كُلما تكبر بعد
كُلما الطرق اللي رسمتها انت وصغير والخطط اللي خططت الها تحت مبدأ "من أكبر" بدت أصعب واعقد من ما جنت متخيلها ،
بس لاتستسلم أتمنالك تبقى بالروح الطفولية اللي راغبة بتحقيق هالخطط وتسلك هالطرق مهما جانت صعبة ..

..

اتمنالك الأنتصارات بالحروب اللي داتمر بيها بحياتك وماحاجيها لأحد ..

لا شنو انا أتعامل بأحسن معاملة ودلال من مقربيني:

محتاجة اكون بمزرعة بعيدة عن الدنيا كلها وكل هالعالم
واستبدل بيها التلفون بالكتب والزرع والناس اللي حولية بالحيوانات والماي يمي،
كـ نوع من أنواع العلاجات النفسية لحد ما اتحسن واحس نفسي قادرة أواجه هالدنيا من جديد ارجع ..

انا اعرف الأغاني ذنب
بس والله صوت أصالة واغانيها ماتتقاوم💕 ..

بكل هدوء ماتبالغ
اللي ينطيك كلمة حلوة ردله بكلمة حلوة،
اللي يطلب نصيحتك انطيها،
اللي يتقدملك خطوة تقدمله خطوة مثله،
اللي حابب وديحاول يكون وياك كون وياه وقدر محاولته،
واللي حابب يبعد ساعده،
تذكر أنك لاتنطي أي شي بشكل مبالغ عنه لأن دائمًا راح ينقلب هالشي ضدك بعدين ..

بس للأمانة
هالشي مايشمل مقربيني
لا دائمًا يكونون داخل دائرتي اللي ممكن اقدملهم روحي وعادي عندي
من اعرف بيهم يستاهلون طبعًا ..

__

"رُبما الأمر بهذه البساطة
لاتَبحث عن الطمأنينة
تصالح مع قلقك" .

💕!

ما لا يعلمه عني الرفاق
ان لمن اقفل موضوع أو ابطل احجي بفد سالفة معينة تخصني فجاة مو معناها مارايده احجيلهم
السبب الحقيقي انو اكره الملحة واحس لو بقيت احجي بيها الكدامي راح يبدي يمل ويستثقل الحجي وياي ،
مع العلم انا مستعدة اسمع ناسي لنفس الموضوع الف مرة بدون ملل
بس انا سوالفي راح تلگيني افتح وياك الموضوع مرة وحده بس وراها اقفله حتى لو بداخلي يريد يحجي بي بعد احجيه ويه نفسي لأن راسًا يجيني إيعاز انو كافي يابنت بديتي تلحين واسحب واسد سالفتي بهدوء ..

هي ثلاث شغلات:
نتركها على الله
نتوكل عليه
ونسعالها ..

هو السر كله
بالمحاولة اللي يبذلها المقابيلنا علمودنا
وبس هيج ..

__

أقوى اللحظات سحرًا وإعجازًا
هي لحظة تمرُّ على الإنسان، يقف فيها أمام نفسه -لأول مرة- وقفة حسمٍ وعدلٍ ورحمةٍ، ويؤمن فيها -كما لم يؤمن من قبل- كم أنه جميل أكثر مما كان يظن، وجدير بأكثر مما كان يقنع

بعدها؛ لا يعود الإنسان أبدًا كما كان

-اسلام النادي.

_

باوعت للخلف شوي
لگيت انو ماضي هالسنة بالذات مليان إنجازات
حتى وأن جانت بسيطة وغير ملحوظة ولا أحد اله الفكرة عنها وشايفها وسامعها،
بس هي لو تدرون شكد بالنسبة الية إنجازات عظيمة لروحي✨ ..