الليل
وكلام الليل دا كلاموا براهو
هسة في زول ببكي عشان محروم من زول وفي زول ببكي عشان مات ليو زول وفي زول مستني جية زول..
وفي ناس بتضحك وناس تزغرد وناس متلمة جنب مستشفى وناس قاعدين في شارع النيل وناس ناااااااااااايمة وبتشخر وناس بتحب..

وانا قاعدة في كنبة في آخر البرندة صاح الانوار مولعة والتلفزيون شغال بدون صوت .. وماسكة تلفوني..
بس الدنيا حولي كلها بتتلكم.. الصاحين والنايمين وغرقانين في احلامهم.. كلهم بتكلموا..
عارفين؟!
الكلام دا مشكلة والله..
ممكن يعليك وممكن يدليك .. عشان كدا المثل بقول (لسانك حصانك إن صنتوا صانك وأن خنتوا خانك) لولا الكلام لعشنا بسلام.. (والناس بيسمعوا بس طرش والحس جواهن مات كتيل) بنتكلم بس كتير بنعمل فيها ما سامعين..وكتير ما بنحس بي غيرنا..

الكلام انواع : في نوع حميد.. لما تتكلم عن الله ورسوله ولما تتكلم عن حب الخير وحبك للناس ولما تتكلم عن اهدافك السمحة ونواياك الحسنة ولما تتكلم (مع وعن) اصحابك والناس الحولك بالخير .. ولما تتكلم مع الزول البتحبو وانت ملاااااااااااان محنة وشوق وتقدير واحترام وريدة ولهفة... هنا الكلام ليهو طعم خاص ممكن تتمنى انو ما يخلص..(والكلمة الطيبة جواز سفر)
نجي للنوع التاني :
الكلام الخبيث والله يحمينا شر العوارض والناس الخبيثة.. الكلام هنا كلو ذنوب... يا قطيعة يا صواتة يا مشاكل يا اساءآت يا ألفاظ بذيئة يا مطاعنات يا ونسة فارغة... النوع دا بدخلك في حق الله وحق الناس عشان كدا كل زول يمسك لسانو لأنو في الحالات دي (الكلام من نحاس والسكوت من ذهب) .. صاح كل زول فينا بتعرض لي مواقف بتخليو عايز يتنفس بي شكل من الاشكال او يفضفض بس برضو الزول يوعي نفسو ويحوش لسانو ويتكلم في حدود الصاح والمعقول ويستغفر لانو لو ربنا غفر ليك حقو يمكن الناس ما تغفر ..

النوع الثالث: كلام الراس والقلب
ودا كلامك بينك وبين نفسك.. تفكيرك.. وساوسك وهلاويسك... ودي هي الحاجات البتحدد قوتك وشخصيتك لانو العقل والقلب هم البقودو الانسان... وهم البخلو نوع كلامو يبقى واحد من الاتنين الفوق.. يا بي خير يا بي شر.. كلام الراس دايما سمح وكلام القلب اسمح والاتنين مربوطين بالضمير.. مرات قلبك يقول كلام وعقلك يعاكسو ومرات عقل يقول كلام وقلبك يعاندو.. كلام الراس والقلب هم البخلونا نتحكم في سلوكياتنا وتصرفاتنا واننا نتكلم عن شنو ونسكت عن شنو .. عشان كدا بنحتاج اننا نرجح الكفة بيناتهم ونخليهم الاتنين يقودو بعض ونتعامل بي عاطفة وعقلانية في آن واحد... (والكلام في النقطة دي بطول)
النوع الرابع :
الكلام عن طريق الكتابة ودا برضو محكوم بالنوع الثالث لانو انت بتكون بتكتب وبتفكر.. مثلا بتدردش مع زول وبتكتب وانت مبتسم لانك بتحبو ولانك متلهف لي حروفو والمضمون البكون خلف الكتابة.. واكيد مضمون بكون جميل وبخلي قلبك طاير من الفرح..
ومرات بتكتب وانت زعلان وصاري وشك.. مثلا لما تجي تكتب عن حال البلد والظروف والاوضاع الحاصلة فيها...
او تكتب مقال او شعر او تحضر لي محاضرة او حصة او تكتب (بخرة لي علاج زول ممكون) ودا طبعا كلام براهو لانو بخص كلام العالم التاني 😂😂😂 ما علينا تقوموا هسة تطلعوني شيخة 😂😅
المهم النوع الخامس :
أحلى الكلام لغة العيون.. واللغة دي دايما بنستخدما مع الناس القراب.. مثلا بت مع امها او صاحبة وصاحبتا زيي أنا لما أكون مع توحا الشيخ و شوق محمود و bt elfeel بنعرف للغة دي كوييييس (لأننا دافننو سوا) 😂😂
ما علينا كلام العيون بكون مفهوم شديد بين العشاق واهم شي فيها (التسبيلة😚) ودي طبعا ما بفهموها الا هم الاتنين.. كلام العيون دا خطير بالمناسبة فيهو مضامين كتيرة وراحة واطمئنان وعلاج... وصدق القال (عينيك فيها علم الطب..عينيك علمتني أحب) ودا شكلو مزاكر عينيها كويس لانو كلام العيون بحتاج مزاكرة وناس بتفهمو لانو كلام معقد ومشربك وما ساهل.. 😉

وأخيرا:
اتكلموا عن بعض بالخير اتعملوا اجبروا خواطر بعض لانو الكلمة زي الطلقة ممكن تقتل وممكن ترفع معنويات ناس وممكن تغيير تفكير ناس وممكن تشجع وزي ما بتبني ممكن تهدم .. عودوا لسانكم على الكلام السمح والكلام الفيهو فايدة وخير.. وابعدو من الكلام الجارح وقولوا كلام طيب لي بعضكم.. عشان لما الناس تموت تتذكر بعض بالكلام الجميل... والما قادر يقول كلام سمح احسن يسكت.. واهم شي كلام الله ورسوله أبقوا عليهو عشرة.. وهم حاجة الذكر والتحصين والاستغفار والصلاة على النبي (عليه أفضل الصلاة وأتم التسليم ❤)

وياااااااا أنت :
كلامي كتير
كتير عنك وعن محياك
اريتا عيونا تتلاقى
وأكحل عيني بي لقياك
وافضل اكلمك عنك
وعن قلبي الكتل حباك
وانت تقص حكاوي الريد
وتتمناني ابقى معاك
كلامك يبقى كلو معاي
أصبح بيكا وأملأ مساك
نعيش الريد
حكاوي الريد
غناوي الريد
تريدني شديد
وأريدك ويوووومي اتحداك
تلاقي متل حناني حنان
او انسان اصلو ما ينساك
واريدك ويومي اتحداك
اعيش لامن امو

ت بهواك

بصمات: مرام العبد

ليست بكاملة .. هكذا الدنيا تجعلها تخطئ احيانا .. تجعلها تذنب في حق نفسها كثيرا..
هي الان تقف امام مرءاتها وتعتزر لذاتها .. تصفع خديها ندما ..

جانب الخير منها يقول :
يا طفلة الذات النفس أمارة بالسؤ .. ومغريات الحياة تدفعنا احيانا لمجاراة سبيل الشيطان .. ولكن فالنتذكر قوله تعالى: (خير الخطاؤون التوابون).. سحقا للشيطان واستعاذة منه .. لم يقدكِ لتقترفي جرما بحق احدهم لتتوبي ولكن جعلكي تذنبين بحق نفسك... لها تأسفي فهي تستحق الاعتزار.. لانك تركتها علي مهب الريح .. سلمتها لهم فرموها في أخر الجب ليلتقطها بعض السيارة.. جعلوكي تشمئزين .. تتصارعين مع ذاتك ببعض رفات ذكريات مرت كلمح البصر.. أفلتو قيودك ليكبلوك بقيود جديدة .. وهفوات لا تحسب لديهم ولكنها كالجبال لديك..

جانب الخير منها ايضا يقول: لم اعتدكي هكذا.. هشة .. لينة .. لم انجرفتي مع تيار الدنيا لوهلة ..لم ؟! وانتي تلك الصامدة الراسية التي يهابها الجميع ... اين تلك المبادئ بل من انتي ؟! بت اجهلك..
احمرت خدودها خجلا وغطتها الدموع ..تبكي قهرا واستحقرت نفسها التي تقف خلف المراة .. انهارت قواها.. سجدت لربها تسأله المغفرة ..

هي انثى كغيرها من النساء تضعف امام الملابس الاخاذة .. يعجبها احمر الشفاه .. وطلاء الاظافر.. تطرب لسماع صوت فنانها المفضل.. كما يمكن ايضا ان يغريها ذلك الاسمر ببعض النظرات وبهمساته السحرية .. فتميل ...

القلب هو عدو الانثى ..لو انتزع من جوفها لصارت كالصخرة الصماء لا تشوبها شائبة ولا تلين مع المطر.. ولا تنجرف مع التيار..
قلب الانثى هو سر الضعف لديها .. بل هو هوانها في اغلب الاحيان ..

فتاتنا اعلاه افضل بكثير من غيرها من الفتيات .. فهي تحسب خطواتها.. تقاضي ذاتها لهفواتها تراقب افعالها
تتوب وباب التوبة مفتوح .. هي ليست سيئة ..

اتعرفون؟؟ بعض التجارب نحتسبها سلبية فنكتشف مؤخرا انها على قمة الايجابية ... فخلالها ندرك احيانا تصالحنا مع انفسنا.. تعلقنا بمبادئنا..درجة الوصل بيننا وبين خالقنا..واحيانا درجة الصلاح لدينا..
فباب الشر او فالنقل باب السؤ مفتوح .. وطريق الشيطان اسهل بكثير من الطريق الى الله .. اقول لصديقتي اعلاه.. قد تهوي بنا الخطوات وتهفو بنا الانفس فنخطئ اليوم وغدا..وفجأة نستيقظ ونخرج من الظلام الى النور..نندم ..نتوب.. ونتعلم..

يا عزيزتي..تزكري.. الندم يُنسى بأمر الله .. وتبقى لديه التوبة..والتعلم من التجربة يكبحها عن الاعادة..
لا تقلقي.. فجرمك لا يحسب امام جرائم العالم ما دمتي تحاسبين نفسك.. فصوت الضمير لا يوجد لدى كل البشر..فهنيئا لكي بصحوته في عالم نامت ضمائره بلا استيقاظ ...لا تندمي علي فعل مضى بارادتك..بل هيئي قلبك لما سيأتي واخبريه بأن الناس معادن ..وان الاريحية لا تعني الأمان وان الطيبة لا تعني الاستغلال ..والتسامح لا يعني الرضا... وان الله وضع في جوفك بوصلة تعيدك للطريق المستقيم ان تاه بك الدليل..وثقي تماما بأن الله يحبك..فماذا تريدين بحب البشر الزائل وحب الله باق..

من اللحظة.. ادفني الماضي.. وعيشي بتلك الانفة لا تتخلي عن الكبرياء خوفا من فقد احدهم .. سيري بخطى ثابتة دعي السذاجة واتركي التنازل فالتنازل يجعلنا نعيد الاخطاء..
وقولي:
(شكرا لاشياء حسبتها باقية فتلاشت وشكرا لاناس دخلوا حياتي وعلموني درسا ومضوا..وشكرا لذاتي لانها تحاسبني عند الخطأ..)
ورددي معي بالآلاف:
(اللهم لك الحمد والشكر خلقتني مسلمة..اني اخافك واستغفرك ولا ملجأ منك الا اليك..اللهم اني على عهدك ووعدك ما استطتعت أعوذ بك من شر النفس وشر الناس وشر الوسواس الخناس اللهم ان حادت خطاي عن الطريق اليك فردني اليك ردا جميلا اللهم اغفر لي ما تقدم من الذنب وما تأخر وما صغر منه وما عظم ..اللهم اني عبدك ابن امتك ناصيتي بيدك اللهم اني استغفرك عدد خلقك وزنة عرشك ومداد كلماتك..استغفرك مد الفضاء وملء السموات والارض..اللهم يا سابل الستر وقابل التوبة احسن خاتمتي اللهم اني اسألك خير هذه الدنيا والعفو والعافية فيها وفي والاخرة)
وصل اللهم وسلم وبارك على سيدنا وحبيبنا ونبينا وشفيعا محمد افضل الصلاة واتم التسلم ...واستغفر الله لي ولكم..
.
.
وشكرا سادتي..
.
.
بصمات : مرام العبد

أنا دايرة أشيل منك قلب
وأديك قلب
أنا دايرة أخشك فال وريد
وأعمل مع نومك حرب
تفضل تفكر فيني
بالليل والنهار
ومشيك يباري خطاي
براي وخطايا غير
دربك تغب..
تبقى الدليل
منديل بصد دمعي
البسيل..
نجمي البوريني الدرب
وأبقالك الحن والامان
وابقالك الدار والفرح
واغني ليك ...
هوي آ الحبيب ..
قوم يلا تب..
هوي آ الأصم قوم
أنكرب..
انا ميتة فيك..
شيل حملي خليني
أنجيك..
مليانة بيك..
خابراكا لي عيوني بتحب

لاقيني عند ساعة الشروق
والموج بدافر للمروق
م الرملة كاتلة ليهو شوق
يتقالدو ويتوانسوا ويجارو
في القيف
والبحر
دفر الشمس خلاها مرقت
بالغرب..
والقمرة جات..
والغيم بغير من جيتا
فات السماء..
اصلا غيور وكتين
يشوفا بينسحب ..
واترصن النجمات سوا
بنوت نعش قعدن
قصاد العنقريب ..
في الواطة جم
ضل القمر.. يتونسن
ونسيم هواك فوقن بهب
وانا قاعدة بتكرف لقاك
وخيالي مليان بالصور
صورة عيونك ونظرتك
رصة سنونك وضحكتك
ركعات صلاتك وغرتك
صورة ملامحك ...
وفجأة أسرح في الصور
وأنعس مع بالي الضهب
وانوم واحلم بي لقاك
والقاك في النوم مبتسم
شايل معاك فرح السنين
كوم امنيات وانا امشي ليك
شاطر اتاريك في السلب

شاطر تشيل مني الهموم
ناصرني في الزمن الجحيم
جنبك بهيم..
روحي بتجيك شان
تستطب

واديك يقين ووعود
ملانة غرام وريد
وعيون مستفة بالحنان
واشيل قليبك واعشقو
وأديك بدل قلبك قلب
❤

بريدن ريدة ما معروف مداها
حياتن كان تروح الروح فداها
انا الجابرني في الدنيا وشقاها
شوفة أخواني جم عيني وحِداها

بريد أخواني ريدة ولا في فوقة
وشانن بوهب النمات وأسوقة
يا رب روحي لا ساعة مروقة
ما تشوف فيهن الوجعة وتضوقة

أحمد دُكري العركة أم صهيل
وافر خيرو للمحتاجلو نيل
أخوي الدخري شيال التقيل
مهماً سيت غناي فوقك قليل

مرتضي أخويا سميتو الرِّضَي
شايل همي ديمة بِحسَّ بَي
بلسم روحي لي عينيا ضي
سَي يا أختي فوق الغالي سَي

محمد إسمو سَمُّو علي الرسول
يحفظو الله من عين العزول
أخوي الراسي شيال الحمول
هيلو الشكرة تب مافيهو قول

مؤيد صاحب الراي السديد وممشة
برق العينة أخوي مطر الرشاش الرشة
دربو وُلُو عَوج معدول وخاتي اللَّشَّة
قلبو أبيض بياض متل اللبن حين بشة

حسن سيد ريدي اخوي نماتي فوقو بجيدة
الراسي الخلوق جامع المكارم وسيدا
هيلو الروقة في الجنيات خصالو فريدة
نميت فوق أخويا وريدتي ليهو شديدة

البشر البقت في السوق تبيعو ضميرة
شغلت فكري بي حالا وملتني الحيرة
دحين خلايا سمحين النضم والسيرة
دايرالن علاج الحالة ماشة خطيرة

واحدين واحدن فوق راسو مخ الطيرة
واحدين كلهن ما بعرفو حق الجيرة
واحدين همهن في الماركة والتأشيرة
واحدين أدمنو البنقو وشراب البيرة

واحدين الله ما اداهن ايي بصيرة
واحدين للعوج فاتحين قهاوي وديرة
واحدين نفسهن جاحدة بتدور حق غيرا
واحدين بنسو زنقات القبور ونكيرا

واحدين همهن حفلة وسماية وسيرة
واحدين ياكلو لامن تغلبن دنقيرة
واحدين بارو للافلام وحاكو شكيرا
واحدين دقو سستم والفنيلة قصيرة

واحدين حسبي القيوم خلق شريرة
واحدين ان بنيت القيف بيبقو دميرة
واحدين زيي فاكرين النفوس بي خيرا
واحدين ليكا ضامرين الحسد والغيرة
.
.
الله يكفينا شر خلقو..

الحسس العلي يا اخيتي تب ماك خابرة
كاسر قلبي وانا لي كسرو شافية وجابرة
ان ما جاني سيد ريدي اب خسايلا نادرة
بقنع منها الدنيا وبحرس الأخرة

واجع قلبي نخش الكبدة والفشفاش
مريودي الغشيم مطر الرشاش الراش
انا جنيتبو فوق الجن شلل رعاش
وان ما شفتو باكر بدخل الانعاش

انا مبارياهو عامل ليا فيها طناش
ورصص قلبي سحر المايق الرشاش
الاهديتو روحي وشال حناني بلاش
دفعني المغايس والوجايع كاااش

مسدار ام ضوابان

وفي ضل العصير شميتا ريحة اجدادي
راودني الحنين ونويت ازورا بلادي
شديت الرحال وحملتا مويتي وزادي
للدار البريدا وفيها بلقى مرادي

ومن السمرة لاحت قبة ام ضبان
طريت الفقرة جم تقابة القرآن
الدبليبة يوت بتشبع الجيعان
وما أحلاها موية الركوة والليحان

وياام ضبان سلام جيتك وليكي تحية
ودبدر الرشيد سموو العبيد ود رية
فيك حسب الرسول يوسف وبلاع مية
فيك عثمان ووالجد بجرد السبحة بالألفية

يا ام ضبان دخلتك بي سلام وامان
وفي جوة المسيد صار القلب هيمان
شميت المسك شميتو قرض ولبان
واتقريفتا تب لي موية الليحان

وفي جوة المسيد دخلتا شفتا القبة
حدا التابوت جلستا ودمعي خرا وكبا
قريت الفاتحة والاخلاص وصنيت حبة
حسيت بإرتياح وكأني زرتا الكعبة

وفي رمال المسيد مشيت علي التقابة
معاي اختي واخوي ومعايا يمة ويابا
تلاوة الفقرا خلت دمعي زي صبابة
في الليحان قريت وسمعتا اغلى كتابة

طلع من المسيد قبلتا شفتا الحلة
مشتاق للاهل كل الجهال والخلة
علي حلة علي بمشي وبقول يالله
لي متين عاد اصل شوقي العلي ينبلة

مشيت بين البيوت بي كم زقاق شاققتا
وفي لمحة بصر بسراع لبيتنا وصلتا
ومن باب الديار في الحوش سرح عاينتا
حسيت بالأمان وانا من جواي ارتحتا

في حوش الديار سامعاهو صوت فطونة
بريبة الفريق الفي النضم موزونة
بت عز الرجال الحاشا مي ملعونة
طيبة وبت اصول بيها القلوب مفتونة

اتسالمنا زييييين ومشيت علي الراكوبة
طرتا من الفرح عن شوفتي لي حبوبة
فوق العنقريب جم سبحتا اللالوبة
شميت المسك ريحة الحنان فوق توبة

علي الديوان مشيت لي اهلي جت طايبتا
وجم حبوبة في بنبر سعف صنقرتا
واحشني الحجا ولي قهوتا اتقريفتا
بقدح نور وشيها وبي سماحتو بهرتا

في العصرية اتلمن بنات الحلة
لعبنا شليل وام حيفيرة والكرتلة
وفوق الشجرة اخوي طالع بدور يتدلة
ديك حبوبة موقدة الصاج وشادة الحلة

في المغرب مشت حبوبة شالت الدكة
علي ام ضرعا مستف باللبن وانشكة
وفي قفص الفراريج قايمة عوة وعكة
وما احلاها كارات الحمام الركة

شربنا الشاهي رصينا العناقريب برة
وضارب فينا ضل الشدر ونور القمرة
الجو العجيب بيهو النفوس منسرة
لابردا شديد لا حر بسوي الصرة

اتلمينا جم حبوبة بتحجينا
تاريخا قديم وجدود بعدلو الشينة
فاطنة السمحة والغول والبت المسكينة
وانقطعت وانشطعت في راس الصغيرفينا

رقدنا ونمنا مرتاحين ورايقين بال
وللهم والحزن جوانا مافي مجال
في ام ضو الخلوق طاعمين وسمحين فال
مافيهن للئيم مابعرفو قلنا وقال

وعدا اليوم وكت مرتاحة قلبي سعيد
واصبحنا الصباح والدنيا كانت عيد
ودناصر نده بي صوت رخيم وزهيد
واتلمو الخلوق ماشين صلاة العيد

عايدنا الاهل والخلة والاحباب
مبتهجين جميع لاقونا بي ترحاب
اتلمو الخلوق شفع شيوخ وشباب
وفي الحوش الكبير مابتلقى زول بنعاب

عمانا الفرح مافيش حزن وكآبة
متلمين جميع وارواجنا جت متحابة
في ام ضو الخلوق للعرفة مابتتغابة
لي كرم الضيوف تلقاها فانحة ابوابة

ووكت اليوم دمس سمعنا صوت اعجوبة
سرنا علي المسيد وارواحنا جت مسلوبة
في ساحة المسيد كل الخلوق مزروبة
في الليلية درويشا بدق النوبة

وفي الليلية درويشاً بسمو حكاية
من بين الخلوق شايلو لوح ودواية
بي همة نفس بي ايدو رافع الراية
كاسيهو الصلاح والتقوى ليهو عباية

إشتد الزحام والنوبة شدت وحرت
وشعرت جلدي من انصالا كشت وفرت
جاريات الدموع سال العرق واتخرت
ومابنساها ساعات الهيام المرت

عدنا علي الديار وسمانا رعد وبرق
ومطرا صبا كبا وللشوارع غرق
الشارع مترس بالتراب ومدرق
صبح الجو ربيعي والسحاب اتفرق

خجنا الموية سرنا علي الخلا بنتفرج
كانت الواطة مبلولة وطريقنا معرج
شفنا البرقي متدكم وعاتي مدرج
وبرو غزير سنامو كبير وماهو مسرج

شفنا القمري والسمبر وشفنا حدي
وود ابرق بطير بي سرغة متل الضي
شفنا الصبرة والسحلية ثعبان حي
شفنا غنم وشفنا بهم وشفنا جدي

وبين البوص جرينا لعبنا دسوسية
من فوق للمنبقر وكان قيامو شوية
طفناها الحفير نلعب ولاهمية
ياعند الديار عدنالا في العصرية

كان اليوم مغيم وجوو سمح ومثالي
وانا مرات بهيم بسرح ومشغول بالي
وكت اتزكر البندر بيكدر حالي
مابية الرجعة للبلد الغبارو علالي

ايا ام ضبان سنينك اصلي مابنساها
كانت احلى ايام فيكي عديناها
يا الزكراكي خالدة ومستحيل اسلاها
وان عاد الزمن بلقاني صم حافظاها

ﻳﺎ ﺩﻧﻴﺎ ﻳﺎﻣﺘﻤﻜﻴﺠﺔ
ﺃﺧﺸﻲ ﺍﻟﻐﺒﺎﺭ
ﺣﺎﻳﻤﻸ ﻋﻴﻨﻴﻚ ﺑﺎﻟﻌﻤﻰ
ﻭﺇﻏﺒﺮ ﺭﻣﻮﺷﻚ ﺑﺎﻟﺼﻔﺎﺭ
ﻭﺍﻭﻋﺎﻛﻲ ﺗﻤﺮﻗﻲ ﻓﻲ ﺍﻟﻤﻄﺮ
ﺣﺎ ﻳﻔﻀﺤﻚ ..
ﻭﺇﻏﺴﻞ ﻣﻼﻣﺤﻚ ﺩﻭﻥ ﻫﻈﺎﺭ..
ﻳﻜﺸﻒ ﻣﻌﺎﻟﻢ ﻃﻠﺘﻚ ..
ﺍﺣﻤﺮ ﺧﺪﻭﺩﻙ ﻭﻭﺟﻨﺘﻴﻚ
ﺣﺎ ﻳﻜﺴﻔﻦ ..
ﻭﺇﺗﺨﺠﻠﻦ ..
ﻳﺪﺧﻠﻦ ﻭﻳﺎﺑﻦ ﻳﻤﺮﻗﻦ
ﻭﺇﺑﻘﻦ ﺻﻐﺎﺍﺍﺍﺭ ..
ﻳﺎ ﺩﻧﻴﺎ ﻫﻮﻱ ..
ﺍﻭﻋﻲ ﺍﻟﻤﻄﺮ ..
ﻛﻞ ﺍﻟﻄﻼﺳﻢ ﺍﻟﻐﻄﺘﻚ ..
ﻟﻮ ﻣﺮﺓ ﺣﺴﺖ ﺑﺎﻟﺮﺍﺯ
ﻣﺎ ﺑﻨﺼﺤﻚ ﺑﺎﻹﻧﺘﻈﺎﺭ ..
ﻳﺎ ﺩﻧﻴﺎ ﺍﻣﺮﻗﻲ ﻣﻦ ﺿﺮﺍﻙ
ﻭﺍﺗﻐﺒﺮﻱ .. ﻭﺍﺧﺸﻮﺷﻨﻲ
ﻭﺧﻠﻴﻜﻲ ﺯﻳﻨﺎ
ﺿﻮﻗﻲ ﻣﺮﺓ ﺍﻹﻧﻜﺴﺎﺭ ..
ﻭﺇﺗﻨﺎﺯﻟﻲ ..
ﻣﺎﺗﻘﻮﻱ ﺭﺍﺳﻚ ﺩﻭﻥ ﻓﻬﻢ ..
ﻭﺍﻧﺎ ﻋﺎﺭﻓﺔ ﺍﻧﻮ ﻋﻠﻴﻜﻲ ﺣﺎﺭ ..
ﺍﻧﻚ ﺗﻜﻀﺒﻲ ﻣﻨﻈﺮﻙ ..
ﺯﻳﻒ ﺑﺴﻤﺘﻚ ..
ﻟﻮﻥ ﺑﻴﻀﺘﻚ ..
ﻛﻞ ﺍﻟﻨﻀﺎﺭ ﺍﻟﻜﺎﺳﻲ ﺟﻠﺪﻙ
ﻣﺼﻄﻨﻊ ..
ﻭﺍﻟﻐﻨﻮ ﻓﻲ ﻟﻮﻧﻚ ﻛﺘﺎﺭ ..
ﻗﺎﻟﻮ ﺍﻟﺨﺪﺍﺭ ..
ﻓﻲ ﺍﻟﻨﺨﻠﺔ
ﻭﺍﻟﻨﻴﻞ
ﻭﺍﻟﺠﺮﻭﻑ
ﻳﺎﻫﻮ ﺍﻟﺨﺪﺍﺭ ..
ﻗﺎﻟﻮ ﺍﻟﺨﺪﺍﺭ
ﻓﻲ ﺍﻟﻘﺒﺔ
ﻭﺍﻟﺴﻮﻕ
ﻭﺍﻟﺒﻴﻮﺕ
ﻳﺎﻫﻮ ﺍﻟﺨﺪﺍﺭ
ﻗﺎﻟﻮ ﺍﻟﺨﺪﺍﺭ ﻓﻲ ﺍﻟﺠﻨﺔ
ﻣﻮﺟﻮﺩ ﺑﻲ ﺑﺰﺍﺭ ..
ﻭﺍﻧﺎ ﻭﺍﺣﺪﺓ ﻣﻦ ﺍﻟﻨﺎﺱ ﺑﻤﻮﺕ
ﻓﻲ ﻟﻮﻥ ﺣﺒﻴﺒﻲ ﺍﻟﻘﺎﻣﺘﻮ
ﻛﺎﺳﻴﻬﺎ ﺍﻟﺨﺪﺍﺭ ..
ﻭﺍﻧﺎ ﻭﺍﺣﺪﺓ ﻣﻦ ﺍﻟﻨﺎﺱ ﺑﻤﻮﺕ
ﻓﻲ ﻭﻃﻨﻲ ﻓﻲ ﺍﻟﻨﺎﺱ ﺍﻟﺨﺪﺭ ..
ﺭﻏﻢ ﺍﻟﻔﻘﺮ ﻭﺍﻟﻘﻠﺔ ﻓﻲ ﺍﻟﺰﺍﺩ
ﻭﺍﻟﻌﻤﺮ .. ﻣﺎ ﺑﻌﺮﻓﻮ
ﻏﻴﺮ ﺍﻻﻧﺘﺼﺎﺭ..
ﻳﺎ ﺩﻧﻴﺎ ﺗﻮﺑﻚ ﺧﺎﻟﻔﻦ
ﻛﻴﻔﻦ ﺑﻌﺪﻙ ﻣﻨﻬﻦ
ﻛﻴﻔﻦ ﺗﻜﻮﻥ ﺍﻟﻤﻮﻳﺔ ﻧﺎﺭ
ﻳﺎﺩﻧﻴﺎ ﻧﺎﺭﻙ ﻓﻲ ﺍﻟﻤﻄﺮ
ﻭﺍﻧﺎ ﺑﻨﺼﺤﻚ ﻗﺒﻞ ﺍﻟﺨﺮﻳﻒ
ﺍﺣﺴﻦ ﺗﺸﻮﻓﻴﻠﻚ ﻣﻄﺎﺭ
ﻭﺗﺴﺎﻓﺮﻱ ﻟﻠﻬﻢ ﺑﺸﺒﻬﻮﻙ
ﻭﺍﻥ ﺷﺎﺀﺍﻟﻠﻪ ﺗﻠﻘﻴﻠﻚ ﻭﻃﻦ
ﻭﺇﺩﻭﻛﻲ ﻣﻦ ﺍﻟﻔﺮﺣﺔ ﺩﺍﺭ ..
ﻳﺎﻣﺎﺭﻗﺔ ﺩﻭﻥ ﺗﺎﺭﻳﺦ ﺭﺟﻮﻉ
ﺧﻠﻴﺘﻲ ﺑﻴﻨﻚ ﻭﺑﻴﻨﻲ ﺗﺎﺭ ..
ﻏﻴﺮ ﺣﻠﺘﻚ ﻣﺎ ﺑﺘﻠﻘﻲ ﺭﻳﺪ
ﻻ ﺑﺘﻠﻘﻲ ﺩﻳﻦ ..
ﻻ ﺑﻴﺖ ﻣﻠﻚ ﻻ ﺑﻴﺖ ﺇﻳﺠﺎﺭ ..
ﻭﺗﻨﻮﻣﻲ ﻻﺟﺌﺔ ﻋﻠﻰ ﺍﻟﺮﺻﻴﻒ
ﻭﺣﻴﺎﺗﻚ ﺍﻣﻼﻫﺎ ﺍﻟﻮﺩﺍﺭ ..
ﻭﻭﺩﻋﺘﻚ ﺍﻟﻠﻪ ﺑﺪﻭﻥ ﺳﻼﻡ
ﻳﺎﻛﺎﻓﺮﺓ ... ﻓﻮﺗﻲ
ﻭﺑﺈﺧﺘﺼﺎﺭ ..
ﺍﻭﻋﺎﻛﻲ ﺗﻤﺮﻗﻲ ﻓﻲ ﺍﻟﻤﻄﺮ ..
ﺣﺎﻳﻔﻀﺤﻚ .. ﺑﻴﻦ ﻧﺎﺱ
ﻭﻻ ﺑﻌﺮﻓﻮ ﺍﻟﻬﻈﺎﺭ
.
.
.
وزي ما غنا ودالنصري: وقال:
يا زايلة زالت من قليبا محنتا ..
لانحنا شاحدين حنها ولا حتى دايرين سكنتا
وباكر على الجنة بنعيش والدنيا تعرف غلطتا..

أماني وأمنيات
هن عنهن ما اتحققن
وانا عنهن من هسة
اعلنتا السبات
عنك ولا بكتب حرف
شعري القديم بعتبرو
ونسة ودردشات

تنفيس أذا ضاق النفس
تخليص جمارك للفرح
يومو المرق من دنيتي
ويا حليلو فات ..

فات الفرح يوم فتا مني
وللرجوع فات الفوات

عنك ولا جيت لا بقيت
لي زاتي زات

عنك ولا حبيت سواي
وانا عني ما بقيت واحدة
زي باقي البنات

حردانة من الحب زمن
وانا اعتزلت الريد وكل
الدندنات ..
الياما غنيناها في سكة
سفر .. ورقصنا رقصات
النسيم صفقنا صفقات
الوداع
صفرنا ماشين للفراق
واسع مشاعري الانتهن ..
تحت الصفر متجمدات ..

دخلن بدالن خوف وهم
طنين ألم ..
تتزكر احلامي السجم ؟؟
دعواتي والبكاء والعشم ؟؟
ديل كلهن صبحن
وهم .. او قول سراب ..
محكوم عليهن بالشتات ..

يا وجعة العمر الرحل
كابوس معشعش في عيوني
وكل محل...
يا حرقة الروح القدر ما
أقول تفوت بلقاها جات ..

عنك ولا اتكلمتا يوم
كل الكلام بعدك خلص
والباقي عنك هو السكات

قنعانة ..
ما دايراك عشق
لا دايرة منك ريدة لا حب
لا صلات

البيني والبينك خلص..
قلبي انكسر ..
ورغم الكسر قسيتو
أقوى من الحجر
بي إختصار ..
انا قلبي مات ..

بطلتا أحلم بالخريف
شان السموم قفلن عليو
سكك الدخول

والغيم شرد
رغم إنو كان ناوي النزول ..

إتلوع الحمل المطر
خايف الشمس تسرق
ملامحو مع الهطول

وإتبخر اللين واليقين
حر الهجير سالب معاو
زكرى الفصول

وآ لهفة الشوق للبلل
وآ عبرة الحس البقول :

الوحشة
والليل
والسهر
ومرقة الضي للدخول

النجمة
والهم
والقمر
والحال كما كان من زمن
والحول بمر وأجي بعدو حول

والنقطة في نهاية سطر
مكتوب عليو
قريافة لي ريحة البحر
ضجة وصريخ رغم المحل
الخالي من جنس البشر
وعيون مستفة بالنحيب
لكنو طرشان البصر
وأحلام مهددة بالذبول ..

والنقطة واقفة ولا بتزح
وأعمار مشت ناوية الافول

إعدام .. وكوم من أمنيات
عشمانة كانت بالقبول ..
.
.

أستغغغفر الله العظيم
الجاية من الله التجي
والجاية من غيرو بتزول ..

(شكرا للناس البدونا دورس مجانية تخلينا نعرف قيمتنا عندهم وتورينا انو حب الجمادات والوحدة احسن من البشر..وعالم مليان نفاق..وشكرا للزول القريب الفرحان عشان وجعتنا وبصفق عشان وقعتنا ..وشكرا كمان للزول الغريب البجبر في كسورنا رغم البعد ويقشقش دمعتنا ..
وسلام عليك يا دنيا بي ناسك لو دا اصلا حالك)..

فوق الخوة عاد خاواياً
وفوق الريدة عاد كاواياً
انا الرايداهو لو خاين ولو بتخاين
ساك بكتلني بالنظرات اكان لي عاين

أرح نمشي
توديني البلود
الما حصل أنا شفتها
يلاك نمش..
كل الخطاوي الماشة
جنبك بختي بيها
وبختها..
يا زول بتشبه روحي
إنت بتشبها..
حتى التفاصيل الصغيرة
العندي عندك كلها..

يلاك معاي
نمرق نطوف كل المدن
نسرق من النيل لينو
من شاطئ البها..
ونلملم الغيم فوقنا ضل
ونسوي سدرة منتهى
ونقعد هناك..نصبح
نمش..
وانا ماشة جنبك..
بنتشي وتسرح عيونك
فيني وأسرح فيك
وأقيف..تهتف مشاعري
وتندهك وإت تندها
وحنواصل المشوار سوا
نغشى البحر..
نقعد نمشط في رمال الشاطئ
نستنى السحر..
وأتأملك رغم إني جنبك
بشتهيك جنس إشتهى
ومشتاقة ليك..
رغم انو ايديك فوق إيدي
عيني يشوفن ضحتك
وتنادي لي..
وبرد...... أها
صوتك براو راحة وغنا
شوفتك روا..
وما قادرة أشبع منها..

الريدة قالوا براها جن
وانا ريدي ليك..الريدة
طير جنها..
مجنونة بيك.. جداً انا
وكتين بتتكلم معاي..
انا عقلي في عينيك سهى
وما فهمت شي..
ولهانة بيك...
باقي العمر من غير
وجودك جنبي بعتبرو
إنتهى #

أنا ليك بشتاق
والله بشتاق
لممممن بهناك والشوق حراق
ورويحتي مطقطقة لي شوفتك
وبشوف صورتك
في كل شارع في زقاق
متقرفية أسمع ضحكاتك
للونسة هنا التحت الضل
بين الرقراق
والقهوة بتطعم بي حسك
والدهشة تزيد حد الإملاق
تتشحتف روحي تزيد تحنان
والريد بيفيض يصبح عملاق
وبحس بي إني بقيت خارقة
أو عايزة أطير وأحندك
بي ريدنا العشاق
م أنا ليك بشتاق لو حتي
بقيتي قصاد عيني
كيفن لو فتي بعيد مني
حا أكون بشتاق
بشتاق
بشتاق
وأسسسسع بشتاق ..
.
.
.
الشووووووووووق والريد ♡

يلا نسكن في الهوا
وتكون سلالمنا المطر
ننزل عشان نروي البلود
الجاحدة بالرواء للخلوق
وقلوبها أقوى من الحجر
يلاكا نبني الطين ونزرع
خيرنا قدام البحر.
ننشر خدار عز النهار
نلبس جلاليبنا الخُُدر
تحت الشمس..
ونحدك الرماضة بي
موية الوضوء..
ونصلي من فوقا الضهر..

شان الله اكبر من تراب الواطة
والعيشة الفقر..
شان الله أكبر من بيوت الدنيا
والضل البواسي رقبتو
والحيطان شُتر..

يا الله ما تدينا هم..
يا الله ما دايرين صبر..
ادينا راحة بال وخير...
وكفاية تسقي قلوبنا مر

يا الله كان الجايي شر
يا الله ما دايرين عمار
لا مال ولا طولة عمر

شيل روحنا خلينا أنموت
الموت أخير من ناس بتكتل
في القِرش..
تنخر عشان يقع العرش.
والسوس زماااااان فارق بنانا
وقال أخير ليهو القبر..

يا حليل بيوت الطيبة
والحن واليقين..
يا حليلا لمتنا العصر..
يا حليلا شعبة جدي
للعتان تتر...
يا حليلا سبحة يمة
والشاي بالتمر...

يا حليل أبوي...
يا حليلا ريحتو وعمتو
يا حليلا أمي وكت تحصن
قامتو بي يس
تقول يا عين دقر..

اتغير الحال والزمن
وانا نازرة ليك..
روحي وغناي..
شعري ودعاي
عيش جمبي حر...
وأسكن معاي جمب القمر
خلينا نضحك وننتشي
ما بين عيونك وضحكتك
بحلا السمر
خلينا ننتكي في الغيوم
وانجم وتبقالي الدخر
تدفرنا نسمات الليالي
الحالكة.. فوق بلد السُمر
ونمر على الحلة
المضلمة بالسنين
نرميلا فصاص التمر..
نتزكر أيامنا الزمان
ونكندك الغيم بالدموع
ونطمبج النيل والشجر

زاكراكا أسمح من عيون
الجهلة قدام المسيد
والدنيا عيد..
أسمح
من الجبة المرقعة بالحمار
وجيوبا من قدام صفر
اسمح من الدويش
ونوبة جدي من بعد العصر
اسمح من الحيران
وتقابة ابوي الشيخ
وتسبيحو الكتر
اسمح من الحلقة
ولفيفا وضجتا
زكراكا اجمل من بيوت
كل الشكر..
القالوا فوق كل الخلوق
أجمل من الحن واليقين
عن زول قنوع رغم الفقر

تعال أملا الفراغ بالضي
وصنقر بيني بين الهم
تعال سالمني مشتهياك
تعال قول لي وحشتك كم؟
وانا الناجيت خيال عينك
وكت لون الوقت ضلم
وانا الإنبح فيني الصوت
وبندهلك تعال يا ريد
بناديلك تعال نتلم 💑

تعال أملا الفراغ بالضي
وصنقر بيني بين الهم
بدورك تبقى لي الخير
واسرح في سماك وأنجم
بدور اشكيلك الجواي ..
معاك بختاني أيي ألم
واغمض عيني عز الليل
وأهاتيبك أكان أحلم ..
وأشوفك روح ..
مستفة فيني مجرى الدم ..
وأحسك زي كأنك أنا..
وإنت ان شاء الله لي تسلم..

وناجيت في الخيال عينيك
وكت لون الوقت ضلم
وانا الإنبح فيني الصوت
ودقات قلبي تتكلم ..
وتندهلك تعال يا ريد
بتناديلك تعال نتلم..
تعال سالمني مشتهياك
تعال قول لي وحشتك كم؟

ان عاديتنا أبشر بالخراب والضر
اخونا البكفت الشيطان وسمو المر
وانا البي السبحة بتحسبن بكر وبجر
نخلي الملة من حالك تقول كُر كُر

ان جاورتنا حبابك حباب الجيرة
ستات الكرم والجود وحسن السيرة
لافينا الغتيتة ولافي واحدة عويرة
أنا ياني البكر ملكة واخيتي اميرة

ان خاويتنا بنسدك بنجبر حيلك
بنشيل همك ان فاضبك نخفف شيلك
ان شفناكا فوق عوجة بنعدل ميلك
نخاويك صِح معاك بنزح ننور ليلك

ان حبيتنا الله اداك مفتاح جنة
بكولنا كتار وكم من فوقنا شاعر غنا
ان كت ماش وشفتنا..في المشي بتتأنى
كم فوق ريدنا عاشق عقلو ودر وجنة

لا بننحل لا بننزل ولا بننلك
لا بنهون ولا بنخون ولا بننشك
اخونا الفنجري العاداهو بندك دك
شبعانات فراسة وعزة بنوت مك

صغيرتنا ان مشت ساكت وقارا علامة
وان جات قنبت لا قاصعة لي نضامة
كبيرتنا الملانة صلاح وحكمة كلاما
مختلفة فكر مختلفة حت في سلاما

سمحات تب بنوقد في القلوب بقاقة
لا بنبرأ الرزايل لا بندور الفاقة
امنا واحدة لي عكر السنين رواقة
اختنين نحن تالتنا البعقر الناقة

لا سمعوبنا يوم في قلنا لا في قال
محل ما نمشي هيبة وعز وأدب وجمال
الله من المحاسن فوقنا عبأ وكال
نسوان نحن لكن في القواسي رجال

يا زول كفاك ..
راجع حسابات سكتك
كل الدروب الانتا فيها
ولا بتشبه خلقتك
أرجع وزاكر الفات وراك
ارجع وعد المات وراك
ارجع وشوف دمعي
الخرف وانا في راجاك
ارجع وراجع دنيتك ..
ارجع وزاكر الفات وراك
واتزكر ايامي المعاك
واعرف كمان ..
الضربة إن ما صابتك
لابد تزيد من قوتك ..

يازول بتسرق في الحكاوي
الطاعمة من خشم الغنا
يازول خبارك وصحتك
ليشن مطول مننا..
يا (خي) خبارك والبرد
والزيفة والهم والعنا ..
كيفن تكوس درب الودار
واحلامك المالياك كتار
وإت عارف إنها ممكنة؟؟

طاوعني واوعاك تنكسر
في دنيا بتبيع الفرح
وآمالنا تسرقا مننا
ساعدني وأجبر خاطري فيك
اسندني وارفع راسي بيك
خليك سمح وقت الشنا ..

قايل روحو بشتري قلبي بي جنيهاتو
وانا البعجبني في الراجل رصين كلماتو
المتلك يمين ما بسوى شبشبي زاتو
زي ما جيت حياتي تغور وتبرأ الفاتو

قايل نفسو بشتري ريدي ليو بي قروشو؟
وفاكر قلبي دون الناس بصير مدهوشو؟
عزيزة كريمة بت أشراف بركزو وإهوشو
والمتلك منافق وعشرة عشرة وشوشو

اوراق القِرش كان يورو او دولار
ما بتجيب غرامي وأصلا السوق حار
أختا طريقي أحسن ليك قبل تنهار
بلاش عنطيظ بلاش فنطيظ بلا استهتار

وما زي البنات بشهق وأباري المادة
وبينات الرجال معروفة راكزة وجادة
قاصدة الخوة ليو تلقاني بالخير رادة
والبقصد يشاغل نفسو تمرق سادة


اهلي الفي المحاص خلو الرقاب تتطاير
و بتـــــــــك يا أبوي مني الرجال تتضاير
لا بنقاد ولا بنباع ولا بتعاير
ألزم علبك إن داير معاي تتساير

ما تعمل وجيه مرتاح وطبعك هادي
وعندك مال هنا وعندك دهب بي غادي
إت في وادي يا الراجيني وانا في وادي
لا رايداكا لا دايراكا..إت زول عادي

أكان قايلني بعجب بيك وأتابع جيبك
كان كدي أرجا ساي لامن يبتق شيبك
لا بغريني قرشك لا مدى رِطيبك
قروشك ختهن يمكن يضارن عيبك

عامل فيها سيد عزة وخزاين وجاه
انا اخت الاصم اللي الوجوه شواه
الدار قربي لابد من يضوق الآه
وكل الدار غرامي إحتار وجنّ وتاه

متقندف ومنفوخ ساي وكيسك فاضي
هاك مني النصُح إن راضي إن ما راضي
انت مدان امام عيني وقلبي القاضي
ما بتلزمني في الحاضر ولا في الماضي

من ولدوني راضعة العز ونفسي عفيفة
عيني ملانة ست حوبات ونيتي نضيفة
سمحة وطاعمة للدايراهو ببقى ظريفة
للمابياهو شوم وقبيحة صورتي مخيفة

بت ود العبد انا وامي بت الأطرش
ملانة يقين ملانة ثبات وخيري هبطرش
قولك ما بفيد ليو عادي بسمع وبطرش
وكتار البكا نضمي وليهو سمم وطرش

وكان ات ود مكوك انا زاتي بت الباشا
مع المتلك قسم لا بمشي لا بتماشى
هاك قولي النجيض هاك زردة الكماشة
ما بتاخدني كلا وقط وقطعاً وحاشا
.
.
مرابيع تعكس ظاهرة انجذاب (بعض) البنات تجاه المادة.. وتعكس ايضا مدى وضاعة (بعض) الرجال لجذب ولكسب قلوب البنات عن طريق المال والسلطة والجاه..فسحقاً..👌