حبيبتى الطفل اللى عنده سنه ده ما ينفعش نعتبره عصبى او عنيد...هو مش بيعاندك...هو جواه حب استطلاع كبير جداااا...فبيزعل جدا لو منعتيه من حاجه...
الفضول اللى عنده ده دليل انه حيتعلم بسرعه....انه ذكى....و بيتطور
و انا فاهمه يا حبيبتى انك بتبقى خايفه عليه و بتنقذيه من تصرف خطر....
بنعمل ايه ساعتها مع رد فعله؟
Distract
يعنى الفتى نظره لحاجه تانيه مشوقه...حتلاقيه نسى الاولانيه بسرعه...
بس اختارى حاجه مشوقه بجد....على نفس مستوى المناديل و الريموتات و الشباشب 😅
غالبا بتبقى اطباق بلاستيك ملونه...طعام اصابع بيحبه...حاجه يعض عليها
و ممكن انتى تفاجئيه و تسقفى مثلا...تنادى على حد بيحبه...تغنى...و هكذا

معلش ربنا يكون فى عونك و الله انا عارفه

كمان الحاجه الخطر اديها اسم و قوليه للطفل...قولى خطر...سخن....كهربا...مع الوقت حيربط ان دى حاجه ممنوعه

ما تعمليش عقلك بعقله 😊 هو مش قدك و قاصد يعصبك....هو فى دنيا تانيه اصفى من كده بكتير....اقصى طموحه انه يعض على حاجه تريح اسنانه او يمسك حاجع ملونه و يخبطها يشوف لها صوت ولا لأ....

اديله فرصه يعبر عن احباطه انها اتاخدت منه...خديه فى حضنك...و حتعدى...

بس اثبتى على رأيك بهدووووء...

و الاحلى اننا نتوقع الحاجات الممنوعه من الاول و نخبيها و نريح نفسنا علشان احنا فينا اللى مكفينا و مش ناقصين 😅

توصيات جديدة من الجمعية الامريكيه لطب الاطفال بتشجع الأمهات على تأجيل الفطام لغاية ما الطفل يتم سنتين
و ده محاكاه لتوصيات منظمة الصحه العالميه و الجمعيه الكنديه....
و سبحان الله مبدأ "حولين كاملين" اللى احنا عارفينه من ١٥٠٠ سنه....الابحاث كل يوم بتثبت اهميته
التوصيات بتقول ان السنه التانيه من الرضاعه بتقلل من الإصابه بامراض الجهاز التنفسى
إلتهابات الاذن الوسطى
الإكزيما
النزلات المعويه
سكر النوع الاول و التانى
سرطان الدم اللوكيميا
إضطرابات الجهاز الهضمى المناعيه

الغريب ان التوصيات بتقول ان عائد السنه التانيه من الرضاعه قد يكون كمان اكبر للأم مش بس الطفل

الام اللى بترضع السنه التانيه عندها نسب اقل لحدوث سرطانات الثدى و عنق الرحم، و سرطان الغده الدرقيه

نسبة اصابتها مستقبلا بالسكر و الضغط بتقل حوالى التلت

احنا عندنا اعتقاد شعبى خاطىء ان الرضاعه بعد السنه مالهاش لزمه...و ده غلط اوى للأسف...بالعكس

اى أم رافضه تفطم و متمسكه بالرضاعه رغم التعب و الضغوط ....انا حاسه بيكى جدا...انا اصلا بنتى بترضع زى اولادكم....و عارفه قد ايه اوقات بتضيق بينا و بنتمنى نفطم

انا جايه اقول لك برافو....تسلم ايدك....مجهود جبااار.. بس فعلا فى مكانه....و هديه كبيره اوى اوى لطفلك

الام اللى ما قدرتش ترضع، او ماقدرتش تكمل و فطمت بسبب ظروف......البوست ده مش عشان تضايقى خالص....انتى ياما اديتى الطفل ده و ياما حتيدله ...و لو تطولى حتديله روحك كمان...و لسه قدامكم عمر طويل علشان يتغذى صح و يلعب رياضه و يشبع من حنيتك و حبك ....المهم تبصى للى جاى

الام اللى لسه محتاره تفطم ولا تكمل...كملى و ربنا يقويكى طول مانتى قادره ❤️

معلش يا جماعه🙏 مضطرين ناخد بالنا من كورونا اليومين دول...و الله عارفه انكم زهقتوا و انا اولكم...
الدور فعلا بيربك البيت كله....و انا جاتلى قبل كده مش مجرد بقول كلام مذاكراه.....
بتبقى مجهده جدا....و انتى كأم بتبقى تعبانه بس شايله كل البيت....ففعلا على ما بتشدى حيلك و تفوقى بتبقى غلسه اوى
ده طبعا غير قلق انك تكونى عديتى حد...او لا قدر الله بابا او ماما إتعدوا....بتبقى فترة صعبه فعلا...
فمعلش علشان خاطرى ركزوا مع الموضوع اليومين دول شويه...خصوصا لو حد عيان بلاش تتقابلوا ....
التطعيم بيفرق خصوصا مع كبار السن و اصحاب الامراض المزمنه...
و خدوا بالكم التطعيم مش شرط يمنع الإصابه....التطعيم بيقلل حدتها و يجهز الجسم لمواجهتها....بحيث تعدى على خير...

حاول لما تخرجى تبقى اماكن مفتوحه....
ركزوا على الاكل الصحى....
من غير قلق او مبالغه....ناخد حذرنا و نكمل حياتنا...
و هى مع الوقت حدتها الحمد لله بتقل

ربنا يحفظكم و ان شاء الله الايام الجايه تبقى اهدى و اسعد ♥️

الناموس بيحب ناس معينه فعلا 👀 الاطفال ،و الحوامل، و اللى اجسامهم سخنه او عرقانه و اللى لابس اسود او لبس ربيعى فيه ورود، و اللى فصيلة دمه O
🎯 أحمى إبنى ازاى؟
1️⃣ حتنضفى البيت من اى فتافيت او بقايا اكل، خصوصا الأركان..بيتجمعوا فيها
2️⃣ حتشيلى اى مياه راكده، علشان بيحطوا فيها البيض و يتكاثروا....لو فيه طبق مياه تحت التكييف...او مياه بتتجمع تحت الحوض...او بتسيبى هدوم منقوعه فى فانيش او كلور فتره
3️⃣ حتطلعى الزبالة اول باول و دايما تغطيها
4️⃣ حتركبى سلك للشبابيك رفيع
5️⃣ لو ماعندكيش سلك، حتعملى ناموسيه للبيبى خصوصا لو اصغر من شهرين
6️⃣ و حتهوى الشقه بالنهار و على العصر تبدأى تقفلى قبل ما يدخل يعشش فى الشقه
6️⃣ لو فتحتى الشبابيك لازم تقفلى نور الاوضه و تشغلى المروحه...الناموس لا بيحب الضلمه ولا طيارات الهوا لانها بتعوقه فى الطيران
7️⃣ حتستخدمى روائح طبيعية تبعد الناموس
✅ اهمهم الريحان و زيت اللافندر و زيت النعناع و حاجه اسمها سيترونيلا...هاتيهم من العطار...و ممكن تلاقى عنده خلطه جاهزة...تخففيهم و ترشيهم فى البيت...و ممكن ترشى على غطا البيبى
✅ فيه كمان التوم و الروز مارى و القرنفل

8️⃣ لو عندك جهاز ريد السائل...غلط يشتغل و الطفل فى الاوضه...الريحه غلط على صدره...شغليه و الاوضه فاضيه...و بعدين اطفيه و هوى الاوضه بمروحه مثلا و بعدين دخلى الطفل

❌ ممنوع اى مبيد حشرى جنب الطفل....كارثه..اوعى 🙏

9️⃣ الطفل لبسه له شروط
✅ لبس مش غامق...و مش عليه رسومات خصوصا الربيع و الحاجات الفلورى اللى كلها ورود بتاعة البنات.
✅ اللبس يكون مريح مش ضيق...و مناسب لدرجات الحرارة...لان العرق و ثانى اكسيد الكاربون بيجذبوا الناموس للطفل بالذات
✅ الافضل يلبس بنطلون لو الجو يسمح، او يتغطى بكوفراه
❌ ممنوع اى عطور او لوشن او زيت له ريحه....لان الناموس فيه عطور معينه بتجذبه جدا

🔟 حنستخدم ايه لإبعاد الناموس عن الطفل؟
حتجيبى سبراى OFF او بدائله اللى بتحتوى على نفس الماده، طب ايه هو الOFF؟
🎯 ده بيحتوى على ماده اسمها DEET
✅ دى مش مبيد حشرى....دى ماده بتعمل طبقة على الجلد، الطبقى دى بتزحلق الناموسه و تخليها ما تعرفش تستقر على الجلد علشان تقرص.....
❌ مش صحيح ان ريحته بتطرد الناموس
✅ المادة دى لها تركيزات...ايه الفرق بينهم؟ كل ما التركيز زاد مده الحمايه بتزيد
ال ١٠% بيحميك ساعتين
ال ٣٠% بيحميك ٥ ساعات
الازيد بيحمى وقت اطول...

✅ الحد الأقصى المسموح للأطفال حسب توصيات الجمعية الامريكيه لطب الاطفال و نظيراتها على مستوى العالم هو ٣٠% للاطفال اكبر من شهرين
❌ ممنوع ترشيه لو طفلك اصغر من شهرين...اعمليله ناموسيه
❌ جربيه بحرص لو طفلك عنده ربو او حساسية صدر

🎯 طب أرشه ازاى و فين؟
✅ تطلعى مكان مفتوح او تفتحى تيار هوا قبل ما ترشى
✅ حترشى على ايدك مش على جلد الطفل مباشرة
✅ حتدهنى بايدك طبقى خفيفة جدا جدا على الاماكن المكشوفه....خاصة الرجلين لان الناموس بيحب المكان ده جدا
❌ ممنوع ندهن على العين او الفم...ممكن جوانب الخدود...لان الناموس برده بيحب المكان ده
❌ ممنوع يترش تحت الهدوم
❌ ممنوع يتحط على جروح او دمامل ...
و الدهان يكون قبل النوم مباشرة او قبل التعرض للناموس
✅ حتغسلى ايدك كويس بالماء و الصابون
✅ و لما الطفل يصحى، حتغسلى الاماكن كويس...علشان ما يقومش الصبح يلعب فيهم و يحط ايده فى الفم مثلا

❌ بلاش تشترى ال OFF اللى بيكون معاه واقى للشمس sunscreen ...بيحتاج يتجدد بسرعه جدا و مفعوله بيروح

❌ السبراى دايما لازم يكون بعيد عن ايد الطفل....بعد كا تخلصى لازم ترفعيه فى مكان بعيد

نصيحه مهمه...بلاش تسيبوا طفل يلعب فى النجيله و رجليه مكشوفه...الناموس حيتعبه جداااا

🎯 طيب لو ابنى عنده قرصة ناموسه اتصرف ازاى؟
✅ اول تصرف انك تجيبى حاجه ساقعه، او حتة تلج تهدى المكان
✅ ممكن شوية مياه متخففين بخل ...حيهدوها...بس بتلسع بسيط فى الاول
✅ ممكن قطعه خيار ساقعه

1️⃣ لو قرصة بسيطه، حتحيبى كالاماين لوشن و تدهنيه....
2️⃣ لو قرصه صعبه، حتجيبى مرهم فيه هيدروكورتيزون و يتدهن نقطه بسيطه جدا ، على القرصه بس، لمدة ٥ ايام فقط...فقط...
و ممكن الطفل ياخد فنسيتل نقط اليوم ده لو بيهرش جامد و طبعا يكون عمره يسمح

3️⃣ لو الطفل شفايفه ورمت...لازم انزل مستشفى فورا...دى علامه تحسس شديد

غير كده ما تتخضيش...القرصه بيبقى شكلها يزعل و غلس عادة فى الاطفال...
لو القرصه فى الجفن ممكن العين تورم شوية...بس حنروح للدكتور لو استمر الورم او زاد او العين احمرت

✅ ممكن تحطى جيل صبار...ممكن زيت لافندر بس يكون معمول للاطفال

❌ بلاش معجون اسنان...لانه فيه فلورايد و ده ممنوع للاطفال
❌ و بلاش عسل...هو صحيح حيرطب و يهديها...بس الناموس حيتلم عليه بعدها اكتر

ليه اللبن ممنوع قبل السنه بس الزبادى مش ممنوع؟
🚫 اللبن بيبقى ممنوع لإنه فيه بروتين إسمه casein ، ده بيبقى صعب الهضم على الطفل، و بيبقلل امتصاص الحديد فى الجسم
✅️ الزبادى طريقة عمله بتهضم الكازيين ده....لان دخول الخمائر فيه بتطلع احماض....الاحماض هى اللى بتخلى طعم الزبادى لازع شويه....و الاحماض دى بتهضم الكازيين...و بيبقى سهل على الطفل
✅️ الزبادى غنى بالكالسيوم و البروتين و مفيد لصحة القولون...و مش ممنوع قبل السنه يا حبيبتى
✅️ ممكن تبدايه من إتمام السادس....و خليه بكميات معتدله...و ضيفى له فواكه و شوفان و سمسم و مكسرات مطحونه ترفع قيمته الغذائيه
✅️ لبن الام افيد بكتير من الزبادى....فخلى فيه توازن بين الرضاعه و الاكل....و لما تختارى اكله خليها غنيه بالفيتامينات اللى ناقصه فى اللبن
✅️ زبادى الفواكه الجاهز فيه سكر كتير و مفبهوش فايده الفاكهه الحقيقيه يا حبيبتى

ربنا يقويكم و يبارك فى الاولاد ❤️
#د_باكينام_الحفناوى #الزبادى #moms911

إزاى تخسى من غير دايت؟ 💪♥️
1️⃣ قللى الملح فى الأكل بالتدريج
2️⃣ إغرفى الأكل فى طبق أصغر، حتلاقى الكمية شكلها أكبر و مُشبعه اكتر 👌
3️⃣ كلى الخضار و البروتين قبل النشويات ع الغدا
4️⃣ بطلى أكل قدام التليفزيون....التليفزيون بيخلينا نسرح و ناكل كميات اكتر
5️⃣ لما تكونى فى السوبر ماركت...بلاش تشترى بسكوتات و شيكولاتات بكميه و تسيبيها فى البيت
6️⃣ كلى بالراحه....إمضغى الأكل بالراحه.....مع الوقت المخ حيحسسك بالشبع أسرع
7️⃣ قللى ربع معلقة سكر من المشروبات كل ٣ ايام.......مع الوقت حتلاقى سكر كتير اوى إتشال من غير ما تحسى بفرق طعم
8️⃣ بدل القلية، دخلى الاكل الفرن......صدور الفراخ مثلا...او حتى اصابع البطاطس
9️⃣ سبكى الصلصات من غير شوربة دسمه......
🔟 نامى بدرى....لو بتنامى اصلا 😅
1️⃣1️⃣ خلى طبق السلطه روتين يومى
1️⃣2️⃣ إغرفى تلتين اكلتك فى الطبق .....و لو جعانه قومى اغرفى الباقى.....ده حيديكى فرصه تفكرى قبل ما تكملى اكل هل انتى جعانه فعلا؟
1️⃣3️⃣ اشربى كباية مياه كل ساعه و نص
1️⃣4️⃣ دخلى البقول فى اكلك كتير.....حتديلك احساس بالشبع و تسيطر على الوزن....فول، حمص، عدس، لوبيا

1️⃣5️⃣ قللى اعتمادك على المكرونه، و بدليها بالأرز و الفريك و قللى إعتمادك على العيش الفينو، و بدليه بالعيش البلدى و التوست السن ....


ربنا معانا كلنا ♥️

عاوزه ترضعى🤱 من غير ما تاكلى الاخضر و اليابس😅🍰🍫🍩🍨 و يزيد وزنك🤷‍♀️؟

⛔ فيه خمس صور للجوع مع الرضاعه الطبيعيه، ركزى فى السبب و اتصرفى معاه صح 👇👍

1️⃣ شراهة السكريات....مرحلة سكر حلوه الدنيا سكر 🎂🧃
⬅️ جسمك عاوز يعوض المياه بسكر اللى عمال ينتجها، و للاسف انتى بتعوضيها بحلويات و عصاير و ده بيزود وزنك و بتحبطى اكتر 🙄
✅الحل:
١. معلقة عسل او تمر او توستايه بمربى او فواكه مسكره، حتعوضلك شراهة السكر بأقل الخساير
٢. خدى احتياحات جسمك من النشويات المعقده على مدار اليوم، زى البليله، الارز، العيش البلدى

2️⃣ الجوع من قلة الاكل مش بسبب الطفاصه 😅، و للاسف مابيبقاش فيه وقت تاكلى حاجه صحيه، اللى بتلاقيه بتاكليه....بيبقى نفسك اصلا تطلبى التلاجه توصلك دليفرى، لإنك لو قمتى من جنب البيبى حيصحى 😅
✅ الحل:
١.اعملى ٣ علب تلاجه، واحده لحمه مفرومه تعوضلك الحديد، واحده حمص تعوضلك البروتين، و واحده بليله تعوضلك فيتامين ب....وقت ما تجوعى سخنى و كلى و العلبه حتعيش اسبوع فى التلاجه
٢. إسلقى بيض علشان وقت ما تجوعى تلاقى حاجه جاهزه.

3️⃣ الجوع اول ما تبتدى الرضاعه، حتى لو لسه متغديه من دقيقه 😅....دى مرحله بسميها " زى القطط بناكل و ننكر"🤣
الجوع هنا بيبقى بسبب الجفاف و نقص السوايل، جسمك جرب يحسسك بالعطش و انتى برده مطنشاه، فبيحسسك بالجوع!
✅ الحل: ٤ لتر مياه على فترات، يعنى كبايه كل ساعه مثلا، مياه او لبن او شوربه.......مش عصير ولا مكيفات ولا حوادق، لإنها حتسحب استفادتك من المياه

4️⃣ الجوع النفسى، بتبقى نفسك تبسطى نفسك بأى اكله بعد كل التعب ده.... بتتخيلى ساندوتش البرجر و الجبنه السايحه نازله عليه و بتحسى ان ده التعويض الوحيد للى انتى فيه دلوقتى 😅

✅الحل:
١.ما تحرميش نفسك، بس بكميات قليله و على فترات متباعده
٢. دايما اصبرى نص ساعه قبل ما تطلبى الاكل، حتلاقى نفسك توبتى و غيرتى رأيك 😅
٣. جربى تعملى سناك صحيه تكون مقرمشه و تطلعى فيه زعلك و تعبك 😄 فشار مثلا، لب سورى....ده اكيد ارحم من ذالكومبو !
٤. خليكى متأكده ان ده تعويض مؤقت، و بعد ما تاكليه حتحسى بالذنب علشان تخنتى و فلستى 😅، المشاكل النفسيه مابتتحلش بالاكل، بنفضفض لحد، بنسيب البيبى مع ماما و نخرج ساعه نجدد طاقتنا....و الله حتى لو اتمشيتى للكشك جبتى بيك رولز و رجعتى حتفصلى شوية و تغيرى جو بره حيطان البيت

5️⃣ النوع الخامس ده جوع البرد....جسمك عاوزه حاجه تدفيه.....تعالو ناكل حاجه تدفى جسمك من غير ما نتخن
✅ حمص ااشام....مغذى و بيشبع و بيسخن جدا
✅ شوربة العدس، بس تقللى الزبدة و المرقة
✅ البطاطا السخنه....و بترفع قيمة اللبن جدا
✅ شوربة خضار
✅ قلقاس
✅ ابو فروة

الحاجات دى مش حتخسسك بشكل مباشر...بس هى ارحم بكتير من الحلويات و النشويات و المقليات.....بدل ما نلاقى نفسنا بنزيد اكتر و أكتر

ايه هو جدرى القرود؟ 🤷‍♀️
✅️ ده فيروس شبه فيروس الجديرى اللى بييجى للاطفال
✅️ فيروس بسيط مش لا قدر الله مميت..بس طبعا لازم نلتزم بالوقايه
✅️ الفيروس مش جديد زى كورونا....ده موجود من حوالى اربعين سنه
✅️ اسمه اورثوبوكس....بس مشهور باسم جدرى القرود لانه اول مره اكتشفوه فى قرد
✅️ هو فيروس مستوطن اكتر فى بعض الدول الافريقيه، بيعيش فى اجسام بعض الحيوانات...و بيتنقل للانسان
✅️ الإصابه بتتم عن طريق لمس الجلد و استخدام نفس الملايات و الفوط و المعالق...و ممكن عن طريق الرذاذ لو حد عطس فى وش حد مثلا

ليه فيه حاليا دوشه كتير عليه؟ 🤷‍♀️
✅️ فيه حالات بدأت تظهر فى غير موطنه الاصلى افريقيا....خصوصا اوروبا و امريكا....
✅️ بدأت الحالات تزيد من مايو اللى فات...وصلت لحوالى ١٦،٠٠٠ حاله اغلبهم فى اوروبا...منهم حوالى ٢٥٠٠ فى امريكا...كتير من الاصابات كانت عند الرجال الم ثليين
✅️ منظمة الصحه العالميه اعلنت حالة طوارىء لان الحالات بتزيد خاصه فى اوروبا
✅️ الاصابات بتتعالج بسهوله، بتاخد حوالى اسبوعين و تخف
✅️ من وسط حوالى ١٧،٠٠٠ حاله...فيه ٥ حالات وفيات بس...
✅️ فيه اصابات بتحصل فى الاطفال ، فناخد بالنا على الاطفال
✅️ فيه لقاح بره بدأوا ياخدوه...بس حالات معينه بتكون اكثر عرضه للاصابه....و حاليا مفيش تطعيم جماعى او حاجه
✅️ لغاية دلوقتى مفيش ولا حاله فى مصر حسب كلام الصحه...
✅️ الامارات سجلت ٣ حالات

مش عايزاكم تستهتروا بالوقايه....بس كمان مش لازم نبقى نرعوبين....الحياه مش ناقصه قلق...فنحط كل مشكله فى حجمها الطبيعى

طب ايه اعراضه ؟ 🤷‍♀️
✅️ سخونيه و اعراض برد و معاها طفح جلدى شبه بتاع الجديرى
✅️ الاعراض بتظهر بعد خمس او ست ايام من العدوى...و ممكن تتأخر لغاية اسبوعين
✅️ المرض بياخد وقته زى الجدبرى كده و بعدين يروح
✅️ المرض بيبقى معدى اكتر فى حالة ظهور الطفح الجلدى
✅️ المرض معدى حتى لو مفيش اعراض خالص...فنلتزم بالوقاية دايما

احمى نفسى ازاى 🤷‍♀️
✅️ الوقاية سهله جدا...و عمليه اكتر من الكورونا بكتيير
✅️ لو حد عنده طفح جلدى ما نلمسهوش
✅️ كل واحده له معلقته و فوطته و كبايته و ادواته
✅️ وقت العطس و الكحه نغسل ايدينا كويس و ما نعطسش فى وش حد
✅️ الحوامل و الاطفال و اللى عندهم امراض مناعيه ناخد بالنا عليهم اكتر....

كله حيعدى ان شاء الله...بس ناخد بالنا ❤️

خدوا بالكوا علشان خاطرى من غطا السرنجات...الطفل لو وصل له و بلعه حتبقى كارثة! ...و ساعات بيجيبوه من سلة المهملات! يا ترميه...يا تخبى السرنجه كلها كويس...بصراحه مع لخمة الولاد ساعات بنسرح و نسيب السرنجه ...رأيى شيليه أحوط...و اغسلى السرنجه و غلفيها فى كيس و خلاص
و ما تنسوش كمان الجلده السوده اللى جوه السرنجه...بتتفك و برده خطر جدا
ربنا يحفظهم ❤️

لو حتنزلى الشغل بعد ٣ شهور من الولاده، النصائح دى مهمة👇
1️⃣ مجرد ما الطفل يتقن الرضاعه و لبن الام يبقى كويس....ابداى عوديه على ببرونه فيها لبن بتاعك....
✅ ما تديش الببرونه بدرى اوى، علشان ما يحصلش التباس حلمات
❌ بس كمان ما تأخريهاش اوى لغاية ما تنزلى الشغل....لانه حيرفضها يا حبيبتى ....و حتحتاسى فعلا 😥
🎯 و اديله رضعه طبيعى متشفطه فى الببرونه ساعتها كل يوم مره او كل يومين....علشان ما ينساش الببرونه

2️⃣ حتجيبى شفاط لو امكانياتك تسمح، و يكون كهرباء علشان ينجز معاكى

3️⃣ حتبداى قبل نزول الشغل بشهر مثلا....تشفطى كل يوم ...بعد الرضاعه...علشان المخ يستوعب انه محتاج يزود كمية اللبن....ده لإن اللبن اصلا بيقل شوية مع نزول الشغل

4️⃣ حتبدأى تنظمى الرضعات....و تعودى الطفل واحده واحده انه يشوف تيته او خالتو...او الشخص اللى حيقعد معاه
❌ لو اللبن عندك قليل، اجلى تنظيم الرضاهه و رضعيه وقت ما يطلب
✅ لو الطفل عنده ارتجاع قربى الرضعات من بعض، بس قللى مدتها او كميتها...بحيث بطنه ما تتمليش اوى و يرجع

5️⃣ ابدأى إعدلى اليوم، علشان تقدرى تنامى كام ساعه قبل ما تنزلى الشغل
🎯 كل يوم اطلعى بميعاد النوم ساعه...يعنى مثلا طفل بينام الفجر....نيميه اتنين...بعدين واحده...و هكذا
🎯 اعملى روتين نوم...خطوات مرتبطه دايما بالنوم، مكان معين، اغنيه معينه، لوشن معين ريحته مميزه، حمام دافى...
🎯ثبتى ميعاد النوم تدخلوا فيه الاوضه...حتى لو مانامش...هو حيتعود ان ده ميعاد الدخول....
🎯 خلى الدنيا بالليل هاديه و ضلمه...و الدنيا الصبح فبهت نور و حركه
🎯 القيلولة مفيدة و بتنظم نوم الطفل بس تبقى على الساعه واحده الضهر مثلا او حسب نظامكم ...بلاش القيلوله المتأخره اوى

6️⃣ رضعة اللبن حتبقى فى الشهر الرابع حوالى ١٥٠ مل ...بتختلف شوية حسب وزن الطفل و شهيته...اعملى حسابك فى تخزين اللبن على الكمية دى

7️⃣ جهزى اكلات سهله فى الفريزر، علشان ما تبقيش مضغوطه

واحده واحده على نفسك.... اول فترة بتبقى صعبه...مش لازم كل حاجه تبقى perfect
بعد فترة بتتعودى على الوضع الجديد ♥️

عايزين بوست عن تخزين اللبن؟ ولا تنظيم الرضاعه؟

المانجه مغذية جدا للبيبى، خصوصا فى فيتامين سى😋 سبحان الله ربنا بيجهزنا مناعتنا بيها قبل دخلة الشتا ❤️ و ممكم تساعدنا ندخل للبيبى معاها اكلات مش بيحبها..... بس خلينا نستخدمها بإعتدال علشان سكرها عالى و املاحها كتير....
المانجه ممكن اجربها من إتمام السادس....و دى أحلى وصفات بحبها للمانجه ❤️👇

1️⃣ المانجه نفسها بدون أى إضافات
✅️ طلعى اللحمه بتاعها بس و اهرسيه بشوكه...او اضربيه بالبلندر لو بيبى لسه بيبدأ اكل....ده كده اسمه بيوريه المانجه
✅️ تقدرى من التاسع تقطعيها مكعبات زى الصورة و تلبسى البيبى بافته و يمسكها و يأكل نفسه

2️⃣ بيوريه المانجه مع الفواكه
✅️ دى طريقة تقليديه و سهله....اخلطة بيوريه المانجه مع اى فاكهه تحبيها....مع الموز بتبقى لذيذه و مع التفاح السكرى برده
✅️ و ممكن تحطى مع المانجه بطاطا و رشه عين جمل مطحون و رشة جوز هند....بتبقى تجنن و مغذية جدا ❤️ لو المانجه مش مسكره اوى حطيلها شوية زبيب صغيرين

3️⃣ بيوريه المانجو مع الجزر و الفراخ
✅️ وصفه غير تقليديه....اصلها اسيوى...و هم مشهورين بدمج الحادق مع الحلو....بس الفكره مفيده اوى للطفل لما بيجرب أطعمه جديده...و المانجه بتشجعه ياكل الفراخ و الخضار

✅️ صدر فرخه طرى تبليه عادى و حطيه فى الفرن يستوى...عادة الوصفه بيبقى فيها كركم و جنزبيل بس انتى و ذوقك

✅️ دخلى الجزر برده يستوى فى الفرن او سويه على البخار...و ممكن تضيفى خضروات تانيه زى مثلا الفلفل الالوان...فيه ناس بتحط عدس...فيه ناس بتحط بصل بس انا مش بحبها كده اوى

✅️ اهرسيهم مع بعض مع بيوريه المانجه و هم سخنين و معاهم معلقتين لبن جوز هند

الوصفه عايزه حد بيحب يجرب....لو مش حباها اعملى مانجه مع جزر و بس
او مانجه مع جزر و تفاح بتبقى جميله و رشة قرفه

4️⃣ بودنج المانجو مع بذور الشيا
✅️ دى مغذية جدا و لذيذه جدا و بحبها اوى...و طالعه موضه اليومين دول 😅

✅️ بيوريه المانجو مع شوية زبادى و نقطتين فانيليا بدون سكر...و تحطى عليهم بذور الشيا...حوالى ربع معلقة و تسيبيهم فى التلاجه ساعتين

✅️ بذور الشيا مليانه كالسيوم و اوميجا و مشبعه اوى

الوصفه اساسها فيه حبهان مطحون...بس انا مش بحب احطه بصراحه

لو الطفل فوق سنه ممكن تحليها بالعسل

5️⃣ بودرنج الارز و المانجو
✅️ شوية ارز مغسولين و حطى عليهن لبن جوز هند يستوا فيه...و لو ابنك فوق السنه حطى لبن عادى...بس لبن الجوز هند اطعم
✅️ لما الارز يستوى حطى معاه المانجه و نقطة فانيليا

6️⃣ المانجو مع الكينوا او الشوفان
✅️ كينوا او شوفان مستوى عادى...حيضيف جدا لقيمة الوجبة....و معاهم بيوريه المانجو
✅️ و للتحليه قبل السنه ممكم نقطتين دبس تمر او الافضل بالنسبه لى بيوريه التمر العادى
✅️ بعد السنه ممكن عسل

7️⃣كرات المانجو بالشوفان
✅️ حقول لك فكرتها و شوفيها على يوتيوب بالمقادير احسن
✅️ بنخلط الشوفان مع لبن جوز الهند و بيوريه المانجو و شوية جزر ...و ساعات بنضيف صدور فراخ مفرومه كأنك بتعملى ناجتس كده
✅️ و بتعمليها كرات و تدخليها الفرن...بتطلع زى اخر صوره

ربنا يقويكم ❤️ و بألف هنا 😘
#د_باكينام_الحفناوى #moms911 #المانجو

عندنا سلسلة فيديوهات نازلة بلغات غربية
عاوزاكم تساعدونى ننشرها على تويتر و تليجرام

النهارده نزل اول فيديو
الفيديو من فيسبوك متقطع
https://fb.watch/nXpw3wJx4Z/?mibextid=ZbWKwL

الفيديو من يوتيوب كامل https://youtu.be/qGXpsbUIquE