كل زول حر في عيونو

زول يشوفك عالي جداً
وزول تحت فردة مداسو
يخت مقامك ويمشي فيك

زول ببيعك بالرخيصة
وزول يبيع دنياو وروحو
وبالمقابل يشتريك..

زول بيفرح لما تفرح
وزول تضلم كل حياتو
لما شاف فرحة عِنيك..

زول يفوتك رغم حاجتك
وزول قبل تنده يجيك..

زول يمشيلك مصالحك
وزول يحاربك
وفجأة يرجع ليك وإصالحك
شان يعرقل ليك مشيك..

ناس غريبة..

القريب يشمت عليكا
والغريب يهتم بيك..

القريب سرك بمرقو
والغريب بيضاري ليك..

القريب بتمنى موتك
والغريب داك روحك فيك..

ما البُعُد فيهو المحنة..
والقُرب بنبش ملامحك
وبكشف المستور لديك...

كون بعيد..

ياخ كون بعيد..
وأبعِد من الناس القُراب

إيديك بيبنن ليك حياتك

( ما حتلقى الببني نفسك غير
إيديك)..

رجليك بسندن جتتك

وشان خطوتك تقدر تقيف
ما الا يبقى يبقى معاك شريك

قلبك.. وطيبتك
ديل مصيبتك

موضة الريد والمحنة
والهداك شان حبو جَنا
والمرق من اهلو طشة
بي سبب شك او مظنة
والبلوم القالوا غَنا..
وايييييك واييييك...

ديل زمان ماتن وحاتك
مافي زول بحمل صفاتك

مافي زول ضايق جروحك
الا ذاتك..
لوكو صبرك..
الله هو القادر يقويك...
.
.
.
.
.
مُش عليك الله؟؟
صاح واللا ما غلط؟!

مزاجاتك مزاجاتي
بتعشق إنتا ريحة الطين
قعاد القيف..شراب القهوة
في الضهرية تتقريف ملاقاتي
مزاجاتي
على شاطئ البحر بسرح
وبكتب في الرمال أحرف
تغير الموية من إسمك
تجي وتسرق كتاباتي
مزاجاتك
بتزعل إنتا من ضحكي
وكت مايراوغ الكتمان
ويخفي وراهو دمعاتي
مزاجاتي
بحس بي إني مخنوقة
وكت ألبس قناع الدس
وأدس منك معاناتي
.
.
مزاجاتك مزاجاتي..
.
.

رويدا :

عاد ياصحبة كان أصفر صفارو يراري ..
من الجنة أظن بعجلة قام سداري ..
كان شوفتيهو آب وجنات تقول وآ ناري ..
كان أيقنتي جكسنا الجداد ونباري ..

مرام العبد :

شكلو الود وسيم راقي ونبيه وحضاري
وعاد ياحليلنا نحنا اللي الجداد بنباري
الواحد مفلس ووشو دايما صاري
من أمدر لحدي العاصمة بجي كداري

###
ﻣﺤﻤﺪ ﺍﻟﻤﺎﺯﻭﻥ :
ﺣﻜﻢ ﺍﻟﻘﺪﺭ
ﻣﺮﺍﺕ ﻳﺠﻴﺒﻚ ﻭﺍﻧﺖ ﻣﺎﻙ ﺣﺎﺳﺐ ﺧﻄﺎﻙ
ﻳﺎ ﺟﺎﻳﻪ ﻣﻦ ﺑﻠﺪ ﺍﻟﻤﻠﻮﻙ
ﻏﻠﻄﺎﻥ ﻗﻠﻴﺒﻲ ﺍﻻﺷﺘﻬﺎﻙ؟؟
###
ﻣﺮﺍﻡ
ﺣﻜﻢ ﺍﻟﺰﻣﻦ
ﻣﺮﺍﺕ ﺑﻨﺴﻴﻚ ﺍﻟﻤﻌﺎﻙ
ﻭﻳﺸﻴﻞ ﺧﻴﺎﻟﻚ ﻭﺇﻣﺸﻲ ﺑﻴﻚ
ﻟﻲ ﺯﻭﻝ ﻫﻨﺎﻙ ..
ﻭﻳﻮﻧﺴﻚ ﺭﻏﻢ ﺍﻟﺒﻌﺎﺩ
ﻭﺗﺤﺲ ﺑﻴﻮ ﻣﺎﻟﻚ ﺟﻮﺍﻙ
##
ﻣﺤﻤﺪ ﺍﻟﻤﺎﺯﻭﻥ :
ﺣﻜﻢ ﺍﻟﻘﺪﺭ
ﺭﻏﻤﺎ ﺻﻌﺐ ﺗﻠﻘﺎﻙ
ﻣﺮﺗﺎﺡ ﻣﻦ ﺟﻮﺍﻙ
ﻟﻜﻦ ﻭﻛﺖ ﺷﻮﻗﻚ ﻳﻔﻴﺾ
ﻭﺗﺰﻛﺮ ﺍﻳﺎﻡ ﺍﻟﻤﻼﻙ
ﺗﺴﺮﺡ ﺑﻌﻴﺪ ﺟﺎﺭ ﺍﻟﺸﺮﻳﻂ
ﻟﻲ ﺯﻛﺮﺓ ﺍﻟﺤﺐ ﺍﻻﺯﺍﻙ

###
ﻣﺮﺍﻡ
: ﻣﺎ ﺍﻇﻨﻮ ﻳﺎﺥ ﺑﺈﺫﻳﻚ ﻗﺼﺪ
ﺍﻟﺤﺐ ﺑﻠﺨﺒﻂ ﻣﺤﺘﻮﺍﻙ
ﺑﻴﻌﺬﺑﻚ ﻟﻮ ﺭﺩﺗﺎ ﺯﻭﻝ
ﻭﺍﻟﺰﻭﻝ ﺩﺍ ﺯﺍﺗﻮ ﺑﺮﻳﺪ ﺳﻮﺍﻙ
ﺑﻤﻼﻙ ﻓﺮﺡ ﺇﻥ ﻛﺎﻥ ﺑﺮﻳﺪﻙ
ﻭﺑﺎﻗﻰ ﻟﻴﻚ ﺃﻗﺮﺏ ﻣﻦ
ﺍﻟﻨﺎﺱ ﺍﻟﻤﻌﺎﻙ ..
###
ﻣﺤﻤﺪ ﺍﻟﻤﺎﺯﻭﻥ :
ﺯﻭﻻ ﻫﻮ ﻛﺎﻥ ﻟﻴﻚ ﺍﻟﻔﺮﺡ
ﺍﻟﻨﺴﻤﻪ ﺍﻟﺮﻭﺡ ﻓﻲ ﺩﻭﺍﻙ
ﻛﺎﻧﻮ ﻫﻤﻮ ﻳﺴﻌﺪ ﺩﻧﻴﺘﻚ
ﻣﺎﻫﻤﻮ ﻳﻨﺴﻴﻚ ﻣﺤﺘﻮﺍ ﻙ
ﺍﺧﺘﺮﺗﻮ ﻭﺣﺪﻙ ﻟﻴﻚ ﺳﻨﺪ
ﺍﺧﺘﺮﺗﻮ ﻭﺍﻋﻲ ﻭﺑﻲ ﺭﺿﺎﻙ
ﻣﺎ ﺣﺴﺒﻨﺎ ﺣﻜﻢ ﺯﻣﻦ
ﻳﺘﻬﺪﻡ ﺍﻟﻘﺎﻡ ﻣﻦ ﺑﻨﺎﻙ
###
ﻣﺮﺍﻡ
ﺍﻟﺤﺐ ﺍﺫﺍ ﻣﺮﺿﻚ ﺯﻣﻦ
ﻣﻤﻜﻦ ﻫﻮ ﺯﺍﺗﻮ ﻳﻜﻮﻥ ﺩﻭﺍﻙ
ﻭﺍﻟﺤﺐ ﺍﺫﺍ ﺑﺎﺭﻳﺖ ﺧﻄﺎﻭ
ﻣﻤﻜﻦ ﻳﻮﺩﻳﻚ ﺍﻟﻘﻤﺮ
ﻣﻤﻜﻦ ﻳﺴﻮﻗﻚ ﻟﻠﻬﻼﻙ ...
ﺩﻭﺭ ﺍﻟﺒﺪﻭﺭﻙ ... ﺑﺤﻔﻈﻚ ..
ﻭﺍﺑﻌﺪ ﻋﻦ ﺍﻟﺰﻭﻝ ﺍﻷﺑﺎﻙ ..

###
ﻣﺤﻤﺪ ﺍﻟﻤﺎﺯﻭﻥ :
ﺳﻤﺖ ﺍﻟﻨﺴﺎﻳﻢ ﻓﻲ ﺍﻟﺨﻤﻴﻞ
ﺑﻲ ﻟﻮﺣﺔ ﺍﻟﻘﻠﺐ ﺍﻟﻬﻮﺍﻙ . ﻭﺍﻟﺪﻧﻴﺎ ﻛﻨﺖ ﺯﻱ ﺗﻘﻮﻝ
ﻧﺎﺳﻴﺎﻙ ﻣﺎ ﺣﺴﺒﺖ ﺷﻘﺎﻙ
ﻓﺮﺣﺎﻥ ﻭﺟﻨﺒﻚ مشتهيك
ﺳﻄﺮﺗﻪ ﺗﺎﺭﻳﺦ ﻓﻲ ﺍﺷﺘﻬﺎﻙ
ﻟﻲ ﻟﺤﻈﺔ ﺍﻟﻔﺮﺣﻪ ﻭﺍﻟﻮﺍﻟﺪﺓ ﺟﻨﺒﻚ ﺑﻲ ﺣﺪﺍﻙ
ﻭﺑﻘﻴﺖ ﻫﺴﻊ ﻳﺎﺥ ﺑﺮﺍﻙ

###
ﻣﺮﺍﻡ
ﺍﻧﺎ ﻣﺎ ﺑﺮﺍﻱ
ﺍﻧﺖ ﺍﻟﺒﺮﺍﻙ ...
ﺍﻧﺎ ﺍﻟﻠﻪ ﻭﺍﻟﺼﻼﺡ ﻣﻌﺎﻱ
ﻭﺍﻟﻮﺣﺪﺓ ﻭﺍﻟﻬﻢ ﺩﻳﻞ ﻣﻌﺎﻙ
ﻗﻠﺒﻚ ﻭﻻ ﺗﺨﻠﻴﻬﻮ ﻫﺶ
ﻭﺍﻭﺍﻋﺎﻛﺎ ﺍﻭﻋﺎﻙ
ﺗﻨﻜﻤﺶ ﺷﺎﻥ ﻗﻠﺒﻚ
ﺍﻟﺴﺠﻤﺎﻥ ﺍﺫﺍﻙ
ﺍﻓﺮﺩ جناح ﺍﻟﺤﺐ ﻭﻃﻴﺮ
ﺍﻟﺪﺍﺭ ﻫﻮﺍﻙ ﺑﻠﺤﻖ ﺳﻤﺎﻙ
ﻭﺍﻟﺪﺍﺭ ﺭﺿﺎﻙ ﺑﺤﺮﺱ ﻧﺠﻮﻡ
ﺍﻟﻠﻴﻞ ﻓﺪﺍﻙ ..
###
ﻣﺤﻤﺪ ﺍﻟﻤﺎﺯﻭﻥ :
ﻟﻤﻦ ﻳﻜﻮﻥ ﺍﻟﻮﺩ ﺻﺪﻭﻕ
ﻭﺍﻟﻔﺮﻗﻪ ﺟﺎﺕ ﻣﺘﻮﺟﻬﺎﻙ
ﻣﺎ ﻛﺎﻥ ﻏﺪﺭ ﻣﻦ ﺍﻟﺤﺒﻴﺐ
ﻭﻻ ﺣﺘﻲ ﺍﺧﺘﻠﺖ ﺭﻭﺍﻙ
ﻳﺒﻘﻲ ﺍﻟﺤﺰﻥ ﻣﺎ ﺑﺒﺮﺣﻚ
ﺷﺎﻥ ﺍﻧﺖ ﻣﺎ ﺳﺒﺐ ﺍﻟﻬﻼﻙ
ﻭﻫﻲ ﻛﺎﻧﺖ ﻳﻮﻡ ﺳﺒﺐ
ﻓﻲ ﺍﻧﻮ ﺗﺒﺮﺡ ﻣﻨﺘﻬﺎﻙ
ﻛﻴﻒ ﺍﻟﺨﺰﻥ ﻣﺎ ﻳﻜﻮﻥ ﻧﺪﻳﻢ
ﻭﺍﻟﻨﺎﺱ ﺑﻜﺘﻠﻮ ﻗﻠﺐ ﻫﻮﺍﻙ
###
ﻣﺮﺍﻡ
: ﺍﻟﻨﺎﺱ؟ !
ﻭﻻ ﻳﻬﻤﻮﻙ ﻛﺘﻴﺮ
ﺩﻳﻞ ﺑﺤﺴﺪﻭﻛﺎ ﻋﻠﻲ ﻫﻨﺎﻙ
ﻭﺍﻥ ﻛﻨﺖ ﻏﺮﻗﺎﻥ ﻓﻲ ﺍﻟﻌﺬﺍﺏ
ﺑﻴﺸﻴﻠﻮ ﺣﺎﻟﻚ ﻓﻲ ﺷﻘﺎﻙ
ﺍﻧﻌﻞ ﺍﺑﻮ ﺍﻟﺨﻮﺓ ﺍﻟﺒﻘﺖ
ﺗﻔﺮﺡ ﺍﺫﺍ ﺷﺎﻓﺖ ﺑﻜﺎﻙ
ﻭﺍﻧﻌﻞ ﺍﺑﻮ ﺍﻟﺼﺤﺒﺔ ﺍﻟﺒﻘﺖ
ﺑﺘﺒﻴﻌﺎ ﺍﺳﺮﺍﺭﻙ ﺑﻼﺵ
ﺗﺤﺮﻕ ﺣﺸﺎﻙ ..
ﻭﺍﻧﻌﻞ ﺍﺑﻮ ﺍﻟﺮﻳﺪ ﺍﻟﺒﺬﻝ
ﻗﻠﺒﻚ ﻭﺍﺩﻟﻴﻚ ﻣﻦ ﻋﻼﻙ

ما ناقصة..
ولا بشبه بنات الجيل
طويلة بال
بالي طويييييييييييييل

وبسند بي يقيني الحيل
اذا جافى الغميد عيني
وإذا إتمطى طول الليل

منو البسهر معاي غيري
ولي الدمعات يكون منديل؟
منو العضعض اصابعو وجع
ملاها جروح ورغم جروحو
مشط بي اصابعي الويل ؟!

خسارة ناس زرعتها
في المسام تحنان
ومالاقيالي فوقا خليل

خسارة زولة!
ان كان زول
هي ما أظن الحروف بتهم
ولا أظن بفرق التشكيل

بتفرق كل ريدة معاي
وكت زولا السكن جواي
يفارق قلبي
دون تاريخ إياب ورحيل...

بنتصبر
ونتغابى الوجع مرات

بنتجاهل همووووم وهموم
ننوم ومستفين عبرات

وفكرنا يمسح التاريخ
ونتناسى الزمان المات

ونصحى قبل نزول الحر
عرقنا نشف من الوجعات

ونبرد ونستكين في الضل
ونتوانس مع النسمات

نشخبت في رمال الحي
وفوقا نشتت البسمات

نمد من الفرح أوطان
ونكتب للوطن غنوات

ونزرع في القلوب الريد
ونتسامح وننسى والفات

ويتبخر عكر أرواح
تصب من الأمل غيمات

نعيش والبينا حب في حب
ونبني الريد بيوت وأبيات

دحين لاتشيلو هم الفات
وسكو واقرعو الجايات

دحين خلو الجزع والخوف
دحين لوكو الصبر قرضات
.
.
.
وأكيد الجايي أحلى :-) ان شاء الكريم...

كلام في بداية آخر الليل
.
.
أصعب حاجة في الدنيا .. لما تكون مخنوق وماسك تلفونك بتفتش في 500 رقم وتفكر في انك تضرب لي منو يشاركك وجعتك ويقاسمك حزنك.. تفتش وتتردد ألف مرة قبل ما تتصل ..لحدي ما تلغي فكرة انك عايز تتكلم ..
لانك اتزكرتا انو مافي زول حيفهم الشي الجواك .. وانو اقرب الناس ليك هو أبعدهم عنك .. تتزكر انو ياما وقفتا معاهم.. ساهرتا عشان راحتهم وكنتا بترضيهم رغم قساوة الموقف والظرف .. وتبكي وتصلي الليل كلو وتدعي عشان ربنا يفرج كربتهم ..
وتتخيل وانت بتشكي ليهم طريقة ردودهم ليك.. بي بروووووود ومرات تحس بالشماتة في كلامهم ونظراتهم .. وفي النوع البقرب يقول ليك كرهتنا بي مشاكلك دي او يديك احساس انك بايخ وفارغ وموهوم وهو ما فاضي ليك .. (معليش سيادتك إفتكرتك قريب/ة لي) .. وتكون متمني مجرد طبطبتهم او يدوك احساس انهم شايلين همك وهم ولااااا عليهم ولا حاسين بيك أساسا ..

صدقوني مافي زول بخاف عليك زي نفسك .. ما في زول بشيل همك غيرك .. مافي زول بيسندك غير عمودك الفقري .. مافي إيد بتتمد ليك غير يدك لما ترفعا لي ربنا وتدعوهو يصلح حالك..
الناس؟؟؟؟؟؟؟؟!؟!!!! ...
ها ..
القريب والبعيد بقو واااااااحد .. ما بفيدوك بي شي غير يشيلو حالك..وناااااااااااادر جدا البقدرك ويقدر تعبك عشانو..عشان كدا الوحدة وتجنب البشر أفضل شي..حتى القرااااااب ليك ما بحسو بيك..انا ما مستغربة .. لانو حب النفس شي عادي بقى .. والانانية بقت في ال Top.. وكل زول بحب نفسو وراحة نفسو وبيعمل عشان نفسو ..

البموت ببكو عليهو صاح .. وبتخلتف وجعة البكاء من زول لي زول .. ومن الاقرب للابعد ومن الدموع الصادقة لي دموع التماسيح .. لحدي ما نصل درجة بكاء المجاملة ودا البكون بدون دموع اساسا..
صدق القال: المات فقد رقبتو .. كتار مننا ما عارفين يحيوا واللا يموتوا..لانو لو عاشوا وووب ولو ماتوا وووبين .. غايتو عايشين آداء واجب لحدي ما ربنا يشيل أمانتو ..
ليه بتتصرفو كدا؟؟! ليه بتجرحوا .. ليه بتخونوا ...ليه بتستهترو بي مشاعر بعض؟؟ ليه الانانية والكذب والنفاق والحسد .. كيف بتعرفو تكرهو زول بدون سبب وتحبو غيرو برضو بدون سبب؟؟!

ههههههههههه دايما بستغرب ... انا still مستغربة .. في تصرفات كدا بتخليني في حالة تجهم وتعجب .. وبي إختصار (طمام بطن) .. في نوع من الناس بخلوك تقرف من إنهم دخلوا حياتك او بقو في طريقك.. وفي نوع تاني ودا طبعاً أقرف من الأول .. ديل النوع البيمثل في وشك وانت عارف وحافظ تمثيليتهم حلقة حلقة وناقش الحلقة الأخيرة حا تكون كيف..
أنا ما مجنونة ولا جنيت .. كل واحد/ة فيكم يسأل نفسو .. حا يلقى حقايق كتيرة في كلامي وكتار منكم كلامي حيجيهم في جرح .. وكتاااااااار حا يكونوا جانين وكتار المجني عليهم..بس اهم شي انو البراجع كلامي دا يشوف نفسو هل هو ظالم ام مظلوم..
(العفو عند المقدرة) ... وانا شايفة انو المظلوم اهون من الظالم..ع الاقل جزاهو بيكون خير وربنا بعوضوا.. ودعوتو مستجابة.. والظالم البراجع نفسو ويطلب العفو .. أخير من الظالم البتمادى في الظلم ودا طبعاً يشيل شيلتو .. (وليس الله بظلام للعبيد )..
It's easy ..
إذا كان ربنا ما بظلمك معناها ما حيخلي زول يظلمك وحياخد ليك حقك تالت ومتلت (والزمن دوار)..

( ويمكرون ويمكر الله والله خير الماكرين)..
عموما كل زول يعمل حساب لي نفسوا ..
سامعني ؟؟! (نفسك وبس)..
الطيبة والعوارة الزايدة وتقدير (الغير) الغير لازم حقو نبطلوا.. لانو مافي زول بستاهل ..

.
.
اللهم صل وسلم وبارك على سيدنا وحبيبنا وشفيعنا ونبينا محمد أفضل الصلاة واتم التسليم .. صلاة تخرجنا من بطن الضيق إلى أوسع الطريق ومن الهم للفرح والعسر لليسر.. اللهم فرج كربتنا وأزل عنا البؤس والضيم والحزن .. وأنر قلوبنا وأبعدها عن التعلق عمن سواك.. وأعنا على ذكرك وشكرك وحسن عبادتك وردنا إليك ردا جميلا.. لا اله الا انت ولا حول ولا قوة الا بك .. حسبنا الله ونعم الوكيل..وأستغفر الله لي ولكم ..
.
.
.
Delete + Shift + Enter 4 some people in my life..
.
.
بصمات: مرام العبد

أولاد عزة في السودان
سند غير باقي السند في الدنيا
دخر ويقين ثبات وإيمان
هن التقابة شعبة يمة
سبحة يابا...
لوح وكتابة
أصوات فقراء متلمين
برتلو سورة الرحمن
هن العيدية..
صوت ليلية..
وحاجات سمحة تقليدية
صورة ناس بيشربو قهوة
في الضهرية
صوت طنبارة بالعصرية
حس زغرودة من سعدية
طالعة من الفريق مبسوطة
شان اتقبلت الجودية..
ناس عايشين بحسن النية

ناس كل الفريق أخوان

رجال في الحارة
هن القالوا يوم الحوبة
ما بنتضارا..
هن الدرقة والسندالة
هن الفرحة.. وإن الدنيا
قالت لالا بدونا الفرح
كيمان

رجال أخواني
واولاد عمي
واولاد جنسي
واولاود بلدي
برضو رجال..
صافين خلقة..لكن إن عكر
صافينا هن زلزال..
هن المرقو يوم دق النحاس
في الدارة..
عرضو مع الرصاص صقرية
شالو من العجاج شبال..
وسوط العسكري أب طاقية
هن ركزولو كنو بطان..

وثابتين لا قيام الساعة..
نفدي بلدنا بي أرواحنا
كان طعنت أرضنا الشوكة
بنموت شان نزيل أوجاعا
هن الصلوا شان ينتصرو
في الحر البتشوي جماعة
حين نادي المنادي إتملو
هن القالوا سمعاً وطاعة..
ما بننهان..
قسم بالله ما بننهان..

وطن واااااحد...☝
موزع فينا شكل أوطان

وطن حين المحنة حبيبة 💑
متستف مشاعر وطيبة
ريد وحنان ❤
وطن حين البلاوي رفيق 👬
بيتضاحك معاك شان تنسى
في عطشك بفك الريق
بيبقالك براح وصراحة
عز الضيق..وبير أسرار
وعود وكمان

وطن في شكل أبوك
وأمك... 👨‍👩‍👦
إذا تعبت خطاك في الدنيا
هو بضمك...
شالك وشال تفاصيلك
وشال همك
بيجري معبأ في دمك..
ملاكا أمان..

وطن واسع.. بكرمك حتى
في الشارع..
وناسوا حُناااااااان
وإذا تاهت
عناوينك... بيبقالك دليل
ومعزة..
بالطوووول والعرض
عنوان..

وطن وش خير..
ولا بيشبه بلاد الغير
شلوخو النيل..
عيونو بتجري في توتيل
سنونو دهب.. بتمرح
في ربوع الخيل..
وإذا تقل الحمل والشيل
وطن بيرجح الميزان..

وبتو العازة ما ببتحازا
بيقل الشكر في حضورا
وانطفت الشمس من نورا
لابسة العفة..بت مستورة..
كنداكة ومرة ضيفان..
طيبة كريمة
راسية رزينة
سمحة وزينة..
صادقة وأمينة..
بت دغرية..
سودانية
تربالة.. ومأصلة حرة
جوة وبرة ست نسوان..

ومهماً أقول..
قليل القول..
وطن فنان..
وطن إنسان
عجز عن وصفو أيي لسان

وأخيراً
يا رجال شكراً
وأخيراً يا بلد شكراً
بفخر إني جيت منك..
بلد أسمح من أياً كان..
تقل في حضرتك قامتي..
ويزيد في حقك العرفان

وليك يا عزة مني شكر
وجداً يكفي إنك أمي..
أختي وجارتي..
رفقة عمري زايلة همي
بفخر بيك محل ما أمشي
بقدل رافعة راس العزة..
بَعكس صورة السودان..
وطن شامخ وطن عنوان..
.
.
.
مرام الامين (المتواضعة في حضرة الوطن العظيم)

أكتب عن شنو ؟!

أصلو المزاج عكران

لانفسي أرجا الجاي
لاعايزة أنسى الكان

أنا عايزة أموت إنسان

وإنسوني كل الناس

(أنسوني هوي يا الناس)

ما عايزة لي تحنان

كضابة عينيكم
دي بكتني يوم فقدي
وغدرتني ياما زمان ؟!

ما تدفقوا الدمعات
ماتجاملوا زولا مات
تسقوا العذاب ألوان

حفرة وشبر في تراب
جتة وقلب ورمان

لا سبتا دار لا مال
ما كنتا زول فقران
أنا كنتا زول عدمان

مرغوب وما مرغوب
مريود وما مريود
زعلان ولا فرحان

مدفون وشايف الناس
دقت وراي صيوان

سكلن بنات الحي
بكن الغيوم والضي
والقمرة والجيران

ديل كانوا وين يوم كت
بسهر واناجي الليل ..
وانهد كما السكران

راجية البنات في النور
نضحك نحاكي الحور
ستات علي النسوان

صاحبات نسند الحيل
وكتين يقع فتران

كت وين دحين يا الغيم
يوم ريقي كان نشفان

وشكيت نشاف الريق
وبكيت مطر عطشان

والقمرة مابية تجي
اصلو البياض حردان

غار يوم كحل قلبي
الأبيض معبأ حنان

وسهرتا طول الليل
بنده وانادي الضي
تاري السمع طرشان

وقنعتا من الخير
ما الدنيا دار أحزان

ومرقتا ما برجع
جيراني والقيمان

ختوني جوة الحوش
البي القبور مليان

ردموا التراب كيمان

صلوا وفضلتا براي
وانا ذنبي حق مولود
.. مولود مع الأذان

مات قبل ما يكبر
قبال يكون إنسان

لا عاش بيعرف ريد
لا زكرى لا نسيان

لا يوم ظلم لا باع
لا يوم حسد لا خان

مدفونة هسة هناك
بعد الضلام جاء النور
وملائكة الرحمن

والجنة ياها عزاي
عقبال تكونوا معاي
ومع السلامة الآن ..
🙋🙋
.
.
رسالة من بيتي الواسع شديد المساحتو شبر ..

انا كنتا قايلة الغربة عيب...
لكن لقيت العيب هنا..
بين ناس بساعدوك للسفر..
يسقوكا مر..
يملوكا ضر..
يحشوك فقر..
ويسرقو فرحك وبسمتك عزززززز الضهر..

هو وطن شنو ؟!
رغم الوساع بيضيق عليك
في كل زقاق يبقولك الحساد
دقر...

ديل ناس شنو؟!

كان شافو فرحك بهدموك
كان الله اداك يحسدوك
هن الغربية بيضحكوا
وكتين يشوفوك منهزم
تجي شان تغالب دمعتك
تنزل دموعك بالجبر

هن الغريبة بيفرحوا..
دايراين وقوعك ووجعتك
دايرين يجرحو سمعتك
دايرين يزيدوك في النحيب
ما تجف خرائط دمعتك
دايرين يشوفوك منتهي
او بالأصح...
دايرين يودوك القبر..

وأسع تقول لي أصبري؟!
وريني وين ألقى الصبر

انا مارقة دون تاريخ رجوع
لما الزمن يرجع سمح..
انا بوعدك برجع ميقنة بيك وليك
لما الخلق تعرف تصون العشرة
برجع وما بخاف...
برجع وألاقيك العصر..

نقعد هناك نحضر مغيب
شمس الضياع.. نضحك
نكورك وننتشي...
في الحلة..
نهتف بالنصر...

برجع وكت ترجع ملامحك
وعزتك...
برجع وكت تضحك معاي..
لمن أكاويك بالسفر...
ترجع تصر...

برجع وكت تبقالي زاد
وأبقاك وطن.. وتعيش
وتتقدل تمش ما بين شرايني
ودماي
وتعيش هناك في ضلوعي حر..

أبقالك البيت والسكن
مرواد عماك...
شعبة مشيك
سندك... قفاك...
بتك.. وأختك..وجنتك..
ريدك وقلبك ودنيتك..
تلقاني ناسك وملتك..
برجع وكت لي تعترف
بي اني نور...
ما بشبه الناس السمر..

خليني أمرق بالفضل
من ريدي ليك..
خليني أرحل وشايلة منك
دمي واللون والجنس
خليني أمشي ملانة بيك
عزة وفخر...
فك روحي خليني أنمش..
خليها صورتك فيني قبال
تنخدش..
م انا غير تفاصيلك معاي...
انا دون جوازك.. وبصمتك
ما بسوى فصاص التمر..

أحسن أفوت...
قبال تموت الزكريات الدونن
انا يمكن أموت...
قبال أجن وأسكت ولا تسمعلي
صوت
ويقولوا شماتنا الزمان من حالي
كُر..

أعفيلي قبال ما أمش
وانا عافية ليك..
السكة برضاك جنة
ماليها الفرح
والسكة دون عفوك جمر

خليني ارحل وبوعدك
برجع بعد ما اداوي قلبي
الانجرح
برجع عشانك
وشان أعيش..قربك
سويعات الفرح...
وأقعد معاك باقي العمر..
.
.
برجع وكت تشتاق أجيك
وكتين تقول لي : أرجعي
وانا مشتهيك..
مشتاق أشم ريحة هدومك
وأقلدك...
مشتاق ومتشحتتتف عليك...
وبغني ليك وغناي شتر..

صدقني يوم ارجع واجيك
برجع جري...
وحا اطير عليك...
وألقى الوطن ضاحك
وفاتح بابو لي..
ألقى الاهل واخواني واصحابي
الزمان...
العيد دراويش المسيد
لابسين جلاليبن..خدر..

حا القى عكاز جدي فوق
العنقريب...
حا اشم حنان حبوبتي
كل الهمبريب...
ألقاك أبو
وألقاك أخو..
وألقاك حبيب..
وألقاك دخر..

بلقاك
وليك انا أعترف..
وأحلف
بدون عينيك..

حراااااام..

الغربة عيب...
والله عيب..
وأفصح وأقول ليك:
بعتذر..
وأتمنى تلقالي العذر..
بتمنى تلقالي العذر..
.
.
(ياااااااااارب سفر يا ربي غربة وإبتعاد)..

ﻳﺎﻧﺎﺱ ﺣﺮﺍﻡ
ﺇﻧﻮ ﺍﻟﺰﻣﻦ
ﻳﺼﺒﺢ ﺭﺧﻴﺺ
ﻣﻦ ﻏﻴﺮ ﺗﻤﻦ
ﻭﺇﻧﻮ ﺍﻟﻄﻴﻮﺭ
ﺗﻘﺪﺭ ﺗﻌﻴﺶ
ﻣﻦ ﻏﻴﺮ ﻭﻃﻦ
ﻭﺇﻧﻮ ﺍﻟﺤﺰﻥ
ﻳﺼﺒﺢ ﻏﻨﺎ
ﻭﻳﺼﺒﺢ ﻟﺤﻦ
ﻭﺭﻭﻧﻲ ﻛﻴﻒ
ﻛﻞ ﺍﻟﻘﻠﻮﺏ
ﺗﺮﻗﺺ ﻓﺮﺡ
ﻭﺭﻭﻧﻲ ﻛﻴﻒ
ﺗﻬﺪﺃ ﺍﻟﺪﻭﺍﺧﻞ
ﻭﺗﻄﻤﺌﻦ؟؟

ﺳﺌﻤﺖ ﺍﻟﺪﻣﻮﻉ
ﻭﻭﻋﺪ ﺍﻟﺮﺟﻮﻉ
ﺳﺌﻤﺖ ﺍﻟﻬﻮﻯ
ﻭﺍﻟﻨﻮﻯ ﻭﺍﻟﺼﺒﺎﺑﺔ
ﺳﺌﻤﺖ ﺍﻟﺴﻜﻮﺕ
ﺳﺌﻤﺖ ﺍﻟﻜﻼﻡ
ﻭﻟﻐﺔ ﺍﻟﻜﺘﺎﺑﺔ
ﻓﻜﻴﻒ ﺃﻋﺒﺮ
ﻭﻗﻠﺒﻲ ﻳﺰﻣﺠﺮ
ﻭﻋﻘﻠﻲ ﻳﻔﻜﺮ
ﻓﻬﻞ ﻣﻦ ﺇﺟﺎﺑﺔ؟
ﻟﻤﺎﺫﺍ ﺃﺗﻴﻨﺎ ﻋﻠﻰ
ﺑﻄﻦ ﺩﻧﻴﺎ ﺗﺒﻴﻊ
ﺍﻟﻬﻤﻮﻡ ﻭﺗﺠﻨﻲ
ﺍﻟﻜﺂﺑﺔ ...
ﻟﻤﺎﺫﺍ ﻧﺸﺄﻧﺎ ﻋﻠﻰ
ﺳﻄﺢ ﺃﺭﺽ
ﻭﻟﺪﻧﺎ .. ﺭﺿﻌﻨﺎ
ﻓﻄﻤﻨﺎ .. ﻛﺒﺮﻧﺎ
ﻭﻣﺘﻨﺎ ﻋﻠﻴﻬﺎ
ﻭﻟﻢ ﻧﺠﻨﻲ ﺷﻴﺌﺎ
ﻭﺻﺮﻧﺎ ﻏﻼﺑﺎ
ﻟﻤﺎﺫﺍ ﺃﺗﻴﻨﺎ ﻣﻊ
ﺑﻌﺾ ﻗﻮﻡ
ﻳﻌﻴﺸﻮﻥ ﻇﻠﻤﺎ
ﻭﻗﻬﺮﺍ ﻭﻗﺴﺮﺍ
ﺑﺄﺭﺽ ﺍﻟﺼﻼﺑﺔ

رضوان ونيس:
جرحتي فؤادي من يوم مسكتي حروفك
اذيتي قليبي يا السمحة وكتلتي ولوفك
كتير بفرح وكتين يطل صباحي واشوفك
ليه مانعاني من جيتك وشاهره سيوفك

مرام الأمين:
قولها قولي يا السمحة واكتبي ظروفك
بوحي وغني بالريد شان تريحي جوفك
كتار هلكوبك الا انا البدور معروفك
سوي وسوي فوقنا واصلنا ما بنعوفك


رضوان ونيس :
جواي ملامح من نظرتا وبسمتا الرقراقه
وعيونا البيشلع نوراً زي النفيس براااقه
كيف افوتا واصبر ويهدى البال برواقه
عذابي وشقاي من عشقاً نارو جد حراقه


مرام الأمين:
ابوها المك واخوانا البعقرو الناقة
زينة وسمحة توقد في القلب بقاقة
لا بتبرأ الرازايل لا بتدور الفاقة
عينة كَسوفة لكن للقلوب سراقة

رضوان ونيس :
ليك سلام ياعازه معتق ب حنين واشواق
رمضانك احلى في بلدا فيهو الكرم دفاق
من قساوة الغربة مليت فاقد اهل ورفاق
ولمة الناس الحنان واكوابا ملانه رُقاق


مرام الأمين:
لاك اتا اللئيم لاك الوليد العاق
هاك من كل عزيز ليك السلام ينساق
ياو حال القدر واصلو الزمن فراق
الله يرد غربتك وتنبل الاشواق


رضوان ونيس :
يزخ النسام يلقاني في كوخ هواها متمطر
يفوح من فاها العبير وانفاسا فيني تعطر
فيها نداوة خد ومن وجنتينا عسل متقطر
بصراحة وقطع شك شوفتها مرتين بتفطر

مرام الأمين:
عيونا وسيعة ليهن حاشا ما بتنطر
وانا عينيا بالبكا والنواح بتمطر
الماكني ريدها وفي القليب متبطر
ليها الراحة وانا لي العذاب متسطر

رضوان ونيس:
رووعة كلماتك زي نضارة الاصيل براقة
حلو زوقك مرهف وإحساسك فيهو لباقة
القمر الساطع وشمس الله زايدة إشراقة
خاطف لون خدودك من كل الورود باقة

مرام الأمين:
كتابتك بالغنا الموزن يمين نطاقة
حروفك لي عكر هذي السنين رواقة
غناك النسمة والعينة الشلع براقا
بس دايرو لمة حوش ورملة دقاقة

مدخل

الجو باااااااارد
وانا حرانة؟؟
ياخ مالا الدنيا كأنها صيف؟؟

لا

انا بردااااانة ارخو التكييف ..

متلخبطة مالي اليومين ديل
مرات ببرد انا بالساعات
مرات بعرق
والعرق اتدفق ويابى يقيف

كدا كدا اصلا ماااا عاجباني
والله بالجد ما عاجباني

بس فهمي الجايي دا شكلو ظريف
حا اسوقكم رحلة مع الكلمات
حا ابدل جو الصفحة خريف ..
.
.
نص:

مطرة بتنقط وقوس قزح
ضحكة ومرح ..
وانبل ريقي من النشاف
مبسوووووطة والقلب انشرح
ونسيم بغازل في الشجر
والدنيا عماها الفرح
وانا هسة بتخيل قعادك والمطر
واللين شرق شوقي وسبح
والمطرة هيجت الدعاش
من عطرك النديان نفح
وانا بي فرح. بجبد دعاش عطرك نفس
وارسم ملامحك قوس قزح
وانا بي فرح بكتب بريدك في الغيوم
وانقش باسمك قوس قزح
وانا بي فرح بنجما من حر السموم
واداوي جرحي الانجرح
واتخيلك انا في المطر
واتخيلك في كل الوان قوس قزح

يا زول بتديهو الملامح والشبه
والوانو زاتا بتشبهك
والمطرة بتنقنق فرح
والقيفة مالت للبحر
والموج بعد قام انبطح
واتشابى تاني على السما
وتلقاهو للنقاط لفح
يا مطرة انا بتنفحك
ياموج دحين بستسمحك
سيب الضفاف وارجوهو
ظرفك لو سمح
ما تسرق القيزان جواك
شايفاك بتسرقا بي عجل
وكتين تشوف قوز انطرح
ياموج دحين خليكا رايق
زي كأنك في قدح
قبال الومك للمطر
وهو لسة ليك ما اظن لمح
يا مطرة غسلت البيوت
والآهة والهم اتمسح
تتشابي بي طول النخل
لامن شرف نفس البلح
ياغيمة معطونة حشا
وانا في حشاي معطون سراب
والليلة ماعونوا انكشح
يا غيمة ما احلاكي وكتين
تنتكي وتتدفقي
ويتلفحك توب قوس قزح
البشبه الزول الجواي
الصوتو احلى من الكنار
الغنى في المطرة وصدح
وانا دايرة اقول ليك سر براك
رغم انو للناس انفضح
يا غيمة شان احكيهو ليك
قوماك وارح
سوقيني لي زول بشبهك
لا
بشبهك الشمس الوراك
وشعاعا وكتين اتضح
قوماك وارح يا غيمة لي زول
زيي في نفس الصفات
باب قلبو لي انا انفتح
وانا سري ليك
ياغيم بتفزع بالمطر
وانا بالي بالمريود سرح
راهنتا بي ريدو الرياح
ورهاني في الاخر نجح
واتجابد البحر المطر
واتعشرقت رئة التراب
بالموية فاض لامن طفح
وفي غيمة اتدلت مطر
غشغشتها وستفتها
الشوق والفرح
وديتا لي زول بشبها
لا
بشبه الحن الملاها
الشايلة مني وليو طمح
زول اصلو ما بشبه بشر
زول في الجمال اتحدى امواج البحر
والمطرة والزرع الفلح
والقمرة والغيم والزهور
واتحدى الوان قوس قزح ..

احساس انك ما فاقد زول
ومعاك ما بفرق أياً كان ..

احساس انك بتحس بالناس
واحساسك ما حاسيو انسان..

وبتزعل لما حبيبك إخون
وعيان وبيان..؟
في نص السوق..
بيبيع في ريدك بالمجان.. ؟؟

متضايق جدا وما بتنوم؟؟
دنياك مليانة أرق وهموم؟؟
بالليل تتزكر كل ماضيك..
وتعيد الكان والكان والكان؟؟

قلبك بتحس زي جاهو نزيف
تترجا شديد لو عقلك اقيف؟؟
بتحنس في الافكار ما تجيك
تتمنى يجيك داء النسيان؟؟

نفسك بنخم؟؟
شايف نفسك مليان احساس
والناس ما عندها نقطة دم؟؟
بتحس بي انك زي عيان
او ما عيان...؟

بيموت حيلك...؟؟
والشارع قافل ومتزرقن
كرعيك حاير بيها دليك؟؟
بتقفل في وشك ابواب..
وحياتك فارغة بدون عنوان؟؟

بتصدع صاح؟؟
وبتبكي وتتنخج بالجد..
والببكي معاك بتحس بي
دموعو دموع تمساح؟؟
عينيك بتظاهر شان تفرح
عبراتك باقيالا البمبان.. ؟

بتونس روحك بالحاصل
والآهة بتبقالك فاصل..
لما تواصل ..وحبيبك
يطلع ما بحبك..
واهمك بالريد.. ويجي
يقول ليك..
احسن خلينا نكون اخوان؟!

او يعمل فيها برئ شاعر
وهو لا شاعر ولا بقدر يرسم
حجم الريد..
لا صوتو بساعدو
يكون فنان.. ؟!

دا هو غايتو بكون حاجة من اتنين:
يا اما سراب غشاكا سنين
يا لوحة مشوهة دون ألوان..

وحبيبك ما الا يحبك...
عادي بيعمل بيكا مسلسل
الحلقة الأولى يكون بهواك
والحلقة التانية يساهر بيك
والتالتة بطالب بي لقياك..
تتلاقو هناك جمب القيفة
تتوانسوا من فوق للقيزان..

وتخشوا الموية ومبسوطين
تتراششوا بالموية وبالطين
ويقرب فجأة عليك وإرميك
وتقع في الموجة وتوحل بيك
في الآخر بيسيبك غرقان..

بتكوس للقشة عشان تمرق
ما انت زمان..
ما خبرتا العوم..
واليوم حا تعرف قيمة الريد
حا تعرف انك كت غلطان..

غلطان يوم ردتا بدون حسبان
غلطان وقعتا بدون تاريخ
لا حتى مكان..
غلطان يوم بعتا رويحتك كاااااش
ما شلتا ضمان...
غلطان امبارح والليلة وغلطان الآن ..

غلطان في بكرة اذا حبيت..
غلطان لو لي قلبك باريت..
عقلك ما بضرك بس باريو..
بترجح بي تقلو الميزان..
.
.
.
.
أسمعوا كلامي دا ما بتندموا..
(عِش لنفسك فقط).. برا ريد برا بطيييييييخ..

ﻳﺎﻟﻴﺘﻨﻲ ﻟﻮ ﺟﺌﺖ
ﻣﻦ ﺃﺣﻀﺎﻥ ﺭﻳﻒ
ﻣﻤﻄﻮﺭﺓ ﻣﻮﺣﻮﻟﺔ
ﻃﺮﻗﺎﺗﻪ ﺑﺎﻟﻤﺎﺀ ﻓﻲ
ﻓﺼﻞ ﺍﻟﺨﺮﻳﻒ ..
ﻭﺇﺫﺍ ﺃﺗﻰ ﻓﺼﻞ ﺍﻟﺸﺘﺎﺀ
ﺑﻪ ﺻﻘﻴﻊ ﺑﺎﺭﺩ ﻭﺑﻪ
ﻋﻮﺍﺻﻒ ﺻﻮﺗﻬﺎ ﺟﺪﺍ ﻣﺨﻴﻒ
ﻭﻣﻦ ﺍﻟﺤﺮﺍﺭﺓ ﺗﺮﺗﻮﻱ ﺃﺟﺴﺎﺩﻧﺎ ﻋﺮﻗﺎ
ﺗﻤﻴﻞ ﺭﻗﺎﺑﻨﺎ ﺳﻬﻮﺍ ﺑﻐﻴﻒ
ﻭﺍﻟﺸﻤﺲ ﺗﺤﺮﻕ ﻛﻞ ﻣﻦ
ﻳﻤﺸﻲ ﻧﻬﺎﺭﺍ ﺗﺤﺘﻬﺎ ﻭﺍﻟﻔﺼﻞ ﺻﻴﻒ
ﻭﺍﻷﻫﻞ ﻭﺍﻟﺠﻴﺮﺍﻥ ﻭﺍﻷﻃﻔﺎﻝ
ﻛﻠﻬﻢ ﺳﻮﻳﺎ ﻳﺄﻛﻠﻮﻥ ﺑﺪﻭﻥ ﻋﻴﻒ
ﻭﺍﻟﻄﻴﺮ ﻭﺍﻟﺠﺰﺍﻥ ﻭﺍﻟﺒﻬﻢ ﺍﻟﻄﻠﻴﻘﺔ
ﻛﻠﻬﺎ ﺗﺮﻋﻰ ﻭﻗﺪ ﺇﺳﺘﺤﻮﺫﺕ ﻓﻲ ﺍﻟﺪﺍﺭ ﺣﻴﻒ
ﻧﺠﺮﻱ ﻭﻧﻠﻌﺐ ﻗﺮﺑﻬﺎ ﺑﺎﻟﻄﻴﻦ ﻭﺍﻷﺣﺠﺎﺭ
ﻧﺒﻨﻲ ﻣﻨﺰﻻ ﺭﺟﻼ ﻭﺇﻣﺮﺃﺓ ﻭﺃﺻﻨﻊ
ﻣﻦ ﻟﺤﻰ ﺍﻷﺷﺠﺎﺭ ﺳﻴﻒ
ﻭﺍﻟﺠﻮ ﻟﻴﺲ ﺑﺒﺎﺭﺩ ﻭﻧﺴﻴﻤﻪ ﺻﺤﻮﺍ ﺟﻤﻴﻼ
ﻟﻢ ﻳﻜﻦ ﻳﻮﻣﺎ ﺑﻬﻴﻒ ...
ﺣﺘﻰ ﺍﻟﻜﻼﺏ ﺗﻬﺰ ﻣﻦ ﺃﺯﻳﺎﻟﻬﺎ
ﻳﻌﻠﻮ ﻧﺒﺎﺡ ﺟﺮﺍﺋﻬﺎ ﻓﺮﺣﺎﻧﺔ ﻟﻘﺪﻭﻡ ﺿﻴﻒ
ﻭﻣﻦ ﺍﻟﺴﻮﻳﻖ ﻳﻌﻮﺩ ﺟﺪﻱ ﺣﺎﻣﻼ
ﺑﻄﻴﺨﺔ ﻣﻌﺴﻮﻟﺔ ﺣﻤﺮﺍﺀ ﻗﺪ ﺯﺭﻋﺖ ﺑﺮﻳﻒ
ﻭﺃﺭﻯ ﺍﻟﺘﺼﻮﻑ ﻓﻲ ﻣﻼﻣﺢ ﺟﺪﺗﻲ
ﻣﺼﻼﺗﻬﺎ ﺑﺮﺵ ﻟﻘﺪ ﻧﺴﺠﺘﻪ ﻣﻦ ﺳﻌﻒ ﻭﻟﻴﻒ
ﻳﺄﺗﻴﻨﻬﺎ ﻋﻨﺪ ﺍﻟﻈﻬﻴﺮ ﻧﺴﻮﺓ
ﻳﺠﻠﺴﻦ ﻳﺘﺴﺎﻣﺮﻥ ﻳﺘﺴﺄﻟﻦ
ﻛﻴﻒ ﺍﻟﺤﺎﻝ ﻛﻴﻒ؟
ﻭﺍﻟﺒﻦ ﻳﺴﻜﺮ ﺭﻳﺤﻪ
ﻭﺍﻟﺸﺎﻱ ﻣﺎ ﺃﺣﻼﻩ ﺑﺎﻟﻤﻌﻤﻮﻝ
ﺃﻭ ﺑﻌﺾ ﺍﻟﺮﻏﻴﻒ
عند المساء ترى اسرتنا تجاور بعضها
من دونها تأتي وتجلس جدتي
قربي أنا شخصي الضعيف
وتقص لي أحجية
وأنا بذاك العمر قد صدقتها
ولم أكن ادري بأن حديثها
درسا وطيف
وأنام وهي بحابني
تضع الغطاء علي
تقرأ بعض آيات اللطيف
وأنام ملء العين أحلم أنني
ملك لدي خزائن
حرس وأحصنة وزيف

لكنني اعتدت التمدن مجبرا
أين الفطام
متى وكيف؟؟؟؟

ردتو ودرتو عيلا سكتا ما وريتو
الريد والحنان انا بالجفاف ضاريتو
اكان ما العيب واكان ما الناس تقول سكيتو
أفارق بيتنا وأسكن برة جم باب بيتو

مرام الامين

وكم دقت طبول الهم
وأخدت من جواي شبال
وكم ناديت علي وجعي
كفاك أمرق كفاك امرق
وما بيمرق
وبلقاو في دماي إنهال
وإتكاثر غلبني العد
وفي جواي ولد أجيال
وجيل ورا جيل
وما ظنيتا ليو آجال
.
.
.
عموما فيني عالم وهم
وزي البيا مافي مثال

وريدتو الفي القلب بين الضلوع داساها
حافظاهو الوداد والريدة انا صايناها
بعاين في المراية وصورتي ماشايفاها
شايفة حبيب قسايا وصورتو ما احلاها

بتزكر زماااااان وقعادنا فوق الرملة
جم شاطئ البحر قدام بيوت الحلة
بتبسم حداو فرحانة شان الطلة
لا بنشبع حكى لا الشوق كمان بنبلة

لافح قلبي زي لف طرحتي اللافحاها
شايلة الليل سقد وأنا شوفتو بتمناها
الغالي العزيز الصورتو ما بنساها
من شدة هواي عادة الارض بحصاها

ايا زولي البريدو وفوق هواو منطبلة
شمتو الناس علي سموني عوقة وهبلة
شان ظاهر جنوني افكاري جت منخبلة
حرم في غرامك فتا عنتر وعبلة