‏معليش للدنيا
اللعبت بي
الديمة بتبعد مني قراب
وتقرب ناس ما بقربوا لي
.
.
معليش

إزيكم.. عساكم بي خير؟!

تعالوا نتونس..

عن الريدة..
وانا بريدكم كلكم كدا لوجه الله..

الريدة كلمة سودانية بحتة .. انا بقول انها اعمق من الحب بي كتير.. لانو البريدك بتكون حتة من قلبو.. بيحن عليك وبشيل همك وبراعي لي مشاعرك ويتمنى ليك الخير دايماً.. وحتى لو زعلتو او زعلك بتكون عايز ترضيو.. البتريدو لما يغيب بتفتش ليو.. تفضل لصقة في حياتو وما تختاو..الريدة ما فيها حسابات بين طرفين.. مافيها حقي وحقك وعزتي وكرامتي وروحي..بإختصار ما فيها إنت وأنا..(إنت أنا مافي واو بيناتهم)....فيها روح واحدة في جسدين .. الريدة مافيها خيار ضمن خيارين.. والبريدك بكون ظااااااااااهر بتشوفو وبتحس بيو حتى في نص الزحمة..
الريدة ما عندها ضد وما بتتحول.. لكن الحب عادي بتحول لي كراهية..
لما تريد بتغرق.. وتحس نفسك هايم كدا وزي الكأنك بتتنفس تحت الموية.. وحاسي بي راحة وإطمئنان عجيب.. ويجيك إحساس بالأمان حتى لو كان الطرف التاني بعيد عنك كل البعد..
الحب درجة واحدة وشكلو واحد..بس الريدة درجات وفنون واشكال والوان..الزول لما يحب بيشوف الحب في عيون الناس بس.. لكن لما يريد ممكن يتخيل عادي انو الغيمة بتريد المطرة .. وانو النقاع بريد الزير..وانو الطين بريد البحر..كلها حاجات ما بتتجزأ وكل واحد ماببقى من غير التاني.. يعني تكافل وتكامل واندماج متناهي.. وبشوف الريدة حتى بين الجمادات .. الإبرة بتريد الخيط والورقة بتريد القلم والحَلة بتريد الغطاية ..وهكذا..
لما يقولوا ليك فلان بحبك .. ممكن تقول: هو بالله في حب صادق الزمن دا؟؟!... لكن لما يقولوا ليك فلان بريدك ؛ بتحس انو خاتيك في درجة أسمى من الحب..فيها صدق وإخلاص..

(ريدة خُنْفُشارِية صاح؟؟!)
المهم .. البريدك بشوف كل حاجة حولوا حلوة بيك وبي تواجدك معاو..
ياخ المريود بكون ضعيف وهش قدام مريودو..
لما زول يقول ليك انا "بحبك" بكون قال كلام قلبو.. والقلب هش.. عشان كدا أسالوا قول ليو حا تحبني لحدي متين ؟! لانو الحب عادي بموت وبيتبدل (وسبحان مبدل القلوب من حال الى حال).. عادي ممكن تروح انت ويجي غيرك..بس لما تلقى زول يقول ليك "بريدك" هنا بكون واثق من قرار عقلو وقلبو وحواسو سوا .. يلا دا امسك فيو قوي
الريدة عمرها ما بتموت ...وبالعكس كمان بتجدد وبتزيد..
البريدك ما بخونك ولا بجرحك..ولا ببيعك..البريدك بوفي ليك..وبكون مقتنع بيك في شكلك وفي تصرفاتك حتى غلطك بشوفو عادي وحتى لو شين بشوفك سمح.. يعني بريد روحك ومتعلق بيها..
الريدة قنااااااعة .. ما زي الحب الممكن تكون فيو تناقضات ونواقص ...
والبحبك عادي ممكن يجي يوم ويكسرك ..لكن البريدك لو لقاك مكسور ببنيك ويعيد ترتيبك أحسن من الأول..

*في ناس كدا بجونا من حيث لا ندري وتجمعنا بيهم صدف غريبة ومواقف أغرب ..وفجأة يبقو بريدونا وبنريدهم ..

الحبيب بي فهمنا هو فقط حبيب..لكن الزول البنريدو بكون كل شي.. عادي يكون ابو او ام اخو او اخت صديق او صديقة....الخ..

في نفس الوقت المريود ياهو الحبيب بس أكثر شمولية ...يعني حبيب وصاحب ورفيق وسند ودنيا بي حالة ...(والبريدك بحبك لكن ما كل البحبك بريدك)..

غايتو الريدة حاجة غريبة بتكون معاك إلى ما لا نهاية... ممكن تلخبط كيانك وتخليك ما فاهم نفسك .. ياخ الريدة دي مرض... بتجيب الحمى والطشاش والهلواس..وتخليك أربعة وعشريييييييييييين ساعة بتفكر في مريودك وتخاف عليو زي جناك.. والحب ما بجنن البتجنن الريدة الشديدة... (الريدة قلب بنبض وراس شغال)...

#كسرة : (بريدك من كَنَاكِينِي)..

كناكيني دي مافي زول يسألني من معناها لأني أنا زاتي ما فاهماو..لكن ممكن أوصفا ليكم .. غايتو هي حتة هنااااااك جوة القلب في قاع البُطَين الأيسر يعني الكنترول كلو .. وفيها جزء مع فم المعدة..بتشحتف الروح وبِتفَوَّر البطن ..😂😂😂😂😂..

وزي ما قلتا:

الريدة أُم..
لإتنين بيكبرو في بعض
وأخوان بيسندو في بعض
وأصحاب بيخلصوا لي بعض
ويبددوا الواقع المخيف..
الريدة بين أغصان شجر ..
عصفور بدندن في السحر
برقص علي صوت الحفيف..
الريدة فرحة موج بِمِدْ
يتشابى شان إصل الأرض ..
داير يقالد فيها قيف..
الريدةفي ضروة حصير
بي لقمة طاااعمة وضُل وزير
وقناعة بالهدم النضيف..
والريدة عاصمة وصي وريف..
والريدة كَم قبال تكون أو تبقى كيف..
.
.
بصمات:
مرام العبد..

بنتفائل ...
نصحى املنا في باكر
عشان نتلم نعيد الماضي بالحاضر
واريتو لو الزمن برجع ..
ونسكن نحنا في الساعات
ومنها نابى ما نغادر..
واعيدالكان
ابويا زمان ...
وامي زمان..
طفولتي زمان..
ولعبي الكان..
وأجدد لحظة في الخاطر..
واعيد الريد
واختي الكل ماتضحك
بهل العيد..
واخوي الناجح الشاطر..

بنتفائل
عشان يغشانا مرة النوم
ويقنع بالنا مايساهر..
ونحلم بي فرح وناس
قدر ما نقول خلاص بسكت
يقرقر في الحزن ساخر..
ونتقلب ...نهضرب
بي تمامة النوم...
واريتنا ننوم وللآخر..

بنتفائل ...
نصبر روحنا بي بسمات..
يكورك همنا المخنوق...
بدل ما نقول عليو صابرين.
يقول فاض بيو
ومن البينا هو الصابر..
بنستحمل
نصوم من الفرح سنوات..
ونكرمو لو يمر عابر...
دحين كيفن نعيب الجوع..
اذا كان الزمن كافر

بنتفائل...

أنا دايرة شنو؟!
ما دايرة كتير
أنا دايرة أعيش في
عشة صغيرة معايا سمير
والعشة تكون مليانة زهور
أشكال وألوان وسياجا حصير
مفروشة برملة ومرشوشة
رشيشيا يكون بي نقاع زير
وانا زيري بكون ما زي أي زيز
حا يكون باااااارد في عز الصيف
والواطة هجير
وأخت كتوشي علي المنقد
مليان بالعيش
دي سلامة..كرامة
وياكلو الطير
م الطير حيكون طالبني كتير
بيغني معايا وكت انداح
واغني معاو.. ويحاكي غناي
انا بالصفير..
ويطير الطير ويشيل الشوق
لي زول معشوق
بطراو بالخير..
ويوزع ريدي على الحبان
كل الجيران..
لي كل خلق الله كبير وصغير
يديهم حبة إطمئنان..
ما الدنيا هي زيها زي الطير
بترك بتلقط فرحتنا..
تتفرج فينا وفجأة تطير
ما تطير كان طايرة ولافي ندم
معروفة القسمة أكيد بتصير..
كان ركت وكان طارت (دنيا)
وفي الآخر لابد لينا مصير..

الحب علاج والحب مرض
حيلين بيسندو في بعض
لو حيل من الحيلين هبط
التاني ببقالوا الدِرِب
.

الحب دَرِب

شارع طوييييييييييل
مختوت هناك في اللا نهاية
عليو قلب ❤
محفور عليو كمين.. كمِين
وقصادا بوابات حنين
يا إما تَعبُر بي وفاك
يا إما توحَل بالكضب
.
زولين و(رُوح) بين جتتين
ما عارفة إتخلقت هي وين
بس عارفة انها هي بتحب
.
وشين بيقدحوا بالرضا
بيقولوا للعالم كدا :

لو مرة خانتنا الظروف
ما بننسحِب
ولو مرخِي بقى حبل الوصال
بي اللُقيا تاني بننكرب
والدنيا لو نوت الخراب
حا نبني عُشنا بالغصِب
.
.
.
.
شترة:
الريدة بس كدا ...
أسألوا روميو هو البدأ..

اجيب ليك موية
ومن حيشانك جيب لي
رملة ملاااانة حنين

مش فكرة جميلة؟؟

نطمج
ونقعد سوا نتلمى
ونبني بيوت.. قيزان من طين؟؟

واجمل حاجة . .
نوهط بيتنا ..
الناصية الاولى
بداية الحلة ..
وقدام بيتنا نفج شارعين ..
شارع ماشي لغاية الآخرة
سوا نمشيهو ومتماسكين
وشارع برجع بيك للماضي
وبرجع بيا معاكا سنين ..
وشارع تاني وشارع تالت
وشارع وشارع
وياما شوارع ماحقتنا
وبس بتخص ناسا تانيين ..

ياخ اناسهم
ما ليك بيهم ..
ركز وخليك في شارعنا
الماشي تحتنا ..
وما ماشنو وفيو واقفين
ياخ ركز وخليك في سكتنا
الكل ما نقول نفرشا بالفرحة
ونزرعا بالفل والياسمين ..
تجيها الارضة تلوك تيرابا
ونحزن ونسرح

ومرات نبكي

وسعات نترح ..
ونرجع تاني نقول صابرين

لازم نصبر..
ما السكة معنونة بي سكنتا
خطاوي العشرة السوا لمتنا
عليها انحنا المجبورين

نمشيها ..
ونتعب ..
ونرجع تاني ونقعد نلعب
ياخ تتزكر
انو الفكرة
هي كانت اصلا
بيت الطين؟؟
البابو بيفتح في شارعنا
الشارع الفيو بوابة بيتنا
الانا حصنتها بي يس؟!

يكفيني قلبي بشيل وطن ❤وبضوي للعالم شموع 🎂
يكفيني طيبتي الباقية زاد
للدنيا كان هداها جوع

سألها أحدهم: أراكي قوية وتضحكين رغم الحزن.. فما السر في ذلك؟؟

أجابت بعين تملؤهما الثقة .. يا هذا .. قوتي في دموعي.. وكيف لأنثى تزرف الدموع أن تنكسر؟؟!..

أنا يا سيدي.. قوية لدرجة الهشاشة ..
قال لها: وكيف؟!
قالت له: قلبي يسع العالم ...ويمكنه إيواء كل مجروح وتائه ويتيم وشحاذ ومهموم .. قلبي يتسع لكل صديق..وعابر سبيل..

أتصدق؟!
أنا لا أكره احداً البتة..لدي الكثير من الأعداء لكن لا أعرف من أين أتو .. هم يكيدون لي وانا اغفر إليهم.. فالسماح من أبسط الأشياء لدي... هم يكرهونني وانا احبهم..

لست بملاك لكنني احس ان الفرق بيني وبين الملائكة انهم لا يأكلون ولا يشربون وانا أفعل.. أنهم لا يخطئون وأنا لدي بعض الهفوات الصغيرة.. التي لا تحسب بجرم أندم عليه..

أوتدري؟؟
لم أندم يوماً .. أفعل أشيائي بقناعات تامة..حين أحب أمضي في الحب بخطوات ثابتة .. لا اعرف الخيانة.. أمقت الكذب .. أحس بذلك الرجل الذي أحببته وكأنه طفلي المدلل.. أحتويه بكل ما يملك الحب من معنى..
حين أصادق...أوفي لصداقاتي.. فرقني الزمن عن الكثير منهم .. لكنهم ما زالوا بخاطري احمل لهم الكثير من الزكريات التي لا تنسى..

قوية أنا يا سيدي.. للدرجة التي تجعلني أحس أنني حين أصبح أماً سأنسى آلام المخاض بقدوم طفلي على الدنيا.. سأنجب بلا ألم .. فالفرح في تلك اللحظة سيكفيني أن لا أتألم ..

أتعرف السدود؟؟!
نعم ..تلك التي تحجز المياه ..
تشابه قوتي..
وعاطفتي هي الفيضان المحجوز خلفها...

قال لي : لماذا إذا الجفاف مع الرجال؟؟! أراكي وحيدة؟؟

ضحكت حتى برزت نواجزها..
وقالت: الرجال؟؟! من تقصد؟؟

أبي؟! حياتي .. هو يراني أحن مخلوق علي وجه الارض وهذا يكفي..
إخوتي؟! هم نبضي .. أخاف عليهم وأدعو لهم وأفديهم بروحي..

زوجي؟؟! سأجيبك لاحقاً... كي لا يكون ردي سابقاً لأوانه ...

بعيداً عن الدين... من غير هؤلاء يستحق القرب؟؟..

أتريدني أن اضحك مع هذا واتهامس مع ذاك .. واتبادل الحب مع هذا وأخون ذاك...
اتشارك الكأس مع هذا وأطعم بيدي ذاك؟؟
كغيري من النساء؟؟!

عذرا سيدي.. فبصمتي تختلف...
أنا أنثى أحادية في الحب.. لا تغريني أصناف الذكور.. وأكتفي برجل واحد..

أنثى ... أنجبتني إمرأة لم تراقبني يوماً ولكنها جعلتني أستشعر مراقبة الله لي..
أنا بنت لرجل..و أخت لرجل .. ولن أنكسر او أحنو الا لمحارمي..

قاطعها قائلاً: إلى متى القوة ؟؟ حتماً ستنهار قواك؟؟
قالت: إلى أن أُبعَث .. تلك هي قناعاتي.. تلك هي مبادئي... تلك هي ثقتي بربي..
لن انكسر لإرضاء قلبي.. لن أتخلى عن عاداتي في تعاملي مع الرجال.. فأنا هكذا.. ومن يريدني عليه ان يتعب لأجلي .. عليه أن يسعى إليَّ.. عليه أن يرضيني.. عليه أن يصير زوجي بالفعل وليس بالشعارات ...حينها فقط سأعطيه فوق ما تمنى..

قال بوجه حائر : عجباً! مثلك قد إنقرض .. وأنا أريدك زوجة؛ أتقبلين؟؟ وما هي الشروط؟؟! فلابد لإمرأة مثلك أن تشترط؟!.

سألته: أتصلي؟!
قال : جميع أوقاتي في المسجد..

وما الدين لديك؟!
قال: الدين وسط ويسر.. رخو دون شد..وأًَحفَظُ أركان الإسلام..

إذا من هي المرأة في نظرك؟!
قال: هي آخر وصايا النبي .. ورسول الله قدوتي..
خُلِقَت من ضلع اعوج وتستقيم باللين..

قالت:
وماهو الحب لديك:
قال : اهتمام ..تفاهم .. ووفاء ..

وما الزواج عندك:
قال : نصف الدين.. شراكة مقدسة ... مسؤولية وواجبات.. توافق واتفاق .. شد ورخو .. انجاب وتربية .. اخلاص لآخر العمر..

قالت : ومن أنا لديك؟؟!
قال: أنتي تلك الأنثى التي أريد.. أريدك أماً لأطفالي.. زوجة تقر عيني بيها..تساندني وتقف بجانبي... انتي هي التي أُحب..

قالت إذاً علينا بصلاة الإستخارة.. وعلى بركة الله ..

.
.
.
بصمات:
مرام العبد..

ما قال ماشي
وما ودعتو

اتفاجأتا
لقيتو رحل

لا سالمتو ولا ناضمتو

وكُت مخلوعة
وبسأل روحي لماذا ؟
وهل؟

هُنتا عليهو؟؟
واللا تكون الريدة العندي
اكتر من الريدة البيهو؟؟
واللا الفرقة القاسية عليهو..
وخائف اني اقوم ازعل ؟؟

عموما غايتو فُراقنا حصل ..

كنتا بعاند في احساسي
باكر برجع..
برجع باكر..

وباكر جاني.. وكنتا بتاوق
رغم احزاني .. لعَلو يصل..

باكر عَدا
وعَدا اليوم البعدو وبعدو
وانا امبارح وقبل امبارح
ويومي ويومي كنتا
بجابد في زكراهو وبتزكر

لما عيونو بقت في عيوني
وعاين ليهن..
اتكبكبتا ملاني خجل..

لمن يضحك بضحك ساي
ولمن يِكَشر برضو بَكِشر
كَنُو الزول يوم خلقو جبيني
خلقو جبينو الصاري معاي

كان بشبهني ولافي قرابة
ولانا أهل...

بس لمانا الريد في صُدفة
وبقت الصدفة تخطط لينا
يوم نتسالم ويوم نتكالم..
يوم نتفارق ويوم نتلم..
يوم نتقاسم فيو الفرحة
وحتي المُر بنضوقو عسل

وهسة ملامحو ولا بنشافن
وصورتو الهدت كل الوانا
جيت غسلتها انا بالخَل

بَدَن اتلاشن..
وكل الظاهر جوة الصورة
شكل العين من فوقا الحاجب
وكمين شختة مكان الشارب
وموية وشولة ونقطة ودولة
وشام ونخل

غايتو الصورة ملخبطة جدا
كل الظاهر فيها خريطة
ولو دققتا شديد حا تعرف
انو الكان في الصورة رجُل

كل الماضي الكان بيناتنا
غيمة مستفة بي دمعاتنا
مرت بي حِلتكم وجاتنا
ولمن وصلت فوق راس بيتنا
بين الحيطة وشباك اوضتي
رسمت قلبي وقلبك ضُل

بدت تِنخَج وبقت تَتنَخَج
ولمن سالت قلبك مَيل..
كنتا مراقبة خطاوي رحيلك
بين انا واعية وبين بتخيل
هسة حقيقة مشيت وانا فُتا
بقيت في فجة وانا في محل..

فرصة سعيدة الجمعت ريدنا
وزي ما ربنا والف بينا
زي ما جا المقدور وفصل

نهاية القصة حزينة وقاسية
وشكرا ليك علي اقصر فرحة
وكوم احلام تحقيقا فشل

وعُذراً لي يوم اتمنيتك
وبعتا الدنيا عشان حبيتك..
عيش الفيلم الباقي بدوني
دوري اكون المجني عليهو
وانت بطل

قَدُر ما انا ضوقتو سعادة
قَدُر ما ضوقني الحنضل

قَدُر ما الدنيا انسدت ليهو
قَدُر ما انا فتحتا ضلوعي
عشانو وقُت ليو اتفضل

وكان يا مكان
انسان حبيتو..وبتناساو
او قولوا نسيتو
وزي ما خش الروح حا يمرق
بي باب روحي البيهو دخل

ما حا اسيبا الصدفة تجيني
وتحكم فيني
إنو يفوت في آخر لقطة
وانا اتفاجأ انو مفارق
ومن الخلعة اقع وأنشل..

حا اتعامل عادي معاهو
ولو لاقيتو عادي بسلم
معرفة كانت..
ياخ كيف حالك ؟؟
علك طيب ؟؟
.. ناس البيت
ان شاء الله عوافي؟؟
ومني يشيلو سلام للكُل

ومنو اعَدِي اسوق صاحباتي
نَمِش نتفسح وناكل مَندِي
كأني ولا لاقيتو أساساً..
لا بتضايق لا بزعل ..

لا حاتقيف الدنيا عليهو
لا بتجرس لا بَنذَل..

وعادي القسمة تجمع بينا
وعادي الفرقة تجي وتحصل..

جمبك ولا بتزكر القاعدين ..
ولا الماشين
ولا الواقفين
ولا بتزكر أياً كان ..
قصادك ما بشوف غيرك ..
وحتى وراك بشوف طيفك في كل مكان ..
مشتت حرفي في دربك وبعزف في هواك ألحان ..
بريدك جد شوية عليك وبهواك جد قليلة كمان ..
..متيمة بيك
أيا الفارد مساحاتك هوى وتحنان ..
و ساكناك فجة فجة براي وفيكا بتوه وما بلقالي فيك إنسان ..
وأفتش في متاهاتك وألعب في عنيك دس دس ..
وأجوطك زي كأنك أنا وأصلا انتا لي عنوان
بدايتك بتشبهني ..
وفصيلة دمك الرويان زمان شالوها من دمي
وبحتار فيني في نبضي
وفي قلبي الرواك
عطشان..
واخشك واروي فيك عطشي
وأشيل الشوق يجيك عميان ..
وقايد حبنا المجنون مكسر فيك وبيك ولهان ..
وتحتل مني كل وريد وبحتل فيكا كل شريان ..
..ونبقى اتنين وروح واحدة ولا يصادفنا هم لاخوف
..ولا يعذبنا بعد أبدان
.
.
.
ياخ الحياة بدونك عذاااااااااااااااب
ما بتتوصف ..

وحظي فرندقس والدنيا جد ملعونة
في بحر العذاب والآهة انا معطونة
كل ما يهج بعيد ببراهو زايدة مرونة
زايد في الطناش وانا روحي بيو مجنونة

يِزُول ويبقى حكاوي..

والظَلَم قلبك حيندم
وتملأ دنياهو البلاوي..
والأذاك بِطلُب سماحك
يبكي يتراجاك تداوي..
وايي زول فاتك مَخيَّر
بكرة برجع بالشكاوي..
انو عطشان بي قفاكا
وراجي منك
تبقى ليهو سحاب وراوي..
وإنت حاشاك يا قليبي..
حاشا ما بتعرف تكاوي..
زادك الريد والمحبة..
وكل زول بغشاك تطايبو
وتهدي من الحِن غناوي..
وحاشا ما بتكره عوازلك
وحقك الشالوهو غيرك
حاشا ماك داير تقاوي..
وراضي بي أقدار زمانك
راضي تملاهم سعادة
وإنت من الفرحة خاوي..
الله فوقك ؛
زيدا طيبتك وما حتخسر
وديمة بالخير أبقى ناوي..
بخسرو الباعوك وفاتوا..
كنت ليهم دار وضحكة
ودنيا باللون السماوي..
واسعة ياما انداحو فيها..
شبعو منك ..
لما جرحوك شافوا جِنك
وشالوا حالك بالحكاوي..
كلو منك ..
كلو منك يا قليبي..
وتوبة كان ابراك وأتفاقك
وتوبة كان تبقالي حاوي..
وتاني ما بطلُبلي ريدة
لاني بعشق..
لاني دايراك تبقى هاوي..
اختا درب الحب وسيرتو
وأبقى درويش في الخلاوي..
ببقى ليك انا لوح
وقصبة..
أبقى تقابة ضلوعي
وقُود مشاعري..
وللصَلاح زيد الخطاوي..
دمي ببقالك دوايتك
كون فقير او بقى راوي..
وفوق ضلام الليل تنور
عتمتي وتبقالي ضاوي ..
وما تريد زول زول شان يبيعك
انت عند الغيرو غااااالي
وعندو ابداً ما بتساوي..

أسمح لي
دقايق بس
أشيل أنفاسي وأتنفس
بريدك
وإنتا عارف الريدة
كان دسوها مااااااا بتندس

عيوني مابية تنوم
شايلة السهر كل يوم
قليبي ديمة معذب
جواو ألم بالكوم
بالله ياخلاي شوف السهاد البي
أنا في العمر مظلوم
نسيتو درب الريد
ومن الفرح محروم
بس وروني أعمل إيه
وبي راحة أقدر أنوم
حلي الوحيد يازمان الدعوة لي ربي للواحد القيوم

لم أتبع الشيطان منذ طفولتي
لكنه قد كان يتبعني
عساي بأن أصير من الهواة...
وعساي أفعل مايشين بسيرتي
ويضيف لي سؤ الصفات..
فيزيدني هما يشوه فكرتي
فيقودني للموبقات..
اصبحت بعضاً من رماد او رفات
قسراً تبعثره الرياح كما تشاء
وأراه في عينيّ بعضاً منه
يمضي راحلاً والبعض آت
بعضي انا...
بعضي الذي قد كان يوماً ما
يسموني به اني فتاة..
أيا رفاتي ويح هذي الريح
كيف تقودني .. لسبيل
بعض إمتطاه رفاتهن
فقادهن الى الممات..
وانا التي أرمي بدلوي مفرغ
فإذا به يتجابد الأحزان من
بئر الحياة..
وانا التي قد كنت أرتقب السعادة مرة
فإذا بنفسي قد هويت وصرت
أهتف للنجاة..
وهربت من شط الحقيقة للخيال
وبحثت في كل الدنا..
علي ألاقي مثل زاتي أي زات..
وأنا التي في الحين تقف أناملي
مرفوعة...
وجوارحي الأخرى تحث دواخلي..
أن انزوي في عقر داري للصلاة..
وأنا أستعذت الله عمرا كاملاً. .
رحماك ربي بي فإني قد
دعوتك عد ما يدعو الدعاة...
رحماك ربي خالق الارضين
من طياتها تهب النبات..
فأنا فتاة قد تآكل خدها بالدمع
حتى سميت عيناها بإسم الدامعات..

الحُرقة بداية الليل
بتزيد والليل بقصر

والوحدة القاعدة معاي
نتونس وسوا نسهر

والعرق الشايل الخوف
اتبخر وصبَّ مطر

والمطرة تنقنق حِن
وانا دمعي بيقطر

مِتفَحِم قلبي الشُّوم
والفحم الفيو جَمَّر

وبُكاي البِمرق بُوخ
ما بِبرد وزايد حَر

يا الفرح العدا وفات
طولتا خلاص اظهر

م انا مارقة عشان القاك
فاصل بيناتنا بحر

عوامة وبعرف اعوم
بس لكن فوق البَر

والمركب شال النوم
لي جيهتك عدا عَبر

والموية البينا تزيد
كل ماليك اتزكر

اندفقت فوق القيف
وانداح الموج وهَدر

وانكسرت بيك احلام
ياخ عاي أتتكسر

لاانت الروا لا القوت
لا انت الخير لا الشر

لا انت الراس لا الساس
لا بتندس لا بتَنشَر

لا انت الفات لا الجاي
لاك قائد لاك عَسكر

إت كنتا مجرد زيف
يوماتي بتتنكر

انا ردتك وكلي صدق
بس زيفك كان أكبر

فارقتك كلي سماح
ذنبك ماهو بيغفر

وخلاصتك عندي حروف
وأجهضتها في دفتر..

ورميتو محل ما يفوت
ياخ عادي الضاع أكتر..

مطرودٌ أنت وزكراك
مطرودٌ حبك من قلبي
والولهُ الكامنُ في صدري
قد مات وصرتُ بلا نار ..

إنطفأ الشوقُ بلا ماءٍ
مكبوت دمعي في حلقي
عبراتي صارت كحجار..

تخنقني أصواتُ الزكرى
باردةٌ أطرافي صيفاً
وشتاءاً اتصببُ عرقاً
يتصاعد ملحي كبخار ..

قد صرتُ الآن بلا طعمٍ
وتقلصَ عقشك في جوفي
حتي أضحيتَ بلا حجمٍ..
وتلاشت مدنٌ وبحار..

زرناها في القرن الماضي
وعلى سطح العشق الهادي
أبحرنا عكس التيار..

نتغنى فرحاً وننادي
يتراقص ريحٌ بالوادي
ويعمُ الرقصُ الاشجار..

قد كنتَ وكنتُ
وكنا إثنين..
وثالثنا حلمٌ قد رحل
بلا نومٍ
حبٌ قد مات بلا يومٍ..
كلقيط وُلِدَّ بلا قومٍ
مطرودٌ بين الأخيار...

لا أنكرُ اني ادمنتك..
لا انكر انك في شعري
ألهمتني كل الأشعار..

مطرود انت بأفعالي
موجود انت بأفكاري ..
مطرود أنت بأيامي
موجود أنت بأحلامي..
مطرود أنت من الآتي
موجود في زكرى الماضي
يا رجلاً أضحى من زاتي
مطبوع فيه كتزكار..

هيهات نعود كما جئنا..
في ظل الغيمة نتسامر
فيصب الغيث علي الدنيا
مطرا في الحي وقريتنا
نسعد بهطول الامطار..

يخضرُ العشبُ بشارعنا
تنمو أزهاراً..
أشجاراً
والطيرُ الهارب من عشه
يملأ بالدفئ الأوكار..

هيهات نعود بلا ندمٍ..
اوجرحٍ طال بأوردتي
والدم النازف يفقدني
الوجع الصامت يقهرني
الشعر الناطق يفضحني
واداري ليني بجفافي
اتعامل قسراً عن طبعي..
صحراءاً تحوي الصبار

اشواكي تطعن من يشري
وأضم العقرب في حكري
وانا ادري او لا ادري..
أحفر للأفعى أنفاقاً..
يؤلمني اللدغ علي صدري..
لكني أسمح لو تدري
ان احمل كل الٱشرار..

واجود عليهم بالسُكنة...
وبطيب الخلق أعاملهم..
واشاركهم حتى المحنة.
أتغابى فعلتهم قصدا
أتجاهل كل الأضرار..

وأدل التائه في دربي..
من يعطش أسقيه شهداً
وسرابي وحدي أتبعه..
ضلت خطواتي المشوار..

قد تهت بنفسي
ودليلي نجمٌ من فوقي يتلالا
قمرٌ وسماء وحجارة...
ورمالّ مد الإبصار...

لم أدرس علم الأفلاك...

خارطتي ..

تزكرُ خارطتي؟؟؟..
أعطيتها يوماً إياك..
يبدأها دربٌ مملؤٌ بالجمر
وبعض الأشواك...
اصداف تنضح بالسُم..
تتشارك فيه محار..

قد كنت تنادي لدخولي..
أدخلتك نبضي بقبولي..
أختلت بعدك ضخاتي
ودمائي هدت من طولي...
يمضي التاريخ بلا جدوى
والزمن يفوت بإهدار..

قد صرت
بلاك..
بلا وطنٍ..
قد بعتَ الحب بلا ثمنٍ..
أحتاج الآن لأن أغفو..
أحتاج أماناً وديار...

أشتاق لأهلي ورفاقي..
(احتاج لغيرك في شعري)..
يشتاق الشعر لأوراقي...
أفتقد لبعض السُمار..

فلتقرأ..
وأرحل عن عيني
لينام الأرق برئتينِ
تتنفس تشهق زكراك...
وزفيري يمضي كدخانٍ
والصوت يردد من جوفي..
غدارٌ أنت ومن حولي..
(غدارٌ قلبك غدار)...

سمح الصبروكتين يخش في دنيتك
يمسك ايديكا يسالمة
سمح الصبر وكتين يرتب دنيتك
وافكارك انتا ينظمة
سمح الصبر وكتين يفجفج في الضلام
داير دواخلك اكلمة
سمح الصبر وكتين عينيك بتشوف عديل
لكنو بس قلبك عمى
سمح الصبر وكت الهموم تكتر تزيد
تصبح عليك متراكمة
سمح الصبر وكت الظروف تخدش وتنبش
في الحواس وتخفي كل معالمة
سمح الصبر لي زول قلب حالو الزمن
كانت حياتو منعمة
سمح الصبر وكت البشر تغتر عليك
تطلع وترفع سلمة
سمح الصبر وكت المآسي تزيد عليك
واصعب عليكا تقاومة
سمح الصبر وكت البشر تطغى وتجور
وعقولا تصبح ظالمة
سمح الصبر وكت الحياة تصبح خلاف
ومزاحمة
سمح الصبر وكت الزمن يرهن حياتك للشرور
وافرض عليكا تلازمة
سمح الصبر لما الزمن يفرض عليك افعال
قبيحة تداومة
سمح الصبر وكت الحياة تبقيك مدان
في محاكمة
سمح الصبر وكت الحزن تلقاهو في دمك نمى
سمح الصبر وكت الزمن تلقاهو من الفرحة
روحك حارمة
سمح الصبر وكتين يدخلك الحياة يخليكا طالب
وتبقى ليكا معلمة
سمح الصبر وكت الحبيب يهجر هواك
وينسى احلام القليب الكنتا واياو راسمة
سمح الصبر واصلو الصبر بقى لي حمى
واصلو الصبر بقى لي طبيب عالج جروحي
المؤلمة
واصلو الصبر عالجني من جور الزمن علمني
معنى الانتما
سمح الصبر وكتين يشيل منك دموع يرسم
علي شفتيكا افراح دائمة
سمح الصبر وكتين يزيدك في الصلاح
ويشيل همومك الملمة
سمح الصبر وكتين يدق بابك يخش
يملك حياتك ويحكمة
ويا ربي لزمني الصبر واديني
حسن الخاتمة

تحياتي:مرام العبد

الهواجس راودني
ومن دبر قدن
قميص اشواقي ليك
شترن وتر عصبي البغني
علي مجيك..
رقصن علي شترة غناي
ديل زغردن واتشبلن
شان لحظة ماشافني فيك..
قطعن رحط حبل الوصال
مدنو زي حبل الصراط
وانا نفسي اجري جري واجيك
مابيني بينك فد طريق
من تحتو نار..
وريني كيفن ابتديك..
وانا شايفة طيفك من بعيد
خلاني اتلفت براي..
لي؟؟...
واللا لسواي ماد إيديك
انا واقفة وحدي ومافي زول
واقف معاي..وزاتو ما اظن
تلقى زولا زيي رايدك وبشتهيك