اول ليله من دونك .. كلش صعبه وعيونك

يا خويه شيخلص الليل
وحدي ابيـن زلـم وخيل

..،..،..،..،..،..،..،..،..،..
اجاني الليل خويه وضيم فكدك حان
يل جسمـك مـطـشـر نعمه عالكيعان
انـه بــلا خـيـام وانــتــا عـل تــربـان
كلي شـلـون تـغـفـه الـفاكده الخوان

تعمه العين التغمض .. وانتا الخيل بيك ترض

تدبج فوك صدرك حيل
وحدي ابيـن زلـم وخيل

..،..،..،..،..،..،..،..،..،..
كـلـما اريد اغافلهم واجي لملكاك
تمنعني الخيول الي اركضت فوكاك
بحوافر خـيـلـهـم اثـار مـن ادمـاك
مو بس صدرك كليبي انسحك وياك

شما اجيلك يمنعوني .. يا خويه ويضربوني

وكـل ضربه تهد الحيل
وحدي ابين زلم وخيل

..،..،..،..،..،..،..،..،..،..
اجيتك والله سـهـلها وشفت بالعين
بس شويه باقي من هذاك حـسـيـن
جسمك مثل صيتك تارس الصوبين
حلاتك خويه بالطف كلي راحت وين

حرت من اوصلت يمك .. ابجي اعليك لو المك

مطشر عـل تـراب الهيل
وحدي ابيـن زلـم وخيل

..،..،..،..،..،..،..،..،..،..
موش دموع طاحت مني طاحت روح
بكد ما شـّـتمونه بيك شـفت جروح
حيرة منين اشمن نـحـرك الـمـذبـوح
ورغم دخـان الـّمـخيم بقيت تفوح

عطرك خويه كاداني .. لنحرك هوه دلاني

مكطع واحله من سهيل
وحدي ابيـن زلـم وخيل

..،..،..،..،..،..،..،..،..،..

شما حاولت اشبگگ سهم صدرك جان
يـعــارض شـبـگـتـي ومـوادع الخوان
انذبحت بسيف انته وانه بـالـهـجران
وعكب اذراعك نــحط حبل بالذرعان

خويه امن الصبح باجر .. كوه عنك نسافر

وتهل المدامـع ســيــل
وحدي ابيـن زلـم وخيل



الشاعر محمود محمد العطواني

ميمر كربلائي

يمك عبد يا مولاي .. تعتقني ماريدنك

•

بزنزانة الحب يا حبيبي اسجني
بحبك مؤبد رايديك تحـكـمني
وبقيد حزنك سيـدي تـقـيدني

بعيوني اجمل سجان .. صرت واحبن سجنك

•

تـخـلّـي سبيلي سيدي ما اريدك
تحضني رايد حضنتك لـولـيـديك
خليني من هاي اديك لهاي ايدك

من اهلي امِل بس والله .. يحسين ما املنك

•

كــلــي الـك يـا سيدي وتملكني
بداعت رقيه بغيري لـتـبـدلـنـي
خـادم لـخدامـك ولو تحسبـني

قنبر اصيرلك كون .. ما رايد ابعد عنك

•

يل حبك اعلى امن النجم خلاني
بالدنيه مـو خـادم مَـلك سواني
وحاشاك لن يوم الحشر تنساني

لا والله ابد ما تنساه .. الما ناسي جمرة حزنك

•

هـنياله كلـمـن ما تـهـيـد احزانه
وللدوم ضل ذجرك بطرف لسانه
نـاجـح الـصـار بـدفـتـرك عنوانه

خيعونه يابو السجاد .. وحرگه انتا منطي منك

•

لا بارك الله بعـيـن مـا تـبـجـيلك
وشتفيد رجلي انجان ما تمشيلك
وتنشل عسن كـل ايد ما توميلك

تمنيت انه شكد لو كون .. مخلوق تربه بصحنك

•

مو شرط الطم انه بصدر المجلس
يم عتبة الباب افتخر لــو اجـلـس
وامنيتي جانت بالصحن كون اكنس

للـ لوحة اضلن وياك .. يحسين ماعفونك



الشاعر محمود محمد العطواني

● قصيدة :- حي الله عباس

●أداء الرادود :- قاسم الحاج عاتي الساعدي
● كلمات الشاعر :- محمود محمد العطواني

■ تنفيذ
هيئة فاطمة الزهراء ع للعزاء المركزي
■ المكان
واسط - كوت - شيخ سعد

🔗 🔗

https://youtu.be/k4R-zBLcq0I?si=xx0EN0rDxRuNUoDT

ابن هند ابن بمجلسه
ودخلن اعليه النسه
صّدك بروحه ونسه

هاي بت ذاك الأبي
من نسل صه النبي

::
تكله يا نسل الرده
زينب انه وصامده
احوال ربعك شهاده

منهو بينه المنسبي
هاي بت ذاك الأبي

::
حتى لو بيدي الحبل
تخسه الك لا ما اذل
ما يرك بيه الحمل

عندي جيش امن العبي
هاي بت ذاك الأبـي

::
انه لبوة فاطمه
ربات حماي الحمه
لساني يشبه صارمه

بل كلافه اشبه ابي
هاي بت ذاك الأبـي

::
يا عديم المرجله
نصي صوتك شو عله
لا وحك البسمله

حسين احلفه بمعصبي
هاي بت بذاك الأبي

::
حسين لو مو بس نحر
يفزع ويمحي القهر
ويفزع وياه الكمر

لا مفر يل نـاصـبـي
هاي بت بذاك الأبي

::
انتَ ابن الطلقاء
وانه اصل الكبرياء
مو غريبه وهل سماء

موطني وبيها احتبي
هاي بت بذاك الأبي

::
قصرك وهذا العرش
بيه ما حرك رمش
انت ذباب الجرش

وانه بت طه الـنـبـي
هاي بت بذاك الأبي

::
هاي راية كافلي
بس احلفها بعلي
الشام تفنه وتبتلي

عرجه حار الطالبي
هاي بت ذاك الأبي

::
شوف قبضة ساعده
رغم كل ذاك السده
فدوه اندار ليده

دوم تفعل مطلبي
هاي بت ذاك الأبي

::
خولي اسئله وحرمله
عن فعايل كـربـلـه
عل الكمر محد عله

ساعة الشد معصبي
هاي بت ذاك الأبي

::
والله من غم الزمن
يوم خله اخت الحسن
لا عشيره ولا وطن

فوك تل الـزيـنـبـي
هاي بت ذاك الأبي


الشاعر محمود محمد العطواني

ميمر كربلائي للمشايه

يهوه الكلب ـ هذا الدرب
بي محله جادر ـ منصب

قد دقت الساعه الان ـ حي على المشايه

ـ
من الزغر جدمي تحب درب حسين
بي امشي أنه مدلل وانحط بالـعـيـن
ومحله المواكب بالدرب للماشين

يمطر شيم ـ صوت الخدم
بالعرب اهلاً ـ والـعـجـم

دربه ولا بي تفريق ـ كل احنه فرد الغايه

ـ
كل احنه اجينه وانجمعنه بدربه
واحدنه بالـمـشـايـه فرفح كـلـبـه
جي عدنه موعود بي نشوف الكبه

وتحضرت ـ وتحزمت
منك اجر ـ ثق ما ردت

منك اريدن مشاي ـ وفقني سنة الجايه

ـ
بـالـصـور ينفـخ عــالــدرب اسـرافـيــل
بوق المشي دكـ نمشي جن ماي يسيل
وكل عمره كضاه يمشي لحسين الميل

ميل العصر ـ يمشي ويفر
واباله اكو ـ غايه وامر

يمشي الزمن للموعود ـ يضهر يشيل الرايه

ـ
مثل اليضيع ويلكه اهله امن ابعيد
نتعنه الك نتشابگ ويـاك انــريــد
دربك حلاته جن حلات التجويد

مشاي الك ـ حتى المَلك
يمشي ويجود ـ مقتلك

ترابك تره يا مولاي ـ كشخه للمصلايه

ـ
تنمل تره العادات اذا تتكرر
الوادم تمل منها وبعد ما تحضر
بس دربك الما بي نقص لا يكثر

دربك بعد ـ شابع مدد
لا والله ما ينمل ـ ابد

وكل عام يابو السجاد ـ دكينه بالطف ثايه

ـ
مشايه لجلك يابو الاكبر جينه
شما نتعب يشد العزم مهدينه
وذيج المناير يا هله تنادينه

كل هله ـ وميت هله
مشايه كلكم ـ مرجله

والعلكمي اهلاً صاح ـ وبينه يرحب مايه



محمود محمد العطواني

من اول ما ينوي الزاير .. يلكه بدربه الموكب حاضر

كـل احنه بأمره وخدامه
من يتعب يلكانه احزامه

•.•.•.•.•

قبل لا يمشي احنه نخدمه واجب .. ولمن ينوي ننصبله المواكب
عگالي الزاير وبي افـتخر دوم .. واعله العگل ما تعله الحواجب

الـمـشاي اعتنه وكاصد العباس
يمشي بدمي مو عل كاع يا ناس
مو خطار ينحط تاج عـــل راس • وافرح من اشوفه


اعله دروب المشايه نباوع .. بلكي نعاين بيرغ طالع

والزاير نحـسب بــ ايامه
من يتعب يلكانه احزامه

•.•.•.•.•

يل حبك لعب بكليبي جوله .. موقف عندي انه ورايد اكوله
من النضره الاوله تعشك ناس .. واعشكتك انه امن الخطوه الاوله

احبك مثل حب الحسن للضيف
يا نـسـمـة بروده بعزت الصـيـف
تكطع همي جيتك كطعت السيف • يا عيني ونضرها


وما دام مسير خطاري .. بالموكب ما تخمد ناري

مو سفره انه انمد كدامه
مـن يتـعب يلكانه احزامه

•.•.•.•.•

بجيتك يا هلا ومرحب يزاير .. عل جهتين منصوبه الچوادر
بين الخدم صار مزاود اعليك .. واليحضه بخدمتك ضل يفاخر

اليمه تحط رحالك يفتخر بيك
اغاتي ويا بعد روحي يـسـميك
من ذيج الزياره لهسه اتـانـيـك • ارد احضه بخدمتك


بجيتك يل زاير هنالي • كمت اتلامع ويه ادلالي

والضيف انحطه اعله الهامه
مـن يتـعب يـلـكـانه احزامه

•.•.•.•.•

يزاير قادم اعليه امن اشوفك .. انته ورايتك اركض اطوفك
فرصه واستغلها خدمتك هاي .. تعبر موكبي لتضن اعفوك

مـا تـعـبـر اذا مـتـوجـب الزاد
مـن تـرابـك اخـذ رايـد مــراد
مره بكل سنه هل خدمه تنعاد • اشبع منها اريدن


يل زاير لمن تلفينه • جن موته وجيتك تحيينه

روحي اعـلـه الـزايـر محتامه
مـن يتـعب يـلـكـانه احزامه

•.•.•.•.•

يـل مـشـاي مـن تـجـبـل عـلـيـه • جن قران وكت المغربيه
ابوسن جفك وعل راس اخلي • لان بالدرب كايدته الزجيه

لجرح حسين بلسم هذا ممشاك
والـزهـراء هــم تــســيـر ويـــاك
وراح حـسـيـن بـالحـضره ايتلكاك • وبجيتك يرحب


بجف ناقص حييه المشايه • حي الله زلامي الوفايه

وحـسـيـن اتفاخر بزلامه
من يتعب يلكانه احزامه




الشاعر محمود محمد العطواني

حيدره باب العلم ••• والحسن باب الكرم

•••

العنده حاتم خل يضمه من نسولف عالحسن
كــل دواوين العـشاير يــم عـتـبـتـه يـنـحـنن
للغريب ابــن الـزجيه مستعد يــكــرم وطــن
وزاده لــو مــا بـي ملذه الـ بالسمه مــا وچرن

من زغر سنه الحسن ••• عالعزوبيه انفطم
حيدره بـاب العلم ••• والحسن باب الكرم

•••

نــار كـُسـرى بـنـاره ضـاعـت يـوم فَوّر دلته
وراحت الضيف اليطبله عنده اعز من چبدته
قمه جان امن التواضع دوم جانت عادته
موش متصدر مضيفه بيده يفرش سفرته

العنده حاجه وطب اله ••• ابد ما يوم انهضم
حـيـدره بـاب الـعـلـم ••• والحسن باب الكرم

•••

عل الحسن عدهم روايه تناقلوها اهل الدجل
بالفروسيه اعله كــده وجان مــو كلش بـطـل
رايد اسئلهم واكـلــهـم للسؤال انطوني حــل
منهو يا ناس الي طاعن بالرمح ذاك الـجـمـل


ياهو مثله بـهل الخلگ ••• هذا ابن سِيد الامم
حـيـدره بـاب الـعـلـم ••• والحسن باب الكرم

•••

خرسه كل الدنيه تصبح لمن يدك هاونه
وكلمن يطب لمضيفه يصير اعز امن الضنه
العرب ثلث ايام جانت ضيفها ينام بهنه
والحسن يتمنى ضيفه يبقه بمّضيفه سنه

اجبال يطحن هاونه ••• ومـوگـده بـنـار انـضرم
حـيـدره بـاب الـعـلـم ••• والحسـن باب الكرم

•••

يـرعـب وجـانـت صـفـاتـه كلها تشبه والــده
واسمه لو واحد يذكره ترجف كلوب الــعــده
جان مو بس حطب يشمر حتى روس بموگده
وغصبان اعليهم صفاته بكل كتبهم خــالــده

ومن بعد حامي الحمه ••• صار اهو والي الحرم
حـيـدره بــاب الـعـلـم ••• والحسـن باب الكرم



الشاعر محمود محمد العطواني

هذا الحسن ـ شيخ الكرم
و يا دلتــه ـ تضاهي الهرم

هذا الحسن هذا الحسن
ـ

هذا الحسن من ينذكر طاريه
اجــلالاً ادنـكـلـه الـعـزوبـيـه
ودلاله حاشه بيوم ما مجـفـيه
ولو تنجفي تميل الكره الارضيه

يــا هـاونــه ـ كل ما يدگ
اهل الشرك ـ بي تنسحگ

هذا الحسن هذا الحسن

ـ

للكرم يل سويت صـيـت وسـمـعـه
ونلكه البخت بمِضِيفِك امن نضيعه
تتلكه ضيفك ركض مـثـل الـفـزعـه
وقــانــون العزوبيه انــتــا مـشـرعـه

عـنـدك كـرم ـ ما ينوصف
وعندك بخت ـ بي ينغرف

هذا الحسن هذا الحسن

ـ

نقطه ابحر صيت العرب يم صيته
تفـرغ الـجـنـه وحـاشـه يفرغ بيته
تارسها بالغيرة الحـسـن صـينـيتـه
شيخ الكرم اهل الوفه مـسـمـيـته

من الحسن • جا والنعم
سبط النبي • ويكفي الاسم

هذا الحسن هذا الحسن

ـ

يل علمت عباس من عـنـادك
وانطيت كل الناس من مرادك
محشي بدراهم يل تقدم زادك
ولجل ابو اليمه عزبت بـاولادك

يل قاسمك ـ وجه الشمس
عـزبـتـه بهدوم ـ الـعــرس

هذا الحسن هذا الحسن

ـ

ما فرغ بيتك يـوم مـن الـخـطـار
خيرك الواصل دوم حد لسابع جار
ويعزب بـحـيـلـه ابو الراس الحار
حاتم الطائي كبال صيتك محتار

من موگدگ ـ غارت صَقر
نــارك تــره ـ تـسـر النضر

هذا الحسن هذا الحسن

ـ

عندك كرم وهواي بي جم عبِره
ما ترضه الك مولاي نرفع حضره
وتكول زحمه شلون من الزهره
ولهسه كلبك بي صواب العصره

يا لوعتي ـ ويا لوعتك
اللهَ يساعد ـ حالتك

هذا الحسن هذا الحسن



الشاعر محمود محمد العطواني

مــن النوك نــزلـن كــون بـهـداي
خــاف تطيح وحده وتلچم اعضاي

لجن من كربت اعله كبور السباع
شمرت روحها امن الناكه عل كاع

•••.•••.•••.•••.•••.•••

قبل لا توصل الطف سوت ام عون اويه النسوان كعده
وكالت يا بنات حسين لـحسين هــاي الـروحـه شــده
شـويه شويـه نزلت مـن على النوك خاف تطيح وحده
صح ميـت لجنه لهسه الحسين دمــه يـفــور بــعــده

تره الما عدها اخو امن الهّزل تطيح
وبيها تـعـيــل بـاجـر نـسـمـة الريح

الـتنزل لازم يـسـنـدوهــا بــذراع
شمرت روحها امن الناكه عل كاع

•••.•••.•••.•••.•••.•••

جروح حسين كثره وكلمن تطيح بيهن خاف تلچم
من عالناكه تنزل كون بهداي واعلى اسـمـه تسلـم
وليلى تروح للاكبر تحاجي تـكض تــرابــه وتــشــم
وتعلگ رمله شمعه ابين الكبور وتنوح اعله جاسم

وعبدالله امه ويـا تحجي بـعــتـاب
حضن امك احن من حضن التراب

يرضع كالت ابني وهـل وكت جاع
شمرت روحها امن الناكه عل كاع

•••.•••.•••.•••.•••.•••

مـــن نـاكـه لتـطيحن عـلـى الكاع للـنـســوان كـالـت
لكن شو قبل من ما توصل حسين من عل ناكه طاحت
ثاري الملكه حار ويـاخـذ الروح اويـه الـخـوان صاحت
وتره الما مالت بقصر اللعينين اعله كـبر حسين مالت

فــوك حسين طاحت من على النوك
اجت عل قصر تشكيله وعلى السوك

تغرك بالدموع الـتـفـكـد شــراع
شمرت روحها امن الناكه عل كاع

•••.•••.•••.•••.•••.•••

كضتيه وچواني ترابك الحار من طحت اعله كبرك
محد راش فوكك ماي يحسين وبلكت يروي صدرك
وبطول الدرب كلما يجي الماي تصد عيني اعله نحرك
عن ثغري ابعده وما ادنيّ الـمـا يـدنـه اعـلـه ثغرك

اشربه شلون جتال اخوتي الماي
ونار الخيم لسه تچوي بـحـشاي

وتدور بـقـت عل خـنـصـر الضاع
شمرت روحها امن الناكه عل كاع

•••.•••.•••.•••.•••.•••

من تراب كبره تـحط عـلــى الــراس وتكله بأذيه
ها يل امنت عـندي العزيزات ومنطيني وصــيــه
ذابحني الخجل جيتك يمذبوح واتمنه الــمــنيـه
ضعنك جبته يم كبرك يمسلوب بس ناقص رقيه

بس اخذ الوعد يا شيخ الزلام
مابقيها ابـد وحدها بـالـشـام

وللشام اخذت وياها البجي امتاع
شمرت روحها امن الناكه عل كاع



الشاعر محمود محمد العطواني

مثل ما طيحت خيمة العباس
طيحنه الجوادر وانحنه الراس

خلصت اشرف ايام • الله يعين الخدام

.،•.,•.,•.,•.,•.,•.,•.,•.,•,.

سدينه المواكب • رد واحدنه شايب
وبكثر المشو ينزل دمعنه
مكسورين خاطر • طـيـحـنـه الجوادر
والجادر مثل ما طاح طحنه

ايـــام الكرم والـ يا هــلا خلصت
وعـل خدام جن لمح البصر مرت
امـن الزوار وسـفـه كربلاء فرغـت
وبالمدمع تره عيون الخدم غركت


مامش زاير امن تـديـر الــعــيــون
وحشتها الخدم جن وحشة ام عون

جانت متحزمه حزام • الله يعين الخدام

.،•.,•.,•.,•.,•.,•.,•.,•.,•,.

ردينه لاهلنه • بالحسره رجعنه
والخدام تتمنه المنيه

الله شمصيبه • بنص اهلي وغربيه
روحي تحس تره بكل مغربيه

من كد المدامع طيحت رمـشـي
بعد زوار مامـش بالدرب تـمـشي
ضعت بلا خـدامـه وتيهت كلشي
الموكب كون يبقه وينرفع نعشي


كون تراب فوك الروس ينهال
بـعـد يـا زاير اتفـضل متنكال

تضل عل زاير تحتام • الله يعين الخدام

.،•.,•.,•.,•.,•.,•.,•.,•.,•,.

لداري من اردن • منگب وابقه اونن
ارد من دفنت امي جني راجع

من ليلي لنهاري • المدمع يبقه جاري
الليله الاوله بيها شكد مواجع

طويله الليله الاوله التعگب الخدمه
لـيـلة وحـشـة لازم هيجي تتـسـمـه
يخنكنه الـهـوه بـهـل ليله الـ انشمه
الـخـادم منفجع مـن هامته لجدمه

وحــك الشتموها بقصر وبسوك
مثل ليلة العاشر صدري مخنوك

بيهم نيران خيام • الله يعين الخدام

.،•.,•.,•.,•.,•.,•.,•.,•.,•,.

احله ايامي خلصت • ونار بكلبي شبت
ولو شب الكلب ما تطفه ناره

دمعي يهل عماني • ولازم عام اتاني
يـلا يـرد مـحـرم والـزيـاره

اعله احر من الشمس راح ابقه متنطره
قميص حسين فـاطـم بالسـمـه تنشره
يـمـتـه الـعـشـره الاوله ترد واضل اقره
مـا نـنـسـاه وعــد مـنـطـيـن للــزهـره

شـوكت يـا لـيـلـة السابع تردين
واذكر بيج كسرت ضهر الحسين

تناطر من عام لعام • الله يعين الخدام

.،•.,•.,•.,•.,•.,•.,•.,•.,•,.

يرف مثل الحمامه • كلبي اعله الخدامه
وتطيح شما نبض من عيني دمعه

خلصـت يا حرمات • ايـام الـعـزائـات
اباب الهيئة راح اشعلي شمعه

دمعي ودمعت الشمعه سوه ينزلن
وموش بضهري بدموعي الكسر بين
ايـام الـمـجـالـس واللـطم خـلصن
بـعـد رادود مـاكـو ويـاه اون لـو ون

شـيـجـيـبك بـعـد يهلال عاشور
ضهري وخاطري وكليبي مكسور

كامت تلطم عل هام • الله يعين الخدام



الشاعر محمود محمد العطواني

(موطني يابو علي)


اشكرك يابو علي خليـتـني احضه بخدمتك
وخلـصت ايامك لجن بالروح ضلت لوعتك

••
خلصت ايامك لجن مولاي حزنك ما خلص
وكلبي عل ون واللطم والنوح لمصابك حرص
موش بس هذا الدمع لحسين حتى الدم رخص

بجال خل خدمه اصبحت انسان راقي بصايتك

••
بجال هل خدمه اصبحت انسان راقي ومحترم
وغير حـبك بـالـكـلـب مولاي كل حـب ما رهم
وريـت شُـلـت يمـنـتـه الـعـلـيك ما ناح ولطم

وكلشي منك ما ردت بس رايد اشتم نسمتك

••
كـلـشـي منـك ما ردت يحسين لكن ارتجي
بخدمتك كـون انـرزق مـولاي بالعام اليجي
ومن جهنم ادري انه خدمتك باجر مخرجي

النار ما توصل اله كلمن اليدخل خيمتك

••
خيمتك يل مـنـذبح للروح مـلـجـأ صـايره
وخيمته تشافي العلل عباس سبع الكنطره
وعيني الكم بالـدمـع والنوح ضلت ساهره

واجر منك ما ردت مولاي رايد نضرتك

••
نضرتك يابو عـلـي بـيـها اوصـل لـسابع سمه
كـلـها رفعه ومـنـزله نـضرتك يـابـن فـاطـمـه
وهل العشك من عابسك مولاي ثق مستلهمه

عشكك بـ كلب المحب يحسينه بكد رحمتك

••
رحمتك ما تنوصف مـولاي فـاقـت كل عقل
امن اهد ما خادم صرت لليوم ما مال الحمل
بوجهي بابك منفتح الـكـاه شـمـا بالدنيه ازل

ويوم رحمه ومغفره مولاي يوم زيارتك


••
زيارتك بـيـهـا الدرب بالدمع والـون ينفرش
يل قريب اعله الكلب جن قرب عين اعله الرمش
شيخ عند اهلي ولجن ويـاك كلبي يذب جرش

كبر بالدنيه شكثر يحسين شاني بعشرتك

••
صحت مسك الخاتمه وياك بي ما فكرت
لان حساب للحشر وياي تبقه بكل وكت
وابقه عايش سيدي والله لو خادم متت

ما يموت اليخدمتك فوكاه ترفرف رايتك



الشاعر محمود محمد العطواني

اخافن لا اموتن بـالسنه الجايه
وما اخدمنك وما امشي مشايه

•••.•••.•••.•••.•••.•••

احلفك بالمشت عـالهزله مـسبيه
اريدن فضلك يضل كل سنه اعليه
انه الــكل عام اخدمك بيه ما بيه

وما انساك لامك منطي الحجايه

•••.•••.•••.•••.•••.•••

شاني ارفعته من دموعي طاحتلك
وعشت عيشت ملوك بساعت اخدمتك
ومثل ذيجه السنه يحسين من كتلك

طوّل عمري حتى اقرالك قرايه

•••.•••.•••.•••.•••.•••

طوّل عمري مو طمعان بالدنيه
ولا خاطر تشم هذا الهوه الريه
اريدن كون الك احضرلي لطميه

والطم والمدامع تنزل هوايه

•••.•••.•••.•••.•••.•••

طوّل عمري لجل الخدمه بالموكب
ولـزوارك اوكــف سـيـدي مـعــزب
بالعام اليجي عطـرك اريـده ايـهـب

واشتمه اريدن واحزن برايه

•••.•••.•••.•••.•••.•••

صحت من مجلسك ماريد تحرمني
وبالعام اليجي يــحــســيـن وفـقني
لـعـزائك يابو الاكبر هـم تـحـزمـنـي

واترف كون بيدي بكل سنه الرايه

•••.•••.•••.•••.•••.•••

خايف لو اموتن مـن يـدفـنـونـي
بلون ابيض يحيف اهلي يچفنوني
وانه المتعود اسود دوم الك لوني

مو من موتي خايف خوفي من هايه

•••.•••.•••.•••.•••.•••

اعرف لو اموتن انتا تـحـضـرني
ومن عيني البجت لجلك تقبلني
ومثل لزمة رقيه ادريك تلزمني

ولـ جنة عدن تتمشه ويايه



الشاعر محمود محمد العطواني

ميمر كربلائي

من صيت خدامك دوم • ما شفنه يحسين اعله

••
مهما كبر شاني ومقامي وصيتي
خـادم الك ابـقـه واضـل امنيتي
يحسين يـل عـامـر بخيرك بيتي

يتمنى صـيـت الـخـدام • حـتـى المَلك يوصـله

••
دكتور عالي المستوى يتسمه
لكن ابد مو بالتخصص همه
مو بالشهادة اتباهه لا بل خدمه

لو يصبح بـروفـيـسـور • كـلـمـة الـخـادم احله

••
شيخ العشيرة هوايه صح مقدر
بس شانه بالخدمه يزود ويكبر
صيت الخدم منه اعله لا تتصور

خادم ابا عبد الله • محلاها هاي الجمله

••
والضابط شما رتبته اعله امتونه
موش احترام الوادم يخافونه
بس بالخدامه راح يحترمونه

بالـرتــبـه ما تفخر لا • بالخدمه تفخر اهله

••
اليدرس فقه ومضحي عمره لدينه
نور العلم لا مـا يـشـوفه بـعـيـنـه
الا اذا يـلـطـم لـجـرح حـسـيـنـه

بلا خدمه لو مرجع جان • دين الله ما يندله

••
شما تكثر امواله يناس التاجر
يعتبر من دون المجالس خاسر
اكبر ربح بالخدمه من يفاخر

والخادم العز والجاه • بين الخلگ لايكله

••
ولا مـاكـو داعــي نـعـرج اعـلـه الفـقره
اهـل الـشـرف واهـل الـكـرم والـفـطره
اويه حسين عدهم عشِره مو بس عشره

وياهم حسين يعيش • بماي الوجهه يتجله



الشاعر محمود محمد العطواني

وزن عكيلي


يا بويه فراكك هد حيلي

••
يــا دين الله ونهجه ونوره
وحـشه ابلياك المعموره
خلاني فراكـك مـكـسـوره

واعليك انحب صبحي وليلي
يا بويه فراكك هد حيلي

••
يا قـران الــبــاري الاطـهـر
يـتـمـت بـفـركـاك الـكـوثر
وي كل دمعه اعليك اتحسر

وبيت احزان اعليك ابنيلي
يا بويه فراكك هد حيلي

••
بـويـه الاذان امـن يـأذن
يذكرون اسمك وكليبي يحن
وحيدر وياي اعليك يون

وسفه اتـيـتمنه يناديلي
يا بويه فراكك هد حيلي

••
فكدك كاسر خاطر حيدر
منهد حيلـه الـقالع خيبر
يهتف كسرك ما يـتـجـبـر

تبجيلك عينه وتبجيـلـي
يا بويه فراكك هد حيلي

••
ولدي اعليك تنوح وتنحب
كامت من هسه تون زينب
وضهري بفكدك مال وحدب

وخـلافـك ولدي اتچيلي
يا بويه فراكك هد حيلي

••
اعليك الحسنيّن شكد ناحو
جـداه مـتـانـيـنـك صـاحـو
وي امهم نفس الهم شافو

وغير الهم لا ما باقيلي
يا بويه فراكك هد حيلي


••
جـانـت بـيـك الـدنـيه مـنـوره
بس صارت ضلمه اعله الزهره
وعكبك هجمـت ذيـج الـزمـره

ومن هجمت كطعت ترتيلي
يا بـويـه فـراكـك هـد حيلي

••
لا ما ناشف بـعـده اترابك
وعود اليتسمون اصحابك
حـركـو كلبي وحركو بابك

بعدك نيران محضريلي
يا بويه فراكك هد حيلي

••
هجمو يا بويه ومن هجمو
نيران بـدار الـعـز شـعـلـو
ويضرب متني بقنفذ امرو

ريتك موجود تحاميلي
يا بويه فراكك هد حيلي

••
صحت بساعت سطرت عيني
ويـنـج يا فـضـه تـسـنـديـني
بـسـمـار بضلعي ويـاذيـنـي

والمحسن طايح يا ويلي
يا بويه فراكك هد حيلي



الشاعر محمود محمد العطواني

لتغمض عينك وتهاجر ما احمل فركاك
لا اكدر اصبر عل فركه ولا اكدر انساك

يهتف دمع العين • مثلك الكه منين

••
يل بحضنك ربـيت وكـبـرتني انته
شلون اكبالي متمدد واضل سكته
موش دموعي فص العين طيحته
اعله اهل البيت والله بيت هدمته

ما ترهملي الضحكه اخلافك يرهم بس النوح
حلفتك بالعشره الحلوه يمنه ابقه ولتروح

يخلص عمري ونين • مثلك الكه منين

••
رايح مـنـي ومـخـليلي بـس لوعه
نوحت بيتي ضلت دوم مـسموعه
بجي المفجوع كلما تنعه مفجوعه
وحسين امن اذكرك يلزم اضلوعه

لا تـرحـل خـلـيـك ابكالي يـهـتـفلك جـداه
من كل كلبه بحسره وتوجع طلعت كلمة اه

ها يا جد حسين • مثلك الكه منين

••
جفوفي شلون تكدر تترك جفوفك
وتدري بفاطمه ما تكدر تعوفك
تحس الدنيه وحشه انجان متشوفك
كلي شلون تتعود على اطيوفك

بنتك متعوده اعله عيونك موش اعله الاحلام
وما تكدر هيه تنام اصلاً اليبجي شلون ينام

بهل حال الله يعين • مثلك الكه منين

••
يـبـن عـمـي واخوي وعـازتـك عـازه
ماضل حـيل عندي لـشـيـل الجنازه
مـيـت يـنـحـسب الـيـفـارك اعـزازه
وداحي الباب ضل يمشي اعله عكازه

كسار الروس الما تنزل عكبك كض صفاح
دافن واحد يسوه الدنيه كلي شلون ارتاح

منك ماكو ثنين • مثلك الكه منين

••
يل اعتبرك ابو مو بس فقط خوه
فـراكـك حـيراني بحالتي شسوه
ابو الكلب الحنين بفكدك تچوه
كـبرك من دموعي ترابه يتروه

يل رايـح يـتـمـنـي فراكك خـلانـي بـلا راي
جرحك وسط كليبي وباقي ويكبر راح وياي

ابجي اعليك سنين • مثلك الكه منين



الشاعر محمود محمد العطواني

تدري بنتك بويه شنهي اخبارها
فزعـت اعليها العصابه بـنارهـا

🔗🔗🔗🔗🔗

صحت وا ويلاه اه يا والدي
حيره من يا سوط وياك ابتدي
تدري بيه اخلافك شسوه الردي
الكال عنك تهجر اعلي يعتدي

بويه ريحانتك حــركــوا دارها
فزعت اعليها العصابه بـنارهـا

🔗🔗🔗🔗🔗

علينه تدري الضيم بويه شكد سده
والمصايب هـــاي مــن اهل الـرده
الله لا يـنـطـي سـقـيـفـــة سـاعـده
منها ذبح حسيـن وعــيـالــه ابـتـده

والهزل والسوك من افـكـارهـا
فزعت اعليها العصابه بـنارهـا

🔗🔗🔗🔗🔗

بعده بيه صوابك الما ينجرع
وفزعوا اعليه الي ما بيهم سبع
اعليه يا بويه اندفع ذاك الجذع
وفوك كسري اعليك كسرولي الضلع

ومني يا بويه العده اخذت ثارها
فزعت اعليها العصابه بـنارهـا

🔗🔗🔗🔗🔗

بموتتك يا حيف هل دين انعدم
واعله اهل البيت جم غادر هجم
تصيح ربعك يال ثـارات الـصـنـم
نحرك الباب وغداً نحرك خــيــم

والوصيه الگيدت صـكـارهـا
فزعت اعليها العصابه بنارها

🔗🔗🔗🔗🔗

ويه كل غروب ابـقـه اعليك احن
بفركتك ضل دوم يرهملي الحزن
ومنعت الانذال بويه اعليك اون
الله لا يـنـطي ابو كـلـمة (وأن)

والسياط اعله الـمـتن اثـارهــا
فزعت اعليها العصابه بـنارهـا

🔗🔗🔗🔗🔗

ويلي صحت بصوت يا بعد النضر
بين باب وحايط ولـيـدي انـعـصـر
ومن بـعد عـيـنـاك يبرالي الـقـهـر
وراح الحكك هيه حسبت جم شهر

وسر كبر بتك بقه امن اسرارها
فزعت اعليها العصابه بـنارهـا



الشاعر محمود محمد العطواني