انا اعرف الأغاني ذنب
بس والله صوت أصالة واغانيها ماتتقاوم💕 ..

بكل هدوء ماتبالغ
اللي ينطيك كلمة حلوة ردله بكلمة حلوة،
اللي يطلب نصيحتك انطيها،
اللي يتقدملك خطوة تقدمله خطوة مثله،
اللي حابب وديحاول يكون وياك كون وياه وقدر محاولته،
واللي حابب يبعد ساعده،
تذكر أنك لاتنطي أي شي بشكل مبالغ عنه لأن دائمًا راح ينقلب هالشي ضدك بعدين ..

بس للأمانة
هالشي مايشمل مقربيني
لا دائمًا يكونون داخل دائرتي اللي ممكن اقدملهم روحي وعادي عندي
من اعرف بيهم يستاهلون طبعًا ..

__

"رُبما الأمر بهذه البساطة
لاتَبحث عن الطمأنينة
تصالح مع قلقك" .

💕!

ما لا يعلمه عني الرفاق
ان لمن اقفل موضوع أو ابطل احجي بفد سالفة معينة تخصني فجاة مو معناها مارايده احجيلهم
السبب الحقيقي انو اكره الملحة واحس لو بقيت احجي بيها الكدامي راح يبدي يمل ويستثقل الحجي وياي ،
مع العلم انا مستعدة اسمع ناسي لنفس الموضوع الف مرة بدون ملل
بس انا سوالفي راح تلگيني افتح وياك الموضوع مرة وحده بس وراها اقفله حتى لو بداخلي يريد يحجي بي بعد احجيه ويه نفسي لأن راسًا يجيني إيعاز انو كافي يابنت بديتي تلحين واسحب واسد سالفتي بهدوء ..

هي ثلاث شغلات:
نتركها على الله
نتوكل عليه
ونسعالها ..

هو السر كله
بالمحاولة اللي يبذلها المقابيلنا علمودنا
وبس هيج ..

__

أقوى اللحظات سحرًا وإعجازًا
هي لحظة تمرُّ على الإنسان، يقف فيها أمام نفسه -لأول مرة- وقفة حسمٍ وعدلٍ ورحمةٍ، ويؤمن فيها -كما لم يؤمن من قبل- كم أنه جميل أكثر مما كان يظن، وجدير بأكثر مما كان يقنع

بعدها؛ لا يعود الإنسان أبدًا كما كان

-اسلام النادي.

_

باوعت للخلف شوي
لگيت انو ماضي هالسنة بالذات مليان إنجازات
حتى وأن جانت بسيطة وغير ملحوظة ولا أحد اله الفكرة عنها وشايفها وسامعها،
بس هي لو تدرون شكد بالنسبة الية إنجازات عظيمة لروحي✨ ..

مادري عنكم
بس احسها قلة حية لمن أضهر فرحتي كدام وبمحادثة شخص حزين ،
وماحب أضهر حزني كدام وبمحادثة شخص فرحان احسها كئابة وممكن اكسر بفرحته بهالتصرف،
وماحب احجي عن فرحتي ويه شخص هو فرحان احس لازم اتركله هو هالمساحة يحجي ويعبر عن فرحته أهم مهما جانت بسيطة،
وماحب احجي عن حزني عند إنسان هو أيضًا حزين لأن اگول اللي بيه مكفيه مو ناقص همّ بعد،
لهذا الكتمان عن مشاعرنا كدام الأشخاص جان ولازال الحل الوحيد لكل هالمواقف وبسبب هالمواقف ..

♥️.

…

أعبد اللي تعبده وسوي اللي تسوي ،دام مضارني ولا ضار بشر ،بس لا تجي تحلل وتحرم بكيفك ولا تسقط بكيفك ،خلي كل بشر هو يوصل للصح بتعبه

هو فعلًا يعني
قبل ماتحجي عن أي احد وترمي باغلأطه اللي فقط باعتقادك انها غلط
تذكر أن لو لا ستر الله جان كلنا هسه مفضوحين لدرجة محد بينا يكدر يباوع بوجه الثاني ..

لاتتعاملون ويه روحكم كأنها روبورتات لازم تجاهد وتبقى بنفس مستوى بذل الطاقة ،
ماتخلون السوشيل ميديا والمثالية الزايدة اللي نشوفها تأثر عليكم،
تذكر انك إنسان طبيعي واله قدراته وطاقته وسعيه بكل شي
وطبيعي جدًا لو اجت عليك هالأيام اللي تكون ماعندك واهس بأي شي وطاقتك نافذه،
عادي جدًا لو محاولاتك فشلت مرة ومرتين ومحد بينا وصل من أول محاولة أساسًا ،
وكمية النجاحات اللي تشوفها حوليك ماتخليها تزرع بداخلك مفهوم انك فاشل بس لانك مامسوي مثلهم ،

خليك طبيعي وتماشى مع هالدنيا وقدرتك وسعيك الها انت بشر ومن حقك التعب والاستراحة والتوقف لمدة تسترجع بيها قوتك من جديد ..