مرق مرقت دخول الضي
على الحلة الصباحية
و كت سهرانة طول الليل
ولا نايمة النهارية
أكت مجروحة
كت مهمومة
كت مآذية

إت من وين
تعال قول لي
متين كونك دخل كوني
ومتين واعدتو بالجية ؟!

تعال أقعد قصاد عيني
قبل ما تدقو باب البيت
تعال أوعدني إنو الريد
مستفو ليا كمية

ونرحل فوق بيوت الحن
وتبقى الرحلة ابدية

وتخلص ليا واخلص ليك
واغير من ايي دنيا عليك
ونون النسوة
تاء التأنيث
أكون فوقن انانية

بدورك لي
واحتكرك
حبيب وطبيب
وعنوان للمثالية
بدورك نيل
وأغرق فيك
وامرق يوم أدور أشتاق
تشوفني الناس علي القيفة
يقولو عليا حورية

بدورك لي شمس في الليل
وانا القمرة
أجود بي نورك ادي النور
عيون شفع بفتشو في شليل
ورين راح على الرملة
وسوا نلعب دسوسية

بدروك تبقى لي الغيم
تشيلني مطر على جوفك
واتدلاك فرح ونداح
واتكشح على جروفك
تقوم شجرة قلوب تفاح
تكون بي ريدنا مروية

وأريدك ريد ..
قدر فرحة جهال الحلة
يوم العيد ..
وزغريدات بنات الحي

قدر حمشينة التبة
وكليبة شعر جلدي
وكت امرق واشوفو
اخوي عرض في الدارة صقرية

بدورك ليا عيدية

واصرك فوق طرف امي
وتدسك لي
م انا الداخراك سند للحيل
تخت همك تشيل همي
واشيل همك..
همومي معاكا منسية

بدروك طين
تقفل كل شوارع البين
وارشك بالحنان كل حين
تفوح ريحة دعاش منك
ورغم الصيف تهب نسمات
ربيعية

وحين الدنيا تغدر بي
بدورك لي سند في الصي
تدفق ري
وتمتد ضل تحت كرعي
تكون لي زاد وقطية

تكون لي ساس واكونلك بيت
اكون الابرة وانتا الخيت
اكون فانوس وتبقى الزيت
تكون لي روح بلاك انا ما بكون حية

تعالوا نتكلم ..

عارفين ؟!
الحياة دي زي ما بتفرق مصيرا تجمع وزي ما بتشيل مصيرا تدي..
الله عواض.. والله عواض شديد..

مافي زول يزعل علي حاجات فقدها او ما لقاها لانو ربنا ما بحرمك من حاجة الا عشان يديك الافضل.. دايما خليكم متفائلين مهما ساءت الظروف وشاءت الأقدار وخلو عشمكم في ربنا قوي..
اوعة تيأسو وأوعة تنكسرو لانو الضربة الما بتقتلك بتقويك..خليكم عزاز وما تتنازلوا عن حقوقكم وما تتطلعوا لي حق غيركم وقولوا ربنا يزيدو ويدينا احسن من كدا..
اتواضعوا وما تفترو لانو الدنيا زايلة وفي النهاية كلنا بشر ومخلوقين من طين.. سامحو الظلموكم وسامحو الغدرو بيكم وادوهم الكرت الأحمر.. وافتحو ابواب جديدة عشان يتجدد الفرح والسعادة وتخش البهجة ويطلع من حياتكم الهم والنكد.. أبكو حتى لو كنتو رجال.. البكاء بنفِس وبقوِي وبشيل كتيييييييييييير من الوجع.. اتونسوا اضحكوا اطلعو.. أنسو..

لأنو الدنيا ما بتقيف على زول.. واهم شي تصنعوا في عز ظروفكم الكعبة حاجات تسعدكم حتى لو كانت بسيطة..

مثلا: لو عايش في راكوبة ووضعك تعبان قشها ورشها وولع فيها بخور وشغل اغاني في تلفونك ولم ناس البيت واشربوا الشاي وانتو بتضحكوا على الدنيا.. ولو شغال ترزي افتح الرادي وتابع حكاوي البلد والناس.. ولو مزارع خت الطورية واقعد في كوم تراب واتفائل و اتخيل انو الدنيا بكرة حا تضحك ليك وحا تبقى من اكبر التجار في البلد.. لو انتي ست شاي اضحكي مع زباينك واكرمي الما عندو قروش.. لو انت كمساري ما تصر وشك للناس اضحك وركب الما عندو مجان.. لو انتي دكتورة عاملي الناس بي رحمة وابتسامة وما تفتري عشان عندك شهادة وممكن تنقذي زول من الموت.. لو مهندس عامل العمال بي بساطة وتواضع وأمرهم بدون نرفزة وإفتراء.. المهم مهما كنت ومهما كانت مكانتك خليك زول مختلف..وبصمتك مختلفة.. وليك الثواب والأجر... الطيبة ما غباء والضحكة ما عيب والمجاملة السمحة مرات ممكن تقلب كيان زول والهدية بتقرب الناس لي بعض والبسمة ياما بتبرد قلوب..
حاولو ما تزعلو بعض.. حاولو أكسبو بعض.. حبو الخير لي بعض.. ساندو بعض.. عشان بلدنا ترجع تقيف من الاول ونرجع نفتخر بيها وبي مواردها..
كل زول يصلح منظر بيتو وكل زول ينضف قدام بيتو.. وكل زول يساعد في نشر التوعية والخير..
انسو السنين الفاتت خلونا نبني بلد جديد بي شكل جديد ونفوس جديدة وافكار جديدة واجيال جديدة.. خلونا نزرع المحبة والتآلف والتآخي والبسمة وننشر الفرحة في كل مكان.. خلونا نعرف ونقتنع بي اننا بنستاهل نعيش مرتاحين وما نستكتر على روحنا التطور والنجاح..

والعاقل طبيب نفسو..

الدنيا يا سمحين ما بتخلو من المشاكل والكسل واعداء النجاح بس انت كيف تتنفض وتنتفض وتقاوم نفسك والجهل والكبت والشحنات السلبية الحولك وتبقى زول جديد تفيد وتستفيد..
غايتو كالعادة انا بكتب والحروف براها بتجري وبلقى روحي بكتب عني وعن غيري..وكتار البلقو نفسهم بين السطور دي..
وانا عاجبني جدا قول الشاعر : إزرع جميلاً ولو في غير موضعة..فلن يضيع جميلٌ أينما زُرِع

وفي مقولة عاجباني بتقول:
"لا يتعافى المرء بصُحبةٍ، ولا بوجودِ حب، ولا بوجود مال..
بل يتعافى بقدر رضاه، وبقدر صلته بالله، وبقدر كونه حقيقي..
بكونه جميل داخليًا لا ظاهريًا فقط..
يتعافى المرء بقدر صراحته وصدقه، ولينه وودّه، وحنانه على نفسه قبل غيره، وهوان أخطاء الناس على روحه..
يتعافى المرء بقدر قربه من روحه وبقدر تعلقه بالله."

انا مرام دي.. بحب روحي وبحب الناس وبحب ازرع الخير بين الناس وعايزة اكون كدا دايماً مهما عاندتني الدنيا ومهما جار بي الزمن.. عايزة أكون سمحة قلباً وقالباً متسامحة ومتصالحة مع نفسي.. عايزة ارضي ربنا وارضي نفسي حتى لو بالقليل..عايزة يكون عندي عشان أدي أكتر مما آخد.. عايزة أسعد نفسي والحولي في عمري الجايي حتى لو بي أبسط الأشياء. عايزة اكون وردة بتفوح عشان تسعد الحولها.. عايزة أفرح أنجح وأتفائل وأطمئن وأرتاح عشان أنا فعلاً بستاهل كدا..

وأخيراً انا بعترف بريد أهلي وبريد أصحابي و(ناصر) 😍
.
.
.
وانا واحدة من الناس بمووووووووووت
في وطني في الناس الخُدُر
رغم الفقر والقلة في الزاد والعمر
ما بعرفو غير الإنتصار
وأنا واحدة من الناس بموت
في لون حبيبي اللونو مخلوط
بالسمار 😉
.
.
بصمات مرام العبد

حا اتكلم ليكم عن اللا شي؟؟

لما تكون مساهر وما لاقي موضوع.. لما تحس بي انو جواك احاسيس ملخبطة كدا.. وما فاهم هي شنو او جاياك من وين.. لما تحس بي انو قلبك واجعك ومعاو الحتة ديك التحت نهايةحلقك وجوة صدرك.. المهم ما بعرف مكانا بالضبط بس حاجة بين ضيق نفس او هواء كتير ماليك حايم جواك وكل ما تنفخو بتحس انو بدل ينقص بيزيد..

ويجي زول يسألك يقول ليك مالك.. تقول ليو ولا شي ..
لانك انت زاتك ما بتكون فاهم نفسك ولا عارف تحكي شنو وتخلي شنو..
الرد بي ولا شي.. مرات بكون غباء.. لانو غالباً وشك بفضحك.. لو كنتا صاريو او طارحو او بتضحك او بتبكي.. (علي فكرة الحاجات دي ما بتحصل ساي بدون مناسبة الا عند المجانين) حمانا الله وإياكم.. عشان كدا (ولاشي) هنا بتبقى كضب او اخفاء للحال.. او دس دس..
ولما تتكتب في الدردشة مثلا برضو بتكون واضحة خصوصا إذا كان الزول المتلقيها زول قريب ليك بيحس بيك او عارف طبعك...

ما علينا..

تساؤلات كتيرة بتكون في راسك.. وناس كتار بيمرو عليك في اللحظة دي.. بس غالباً بيشغل تفكيرك زول واحد او زولين..
حياتك كلها بتمر عليك في الحالات دي.. نص الليل.. كوابيسك.. مشاكلك.. عوارضك.. الناس الجرحوك.. الناس الباعوك.. الناس الاديتم كل شي وما تعبوا عشانك.. الناس الخانوك.. الناس الياما حبيتهم وراعيت ليهم وما راعو ليك..
عموما أتزكر إنو:
الاحساس بي انك مظلوم احساس مُميت .. بس احسن من انك تحس بي انك ظالم..
والاحساس بي انك وحيد. افضل من انك تعيش وسط ناس مخادعين بإسم الحب او الصداقة او القرابة او غيرو..
والاحساس بي انك طيب وحقك مهضوم افضل من الاحساس بي انك حاسد وجاحد..
وكمان اتزكر انو ربنا ما خلقك كدا من فراغ .. الإبتلاء نعمة.. بتدل على حب ربنا ليك.. والإمتحانات في الدنيا ثوابا كبير في الآخرة..
ما بقول ليك أصبر لأنو الصبر صعب وممكن يزيد البلاء بس كرر وأدعي (اللهم أن تعطيني فأحمد.. خيراً من أن تبتليني فأصبر).. دحين ربنا يديني ويديكم الدنيا والآخرة ويفتحا علينا من أوسع أبوابه قادر يا كريم..

نرجع لي موضوعنا :

ولا شي.. مرات بتكون وراها وجعة وحرقة وأنة وندم..
كضاب البقول بقدر يحس بالحاجات دي غيرك.. وكضاب البقدر يحلها ليك غير خالقك..
انا مؤمنة جداً بالمقولة البتقول (الفاصل بين الحلم والواقع مجرد دعوة). . عشان كدا ندعي ونخلي الباقي علي ربنا.. عسى أن يستجيب..

ولا شي مرات بتكون سخافة او استهتار بالزول البسألنا او كمان رد باللفة.. يعني ما يخصك او ما تتدخل.. ولما تجيك من اقرب الناس ليك بتجيك حاااارة بس انت بتتضطر تبلعا وتمشيها ليو..

ومرات بتكون غتاتة.. نظام انو ما عايز يحكي ليك..
او زول بي طبعو بخاف يدي سرو لي زول.. ودا طبعا شي إيجابي ومنطقي..

عشان كدا حقو نركز في ردود بعضنا..
في كتير من الحزن ورا كلمة ولا شي..
وكتير من الأرق ورا كلمة تماااام..
وكتير من الهم ورا كلمة مافي حاجة..
وكتير من الحب ورا كلمة كيفك؟
وكتير من الخوف ورا نعم او لا..
وكتير من الاحتياج ورا كلمة ما تمشي..
وكتير من الفقد ورا كلمة تعال..

والكتير الكتير من الكلمات الوراها مضامين خفية..

كلها جُمَل بسيطة بس الشي الوراها ممكن يكون كبير.. حسب شخصية الراوي وموقعو بالنسبة ليك.. عشان كدا ما تفوتوا ايي كلمة بتتقال ساي.. ياما في كلام وراهو تورية وتلميح واتقاضينا عنو..
ما عايزة اتكلم كتير..
.
.
.
.
ومافي زول يقول لي مالك؟!
لأني حا أقول ليو : ولا شي..

نقاع الزير
والزير الباااااارد
رغم الحر الزار حلتنا
ملاها هجير

حيمور صلصالو
بقريف ريقك
وتشرف
وتشرب
لامن تروى وتحمد
ربك رب الخير

ياخ شفتا الطير ؟؟
الرك هناك في طرف
الجردل
تحت الزير النقط فوقو
وستفو موية
وسالت
ومالت فوق لي قيفو
وعزفت بي سيلانا خرير ؟!

وفجأة
تطير واحدة من الطير
الرك قبيل فوق لي نقاعو
وترقص فوق نخلات الحلة
توانس الصاحبات بالصفير

ويجيهن قاطع ود القمري
الجنن بيهو قماري الحلة
وفيهن واحدة عليو بتغير

تعمل زعلانة تفوت صاحبات
تفر جنحاتا تطير
وتطير
وتطير
وتطير
ما ود القمري الماهو هوين
سبق راجيها على الخدير

مقتول بي ريدا ومن الشوق
غالبو الصبير

وتجيو تتخجل .. وتقعد جمبو

شوية بعيدة ^_^

تسالموا تناضموا تبادلوا الريدة
رغم الهم الشايلة كتير

خوافة ملوعة من الدنيا
خايفة المطرة ..
تهد البيت التعبت فوقو
بنت حيطانو تمامات قش
وبواقي حصير
مافيهو مكيف
بس فد أوضة ولا هو مزين
لاحيطانو كساها الجير

تسرح تتخيل في الجايها
وتبكي عشان الخوف ماليها
على قميريها
القالو ضكور
طير كل الحلة بدورو يموت
ويختفو صقير

واستفردوا بيها ..ويضحكوا فيها
وهو اليا وحدو كان حاميها
وليها أمير

يقاطعا همسو
ويرفع صوتو يطمن خوفا
يقالد ريشا وليها يقول
يلاكي نسير

وينططوا من القوز للشتلة
يغردوا ينسو الغم والضير

إزكروا المولى
ويضحكوا فوق أفعال خلق
الله ..
يزكرا انو العيشة مصير

تستغفر سيدا وترفع إيدا
تقول يااااااا الله الدايرة يصير
تقول ياااااا ربي الدايرة يصير

تتيقن تهجس روحا وروحو
وقبل الغيبة توادعو وترحل
وتعطش وتغشى معاها الزير

وترك من فوق لي قيف نقاعو
وتشرب وتروى
وفجأة تطير ..

نفس الحروف
عندي انشرق

قلمي انكسر
طق طق طرق

مكتومة خانقني النفس
وانا قلبي بالنار انحرق

كلما اقول اكتم هواك
بمرق حروفك في العرق ..

وعيوني فضاحات شديد
كل ما يعاينن في ورق

تمرق قصيدة ودمعتين
يبقن بحر ويفيض وكت اتزكرك
وأبدأ الغرق

وأغرق ولا بعرف أعوم
وانا ليك أكورك بالمدد
مدد.. مدد..
وألقاكا قيف .. وهوايا
فوق رملك مرق ..

وألقاني ديمة بكوس علي
م انا حية ياخي وميتة فيك
مجنونة بيك ... زي التقول
عقلي انسرق
.
.
ياااااااا أنت:
(جيت من وين تعال قول لي:
متين كونك دخل كوني ومتين
واعدتو بالجية؟!!!!!!!!!!!!!)

فوقي أحسن يابنية
هاك نصيحتي وأسمعيها
إنتي في دنيانا لعبة
ناس تبيعا وتشتريها
ناس تباريك للمصالح
وناس تجيكي عشان تجيها
وناس بتضحك في وشيكي
وبي وراكي تقول سفيهة
وأبقي دار لي كل لاجئ
وأبقي أم واعية ونبيهة
وأبقي سودانية طاهرة
والخلوق تتحاكى بيها
.
.
.
.
.
.
.
.
فوقي أحسن
يا بنية..

كلااااااااااااااام آخر الليل
وكالعادة بمسك الحروف وببدأ أكتب وما عارفة نفسي بكتب عن شنو؟!
لكن تعالوا نحكي ونتونس عن قانون الجذب الترابط..
المغناطيس والحديدة.. ونحن والواطة التحتنا.. السمكة والبحر.. الشجرة والمطر..الليل والنهار..الام وجناها..الزوج وزوجتو الصاحب وصاحبو.. الحبيب وحبيبتو (لمن حبهم يكون صادق)
ديل كلهم لازم يكونوا في شد وجذب دايما.. مهما بعدو ومهما اختلفوا لابد من يرجعوا لي بعض.. لانو في بيناتهم قوة ترابط.. ونحن درسونا انو قوة الترابط أقوى من قوة الإلتصاق..
(Cohesive force stronger than adhesive force)
الالتصاق والناس البتتلصق حدهم في حياتك قريب.. ودايما البتلصق بيك غالبا بكون هدفو منك مصلحة اما البيرتبط بيك معناها ماخدك وما بقدر يتخلى عنك.. عشان كدي دايما حددو روابطكم وأختوا رابطة الإلتصاق لأنو حدها قريب ونتيجتا حتكون سلبية عليكم..
نرجع للجذب.. مرات بتكون عايش حياتك بعيد عن زحمة البشر واحوالهم.. لا شغال بي زول ولا هاميك حال زول.. ولا عندك شغلة بالناس.. بس فجأة يظهر ليك كائن (جاذب) زول مغنطيس يعني يبدأ يجرك وانت(المنجذب) تسوق نفسك وتمشي عليو ولما تحاول تدوس فرامل تلقى انو الفرملة ما شغالة وروحك ماشة سااااااااااااااااي بدون تخطيط وبدون حسابات وما بتكون عارف الحاصل عليك دا زاتو شنو واللا الزول دا جاك من وين.. وتبدأ تهتم بيهو وبي تفاصيلو وكل صغيرة وكبيرة في حياتو ومستعد ما تراعي حتى لي نفسك عشان خاطرو.. دا كلو ما مهم المهم (إنو الزول دا ما يفهمك غلط ويقدرك ويحترمك ويحافظ عليك لانو انت يا حضرة المجذوب بتكون ماشي بدون إرادتك وكأنوا الزول دا قدر رباني جاك وانت ما قادر تسيطر على حالك) ربنا سخرو ليك عشان يحتويك من كل النزاعات والصراعات السببوها ليك ناس كانوا متلصقين في حياتك والهواء شالهم.. او وقعوا عشان اللصاق نشف..
ما علينا.. دربهم أخداااااااااااااار تنفتح عليهم محل مايقبلو ان شاء الله وبالمال والزيادة.. وغادي غادي..

المهم كنكشوا في الناس الجابوا المفك وربطوا حيلهم وحياتهم ومصيرهم بيكم.. وما تحاولوا تصلحو الفرامل خلوها ماشة كدا.. لانو مركب على الله ما بتغرق والمشي لما يكون بي توكل وإستوداع سيدو ما بضيع مهما جارت الأيام وخانت الظروف.. (ومهما بعدت أجسادكم أرواحكم حا تكون مكنكشة بي بعض) ومافي أحلى وأعمي وأنقى وأفضل من ترابط الأرواح
عموماً الحياة أخد وعطاء ومرات بتشيل عشان تدي.. وربنا سبحان الله كريم خلاص.. ربنا عطااااااااااااااي مرات بحرمنا من شي عشان خاتي لينا الافضل ومرات بأخر دعواتنا ومرات ننخزل في ناس عشان يعوضنا بي غيرهم... ومرات بخلينا ندخل حياة ناس يساندونا ونساندهم لانهم بشبهونا في الصفات وبياض النية والحِنية والرضا والنقاء والأفكار السليمة..
عموما.. أبقوا عشرة على الترابط وأجذبوا بعض بي التصرفات والتواصل والدعوات والحاجات السمحة دايما..
حا تصحوا تلقوا منشوري دا.. أقروهو وأدعو لي بالخير وكل زول يدعي لي نفسو الدعوة التحت دي ويقول جمعا:
(اللهم إني إستودعتك قلبي وجوارحي ونفسي ورضاها وعقلي وتفكيره وروحي وسلامتها واستودعتك ربي كل ما املك من نبض وحس ومشاعر وحب وحنان وعاطفة وثقة وإحتواء ونفَس فلا تجعلها الا لمن يستحق ولا تخيرني فيما تختار فأنت أكرم الأكرمين فجُد علي بجودك وأكرمني بكرمك وأرزقني من فضلك العظيم فإنك تعلم ولا أعلم.. يا الله بجاه حبيبك ونبيك وشفيعك محمد عليه أفضل الصلاة وأتم التسليم)
.
.
ويااااااا أنت يا (فلان😁)

جيت من وين تعال قول لي
متين كونك دخل كوني ومتين
واعدتو بالجية ؟!
تعال أقعد قصاد عيني 👀
قبل ما تدقوا باب قلبي
تعال أوعدني إنو الريد
مستفو ليا كمية..
ونرحل فوق بيوت الحِن
وتبقى الرحلة أبدية
وتخلص ليا وأخلص ليك
وأغير من أي دنيا عليك
ونون النسوة.. تاء التأنيث
أكون فوقن أنانية
وأحتكرك حبيب وطبيب
وعنوان للمثالية
بدورك نيل وأغرق فيك
وأمرق يوم أدور أشتاق
تشوفني الناس على القيفة
ويقولو عليَّ حورية
بدورك لي شمس في الليل
وأنا القمرة..
أجود بي نورك أهدي النور
عيون شُفع..
بفتشو في شليل وين راح
على الرملة..
وسوا نلعب دسوسية
بدورك لي تكون الغيم
تشيلني مطر على جوفك
وأتدلاك فرح وأنداح
وأتكشح على جروفك
تقوم شجرة قلوب تفاح
تكون بي ريدنا مروية
وبريدك ريد 😍❤

أوعاك تفتري زايلة أم بناياً قش
البيت إن وقع إتأكد الساس هش
الضايق الجمر ما بهموا كان إنتش
والممطورة ما بتتبالى من الرش

مشيت في السكة شايلة النار..
مولع جوفي جمراً حي..

واشيل وازيد
واشيل وازيد
واكيل في روحي بي ايدي..

وبي رغم الدخان بضحك
واقهقه بي دموع حاراااات
بتمرق من بخار رئتي..

بدور اغرق ..
اكان أطفي الحريق البي..

بدور اتوضأ في القيفة..
واشيل خطواتي عكس الموج
ويدفر فيني شان أرجع
وأقاوي الموجة بي كرعي...

بدور أغرق..
وأكفن روحي بالموية ...
واتسطر علي التاريخ
بنية عيونا عسلية
ملامحا ما اتلقت فيهن
ولا بتشبه بنات الحي..

واكون قصة..

ويتحاكوبا كل الناس
وإقولوا علي..

زمان مرقت ...
قبل ما تغيب..
شمسنا العايمة في نص
البحر بالضي..

وهي المرقت بلا استئذان
ملانة يقين
ومثقال ذرة من إيمان..
وهي القنعت من الدنيا
وطردت من دروبا الغي..

وهي المفقودة ليها سنين
هدوما لقوها فوق للطين
وغرقت وما اتلقت روحا
اظنها قاعدة جوة هناك
تغسل لسة في جروحا..
كتيرات زاتو ما بروحن..
وجرحها دابو لسع ني..

وتبكي عشان دموعا تفيض
تزيد في الموية تسقي الناس..
ومن غرقت..
بحرنا ملان وخاتي يباس...
واغرب حاجة يوم غرقت..
مرقت قالوا عطشانة
بتفتش كان تلاقي الري
..

ولا ماتت ..
عندها بيت...
وساكنة هناك
مع الحيتان ..
ولما القمرة تملا الليل..
بتمرق من ضهر حلتنا ..
بتاوق علي بيتهم..
وتطمن علي الحبان..
وقالوا عليها حورية ..
واول من يشوفا انسان..
تطفر بي سراع
في القيف .. وتغرق
تاني جوة المي..

زمان غرقت...
ولا لقوها..

لقولا رسالة في كراس..
وكاتبة عليها دون عنوان..
انا الغرقت .. وحية كمان ..
حضرتا فراشي في الديوان
بكيت ورثيت مع النسوان..
عزايا الكان بدون جثمان ..
وشلتا الفاتحة في روحي..
ودعيت ياااااااااااااا الله
تغفر لي...

انا الغرقت

بدور أسأل...
زمان كان عندي فيكم زول..
وكت القاهو كان بيقول..
بموت بي واري..
دحين شايفاهو بيحفر برة
في الصيوان..
و قااااعد وحي..

دحين ما مات ؟!
وعايش عادي ..
بضحك ومازرف دمعات؟! ...
دا ما اظن صابتو الوجعات
ولا هماو فراق عيني ؟!...

رخيصة العشرة واللا الناس؟
وليشن البصون بتخان؟! ..
وكيفن قدر ما تخلص
يبيعوك في الارض مجان؟!
وعادي تشيل هموم غيرك..
وإجازوك بالوجع والكي..

انا الغرقت ...

فترتا من الظروف والهم..
فترتا من الببيع في السوق
ويسأل في الشرف بي كم؟!
وكل الحرقة وقت امرق وألاقي
يتيم بفتش ف الطريق
عن ام ...
وابوهو الجابو مو معروف ..
ولا بعرف علاقة الدم..
وتملأ العبرة كل حلقي ...
وأعاين ليو ..
وأقول أححححححي...

انا الغرقت ...

وأعيش ليشن؟!
أخير أغرق قبل ما أجن..
واعيش بين السمك وانداح ..
واغني معاو غناوي الحن ...
ولا تجرح قليبي ظروف
وانسى الناس شوية شوي..

رسالتي بقولا قبل افوت..

انا الغرقت ..
ولسع ما طراني الموت..
وصابرة وجوة بطن الحوت..
ووكتين القيامة تقوم..
بدعي المولي وقت امرق
اخش الجنة .. خاتية عذاب..
واقول جيد لي...
وآآآآ جيد لي...

بحتار فيني في نبضي
وفي قلبي الرواك عطشان
وأخشك وأروي فيك عطشي
وأشيل الشوق يجيك عميان
وقايد حبنا المجنون ..
مكسر فيك وبيك ولهان ..
وتحتل فيني كل وريد ..
وبحتل فيكا كل شريان ..
بقينا اتنين وروح واحدة
اريتو ولا يجينا الهم
ولا يعذبنا بعد أبدان ..
م أنا الراجياك سنين بالفال
وداخرالك فرح كيمان ..
ولا مليت ولا كليت
ولاني شكيت وياما بكيت
صبرتا على أذى الحرمان ..
رجيتك وصاب عيوني خريف
مهددة يومي بالفيضان ..
رجيتك في هجير الصيف
وبعدك فيا باق نيران ..
رجيتك وشاتي حسي بلاك
وكل ما يوم بكش بردان
رجيتك وكل مواسمي ربيع
وترحل من سماي احزان
واطير من بسمة لي ضحكة
وأوزع فرحي للحبان
كريمة الفرحة جم عينيك
ودونك ما بلاقي أمان ..

لم أتبع الشيطان منذ طفولتي
لكنه قد كان يتبعني
عساي بأن أصير من الهُواة...
وعساي أفعل مايُشِينُ بسيرتي
ويضيفُ لي سؤ الصفات..
فيزيدني هماً يُشَوِهُ فكرتي
ويقودُني للمَوبِقات..
اصبحتُ بعضاً من رمادٍ او رُفات
قسراً تُبعثرهُ الرياحُ كما تشاء
وأراهُ في عينيّ بعضاً منه
يمضي راحلاً والبعض آَت
بعضي انا...
بعضي الذي قد كان يوماً ما
يسموني به اني فَتاة..
أَيا رُفاتي ويحَّ هذِي الريح
كيف تقودني .. لسبيلُ
بعضٍ إِمتطاه رُفاتهُن
فقادهُن الى الممات..
وانا التي ارمي بدَلوي مُفرغٌ
فإذا به يتجابدُ الأحزانَ من
بئر الحياة..
وانا التي قد كنتُ أرتقبُ السعادةَ مرةً
فإذا بنفسي قد هَويتُ وصُرتُ
أهتفُ للنجاة..
وهربتُ من شطِ الحقيقةِ للخيال
وبحثتُ في كل الدُنا..
عَلِّي أُلاقِي مِثل ذاتي أي ذات..
وأنا التي في الحينِ تقفُ أناملي
مرفوعةٌ...
وجوارحي الأخرى تَحثُ دواخلي..
ان أَنزوِي في عَقرِ داريَ للصلاة..
وأنا أستعذتُ الله عمراً كاملاً. .
رُحماكَ ربي بي فإني قَد
دعوتكَ عدَّ ما يدعو الدُعاة...
رُحماك ربي خالق الأَرضِين
من طَياتها تهبُ النبات..
فأنا فتاةٌ قد تآكل خدُها بالدمعِ
حتى سُميت عَيناها بإسم الدامعات

مستويك ضرب ام رقيقة باخعا**لحس الاصابع و انبرى يتمطق
ابصرته احناكه مرتجة** تقريبنن زي مثلما تتغرطق
جكان من ماء السعون شرابه**احرنجمت في حلقه تتدفق
و الشاي يجغمه فيحدث جلبة**صوت الجقاجق اذ تفور تجقجق
يا ويحه لما تمطى راقدا من تحته**و العنقريب يطقطق
يا ويكة احلى من الفالوزج كم** من فندك من تحتها يتشقق
سالت و لما تلولوت حلقاتها** علقت و كنت اظنها لا تعلق
حاشية:
*مستويك: ضارب الويكة
*تقريبنن : تقريبا منونة مرتين لزوم الوزن
* تقرأ القاف في القافية مضومة
.
.
.
بقلم والدي الدكتور الشاعر: الأمين حسن العبد

جنبك..
ولا بتزكر القاعدين ..
ولا الماشين
ولا الواقفين
ولا بتزكر أياً كان ..
قصادك..
ما بشوف غيرك ..
وحتى وراك..
بشوف طيفك في كل مكان ..
مشتت حرفي في دربك
وبعزف في هواك ألحان ..
بريدك جد شوية عليك
وبهواك جد قليلة كمان ..
متيمة بيك..
أيا الفارد مساحاتك هوى وتحنان ..
و ساكناك فجة فجة براي
وفيكا بتوه سواي ما بلقى فيك إنسان ..
وأفتش في متاهاتك
وألعب في عنيك دس دس ..
وأجوطك زي كأنك أنا..
وأصلا انتا لي عنوان

بدايتك بتشبهني ..
وفصيلة دمك الرويان
زمان شالوها من دمي
وبحتار فيني في نبضي
وفي قلبي الرواك
عطشان..
واخشك واروي فيك عطشي
وأشيل الشوق يجيك عميان ..
وقايد حبنا المجنون
مكسر فيك وبيك ولهان ..
وتحتل مني كل وري
د وبحتل فيكا كل شريان ..
ونبقى اتنين وروح واحدة
ولا يصادفنا هم لاخوف
ولا يعذبنا بعد أبدان
.
.
.
مرام و (فلان)

الريد يوما داك
غفلني ورحل
وشال النوم وراك
خلالي السهر
رهن عيني فداك

الريد الرماني
ما ظنيت رماك..
هنا انا وحدي ساهرة
وقلبي هناك حداك..

الريد والبحر
والحب الأمر..
والقلب إنكسر..
والهم الجواي..
بكبر في حشاي
وإنت هناك براك..

ياخ انا شايلة همك
مين انا غيري بقدر
يقشقش كل دموعك
وزي أمك يضمك..
مين اللما تبعد
بتقريف لقاك..

عاين..

أوعة تزعل..
ما بحمل اشوفك
صاريهن حواجبك..
وشايل هم دناك..

حلفتك عشانك
ما تباري الفواجع..
والقدر اللي خانك..
ارميو بي وراك..

خسمتك بروحك
أنساها المواجع
ولي صفحات حياتك
قلب وشوف وراجع
وقيم مستواك..

عالي
ودنيا واطية..
خاتية وكت تمسك..
خاتية الدنيا خاتية..
وإنتا شبه الملاك..

وأنا زولة بتجابد
زي سمكة بتناهد..
بين صياد ومركب
وأسوار الشباك..

زولة بسيطة جدا..
حلمها كان تشوفك..
بتحلحل قيودا..
وتتنفس هواك..

حلمها كان تشيلك
في حدقات عيونا
وما تبكيكا حرقة..
تفرح لما تضحك
وما بتحمل بكاك..

كل آمالا كانت..
عشة صغيرة هادية
وهي تكون أم جناك..

وآخر منية ليها كانت
رغم خوفا..
تكبر في عيونك
اقصد..جم عيونك
وبيها يتم مناك..

ولما تشيب..تخرف
يبقى كلاما عنك..
عن أسلوب كلامك..
وإنك رغم سنك..
لسة حبيب قساها
تريدك زي جناها..
وهي حبيبة قساك

ساذجة جنس سذاجة
حتي الموت ودربو
سيرتو وقت تجيبا
بتتمناو معاك..

ماتت وحية لسة..
جتة وراها قصة..
قصة زول وزولة..
وما أدراكا ريدة..
وما أدراك هلاك..
.
.
.
.
الفاااااااااااااااااتحة...

أصلو الزمن دا عجيب خلاص
مرات جواك يملاو فرح
مرات حياتك إنكدة
وبعد يشتت فرحتك
قبال تحاول تجمعا
بترك طيور كل الهموم وتنقدة
وتبقى عايش في الضلام
وتلازمو لي آخر مدى
مشلول فكر بالك فتر
وخطاكا زاتا مقيدة
وتقعد معا عقلك تقول:
يادنيا ياخي حرام كدة...

اسمعوا كلامي دا يا نسوان
انتي كمطلقة...
وبما انك قنعتي من طليقك
لازم تتفائلي وتبقي حلوة وتبيعي قضية ماضيك وتقلبي الصفحة بي صفحة جديدة

اطلعي واعرفي ناس بخلوك تحبي الحياة .. انجلخي وابقي حلوة وعيشي حياتك بالطول والعرض ما دام ما فيها شي بغضب ربنا لانها دي حياتك وما حتكرر مرتين
..
عرسي مرة واتنين وتلاتة وعشرة بس اوووووووووووعك تجي علي نفسك عشان راجل .. والراجل الما بقيمك صاح بيعيهو في اقرب ملف .. والتقييم هنا ما مقصودة بيهو القروش وانما التعامل والاحترام المودة والرحمة والحنان والامان .. لانو الزواج استقرار .. ولما يكون فاقد النقطة دي بفقد اساسو .. والاستقرار دا موضوع طويل بتكلم ليكم عنو فيما بعد ..
عشان كدا ايي واحدة مطلقة (وقنعت من طليقها) تقوم هسة تعاين في المرايا وتتنفض وتصلح من نفسها علي كافة المجالات العامة والخاصة وتدعم نفسها بالافكار الايجابية وتبعد السلبيات والناس الخنقة ..

واااووووووووعك تتعقدي من كلام الناس ونظرتهم ليك كمطلقة .. العترة بتصلح المشية.. والمجربة اخير من الياداب حا تخش للحياة الزوجية...قومي انشطي اتلحلحي .. اتصالحي مع نفسك وادفني الماضي واثبتي وجودك لي نفسك اول شي
عيشي بي طموح وبي ثبات وبي يقين بي انو الجاييك اكتر واحلي واعظم وانو ربنا شال منك زول عشان يعوضك بالابرك ...

هييييي انتي

ايييوة انتي

يا مطلقة
يا حلوة
يا جميلة
يا عظيمة
يا فريدة
يا ذات التجربة المميزة
يا صاحبة المنطق والعقل السليم والمواقف المفيدة
قومي اتحركي غيري حياتك من اللحظة دي .. ابقي انسانة جديدة وسيبي النكد والزعل والتشاؤم وعيشي اللحظة بي قانون (الفاتك فوتيهو والنساك انسيهو )...
واتأكدي انو ربنا رائد ليك الخير في زول غير 😍 (بس احذري من رجال النسوان لانو موضوع الضرة يطول شرحو برضو حا اتكلم ليكم عنو فيما بعد)..

وان شاء الله كلو مطلقة هنا تلقي الخير وتلقي السند وتلقي الرفقة والتعويض والمعين والزول البشبها ..

وانتو يا ناس المجتمع هوي .. ارحمو المطلقات .. الطلاق لا عيب لا عار وحاصل في ارقي العائلات عشان كدا ساندوا بناتكم واخواتكم واقيفوا معاهم ضد نظرة المجتمع للمطلقة وضد التهم البتترمي في عاتقها .. وخلونا نقيف شوية ونرفع قبعة الاحترام لي مطلقات ياما تعبن وربن وساهرن وجاهدن عشان يطلعونا نحن ...
(نحن) لانو اكيد الامو ما مطلقة اختو مطلقة او خالتو او عمتو او زولة بهمها امرو .. وشاف عن طريقا كيف التربية و تحمل المسؤولية بعد الطلاق بكون صعب عليها وكيف هي بتعاني
.
.
.
فأرحمونا يرحمكم الله..

انا مرام دي (كنت مطلقة وعرستا خلاص الحمد لله ) و بعرف كمية هايلة من المطلقات ..
وبحييهم كلهم علي رأسهم (أمي) الزولة الخلتني اكون انا كما انا الان وسدت خانة أبونا بكل ما تحمل الكلمة الكلمة من معني ومضمون .. خرجتني للدنيا ناضجة ثابتة سليمة القلب والنظر .. ربتني علي الشموخ والعزة والتسامح والتواضع والصبر وورتني انو الحياة يوم ليك ويوم عليك وانو الحزن والسعادة زي ضل الضحى وانو حال الدنيا متقلب .. علمتني اني اعيش بي لين ويقين وقوة واني احب نفسي واحب الناس واحب الحياة..
امي الزولة المهما كتبتا عنها بتقيف حروفي وتعجز عن التعبير لذلك انا اكتفي بعبارة (امي ويال جمالها وعظمتها وقوتها وطهرها ونبلها ويال حبها ذلك الوحيد الذي يتمادي بداخلي دون نقصان .. لها مني التعظيم ولمن هن مثلها ..
.
.
فرفقا بالقوارير ورفقا بأنثى خلقت من ضلع اعوج وتستقيم باللين وليس بالذجر والسب والشتم والتجريح والاساءة ..رفقا بقلوبنا فنحن منكم ومن اضلاعكم جئنا ولاجلكم نحيا

جيت وفتحتا باب الريدة
كانت الدنيا قبلك واقفة..
جيت واختل بيك تفكيري
كل افكاري غيرك زالفة ..

ماك داري العلي والبيا ؟؟!..

ما خابر مشاعري الحية؟؟!
نيران قايدة
تهرد في قليبي وتالفة؟!
صوتك يا الحنين لو تدري
شدة ما قليبي بريدو ..
ما ليو غير حديثك سالفة
صورتك في سواكا بشوفا
دايما لي خيالي موالفة ..
بقسم بي يمين الريدة
وأجزم بي غرامك وحالفة ..
لا عنك بميل وأتناسى
لا للريدة ببقى مخالفة ..
هيمان القلب فوق دربك
زايد همي يوت لو تدري ..
فوق راسي الهموم مترادفة
هم الفرقة قاسي عليا
هم الشوق ونارو الحية
هم الليل وهم الوحدة
فوقن هم سنيني الزالفة..
آخ من حبك
آه من ريدك
الآه يا الحبيب خابراها
الآه ما بتاداوي جروحي ..
والبكى والنواح كملتو
عيني من كتر دفيقا صبحت ناشفة ..

حن فوق حالي ..

حاول مرة تبدأ السكة
تقصد بي مشيكا وصالي
أمشي علي وبجري عليكا
كالفلينة فوق للموية
تارحة وماشة وين مي عارفة
قربك زيو زي الجنة
كل الراحة يوم نتلاقى
وأقصد إني أوصل حيك
أعمل فيها جيتي مصادفة .. .
.
.
.
وياااااااا محاسن الصدف..

خَليك غَريب
وأَبعِد
.
مِن الناس القُراب

سئمت الدموع
ووعد الرجوع
سئمت الهوى
والنوى والصبابة
سئمت السكوت
سئمت الكلام..
ولغة الكتابة...
فكيف أعبر؟؟
وقلبي يزمجر
وعقلي يفكر
فهل من إجابة؟
لماذا أتينا على
بطن دنيا تبيع
الهموم وتجني
الكآبة...
لماذا أتينا على
سطح أرض
ولدنا..رضعنا
فطمنا..كبرنا
ومتنا عليها
ولم نجني شيئا
وصرنا غلابا...
لماذا نشأنا
مع بعض قوم
يعيشون ظلما
وقهرا وقسرا
بأرض الصلابة
.
.
.
.
لماذا؟؟؟؟!!

يا الدنيا أم لهيب صالياني بي نيرانك
قاسية دوام علي حارماني منو حنانك
منحوس حظي فيك جاير علي ميزانك
أعمل إيه معاك يا الزايدة في طغيانك

غلبتا معاها حيلة وعارفة روحي فترتا
عاملاهو العلي وجمعتا بس ودرتا
رضيت بالقاسمة لي وبكيت وإتصبرتا
لايكاهو الصبر بحبالو إتكربتا

ياخلة أم قدود أنا فوقا ضقتا الويل
بزرف في الدموع شايلة النهار والليل
عديت النجوم كلتا المصايب كيل
والغميد شرد وأصبح منامي قليل

ومن جور الزمن زايد عليا نواحي
تفكير بالنهار والليل سهر صباحي
فوق درب السعادة بقيت أشرك أحاحي
ودعتا الضحك عدمت علي أفراحي

ربي يعينا نحنا علي الزمن وآهاتو
ويغفر للجميع القعدو كان الماتو
الناس إغترت كل زول بريد حاجاتو
ناسين القبر مابطرو تب زنقاتو