مرة نحكو انا وهبة وريهام أيا وكانت تصب المطر وانا ندعي وهوما يقولو آمين كنا قاعدين في البالكون، بقيت ندعي بالزوج الصالح وذكرت الصفات الجميلة سواء في الشكل ولا في الشخصية ولا في الرزق في كللللش بالتفصيل وهوما على كل تفصيلة يقولو آمين، حتى وين وصلت قلت اللهم ارزقني اياه غني الخُلق والمال وكنت راح ننتقل لتفصيلة أخرى حتى حبستني ريهام قاتلي أيا ويرزقك ربي واحد يدز في الدراهم برجليه من كثرتهم وساكن قصور بالصح بخيل؟! قاتلي كملي معاها "كريم" هكا تكوني دعيتي صح وحرفيا لظرك مزالني نتفكر الأمر والطريقة الي قالتهالي بيها لأني مكنتش نتوله🌟🥹

تفكرت حاجة!
شفتو كي تشوفو شخص يحط ادعية ولا ديما ينشر قرآن، لابس حجاب وووووو متقولوش راهو ملتزم راهو شخص متدين راهو شخص يليق قدوة والكثير من هذا الكلام ،متشوفوش انفسكم بعين النقص وتذموها فقط لأنكم شفتو مظهر ولا فعل معين!! لانه واحد ما علابالو وش في قرارة نفس الاخر تشوفيها لابسة حجاب وحتى ممكن منقبة بالصح هي تصارع في نفسها وهواها وهي ثاني كيفك في صراع المجاهدة ومحاولات تهذيب النفس فقط هي ربي انعم عليها باللباس الشرعي! تشوفي وحدة تحط في ادعية وقران مش معناه راهي ملازمة كتاب ربي وحافظة ومن السجادة متنوضش وووووو برك هي تحاول تلقى طريقة تنقص من ذنوبها وعسى ربي يغفرلها في جرة فلان سمع ولا قرا حاجة من عندها!! حرفيا المظاهر والمواقع خداعة وحنا فقط الي نعرفو رواحنا ونعرفو البلاصة الي رانا نجاهدو في رواحنا عليها لأنه لولا ستر ربي راه واحد ميشوف الآخر بالنظرة الي راهو يشوفو بيها!

ربي يهدينا لأحسن الأخلاق ويردنا اليه ردا جميلا ويغفر لنا ذنوبنا جميعا ونحن في عفو وعافية 💗🌟

علابالكم؟
كي تكونو تديرو حاجة حرام ولا تعتبر ذنب وكذا أهم شيء تكونو مستعرفين لأنفسكم تكونو عندكم الرغبة في التوبة تكونو نادمين شغل هاذاك الشعور تاع ايه راني ندير في حاجة غالطة بالصح ياربي اهديني وسامحني وعاونني نبطلها!! مش نكونو صحاح وجه نديرو الذنب ونزيدو نجهرو بيه وفوق هذا نقنعو الناس بلي وش من حرام فيه!!! نتي تتفرجي مسلسل؟! ايه نتفرج وربي يهديني ونحبس وننحيهم من حياتي خلاص، نتي تسمعي اغاني؟! ايه وعلابالي حرام وربي يزرع كرههم في قلبي، نتي تلبسي سروال؟! ايه ربي يردني اليه ردا جميلا ونلبس كيما امهات المؤمنين، نتي تديري مكياج كي تخرجي؟ ايه وربي يهديني ويرزقني توبة نصوحة ونحبسو خلاص! شغل مرانيش نقلكم ديرو هاذي الاشياء وفقط تكون عندكم نية التوبة وانما حبيت نقلكم كي تكونو غالطين استعرفو وارجعو لربي مش تاخذو موقف وتعتبرو الامر شخصي وراني نحكي بالمخاطب لاني هكا نحس روحي نعرف نشرح والا راني نقصد في روحي حتى انا معاكم💕

اشخاص في محيطي كي يقولولي على حاجة ونقلهم لا منديرهاش ولا سواء على الحجاب ولا الاغاني ولا اشياء عديدة يضحكو عليا ويقولولي الكثير من الكلام الجارح هاذاك الي يجي على شكل استهزاء بالصح حرفيا منتأثرش وحتى ولو ساعات يقيسني الأمر نبقى نقول عادي راكي تجاهدي في نفسك هوما معلابالهمش بالحرب الي راهي في قلبك مزال برك مش متولهين وكذا بالصح حرفيا معلاباليش وكتاه الناس تعرف الخطأ من الصواب وتتعلم متناقشش في حاجة باينة حتى ولو نتا مش عاجباتك متناقشش ومتعطيش رايك الي معندو حتى فايدة والي قادر يجرح شخص وخاصة كي يكونو هاذ الأشخاص من عائلة ولا صديقات ولا..... وتلقاو هذيك العبارات تاع ايه يخي نتي تلبسي كيما العجائز ايه نتي حتى في الأعراس تحوسي تكوني كيما الأتراك تاع الضيعة، يخي نتي متدينة زعماااااا

ربي يبينلنا الحق ويرزقنا اتباعه ويجعلنا أجمل نسخة من أنفسنا ويرضى علينا ويرزقنا الجنة💗

شيء آخر!!
شفتو كي حركات قرمزلي واحد الليلة على المسلسلات وكيفاه انها كي كانت متحبهمش راه ماشو الأمر بيدها وانما بيد ربي الي كرهها فيهم والي قلبها بين ايديه، هدرتها مراحش من بالي ابدا ابدا وليت في أي شيء نقول انا راني ندير في هاذيك الحاجة لازم نحمد ربي لانه هو حببني ووفقني ليها ،وهذيك الحاجة راني واقعة فيها ندعي انو يهديني ونحبسها حرفيا كلامها أثر فيا وكيف اننا مش بهوانا نديرو الحاجة وانما بتوفيق ربي لينا، متنسبوش أي شيء لأنفسكم وخلو ديما الفضل لربي واشكروه على النعم وادعو يديمها عليكم🩷

صح قرمزلي وقتها حكات عن خطأها وكيفاه استوعبت الامر بالصح انا عن نفسي فادتني ونبهتني لأمور مكنتش فايقة ليهم وهذا علاه نحب القنوات تاع التلغرام😔🌟💕

اللهم اجعل ابتهال في عنايتك التي لا تغيب، وامنحها من لطفك ما يهون عليها كل أمر ومن نورك ما يدلها على أجمل الطرق، اللهم ارزقها قلبا راضيا، ونفسا مطمئنة، وأياما تحمل لها من المفاجآت الجميلة ما لم تخطط له ووفقها لما فيه خيرها، واصرف عنها ما لا يليق بها، واكتب لها عمرة قريبة تدمع لها عيناها من شدة الفرح وافتح لها أسباب الوصول من حيث لا تحتسب، وارزقها شرف الوقوف بين يديك في أطهر البقاع يا رب.

رب يرزق ندى من واسع فضله اضعاف مضاعفة🩷

‏الشيء الأكيد :
أن الله على كل شيء قدير مهما كانت الظروف مؤلمة والصعوبات قاسية حتى لو استحالت المسببات في نظرك فهو سبحانه قادر أن يغير كل شيء لأجل دعائك وما سكن قلبك وتمنيته فأحسن الظن به وتمنى وبالغ في طلبك وارفع سقف توقعاتك فأنت تطلب أكرم الأكرمين وأرحم الراحمين💕💗🌟

ومَن يَصحب الدُنيا يكُن مثل قابض
‏على الماءِ خانتهُ فُروجُ الأصابع

ليوم راح نحكيلكم عن مرض التيتانوز🌟
ال tetanus ولا كيما نعرفوه الكزاز، هو عبارة عن maladie bactérienne تسببو بكتيريا اسمها clostridium tetani والي تعيش في التراب والحديد المصدي والحاجات الملوثة بصفة عامة ،هاذي الاخيرة تدخل لجسمك ويحدث هذا كي نتا تلمس حاجة تاع حديد مصدية ونتا تكون مجروح ولا ممكن الاداة الي نتا لمستها سببتلك الجرح على حساب يعني سواء تكون وضعت قدمك على مسمار ولا لمست ادوات حديدية قديمة وما إلى ذلك، اول ما تدخل راح تبدا تاطاكي في SNC تاعنا والي هو الجهاز العصبي المركزي وتفرز سم اسمو Tetanospasmin الي يخلي العضلات تتشنج وغالبا ما تبدا هاذي التشنجات بعضلات الفك أيضا تيبس في عضلات الرقبة والظهر، اذا مصراش تدخل وتم العلاج بسرعة قادر توصل التشنجات لعضلات التنفس وهنا وين يولي المرض قادر يقتل الشخص وبشكل عادي جدا
#معلومةwithابتهال🌱

الحياةُ ليست ثقيلةً في ذاتها ولكنها تثقُلُ حين نُحمِّلها ما لا تحتمل ونُعلِّقُ قلوبَنا بها حتى نظنّها الغايةَ لا الطريق ،فمن تعلّق بها تشبّثَ بكلِّ تفصيلةٍ فيها، ففرحه مُعلّق وحزنه مُضاعف وخيبته موجعة لأنه أراد منها كمالًا لم تُخلق له💗🌥️

يقول لا بأس
والبأس كله يقبع في صدره والله!

لا زِلت؟
- لا، زُلت
وحالُك؟
- حَالِك
وصَديقك؟
- صدّ عنّي
وشريكك؟
- شرًا كَان
وأحلامك؟
- مُحالة
وحروفك؟
- فرّت منّي
تأقْلَمت؟
- تقلَّمت أجنحتي!