الريد يوما داك
غفلني ورحل
وشال النوم وراك
خلالي السهر
رهن عيني فداك
الريد الرماني
ما ظنيت رماك..
هنا انا وحدي ساهرة
وقلبي هناك حداك..
الريد والبحر
والحب الأمر..
والقلب إنكسر..
والهم الجواي..
بكبر في حشاي
وإنت هناك براك..
ياخ انا شايلة همك
مين انا غيري بقدر
يقشقش كل دموعك
وزي أمك يضمك..
مين اللما تبعد
بتقريف لقاك..
عاين..
أوعة تزعل..
ما بحمل اشوفك
صاريهن حواجبك..
وشايل هم دناك..
حلفتك عشانك
ما تباري الفواجع..
والقدر اللي خانك..
ارميو بي وراك..
خسمتك بروحك
أنساها المواجع
ولي صفحات حياتك
قلب وشوف وراجع
وقيم مستواك..
عالي ودنيا واطية..
خاتية وكت تمسك..
خاتية الدنيا خاتية..
وإنتا شبه ملاك..
وأنا زولة بتجابد
زي سمكة بتناهد..
بين صياد ومركب
وأسوار الشباك..
زولة بسيطة جدا..
حلمها كان تشوفك..
بتحلحل قيودا..
وتتنفس هواك..
حلمها كان تشيلك
في حدقات عيونا
وما تبكيكا حرقة..
تفرح لما تضحك
وما بتحمل بكاك..
كل آمالا كانت..
عشة صغيرة هادية
وهي تكون أم جناك..
وآخر منية ليها كانت
رغم خوفا..
تكبر في عيونك
اقصد..
جم عيونك
وبيها يتم مناك..
ولما تشيب..تخرِّف..
يبقى كلاما عنك..
عن أسلوب كلامك..
وإنك رغم سنك..
لسة حبيب قساها
تريدك زي جناها..
وهي حبيبة قساك ..
ساذجة جنس سذاجة
حتي الموت ودربو
سيرتو وقت تجيبا
بتتمناو معاك..
ماتت وحية لسة..
جتة وراها قصة..
قصة زول وزولة..
وما أدراكا ريدة..
وما أدراك هلاك..
.
.
.
.
الفاااااااااااااااااتحة...

الكلام عز السكوت
ونسة دجا ..
وكوم من حروف مرقن
بدون ما يشتهن طعم
الغنا..
جن هن براهن ومافي في
جوفن طلاسم من فرح
لا زغردن لا رددن
لا كوركن ولا اتوجعن
لا ضاقن المدعو الجنا

وانا بت وناس
قيمان ملوك ماسكين
ترانيم العشق
قاتحين بيوت كل الغرام
لابسين جلاليب اليقين
زارعين ورود فل.. ياسمين
والأحلى بينات الشتول
كانت فروع السوسنة

وانا ما انا ..

انا لما اكتب ما بكون
بكتب براي ..
عندي القبيل
حافظين ملامح دنيتي
وحافظين تفاصيل الوجع
والضحكة في الروح والهَنا

وانا ما براي ..
انا لما اكتب
بنكتب سرك معاي
يا زول ملاك ..
جيت من غيوم الريد
وصبيت من سماي..
ومليتني لاحد الشبع
بيك إرتويت ..
واتطمبج القلب الهواك
لا عن هِنا ..

جيت من بعيد ..
وانا كنت راجية الدنيا تفتح
بابا لي في دنيتك ..
وتجيب خطاويني الزمان
وتعيدا لي في سكتك
وانا اتولد من تاني ..
من اول جديد ..
واعيش معاك زي ألتقول
أنا ما أنا ..

وأبدأ وأعيد في الريدة
من أول جديد
م أنا جيت وليك حا أعترف
لا ردتا قبلك
لا هويت
لا عقشت قبلك لا رأيت
لا نمتا قبلك لا صحيت
لا جيت بلاك لا حتى
لي غيرك مشيت
لا لقيت ديار أستوطنا

وأنا ما أنا ..
يوم اشتهيتك ..
كنت قبل اجيك براي
بتمطقك والريق نشف
لمن طريتك وقلتا لي
جاييك مستف ليكي شوق
مليان حنين
مليان ومتلهف
عليك ..
وبقيت أغني من الفرح
بكتب حروفي وألحنا

ومشوار هواك جدا جميل
جدددداً جميل.
بفتح مواسم من عبير
وارياح وصندل ومستكة
انسام مبخرة بي هواك
ريحتك ولا بتشبه
عطور الدنيا لا حتى الزهور
عطرك براو واحد ولا لقيت ليو
شبيه .. بتنفسو ..وبتكرفو
وبتقريفك جداً أنا ..

الدنيا كلها كوم براو
وانا وانت اتنين في بعض
تشبهني بس وانا بشبهك
قلبك ملان بي ريدو لي
بي حبي ليو أنا منتهك
إيديك شرايينك وتينك
وجتتك
كونك شياطينك ملامحك
وإنت..لي ..
عينيك براهن دوزنة..

خليك من الناس والهموم
أبعد .. تعال ..
أرجع ...وفوت
في الآخر انا بس باقية فيك
منك وليك
عنك ولا بمرق شبر
وان فتا سنتمتر بجيك ..
انا ساكنة فيك .. لامن تموت
وبعد تموت جوة القبر
بقسم معاك كل الذنوب
وبشيل معاك كل العنا ..


تنساني؟!..

قوم أصحى..
ما تحلم كفاك ..
حا تنسى روحك وملتك
حا تنسى ماضيك ..حلتك
حا تنسى إسمك وذكرياتك
و تطرأ وجعك وعلتك
بس أووووعة تحلم إنو تنسى
هواي أنا ...

أنا بتنسي ؟!
ما بتنسى انو السكة بي
بس ليكا ممكن تتمشي
ما تنسى انو البينا أكبر من
نسميو أي شئ
وريني كيف تنسى الضحك
حنيتي والحس والعيون ..
حا تنسى كيف إسمي
وهدؤئي الفجأة بتحول جنون
حا تنسى كيف الدندنة

ياخ قوم تعال ..
انسى الجواب قبل السؤال
الفات مجرد إفتراض
انا عارفة اني موهطة ومالياكا
لي حد الكمال ..
تنساني.. ليك ما بتنسي ..
وأنساك .. مُحال ..
مخلوق عشان تبقالي روح
مخلوقة ليكا وما بروح ...
والسكة بينا معنونة

شارعين وبيت ..
وعديل وزين .. زغريد
وتحقيق أمنيات
دعوات وحوش
وبرندة فيها رتوش رتوش
جبنة وسبح ..
وكرم عريض...
جود بي بلح ..
وحلاوة من إيدين ولدنا
وبتنا

ومن حقنا نحلم نلم
ايدينا فوق ايدين بعض
من حقنا ..
نفرح نمش لي دنيا
غير دنيا الخلوق
مافيها حب غير حبنا

ومن حقنا نعلن غرامنا
وننفصل عن ناس
زمان بتمنو فرحة تلمنا

ومن حقنا ..
نتلم ونطرب وننتشي
وبذكرك ايام زمان ...
وكتين تعاين لي مساااااافة
وتبتسم ...
وأنا أختشي ..
لمن تقول لي بعشقك
رايدك ودايرك ..
وليك أقول :
القسمة في إيد ربنا
وياااااااااا ربنا..

مجنوووووونة جداً ياخ أنا
ما أصلو قالوا الجن فنون
وأنا عقلي وارث الشيطنة..

بنتصبر
ونتغابى الوجع مرات

بنتجاهل همووووم وهموم
ننوم ومستفين عبرات

وفكرنا يمسح التاريخ
ونتناسى الزمان المات

ونصحى قبل نزول الحر
عرقنا نشف من الوجعات

ونبرد ونستكين في الضل
ونتوانس مع النسمات

نشخبت في رمال الحي
وفوقا نشتت البسمات

نمد من الفرح أوطان
ونكتب للوطن غنوات

ونزرع في القلوب الريد
ونتسامح وننسى والفات

ويتبخر عكر أرواح
تصب من الأمل غيمات

نعيش والبينا حب في حب
ونبني الريد بيوت وأبيات

دحين لاتشيلو هم الفات
وسكو واقرعو الجايات

دحين خلو الجزع والخوف
دحين لوكو الصبر قرضات
.
.
.
وأكيد الجايي أحلى :-) ان شاء الكريم...

عنترة2020

يا دار عبلة في الفناء تكلمي
فاليوم قد منع التجول فاعلمي

إن البقا في البيوت أصبح واجبا
لا تخرجي يا عبلتي كي تسلمي

كوفيد لا يدري بأنك عبلة
وبأن عنتر فارس لم يهزمي

قد كنت قبل اليوم أهزم جحفلا
إن قيل عبلة في المخاطر ترتمي

واليوم ها أنا ماكث في غرفتي
وبمفردي مثل البعير الأجذمي

أصحو فأطبخ وجبتي متثاقلا
ليس الطبيخ على الفتى بمحرمي

ولقد ذكرتك والصحون مليئة
فولاً وكأس الشاي يسكب في فمي

وودت تغسيل الصحون لأنها
لمعت كبارق ثغرك المتبسمي

لا تعجبي من حالتي ولتسألي
إن كنت جاهلة بما لم تعلمي

هلا سألت الغرب يابنة مالك
كم مات منهم كم بغير تكتمي

فلكم أذاقهم كرونا ذلة
ويسومهم قتلا بغير تكلمي

*عنترة 2020*


منقول ..

إنعل ورق كل القروش
وإنعل حيط كل البيوت
الما بتستر روحنا
عن ساعة المروق ..
انعل غيوم الحلة يوم
روت المِرق واتكهرب
النوم بالبروق..
وسهرنا والليل ما إنتهى
لا هدد القمرة الشروق

إنعل فهم كل الخلق
كل القلوب الظالمة
قلاعة الحقوق ..
إنعل فراغ الأمكنة المليان
مستتتتتتتتتف بالخلوق..

إنعل أبو الحيل الفِتر
إنعل بلدنا في كل شبر
دام التراب بقى ليهو
شَنَّة وباع وسوق ..
مطلوق خيالي
ومااااااا إنقرع ..
مليان مغايس وريد
وشوق
خداعة يا دنيا الظروف
يوم فتنا قاصدين البحر
صدينا ناشفين الحلوق
وقلوبنا ماليها العطش
نتجرع المُرة ونضوق

يا حليل سند روحي النصَل
يا حليل وِلِف كل الأهل
وإنعل أبو الدم في العروق

دام القريب ما بنصفك
واتجاهلك زي ألتقول ما
بعرفك .. دام بكسرك
دام بجرحك دام بكرهك ..
دام بنسِفك

قول الله فوق..

وأنا ما بروق ..
والله بقسم ما بروق
لو ما إندمل
جرحي المفتق بي الوجع أنا مابروق ...
لو ما إنقفل باب الطمع ...
بي أقوى طوق
أنا ما بروق..
لو ما إنصرع قدامي شيطان
الجشع
لو مارجع حقي القصاد عيني
إنقلع أنا ما بروق ..

صليت وبدعي وما بروق
قلبي المستف بالهموم
وحشاي مفتق بالحروق..

والحال لسانو بقع وإقوم
قول يا لسان

قول الله فوق ظلم السنين
قول الله فوق كل العباد
الظالمين
قول الله فوق حق
الأمين .. والما أمين..
قول الله فوق روحي المطقطة
بالحنين
قول يا وكيل الغافلين..
قول الله فوق ..

شكراً علي اجمل حلم
كان لي عشم
شكراً علي الريد
اللي جرعني الألم
شكراً الى حد السكات
شكراً الى آخر النضم
انا ماقريتك في الفصول
وانا ماكتبتك بي قلم
وانا مازرعتك في جواي
شان احصد الهم والندم
انا فيك رسمتا احلام هواي
وعزفتا بي همسك نغم
شيدتا لي حبك قصور
ورفعتا فيها هواك علم
طرزتا فيك بحر الحروف
ودرستا حبك زي علم
ختيتا صورتك في القمر
وكتبتا اسمك بالنجم
وانا كان جوايا بحور امان
لكنو صدك كان ظلم
وانا كت بنادي واهاتي بيك
لكن نداي ليك مابهم
وانا كت بسوق اشواقي ليك
في سكة الشوك والعدم
وانا كنتا خاتة آمالي فيك
وأحلامي بيك صبحت وهم

شكرا علي كلمات عشق
مكتوبة بي لغة العجم
جبرا علي جافيت سماك
شان قلبي رادك وانصدم
وانا كم رجيتك بالسنين
وريني كت راجيني كم ؟؟؟


شكراً إلَي

ذنبك عليك

قسراً علي

ماراجعة ليك


قلبك معاك ماليهو زيف
وامل الرجوع فيني انعدم

باريت خطاكا علي الرهاب
وانا حيلي في دربك فتر
قلبي المباريك من زمان
الليلة هداهو السف
خلف وراكا رفات قلب
عطشان وغرقان في بحر
دقيتا نوبة العاشقين
ولعتا تقابة الصبر
لي كل درويش في الغرام
اشواقو حية زي الجمر
لي كل قلب حارقاهو نار الانتظار
والوحدة في الزمن الفقر


انا ماجبرتك شان تريد
انا قلتا فيك آخد الاجر
ودعتا ليه ايام زمان
غادرتا دنياي دون عذر
فتقتا في جواي جروح
وانا كنتا راجياك تعتذر
لبستني الحفا في الهجير
تاتيتني ليك والدنيا حر
وانا كنتا بحلم بيك رسول
في فداو احارب وانتصر
وانا كنتا بحلم بيك وطن
اهواو واعيش في داخلو حر
وانا كت بناجيك في الخيال
وكت النعاس غلبو السهر
وانا كنتا بحلم بيك رفيق
واتونسك وقت السحر
وانا كنتا بحلم بيكا كيف
واتقريفك باقي العمر

بس مالقيتك غير وهم
ضمخ رؤى الحلم الجميل
لقط حطامك من جواي
انا شفتا غير حبك بديل
والليلة مابفيدك عشم
ورجوعي ليك هو المستحيل
وآوحدتك وآ طول أساك
وآ وجعتك وآ طول بكاك
انا عنك اعلنتا الرحيل
خت نقطة واحرق صفحتي
وبقولا ليك شكرا جزيل....

دخان السجار ما بسو فعايل البدرة
والعفو والسماح معروف بكون بالقدرة
قلبي الأبيض الوصفو زمان بالندرة
من مغس الخلوق جاب ليهو حبة كدرة

روحي التايهة للخالق سؤالا
وخربانة أم قدود و أياهو حالا
نضاري حزنا بتزيد انبهالا
ما بتدي الفرح دغيلة جنس دغالة

لا شافوني يوم فوق عيب ولا مجلس قوالة
وكوني اغير وأحسد إستحالة
من قلبي الضغاين ربي شالا
وما بتلقاني عند الفارغة..لالا

وئام عبدالباقي
بعد ما قلت كل ابواب هناي انسدو
تجي الافراح وتفتح كل باب لا حدو
قلبي بشوفو لي الاقدار مسلم يدو
حتى رفيقو مرة معاهو مرات ضدو

مرام العبد:
في الدنيا ام قدود اصلو الصبر لابدو
والهم والوجع لا بدة بكرة يعدو
ما بسندك رفيق وان فات دحين لا تردو
م الزول ان وقع ما بنسند غير يدو

صبت مطرة 💦
ومرقت ريحة الطين في القيفة
وشميت ريحة شجر المنقة 🌳...

صبت
وصبت

وانا في بيتنا
بنطط فرحة.. 💃💃
مع نقنيق قطراتا النازل
اتشحتففففففففتا
وكايسة المرقة..

نفسي اكورك😮 واجري 🏃🏃
وانادي ويضحكو فيني😂
الجاي والغادي 😂😂
وكل الناس تستغرب انو 🤔
كيفن امشي براي للمطرة
أقيف في نص الحوش واندقة.. 🙆🙅

انا رضيانة
وياخ بالجد بالجد فرحانة 😄😄
تعرفوا اني بريد نقيطا ؟!
😍😍

وكل ما تنقط نقطة بغني🎼
وبحة صوتي الراحت مني
بترجع تاني..

مع النقيط بتفك الخنقة..

وافضل اغني.. أغني وأغني
🎶🎶🎶
وكل ما اغني يزيد دفيقة..

ويا ميطيرة صبي لينا..
غسلي وجعاتنا وعينينا
بدلي كل احزانا سعادة
خلي الجو اللبقى دبنقا..
🏞🏞🏞
دبنقا الجو في حضرة غيمك
ونيلنا اللولوح كل امواجو..
طفر قيفو 💙

وكل رمال الشاطي الغرقت
كانت اصلا راجية الشرقة.. 🏝

وسبلوقتنا الفوق راس بيتنا
اجمل منظر كان شفتوها..
وصوت الموية المنها نازل
صوت شلال والسما مندلقة.. 🌌

وصوت طقطيقا ..
بطقطق روحي..
وكل الهم الكان ماليني 😧😢
بي طقطيق المطرة الصبت
طرشق وطق طق
طق طق طقة.. 🤗🤗

وزنك الحوش الهدرت فيهو
بيهو طريت شفع جيرانا
وكت يتجادعوا بالخرصانة..
ويفلع حجر الشوم زنكينا
واقوم زعلانة.. 😤
واكون منحرقة.. 😬

صوت الحجر الضرب الزنكي
صوتو بيشبه صوت الطلقة.. 💣

ام الضرب الجانا امبارح ..
خلا عيوني براها بتضحك 😍
لا صدعتا ولا حسيت بالحر
والزنقة..

ياخي حلاة الغيمة الجاتنا.. 💭
حلاة المطرة الفلقت قلبي 💦
وبخت الزنكي الضاق الفلقة..
.
.
.
صبت 😍😍😍😍

حباب سيد الخسايل السمحة وايدو كريمة
هيلو الشكرة من ما قام ونيتو سليمة
حباب ود المكوك النشمي سمح الشيمة
هالكني الغرام انا حالتي الله عليمة

بلاك قول لي بعيش مرتاحة انا كِكيف؟؟
أيا المريود وراك الكون ضلامو مخيف
فرقك ليا قلاية ولهيب الصيف
انت الجنة وانت الفرحة وانت الكيف

ما خالفتو ديمة بقولو سمعاً وطوعا
عالي القامة كرمو علامة كلو هو روعة
أوعة تجيو مكشر وقاصد الشر اوعة
حرم شفتو بكتل خصمو ساي باللوعة

وفوق درب الغرام سموني انا مسكينو
من الزول البريدو وراجي عطفو ولينو
هالك قلبي قانون المحبة بدينو
قلتا الروووب وقلبي وراو طلع ميتينو

مغايس الريدة فوق دنيايا زايدات عومن
وعيني بالسهر وارمات ومابيات نومن
الهم والوحيح قلبي الموجع تومن
الحب والغرام ياخ الله ينعل يومن

مناي نتلم في الدارين وينتم عيدنا
بختم بالسلام ادعولنا وأرجو جديدنا
وصلوا على الرسول سيد المحبة وسيدنا
صلاة بيها الله من الفضائل إزيدنا

البشر البقت في السوق تبيعو ضميرة
شغلت فكري بي حالا وملتني الحيرة
دحين خلايا سمحين النضم والسيرة
دايرالن علاج الحالة ماشة ختيرة

واحدين واحدن فوق راسو مخ الطيرة
واحدين كلهن ما بعرفو حق الجيرة
واحدين همهن في الماركة والتأشيرة
واحدين أدمنو البنقو وشراب البيرة

واحدين الله ما اداهن ايي بصيرة
واحدين للعوج فاتحين قهاوي وديرة
واحدين بنسو زنقات القبور ونكيرا
واحدين نفسهن جاحدة بتدور حق غيرا

واحدين همهن حفلة وسماية وسيرة
واحدين ياكلو لامن تغلبن دنقيرة
واحدين بارو للافلام وحاكو شكيرا
واحدين دقو سستم والفنيلة قصيرة

واحدين حسبي القيوم خلق شريرة
واحدين ان بنيت القيف بيبقو دميرة
واحدين ليكا ضامرين الحسد والغيرة
واحدين زيي فاكرين النفوس بي خيرا

شيطان الغرام راميني فوق قلايتو
جب قليبي شالوا وختا فوق مخلايتو
وسمو بي هواهو وقدا بي جلكايتو
حوطو بي حرز غلبتني زاتو حمايتو

وفي دنيا الغرام شيطانا شكلو عجيب
قاسي الطبعة لونو بشابه الدغميب.
ان ختف القلب ما بسيبو دون دنكيب
وان خلاهو ما ظنيتو بشفى وإطيب

الزول البريدو وما عشقتا خلافو
شايل نومي والقلب الرهيف ختافو
عشقنو البنات وهواهو كل من شافو
مهما قلتا فيو بغلنبي عد اوصافو...

روقة روحي في الدنيا ان عكر صافيها
وراحة بالي لي حالي المبشتن جيهة
انا طارياهو لكن هو العهود ناسيها..
خالف الكية فوقي إشيل وإتندل فيها

آه من نار غرامو وحمتو السهراجة
وانا غير ليمو ما طلباهو ابدا حاجة
النتاحة والوحواحة والوجاجة
عاسن قلبي عوس كسرة فوق لي صاجا

ايام العذاب ربك كريم ما بعيدة
تبرأ من الجروح والوجعة والتنهيدة
إت خابرني رايداك ريدتي ليكا شديد
متل المغنطيس وكتين يلاقي حديدة

وريدتو الفي القلب بين الضلوع داساها
حافظاهو الوداد والريدة انا صايناها
بعاين في المرايا وصورتي ما شايفاها
شايفة حبيب قسايا وصورتو ما احلاها

من كترة بكاي يشهد علي منديلي
ليلي صبح صباح وصباحي اصبح ليلي
دحين يا الفرحة لي متين للعليا تشيلي
عديت النجوم طيف محيو باقي خليلي

جروحي الفتقت زادت جروح متقايحة
وروحي الفارقت دنيايا جاتك سايحة
في نص اهلي ضهبانة ومغبية ضايحة
قلتا الروووب وجيتك بالمشاعر بايحة

الاعياد كتيرة وشوفتو للروح عيدا
يوم لقياهو حتما ببقى بيهو سعيدة
الماكني بالحب والغرام والريدة
عادي اموت فداهو وانحسبو شهيدة

جاريات الأيام وانا حالي مو متغير
وصبري حبالو لامن وباقي منو قصير
الجنن مخيخي ولي قليبي محير
هايمة معاهو روحي ولي حياتي مسير

الجن اللبس عقلي وقليبي عباية
يكوسولي العلاج وانا مابية منو شفايا
الخلاني عايشة ولا فكر لا دراية
صليت في السرير ورقدتا في المصلاية
.
.
من الأرشيف

الطابشير والقلم
الدواية والمفاتيح
الملت جوف العوالم
والتواريخ والنقط
كل الحروف
كل الخطوط
كل اللغات
لهجات عرب
لهجات عجم
كل الكراريس
والمتاريس
والطوابير
واللحون
والامكنة المليانة
بي نقص الفهم
كل الشبابيك
والكواريك
والمساحات
البتفتح بابا
في شدر السلم
والخدار الشاري روحو
على المحطات
والنخيل
والنيل
وكل عشاقو
والشايلين علم
والغربة والسفر
البعيد في كل مطار
انا لي وحم
بعشق تراب حلتنا
لكن بشتهي..
بتمطق البلد الهناك
الفيها زول لاقيتو
لمن نمتا صدفة
وكان حلم
فجّ المسافات بالضحك
قطع الشكك الكان ملاني
زمان وهم
وملاني لين..
ستفني راحة
وفرحتين
فرحة مجيو..
الجات محملة
بالبشارات والنعم
فرحة تباشير الصباح
والضي بشتت روحو
في نص النهار..
والضل بغطي رقبتو
بي حيط البيوت
والحر تحت راكوبتي
بتهوى وبموت
بنجم
وبنجم الوكت..
والهمبريب بملاني
واتكيف واقيف واقعد
اقشقش في دميعات الندم
مع وش تفاصيل الزمن
المات زمان
وامسح رتوش هذا المكان
الياما بي موية المطر
طينو انهدم
بت واحدة
والسمحات كتار
بت طيبة والطيبات قلال
بت احتمال.. راجيها
في باقي الوكت خيرين
وفال.. وضبيحة خالية من
اللحم..
ما الدم بجرس روحها
لما تشوفو في عين الطيور
الطايرة من روح الخروف
ما بتحمل الخوف والدموع
الجاية من وش نعجة
تبكي واجل حبيبا
اوانو تم
بت ياما ضبحت من قلوب
حبانا هم..
بت فرحة شايلة
الليل نهار..
هي بتدعي والدعوات
كتار..
والجاها ياما هي أدتو
من روحا فرحة
وإبتسم
عينيها في الحور مافي
ابداً ما اتلقن
ايديها حانيات لليتيم
وحنانا مدفوق للبفتش ليهو
عن دار او وطن..
كايس لي أم..
تلقاها في كل الشوارع
للقنع من روحو هي بتديو
عشم
بتلم تشيل..
بتلقط اوجاع الخلوق
شيالة ما بتعرف تميل
ما بتشكي .. بتشيل التقيل
بتقول نعم

ما جِرسة...صابرة
ومستحيل تجرح
تخون.. او تقسى
او تنساك قصد..
ما بتدي كل العندها
وتجي تاني تشعر بالندم
رضيانة بي حكم القدر..
قنعانة من خير البشر
وهي عارفة انو الدنيا
غدارة وسجم

وهي عارفة انو الوجعة
بس في سيدا بتخت الألم

وانا زاتي كاتبة عشان منو
وبقصد شنو

يا ربي عقلي بكون خِرف
واللا الفكر منو انعدم
انا جاية احكي واقول كلام
نفس القصيد فيني انكتم
ومرق زفيرو الفيني نص
ممدود على مد البصر
بنضاق.. وبرضو بشمو
شم..
والنص بقول :
إحم إحم :
كل زول معاي يمرق قلم
الحصة حا تكون في الفراغ
فُط خانة في بداية السطر
واكتب علم..
ما انا رافعة يدي عشان أجاوب
أصلي كملتا الفهم
ما انتو ما عرفتو السؤال الكان
بقول :
انا عمري كم؟!
وأيامي كم؟!
واحبابي كم؟!
وأصحاب كم؟!
والكم هو كم؟!
جاوبوني هسسسسع
بي رقم..
.
.
فهمتو شي؟!
الفهم يفهمني لاني انا زاتي رحتا من النص دا.. لانو كتب روحو براو

القريب بتمنى موتك
والغريب داك روحو فيك

صبح علي
غنيلي اغنية الفرح
وانا ليك بشيل..

خلينا نقعد فوق ضهر حلتنا
قدام البحر..
بي طلتك بحلا المقيل...
لاعبني بالرملة البقت
دون جيتك تلعب معاي
ونكوس خطاك..
زي التقول رايح شليل
واكتب حروفك
والدموع لا حلقي تتدفق
تسيل..

انا بشتهيك ..
صبح علي..

ما ضقتا طعم الريد وراك..
وسواكا ما لقيت لي خليل..

الحنضل الويل في البعاد
الحرقة والهم والسهاد..

الليل.. !!!

وما ادراكا ليلي
بدون صباحك..
ويا حليل..
ونستنا في الدنيا الفقر
وكرمنا في الزمن البخيل..
وحليل صباحاتي البقت
زي ليلي .. بتضلم بلاك ..
وطويلة زي ما الليل طويل..

وحمامي بسجع بي قفاك
وإنبَحَّ من سجعو الهديل..

راجياك تخفف همي..
تِقل الهم...
تقيل..

راجياكا تنسد روحي..
ما فضلي حيل..

واوعاك تميل..
اوعاك تميل..

ان ملتا
واطاتنا بتميل..
والنيل بدفق غادي..
وإنشف في الشمس
زي التقول شارنو فوق
حبل الغسيل..

اوعاك تميل..
خليكا زي حرف الألف
واقف عديل..

وريني ان جانا العطش
وين نلقى فوق واطتنا نيل..

وان جعنا ما بنلقالنا قوت..
خبرني مين بسقى البراحات
المِخَدِرة والنخيل..

ان ملتا واطاتنا بتميل..
عمدان بيوتنا بتنتني..
بتواقع المِرِق البشيل..

بتميل معاك كل الحكاوي السمحة
والزمن الجميل..
.
.
.

جزء من نص..
(اوعاك تميل)

بطلتا أحلم بالخريف
شان السموم قفلن عليو
سكك الدخول

والغيم شرد
رغم إنو كان ناوي النزول ..

إتلوع الحمل المطر
خايف الشمس تسرق
ملامحو مع الهطول

وإتبخر اللين واليقين
حر الهجير سالب معاو
زكرى الفصول

وآ لهفة الشوق للبلل
وآ عبرة الحس البقول :

الوحشة
والليل
والسهر
ومرقة الضي للدخول

النجمة
والهم
والقمر
والحال كما كان من زمن
والحول بمر وأجي بعدو حول

والنقطة في نهاية سطر
مكتوب عليو
قريافة لي ريحة البحر
ضجة وصريخ رغم المحل
الخالي من جنس البشر
وعيون مستفة بالنحيب
لكنو طرشان البصر
وأحلام مهددة بالذبول ..

والنقطة واقفة ولا بتزح
وأعمار مشت ناوية الافول

إعدام .. وكوم من أمنيات
عشمانة كانت بالقبول ..

أستغغغفر الله العظيم
الجاية من الله التجي
والجاية من غيرو بتزول ..

أنا الدايراهو لا من أروبا لا آسيا
أنا الدايراهو إفريقي وفي إفريقيا سوداااااني!