أوعى تكون بتصلى فى رمضان وناوى تبطل تانى بعده 👀
أو من جواك مافيش عزيمة إنك هتواظب بعد رمضان...يعنى سايبها لظروفها
عن جابر رضى الله عنه قال: سمعتُ رسولَ اللَّه ﷺ يَقُولُ: «إِنَّ بَيْنَ الرَّجُلِ وَبَيْنَ الشِّرْكِ وَالْكُفْرِ تَرْكَ الصَّلَاةِ». رواه مسلم
الصلاة او بر الوالدين ..الصبر على الناس وحسن الخلق وغيرها من العبادات
متخلهاش موسمية ..
وأنا فاهم طبعا رمضان شهر عظيم وله فضل كبير الحمد لله .. لكن إحنا بنعبد الله عز وجل رب رمضان ورب كل الشهور.
غير مفهومك عن رمضان ..
رمضان فرصة لأى حد عنده تقصير فى طاعة يبدأ يستعين بالله ويصلح ويعالج فيها
ويطلع منه مكمل بيها إن شاء الله فى طريقه لربنا.
رمضان ممكن يكون لينا نقطة انطلاق وعهد جديد مع الله
ممكن يكون لينا مرحلة علاج وترميم وشحن
ممكن يكون لينا مرحلة اكتساب طاعات جديدة ..
ومن الآخرة كده خلى عينك على الهدف الأساسى 👈 الفوز برضا الله ودخول جنته .. وخد بكل الفرص والأسباب اللى ربنا يرزقك بيها ومنها شهر رمضان :)
وصلت ؟
#رمضان_أحلى_مع
#عائلة_الحج_رمضان

إنتم لسه مخطوبين وده معناه 👈 إنكم لسه أجانب عن بعض ..
وده بقى معناه إييييه 😌 ؟
إنكم لازم تلتزموا بضوابط التعامل بين الرجل والمرأة الأجانب عن بعض من غض البصر وعدم الخلوة وعدم الخضوع بالقول
والكلام بينكم يكون بضوابط 😎
لكن "حبيبتي" و "نصحي بعض للفجر" مينفعش
ماهو مش علشان هنصحي بعض على الفجر هيبقى يجوز ساعتها :)
يا شباب ويا بنات
معلومة كده على السكة الكلام بينكم بالطريقة دى حرام قبل الفطار وبعده ... المعصية بعد الفطار حرام برضه
#رمضان_أحلى_مع
#عائلة_الحج_رمضان

الله عز وجل أنزل كتابه لنتدبر آياته ونعمل بها..
في شهر القرآن محتاجين نخرج بعلاقة مختلفة مع القرآن .. علاقه فيها تدبر وعمل
ربنا قال (كِتَـٰبٌ أَنزَلۡنَـٰهُ إِلَیۡكَ مُبَـٰرَك لِّیَدَّبَّرُوۤا۟ ءَایَـٰتِهِۦ وَلِیَتَذَكَّرَ أُو۟لُوا۟ ٱلۡأَلۡبَـٰبِ)...
ابدأ بانك تشترى كتاب مبسط لتفسير الآيات
واجعل لك منه ورد ولو بسيط واستمر عليه.

#رمضان_أحلى_مع
#عائلة_الحج_رمضان

ماينفعش لما تُقام الصلاة وخلاص الصفوف بتترص تقولى لا أنا حاجزة المكان ده لبنتى
الصف كده هايبقى فيه فُرجة .. وهايبقى ناقص ..
ده غير أصلا إن ساعات بيكون المسجد زحمة والناس مش لاقية مكان تصلى ..
هتفضلى بردو ساعتها حاجزة المكان لبنتك اللي فى بيتها 😬!
النَّبِيِّ ﷺ قَالَ : " أَتِمُّوا الصَّفَّ الْمُقَدَّمَ ، ثُمَّ الَّذِي يَلِيهِ ، فَمَا كَانَ مِنْ نَقْصٍ فَلْيَكُنْ فِي الصَّفِّ الْمُؤَخَّرِ ".
#رمضان_أحلى_مع
#عائلة_الحج_رمضان

الله عز وجل قال ( یَـٰبَنِیۤ ءَادَمَ خُذُوا۟ زِینَتَكُمۡ عِندَ كُلِّ مَسۡجِدࣲ وَكُلُوا۟ وَٱشۡرَبُوا۟ وَلَا تُسۡرِفُوۤا۟ۚ إِنَّهُۥ لَا یُحِبُّ ٱلۡمُسۡرِفِینَ)
ومش باقولك قوم جعان طبعا .. لا كل واشبع براحتك
بس بالمعقووول وأول ما تشبع .. قوم وكفاية كده ماتزودش وتملى بطنك فوق طاقتك لأن ساعتها هتتقل وتبقى عايز تنام 😴 ولا هتعرف تنزل تصلي
ولا هتعرف تاخد نفسك من التخمة 🤕
بص من الأخر كده خليك وسط لا إفراط ولا تفريط
النَّبِيِّ ﷺ قَالَ: "ما ملأَ آدميٌّ وعاءً شرًّا مِن بطنٍ ، بحسبِ ابنِ آدمَ أُكُلاتٌ يُقمنَ صُلبَهُ ، فإن كانَ لا محالةَ فثُلثٌ لطعامِهِ وثُلثٌ لشرابِهِ وثُلثٌ لنفَسِهِ"
#رمضان_أحلى_مع
#عائلة_الحج_رمضان

العزومات ولمة العيلة جميلة فى رمضان علشان صلة الرحم
وخصوصا إننا فى عصر "مواقع التواصل الإجتماعي" اللى بقينا فيه منعزلين عن بعض !
بس نصحيتى ليكم فى العزايم
إن ما ينفعش تبقى الدنيا مفتوحة الرجال مع النساء و هزار وضحك 🤷‍♂️
طالما القعدة هايكون فيها رجال ونساء مش محارم 👈
فإما تكون القعدة منفصلة .. النساء مع بعض فى حتة والرجال مع بعض فى حتة تانية .. .. وساعتها بقى اشربوا وكلوا وشمروا براحتكم ...
أو.. لو هتقعدوا مع بعض يبقى لاااازم تلتزموا بضوابط التعامل
بين النساء والرجال غير المحارم
من غض بصر والتزام بالحجاب الشرعى وإن الكلام بينكم للحاجة
ومايكونش فيه خضوع بالقول من هزار وضحك ولا خلوة بين راجل وست!
طيب السؤال اللى هيتسأل ..انا ملتزم بالضوابط لكن الجو مش ملتزم اعمل ايه ؟
غيّر على قد ما تقدر بالنصح برفق ولين وحكمة
ولا تشاركهم فى منكر يحدث
وتمسك بالضوابط واوعى ياخدك تيار التفريط والتنازل ..
#رمضان_أحلى_مع
#عائلة_الحج_رمضان

ربنا عز وجل قال " إِنَّ ٱلصَّلَوٰةَ كَانَتۡ عَلَى ٱلۡمُؤۡمِنِینَ كِتَـٰبࣰا مَّوۡقُوتا "
كتابا موقوتا 👈 يعنى فرضا مؤقتا في أوقات معلومة
فالله عز وجل أمر باقامة الصلاة فى أوقات محدده حددها هو سبحانه
فكونك تجمعها"فى الوقت المناسب ليك انت "
وتصليها فى أخر اليوم دى كبيرة من الكبائر
خلينى اسألك سؤال هو إنت لو احتجت تدخل الحمام أوى وإنت فى الشغل هتدخل ولا هتسيب نفسك علشان الشغل كتير وإنت مش فاضى ؟!
خلينا واضحين إنت لو حطيت فى دماغك تفضى نفسك علشان الصلاة هتفضيها 😎
والبنات
اللى مش بتصلي بره البيت "علشان مش لسه هتتوضى .. اوهتمسح المكياج... او كم الشميز ضيق فمش هتعرف ترفعه للوضوء " ... فتقوم تروح البيت وتصلي كله مع بعضه النبي صلى الله عليه وسلم قال "إِنَّ أَوَّلَ مَا يُحَاسَبُ بِهِ الْعَبْدُ يَوْمَ الْقِيَامَةِ مِنْ عَمَلِهِ صَلَاتُهُ فَإِنْ صَلُحَتْ فَقَدْ أَفْلَحَ وَأَنْجَحَ وَإِنْ فَسَدَتْ فَقَدْ خَابَ وَخَسِرَ "

#رمضان_أحلى_مع
#عائلة_الحج_رمضان

باباك راجل كبير دلوقتى ومابقاش يقدر يعمل حاجات كتير زى الأول
فعيب أوي لما تقوله كده.
وطلب زى ده مايحتملش التأجيل يا لؤي ..
غير طلبات تانية ممكن تطلب بأدب إنها تتأجل شوية لو فعلا تعبان ومش قادر.
وبعدين لو موقفتش جنبه فى موقف ممكن يكون بسيط وسهل إنك تعمله زي ده .. طب فى المواقف الكبيرة الجامدة هتعمل إيه ؟!
بلاش تخلي والدك و والدتك يحسوا إنهم مالهمش ضهر يتسندوا عليه فى كبرهم.
وماتنساش 👈 عن ابن مسعود قَالَ: " سَأَلْتُ النَّبِيَّ صَلَّى اللهُ عَلَيْهِ وَسَلَّمَ: أَيُّ العَمَلِ أَحَبُّ إِلَى اللَّهِ؟ قَالَ: (الصَّلاَةُ عَلَى وَقْتِهَا) ، قَالَ: ثُمَّ أَيٌّ؟ قَالَ: (ثُمَّ بِرُّ الوَالِدَيْنِ) قَالَ: ثُمَّ أَيٌّ؟ قَالَ: (الجِهَادُ فِي سَبِيلِ اللَّهِ) ".
#رمضان_أحلى_مع
#عائلة_الحج_رمضان

أبواب الطاعات فى رمضان مش بس صلاة تراويح وقراءة قرآن
فيه كمان طاعات كتير ممكن تتعمل
زى زيارة الأيتام والمسنين وإطعام الطعام وغيرهم كتيييير.
النَّبِيِّ ﷺ قَالَ : ( مَنْ أَنْفَقَ زَوْجَيْنِ فِي سَبِيلِ اللَّهِ نُودِيَ مِنْ أَبْوَابِ الْجَنَّةِ يَا عَبْدَ اللَّهِ هَذَا خَيْرٌ ، فَمَنْ كَانَ مِنْ أَهْلِ الصَّلَاةِ دُعِيَ مِنْ بَابِ الصَّلَاةِ ، وَمَنْ كَانَ مِنْ أَهْلِ الْجِهَادِ دُعِيَ مِنْ بَابِ الْجِهَادِ ، وَمَنْ كَانَ مِنْ أَهْلِ الصِّيَامِ دُعِيَ مِنْ بَابِ الرَّيَّانِ ، وَمَنْ كَانَ مِنْ أَهْلِ الصَّدَقَةِ دُعِيَ مِنْ بَابِ الصَّدَقَةِ )
فَقَالَ أَبُو بَكْرٍ رَضِيَ اللَّهُ عَنْهُ : بِأَبِي أَنْتَ وَأُمِّي يَا رَسُولَ اللَّهِ مَا عَلَى مَنْ دُعِيَ مِنْ تِلْكَ الْأَبْوَابِ مِنْ ضَرُورَةٍ فَهَلْ يُدْعَى أَحَدٌ مِنْ تِلْكَ الْأَبْوَابِ كُلِّهَا ؟ قَالَ : ( نَعَمْ وَأَرْجُو أَنْ تَكُونَ مِنْهُمْ )
#رمضان_أحلى_مع
#عائلة_الحج_رمضان

أنا متفهم جدا شعورك ومقدره لأن فعلا ساعات بيكون حمامات المساجد رهيييبة 😷
بس مش معنى كده إننا نفوت فرصة الاعتكاف وفضله وثوابه
إحنا محتاجين نفكر فى حلول مفيدة 🤔
فيه فكرة جميلة وسهل تطبيقها إن شاء الله 👈 هتتفق إنت وأصحابك اللى هايعتكفوا معاك فى نفس المسجد إن شاء الله إنكم تتولوا مسئولية نضافة المسجد فى الفترة دى .. وتجمعوا من بعض وتشتروا أدوات نضافة للحمام من كل شئ بقى حتى صندوق القمامة 🗑 تجيبوه وتحطوه فى الحمام ..
وقسموا نفسكم أثناء فترة الاعتكاف كل يوم اتنين منكم يتولوا نضافته مرة بعد صلاة التراويح ومرة تانية بعد صلاة التهجد ..
وهايبقى زى الفل إن شاء الله 😎
وكمان ماتنسوش سجاد المسجد يتنضف وتحافظوا إن ريحته تكون حلوة 😍
فَعَنْ عَائِشَةَ قَالَتْ: " أَمَرَ رَسُولُ اللَّهِ ﷺ بِبِنَاءِ الْمَسَاجِدِ فِي الدُّورِ وَأَنْ تُنَظَّفَ وَتُطَيَّبَ "
معنى الدُّور : الأحياء.

#رمضان_أحلى_مع
#عائلة_الحج_رمضان

الحكاوى مش هتطير وقد ايه بتكون مزعجه فى المسجد
لما يبقى الصوت عالي ومزعج للى جنبكم
ومنراعيش حقه انه يركز فى العباده
فياريت نحرص اننا منزعجش بعض وناخد بالنا ولا نستهين بالامر
النبي صلى الله عليه وسلم نهى إننا نقرأ قرآن بصوت عالي علشان بس
منشوش على بعض ...فمابالكم بقه بالحكاوى والصوت العالي والدوشة !!
اما بقه لو الحكاوي دى غيبة أو نميمة.. فالغيبة من كبائر الذنوب
ومشكلتها إنها ذنب مش بس فى حق الله لكن فى حق العباد كمان
الموضوع مش سهل و ممكن الشخص اللى اغتبته ده
يأخذ من حسناتك يوم القيامة
فنيجي المسجد مركزين كده للعباده و نأجل الكلام لبعدين
#رمضان_أحلى_مع
#عائلة_الحج_رمضان

لو متمسكة بالمروحة أوى كده يبقى صلى فى بيتك أفضل 😎
النَّبِيِّ صلى الله عليه وسلم قَالَ
سَوُّوا صُفُوفَكُمْ , فَإِنَّ تَسْوِيَةَ الصَّفِّ مِنْ تَمَامِ الصَّلاة
فماينفعش النبى يقول .. سَوُّوا صُفُوفَكُمْ
وتقولى لا أنا هاصلي جنب المروحة وأسيب الصف
ده غير انه طالما الصف فيه مكان
فماينفعش تصلي لوحدك خلفه
عايزين نحافظ على آداب المسجد و آداب صلاة الجماعة
#رمضان_أحلى_مع
#عائلة_الحج_رمضان

مايصحش كده 😎
مش كل المواقف ينفع نشد فيها كده 🤓
ربنا قال (ٱدۡعُ إِلَىٰ سَبِیلِ رَبِّكَ بِٱلۡحِكۡمَةِ وَٱلۡمَوۡعِظَةِ ٱلۡحَسَنَةِۖ وَجَـٰدِلۡهُم بِٱلَّتِی هِیَ أَحۡسَنُۚ إِنَّ رَبَّكَ هُوَ أَعۡلَمُ بِمَن ضَلَّ عَن سَبِیلِهِۦ وَهُوَ أَعۡلَمُ بِٱلۡمُهۡتَدِینَ)
والنبيَّ ﷺ قَالَ: " إِنَّ الرِّفقَ لا يَكُونُ في شيءٍ إِلَّا زَانَهُ، وَلا يُنْزَعُ مِنْ شَيءٍ إِلَّا شَانَهُ "
عايزين نتعلم آداب النصيحة علشان منكنش منفرين للناس
#رمضان_أحلى_مع
#عائلة_الحج_رمضان

النَّبِيِّ ﷺ قَالَ: " يَا أَبَا ذَرٍّ إِذَا طَبَخْتَ مَرَقَةً فَأَكْثِرْ مَاءَهَا وَتَعَاهَدْ جِيرَانَكَ "
فى زمنا للاسف أصبح الشائع فيه المثل المنتشر
"صباح الخير يا جاري انت فى حالك وانا فى حالي"
وغاب عنا حاجات جميلة زمان كانت بتحصل زى
"الطبق" اللى بيلف على كل الجيران سواء حلويات او غيره
كان جبريل عليه السلام يوصي النبي صلى الله عليه وسلم بالجار
حتى ظنن النبى انه سيورثه
عايزين نرجع علاقتنا الطيبه بجيرانا من الود و التراحم فضلا
عن ألا نؤذى بعض طبعا :)
#رمضان_أحلى_مع
#عائلة_الحج_رمضان

"الدين يسر " !!
طيب طالما هنمشي كل حاجه الدين يسر
يبقى ربنا شرع لنا أحكام ليه ؟
ما كل واحد يعمل اللى عايز يعمله و خلاص !
"النبى صلى الله عليه وسلم اللى كان من سيرته
"انه ما خير بين أمرين الا واختار ايسرهما ما لكم يكن إثمــــــــــــــــــا "
ما لم يكن إثما يا شباب ... ما لم يكن إثما يا بنات
علشان دايما مش بنكمل الحديث :)
ربنا قال (وَمَاۤ أَرۡسَلۡنَا قَبۡلَكَ إِلَّا رِجَالࣰا نُّوحِیۤ إِلَیۡهِمۡۖ فَسۡـَٔلُوۤا۟ أَهۡلَ ٱلذِّكۡرِ إِن كُنتُمۡ لَا تَعۡلَمُونَ)
الدين لم يشرع المسح على " كم العباية " وبالتالي فالوضوء لا يصح
والصلاة كذلك .
ارجوكم يا شباب اتعلموا دينكم وعلموا الناس :)
#رمضان_أحلى_مع
#عائلة_الحج_رمضان

العبادات والطاعات القلب والبدن مش بيتعودوا عليها بسهوله
لازم تدريب عالعبادة عشان القلب يتلذذ بيها بعدين..
فمينفعش تستنى لرمضان عشان تبقى مستعد للعبادة
والوتر من العبادات اللى وصى بيها النبي أصحابه وكان لا يتركها النبي فى سفر ولا حضر
فقال أبو هريرة -رضيَ الله عنه-: (أَوْصَانِي خَلِيلِي بثَلَاثٍ لا أدَعُهُنَّ حتَّى أمُوتَ: صَوْمِ ثَلَاثَةِ أيَّامٍ مِن كُلِّ شَهْرٍ، وصَلَاةِ الضُّحَى، ونَوْمٍ علَى وِتْرٍ)

فابدأ من دلوقتي ومتضيعش على نفسك وصية النبي فى الوتر والمداومة عليها من دلوقتي وفى رمضان ولبعد رمضان

#تحدي
#صلاة_الوتر
#عائلة_الحج_رمضان

t.me/moh_elghaleez

ساعات كتير بنقعد نفكر في الفلوس وازاي هنقدر نواجه الظروف الصعبة اللي بنمر بيها، واللي كان بيتصدق بمبلغ نقصه للنص، ومنهم اللي مبقاش يتصدق أصلا وكل ده خوفا من الفقر
ونسينا إن الرزاق الذي خزائنه لا تنفد حي وباقي.. ونسينا كمان أن الصدقة لها ثواب عظيم لا يقدر بثمن..
وكمان بتنفي الفقر كما قال صلى الله عليه وسلم : (ثلاث، والذي نفس محمد بيده إن كنتُ لحالفا عليهنّ: لا ينقص مال من صدقة فتصدّقوا، ولا يعفو رجلٌ عن مظلمة يريد بها وجه الله إلا رفعه الله بها عزّا يوم القيامة، ولا يفتح رجلٌ على نفسه باب مسألة إلا فتح الله عليه باب فقر)
يعني النبي الذي لا ينطق عن الهوى يحلف إن المتصدق عمر ماله ما هينقص.. يبقى لسه لحد دلوقتي خايف تتصدق لمالك يقل؟

ده مش في الدنيا بس لا ده الثواب الأكبر والأعظم يوم القيامة يوم الحشر اللي بلغنا عنه رسول الله صلى الله عليه وسلم وقال: "كُلّ امرئ في ظِلّ صدقته حتى يفصل بين الناس" يعني الناس كلها تبقى مش قادرة من هول الموقف ومن حر يوم القيامة وأنت واقف مبسوط مستظل بظل صدقتك فهل بعد كده من نعيم؟

#تحدي
#الصدقة
#عائلة_الحج_رمضان

t.me/moh_elghaleez

فيه أحاديث جميلة جدا عن فضل السواك هقولك منها واحد
الرسول صلى الله عليه وسلم قال: "السواك مطهرة للفم مرضاة للرب"
يعني أنت هتعمل حاجة مفيدة لك وكمان ربنا هيرضى بيها عنك..
واحنا نفسنا في إيه غير إن ربنا يرضى عنا؟
هقولك حاجة كمان.. السواك ده سُنة مهجورة وقليل أوي اللي بيستخدمه
فكده أنت كمان هتبقى ساهمت في إحياء سنة مهجورة ودي برضه ثوابها عظيم جدا
حاجة كمان.. احنا داخلين على رمضان والرسول كان أكثر حرصا على السواك في رمضان
فالسيدة عائشة قالت: (رأيت رسول ﷺ ما لا أحصي ولا أعد يتسوك وهو صائم)
يلا اشتريلك واحد ونشوف مين هيثبت ع السواك لحد رمضان 💪

#تحدي
#السواك
#عائلة_الحج_رمضان

t.me/moh_elghaleez

مادام الحمد لله صحتك كويسة وتقدر تصوم يبقى ابدأ وصوم النوافل..
لأن محدش ضامن يعيش لرمضان وكدة هتفوت على نفسك أجر عظيم أوي زي ما رسولنا صلى الله عليه وسلم قال: "من صام يومًا في سبيل الله بعد الله وجهه عن النار سبعين خريفًا".
يعني صيام يوم واحد تصومه يبعدك عن النار سبعين سنة تخيل!! وده ثواب مايتفوتش بسهولة كده
ده غير إننا في الشتا كمان والجو بارد والنهار قصير والرسول صلى الله عليه وسلم قال: "الغنيمة الباردة الصوم في الشتاء"، يعني تصوم وتاخد الأجر العظيم من غير تعب ولا مشقة

شاركونا تحدي اليوم وانووا المحافظة على صيام التطوع
ونسأل الله أن يكتبنا وإياكم من أهل باب الريان

#تحدي
#صيام_التطوع
#عائلة_الحج_رمضان

t.me/moh_elghaleez

خد بالك يقول ابن عباس: "وخوفك من الريح إذا حركت ستر بابك وأنت على الذنب ولا يضطرب فؤادك من نظر الله إليك أعظم من الذنب"
إنك تعمل حساب لحد وتخاف يشوفك وانت بتعمل الذنب وناسي إن ربنا مطلع عليك ده ذنب أعظم من اللي انت عليه..
راقب الله في أفعالك واتق الله وتذكر دائما وقلها بقلبك قبل لسانك
الله معي
الله شاهدي
الله مطلع علي..

#تحدي
#مراقبة_الله
#عائلة_الحج_رمضان

t.me/moh_elghaleez