• شوية صور من أجواء العمل اليوم بتجهيز الأصص للزراعة :

خلطت كيس السماد مع التربة، بعد ما كنت مفرغة الأصيصات كلهن عالأرض، ورجعت عبيت كل الأصص من جديد وجهزتن للزراعة.

استغرقت العملية ٣ ساعات تقريباً تحت أشعة الشمس الخلّابة، بس للأمانة رغم التعب والصيام والشوب، إلا إني كنت مستمتعة وحسيت ببعض من شعور الفلاحين والمزارعين وبالتعب والجهد اللي بيبذلوه وهنّ عم يشتغلوا بالأرض.

عدا عن إنو إيديي رغم استخدام الكفوف صارت كتير خشنة وما عم تترطب بولا شكل.

صح لساتني ببداية التجربة إلا إني متحمسة كفي كتير واتأمل كل نبات كيف بشق التربة وبيطلع، حرفياً اليوم شعرت إني صرت جزء من الطبيعة🌱.

إن شاء الله كون عم اقدر انقللكن الصورة اللي عم عيشها وعيشكن أجواء التجربة معي 💘.

#تجربة
#زراعة.

• اليوم الحمد لله خلصت تعباية التربة بكل الأُصص، وبدأت الزراعة بعون اللّه 💕.

ومبارح جبت من المشتل شتلتين إكليل الجبل ( وحدة قائمة وحدة زاحفة ) + جبت زعتر بري + اشترتلي تيتا هدية ورد جوري ( بس لسا ما طلعتا عالسطح لأن تقيلة كتير ).

فزرعت الشتلات بأصيصن.
وزرعت بذور الفاصوليا بأصيصين، وبانتظار نموهن الجميل 🥹.

وأخيراً.. التربة الزايدة عندي، لقيتلها حل حتى ما كبها (بمساعدة لطيفة من أحدهم) وعبيتهن بأحد الدواليب اللي عالسطح، ومهدتو لزراعة البطاطا بإذن اللّه.

#تجربة #زراعة.

• اليوم طلعت زرعت بصلاية وحدة من عنا من البيت. كتجربة قبل ما جيب كيس بصل للزراعة.

- أول شي شلت الجذر القديم بالسكينة
- تاني شي لازم نغمس المنطقة السفلية فقط
يعني يا دوب ٢ ملم بالمي
وما لقيت كاسة ضيقة عنا، فحطيتا بالقنينة
مشان يطلع جذر جديد وازرعها.

بعد يوم بلش ينمو الجذر ويكبر، أديشو حلو!
وبعد أسبوع تقريباً طلعت ازرعها (يعني اليوم)

زرعتا عجنب الأصيص؛
لأن بدي ازرع حدها بصلات غيرها كمان..

وبالنهاية بعد ما سألت وفتل راسي لفهمت
اكتشفت إنو رح يطلع عندي هلأ بصل أخضر
_البصل اللي بحبو بشكل فظيع_
والبصل تبع المونة اللي منحطو بالطبخ
بدهن شراء من الصيدلية الزراعية.

وأخيراً.. قال البصل بحب المي كتير
فلازم ما عطّشها متل ما عملت بالفجلات.

#تجربة 🧅.
#زراعة.

• طلعت زرعت ستة أصناف من البذور اللي معي، وإن شاء البقية لبكرا.

- إنجاز اليوم (٨ نيسان) :
رشاد / كزبرة / جزر / زعتر / نعنع / فاصولياء.

وبانتظار النتيجة، إن شاء الله تنجح 💕.

#تجربة.
#زراعة 🌱.