للأمام الحسن المجتبى عليه السلام

اصيح ودمعي سچاب. يموت اليفگد احباب
حبيبي يالحسن ليش. تگطع چبدك وذاب
...............

اليفگد احباب الگلب يتمنّه موته
لا نياحه تفيده لا ينفع سكوته
شلون لو گلبه انفجع بكبر اخوته
يبقه شبه الميت ومبحوح صوته

بچيت عيون ودموع. عله المسموم ويلوع
اشوفه يعالج الروح. تغيّر لونه ونصاب
......................

من دخلت عله الحسن ياحاله شفته
يجرح بچبده الألم وينوح سكته
لونه متغيّر يويلي وماعرفته
صحت وا ويلاه يبن امي وشبگته

يخويه الصار ويّاك. دخيلك احنا بحماك
يبعد اختك يمظلوم. وحيد بعازت اصحاب
..................

يختي يازينب تره چبدي تگطّع
وين امشي لياكتر گليلي اطلع ؟
والله من كثر الألم مااگدر اهجع
جعده سمّتني وحس جسمي تصدّع

الچنت اعطف عليها عسه انشلّت اديها
سگتني سم عدوّي علية سدّت الباب
..................

يعينك الله عله الألم يبن الزچيه
هذا چبدك بالطشت ينزف بديه
يعني گربت يالحسن ليك المنيه
تغيب عني يالچنت خيمه عليه

يريت ابدالك انموت. وتظل رحمه عله لبيوت
يشمس الدنيا والكون. هضيمه يضمّك تراب
.....................

اقسه من جرحي ومصابي دمعتچ هاي
نشّفي دمعاتچ يزينب صبري ويّاي
باجر تشوفين موقف اصعب هواي
عالرمل مطروح اخوچ ويطلب الماي

عله حسينچ تنوحين. يذبحونه وتشوفين
تدوس بجثّته الخيل ويجيج الشمر سلّاب
.........................

شلون اشوفك بالنعش ميت يغالي
يالچنت مثل البدر تضوي الليالي
يالحسن يالصورتك دوم عله بالي
شلون محرابك اشوفه بعيني خالي

اخذني لگبرك اَرتاح. بعد ما احمل جراح
يضدني دهري غدّار. يويلي شضاملي مصاب

#سيد_زيد_الفحام

_____

اصيح ودمعي سجاب كلمات سيد زيد الفحام الرادودابوسجادالكعبي ليلة17 من محرم الحرام يوم الاحد13 /7 /2025 هجري1447 في دار الرادود ابومحمد الكعبي

نزلة // للإمام الحسن المجتبى عليه السلام

يا امامي الثاني
ما نسيتك آني
٠٠٠٠٠٠٠٠٠٠٠٠٠٠٠٠
سيدي يبن الزجية ويا ابن حامي الحمه
حبك عله الأمه كلها فرض من رب السمه
افتخر اني بولائك فايز البيك احتمه
حبك بگلبي مكانه يسري بي مسره الدمه
اسمك عله الساني
ما نسيتك آني
٠٠٠٠٠٠٠٠٠٠٠٠٠٠٠٠
يالحسن مولاي حبك ينجي من موج الخطر
شلون ما اهوى واحبك. وانت اغله امن النظر
الله خصك بالإمامة. فرض واجب عالبشر
اكتمال الدين بيكم  واليحبكم ما خسر
منهجي وعنواني
ما نسيتك آني
٠٠٠٠٠٠٠٠٠٠٠٠٠٠٠٠
طالعت سيرة حياتك. يا امامي يالحسن
كلها نور وكلها رحمه  وانت للخايف وطن
تهدي للحق والهداية ودرع يحمينه الفتن
للكرم فاتح مضيفك.  سيدي بطول الزمن
عايش بوجداني
ما نسيتك آني
٠٠٠٠٠٠٠٠٠٠٠٠٠٠٠٠
شكد جرعت جروح كلفه.  گلبك شيحمل ألم
مرّه طعنه من عدوك  مرّه من خِلّك سهم
والأشد طعنة خليلك  من تخاذل ونهزَم
لو جبل صبرك يغالي. جا تضعضع وتهدم
ذكرك باحزاني
ما نسيتك آني
٠٠٠٠٠٠٠٠٠٠٠٠٠٠٠٠
فوك كل هاي المصايب.  آل اميه ظلمتك
ابن ابو سفيان ظالم.  انتهك كل حرمتك
غَرر بجَعدَه اللعينه. نفذتله وسمّتك
چبدك بسمها تكطع  صايم ومارحمتك
مقتلك بچّاني
ما نسيتك آني

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يا أمامي الثاني مانسيتك اني كلمات سيد زيد الفحام الرادودابوسجادالكعبي ليلة17 من محرم الحرام يوم الاحد13 /7 /2025 هجري1447 في دار الرادود ابومحمد الكعبي

نزله للعليلة 2022

السلام عليك والدي. يا حُسين
السلام عليك والدي.  يا حُسين
........

يالعفتني بلا ابو _ لا عمام ولا اخو _ فارگوني.
طفله بجروح وألم _ باقيه وحيل انهدم _ ما تجوني

اباب دارك گاعده متانيتك
بويه مظلم ما اطب لبيتك
شوگ يوسف والدي ليعقوبه
اشتياقي لعطفك وحنّيتك

السلام عليك والدي. يا حُسين
السلام عليك والدي. يا حُسين
..........

بويه يانبض الگلب _ تدري بغيابك صعب _ عاليتيمه
بعدك شيسوه العمر _ يتّمتني منّ زغر _ يا هضيمه

بويه لو تدري شكثر مشتاگه
يجرح غياب الأبو وفراگه
گلبي لاچمني ينور عيوني
بعد هذا السفر ما نتلاگه

السلام عليك والدي. يا حُسين
السلام عليك والدي. يا حُسين
.........

طوّل علية السفر _ بوية ودّيلي خبر _ موّتتني
ما بقة بگلبي صبُر _ لشوكت راح انتظُر _ عذّبتني

بويه ما ادري شيصير بحالك
لا اجيت ولا وصل مرسالك
بدار ظلمه موحشه ومهجوره
ليش عايف طفله منّ طفالك

السلام عليك والدي.  يا حُسين
السلام عليك والدي.  يا حُسين
.............

لا تظن اهجع بعد _ ونورك علية ابتعد _ ما اشوفه
ابچي والمدمع يكت _ والونين بكل وكت _ ما اعوفه

يمته ترجعلي يبويه الغالي
بالمرض مشدوهه من يبرالي
اگضي ليلي انحب بمحرابك
يالغبت بس ما غبت عن بالي

السلام عليك والدي.  يا حُسين
السلام عليك والدي.  يا حُسين
..............

عمري من بعدك وهم _ تسعر بگلبي حِمم _ من لهيبه
گلبي حس بالفاجعه _ ينجرج وتگطّعَه _ يا مصيبه

شفتك بطيف وتغيّر لوني
ريت عمية ما تشوف عيوني
عالرمح راسك يبويه الغالي
آل امية بذبحتك فجعوني

السلام عليك والدي.  يا حُسين
السلام عليك والدي.  يا حُسين
..............

والخفت منّه حصل _ هذا ناعيّك وصل _ للمدينه
يهل يثرب صرخته _ حسين داسوا جثّته _ مگطّعينه

من سمعته يصيح گطعوا راسه
اختنگ صدري وحبس انفاسه
الطم عله الراس وصرخ ويلي
راح ابوي حسين هيبة ناسه

السلام عليك والدي.  يا حُسين
السلام عليك والدي.  يا حُسين

سيد زيد الفحام
__________________________________________

السلام عليك والدي ياحسين كلمات سيدزيدالفحام
اداء الرادودابوسجادالكعبي ليلة 21 من محرم الحرام يوم الخميس بتاريخ 17 / 7 / 2025
في دار ابوسجاد

عايش بوجداني والعشگ جناني
عابس انه الثاني. اوخدمته تحلالي

حسين دلاني اعلى دربـه شلون اروح الغيره
وانه مـن يوم الـعرفته مـــــاوگـعت بحيره
بعطفه حل كل معجزاتي اوغركاني بخيره
او معـضـلات الدنيه كــــــلها حلهن بتدبيره


كلبي هو يريده. اهوه غيره بعيده
غيره لا ماريده اوهو بس يحلالي

حسين مـالك كلشي بيُه حتى نبع احساسي
حسين غرگــني بمحبته مـن اساسي الراسي.
اغله من روحي اوحياتي واغله من أنفاسي
اوكلبه احن من أمي بيه واحن من كل ناسي

اغله من اعيوني. اوكل اليحبوني.
اوخلهم يلوموني حبه كلش غالي

العـاشر احسـين اوخـدمته ماأظن ايعـوفه
واني ناذر عمري لاجله او روحي اله موقوفه
حسين شـال الخير ربه اوحطه بين جفوفه
اوگــــــله بكيفك حبيبي وزع الي تشوفه


تيمتني اطفوفه. ...للأبد ماعوفه
روحي اله ملهوفه وهو بس ابالي

عـايشه بروحي المـــــــئاتم والدمع سلواني
ومن انين الليل وحدي فززت جــــيراني
ادموعي طوفان اعله خدي اوماطفت نيراني
اوراح تكضي ايام عمري اوماكضيت احزاني

احزاني ماگضيها. اودمعتي اجريها
وقف اله مخليها. اوحرگته ابدلالي

كلشي بيه أنـــــــــــــــه أحبه حتى شم ترابه
اوعندي أحله أيــــام عمري لــو وگفت ابـــابه
احبابه چنها املاك ربي هيج اشوف احــــبابه
اوريحة الجنه أشمهـــــــا لــو دخلت اعتــــابه

ياجمال الحضره. بيها عطر الزهره
ارزقني منك نظره. سيدي أرحم حالي

لو ملكت الكون كله بشرط اعوف احسيني
والله مــــــــاأرضه وكـــــــولن حبه امكفيني
راضي انـــــــا ابقى فقير وانت تبقى بعيني
وانه مـــــــادورت دنـــيه اوخدمتـــــــــك تغنيني
والله مايغنوني. العنك ايبعدوني
. انت نور عيوني. وبيك الف هنيالي


خادم الزهراء ع ابو احمد الطائي

عايش ابوجداني والعشك جناني كلمات
ابواحمدالطائي اداء الرادودابوسجادالكعبي ليلة23من محرم الحرام يوم السبت19 / 7 / 2025 هجري1447 في دار الرادود ابوسجادالكعبي

(7) نزلة ...... في رثاء فاطمة العليلة عليها السلام


لا تفارگني لا تفارگني
يانبض گلبي وحياتي لا تفارگني
.....................

الطفله لو فارگها ابوها مـن يسلّيــها
تـنـتـظــر رحـمـة ابوها يعطف عليها
وانت عندك طفله بويه وتعلم شبيها
بويه حتى الطير يبچي وي بواچيها
لا تعذّبني لا تعذّبني
لو رحت تگرب وفاتي لا تعذّبني
...................

آنه طبع الوردة طبعي اذبـل بدونك
بشوفتك آلامي تشفه بويه وعيونك
هـونـك عليّة حبيبـي والــدي هـونك
ادري بالعــدوان ادري ما يرحـمــونك
لا تيتّمني لا تيتّمني
من يحقق امنياتي لا تيتّمني
.......................

آنـه مـتـعــــوّده عليـك بكل فجر يمّي
يشفه جرحي منّ شوفك ينجلي همي
بصوتك الـدافـي يبويه ياحلات اسمي
واحله صوره لو گعدتّوا انت وي عمي
لا تأذّيني لا تأذّيني
يمي من تبقه رضاتي لا تأذّيني
........................

ياحبيبي حسين بويه يانظر عيني
لا تـفـــارگـنـي دخيـلـك لا تخلّيني
ابقه محتـاره وعليله من يبـارينـي
آنه يابويه العـزيـزه عليـك تدريني
لا تحيّرني لا تحيّرني
كل فرض ادعي بصلاتي لا تحيّرني
.......................

لا تـگـلّي صبــري بـويـه ياصبـر ينـفـع
يختنگ صبـري بغيــابـك گلبي يتگطّع
حفرت خدودي وچوتني جمرة المدمع
كـلـمـة مـــوادع يبويه ما اريــد اسـمـع
لا تودعني لا تودعني
وداعك اصعب من مماتي لا تودعني
...........................

بويه يحسين عله بختك ارحم بحالي
عـدمـن تـخـلّي العليله بـويـه يالغـالي
لو رحت عني وعفتني منـهـو يبــرالي
خل امـوت ويـاك بويه موتي يحـلالي
لا تضيّعني لا تضيّعني
خذني وي باقي خواتي لا تضيّعني

سيد زيد الفحام
_______

لاتفاركني لاتفاركني نزال كلمات سيدزيدالفحام
اداء الرادودابوسجادالكعبي ليلة23من محرم الحرام يوم السبت19/ 7 / 2025 هجري 1447 في دار الرادود ابوسجادالكعبي

الشاعر ظاهر حبيب الهليجي

ادركيني بـلكبـر يـم الـبنـيـن
ادركيني وانه خادم للحسين
---
انتي باب الله ونخيـتـج يلوفـيـه
رايد تحضريني من تدنى المنيه
بجاهج العـنـد الله شايلهن اديـه
نظره منج للحضرلج كل عزيـه
ادركيني ----------- جلمه تطلع بالونين
ادركيني ----------- وانه خادم للحسين
---


باجر ادري من يوارونــي بحفـرتـي
ابقه وحدي من يواسينـي بـوحشـتي
لاكن اعرف هاي تسهل لو حضرتي
حاشه مـا تـنسـيـن مولاتي خـدمـتـي
ادركيني ------------- خادمج رايد معين
ادركيني ------------- انه خادم للحسين
---
محلفـج بعـباس واخته زوري كبــري
انه خـادم بالـمواكـب كـاظـي عـمــري
هاي طبع اجفوفي ظلن فوك صــدري
وعله صوت اهل المنابر دمعي يجري
ادركيني ---------- صوتي مخنوك بحنين
ادركيني ---------- انـه خـادم للـحـسيـــن
---
مفترض من عندي ابجيلج نواظـر
خاف منكر بالكبر يسالني باجـــــر
عن ذنوبي بدنيتي وابقه انه حاير
بلجن تحضرين وتصيريلي ناصــر
ادركيني ----- شما خدمت بهل السنين
ادركيني ----- انــه خــادم للـحـسـيـــن
---
انتي جرح وعاش بيه باقي يـدي
شما كلت يم البنين يسـيـل خــدي
للعرفني وما فهمني يكون ردي
خـادمـج حـد المنيه وهــذا عهدي
ادركيني -------- واثق وعندي يقين
ادركيني --------- انه خـادم للحسين
------------

ادركيني بلكبر يم ام البنين كلمات ظاهر حبيب الهليجي اداء الرادودابوسجادالكعبي ليلة24من محرم الحرام يوم الاثنين 20 / 7 / 2025هجري1447

#زين_العابدين_ع



يالنـايم ابحــــر الشمس .. يابويه راسك ويــنه
وحتى الوگع عالمشرعه .. هم ما شــفت چفينه
شادهني موقف منحرك
ضليـــت ادور خنصــرك
@@

يا بويه بيــك اتحــيرت .. اشـــــــلون الــم اشــلائك
كل مااشيـــــلك سيـدي .. يوگع عضو مـن اعضـائك
وحتى الظلوع مكســره .. ما ارحمــــــــوك اعــدائك
لاچن على اسيوف الظلم .. انتصـرت يبويه ادمائك

جسمك طريح ابكربله .. محــد فزعله ايشـيله
يابويه وبدمـع الحـزن .. جسمك صبح تغسيله
چاوين حيدر يحضرك
ضليت ادور خنصـــرك
ـــــــــــــــــ ❁ ❁ ❁ ــــــــــــــــــ
الف وتســع مية جـرح .. بيــك وحـرت بجـروحك
وگبـال زينـب عمـــتي .. يا بويه طلعت روحـــــك
من طاح اخيك عالنهر .. انهدمت جميع اصـروحك
وبأذني لجل الفــارگك .. ليهــسه عايش نوحــــــك

مكسور ظهرك لاحظت ـ لمـن رجــــعت اوحيدك
ومن سئلتك ام الخـدر ـ نحت وصفگت بأيـــدك
يهز الظـماير منضرك
ضليت ادور خنصرك
ـــــــــــــــــ ❁ ❁ ❁ ــــــــــــــــــ

ضل مرمي جسمك عالثره .. وشمس الظهر حـــراگه
وخـــــذونه عنــك لليـــسر .. ماچـنت اضـن نتــلاگه
تدري المحــب مــن يبتـعد .. يحـــني الظلوع افراگه
ولشــــوفت اعيـــونك ترى .. عيوني اشكثر مشتاگه

جيت آنه اقـبل شفتك ــ وبلايه راس الگيتك
ابنحرك يبويه المنگطع ــ قبلتك اوشميـــــتك
اشلون تترك منبــرك
ضليت ادور خنصرك
ـــــــــــــــــ ❁ ❁ ❁ ــــــــــــــــــ

يا بويه منـك مستــحي .. چا ما متـت بين ايدك
ليش ابنصــرتك مانعت .. چـا آنـه هـــم اوليــدك
هنيـال عبـــدالله وعلي .. وهنياله بيك اعضـيدك
المفروض اقدم منحري .. يا بويه دون اوريـــدك

وهـم ابقه نايم عالترب .. والرمح شايل راسي
وبسهام صدري ينظرب .. وهم تنگطع انفاسي
بالروح يابويه انصرك
ضليت ادور خنصـرك
ـــــــــــــــــ ❁ ❁ ❁ ــــــــــــــــــ

يابويه شنهو الصـــبرك .. مـن ضــربو ابنياتك
معقوله يمك مـن لفـن  .. ما فجـرن دمعــاتك
انه ادري بسياط المتن .. اكبر وشـد لوعــاتك
وترجيته ارقيه اشكثر .. زادت لهب جمـراتك

من صعدونه اعله الهزل .. ماتعرف اشحل بينه
من بعد ســبع الگنطــره .. صـار الشـمر حادينه
اسولفنه كلها اتمرمرك
ضليت ادور خنصــرك
ـــــــــــــــــ ❁ ❁ ❁ ــــــــــــــــــ

     الخادم
كامل السعيدي

يالنايم ابا حرالشمس كامل السعيدي اداء الرادودابوسجادالكعبي ليلة25من محرم الحرام يوم الاثنين21 /7 / 2025 هجري 1447مجالس الحسين ع

يوم الحسين إجتنه اخباره
ماكو أنصار مثل أنصاره

نقره تاريخ المَجِد واعلومه
مُحتوى العِز والنِّصر مفهومه
بالدماء لوحة عشگ مرسومه
سَوَّت انصاره خَسِف بالحومه

اجيوش الاعداء صفت محتاره
ماكو أنصار مثل أنصاره
.................................
وگفة الأنصار يامحلاهه
بيهه ابو السجاد ضل يتباهه
الضحَّت ابطف كربلاء إدماهه
نبقى دوم انسولف ابطرواهه

موقف اخلاص تضل آثاره
ماكو أنصار مثل أنصاره
......................................
سمعو ابِّت حيدره حزنانه
صاحو الزينب فداچ ادمانه
باچر انخلِّي الزلم حيرانه
مو وحيد حسين كلنه اخوانه

واعله الاصفوف نشن الغاره
ماكو أنصار مثل أنصاره
.....................................
بالفخر بت فاطمه نادوهه
ماتحس ابكل خطر خلوهه
عيلة اهل البيت ماخذلوهه
وللحسين ارواحهم ضحّوهه

ابدمهم الدين تشع انواره
ماكو أنصار مثل أنصاره
.......................................
بيهم المعبود ناصر دينه
وبيهم افتخرو علي وهادينه
إبن ضاهر چن ينادي اعلينه
هو هذا اليرضه عنَّه حسينه

اليخدم حسين ينول ابشاره
ماكو أنصار مثل أنصاره


سيد علي الموسوي

اليوم الحسين اجتنه اخباره كلمات سيدعلي الموسوي اداء الرادودابوسجادالكعبي ليلة24من محرم الحرام يوم الاحد20 / 7 / 2025 هجري1447

اجمل قصائد للمشاية ستجدونها هنا
https://t.me/wwalmndlaue

ستنطلق دورات. جديدة
دورات قرآنية و دورات حوزوية ان شاء الله للاشتراك👇👇👇

https://t.me/alquranrisala

اجمل قصائد الاربعين تجدونها هنا

https://t.me/+oV0S13DTyIk4Zjgy

دعم مؤسسة منبريون الحسينية
#افضل قناة للنعي
https://t.me/+P0VV4bLqtzuKdcQS
#للاشتراك بالدعم @ahmed_alziwar0