الليله ان شاء الله ننشر لكم القصائد المنبريه للشاعر عباس المشبك

#محرم_١٤٤٦

فضت عشره مال اسنين بيني وبينك بلحضه
كلشي اتعوضه بس بالضيج اخييك محد ايعوضه
اخوك وينكسر ضهره اعله فگدك ادري ماترضه

موت بس اطيني حل
بعد ساعه وزينب اتصيح اعله تل
وانه اخوك وصعبه لو اخوك انچتل
موت بس اطيني حل

اگعد خويه__اطيني خدك كون ينباس
اگعد خويه__طاحت دمعتي وتضحك الناس
اگعد خويه__يصيحون فنه يگوم عباس

لوما عزيز وغالي
ماگلك ارحم حالي
ماطولت ويانه
تدري الهجر چتالي
ــــــــــــــــــــــــــــــــــــــــــــــ

افا اعله اجنازة العباس الوادم كلها فرحانه
خويه اگعد اخوك اوحيد ويعيرونه بخوانه
حيره انطر على النسوان لو ضل يمك اهنانه

گوم يالفصلك ثجيل
گوم خويه انلم الخيام ونشيل
خاف تالي الذبح يوصل للعليل
گوم يالفصلك ثجيل

اگعد خويه__محد مسوي اسوايتك هاي
اگعد خويه__عطشان وانت امن النهر جاي
اگعد خويه__ماترضه گبلي تشرب الماي

ياروحك الخجلانه
وتگلي اضل اهنانه
فوگ المواقف هايه
مغطي الوجه بردانه
ــــــــــــــــــــــــــــــــــــــــــــــ

ياخي المات اخو معذور ليش الوادم تلومه
يضل طول الدهر مكسور حزنه امغطه بهدومه
يبو فاضل شلون احسين فارغ ضهره بالحومه

فراگ وجهك مو سهل
مالت الله المات اخييه المن عدل
باچر اول يوم فاتحتك على النوگ الهزل
فراگ وجهك مو سهل

اگعد خويه__باچر الله بوالخير عالنوگ
اگعد خويه__وتتعذر اختك طبت السوگ
اگعد خويه__اتسلم عليك وچفها محروگ

وتگلهم المسبيه
وگفو النوگ اشويه
هذا النشف ريجه ومات
خلوني ارشه امييه
ــــــــــــــــــــــــــــــــــــــــــــــ

رد اوياي خل زينب تفرح من تلاگينه
واگلها مو سهم عباس شايل طولچ بعينه
لمن نوگف آنه وياك يازلمه اليحاچينه

لومتت يولون اخوك
احسابي كله اختلف لمن طيحوك
ضلو ايضحكون گوم ابروح ابوك
لومتت يولون اخوك

اگعد خويه__فتش اعويناتك يالحنين
اگعد خويه__يصيحون وليه انهد على حسين
اگعد خويه__ركضو بنار اعله الصواوين

يالذتك مادامت
والخوه عگبك هانت
لاروح اخوك ارتاحت
ولاعين اخيتك نامت
ــــــــــــــــــــــــــــــــــــــــــــــ

آخر شي حچه العباس بس المستحه بعينه
امنيتي بماي ارد وياك والخدّر تلاگينه
وواحد يطي الآخر ماي واوفي بنخوة سكينه

روحي والجربه سوه
من تبده الماي ريتي وشلت منها الهوه
شلون ارد والضعن مني ماروه
روحي والجربه سوه

خويه ارجع__گلهم تره العباس خجلان
خويه ارجع__شايل الماي ومتت عطشان
خويه ارجع__فزعت الوادم على النسوان

ماعندي چلمه احچيها
بس روحي اعزب بيها
عطلتك او الله وياك
فراگ وعطش تاليها
ــــــــــــــــــــــــــــــــــــــــــــــ
الشاعر عباس المشبك

چل الليل والوادم__نامت وآنه سهرانه
شلون يغمض اعيونه__الشايف موتت اخوانه

اه يارجعت الميمون__مغضب سابح بدمه
منها وفزت النسوان__الحگن طاح ابو اليمه

خيل ركضت__نار شبت
آخ ياحيرة خوات الساده
منين ماصد__كلها تنشد
وين اخوچن وين شيخ القاده

الخيل الثگيله اتحضرت تسحگ اضلوع احسيني
اسمع اعضام اتكسرت كلما اغمض عيني
ــــــــــــــــــــــــــــــــــــــــــــــ

أنه زينب تعب وفراگ__مضيعتكم واجيت انشد
الماعنده اخو للضيج __ خايف وين مايگعد

آنه الكف زلمها الموت__بيوم اثمنطعش واحد
استحه من الرگاب السيف__عطاشى والنهر بارد

مدوهنه امشي__مات كلشي
ولا اخو البيه حيل يتلگاني
زينب آنه __ امن المتانه
انشلع گلبي وماكو حس لخواني

بطّل يگلبي امن النشد موته الزلم شمتاني
كف الحچي لمن گمت ماچلبو خواني
ــــــــــــــــــــــــــــــــــــــــــــــ

حرمه اتدافع اويه الخيل__كافل خدري اريدنه
چل الليل والعباس__تنشدني السمه عنه

اجيت وضل علي السجاد__يم نار الخيم گاعد
كلساع امن اردله يگول__اخذي اهدوم للوالد

بالموازه__الخووه عازه
الماله اخو المن طايفات اعيونه
يساعده الله__الگعده صلله
يعني هذا الحمل هد امتونه

ماتنجرع يابو الحسن خلصها هاي الليله
راس ابو فاضل عالرمح والنهر يمشي بحيله
ــــــــــــــــــــــــــــــــــــــــــــــ

آنه اخت الخذو گلبه__من اضلوعه بالحافر
عالشفته بضهر عاشور__كون احسين ماصاير

ياهالناس ياهو الشاف__ضلع ابن امه يتثلم
من گد السحگ بالخيل__ماضل بيه كتر ينشم

والله كلفه__شلون اعرفه
الچبير احسين ضاع بهيمه
الله واكبر__ليش ينجر
جابته الخياله يم الخيمه

لوسولف الصار الضهر چامحد يصدگني
مذبوح اخوي امن الگفه وذباحه يمه يغني
ــــــــــــــــــــــــــــــــــــــــــــــ

چاهوه الگلب شيفيد__من اتفارگه اعزازه
والعباس يالعباس__اختك صايره اجنازه

اركض وآنه عمري أچبير__واسمع صيحو زينب
افا واسمي بلسن ينگال__وآنه احچايه من الرب

بصيحت اسمي__نشف دمي
وآنه اخت عباس مامعقوله
حافيه اركض__خيل تعرض
بهيمه ضاعت زينب المكفوله

باچر سبي وروس برمح فوگ الهزل مچتوفه
تالي الوكت بت حيدر ايصدلها سوگ الكوفه

ــــــــــــــــــــــــــــــــــــــــــــــ
الشاعر عباس المشبك

چل الليل والذباح اخذ حيفه
يغرف ماي شفته ويغسل بسيفه
طلعت اركض واگللب بالجثث يحسين
ضلمه وگلبي يشتم ريحة وليفه

الوادم .. نامت وزينب
طلعت .. عالجثث تنحب
ركضت بالحسين الخيل
مبين كلش اتعذب

راحت خيل.. ردت خيل __ چللب گلبك بالحافر
شوف الضيم .. يابو الغيم __ كون احسين ماصاير

اعضامه امطشره ابن امي برگبتمن خطيته
ماترهم احسين الشيخ ينكض من لحيته

ادركنا .. ان كنت حيا
ــــــــــــــــــــــــــــــــــــــــــــــ

لگيتك كون مالاگيتك اشوالي
اركاض الخيل غمّج بيك يالغالي
ياخي يعينك الله اعله التعب يحسين
من گد الجروح اضلوعك تلالي

ميّت .. خويه شنده بيك
طايح .. والرمل يچويك
عبالي امن اجيك اتگوم
ما أدري العتب ياذيك

ليش الضيم .. مثل الغيم __ چلچل فوگ خواني
ردت اتگوم .. ياجيدوم __ فشله اعله اختك اتتاني

موت براحتك يحسين بس ياهو لخواتك
مابين الزلم والخيل جروهن بناتك

ادركنا .. ان كنت حيا
ــــــــــــــــــــــــــــــــــــــــــــــ

لاخيمتنه ضلت وارجع اعليها
ولا عباس واگف يمها يحميها
زينب حيره وين تروح تالي الليل
طلعت حافيه تحشم بهاليها

حيره .. حيرتي بلياك
انهض .. اختك وتنخاك
عليه گامو يضحكون
كل ماگلك الله وياك

ضحك مرتاح .. سب وصياح __ حال الضيم ياحالي
ويگولون .. هاي ام عون __ غريبه ومالها والي

الخذو من ايد اخوك الماي طبو عالمخيم
خواتك طلعن ابلا راي خل يتحرك الدم

ادركنا .. ان كنت حيا
ــــــــــــــــــــــــــــــــــــــــــــــ

الليله شلون اخلصها اويه عدوانك
شحلات البارحه امن التمو اخوانك
كل ماگول خويه يگوملي العباس
وربعك تارسين اكتار ديوانك

المن .. كلكم اتموتون
المن .. ضاله يم عون
خليتوني لللوعات
نيتهم حرم يسبون

باچر گيد .. فوگ الايد __ وعالهزّل يركبوني
امر من يم .. طريج الدم __ واسلم اعليك بعيوني

وي ذباح اخوي احسين نتمشه سويه
كل مايلتفتلي الراس جر احبال اديه

ادركنا .. ان كنت حيا
ــــــــــــــــــــــــــــــــــــــــــــــ

باچر مدري وين يصير ممشانه
سبايه بروس وانتم ضلو هنانه
لاصارت ولادارت يبو السجاد
بفاتحتك طبل والناس فرحانه

باچر .. نمشي مسبيات
حرمه .. وبخرابه تبات
سمونه الخوارج ليش
ماسمونه علويات

باچر نوگ .. تمشي بسوگ __ ونسوانك بلا زلمه
صاحت ناس .. اخت عباس __ مچتوفه بحبل زحمه

من فوگ السطوح احجار يتشامر علينه
يگودونه بزجر وسياط ونشاگف بدينه

ادركنا .. ان كنت حيا
ــــــــــــــــــــــــــــــــــــــــــــــ
الشاعر عباس المشبك

خويه الخيمه الچانت ستر
سولف بيها السان الجمر
الچانت يمك ما تلتفت
هيمه وتركض من الضهر

چبيره وحيل مابيه ــــ وكت خلاني مسبيه
يسموني الغريبه الناس ــــ محد گلي علويه

العفيفه الچانت امن الباب ما تطلع عبايتها
هسه اعله الهزل زينب تمشي وتومي لخوتها

بحبل خيمتنه مچتوفه وآنه التستحي امن الله
الرباب امچتفه بگماط تنسه شلون عبد الله؟
ــــــــــــــــــــــــــــــــــــــــــــــــــــــــ

خويه احسينك من العطش
صار السانه خشبة نعش
وليه وشافو ماعنده اخو
داسو صدره وگلبه انفرش

سمعته اخلافك يگلهم ــــ من دارو عليه كلهم
وحق جدي النبي عطشان ــــ اريد امييه يطلبهم

اضلوع احسين شفناها بعمود الخيمه تتكسر
وقميصه الخيل تركض بيه بين الجيش والخدّر

رحتله ومدلي چفه وگال اصبع چفي ماهوه
لو گايلي چامطيه المحبس باگه بالگوه
ــــــــــــــــــــــــــــــــــــــــــــــــــــــــ

الشام الشماته طب الخدر
من وگفانه صاح الشمر
الچانت اسمها شارب علي
مسبيه خل اتطب للقصر

يزيد اگبال راس احسين ــــ يعرفني ويگلي امنين
گتله اخواني ليسمعون ــــ بس مافزعو الميتين

هضيمه وسورة التطهير ابن المدري يقراها
افه والماله اسم ينگال يم بت حيدر اتباها

كبرّت وشيبي مال ارتاح مو مالت حبل وانجر
مشيت الماتگطعه النوگ وبروس الدلال افتر
ــــــــــــــــــــــــــــــــــــــــــــــــــــــــ

مامش زلمه اعليه انتچي
وبين الوادم زحمه البچي
مثل اضلوعك صوتي انسمع
وگالوه اسمي الماينحچي

اختل كلشي بمواعيدي ــــ وركض كبرت مواليدي
شييب حتى راس النوگ ــــ من شاف الحبل بيدي

كلها اتباوع و تضحك و بنيّاااتكم حِفاي
الشايل راس اخوي احسين گدامه يبدي الماي

حاچي الهزله عن لاطيح ريضي شويه من ممشاچ
الگواج الله ما تنگال كلها تگلي حيل اوياچ
ــــــــــــــــــــــــــــــــــــــــــــــــــــــــ

اذكر گلتلي ما نفترگ
وگلبك سمعته باسمي يدگ
تالي بسمانه اهلالك طفه
اگبال الشماته مات العشگ

يولفي الماحضه بولفه.. دمعته توصل الزلفه
من ايندهه المگاود.. يرسم چفك بچفه

بعد مامش عرف وانخاه يردك يابذر تعبي
شتلتك لاچن النهران ماتندل زرع گلبي

على البلكت تمر والگاك طيف مگابل اعيوني
بس ياهو اليجيب النوم ويسيير على اجفوني


عباس المشبك

اذكر الزيارات.. واشهگ
حافر بسماوات.. يسحگ
والرمح بالحسين.. غممگ
وبراسه كض الهوه

لوما عزاء الرب.. خدمتي
وبخدي ما تنشف.. دمعتي
كل الوعي بضِل حب.. فطرتي
حزنك عذاب ودوه

*(وَلَعَنَ اللهُ اُمَّةً اَسْرَجَتْ وَاَلْجَمَتْ وَتَنَقَّبَتْ لِقِتالِكَ، بِاَبي اَنْتَ وَاُمّي يااباعبد الله) زيارة عاشوراء*

چافوگ الضيم... تضحك يمك الناس
ذبحوك مابس... ليش بخيل تنداس
تلتفت وتشوف.. مضيفك لاحته النار
يم اذنك اصياح.. طلعو اخت عباس

تجالع وشفت الشمر... لازم يتيمه
تگله اخذ ترچيتي... واترك الخيمه
يعين گلبك سيدي... وانت بالهيمه
آه يحسين... وياضيمه

(بكل الزيارات.. محترگه خيمات.. وعطشان الحسين.. فوگ الرمل بات)
ــــــــــــــــــــــــــــــــــــــــــــــــــــــــ
بالمجلس الأرواح.. تصعد
والينسه روحه يعيش.. مرقد
بس حزنك المفروض.. يُعبد
غاية وجود الگلب

لوماكو جرح الطف.. لنفرض
المن يصب دمعي.. واغمض
بين الزلم نسوان.. تركض
ضايع عليها الدرب

*(يَا أبا عَبْدِاللهِ، أشْهَدُ أنَّكَ كُنْتَ نُوراً فِي الاَْصْلابِ الشّامِخَةِ، وَالاَْرْحامِ الْمُطَهَّرَةِ، لَمْ تُنَجِّسْكَ الْجاهِلِيَّةُ بِاَنْجاسِها، وَلَمْ تُلْبِسْكَ مِنْ مُدْلَهِمّاتِ ثِيَابِها) زيارة وارث*

چاليش عطشان... وانت احچايتك ماي
بيه التعب كون... وانت بخير مولاي
الينذبح طبرات... نحره يتعّب السيف
وانه ادري يحسين... ياذي الذبح بهداي

كلما تباوع للخيم __ تعرض الوادم
يستحي السيف امن النحر __ لوذبح صايم
چم امنيه اگبال الخيم __ عالرمل راسم
حنّه وماي __ للقاسم

(بكل الزيارات.. تتلاگه الجروح.. عاليسوه مذبوح.. مامش سلامات)

ــــــــــــــــــــــــــــــــــــــــــــــــــــــــ
ياملتقى الارواح.. في الحب
يمعطش التاريخ.. وتصب
تستهدف الألباب.. وتطب
يانعمة المستقر

جفني من يغمض.. رمشه
حلمي بس للحسين.. ممشه
گد مايحب الطير.. غبشه
ماي وطريقك نهر

*(أشهَدُ أنَّكَ أمينُ اللهِ وَابنُ أمينِهِ، عِشتَ سَعيداً وَمَضَيتَ حَميداً وَمُتَّ فَقيداً مَظلُوماً شَهيداً، وَأشهَدُ أنَّ اللهَ مُنجِزٌ ما وَعَدَكَ) زيارة الاربعين*

يلكلشي منطيه... ربك كلشي منطيك
تحتار وياه... العزّب بالكواريك
استغرب البيت... بس يم بابك ارتاح
تعاتبني الجدام... لو ماسيير اعليك

بالممشه مخدوم الگصد __ واكو اعزوبيه
بس بخرايب ياوكت __ تغفه العلويه
والگمر جذاب. اليهل __ عباس ليليه
عنده انجوم __ مسبيه

(بكل الزيارات.. صد للسمه وشوف.. خيط الضوه اچفوف.. وعطشانه نجمات)
ــــــــــــــــــــــــــــــــــــــــــــــــــــــــ
طاح او يشوف النار.. شبّت
واخته من الخيام.. طلعت
والعمرها خمسين.. ركضت
واتدور المنذبح

من حچي الزيارات.. يشتد
من تلگه وي حسين.. محد
دم يابس وتربان.. عالخد
بالناحيه اشچم جرح

*(السَّلَامُ عَلَى مَنْ نُكِثَتْ ذِمَّتُهُ، السَّلَامُ عَلَى مَنْ هُتِكَتْ حُرْمَتُهُ، السَّلَامُ عَلَى الْمَهْجُورِ فِي الْوَرَى، السَّلَامُ عَلَى مَنْ تَوَلَّى دَفْنَهُ أَهْلُ الْقُرَى) الزياره الناحيه المقدسه*

جابو حصيره... وگوه التم الحسين
من سحگ الخيول... واصل للصواوين
بس التهضمك... اهل القره الدفنوك
لاحضرو اخوان... فوگه ولا معزين

دفنو جسد لاكن بقه __ راسك مسافر
بيمن تشوف ام الخدر __ من تجي باچر
همزين راسك عدها ضل __ ماخذاه حافر
بيك الصار __ ماصاير

(بكل الزيارات.. مدفون بس وين.. راسك يالحسين.. يبعد مسافات)
ــــــــــــــــــــــــــــــــــــــــــــــــــــــــ
والمنتظر ساكن.. صحاري
هاضمته چلمه حسين.. عاري
ولو عالسبايا نجيب.. طاري
يلطم وحيد وينوح

چم عجّل وثارك.. يجيبه
والمهدي الك ماكف.. نحيبه
من اسمع الچثه.. سليبه
بالندبه اسولف جروح

*(أَيْنَ الطّالِبُ بِذُحُولِ الأَنْبِياءِ وَأَبْناءِ الأَنْبِياءِ؟ أَيْنَ الطَّالِبُ بِدَمِ المَقْتُولِ بِكَرْبَلاَء؟ عَزِيزٌ عَلَيَّ أَنْ أَرى الخَلْقَ وَلا تُرى عَزِيزٌ عَلَيَّ أَنْ تُحِيطَ بِكَ دُونِيَ البَلْوى) دعاء الندبه*

متانين ونريد... ثار الطبن السوگ
امن الوگفه ساعات... عرگت گصت النوگ
اتبچي الحياطين... ذيچ سوايت الشام
وركضات الصغار... والبالخيمه محروگ

يعطش حسين وماي اكو __ خير من الله
يالمهدي مو گد السهم __ ريج عبد الله
من البچي اعيونك طفن __ وثارك معطلله
جرحك فرض __ يتصلله
(بكل الزيارات.. المهدي مجروح.. كل مغرب ينوح.. اليسبوله عمات)
ــــــــــــــــــــــــــــــــــــــــــــــــــــــــ
الشاعر عباس المشبك

علي راح ياليله الولد راح
گلب طاح بالحومه الگلب طاح
حلو الطول مايرجع حلو الطول
الصياح يسوه وليدي الصياح

يارب __ يالبسمك الهم ينجلي
يارب __ رايد علي بداعت علي
يارب __ ماريد من هسه ابتلي

اليشبه الخلقت محمد لو نضرته
وذره وذره امن الرماح بچفي شلته
مددت طولي اعله طول ابني وشبگته

يأول حضن فرحني __ واول جرح دوهني
بويه اشتهيتك سالم __ اگعدلي كون اتحبني

بويه علي .. بويه علي
ــــــــــــــــــــــــــــــــــــــــــــــ

بده البين يازينب بده البين
غفت عين من هاشم غفت عين
والحسين شلعو گلب الحسين

گومي __ هذا الجرح لهل الجرح
گومي __ ابني الچبير ومنذبح
گومي __ متلاجيه اضلوعه برمح

گومي زينب گومي ليله هاي شده
خاف يطلب ماي مني من اگعده
امن العطش وامن السهام انمرد چبده

چثرن لطم يستاهل __ ابني الچبير وشايل
ليش الوكت ويانه __ مايل يزينب مايل

بويه علي .. بويه علي
ــــــــــــــــــــــــــــــــــــــــــــــ

تره الجيش مايرحم تره الجيش
خذو ليش من گلبي خذو ليش
على الشاب ماراهم غطه الموت
فلا عيش من دونه فلا عيش


ابني __ هذا الحلو اخلاق وشكل
ابني __ گدام عيني و ينكتل
ابني __ الرايح اوليده المن عدل

أجبير اخوته چنت اميزه امن النداره
علي الاكبر ذابحينه ياااخساره
كون اطلّع گلبي واتشوفون ناره

ضامي اوولوه الوادم __ چاليش ذبحو صايم
بس ردت ابلل ريجه __ وخل ينذبح مالازم

بويه علي بويه علي
ــــــــــــــــــــــــــــــــــــــــــــــ

يليله اتلگي ابنچ يليله
ثجيله سالفته ثجيله
شحلاته مييت وشحلاته
يليله الطمي وهلهليله

طاحت __ ليله اعله ابو الاكبر هوت
طاحت __ واتگله ماعندي بخت
طاحت __ من البواچي اعليه عمت

گعدت اگباله وتگله گوم يبني
شنهي نايم عالترابه هذا حضني
تگوم تجبر خاطر امك لو تحبني

الوالده المتعوبه __ تشتم ابنها بثوبه
ضيم البزر موهيين__ طول الدهر منكوبه

بويه علي .. بويه علي
ــــــــــــــــــــــــــــــــــــــــــــــ

النفس ضاع بضلوعي النفس ضاع
على الگاع طاح ابني على الگاع
بچه ومات من شلته بچه ومات
بالوداع هد حيلي بالوداع

بويه __ ماتدري بالطف والمحن
بويه __ باچر خواتك ينسبن
بويه __ ذباحك اليحدي الضعن

اشوي بعد بضلوع ابوك اترض حوافر
وعمتك زينب على الهزل تسافر
الضيم موهسه يبويه الضيم باچر

باچر سبي اعله الناگه __ وروس برمح نتلاگه
واتضل جثثنه اعله الگاع __ بيها الشمس حراگه

بويه علي .. بويه علي
ــــــــــــــــــــــــــــــــــــــــــــــ
الشاعر عباس المشبك

شَريد ، أبچيك يامولاي ؟؟
ياثوب الأشگه اعليك
إنت إختار ، كلشي يهون
بس كون التعب يكفيك
كلهن فدوه الك للموت
ياعطشان اريد ارويك !

أحس بالدنيا كلها خيام محروگه
و أتخَيل صدر وظلوعه مسحوگه
ياموقف يمر ابالي حتى ابچيك
من حسيت صدرك ينصعد فوگه

هاي اللچمه تضل بالروح
حسين بكُبره شو مطروح
من هدت عالِـخْيَـم خَـيل
گمت بطولك بس مذبوح

*يا مولاي ، اعذرني مابچيت*
*يامولاي ، من عطفك استحيت*
ــــــــــــــــــــــــــــــــــــــــــــــ

يلذّت واهس اعيوني
حزن يرسم درب لله
لو مامجلسك مولاي
البشر لاصام لاصلله
انه المابيه خير اوياك
وابلل ريج عبد الله

لو ماصدرك المرضوض بالحافر
براسي وداعتك كل خير ماصاير
اتخييل دنيا مابيها اللطم والنوح
ابدّل عمري كله بليلة العاشر

اخذو گلبي وفص العين
وانطوني الحرگه اعله حسين
شكراً يابو المسبيات
ممنونك ياأصل الدين

*يا مولاي ، اعذرني مابچيت*
*يامولاي ، من عطفك استحيت*
ــــــــــــــــــــــــــــــــــــــــــــــ

أشوفك وين ماأندار
و اتعذب بشرب الماي
أشوف الطف ، بركض الخيل
واذكرك من احير براي
جرح مااحمل إنت شلون
تتحمل سهام هواي

والأكثر هظمني وزَيّد العله
زينب ياخو زينب صعدت التله
و تُوَزَع ثوبك وجسمك نذر للخيل
تعال وشوف حيل الفاگده و عَدله

مانحمل من نسمع هاي
نسوانك تركض حفّاي
وبهالحر من يعطشون
وگبالك بدوا بالماي

*يا مولاي ، اعذرني مابچيت*
*يامولاي ، من عطفك استحيت*
ــــــــــــــــــــــــــــــــــــــــــــــ

أنه شلعان گلبي اوياك
من طبو عالمخيّم
فزغو بالضحك والنار
وخواتك طلعن اعله الدم
ياحيرتهن النسوان
ترگض؟ تبچي؟ تتلثم؟

آه يارجعت الميمون والصدمه
على ضهر المهر دمك يبو اليمه
وزينب تركض اتدورك اتطفي النار
تدور اطفال كلها تصيح ياعمه

طلعت حرمه بنص الناس
شافت مشهد ذبح الراس
وعدوانك صاحت يم عون
وين احسيينچ والعباس

*يا مولاي ، اعذرني مابچيت*
*يامولاي ، من عطفك استحيت*
ــــــــــــــــــــــــــــــــــــــــــــــ

نهر متبدي بس عطشان
وشمس بس ضايع افيايه
الراح ومارجع لام عون
انگطع راسه ونشف مايه
انگطع حبل الخيّم بجفاه
لمّن طاحت الرايه

مدري ابچي عليمن طاحت الخيمه
اعز واشرف نسه اتراكضن بالهيمه
ياناس الحچي اليثگل يريد اگلوب
كون انحس صدگ بحسين وبضيمه

مخلوقين انحب النوح
ونلطم لخيام المذبوح
وابقالك خادم ممنون
لمن الله يطلع الروح

*يا مولاي ، اعذرني مابچيت*
*يامولاي ، من عطفك استحيت*
ــــــــــــــــــــــــــــــــــــــــــــــ

الشاعر عباس كامل الزبيدي
والشاعر عباس المشبك

هناك غربه اهنانه غربه
اهنانه مات وماي يسگي
هناك ضامي انشلع گلبه
والله غربه

قاسم السقّاء جدّه امعطشينه
عايش الغربه الصدگ مثل احسينه
يذكر الطف ويلوم ابروحه
من يصب چتّال عم اسكينه

لا اسم ضل لاوطن __ قاسم
من البچي اعيونه طفن __ قاسم
عالبالصحاري اتغربن __ قاسم

*ياقاسم العطاء .. ارزقنا كربلاء*
ــــــــــــــــــــــــــــــــــــــــــــــ

كلشي شاف بعينه حيره
إستاحشت حتى الصحاري
ويبچي عالراحت أسيره
والله حيره

يشوف كل الناس غربه العطش ديره
عاش بالصحراء هظمتها الأسيره
والبواچي أحزان چانت للخرابه
الغربه وياهم مشت هاي الچبيره

وين مانلگه نهر __ قاسم
بهيمه و الصحرى عثر __ قاسم
هاي چويات الدهر __ قاسم

*ياقاسم العطاء .. ارزقنا كربلاء*
ــــــــــــــــــــــــــــــــــــــــــــــ

أبن هاشم عاش وحده
اتغرّب وشاف المصايب
ماي عنده وضامي جده
والله شدّه

عاش عمره بديره ماتعرف مقامه
ينگل الماي اويوزعه ابن الامامه
ياكل ابروحه النهر واركاض زينب
ماي يسگي وبالعطش ماتو عمامه

لو سمع طاري السبي __ قاسم
تلچم بگلبه العبي __ قاسم
عاش حيره ابن النبي __ قاسم

*ياقاسم العطاء .. ارزقنا كربلاء*
ــــــــــــــــــــــــــــــــــــــــــــــ

هاي من دون الليالي
شاف بيها حسين حاير
يموت سكته العاش غالي
والله تالي

هَظمَت النِسوان بالديره الغريبه
عاش محد شاف لو سامع نحيبه
مختنگ مايگدر ودمعه اعله خده
من شبابه الغربه وصلت حد مشيبه

ضاع بعيونه الأمل __ قاسم
مات مايمه الأهل __ قاسم
شوگه للديره إشتِعل __ قاسم

*ياقاسم العطاء .. ارزقنا كربلاء*
ــــــــــــــــــــــــــــــــــــــــــــــ

من يضوگ الماي بارد
شيذكر؟ العطشان جده
ترجع بعينه المشاهد
والله شاهد

يذكر الطف والعطش والنار والدم
وموقف العباس، ما رد للمخيّم
يترس الطاسه دمع لو راد يشرب
باقي من دون الأهل، لا ابو، ولا عم

شلون متحمل هضم __ قاسم
ساكت وكلشي يضم __ قاسم
والله يستاهل لطم __ قاسم

*ياقاسم العطاء .. ارزقنا كربلاء*
ــــــــــــــــــــــــــــــــــــــــــــــ

الشاعر عباس كامل الزبيدي
الشاعر عباس المشبك

ابتعد والگه الحزن بعيون صحباني
واردلك مستحي وتايب
اذكرك بالتعب بالعطش بلساني
اذكرك ماي ماشارب
استحي من يمي يلتمون خوّاني
وانت الوحدك اتحارب

استحي من چلمة البويه
يالمضحي بعلي الاكبر
فطر گلبي طريج السوگ
چي بيه وگفن الخدر

خايب يگلبي اخجل وانكسر .. حسين الضهر
عاري وخضيب
عدوانه فوگه اخيول وزلم .. اتطش وتلم
جسمه السليب
واخته الچبيره اتلم بالزغار .. واتطفي نار
مامن مجيب

*يارحمة الله ياحسين*
ــــــــــــــــــــــــــــــــــــــــــــــ

انت النادر الماتنعرض للسوم
تطلع احله من تعتگ
لگيتك راحتي وذخري ورَبع واحزام
انس الوحشه من اشهگ
حب فطره وتعب مرغوب ادعي يدوم
اذا مرتاح مااعشگ

ابو السجاد ياروحي
وحبيبي التارس اعيوني
اليجي مسيير ضوه اطمأنان
باچر من يدفنوني

مولاي احبك والله العضيم .. اقبلني غيم
موحب سراب
يمعلي شاني ومنطيني خير .. خيرٍ چثير
گد التراب
بس انت تاج الراس الوحيد .. والكل عبيد
لاهل القباب

*يارحمة الله ياحسين*
ــــــــــــــــــــــــــــــــــــــــــــــ

بعد لحد يسولفلي على الدنيا
وبعد ماهمني اياً كان
خلوني ارد انضف بالخيم گلبي
واشتم ريحت الدخان
شنهي امعزز ومن اگصد مگدّر
والعباس عالتربان

شنهي ابلا دفن ضلو
ثلثتيام عالغبره
شني گوّه بحصيره التم
ذاك احسين الشكبره

دنيا وعفتها وردتك امام .. خصم الكلام
انت الوحيد
عبدك حسبني المبدأ عليك .. واتباهه بيك
بين العبيد
يشتَدُ حُزني هذا الجمال .. فوق الرمال
يمضي شهيد

*يارحمة الله ياحسين*
ــــــــــــــــــــــــــــــــــــــــــــــ

عمر مابيه حزنكم ماله اي داعي
اصل الخدمه تربيتي
اول بذره خضّر جرحك ابگاعي
وصارت موكب امنيتي
حسبتك حسبت المسؤل عالراعي
واحسبني على نيتي

لو ماجرح اهل بيتك
چاكل خير مابيه
دلتني الدرب زينب
لمن مشت مسبيه

راحت غريبه بلاچف عضيد .. مربوطت ايد
وملاگه شام
تسمع ضحكهم فوگ السطوح .. المن تروح
سوگ ازدحام
رسمت طريق الممشه العجيب .. قبر الحبيب
زحف الجدام

*يارحمة الله ياحسين*
ــــــــــــــــــــــــــــــــــــــــــــــ

بچيت الغربتك من تطلب الناصر
وانت تحارب لوحدك
بچيتك من رجعت اعله الخيم حاير
عطاشه وماي ماعندك
التهضم من طحت واعيونك تكابر
افا ومحد يشد عضدك

لاماي حتى تشربه وتگوم
وزينب تگلك مو وكت نوم
واتهووس الذباحك الگوم
متانينك ايسلبون الهدوم
ماشفت زلمه بحيرتك هاي
مذبوح واختك يمك فياي
شافت مصايب مالهن راي
ايغسلون چف ذباحك بماي
ايصيحون فنّه ابن امچ يگوم

*يارحمة الله ياحسين*
ــــــــــــــــــــــــــــــــــــــــــــــ

الشاعر عباس المشبك

اتعطل لاتجي الوادم تشوفك دم
اتعطل لاتجي خل الضعن ملتم
كون الله يطوول عمرك بعاشور
وانگول الضعن ضل غاد ماجدّم

اسدوركم حلوات
مومال رض اسدوركم حلوات
رد عندك بنيات
لاينسبن رد عندك ابنيات
واخيام محترگات
باچر ذبح واخيام محترگات

افا وگللت معازيبك
رد يرحولك فدوه
مايسوون جيتك هاي
وانت الخوش والتسوه

رد لم الخيام .. وعبدالله خينام
لاتدنه لينه __ رد للمدينه
ها ياولينه __ رد للمدينه
ــــــــــــــــــــــــــــــــــــــــــــــ

رد خايف تطيح وتصعب الگومه
وماريد الضهر عطشان بالحومه
ثجيله بيوم واحد كلها تشرب موت
رد خلي الهواشم كلمن ويومه

خل ربعك احذاك
هيبه الربع خل ربعك احذاك
الراد يتعناك
ضل غاد والراد يتعناك
روح الله وياك
موطرده بس روح الله وياك

حبرهم من رگبتك دم
اعزوبية چذب والله
ناس اتحرمك امن الماي
طمع واصل لَ عبد الله

سفرة عطش هاي .. يحرمونك الماي
وانت السفينه __ رد للمدينه
ها ياولينه __ رد للمدينه
ــــــــــــــــــــــــــــــــــــــــــــــ

رد باچر خواتك ينسبن گوه
وراسك عالرمح وامچتفه الخوه
طولك ليش يتوزع حصص للناس
وانت امعزب بچبد الحسن توه

باچر يالحسين
فوگك زلم باچر يالحسين
بذيچ الصواوين
نار وبچي بذيچ الصواوين
سوگ ودواوين
نوگ وسبي وسوگ ودواوين

رد لبنيتك الضلت
عيش وعوف هاي الناس
احسن ماتجي وتسمع
الحگ ذبحو العباس

بالمعركه تشوف .. مگطوعه الچفوف
ومطفيه عينه __ رد للمدينه
ها ياولينه __ رد للمدينه
ــــــــــــــــــــــــــــــــــــــــــــــ

رد حافظ على وليداتك ولمهم
لكبرتك نشعه جدام الخلگ خلهم
ياهو اليسوه طيحت عصت السجاد
وسفه ودم الاكبر ينهدر يمهم

وليداتك اعزاز
رد بيهم وليداتك اعزاز
للخلفه تحتاز
من تنهضم للخلفه تحتاز
ماتلگه جناز
باچر تره ماتلگه جناز

عليك وليدك الاكبر
لخاطر دورة اعيونه
الحلو باخلاقه وبشكله
خايف لايذبحونه

هلبت عدل كون .. وموته اليذبحون
وانكف بچينه __ رد للمدينه
لاتدنه لينه __ رد للمدينه
ــــــــــــــــــــــــــــــــــــــــــــــ

هلا بجيتك شرف للينتضر لاكن
العلويات ياهو اليرجع وياهن
تعالنه بشرط لاطف ولا مذبوح
ولاشوفن حرم وي روس موتاهن

تسيورت الموت
كلش فشل تسيورت الموت
مامش هلا بصوت
من جرربت مامش هلا بصوت
مستحيه البيوت
من الخيم مستحيه البيوت

الخطار ايتلگونه
بگواك الله وامميه
استحه حتى الكرم لمن
سمع عطشانه علويه

عذراً يمولاي .. عالماضي والجاي
آخر حچينه __ رد للمدينه
ها ياولينه __ رد للمدينه

الشاعر عباس المشبك

إِذَا الشَّمْسُ كُوِّرَتْ * وَإِذَا النُّجُومُ انْكَدَرَتْ * وَإِذَا الْجِبَالُ سُيِّرَتْ * وَإِذَا الْعِشَارُ عُطِّلَتْ * وَإِذَا الْوُحُوشُ حُشِرَتْ * وَإِذَا الْبِحَارُ سُجِّرَتْ

انضمت الكون اتعطلت __ عالكوكب خف جدم الناس
ماكو اجناح ايلوح السما __ بالطف ضل ايطير الراس
ومن سمعت زينب هلهلت __ شممر ذرعانه العباس

طب شايل اسم الله بچفه الحمد
والشارد من سيفه يخوفه بعبد
بالصيف وتتراجف طاح البرد

شمر سيفه وشمر طاسه .. يذبح بريشات راسه
ابو فاضل
قاده من اعيونه خرّت .. زلم بس اهدوم ضلت
ابو فاضل
والشمر من تاه رايه .. بدّل السيف بعبايه
ابو فاضل

*ابن قتال العرب.. الله يستر لو غضب*
ــــــــــــــــــــــــــــــــــــــــــــــــــــــــ

فَلَا أُقْسِمُ بِالْخُنَّسِ * الْجَوَارِ الْكُنَّسِ * وَاللَّيْلِ إِذَا عَسْعَسَ * وَالصُّبْحِ إِذَا تَنَفَّسَ * إِنَّهُ لَقَوْلُ رَسُولٍ كَرِيمٍ * ذِي قُوَّةٍ عِنْدَ ذِي الْعَرْشِ مَكِينٍ

لعيونه القران انكتب __ بچفه الله يعذب العاصين
من طارييه الماي انخطف __ مالحگ يوصل للطين
التعبان ابتربيته علي __ شتضنون ايعوف احسين

عباس ابن الجان امخووف العرب
ابنص الماي وضامي بس ماشرب
بأذن الله امنصبينه للخوه رب

حيدره بخيبر توقّع .. من گفا عباس يطلع
ابو فاضل
هذا گطاع الگناطر .. صيته گبل اصياره صاير
ابو فاضل
چنه ليلة شته ويرعد .. منه حتى الطين يلبد
ابوفاضل

*ابن قتال العرب.. الله يستر لو غضب*
ــــــــــــــــــــــــــــــــــــــــــــــــــــــــ
فَأَيْنَ تَذْهَبُونَ * إِنْ هُوَ إِلَّا ذِكْرٌ لِلْعَالَمِينَ * لِمَنْ شَاءَ مِنْكُمْ أَنْ يَسْتَقِيمَ * وَمَا تَشَاءُونَ إِلَّا أَنْ يَشَاءَ اللَّهُ رَبُّ الْعَالَمِينَ

طبلهم راهي ومبتسم __ وبراسه اشمحلاته الريش
ماطللع سيفه امن الغمد __ تسيوره امسيير عالجيش
ضل يستنگي بسوگ الزلم __ لاعامل لاگلهم بيش

ايگلوله ابصطراتك چفك عرف
من حيدر ملينه انوب الكلف
حدر الخيل القاده تزحف زحف

زلم يبست زلم شردت .. بالنخل بالماي لبدت
ابوفاضل
بالشعر من تذكر ايده .. تنترس دم القصيده
ابو فاضل
كون شارب ماي كلهم .. للنجف توصل جثثهم
ابوفاضل

*ابن قتال العرب.. الله يستر لو غضب*
ــــــــــــــــــــــــــــــــــــــــــــــــــــــــ
إِذَا زُلْزِلَتِ الْأَرْضُ زِلْزَالَهَا * وَأَخْرَجَتِ الْأَرْضُ * أَثْقَالَهَا وَقَالَ الْإِنْسَانُ مَا لَهَا * يَوْمَئِذٍ تُحَدِّثُ أَخْبَارَهَا * بِأَنَّ رَبَّكَ أَوْحَىٰ لَهَا

العباس اليصعد للوحي __ اتسولف بيه كل الآيات
ياهو المثله يحصل شرف __ كافل خدر العلويات
ومن ايرف بچفوفه اللوه __ تتنزل كل الرايات

من يزعل قل هو اللهُ احد
اليتلاگه وياه ملگه اييس بعد
واليشرد يتفاخر زلمه وشرد

والجرف بالنخل چلّب .. حتى ضهر الطين حدّب
ابوفاضل
شردو افتر ولگاهم .. والنهر يركض وراهم
ابوفاضل
بس امر ربك يريده .. يعيش من ينحز وريده
ابو فاضل

*ابن قتال العرب.. الله يستر لو غضب*
ــــــــــــــــــــــــــــــــــــــــــــــــــــــــ

وَقِيلَ يَا أَرْضُ ابْلَعِي مَاءَكِ وَيَا سَمَاءُ أَقْلِعِي وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ ۖ وَقِيلَ بُعْدًا لِلْقَوْمِ الظَّالِمِينَ

من بعد القصه استشهدت __ وبزينب خياله اتعيل
احسين ايذبحونه ابضهر __ واتدوس اعله ضلوعه الخيل
الحگني ايربطون الحرم __ لوچلچل عباس الليل

الحگلي يخويه الليل عسعس
امن الدخان بالگوه انتنفس
اجت خياله بالليل اتجسس
زلم عالخدّر اشلون اتدنه
الحگ مادري شيردون مننه
ربطونه ابحبل گومو يهلنه
ومن چف الحسين انباگ محبس

الشاعر عباس المشبك

اغافل روحي وانسه الصار بحسين
ويندهني السبي ودرب الشماته
مصيبه اليعشگ الطف يبقه مشدوه
يفز كلما يردن ذكرياته


عطش گلبي ونهر صلله__قصر گد ريج عبد الله
لحد هسه الرمل بجروحك يعيل
يذكر صدرك امن يلاگي غربيل

يبو ارقيه العشگ منك__اسلهم لو حجو عنك
عاشورك يمر ويفرفح الطين
فتحت باب بوجوه المساجين

حلم
واشوف بوجهك الگمره
تبلل ريجك الزهره
وگلبك ماطلع بره
حلم

گمر
اخييك يوگف بصفك
وختك من تجي تعرفك
باقي المحبس بجفك
كمر

أبا عبدالله.. ويلاه ويلاه
ــــــــــــــــــــــــــــــــــــــــــــــــــــــــ

افتح باب خلگي بطيحت الليل
واضم قرص الشمس من حافر الخيل
الگمر بالماي عاكس گتله عباس
گلي استشهد بنفس التفاصيل

شفت الليل رك حيله__خجل من طلعت الشيله
مره ومذبوح اخوها اشلون ترثيه
رسمت عالرمل راسه وتحاجيه

اجيت وماي جبتلها__شربي الرگبه گلتلها
بچت واتگل لخوها انشربك منين
ارشه اعليك چتالك يالحسين

عطش
واخته اتگله ماتگدر
تشرب سورة الكوثر
وجهه مرايه ومفطر
عطش

حرت
واگل للليل خندفنه
يگلي اضلوعه ماهنه
ضوه مطشر شلمنّه
حرت

أبا عبدالله.. ويلاه ويلاه
ــــــــــــــــــــــــــــــــــــــــــــــــــــــــ

كرهت الغبشه چي من غبشه يرحون
انعگد خيط الصبح بيد الغريبه
المييت ينفصل بس السبي شلون
الما وياه عرف ممشاه مصيبه

موكلهن تره صعدن__اكثر من شهر يمشن
عبي ومچتفه بهيده يصيحن
اذا يعثر جدم كلهن يطيحن

شفت روس بسمه انشالت__وعمايم عالرمح طاحت
گلت وين احنه شو تتلافت النوگ
اضن گوطر ضعن زينب على السوگ

سبي
شفت الكون ماشفته
اعيون اتسولف بسكته
راس ومستحي امن اخته
سبي

جزع
عبر عقلك حچي الواقع
غمض عينك وباوع
خدر بين الزلم طالع
جزع

أبا عبدالله.. ويلاه ويلاه
ــــــــــــــــــــــــــــــــــــــــــــــــــــــــ

المييت من تدفنه اخوانه يرتاح
ليش اهل القره يدفنون الحسين
سمه جابو يلمون النجم طاش
ونزل مثل الضوه بحلگ الروازين

هوه الحافر طفه اشموعه__رسم شباچه بضلوعه
الخريف استفحل وجاس التعابير
عمايم خضره طبت للتنانير

ليش الگاع دافنته__الكواكب كلها رايدته
مو قصة گبر راده الله نيشان
المايعشگ جرح مايشعر انسان

عشگت الخيمه والبيها.. واحس دمعي يطفيها
بمضيف اهل الخيم تسيورت النار
اليطيح البيت مامحسوب خطار

جمر
وطفل خايف طلع دمه
عثر فوگ الجمر جدمه
وكلها تصيح ياااعمه
جمر

ركض
وزينب موطن النازح
بعبايتها الضعن طايح
تلبد الجاي والرايح
ركض

أبا عبدالله.. ويلاه ويلاه
ــــــــــــــــــــــــــــــــــــــــــــــــــــــــ

بس احسين سوها ورضه يموت
حتى انعيش موگد ناره عاشور
تعوضه بيا بچي اليطيك عباس
حنين ويرضه من اتگله مشكور

بيش اتعوض اجروحه__شتنطي السلمك روحه
خل كلمن يسولف وي ضميره
زلمه اشكبر لموه ابحصيره

ماضل بيه كتر سالم__قميصه انباگ ياوادم
يجالع والتفت صوب الصواوين
يسمع صوت طلعوها اخت الحسين


هظم
ماخلصانه الطلابه
فشله السيف بگرابه
اه يحسين ومصابه
هظم

وكت
جثه ومحد بحاله
يضحك فوگه چتاله
نجم ومطشر اعياله
وكت

أبا عبدالله.. ويلاه ويلاه

الشاعر عباس المشبك

الله مبارك بمسرانه
نتلگه الضعن عوانه
والبيه خير يمشي ويانه
والرايه بفخر مشيوله

ابوي ايسولف بتربيته
گال ابني مشه وزتيته
والبيه خير يفرغ بيته
والمشاي مابيه لوله

حياااة
ابلا مشي الزوار ماتسوه الحياة
انطر صحاري وماتهمنه الضاريات
ومثل زينب وين مانتعب نبات

جرح الگلب ماينلظم
مشي ولطم شوگ وهظم
واخر محطه احسين يتلگانه واخوانه

نرسم معانات الخيم
نار وسبي وطيحت علم
ممشه ضعن مابي زلم حدايه عدوانه

مادام زينب تمشي انه امشي
ــــــــــــــــــــــــــــــــــــــــــــــــــــــــ
شايب طلع من الديره
ناوي وعاف شور الخيره
مهتم وتدفعه الغيره
يسابگ اويه المو حله

طفل بالدرب جنه امرايه
طير مرافگ المشايه
شايلته امه ومغشايه
والدرب الصدگ تندله

عجييييب
بكل درب نگلت جدم لله عجيب
شفت شايب ماخذه الحب والنحيب
اتسأله وين يگول رايح للطبيب

عشگ النفس.. ضل بالشمس
مذبوح مييت ينرفس
وتريد ماروحن مشي واتلگه نسوانه

چم يوم زينب من ترد
تلگه الزلم فدوه لعبد
حتى الطيور البالشجر تطلع مشي ويانه

مادام زينب تمشي انه امشي
ــــــــــــــــــــــــــــــــــــــــــــــــــــــــ
چن احسين مييت توه
مذبوح الضهر يتلوه
واجدام الضعن تتجوه
ويشوف السبايه بعينه

والعباس يم الضفه
عاف الماي هوه وچفه
مشكور ابواحجايه الكلفه
رب اهل الوفه منصبينه

خلوووود
بس الحسين وجذب مثله خلود
ينعشگ حد الجنون ابلا قيود
استشهد وشاء الله يخلقله حشود

دوه وضوه وماي وهوه
والله خلقنا النينوى
وابو الجواد الضامن امبارينه بانفاسه

متروس حب هذا الدرب
يشبه شرايين الگلب
من نعطش نحاجي الگمر يروينه بحساسه

مادام زينب تمشي آنه امشي
ــــــــــــــــــــــــــــــــــــــــــــــــــــــــ

احسن صحبه بالمشايه
بس احسين عدهم غايه
خطو بالمواقف ثايه
حب واخلاص لابن الزهره

صاحب عندي ياخيعوني
شايل حملي گبل امتوني
جابه الله رزق لعيوني
ويحثني بطريق العتره

عزااااء
نبتشر من نسمع بطاري العزاء
واحد ايهييج الثاني اعله البكاء
والله احسن صحبه صحبة كربلاء

من تلتقي بصاحب صدگ
عالخيم يطفه ويحترگ
من يسمع بطاري السبي يصبن ضوه اعيونه

هذا الرزق لاهل الوفه
صحبان دين وعاطفه
واليخدم ويمشي وبچه ولطام خيعونه

مادام زينب تمشي آنه امشي
ــــــــــــــــــــــــــــــــــــــــــــــــــــــــ
معازيب الدرب والخدمه
مثل الحسن بيهم همه
شايب شفته فارش هدمه
يعطل الزاير بعوجيته

ناس اگلوبهم مفتوحه
والثگلان من اجروحه
لو زاير اجه ترد روحه
بالخدمه الصدگ عافيته

كرااااام
العزبو زوار ابو اليمه كرام
امنيتهم زاير بفيهم ينام
گد كرمهم عزبو حتى الحمام

من بيتك لحد كربلا
بكل خطوه تلگالك هلا
مدلل الزاير والخدم تتباهه بجدامه

شكراً الى كل الخدم
كل المشو كلمن لطم
بعين الزچيه الواسه ذاك الحرگو اخيامه

الشاعر عباس المشبك

انتضرتك يالغريب.. گلي بيا درب ضايع
مرض ماله طبيب.. فراگك للگلب شالع
سحن روحي النحيب.. ومنك كلمه ماسامع
عماتك خذوهن.. بحبال اجتفوهن
ماتلحگ يمهدي.. اطلع طلعوهن

انه ماريد احجي بس يامولاي
احسين يعطش والأبل تشرب ماي
خيل ركضت.. نار شبت
وزينب اتطيح وزلم يمها هواي
گوم جيب بساع ثار العايله
وتمشي بس مشيتها زينب مايله

امنية شائقٍ يتمنى المهدي
.......
التهضمني ادري بيك.. وحدك تبچي بالهيمه
محد حن عليك.. وسولف گلبك وضيمه
دليني ارد اجيك.. واشوف اشسوت الخيمه

ليش الثاره ثاري.. ساكن بالصحاري
يلطم وحده يلطم.. عالسحگنه عاري

بالي يمك يالرحت مارديت
بهيمه گاعد وانت من اهل البيت
اه يتعبي.. اشتاگ گلبي
طييح الساني النشد ماخليت
وياكل بگلبي الحجي الماگايله
......

چن دوب الصبر.. واگولن هسه نتلاگه
اخاف امن العمر.. يگضي وماگضه فراگه
تهضمني شكثر.. زينب صعدت الناگه

والراحن سبايه.. عبايه تجر عبايه
يغايب فوگ الگبور.. حمر ليش الروايه

اعذرني من فرگاك اسولف مجبور
شلون ترضه احسين راسه بتنور
وبالبراري.. جسمه عاري
وعمتك عالهزله بالسوگ تدور
والنجس راس ابو فاضل شايله
.......
شكثر طال الزمان.. وثارك ياكل بگلبك
اليحب ماله مچان.. ندري المالمغرب يتعبك
يعت بينه الحنان.. غايب ضاهر انحبك

ابو اجروح الجبيره.. غريب ابلايه ديره
زلمه محمل اهواي.. شكبر ثار العشيره

ليش يبن الحسن ماعندك دار
بيوتنه الكم واحنه عدكم خطار
شيل سيفك.. جيب حيفك
وصلت الكاروك عبدالله النار
وخيل صوب اخيام زينب صايله


الشاعر عباس المشبك