ورابع حاجة هنستعد بيها لرمضان إن شاء الله 👈 "الصدقة"
فَعَنْ أَبِي هُرَيْرَةَ رَضِيَ اللَّهُ عَنْهُ قَالَ: قَالَ رَسُولُ اللَّهِ ﷺ: «مَنْ تَصَدَّقَ بِعَدْلِ تَمْرَةٍ مِنْ كَسْبٍ طَيِّبٍ، وَلاَ يَقْبَلُ اللَّهُ إِلَّا الطَّيِّبَ، وَإِنَّ اللَّهَ يَتَقَبَّلُهَا بِيَمِينِهِ، ثُمَّ يُرَبِّيهَا لِصَاحِبِهِ، كَمَا يُرَبِّي أَحَدُكُمْ فَلُوَّهُ، حَتَّى تَكُونَ مِثْلَ الجَبَلِ».
تعالوا كده نتدبر بعض المعاني في الحديث وبعدين نتفق هنستعد إزاي 💪
(يربيها لصاحبها) 👈 يعني ينميها ويضاعف أجرها للشخص اللي أنفقها.
(فلوه) 👈 يعني مُهره اللي هو الخيل الصغير.
(مثل الجبل) 👈 يعني يكون ثوابها زي ثواب اللي تصدق بمقدار الجبل من المال.
شايفين فضل الله ربنا على المتصدقين 💚 صدقة بسيطة من مال حلال ثوابها يزيد ويزيد عند ربنا كأن صاحبها أنفق مقدار الجبل من المال.
فالحمد لله الكريم 💚
طب هنستعد إزااااي 🤔؟
إن شاء الله هنستعد مع بعض بحاجتين ✌
الحاجة الأولى (صدقة واجب الوقت) >> ودي المقصود بيها الظروف الحالية اللي بنمر بيها .. كلنا عارفين إن فيه ناس كتير تأثرت ماديا بالوضع الحالي فواجب الوقت على كل مقتدر إن يطلع من ماله على قدر استطاعته ويحاول يساعد في كفاية فقراء المسلمين.
ومش لازم بس مال ممكن أهل بيتك يزودوا وهما بيطبخوا ويعملوا حساب جارك اللي إنت ممكن تكون عارف إنه محتاج الفترة دي أو حارس العمارة اللي أكيد هايكون محتاج وغيرهم.

الحاجة التانية ( صدقة رمضان ) >> ودي المقصود بيها نحوش من دلوقتي إحنا وولادنا - للي عندهم أطفال - في حصالة كده نسميها مثلا حصالة الخير 🗳️ كل حد يحط فيها كل يوم ولو حتى جنيه وعلى أول رمضان إن شاء الله نطلعها ونساهم بيها في أي عمل خير زي شنط رمضان أو نشتري تمر للصائمين أو نشتري للفقراء مثلا أكل من اللي مش بيقدروا يشتروه.

ولو لقيت نفسك بتبخل فكرها بالآية دي (مَّثَلُ ٱلَّذِینَ یُنفِقُونَ أَمۡوَ ٰ⁠لَهُمۡ فِی سَبِیلِ ٱللَّهِ كَمَثَلِ حَبَّةٍ أَنۢبَتَتۡ سَبۡعَ سَنَابِلَ فِی كُلِّ سُنۢبُلَةࣲ مِّا۟ئَةُ حَبَّةࣲۗ وَٱللَّهُ یُضَـٰعِفُ لِمَن یَشَاۤءُۚ وَٱللَّهُ وَ ٰ⁠سِعٌ عَلِیمٌ)

وحاجة أخيرة قبل ما نختم: الصدقة مش بس مال؛ الصدقة ممكن تكون ابتسامة في وجه أخيك .. ممكن تكون سرور تدخله على قلب مسلم وأولهم أهل بيتك .. ممكن تكون عفو عن مسيء .. ممكن تكون قضاء حاجة محتاج .. ممكن تكون وقت تقضيه في عمل خير .. ممكن تكون إنك تسامح شخص عليه دين ليك ومتعسر في قضاءه ..
الصدقة ممكن تكون حاجات كتير .. جدد نيتك وازرع الخير وأبشر بثمار طيبة بإذن الله.


#استعد #الصدقة
#استعد_استمر_انطلق

قالَ رَسُول اللَّه ﷺ: "مَا مِنْ يَوْمٍ يُصبِحُ العِبادُ فِيهِ إِلَّا مَلَكَانِ يَنْزِلانِ، فَيَقُولُ أَحَدُهُمَا: اللَّهُمَّ أَعْطِ مُنْفِقًا خَلَفًا، وَيَقُولُ الآخَرُ: اللَّهُمَّ أَعْطِ مُمْسِكًا تَلَفًا" متفقٌ عَلَيْهِ.
(منفقا) 👈 يعني مُتصدِقا.
(خلفا) 👈 يعني عوضا عن اللي أنفقه.
(ممسكا) 👈 يعني بخيلا.
(تلفا) 👈 يعني أتلف ما لديه.
مين فينا مش محتاج دعوة حلوة من مَلَك؟!
الموضوع سهل وبسيط بفضل الله والاستمرار عليه محتاج بس نية خالصة لله وعزيمة 💪
عشان كده عايزين نتفق إن مايعديش علينا شهر -كحد أدنى- إلا وإحنا مطلعين صدقة لله..
أول لما نقبض مرتبنا أو ناخد مصروفنا كل شهر نطلع منه حاجة لله .. وكل واحد حسب وسعه وقدرته حتى لو هنطلع جنيه واحد..
أهم حاجة إخلاص النية لله والاستمراااار على الصدقة حتى لو كانت قليلة في نظرنا..
وممكن كمان نعمل صندوق صغير في البيت وكل يوم إحنا وأهل بيتنا نحط فيه صدقة بسيطة وآخر الشهر نطلع المبلغ كله لله في أي عمل خير 👍
📢 وماتنسوش الصدقة مش بس مال 🤓
ممكن تكون إطعام الطعام، كسوة لمحتاج، قضاء حاجة لمسلم، إدخال السرور على غيرك، تفريج كربة، ابتسامة في وجه أخ لك في الله .. وحاجات تانية كتيييير.


#استمر #الصدقة
#استعد_انطلق_استمر

عَنْ أَبِي هُرَيْرَةَ رَضِيَ اللَّهُ عَنْهُ، أَنَّ النَّبِيَّ صَلَّى اللهُ عَلَيْهِ وَسَلَّمَ قَالَ: "مَا مِنْ يَوْمٍ يُصْبِحُ العِبَادُ فِيهِ، إِلَّا مَلَكَانِ يَنْزِلاَنِ، فَيَقُولُ أَحَدُهُمَا: اللَّهُمَّ أَعْطِ مُنْفِقًا خَلَفًا، وَيَقُولُ الآخَرُ: اللَّهُمَّ أَعْطِ مُمْسِكًا تَلَفًا".

#الصدقة

t.me/moh_elghaleez

عَنْ أَبِي هُرَيْرَةَ رَضِيَ اللَّهُ عَنْهُ، قَالَ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «مَنْ تَصَدَّقَ بِعَدْلِ تَمْرَةٍ مِنْ كَسْبٍ طَيِّبٍ، وَلاَ يَصْعَدُ إِلَى اللَّهِ إِلَّا الطَّيِّبُ، فَإِنَّ اللَّهَ يَتَقَبَّلُهَا بِيَمِينِهِ، ثُمَّ يُرَبِّيهَا لِصَاحِبِهِ، كَمَا يُرَبِّي أَحَدُكُمْ فُلُوَّهُ، حَتَّى تَكُونَ مِثْلَ الجَبَلِ».

#الصدقة

t.me/moh_elghaleez

رَوى يَزِيدُ بْنُ أَبِي حَبِيبٍ، أَنَّ أَبَا الْخَيْرِ، حَدَّثَهُ، أَنَّهُ سَمِعَ عُقْبَةَ بْنَ عَامِرٍ، يَقُولُ: سَمِعْتُ رَسُولَ اللهِ صَلَّى اللهُ عَلَيْهِ وَسَلَّمَ يَقُولُ: "كُلُّ امْرِئٍ فِي ظِلِّ صَدَقَتِهِ حَتَّى يُفْصَلَ بَيْنَ النَّاسِ -أَوْ قَالَ: يُحْكَمَ بَيْنَ النَّاسِ-".
قَالَ يَزِيدُ: وَكَانَ أَبُو الْخَيْرِ لَا يُخْطِئُهُ يَوْمٌ إِلَّا تَصَدَّقَ فِيهِ بِشَيْءٍ، وَلَوْ كَعْكَةً، أَوْ بَصَلَةً، أَوْ كَذَا.

#الصدقة

t.me/moh_elghaleez

عَنْ أَبِي هُرَيْرَةَ رَضِيَ اللَّهُ عَنْهُ: أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ: "قَالَ اللَّهُ: أَنْفِقْ يَا ابْنَ آدَمَ أُنْفِقْ عَلَيْكَ".

#الصدقة

t.me/moh_elghaleez

عَنْ عَائِشَةَ رَضِيَ اللَّهُ عَنْهَا، أَنَّهُمْ ذَبَحُوا شَاةً، فَقَالَ النَّبِيُّ ﷺ: «مَا بَقِيَ مِنْهَا»؟ قَالَتْ: مَا بَقِيَ مِنْهَا إِلَّا كَتِفُهَا، قَالَ: «بَقِيَ كُلُّهَا غَيْرَ كَتِفِهَا»..
في الحديث ده السيدة عائشة بتحكي أنهم ذبحوا شاة وتصدقوا بيها كلها إلا الكتف..
فالنبي ﷺ قالها: إن اللي بقى في الحقيقة هو اللي تصدقوا به لأن ده اللي ثوابه باقي ليوم القيامة..
أما اللي هيتاكل في الدنيا فده هو اللي هيفني..
🤍
وإحنا حاليا بنمر بظروف إقتصادية صعبة جدا
ومن واجب الوقت علينا إننا نجتهد ونسعى في سد جزء ولو بسيط من احتياجات فقراء المسلمين..

وأنا عارف إن الوضع صعب على كل الناس مش بس على الفقراء..
لكن الوضع عليهم بلاشك أشد صعوبة، وإحنا جسد واحد ماينفعش نسيب حتة مننا بتشتكي ونقف ساكتين..

فلازم كل واحد فينا يساعد باللي يقدر عليه من غير أن يشق على نفسه؛ اللي يقدر يتصدق بمال، ملابس، طعام، علاج، قضاء حاجة لمحتاج، وقت يبذله في عمل خيري، مسامحة شخص مديون له بمال ومتعسر في قضاءه.....
أو أي شيء تاني من الحاجات اللي الناس محتاجاها..

ولو انتم ماتعرفوش حواليكم ناس محتاجة يبقى تخيروا الأماكن الثقة اللي توكلوهم في إخراج الصدقات دي عشان تطمنوا إنها وصلت لمستحقيها إن شاء الله..

وحاجة كمان مهمة ياريت لو من دلوقتي كل أسرة تجتمع على التجهيز لصدقة رمضان ويبدأوا يحوشوا مع بعض في صندوق أو حصالة..
ومع بداية الشهر يبدأوا يطلعوا من الصدقات دي في أبواب الخير المختلفة..
هتبقى فرصة حلوة للأسرة أنهم يجتمعوا على طاعة..
وفرصة حلوة لربط الأطفال بطاعة الله وتنشأتهم على حب الخير والسعي لقضاء حوائج المسلمين..

وخليكم عارفين إن الصدقة مش لازم أبدا تكون مبالغ كبيرة..
العبرة مش بالكم، العبرة بقبول الله للصدقة 🤍

آخر حابة قبل الختام هافكركم بقول الله تعالى: ﴿مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِائَةُ حَبَّةٍ وَاللَّهُ يُضَاعِفُ لِمَنْ يَشَاءُ وَاللَّهُ وَاسِعٌ عَلِيمٌ﴾..
فجددوا نواياكم وازرعوا حبَّات الخير في بستان أعمالكم وأبشروا بالخير من رب كريم واسع عليم 🤍

#الصدقة
#مش_زي_كل_سنة

t.me/moh_elghaleez

كلنا بنتحمس وقت الطاعات
ونتسابق للخير وندور على أهل الصدقات عشان نتصدق
والحقيقة إنهم موجودين طول السنة
مش بس في رمضان
واحتياجهم ل الصدقة بردو طول السنة
وأنت احتياجك ل الصدقة أكتر وأكتر

اوعى تنسى إن الصدقة تطفيء غضب الرب
وإن الصدقة سبب للبركة في مال المتصدق
وكل ما ينفق ربنا يخلف عليه ما أنفق أو زيادة.

كل يوم ملك يقول اللهم أعط منفقاً خلفاً ✨
‏
﴿وَمَا أَنفَقْتُم مِّن شَيْءٍ فَهُوَ يُخْلِفُهُ وهو خير الرازقين﴾

كمل في الصدقات
كل ما يبقى معاك أنفق
وكل ما تضيق معاك أنفق

#كملها_صح
#الصدقة_في_كل_وقت

ساعات كتير بنقعد نفكر في الفلوس وازاي هنقدر نواجه الظروف الصعبة اللي بنمر بيها، واللي كان بيتصدق بمبلغ نقصه للنص، ومنهم اللي مبقاش يتصدق أصلا وكل ده خوفا من الفقر
ونسينا إن الرزاق الذي خزائنه لا تنفد حي وباقي.. ونسينا كمان أن الصدقة لها ثواب عظيم لا يقدر بثمن..
وكمان بتنفي الفقر كما قال صلى الله عليه وسلم : (ثلاث، والذي نفس محمد بيده إن كنتُ لحالفا عليهنّ: لا ينقص مال من صدقة فتصدّقوا، ولا يعفو رجلٌ عن مظلمة يريد بها وجه الله إلا رفعه الله بها عزّا يوم القيامة، ولا يفتح رجلٌ على نفسه باب مسألة إلا فتح الله عليه باب فقر)
يعني النبي الذي لا ينطق عن الهوى يحلف إن المتصدق عمر ماله ما هينقص.. يبقى لسه لحد دلوقتي خايف تتصدق لمالك يقل؟

ده مش في الدنيا بس لا ده الثواب الأكبر والأعظم يوم القيامة يوم الحشر اللي بلغنا عنه رسول الله صلى الله عليه وسلم وقال: "كُلّ امرئ في ظِلّ صدقته حتى يفصل بين الناس" يعني الناس كلها تبقى مش قادرة من هول الموقف ومن حر يوم القيامة وأنت واقف مبسوط مستظل بظل صدقتك فهل بعد كده من نعيم؟

#تحدي
#الصدقة
#عائلة_الحج_رمضان

t.me/moh_elghaleez

الكلام مفيش أسهل منه، وعادي جدا ممكن أي حد يقول كلام كتير..
لكن ساعة الجد هيبقى كل واحد مطلوب منه يقدم الدليل..
ومن الأدلة دي دليل الصدقة، فالنبي ﷺ قال: "والصَّدَقَةُ بُرْهانٌ"..
برهان يثبت صدق إيمانك، لأن النفس طبيعتها حب المال، فلما تخالفها وتقدم حب الله على حب المال، يبقى دي علامة من علامات صدق الإيمان، قال تعالى: "وَآتَى الْمَالَ عَلَىٰ حُبِّهِ"..

وعشان كده هنستغل أيام العشر ونتفق مع بعض على كام حاجة نبدأ بيهم:
1. نطلع صدقة يومية بدءا من النهاردة لغاية يوم العيد.. وممكن تكون حاجات بسيطة جدا زي إزازة مياه ساقعة لعامل نظافة في الشارع، حاجة حلوة لطفل فقير..
وأفكار تانية كتير.

2. لو مش هنقدر ننفذ الاتفاق اللي فات يبقى على الأقل نطلع صدقة يوم عرفة تحديدا؛ لأن ده يوم مش زي أي يوم.

3. الصدقة أبوابها كتير، مش بس فلوس ولبس وأكل، فلو حتى مش قادرين نتصدق بأي شيء تماما، ممكن نتصدق بمجهودنا، بعلمنا، بوقتنا، بإماطة الأذى عن الطريق.

4. ما بعد العشر، هنتفق إن مايعديش شهر علينا من غير صدقة بأي شيء مهما كان قليل..
وكمان نتعلم فقه الزكاة؛ لأن الصدقة تشمل الزكاة الواجبة، والصدقة المستحبة، فلازم يكون عندنا الحد الأدنى من المعلومات اللي تساعدنا نُخرج زكاة أموالنا بشكل صحيح.

وختاما؛ أخدنا النهاردة خامس عبادة من العشرة..
مين معانا في البداية، ومستعد يكمل للنهاية 💪

#الصدقة
#عشرة_من_عشرة