عرفتا في اخر المطاف
كُترَ القصايد ما بفيد
لا بِفِش غَبينة المُتعَبِين

والغُنا البمرق مَعَبَر
شايل الذكرى الأليمة
اكيد بكون الكاتبو زول
مجروح وحِسو ملان
أنين

السهر والوحدة والليل
المِهَضلِم بالسنين
ديل رفاقة الوجعة للزول
الحنين..

السنين درس الغلابا
السنين يا أخويا غربال
للبِدُورَك وللبِيَابا
السنين سمحة وجميلة
هِناكا في بيوت السَيَادة
المُترَفين

السنين.......؟؟؟؟؟!!!!!!
وأححححيييييييا من
وجع السنين

هي الـــغّــــدارة...

بتعدينا بتسوق فينا
بتعرينا بتكسينا
بتعاكسنا بتلولينا
بتحاربنا بترضينا
بتعادينا بتكاوينا
بتضحكنا بتبكينا
بتدور بينا
وتجور بينا
تشمت فينا
تدينا الحزن مجاني
وتشيل الفرح بالدين

نـنسَاسِق فيها شان نرتاح
نحمد الله في الجايات
ونحمدو في الفَضَل والراح
ونشحد فيها حبة راحة
شان شالت فرحنا سَلَف
وهي تقول لينا لي بعدين...

متين بعدين ؟!

أما آن الاوان نرتاح؟!
تعبنا خلاص وصلنا الحد
ادينا وأَكُــنـَا مطر
وما لاقينا غير الصد
خريفنا خلاص سحابو رحل
قلوبنا بقن تُقَال جَـد جَـد
والفي جوفنا وجعاً شين💔

وما عارفين..
نعيش حيين كما الميتين
ونَكتُل روحنا بالوجعات
بالزول الرحل والفات..
بالصاحب الببيعك سااااي
وبي جيرانك الشُمَات..
بي اخوك النِساك وجفاك
بالزول العزيز المات..
بالاهل البِقُو يعادوك
ويَحَسدُوكا شَان حاجات..
واللا نموت ونَكتُل روحنا
بالسكين ؟؟!!!

وفي شان مين نموت بي
إيدنا في شان مين؟!

جاوبوا علي قبل ما اجن
حايمين برة في الشارع
لكن في قلوبنا سِجن
ومن الفرحة محرومين..

زمان وَصُونا ناسنا زمان
ناس الخلوة والقرآن
نعيش بيناتنا متسامحين
ناس جدي السمح بالحيل
وحبوبتي الملانة حنان
حليلن هن ..
أكانوا زمان بشر صادقين
ونحن الليلة كضابين

تَحِن لي ناس بيقسو عليك
زمان قالولك الليك ليك
واكان لبن العُشَر
بقى ليكا ختو ودِسُو في عينك
عماك وجفاك واتعترتا دون
عكاز .. وانت الفاكرو ببقى
معاك وببقالك عصاية وعين
شالوا عيونك السمحات
بقيت مسكين ..
بقيت مسكين..

جابوا علي..

نموت كيفن؟؟
نكتل نار مشاعرنا
وندوس في قلوبنا مجبورين؟!

نفارق الريدة بي ناسا
ونبطل نبقى حساسين؟!

نسيب الناس ووجع الراس؟!

ناس الدنيا غدارين..

وفي هذا الزمان الشين
فوت اهلك قبل تهلك
فوت ارحل وفارق الناس
وما تستنى بي مَهَلك
بتهلك سااااااي وادفنوك
وامشو مبسوطين

في هذا الزمان الشين !!!!!

ولا في اهل ولا في صحاب
ولا في حبيب ولا في قراب
اخير ليك تبقى بين اغراب
ولا بعرفوكا انت منو
ولا بعرفوك جاي من وين؟

وسرك أوعى لا يضرك
عشان صرحتا بيو للغير
واخيرلك تبقى واعي أخير
الاديتو سرك داك
هداك مرقو وبيعملshare
وكل خلق الله منتظرين

دحين خليكا واعي أخير

وما تمرق تفاصيلك
ولا تدي البشر عنوان
وخليو بس يعرفو الطير
بي حب عيش
يرك يلقاهو لما الطير
يكون جعان
وماعون موية تملاو ليهو
كل يومين

واتصدق على المحتاج
والجاك راجي عشمان فيك
ساعدو وفوت
بدون ما تحس بيو ازعاج
وانسى الناس وعيش لله
دا كلو بتلقى في الاخرة
وبجيك بعدين...

والله يحسن اعمالنا
ونفارق الدنيا رضيانين..

نلاقي رسولنا والمِلة
نخش الجنة ..
قولوا معايا ياااااا الله
ونقول آميييييييييين ...
وقولوا معايا يااااا الله
.
.
.
صلي الله عليه وسلم سيدي وحبيبي ومولاي وشفيعي وغرة عيني ونور قلبي وسيدي محمد ❤

أنا إبنة ملوك النيل
أنا تلك الهضبة في توتيل
شجرة أبنوس خمرية
إسمي في بلدي سمرية
عند العربان عربية
عند الأغراب زنجية
خشن شعري
لكن عيون عسلية

بنت من نور لو حنت
بنت من نار لو جنت
وجنوني نار ...
لو داس على طرفي ظل
يحمل كبرا يدعى التفرقة
العرقية

انا بنت اللوح وبنت الغار
الصوفية
بنت التسبيح وبنت الذكر
السنية
مارجرجس في أم درمان ..
قديس جدي مسيحية..

بنت الاديان
الطين الماذج أعراقي
عجن بإتقان
حتى أخرج من بطن الأرض

سوووووداااااانية

السين سوادي في جلدي
واللون الأسود ملكي
منذ الأعصار الأزلية

سودانية

الواو وداد من طبعي
ورد ازرعه في دربي
وشم في صدري خارطة
تحمل وطنا ختم على
قلبي (السودان)..
وحضارة ارض كوشية

سودانية
الدال دمي
والدم رباط الأرض
الام .. وبلا أمي
أفتقد لكل الماهية..

دن يختمر به عشقي
يسكرني طعم مياه النيل
أسكر ..
أسكر ..
حتى أشعر
أني من بطنه حورية

سودانية

الألف
أبي أرضي وطني
عزي وشموخي
وإبائي .. ستري
وأماني وغطائي
أصلي..
وصفاتي الجينية

سودانية

النون
نقاء في أهلي
نيل يجري
يحمل عشقي
يروي عطشي
عذب يسري
يشبع جوعي..
أعشق في السمك
البلطية

سودانية

الياء
يد تبني وطنا
تزرع أرضا
قطنا.. قحما
تحصد فرحا
تحمل منجل
سلوكة ومعها
طورية

سودانية

التاء تعيش
تحيى الخرطوم

والتاء نهاية قافيتي
هذي المكتوبة اهديها
لأبي السودان..
أغلى
البلدان الغربية والعربية ..

أوبريت بنتشايل

بنتشايل عشان باكر
يكون بي خير
بنتشايل عشان سودانا
يبقى أخير

وطنا الفيهو أعذب نيل
وطنا الخيرو ماهو قليل
وطنا الاهلو متحابين
وطنا الاهلو متكاتفين
وطنا الأهلو متشايلين
لو عندك خت ما عندك شيل

بنتشايل

في شرقو العرضة والشبال
سيف وجفير وعمة وشال
بنلعب في الضلُمة شليل
مقيل القاش هو أحلى مقيل
بنشرب جبنة في توتيل
دبايوا أتنينا كيف الحال

بنتشايل

في غربو البنقزُ الهبباي
غنا الطمبارة والروراي
رهيد البردي أب دكنة
ومسكين قالوا الما سكنا
أرح نمشيلا انتو وانا
وأرح يا اخواني غنو معاي

بنتشايل

جنوبو نويري و شلكاوي
سوادنة بيلبسو اللاوي
شجر باباي شجر أبنوس
مهر أبقار لأي عروس
كرنق نقارة وأحلى طقوس
وملوال صاحبي دينكاوي

بنتشايل

شمالو حضارة وأهرامات
في نهر النيل هناك عادات
حماس وبطان وصقرية
كرم ما ليهو كمية
شوايقة دناقلة جعلية
وحلفا ملانة بالخيرات

بنتشايل

جزيرة الخير أهل طيبين
حنان بالحيل ومعروفين
قطن أبيض وقمح وخدار
سلام من مدني لي سنار
مسافر ودمعي جاري وحار
بقول لي يمة مشتاقين

بنتشايل

وفي النص عاصمة السودان
هنا الخرطوم هنا أم درمان
سنادة وجبرة والستين
وبحري الأزهري وعابدين
وطنا بنلقى زيك وين ؟!!!
سلام ومحبة ريد وأمان

بنتشاااااااااايل

أهل الفرسة والكوماج هن أهل النيش
يمين فوق بارا سوولكن سواة العيش
متـل المسـلمـين والكفرة أهل قريـش
تــّفـــوكــــن و لا قالوا العدد قدر إيش


زردناك قوووووي ما بتنفك من الكِميش
جيت تهبشنا مين دلاك علي الهبيش؟!
شعبنا شرعو واضح وما بدور فتيش
إسم الله ورسولنا حِما الوطن والجيش

وأعز مكان وطني السودان ❤

#كامل_الدعم_والمساندة_للقوات_المسلحة_السودانية

سئمت الدموع
ووعد الرجوع
سئمت الهوى
والنوى والصبابة

سئمت السكوت
سئمت الكلام
ولغة الكتابة

فكيف أُعَبٍر؟!
وعقلي يفكر
وقلبي يزمجر
فهل من إجابة؟

لماذا أتينا علي بطن دنيا
تبيع الهموم وتشري الكآبة؟

لما نشأنا على سطح أرض
ولدنا .. كبرنا .. وعشنا
.. ومتنا... عليها غِلابا ؟

لماذا بُعثنا مع بعض قوم
يعيشون ظلماً
وقهراً
وقسراً
بأرض الصلابة؟!
.
.
.
لـــــــــوطــــــــنــــــــــي أشـــــــــتــــــــــاق 💔🥺

ما زي زمان
انا عارفة ما ياني الزمان
نبرة حكاي إتغيرت
أنا كنت شايفة الدنيا صاح
ما كنتا بحسبها بالغلط
انا كنت ماداها الأمان
وبقت عيوني تشوف خزاز
أوطان بنيتها من القزاز إتدمرت
وبيوت بتطعن في حشاي
وإنسان كأنوا ولا إتولد
أو حتى كان ..
بطلتا أتذكر حكاو
او فرحت الساعات معاو
راهنتا بيو حتى الشمس
حتى الشمس راهنتها
قُت ليها لو ضيك أفل
ببقالي ضؤ
مزيكا هادية وشمعدان
قُت ليها لو غيمك رحل
ببقالي ضل
وتهب سحب عينيو وتهطل
والبَرد بملاً المكان
آه يا وجع
وأها يا حنان
إنعل أبو الحنية يوم جات
فيني ساعة إتولد
أنا هسة مقطوعة لسان
ما قادرة أمرق في الشمس
أنا ناوية أركع بي شروقها
وضلها
وأجبد شعاعها وأقولها
ملعيش خسرتك في الرهان
أنا ناوية أقلدا كلها ..
وأنخج وأبكي وأنحرق
وأدفن عقابي وأنفجر
بركان

بركان أسيل ..
ولامن أصل
حلتنا بتعمد أميل 
لامن أصل لي بيوت
صويحباتي الزمان
وأفطهن ..
لي بيتها بتعمد أسيل

ريان !!!!!!!!

ريان ولا كل البنات
يا صاحبة ماضيك هسة مات
وحقيقة يوم أتزكرك
قلبي البطقطق لا العرق
ما بقولي بس غير كلمتين
خذلان وخذلان
مرتين.. 
اتلم خذلانك معاو وكرهتكم
كفنتكم..  ودفتكم..  وقفلتكم
في برطمان
ورميتو في نص البحر
خليو يغور ما دايرة اعرف
ليو مكان

أنا دايرة بس أقعد براي
أنا دايرة اتصاحب معاي
انا عايزة احب روحي وهواي
شعري وغناي
ضحكي وبكاي
وغتاي وكت ما يحين شتاي
وشتاي وكت ما يحر سماي
لا إنتي لا الزول فرتكان.. 

ريان معاها الزول فلان
الاسمو من أربع حروف
أديتو عشقي وكل دُناي
أداني بالفضل لبان.. 

لايكاهو بي مر الصبر
يوم سيرتو تمرق والحنين
ممكن أشيل من نفسي
ذرات أكسجين وأختهن
يوقدن جمر
وأجيبا كفتيرتي وأسوي
دموعي شاي بالهبهان

أو عادي ممكن أنقلب
وأعصر حشاي وأدفقك
من دمي..من كريات دماي
وأطعمك وأقدمك للناس
عصير البرتكان

هم يشربوك
أنا مالي بيك
هم يعرفوك
أنا مالي بيك
هم عادي ممكن يخدعوك
ويشيلو حالك في الخلوق
وأنا عمرو قلبي ولا أذاك
لا مرة خان..
ما بشبهم
هم عادي ممكن يجرحوك
وانا ما حصل كت منهم
وجنيت علي وإنت  المدان

هم عادي ممكن يهدموك
ويشيلو حالك للخلوق
وأنا كنتا ديمة بغطي فيك
وبنيتا حيشان من فرح
غنيت معاك أشواق وحب
وإندحتا حب في عيوني بان

معليش عليك
حبيت وما حبيت كذب
ظنيت وما ظنيت صدق
لو كنتا قايل قلبي ليك
برجع يحب؟؟!!!
هه.. فرحان.. 

أنا قلبي ما تلفون لعب
يوم تشتريو
بدوك عليو كرت الضمان.. 
معليش بقولا وبالغصب
لو انت ندمان فتني ..
ما بهمني
ما بهمني ..
يومي المرق من دنيتك
بقيت بشر ما بخصني
وأنا ما بهون
ورجوعي ليك بعني الهوان
شطبتكم من صفحتي
انت ومعاك كمين نفر
وواحدة كانت صاحبتي ..
نتلاقى في يوم الحساب
وتبقو راجين رحمتي وأشفعلكم
حتين تخشو على الجنان

يااااااااااا الله

يا الله تسمع دعوتي ..
ريان معاها الزول فلان
يا الله يلقو البملو ليهم فجتي
ويعيشو في أمن وأمان
ما يكوسو سكة رجعتي
أنا أصلي ما ياني الزمان
أنا عارفة ما ياني الزمان#
.
.
.
.
.
كسرة :
(الباعا طينتك بالرخيص
ما تنسى إنو هو زاااااااااااتو طين)..

بالفصحى:

أمشي في أرض زلقة

أتعثر
أنهض
أتعثر...

الطين علي أرضي لازب
يثقل خطوي...
أتزحزح عمداً كي أمضي
وأرى خطواتي تتعسر..

أتفائل أن ينشف مرة..
فإذا بسمائي صب مطر...
فيزيد الطين لزوجته
يضحو دربي زلقاً اكثر...

يا ويح المشوار المرهق..
أخلقت أنا من هذا الدرب؟!
صلصالي قدرٌ كي أتعب؟

سحقاً للطين..
وويح الماء..
ماذا ضراها إذا صبت
ونمى في جوف الطين شجر..

ماذا ضراه اللزِجُ الطين..
لو جف وحن على قلبي
فيصير حجر...

فأهرول أجري دون وقوع
أفرح أضحك من دون دموع
أغتسل من اللون الأسود
وبياضي يجعلني أظهر...

يحسدني الطين على طهري
تحسدني الماء على نصري..
وهما الإثنين نواة بشر ..
.
.
.
النص لم يكتمل بعد ..

ما جابوهو يوم فوق قال وقال
يمينو إن أدت آ بتدري الشمال
معروف للخلق..غني عن سؤال
أحمد اخوي يمين سيد الرجال

جاتنا زايرة...
ضيفة لي خيراتا
شايلة..
.
.
جاتنا مطرة
💃🏻💃🏻💃🏻
🤣🤣😂
😍😍😍

يا موج أقيف ✋🏻

فارق خلاص خلي الرصيف ..

بتلاطفو مرات بي حنان

وهو ياما شالك وما بكى..
شالك ولا عمرو إشتكى
وشايفك خفيــــــف ..

بتلاطمو مرات بي زعل..
بتهيج وبس هو البعذرك..
رملاتو بتبتب عليك ..
دايرات يخففن الحزن
الشالو بحرك بالسينين

بحرك غريق ما عندو قيف..

ببكي وبِمَرِق وجعتو ..
ببكي وبِدَفِق دمعتو ..
طول السنين لا فات و لا عرف
النشاف..
طول الوكت هادرات دموعو
بدون جفاف..
عز الشتاء وعز الخريف
عز الربيع ..
والدنيا صيف..

ممكون أتاريك يا بحر ..
موجك رسايل للبعوم..
انك حنين بتخفف الحر
والسموم..
بتغسل الوسخ القديم
من روحنا بتشيل الهموم.
شغال أتاريك يا بحر ..
تنضيف ...

وتخفيف ...

ياااااااااااااااااا موجة البحر
أضحكي..
وكفاكي ما تبكي الزمن..
لا الناس حتنضف من وسخ
لا الحر بقيف..

يااااا موجة البحر أفضِحي
ما تكتمي السر للخلوق
وانا هسة جيتك أفصِحي
الليلة تاريخ المروق ..
وانا عارفة إنك صادقة
قولك خاتي زيف..

والموجة قالت بي أدب
الشايلة في بطن البحر
شيتاً مخيف..
الشايلة في جوف البحر
عجباً عجاب..
لا بحملو البر لا السحاب
عجزت على حملو الجبال
وأديكي سر..
انو الرصيف ..
عامل حريف ..
داير يشيل من طرفي أسرار
البحر ..
وانا سري ما بديهو ذرات التراب
الدافنة في جوفها البشر
الغارسة بيناتا الشجر ..
الشايلة فوق ضهرها الحجر
الشاربة من موية المطر ..
الفيها كل من هب او من دب
من مر وعبر..
اديها كيف؟!
وريني بس اديها كيف ؟
لو شالتو...
معناها سر كل الخلوق
القالوا في شاطئ البحر ..
فاح وانتشر ..
وأنا عيب علي ..
لازمن أكون أنا موج أصيل ..
ممتد وراي بحراً شريف ..

خليني في حالتي العلي
بس جاوبي لي...
طولتي ما اتوضيتي بي ..
مالن عيونك بسرحن
مالن إيديك للرملة ببنو
وبطرحن ..
زعلانة مالك أشكي لي..
انا موج لطيف..
.
.
وأنا سري يا موج يا ظريف

عند الله ما بديهو زول..

قول يا لطيف ..
الجاية من الله بتجي..
والجاية من غيرو بتزول..

وانا جيت عشان إشتقتا ليك
ما جيت عشان أشكي وأقول

الذلة في الحُكى للخلق..
للناس وللموج والرصيف..

قول يا لطيف

انا سري في عشق الرسول ..
يا موجة صلي علي الرسول
خلينا نضحك وننتشي ..
انا قلبي زي لون القمر
بضحك ولا هاميني شي ..
وبتمنى من ربي القبول
والجنة والخير الوريف

لي الله بدعي ومااااا بقيف..

يا موج أكان صابك فرح
أحمِد عليو قبل الأفول
وإن جاكا ضير
يااااااا الله قول ..
قول يا لطيف..
.
.
.
اللهم ألطف بينا فوق الأرض وتحت الأرض ويوم العرض يا أكرم الأكرمين وأرحم الراحمين يا الله يا ذا الجلال والإكرام❤

يلا كل العايز إمشي
يمشي ما أسفاً عليهو

يبقى بالمرة وهو طالع
يجر معاهو الباب ويطلع
يشيل معاهو الامنيات
والذكريات
شنط الحكاوي
وكل شي لماني بيهو....

وكل زول عايز يسيبني
قربه أصلا ما بزيدني
والبفوت دنيايا يرحل
أوعة يحلم إنو يرجع
يوم وإعيدني
وإني أرجع أصطفيهو..

وكل زول عايز يفارق
يلا باي باي بالسلامة..
وما ندامة...
مني ليو كل الأماني
الطيبة فوق ليها
إبتسامة ..
وبالسمح
أنا بدعي ليهو
.
.
.
وزي ما قال الشاعر:
البفوت ريدتنا يرحل نحن نفرح بي جديدو 😊

محمد المازون
✍✍✍
البنيه المافي زيها
لا اميرة ولا مشيرة
ويكفي من نظرة عيونه
اي بت بتجيها غيرة
✍✍✍

مرام
البينة سميحة جدا
وياخي سيرتا احلي سيرة

ماخدة من النيل عذوبتو
وريدا زي موج الدميرة
✍✍✍✍

محمد المازون

الوقار الفي عيونه
والهدوء الفي مسيرة
كل ناس الحي وحاتك
في حضورة بكونو سيرة
✍✍✍✍

مرام

العوينات الكبيرة
والرموش فوقن غزيرة
ياحلات بسمة سنونة
ويا حلات تلك الضفيرة
النازلة بين جيدا وضميرا
✍✍😂😂


✍✍✍✍✍
محمد المازون

فيها من النيل محنه
يانعه نوارة خديرة
وزيها الامات طبيعي
رابطه كمون فوق سديرة
✍✍😂

✍✍✍✍
مرام

البنية دي ياخ خطيرة
وجاهلة في بداية عميرة
كاتلة كل شبان فريقنا..
وكل بنات حلتنا غارن
وايي زول من ما يشوفا
اكيد بتملاو الف حيرة

✍✍✍
محمد المازون

طينة من نبت المحاسن
ساحرة للالباب منيرة
ويكفي انها من بلدنا
النخيل والنيل سميرة

✍✍✍
مرام
يومداك يوم جاتنا غاشية
جات وشايلة معاها خيرا
بيتنا نور بي مجيها..
واصلوا ما حبينا غيرا
✍✍✍
محمد المازون

زوله منها مافي تاني
قايمه في ارض الحزيزة
وياحلاة المنقه فيها
ويا نضار روعة حريرة
✍✍✍✍

محمد المازون
دي البتنفر في المداين
من بلد اعراف كثيرة
وتلقي دبمه تقاها ظاهر
في ملابسه في مسيرة

✍✍✍
مرام

بت بتشبه بانة فارعة
وقايمة في الواطة المطيرة
حِنها مدفق جداول..
راوية حينا بي هديرة..
✍✍✍
محمد المازون

من نشت حافظه الفرايض
من حياها يفوح عبيرة
وياها من نبع المكارم
غيمه من رمض الهجيرة
✍✍✍✍
مرام

بت قليبا هي واعي جدا
وكل قلوب الناس ضريرة
نضيفة نيتا قبل تكبر..
واعية من قامت صغيرة
✍✍✍✍
محمد المازون:

بت قليبه يشع محنه
من نشت صافية سرير
وحبي ليها انا عادي حدا
الا حب ناس روما غيرة

😹😹😹😹

ها قد بدأ الليل

والشمعة تحترق جواري

يجذبني فتيل يسكنها
والنور يخاطف أنظاري

تتراقص ميلاً شعلتها
والنار هنالك بيساري

الشمعة ترقص دون غناء
وانا يتمايل في قلبي
غيظ وبكاء وعناء
إذ يفرح حزني لدماري

في جوف الليل أنا وحدي
والشمع مذاب..
يمضي يتركني بلا أُنس..
أسكر ..
أسكر من دون شراب
فالليل الهادئ خَمَاري

الليل رفيقي وجليسي
الليل حبيبي وأنيسي
الليل يرتب أفكاري ..

أجلس اتجول بالماضي
أجلس أتحاسب ما بيني
متهم قلبي في نظري
عقلي قاضي
أجلس أكتب ....
أكتب أكتب
يلهمني الليل بأشعاري

أجلس وأدندن ألحاناً
عودي يشتاق لأعزفه..
والشمعة ترقص لي طرباً
أعزف من شعري اوتاراً
يشتاق العزف لأوتاري

مابين النور وبين النار
أصوات ودخان وشعاع
ما بين القلب ورقصتها
أشواق حب وصراع ..
الشمعة تحترق لأجلي
وأنا أحترق بلا نارِ

قول الصباح
او الفجر
قبل الشمس تمرق تفج
كل الشوارع بي حضور
البهحة والشاي والتمر

قول لي بريدك
زي زمان .. محتاجة
ريدك وقت اقوم عيني
حُمُر..

عارف؟؟

ما نمتا طول الليل أمس
انا كنتا بتزكر حكاوي الشوق
معاك ..
شايلين ضلام الليل ضحك
والليلة انا شايلة الصبر

منعول ابو الريد يا قلب
احسن تصدق انو كل
الحب كضب ..
حلو اولو وفي نهايتو مُر

مُر يوم تهون العشرة
بين الناس جُبُر

مُر لما تبقي وحيد براك
والناس كُتر..

مُر لما تخلص لي سواك
ويبيع هواك عِز الضهر..

مُر لما تتستف وجع..
الناس بتسلبك الفرح
لامن تصل حد الفقُر

وتموت ولا عندك عزاء
ديل بدفنوك ناقص عُمر

عارف؟؟

مُرة الحروف المارقة ليك
كل الغناوي بقت شُتر ..

وكتين مرقت قصيدي فيك
انا ناوية ابداو بالشكُر

شكراً عليك ..
شكرا علي زمنك معاي ..
شكرا علي خطوات مشيك ..
شكرا الي طيفك عشان يوماتي
بيزورني ويمر

شكرا علي كل الحنين
شكرا علي تلك السنين ..
ان شاء الله تبقالك أجُر..
.
.
.
.
.
.
نصيحة لكل شاب ..

لا ترتبط ب(شاعرة)..

خـلالي السـهـر طول الــليـل بـــكـــاء
حـلال الـعــلي هــو وحدو الشربــكــا
ساكن قلبي طاعنو وبي كوعو إنتكى
دقــانـي وبـكـى وسـابـِقـنـي إشـتـكى

تمت المشاركة بواسطة برنامج تنزيل الفيديو كله:https://st.deepthought.industries/miQNza

تمت المشاركة بواسطة برنامج تنزيل الفيديو كله:https://st.deepthought.industries/miQNza