ضقناها! ..

فحرفيًا ..

البقاء لله ❤️

وكلو خليهو يتغير عادي المهم علاقتك مع ربّنا تكون ثابتة يقينك، حسن ظنك به، عبادتك..
دا هو بس الباقي، ودا البنفعك بالجد!

اتفقنا؟

والسلام! 🌹

#ترتيل_الخزين

حرفيًا حاسة إنّي عايزة أتكلم عن الدعاء كل يوم لحدي أخر رمضان، إنت ما متخيل فكرة تعاملك مع الدعاء وحال قلبك وقت الدعاء وبعدها مهم قدر كيف!

الدعاء مقام كلّه دروس تُدرس ..

فبالله عليك ماتيأس خالص!

اسمعني مِن الأخر كده أعمل فيها لا بتسمع ولابتشوف لاسبب ولا مستحيل ولا أي شئ، ما تعاين لشئ ولاتسمع كلام مُحبط ..

ركز في دعوتك وقلبك وبس!

{ قد جعلها ربّي حقًا}

مستنياك في نهاية الطريق!

ماتفتر ولاتمل!
وإيَّاك تيأس!
اللهَ اللهَ في اليقين 🤎

#ترتيل_الخزين

ماكانت سيدةُ النساءِ ولا خِيارهن، لكنَّها كانت قوَّامة ل الليل! 🤎

كانت تُجاهِدُ نفسها دائمًا على الصواب بقيام الليل!

#ترتيل_الخزين

ماذا أعددت للأيام الصعبة؟

- لو جيت أعاين لحاجة أقول والله دي الخاتها للأيام الصعبة والابتلاءات، بلقى ميزاني فااااضي، وماعندي عمل مظبط كده، أقول ياالله بس بحق دا ساعدني، بفتش لكن مابلقى شئ!!

لكني مِرارًا ألتمس الألطاف كلّها والتخفيف واليسر بالمعية!
- فأعددتُ للأيام الصعبة معية الله! ❤️

- تعرف والله جد، الله أداهو ال الله معاهو! ❤️

بعد مُضي 5 أيام على السيل العنيف اللي جاء كل أبوحمد تقريبًا، والناس بدت تصلح الوضع، والكهرباء جات والموية رغم إنّو متخوفين مِن خطورتها عشان ملوثة، فإذا به أول أمس جات عاصفة رعدية!
اللي هي برق لدرجة والله الكهرباء قاطعة والدنيا ظلام شديد تشوف الأرض دي كلها نورت بسبب البرق، بعدها رعد تحس السحب فوق رأسك طوالي،وصوت تصادم السحب كان مخيف مخيف لدرجة، والله أنا حياتي كلها ما سمعت مثله، عليك الله شوف قدرة الله كيف!!
والله ياجماعة الله قدير قدرة مالها حد!
الوضع دا استمر مِن الساعة 9 وشوية لحدي 2ونص سبحان الله!
ياجماعة والله أنا أول أمس دي فكرت في يوم القيامة بنظرة تانية خالص، الناس الرعب الدخل فيها الكم ساعة ديل تحسهم خلاص قلوبهم طارت عشان عاشوا التجربة دي قبل كم يوم!

طبعًا كناس حالتهم صعبة طالعين مِن سيل تجي مطرة ذي دي، وصوت الحاجات البتقع دي ما لها حد، تقول خلاص والله حنموت في ليلتنا دي لأنّو معروف بيوت البلد ما بتتحمل لا سيل ولا مطرة تدبل فيهو تاني! ..

فتقول تقوم تصلي ركعتين لله يخفف علينا، تلقى نقطة تقيف فيها ماف، أساسًا كان الموية ما وصلتك في سريرك إنت محظوظ والله، وأنا والله بتجرس جرسة مِن فوات القيام دا،جرسة مالها حد، يومي كلو بكون زهجانة وماعندي نفس لشئ!
فماكان في حل غير أفضل في مكاني وأدعو! ..
أول مرة أجرب دعاء مِن غير صلاة! 🎀

وأنا أردد قول عيسى لربّنا كما حكاه على لسانه القرءان فس سورة المائدة :
{ إن تعذبهم فإنّهم عبادُك وإن تغفر لهم فإنّك أنتَ العزيزُ الحكيم}
بس ببساطة كده!
كان جينا للحق نستاهل العذاب والله لذنوبنا وإن جينا لرحمته وكرمه فهو أهل الكرم كله وهو الرحيم! ..

عارف حسيت بشنو؟

أنا بحب التضرع لله شديد، وأساسّا دي أيام شدة شديدة مايعلم بها إلّا الله، لكن والله حسيت إنّي خفيفة شديد، حسيت بخفة شعور إنّو ربّنا سامعني وهو سبحانه يراني، ويعلم كل ماقلبي، شعور المعية دا هون علي كتير!

فضل الوضع مخيف وكلنا بنعاين للسقف ممكن يقع مِن أي حته لحدي ما وقفت العاصفة بعد 5 ساعات متواصلة!! ..

تذكرت اعصار درنة الذي لم يترك خلفه شئ، والله خراب البيوت وخسائرها سهل مقارنة بفقد الأرواح نسأل الله السلامة ..

رغم صعوبة الابتلاء، لكن قلبي الغيور على الله يكره أن يشكو الله لأحد، ويكره أن يشكو الناس الله عند الناس!

متضايق مِن سيل قول بيتك كلو وقع، مش الجابو الله؟
تقوم تشكي الله للناس يعني؟!
هو الله الجابو قدر كده، الناس حتعمل شنو؟!

الناس بتقول هي ماكانت تجي كلها سوا أسي بعد شالو موية السوق عشان كان وسيلة النقل الوحيدة عربة يجرها حمار وهو المسكين يدخل في الموية رأسه بس بره الموية، والناس البيوتها اتكسرت كلها عملوا خيم وكذا طيب دا ماعذاب تاني؟!

سبحان الله ياجماعة أنا شايفة يوم العذاب ماجاء لسه والله، والله الله ما بعاملوه كده، قسمًا بالله قدرة الله مالها حد، العذاب دا هناك يوم الحساب، هنا دي ولا شئ قدام يوم القيامة نسأل الله السلامة! ..
نسأله سبحان الله أن لايكون هذا مِن غضبه علينا، بل تمحيص وابتلاء ..
فاللهمَّ إنّي أشهدك وأشهدهم لئن هُدمت فوق رؤوسنا البيوت وفقدنا كل المتاع، والله لا ينقص هذا مقدار ذرة مِما في قلبي مِن حب لك ❤️

اللهمَّ لا يجرو مفلس الميزان أن يدعو بأن تصرف عنه البلاء، لكني أقول تقبل قليل صبرنا، وأثقل لنا الميزان بما في صدرونا مِن حب ❤️

اللهمَّ إنّي أشهدك أنّي أحبك ..
وإنّك تعلم كم أحبّك!..
وإنِّي وجلالك مشتاق لنور وجهك ..

فاللهمَّ فألقاك في خير أحوال أهل القرءان ❤️

والسلام! 🌹

#ترتيل_الخزين