لمن كنتا صغيرة وبلعب بالتراب
ماما درستني الدنيا من كتاب
نجحتا ما رسبتا ..
درستا ما حسبتا

بدل ما أكتب حاضر
رسمتا صورة الماضي
وعدتا كل الغاب..
والموسيقى تضرب
والجرس بيضرب
والمعلم إضرب
والزمن بيضرب
والضرب عقاب..
والكشافة تكشف
والرقاصة تكشف
والدكاترة تكشف
والمريض مصاب
.
ياما قلنا ناكل
ناكل لما نشبع
ونكشح العقاب
والفضل فضيلة
عجوة كان بليلة
دورة الشبع غريزة
حتى في الكلاب
نشرب مرة قهوة
شربوت .. كان مريسة
بنشرب الحناضل
في كؤوس عذاب

كيفن نان بنضحك
انا غايتو ضحكي بجامل
وفرحي يوت كضاب

بعرف كيفن أبكي
ودموعي يوت تقيلة
متل المطر بتنزل
هي بتقهر الرموش
وهو بكسر السحاب ..
.
.
.
فهمتو شئ؟!
أنا غايتو ما فاهمة ..

أنا دايرة أشيل منك قلب
وأديك قلب
أنا دايرة أخشك فال وريد
وأعمل مع نومك حرب
تفضل تفكر فيني
بالليل والنهار
ومشيك يباري خطاي
براي وخطايا غير
دربك تغب..
تبقى الدليل
منديل بصد دمعي
البسيل..
نجمي البوريني الدرب
وأبقالك الحن والامان
وابقالك الدار والفرح
واغني ليك ...
هوي آ الحبيب ..
قوم يلا تب..
هوي آ الأصم قوم
أنكرب..
انا ميتة فيك..
شيل حملي خليني
أنجيك..
مليانة بيك..
خابراكا لي عيوني بتحب

لاقيني عند ساعة الشروق
والموج بدافر للمروق
م الرملة كاتلة ليهو شوق
يتقالدو ويتوانسوا ويجارو
في القيف والبحر
دفر الشمس خلاها مرقت
بالغرب..
والقمرة جات..
والغيم بغير من جيتا
فات السماء..
اصلا غيور وكتين
يشوفا بينسحب ..
واترصن النجمات سوا
بنوت نعش قعدن
قصاد العنقريب ..
في الواطة جم
ضل القمر.. يتونسن
ونسيم هواك فوقن بهب
وانا قاعدة بتكرف لقاك
وخيالي مليان بالصور
صورة عيونك ونظرتك
رصة سنونك وضحكتك
ركعات صلاتك وغرتك
صورة ملامحك ...
وفجأة أسرح في الصور
وأنعس مع بالي الضهب
وانوم واحلم بي لقاك
والقاك في النوم مبتسم
شايل معاك فرح السنين
كوم امنيات ومعاو قلب

واديك يقين ووعود
ملانة غرام وريد
وعيون مستفة بالحنان
وأديك بدل قلبك قلب
❤

الريدة أصلا لو حروف
حرمان علي شعري النضم
كان ما بداهو قصيدي بيك

الريدة لو كانت دموع
أنا ببكي من الليلة
لي يوم ألتقيك..

والريدة لو كانت عذاب
ياخ وآحلاتو عذابي فيك..

والريدة لو كانت هي خوف
رغم الضياع الحاسة بيهو
بخاف عليك

والريدة لو كانت سهاد
بسهر وأناجي القمرة والليل
وأدعي واتمناك شريك
.
.
.
(والله بريدك
ريدة ما أظن من خلقتا
مع البشر ..
حا تلقى زولاً رادا ليك)..
.
.
والله جد ❤

كلام في بداية آخر الليل
في مثل بقول : (البيني وبين فلان زي البين شجرة الحراز والمطر)

سبحان الله شجرة الحراز عندنا هنا في السودان من الشجر البخضر وبثمر في كل الفصول عدا فصل الخريف..
يعني لمن يجي الخريف شجرة الحراز بتنشف تماماً من الصفق والثمر لحدي ما الخريف ينتهي حتى تبدأ تخضر من جديد .. ولما تقوم جنب البحر برضو ما بتخضر شديد لأنو مرات بتصلا بعض الموية .. يعني رافضة الري ورافضة اللين ورافضة خير ربنا ..

اها نستفيد شنو من الكلام دا ؟!

في ناس زي شجر الحراز دا قدر ما انت تتعامل معاهم بي عطاء وقدر ما تحاول ترويهم من عطفك ومحنتك وتدفق عليهم سيل مشاعرك ما بقابلوك الا بالجفاف والنشاف والصد .. في حين انهم ممكن عادي يتعاملو مع غيرك خلاف تعاملهم معاك .. بس لانو انت قدمتا ليهم كل العندك بي حب ورحابة صدر وما استكترتا عليهم خيرك ...
ويقربو يقولوا ليك بطل انك تكون عاطفي ومعطاء ويحسسوك بالاستنكار او بي إنك ساذج .. أو عوير .. في حين انهم ممكن يكونوا محتاجين وفي أشد الحوجة للإحتواء والعطف والرواء بس عندهم نوع من التعالي أو بحاولوا يقنعو روحهم انهم مكتفين ذاتياً وما محتاجين لي زول ..
ناس غريبة .. بعاندو في اللين والخير الجاهم من غيرهم وبرفضوهو وبقاوموهو .. بالرغم من إنهم بعانوا من الجفاف.. (ناس حرازيين)

يلا النوع دا لما تتعامل معاهم .. وتتدفق وتتدفق وتحاول ترويهم ويبادلوك بي جفاف .. في حالة زي دي أحتفظ بي باقي لينك ولم سيلك عليك ..وما تغرق الإ الكايس يغرق فيك..
أخير تروي نفسك وتسقي الناس الراجين عطفك عشان يخضرو معاك ويتقاسمو معاك الثمر ويبادلوك الري بالري والسيل بالسيل ..

مالك ومال الحرازيين الكل ما تسقيهم بزيدو نشاف .. يستهلكوك لحدي ما سيلك ولينك وراهم يكمل ومن كترة الجفاء يعادوك وتبقى زول حرازي زيهم ..
ولما يجيك اللين من غيرك تقابلو بالجفاف ..
.
.
.
خليك مع شجر التبلدي البنشف في الصيف وبخضر وبفرهد وبتتشابك أغصانو في الخريف وبحمد ربنا علي نعمة المطر والري.. ولما المطر يصب بخزن مويتو ..
وخليك مع (الزول الطبيعتو تبلدية) لما انت تسقيهو وترويهو محنة وريد بحفظ ليك جميلك وبفرح بي سقايتك ليهو وومكن بعد يشبع من عطفك يتملي حنان يرويك ويسقى منو ناس الحلة وكل عابر سبيل 🥰..

قابلو الاهتمام بالاهتمام والعطاء بالعطاء والامان بالامان واللين باللين والحِن بالحِن والحب بالحب واليقين باليقين..
.
.
.
.
ويااااااااااااا أنت :
خليك كالتبلدي وما تكون كالحراز.
.
.
بصمات : مرام الأمين

فوقي أحسن يابنية
هاك نصيحتي وأسمعيها
إنتي في دنيانا لعبة
ناس تبيعا وتشتريها
ناس تباريك للمصالح
وناس تجيكي عشان تجيها
وناس بتضحك في وشيكي
وبي وراكي تقول سفيهة
وأبقي دار لي كل لاجئ
وأبقي أم واعية ونبيهة
وأبقي سودانية طاهرة
والخلوق تتحاكى بيها
.
.
.
.
.
.
.
.
فوقي أحسن
يا بنية..

كواني النصري بكاني السقيد بأوتارو
حفظتا غنا المواجع وضقتا ياما مرارو
قولولوا الفراق خلا الدموع إتجارو
حلقي مسددو الريد واتمكن بعبارو

قلم أبيض بيكتب في حروف سوداء
وماعارفني عارفة البيو..
لبس توب الجمال من فوق
ونيتو الجوة مابيضاء.

فنجان جبنة ملااااان رملة
عدد زراتا غناوي الريد
الانا كاتباها عشان مريود
احتل النفس الطالع مني
وجوة عيوني

وساكن قلبي

مشتت فيني في كل وريد


انا فرحتي بيك ..
فرحة طفلة بتغني نشيد

حتخش المدرسة يادابا
وشايلة كتابة ..
شنطة وكراس وقلم رصاص
متفائلة ولا بسة جديد في جديد

يا حب يا ريد

انا فرحانة

بالجد والله انا فرحااااانة

وفرحتا شديد يوم لاقيتك
قربتا اطير يوم حبيتك
والله على فرحة قلبي معاك
يوم جيت وبقيت انا ست بيتك
يازول ملكتك انا قلبي وهطتك تاج
وبقيت لي سيد

يا سيد ريدي..
ويا كلللللللل الريد ..

مبروك انا ليك وبباركك لي
مبروك للقسمة الحست بي
مبروك للناس الهسة معاي
وببارك شوفتك لي عيني

وبقول وبزيد
في حبك وابدا ما بفتر
ياحلو يا مر ..
شبهتك بي طعم القهوة
وحسيتك زي فرحة اطفال
شايلين لعباتهم يوم العيد

♥ يا زول يا عيد.. ♥

صباح اللمة والزمن القبيلك فات
صباح حبوبة وكتين تصحى بالدعوات
تسو شايا المقنن وتملأ بالبركات
وكورة ملانة تُف ومستفة لقيمات
.
.
(صباح الوطن القِبيل💔)

حبي زي ما الناس تحب
والبغشك انو رايدك
حبي عادي..
زي ما حباك بالكضب..
حاولي زيفي مرة صدقك
والبفوتك فوتي برضو
والبمسك مسي عرضو
حاولي خلي الطيبة مرة
وبادري غيرك بالحرب

مين بيستاهل حنانك
حقو تعرفي وين مكانك
صنتي ياما العشرة ياما
وما حصل زول مرة صانك
فكي في حصانك لسانك
خلي للشر ينكرب

ما تراعي دموع عيونهم
ياما كانوا سبب بكاكي..
وياما شلتي الليل بدونم..
الببيعك ما بياخدك
والبياخدك ما بببيع ريدك
وإسيبك تائهة في نص الدرب

هي يا العويرة
دا ما ذنب..
انو تجرحي زول اذاكي
انو تغدري زول غدر بيك
من قفاكي..
صدقيني دا ما ذنب..

ياما قالوا البادي اظلم

كانوا وجعك كنتي بلسم
لما ظلموك كنتي أرحم
لما خنقوك قالوا هم
اسياد مشاعرك وانو
قلبك هو الكلب..

غايتو
سازجة جنس سزاجة
أبقي حاجة
هما محتاجين دورسك
دوسي في قلب البدوسك
مغسيهم.. خلي طبعك ينقلب

عادي ياخ ما ما ذنب..

هو معقول تاني أرجع ليك؟؟
لا ما تعشم ولا تحلم
وفوق يا زول
بعد نبتت فصول الريد
وبتق بالعدم محصول ...
حصدتا هواكا من قلبي
ورميتو ف سكة المجهول
محال من تاني ارجع ليك
ولا ببقالك انت رسول
زمان كان راسي بوجعني
وبي محياكا ألمو بزول
وهسة الليلة كان صدع
بدالك ببلع البندول
وأكيد غيرك بجيني أمير
وأكون أنا فاطنة وإنت الغول..

زينوبة ناحت
في الفريق
وإتيتمت عز
الطريق
والليلة مابنبل
ريق
والحوت فراقو
كما الحريق

ذكرى وفاة محمود عبد العزيز له الرحمة والمغفرة

شايفاك بتزرعي في الفرح
للناس وقلبك خالا صي..
شايفاك بتضحكي بالنهار
والليل دموعك تندلق

مين البيستاهل بكاك؟!

يا نادرة خاتياك الظنون
الزيك إنتي ..
يبخروهو يحصنوهو
يضارو من سحر العيون
الزيك انتي كما البرق

يا بشارة الدعو بالمطر
يا صافية في زمن العكر
يا جبارة الحيل الفتر
كل البعرفوك بعشقوكي
نفر... نفر
يا بت خبارك والخلق ؟!

سرك بيظهر في
عيونك وضحكتك
حسك سمح ..
لمن تغني
الكون معاك برقص وإشيل ..
ومعاكي من كُتر الطرب
أنا ببقى شايفة القمرة رِق

والليل بدون أسمع غناك
عن ليل بدون ما تغني لي
أصلا بكون ظاهر الفرق..

يا الناذرة فرحك للسراب
إتعودي
قلبك كفاو
لميو عليك
وأديهو بس للبستحق

إتعودي
إحساسك
الما ليو شبيه
ضاريهو وأحميو يندفق

إتعودي
دسي المشاعر
والحنان ما تخلي مطلوق
بنسرق

إتعودي

شان بكرة
ما تتباكي لي
وإياك

إياااك بعد قلبك حِرق
تجي تشكي لي

انا من زمان
وصيت قليبك يقسى
ما يضعف وإِرق

أنا من زمن وريتك
إنو الحب بحر
غدار ..
مجرد تمشي فيو
ممكن يجرك بالعرق ..

عوامة عارفاك بس
كمان إتذكري ..
الحب بشيل عوامو

ياما حبيب غرق

ما تشكي لي ..
جرحك بدفق ولسة ني
شايفاك توزعي في الأمان
يا الكاتمة خوفك في الضلوع
والنار تحت ضلعك تولع
وتنطلق..

يا روحي
أهديني السلام ..
انا ياما أديتك كلام
وانا ياما حذرتك
كتير ما تمشي فوق
درب العشق
.
.
.
.
.
نصيحة: (كل زول يحب روحو ويبقى عليها ١٠٠٠) ..

جابلها طرحة بالأحمر مع الدبدوب
جابلها ساعة والواتساب ملاهو قلوب
الراجيها تتجرتقلو بالاحمر تلف التوب
ماكلة قروشو عندها غيرو كم محبوب

جابلها ريحة في صندوق مع الجوال
قالها شلتي قلبي اللي قليبك شال
زي ما انتي حبيتني عاشقك.. قال
والحب ها الزمن بقو يشتروه بالمال

قشرت ومرقت الغبيانة لابسة جديد
قالت ليو بحبك وحبي ليكا أكيد 🙄
صدق وانبسط قال ليها حبي شديد 😁
في اربعطاشر ٢ سوو للحب عيد

تغرود في عيونا وحارسة ليها رهاب
هو واهمة بالوجاهة ومنتهى الإعجاب
بتبكي عقب ضحكتي وبارية ليك كضاب
الدايرك بجيب مهرو وبدق الباب

شتتا اوراقي على مهب الريح
تيارا كان عالي ...
والعالي كان غالي...
بقت شعاعات نور ...
بقت فؤادنا جريح ....
نور في الضلام عايش ...
لكن مسارو كسيح...
وأصلو الضلام جبار...
مغرور وماهو نصيح..
سالب حقوق الضو ...
والنور براااااهو فصيح...
فالح بس إتكلم...
زارف دموع الدم ...
عاديها زهج ونويح...
واصلو الضلام مغرور...
بتخطى حد النور ...
بدخل بدون تصريح..
سالب حقوق الضو...
والضو دا ساكت سااااااي
قاضيها اوكاتو صلوات
دعا وتسبيح...
وين الحلول يا النور...
لي متين يكون الضو ..
ساجنو الضلام في الجو...
جلاد بيجلد فيو لي
درجة التبريح...
واصلو الضلام مرتاح
لكنو ماهو مريح ..
وين الحلول يا النور ...
يلاكا لي دكتور. .
نشكيلو حالة الضو
يمكن يحن فيهو ويعملو
كم ترشيح...
قبال يشيلو الضو
ويقطعوهو حتت
ويسجلوهو غياب
في دفتر التشريح..
يلاكا قوم يا النور..
نشكي الضلام لليل
م الليل دا قاضي كبير...
نديهو كم إثبات
ومعاهو كم تلميح
انو الضلام منحل
وكلامو سوف وهل
وحديثو كلللو نبيح...
وانو الضلام شرير
هاضم حقوق الغير
لكن بدون توضيح
قدام سيادة الليل
مسح خيوط الضو
وبعد يفوت الليل
بملاها بالكتيح...
وانو الضلام مختل ..
لو حتى جاب للضو
موية ومعاها اكل
بتكون قزازة خل
وصحن ملاااااان حنضل
وطعم حياتو مسيخ...

أرشيف

المرة الفاتت إتكلمتا ليكم عن موضوع البلادة والنجاح..

والليلة حابة أتكلم ليكم عن الكذب او الكضب بالدارجي كدا..
الكضب ما عندو انواع ولا ألوان.. يعني مافي شي اسمو كضبة بيضاء.. بعدين ياخي في أسئلة بتفرض نفسها... الناس بتكضب لي شنو.؟؟ وحا تستفيد شنو؟؟..ما دام اصلا الحقيقة بتظهر مهما الناس حاولت تخفيها.. واللف والدوران لابد ينكشف.. اهلنا قالوا (الكضب حبلو قصير).
الوضوح والصراحة صدقوني مافي زيهم..
انتو عارفين؟؟ في ناس زي حلاتي كدا.. بكتشفو الكضبة من أول وهلة في نفس ال time بدون أيي دليل... ما بالشم ولا لأنهم بعلموا الغيب بس بحسوا بيها.. بحسو بالكلام الكضب والزول الكضاب.. وزي ديل طبعا خطيرييييين ممكن يحسسوك انك صادق وهم عارفين انك كذاب اقصد كضاب.. بيستغبوا يعني..وديل دايما بستروك لانهم متعودين..
اما في نوع بيشك في كلامك وديل زي ناس فلان وفلانة.. ويعملوا فيها (كونان) ويبدوا يستكشفوا ويحققوا ويشمشروا لحدي ما يقطعوا الشك باليقين ويفضحوك فضيحة.. لانو بعتبروا انو كونهم اكتشفوا انك كضاب.. دا في حد زاتو انجاز واكتشاف .. لازم يشتهروا بيو وسط العامة..

وفي نوع كمان دا كلاموا براو.. تكضب ليو ويكضب ليك ههههههههه بالجد نوع بخليك تضحك من فشافيشك.. تلقاهم متقابلين وكل واحد فيهم بجدع كضبة.. زي البتنافسوا كدا.. والغريبة مبسوطين والكلام عادي بالنسبة ليهم.. بس بالنسبة ليك حيكون فيلم..

والنوع الرابع دا البكضب وانت تجتهد وتثبت ليو كضبتو وهو لسة مصر عليها وكمان بيغالط (نوع لايوق)..

وفي واحد لانك بتعاملوا كويس ومحسسوا بي انك مصدقو.. يقوووووم يستغباك ويمارس كضبوا عليك بي مهارة.. والغريبة النوع دا بيقول الكضبة ويصدقا..

غايتو الكضابين كتار.. والكضابات اكتر..

يوم داك لاقاني شافع جيرانا.. صغير كدا طول البنبر بيلعب في الشارع براو قريب للزلط.. قمتا مسكتو من يدو وبقيت اتونس معاو واحنك فيو عشان ادخلو البيت.. الشافع بقي يتعابط وما داير يدخل..قمتا شلتو دخلتو.. وتعالوا شوفو هااااااك يا بكى وهاك يا مخاخيت.. وبقى يكورك (انا داير العربية) وانا المسكينة الحنينة بقيت احنس فيو.. حاااااضر يا حمودي انا مش ثاحبتك يا حمودي؟.. بعدين وانا جاية بجيب ليك معاي عربية..
هوي اووووعة تقولوا علي كضابة.. دي كضبة بنفسجية..بي طعم الريدة والتحنيس.. وفي النهاية اوفيت بي وعدي وجبتا ليو لعبة في شكل عربية...
ودي ممكن نقول عليها كضبة محمودة تتصرف بيها عشان ترضي الطرف التاني وتحافظ علي سلامتو..

شفتوها ساهلة كيف؟؟ عادي ممكن نكضب في لحظتا.. بس نوفي بي وعدنا او نعمل الشي المطلوب مننا بي اسلوب مختلف يرضي الطرفين.. وكدا نكون طلعنا من نقطة الكذب..

بنعلم اطفالنا في الروضة انو (الكضب حرام بقطع اللسان من ورا وقدام).. وتلقي البت والولد لحدي ما يخلصو الابتدائي ماسكين فيها.. لكن للاسف (كلام الطير في الباقير)... لانو معظم الجيل المرق هسة دا كضاااااااااااااابين...
لو عايز تعرف عاين في الشارع.. حا تلقي جمب الكبري وتحت الكبري وفي البيتش والكرنيش وشارع النيل.. كضب تقيل.. ونتيش نجيلة🍂🍃 وطرقيع اصابعين 🤘🤟🤝وغرويد عيون🙄.. اولاد وبنات وعربات وجكس ونفخة كذابة وونسة وضحك.. دا كلو بالكضب..
والعجب العجيب شفع الجامعة اقصد البرالمة.. تلقى الواحد وزنو 45 كيلو وطولو 150 سم ومفلفل شعرو ولابس جيفايص ولا شنب لا دقن (واللا الجيفايص دا موضة قديمة؟؟ غايتو انا ما بفهم في البناطلين) خلاص نقول داقي سستم وعامل جل ولابس تيشيرت اديني حقنة لونو فوشي وتلفوني آيفون10 واسبورت Adidas يتمروا كل اربعة خطوات.. اها سيادة البرليم دا مباري ليو واحدة اربعة في اربعة.. صغيرة صاااااح بس يختي انتي وزنك اقل شي 75 وطولك اقل شي 160 يعني بتشيليو عادي في صفحتك... وغير كدا هو معاك في نفس الدفعة..دا حا يعرسك كيف؟؟.. نق نق نق شايلين الليل والنهار كلام.. اموت واعرف بتقولوا في شنو؟..
كضب كلو كضب.. والله جد صدقوني.. البعملوا فيهو الناس دا كضب في كضب..

ياخ انا زاتي مالي ومالهم.. خلوني في روحي المحتارة في الخلق دي..

انا بس دايرة اوصل معلومة انو الكضب دا بجيب لي إلتواء في المصران الأعور.. و Gastric upset وعادي ممكن انشل..

عشان كدا حنو علي حالي وما تكضبوا علي..
الطريق الدغري مافي زيو.. والنضم العديل والواضح بزيد جمال شخصيتك في نظر غيرك..
وبرضوا قالوا (الصدق كان ما نجاك الكضب ما بنجيك)..

صاح الحقيقة مرات ممكن تكون مرة بس مافي زيها..
ما تجاملوا ما تألفوا حاجات ما حاصلة.. ما تغشوا بعض.. ما تخدعوا زول بي احاسيس مزيفة.. ما تكسبوا ارزاقكم بي طرق ملتوية...
.
.
.
ما تكضبوا ياخ..

بقلمي
مرام العبد

مساجله
محمد المازون

مرام الامين
______
محمد الماذون: .
✍️✍️✍️
ﻧﻔﺴﻲ ﺍﺭﺗﺎﺡ ﻓﻲ ﻋﻴﻮﻧﻚ
ﻭﺍﻣﻨﻴﺎﺗﻲ ﺑﻌﻴﺪ ﻓﻀﺎﻫﺎ
ﻛﻞ ﻣﺎ ﺗﻘﺮﺏ ﺧﻄﺎﻛﻲ
ﺗﺒﺘﻌﺪ ﻣﻦ ﻏﻴﺮ ﺭﺿﺎﻫﺎ
🤦🏻‍♂️

رووما:
✍️✍️✍️
تلقى وين الراحة عيني
يومي بتزيد في بكاها
غيرن أختار ليكا ريدة
خلي عيني لي شقاها
عيني في الريدة ودروبا
ياما من الحرقة جاها
وهسة بتدفق مواجع
وعايشة في النيران براها

محمد الماذون:

✍️✍️✍️
شفت في عينيك معالم
جل من ابدع صفاها
وبيها هامت روحي الفه
بي معانيها وغناها
عشمي في الزايله البتختف
اهني وانعم بي رضاها
وتبقي ليا سند حياتي
وبيها اوصل منتهاها

رووما:
✍️✍️✍️
القدر يا خلي قاسي
وبالبعاد والشوق كواها
ضايقة من الحب مغايس
وضايقة من الفرقة آهة
عيني من شدة حنانا
ضلمت بعد الوجاهة
ما بتعرفا كان لقيتا
وما بتحمَل محتواها

محمد الماذون
✍️✍️✍️
: زحمة الدنيا وتروسه
اثرت في محتواها
وكسرت القلب الحنين
لم حباها ورضاها
افتكر جنة سعادتو
جاتو بي تيها وغناها
وغني طول الليل وشوقو
املو باكر في لقاااااااها

رووما:
✍️✍️
ودعة كانت سمحة جدا
والعسل مدفوق جواها
الرموش صبحت هزيلة
والجفون الجاها جاها
لي متين تسهر..تنوِح
لي متين الهم الملاها
الله لي عيني وشوفا
والله للقلب المعاها