Кичә ничек салкын булды, ә Чистай районында Чулманда балыкчы батып үлгән. Боз әле һаман да тиешенчә формалашмаган. Сак булыгыз!

07:45 сәгатьтә бер кеше МЧСка шалтырата, елга ягыннан коткару турында сорап кычкырган тавышлар ишетәм, ди. Коткаручылар шул урынга китә. Әмма балыкчы инде исән булмый. Аның гәүдәсен ярдан 700 метр ераклыктан 12 метр тирәнлектән 12:40 сәгатьтә генә табып алалар. Бу урында боз калынлыгы нибары 5 см була.

Ирләрегез балыкчы булса, әйтегез. Бозга чыгу әле һаман куркыныч. Хотя алар сезне тыңлап тормый инде, чыгасы булса чыгалар.

Бүген, 9 декабрь көнне, танылган шагыйрь, популяр җырлар авторы, Татарстанның атказанган мәдәният хезмәткәре, Татарстанның атказанган сәнгать эшлеклесе Мансур Шиһаповның бакыйлыкка күчкәненә 1 ел булды.

Шагыйрьнең елына атап, аның фатирында Коръән ашы уздырылды. Анда Мансур абыйның якыннары, туганнары катнашты.

Тормыш иптәше Клара ханым, кызлары Эльвира һәм Ләйсән, килгән кунаклар Мансур абыйны җылы хатирәләр белән искә алды.

Аның туган ягын яратуын, тормышта гел оптимист булуын, проблемаларны уен-көлке, шаян сүз белән җиңә белү сәләтен ассызыкладылар.

Шагыйрьнең рухы шат булсын. Әлеге фотоларда Мансур Шиһаповның фатирындагы эш бүлмәсе.