#እውነተኛ ነፃነት #በራስ ላይ #የሚቀዳጁት ነው እሱም #እራስን መግዛት ነው ።

• ብዙዎቻችን በራሳችን የስሜት ወጥመድ ተይዘናል ። የዓለሙ የእንቁልልጭ ወጥመድ ሳያንሰን የገዛ ራሳችን የትየሌለ ፍላጎትና የደመነፍስ ምሪት መሄጃ አሳጥቶን አላላውስ ብሎናል ። ስሜታችንን እየተከተልን ፣ ደመነፍሳችን የነገረንን እያመንን በስሜት ፈረስ ያለ ልጓም ወደ ፊት እንጋልባለን ። ቆም ብለን ለማሰብ ጊዜ የለንም ። ተረጋግተን ለማስተዋል ፍቃደኞች አይደለንም ። ኑሯችን ሁሉ የጥድፊያ ነው ። የችኮላ ህይወት ዕረፍት የሌለው ኑሮ መንጋው ሲጋፉ እንጋፋለን ፣ ሲተራመስ እንተራመሳለን ፣ ዞር ብለን ለማየት የቆምንበት አቅጣጫ ለማስተዋል ለራሳችን እድል አንሰጠውም ። ሰው ስለሄደ እንሄዳለን ፣ስለጮኸ እንጮሀለን ስላጨበጨቡ እናጨበጭባለን ፣ተከታዮች እንጂ የራሳችን መሪዎች ለመሆን አቅም አልፈጠርንም ።
• የእግራችን እርምጃ አንቆጣጠርም ፣የዳናችንን ምልክት ዞር ብለን አናይም ። አሻራዎቻችንን ልብ አንልም ፣መንገዳችንን ለይተን አንመርጥም ፣ዓይኖቻችን ያያሉ እንጂ ወደውስጣቸው አይመለከቱም ። ጆርዎቻችን ይሰማሉ እንጂ ራሳቸውን አያዳምጡም ። እጆቻችን ሌላውን ይዳስሳሉ እንጂ ራሳቸውን አይነኩም ። የምናሸተው የውጪውን ዓለም የሚሰነፍጥ ሽታ እንጂ የራሳችንን የክፉ አስተሳሰብ ጠረን አይደለም ። ስሜቶቻችን ሁሉ ከውስጥ ወደ ውጭ እንጂ ወደ ውስጥ አስሙንም ። ራሳችንን የዘነጋን ፣ ውስጣችንን ችላ ያልን እልፍ ነን ልባችንን ያላዳመጥን የውጭውን ዓለም ጩኸት ያጠፋን ሺ ነን ብዙዎቻችን ነፍሳችን ተርቦ መንፈሳችን መንምኖ ህሊናችን ጎድሎ ለስጋችን አምሮት ለስሜታችን ምኞት አላይ ታች የምንል ከንቱዎች አይደለንም ???
• ሰው ከራሱ አጉል ስሜት ነፃ ካልወጣ የደመነፍሱ ባሪያ እንደሆነ ዕድሜውን ይፈጃል ። ለፍላጎቱ ልጓም ካላበጀለት ራሱን በራሱ በእግር ብረት ያሰረ የራሱ እስረኛ ይሆናል ። የብዙ ሰው ጠላቱ ያልተገራ ስሜቱ ነው ። የብዙ ሰው ጌታው የተለጠጠ ፍላጎቱን አደብ ማስገዛት ያልቻለ በራሱ ላይ ነፃነትን ያላገኘ የደመነፍሱ ምርኮኛ ነው ። ህይወቱን ለስሜቱ አስረክቧል ። ላልተገራ ደመነፍሱ እጅ ሰጥቷል ።
[ ] አለቃ ገብረሀና ስሙ ደስታ የሚባል የሚስታቸው ውሽማ ነበረ አሉ ። ይሄው ደስታ የተባለ የሚስታቸው ውሽማ የሞተ ቀን አለቃ በስሙ አስመስለው ደስታዬ ደስታዬ ብለው ደስታቸውን በለቅሶ ገለጡ ይባላል ።
• ጉዳዩ አስቂ ቢመስልም ብዙዎቻችንን ገላጭ ነው ችግራችንን በጊዜው በአጭሩ ከመቅጨት ይልቅ ደባብቀንና ሸፋፍነን እናነባለን ። አብዛኛዎቻችን በሰው ሀዘን የራሳችንን ሀዘን እርም የምናወጣ፣በሰው ደስታ የራሳችን ደስታ የምናሳይ ለራሳችን ውስጣዊ ደስታ ጊዜ የሌለን አይደለንም ?ለቅሶ ቤት ብቻ ስንሆን ስለህይወትና ስለሞት እናስባለን ፣ለራሳችንም ለሟቹም እናለቅሳለን ። ከለቅሶ ቤት ስንወጣ ግን ሁሉን ዘንግተን በአጣዳፊው የስሜት ኑሮ እንቀጥላለን ። በቁጭትና በፀፀት ዘወትር የምንቃጠል ፣ በእቅድ የማንመራ በደመነፍስ ህይወታችንን የምንመራ በመሆናችን ነገሩ ካለፈ በኋላ ነው ብዙ ነገሩ የገባን የሚያንቀለቅለንን ስሜታችንን አደብ ማስገዛት ባለመቻላችን ከተጎዳን በኋላ ነው ሁሉም የሚገለጥልን የትየሌለ ፍላጎታችን ውድ መሆናችን የምናውቀው ከከሰርን በኋላ ነው አብዛኞቻችን ሳናስብ የምንኖር ህይወት በቀደደልን ቦይ ብቻ የምንፈስ በስሜታችን ጎርፍ ተጥለቀልቀን ወደማናውቀው የምንነጉድ ከንቱዎች ነን
• አዎ ደመነፍሱ የሚያሯሩጡ ወደየት እንደሚሄድ አያውቅም ፣አቅዶ አስቦና ወስኖ ሳይሆን የስሜቱ ወጀብ በወሰደው ነው የሚመላለሰው ። ስሜታዊ ሰው አስቦ አይደለም ምንም ነገር የሚያደርገው በደመነፍሱ ግፊት አላስፈላጊ ድርጊት ከፈፀሙ በኋላ ነው የሚያስበው ማሰቡን ያላስቀደመ የስሜቱ ባሪያ ነው ስሜት ሰውን ወዳልተፈለገ መንገድ የሚመራው ስሜቱን መምራትና መቆጣጠር ሳይችል ሲቀር ነው ። ስሜት ሰውን በቁጥጥር ስር ካደረገ ያ ሰው ራሱን መቆጣጠር ወይም መግዛት አልቻለም ማለት ነው ።
• ወዳጄ ሆይ ራሱን የገዛ ራሱን ነፃ ያወጣል ። እውነተኛ ነፃነት በራስ ላይ የሚቀዳጁት ነው እሱም ራስን መግዛት ራስህን ነፃ በወጣው አንተነትህ ዓለሙን ዋጀው ዓለምህን ግራው ። ዓለሙ ያንተ አስተሳሰብ ውጤት ነውና አስተሳሰብህን ካሳመርክ ዓለምህን ማሳመር ትችላለህ የማንነት ስኬትህ ታይቶ የሚጠፋ ሳይሆን ለትውልድ መነሻ የሚሆን ቀሪ ሀብትህ ይሆናል ። ድልህ በራስህ ላይ የተጎናፀፍከው በመሆኑ ውጫዊ የህይወት ድልህ ያን ያህል የሚከብድ አይሆንም ከባዱ ውጊያ ከራስ ጋር ነውና ቀድመህ ጦርነትህን አሸንፍ ሌላው ቀላል ነው ።
የራስ አስተሳሰብ ባለስስጣን ፣የስሜትህ አዛዥ የፍላጎትህ ጌታ ሁን በራሱ ላይ የሰለጠነ ራሱን አዳነ ስሜቱት መጠነ
[ ] መልካም ቀን ይሁንላችሁ