كلنا عم نطلب من الله شيئ وبنضل عم ندعي لحتى يستجاب دعاءنا في منا بيطلب من الله القوة فاعطاك مشاكل ، بتطلب منو يبعد عنك الأشخاص إللي بيؤذوك إللي هني ولاد الحرام بتلاقي أنو اخد منك أعز اشخاص على قلبك ، بتطلب أنو ربنا يرزقك بتلاقي ماافي معك ولا ليرة .
ربنا عم يستجيب إلك بس هاي الطريقة لحتى يشوف صبرك وإيمانك وقديش ح تضل تطلب منو لنو محدا معطي إلا الله ولا حدا أكرم من الله فمنشان هيك ضلك أدعي وأطلب من ربنا أي شي بدك ياه وبس هيك .💚

يسعدلي ياكن 😊
رفيدة ظاظا 💚

اليوم التفائل عندي كتير كبير لدرجة أنو العالم ملاحظة هالشي بيجي زلمة بعمر 40 واجا حكالي الله يديم هالضحكة بس غير عادتك ف جوابتو : عطول أنا هيك ، جاوبني : صح بس اليوم عيونك و وجهك منورين كتير وشايف الفرح فيهن ، جاوبتو وأنا بجد مبسوطة : ما بعرف بس التفائل 1000عندي ليش مابعرف ، فجاوبني : عطول خليكي هيك لنو عنجد أنا بأخد أمل وتفائل بس شوفك وشوف ضحكتك وكمان كنير أشخاص كمان لنو عنجد اللي بشوفك وأنتي هيك بحس براحة لهيك خليكي متل ما أنتي عطبيعتك وضلي أضحكي .
احيانا بتكون مصدر أمل لأشخاص وأنت ما بتعرف وبتاخد منك أمل لهيك ضلو على طبيعتكن وخليك أمل لغيرك وبس هيك .

صباحكن تفائل وأمل وحب😍
رفيدة ظاظا💚.

"وعلى نياتكم ترزقون"❤
واحدة من اكتر الجمل التي أؤمن فيها وبتطمن قلبي دائما لما تكون نظيف من داخلك ، ربنا بكون معك وبيعطيك نور انت ما بتعرف من وين . بتحبك الناس بدون سبب ، وبتجيك مطالبك بدون ما انت تطلب ، سعادة غيرك مارح تأخد من سعادتك ، وغناهم مارح يأخد من رزقك ، وصحتهم مارح تكسب عافيتك ، واجماعاتهم بأشخاص إللي بحبهم ما رح تأخد منك حبابك. لهيك كون دائما الشخص صاحب النية الطيبة .💚

يسعدلي صباحكن 😍
رفيدة ظاظا💚

من يومين تلاتة كنا اعدين بحديقة ..
هيك اعدة بسيطة بين الرفقة بأيام العطلة..

بهاد اليوم بأول الاعدة كنت اخدة زاوية و ساردة بدون ما فكر بشي و قدامي فنجان هالقهوة..

فجأة صوت فيروز بيقتحم خيالي و بخليني بحالة رواق رغم انو كنت عم قول جواتي ياريتني ما طلعت..

حسيت فيروز متل المعجزة..
و كل معجزة بالنسبة الي بهالكون بكون الها صلة..

متل السما و الشجر و القطط و العصافير و رفقاتي هي الاشياء كلا ما اكتملت الا بصوت فيروز..


الدنيا حلوة🤎.
بس حاول تعيش و خليك مبسوط🤎.

سردة بعنوان "متلازمة فيروز"
متلازمة الحب..


رَاما.

أوقات بتكون قاعد وصافن .
بيخطر عبالك شغلات كتير ، اسئلة كتير ما عم تلاقيلها جواب ، افكار بتروح وبتجي
حكي جواتك كتير بس مابتقدر تعبر عنو.💔
عاجز انك توصفو وما بتلاقي كلام تقدر توصفو .
بيسألوك كيفك ؟؟
بتقلهن تمام منيح
بس انت مو تمام ومو منيح 💔مابتقدر تقلهن انو جواتك في معركة وصراع عم بيصير
وقت بتكون مدايق
بيسألوك : شبك ؟.
بتمسك حالك و بتحبس الدمعة بعيونك وبتقلهن ولاشي بس شوية تعب .
تعب من شو ..؟
هون انت بتقلهن مبعرف .
هو فعلان مابنعرف .
مابنعرف نحكي عن وجعناوالغصة الي خانقتنا يلي جواتنا.💔
لانو هي اكبر من انو نحكيها
بيجو بيحكو انك متغير ، لامو هيك نحنا مابنتغير بس نحنا جواتنا وجع كبير وماعم نعرف لي .
شايلين هموم مابتشيلها جبال .
انغدرنا ونتركنا بنص الطريق .
خسرنا ناس كانت اغلا العالم ع قلبنا .
بنفكر بحياتنا ، بأهلنا ، بمستقبلنا .
ولسا شغلات كتير بلقلب مابتنحكى .
لاتشوفونا عم نبالغ لانو مو كل شخص عندو نفس طاقة تحمل .
سايرونا وتحملونا شوي وكونو النا الكتف نتكى عليه .
المطلوب منكن تكونو حناين وبس .
وهاد بيكفي لنكون بخير .
ولتصير الدنيا بخير كمان .❤

يسعدلي اوقاتكن😍
رفيدة ظاظا ❤.

الواحد بسبب كلمة حلوة يمكن يصدق أنو الحياة حلوة فعلا .
وبسبب لحظة حلوة مع شخص بيحبو ممكن ينسى أديش في مشاكل علقان فيها .
 تشجيع وحدة يمكن تخليه اقوى حدا ومن نصيحة ممكن أنو يغير مسار حياتو كلو .
ومن نظرة تقدير تخليه يوثق بحالو من جديد لا تبخلو بالكلمة الحلوة أو من تشجيع أو نظرة تقدير حتى لو سؤال عن الشخص ♥
شغلات صغيرة وبسيطة بس كفيلة تغير نظرتك ومسارك بالحياة♥

يسعدلي صباحكن😍
رفيدة ظاظا ❤.

العالم ناطرك..

مو ضروي تكون ناجح كبير ..

يمكن باختلافك يطلع العالم احلى!

اوقات بقول بكفي لما تشوف اي شخص و انت ماشي تعطيه بسمة خفيفة..

هيك بتكون زرعت الفرحة بين الكل..

لما تكون رايح ع الجامعة بالباص و تسند راس رفيقك ع كتفك لحتى ينام هاد مو انجاز؟

و هاد الانجاز في ناس ما بتعرف تعملو تخيل؟

خلي كلشي اتعرضت الو من مواقف مو حلوة ع جنب..
خلينا نجي للمنطق هدول العالم يلي قدمو الك الأذى مو هنن السبب بمبادئك و شخصيتك و قراراتك؟

حياتك #مهمة
قد ما كانت الحياة قصيرة ربنا رح يبعتلك شخص واحد ع الاقل يورجيك معنى الحياة يعطيك الحب يلي بتحلم فيه..

بس كيف ربنا بدو يبعتلك هيك شخص وانت اعد حاطط ايدك ع خدك و زعلان ع كلشي صار بالماضي..
الماضي صار ماضي ماحدا بيقدر يرجعو لهيك كون مبسوط لحتى تكون قوي قدام الشخص يلي مخبى هدية الك بعدين..

خليك قوي كلنا بحاجتك❤️.



جرعة تفاؤل من بعد زمان😃
مين اشتقلي بالغلط؟😂
رَاما.

كتير بحب الصدف..

متل اليوم بالتحديد..

كنا عم نحكي بشو منفضل من المطربين..

احدى الاسماء يلي نذكرو كان "وائل جسار"


هلء انا وبدي اخد غفوة ساعة زمان ..

بسمع غنية صوتا جاية من بعيد "غريبة الناس" يلي من اجمل الاغاني لوائل..

تذكرت دغري لحديث يلي صار بيني وبين رفقاتي ليوم ..
قدي كان عفوي؟؟


سردة بعنوان " كتير بسيط انا "

رَاما

حدا انتبه على شغلة؟

انتبهتوا لما بتسكر باب بوجنا منبقى ندور ع اي باب تاني؟
او منحاول نعطي شي لحتى نفتح باب جديد بطريقة جديدة من ابداعنا..

باب واحد تسكر بوجك بس بقدرتك انت رح تكون جاهز لأي شي و تتخطى كتير شغلات ناس قبلك ماقدرت تتجاوزها..

يمكن كون غير الناس بأني بحب حس بنكهة التعب بالشي يلي عم احصل عليه؟

و يا ترى هل هاد الشي صح ولا غلط؟

سردة بعنوان "نكهة المشوار" ..

كونو بخير باليز🙏🏻

رَاما🤍

تصبحوا على خير يا كل الخير..

عيلتي الصغيرة انشالله تكونوا بأقصى راحة بال♥️

مسالخير ..

جاييتكن اليوم بسردة رح سميها "حواس الحب"


كتير في ناس بتعيش حياتا عم تدور ع السعادة..

و بصراحة صرت حس هاد الشي شوي مبالغ فيه..

لان هي الناس لما عم تركض لتشوف السعادة وين

يمكن من سرعتا تكون السعادة صارت وراها بدون ما تحس!

لا تكون اعمى و ضلك عم تركض ..

اخلق السعادة انت وخليك انسان رايق لابعد الحدود..

خلي مبدأك بالحياة هو الحب..

و مبدأك بالحياة هو البسمة لأي شخص تقابلو بيومك♥️


رَاما محفوظ

لما تسقي حالك ببسمة صغيرة رح تطلع شجرة مليانة حب..


شي بسيط كل يوم بخليني حس حالي نادرة..

و هالشي البسيط هو انو مرة من المرات ابتسمت لبنوتة صغيرة ووقتا صار بيناتنا حديث صغير بس من ورا بسمة !

من ورا بسمة قدرت ورجيها قدي هية حلوة..


هي البنوتة صارت كل ما تشوفني ع راس حارة بيتي تركض لعندي و ضمني بكل قوة..

انا افرح قدام كل هالناس هيك موقف عم يصير..

بعدا رفيقتا يلي معا كانت رجعت بس تشوفني كمان تركض و ضمني و تعطيني بوسة بريئة..


وهييك لحتى كبرت هالشجرة وصرت كل يوم بس انزل من باص الجامعة بعز تعبي لاقي. كوشة ولاد عم يركضو يضموني♥️


كل هاد من ورا بسمة لطيفة مني لشخص واحد خلتني شخص نادر بعيون كتير اطفال♥️

الحياة خلق فيها الحب ورح يضل فيها

كونو بخير♥️

النصيب!
برافق اي قرار مناخدو بحياتنا..

وجود اشخاص بحياتك نصيب و انو تتركن بحياتك قرار..
وكتير شغلات بحياتك بتنقاس ع هالشي..

وهاد الشي بورجينا انو ازا ما كان النا نصيب فنحن نمتلك القرار ..

سبب المشاكل و قطع العلاقات هو نقل الكلام وبالنهاية كلنا مصيرنا الموت..

بستغرب كيف كلنا منلاقي لأنفسنا عذر بكلشي
وللناس مامنترك الن عذر بأي شي..





خلينا نفكر في قوله تعالى:
( يقول ياليتني قدمتُ لِحيَاتي )
لحتى نتعلم انو الحياة الحقيقة مو هلء!
عطول بنصح العالم يلي بحياتي يعملو خير قد ماكان صغير..
كونو مناح قد ما بتقدرو و قدمو شي لحياتكن ينور آخرتكن♥️

و كل الحب للناس الي مرقت بحياتي خلال ال21 سنة يلي عشتن..
اتعلمت منكن وعرفت كيف ماخلي الشر بعمرو يسيطر ع حياتي

رَاما♥️

كل عام والحب مليان حياتنا..

كل عام واهلينا يلي عطونا كتير بخير..

كل عام والناس يلي بحياتنا بحبونا من قلبن بدون مصلحة..

شكراً لكل حدا كان سند ..

شكراً لكل حدا ما سمح لدنيا تأذينا♥️

وكل عام وشعب اورميلا بخير يلي قدر شو عطيناه♥️

رَاما..

"عندما تركب القطار الخطأ حاول أن تهبط في أول محطة لأنه كلما زادت المسافة زادت تكلفة العودة🤎! "

اوقات بكون في قرار كتير صعب بس بنفس الوقت بكون الحل تبعها واضح متل عين الشمس ..

هاد القرار الصعب صدقاً بخلي العمر يمرق بلمح البصر..
لهيك كلنا لازمنا بس شوية تفكير بالامور يلي عم تصير معنا..

خليك عايش ع مبدأ بكرا احلى و بعد بكرا لسا احلى..
#لا_تخلي_الفاتورة_تغلا_عليك ..



سردة بعنوان "فاتورة حياتك "

بوست يمكن اجى بوقتو ما بعرف..

رَاما..

قولوا يارب❤️

بظن بتختصر كتير شغلات جواتنا❤️

عالعموم هاد الموضوع مافي شي اجباري..

لما انت عم تدرس لجامعتك بتكون عم تعطي من قلبك وعم تحط كل طاقتك ورغم هيك بتفشل!

خلينا نأدرك انو هاد لخير يمكن لحتى نحصل المرة الجاية ع معدل اكبر


الكلمة الحلوة الخفيفة ع القلب خليها صديقتكن ولا تزعجو انسان ممكن يموت شي كبير جواتو من كم كلمة فاضية


ساعدو للشخص لا تنظّر عليه ..
ساعدو لانك حابب انت تساعدو..


و برجع بقول الودّ ثم الودّ ثم الودّ بأي علاقة شو ما كانت تكون

زمان عن سرداتي صح😂؟

رَاما .

احد الاشخاص يلي بحياتي بس يصير معنا موقف منيح او شي بفرح بيبتسم بسمة هيك خفيفة مع عيون عم تلمع..

تلقائياً انا لقيت حالي اخدت هالشي منو وصرت ابتسم ع شي حلو بصير معي بنفس الطريقة..

وها الشي يعني "شكراً كتير" بس بطريقة الابتسامة والعيون🤍.

فعلاً بهي الدنيا كل حدا فينا عندو اسلوب برد فيه..
بشكل عام في ناس بتقدم شكر وناس عندا شي بس هية بتقدمو ..
والنوع التاني هو يلي بكون الو تأثير اكبر بالقلب..

اسلوب اللطافة والحكي الحلو بخليك تحس بقيمة الشي يلي عم يصير او الشي يلي عم تقدمو..

ولا ننسى انو بهي الدنيا في كتير ناس ناقصها تعامل حلو..

كونوا ناس خفيفة ظريفة ع القلب والها أثر حلو

وبحياتك اوعك تترك اثر بشع عند اي شخص حتى لو كان غريب عنك..
لان بيجي يوم و ح يمرشي يتذكرك فيه..
ف خليه يتذكرك بالمنيح ويضحك بس يتذكرك❤️

رَاما محفوظ.