حا اتكلم ليكم عن اللا شي؟؟

لما تكون مساهر وما لاقي موضوع.. لما تحس بي انو جواك احاسيس ملخبطة كدا.. وما فاهم هي شنو او جاياك من وين.. لما تحس بي انو قلبك واجعك ومعاو الحتة ديك التحت نهايةحلقك وجوة صدرك.. المهم ما بعرف مكانا بالضبط بس حاجة بين ضيق نفس او هواء كتير ماليك حايم جواك وكل ما تنفخو بتحس انو بدل ينقص بيزيد..

ويجي زول يسألك يقول ليك مالك.. تقول ليو ولا شي ..
لانك انت زاتك ما بتكون فاهم نفسك ولا عارف تحكي شنو وتخلي شنو..
الرد بي ولا شي.. مرات بكون غباء.. لانو غالباً وشك بفضحك.. لو كنتا صاريو او طارحو او بتضحك او بتبكي.. (علي فكرة الحاجات دي ما بتحصل ساي بدون مناسبة الا عند المجانين) حمانا الله وإياكم.. عشان كدا (ولاشي) هنا بتبقى كضب او اخفاء للحال.. او دس دس..
ولما تتكتب في الدردشة مثلا برضو بتكون واضحة خصوصا إذا كان الزول المتلقيها زول قريب ليك بيحس بيك او عارف طبعك...

ما علينا..

تساؤلات كتيرة بتكون في راسك.. وناس كتار بيمرو عليك في اللحظة دي.. بس غالباً بيشغل تفكيرك زول واحد او زولين..
حياتك كلها بتمر عليك في الحالات دي.. نص الليل.. كوابيسك.. مشاكلك.. عوارضك.. الناس الجرحوك.. الناس الباعوك.. الناس الاديتم كل شي وما تعبوا عشانك.. الناس الخانوك.. الناس الياما حبيتهم وراعيت ليهم وما راعو ليك..
عموما أتزكر إنو:
الاحساس بي انك مظلوم احساس مُميت .. بس احسن من انك تحس بي انك ظالم..
والاحساس بي انك وحيد. افضل من انك تعيش وسط ناس مخادعين بإسم الحب او الصداقة او القرابة او غيرو..
والاحساس بي انك طيب وحقك مهضوم افضل من الاحساس بي انك حاسد وجاحد..
وكمان اتزكر انو ربنا ما خلقك كدا من فراغ .. الإبتلاء نعمة.. بتدل على حب ربنا ليك.. والإمتحانات في الدنيا ثوابا كبير في الآخرة..
ما بقول ليك أصبر لأنو الصبر صعب وممكن يزيد البلاء بس كرر وأدعي (اللهم أن تعطيني فأحمد.. خيراً من أن تبتليني فأصبر).. دحين ربنا يديني ويديكم الدنيا والآخرة ويفتحا علينا من أوسع أبوابه قادر يا كريم..

نرجع لي موضوعنا :

ولا شي.. مرات بتكون وراها وجعة وحرقة وأنة وندم..
كضاب البقول بقدر يحس بالحاجات دي غيرك.. وكضاب البقدر يحلها ليك غير خالقك..
انا مؤمنة جداً بالمقولة البتقول (الفاصل بين الحلم والواقع مجرد دعوة). . عشان كدا ندعي ونخلي الباقي علي ربنا.. عسى أن يستجيب..

ولا شي مرات بتكون سخافة او استهتار بالزول البسألنا او كمان رد باللفة.. يعني ما يخصك او ما تتدخل.. ولما تجيك من اقرب الناس ليك بتجيك حاااارة بس انت بتتضطر تبلعا وتمشيها ليو..

ومرات بتكون غتاتة.. نظام انو ما عايز يحكي ليك..
او زول بي طبعو بخاف يدي سرو لي زول.. ودا طبعا شي إيجابي ومنطقي..

عشان كدا حقو نركز في ردود بعضنا..
في كتير من الحزن ورا كلمة ولا شي..
وكتير من الأرق ورا كلمة تماااام..
وكتير من الهم ورا كلمة مافي حاجة..
وكتير من الحب ورا كلمة كيفك؟
وكتير من الخوف ورا نعم او لا..
وكتير من الاحتياج ورا كلمة ما تمشي..
وكتير من الفقد ورا كلمة تعال..

والكتير الكتير من الكلمات الوراها مضامين خفية..

كلها جُمَل بسيطة بس الشي الوراها ممكن يكون كبير.. حسب شخصية الراوي وموقعو بالنسبة ليك.. عشان كدا ما تفوتوا ايي كلمة بتتقال ساي.. ياما في كلام وراهو تورية وتلميح واتقاضينا عنو..
ما عايزة اتكلم كتير..
.
.
.
.
ومافي زول يقول لي مالك؟!
لأني حا أقول ليو : ولا شي..

ﺃﻫﻮﺍﻙ ﻟﻠﺮﻣﻖ ﺍﻷﺧﻴﺮ
ﺍﻟﺤﺐ ﺃﻧﺖ ﻭﺩﺍﺅﻩ
ﻭﻟﻲ ﺍﻟﻤﻌﺎﻓﻲ ﻭﺍﻟﺪﻭﺍﺀ
ﻭﻋﺠﻨﺖ ﺻﻠﺼﺎﻟﻲ
ﺑﻄﻴﺐ ﺍﻷﻣﻨﻴﺎﺕ
ﻭﺣﻠﻤﺖ ﺍﻧﻚ ﺻﺎﺣﺒﻲ
ﺑﺎﻕ ﺍﻟﻰ ﺑﻌﺪ ﺍﻟﺒﻘﺎﺀ
ﻓﻲ ﺍﻟﻘﺒﺮ ﻛﻨﺖ ﻣﺮﺍﻓﻘﻲ
ﺣﺘﻰ ﺍﻟﺤﺴﺎﺏ ﻟﻨﺎ ﺳﻮﺍﺀ
ﻭﺃﺗﻲ ﺍﻟﺼﺮﻁ
ذﻫﺒﻨﺎ ﻓﻴﻪ ﺳﻮﻳﺔ
ﻭﺍﻟﻨﺎﺱ ﺣﻮﺍﻱ ﻳﻨﻈﺮﻭﻥ
ﻳﺘﺴﺎﺋﻠﻮﻥ !!!!
ﻫﺬﺍ ﺍﻟﺬﻱ ﻳﻤﺸﻲ
ﻭﻳﻘﺒﻊ ﺟﺎﻧﺒﻲ
ﻣﻦ ﺃﻳﻦ ﺟﺎﺀ؟؟؟
ﻭﻧﺴﻮ ﺑﺄﻥ ﺍﻟﻠﻪ
ﺃﻗﺪﺭ ﻗﺎﺩﺭ
ﻭﻧﺴﻮ ﺑﺄﻥ ﺍﻟﻠﻪ ﻳﻔﻌﻞ ﻣﺎﻳﺸﺎﺀ
.
.
.
.
ﻳﺎ ﻛﺎﺋﻨﺎ ﻣﻦ ﺑﻌﺾ ﺑﻌﻀﻚ
ﻗﺪ ﺃﺗﻴﺖ .. ﻳﺎ ﺁﺩﻣﻲ
ﻫﺬﻱ ﺃﻧﺎ ﺣﻮﺍﻙ
ﻣﻦ ﺩﻭﻥ ﺍﻟﻨﺴﺎﺀ ...

ما عندي نفِس..

بس عايزة أنوم
يوم أو يومين
سنة أو سنتين
بس ما أصحى..

وأنا نايمة أقوم أحلم
بي دنيا وناس تانين
عاشقين عيني
حاسين بالبي
وبخافوا علي من الجرحة

وأشخر ضحكات..
وأهضرب بي حبة حاجات
حبة وجعة وحبة آهات
..حبة وحة...

وأرجع أتزكر إني نسيت
شلتا الدمعات بي عيونن
وجيت... لوليتن ونامن
وفجأة صحيت..
فرحانة وبضحك ومنشرحة

في دنيا النوم

حا أحب واحد غير الصاحين
حا يصحى معاي وانا نايمة نحوم
ما بكون شايلني حمار النوم
بس شالني الريد نتجارى
وماليانا الفرحة
ونطط بين الليل والليل
نتفسح ونمشي بشارع النيل
يسرح فيني وتحلا السرحة

ونطير من عالم لي عالم
وبساط الريح يبقى الطرحة

نمشي المريخ..
لندن وأسوان..
ولمن نرجع تاني السودان
نلقى الجنوي بنجلدو بطان
نسوان بيدقن في الريحة
ريحة صندل..
ريحة شية.. وريحة قدحة

وفنان بيغني..وزغرودة
شبال مجدوع من السمحة

..في الحلة مسيد
ويهل العيد..
نضبح تورين..
عيد الأضحى

ونخش الغار..
وتكون صوفي
بتعاين فيني وما تحتار..
عينيك مليانة محنة وخير
في زمناً فوقو الخير
شحة
وأشتاق لي بركة أبويا الشيخ
يدينا الفاتحة وتاني نطير
شايلين بخرات موية وسبحة

بنسبح ونقول يااااااااا الله

ونمشي القمرة
نتفرج في حال خلق الله
واحد هنداك كان ماشي
عليو حادث .... و زحة

مجنون حايم..
ونصيح بالرشوة وقول الزور
ودو مصحة

ورئيس رقاص.. ووزير بلباص
عمارة وساكنها كم قناص
داك إترشح.. والقبلو سقط
والتاني براهو الإتنحى

والناس مليااااانة هموم ووجع
الحسد.. الضر
الغيرة.. المر
الجور والذل
من حالن كُـر..
وأنا نايمة وقلبي ملان بالخوف
بتسابق نبضي بزيد تحة

وانا مهماً أشرح حالي البي
إحساسي ولا بتشيلو سطور
لا دفتر لا مليون صفحة

ياخ سيبك من الناس والجن
لاقيتك نايمة عشان ما أجن
خليني أغني معاك وأنداح
تملاني أمان وأملاك بالحن
صوتك بشبه نبراتي شديد
مرات مرات كدا فيو بحة

نيتك صافية
شوفتك مع انها في حلمي
لكن شافية..قربك عافية..
وسيرتك نفحة..

وأرح ننزل..
القمرة خلاص حا تمشي تنوم
والجاية على واطتنا شمش
يا تمشي معاي دنيا الصاحين
يا عادي بنوم والدنيا نهار..
ما برضى فراقك لو لمحة

يلاكا نمش.. يا تمشي
معاي..
يا ما بصحى..
.
.
.
نَص يطير من عيني النوم ويخليني وأنا صاحية بتخيل إني نايمة.. (يسقط بس)..

حا تشيل معاك الهم؟!
ترهن حياتا فداك
وعميرا تكتبو ليك؟؟!

حالك بدون تشرح
حتعرفو دون ما تقول
وكتين تعاين فيك؟؟

حا تصلي شان تسلم
لا بي ضرر تنصاب
لا يدمعن عينيك؟؟

حا تبكي فوق بعدك
لحظة تغيب!!..
حاتشتهيك؟؟

حتريدك انت شديد؟؟
ترضيك وكت تزعل ..
ووكتين تفوت بتجيك؟

حا تطير من الفرحة
وكيتن تسالم إيديك؟؟

تضحك معاك والخوف
ماليها دون ما تشوف
رغم الحزن حا تشيل
من فرحتا وتديك؟؟

ساكت خبارك قول
جاوب بدور اعرف ..

حا تبقى ليك الزاد؟؟
حا تبقى ليك الشوف
والشعبة والمرواد
حا تكون اخوك وجناك
وتمثل الحواليك..

حا تبكي شان وجعك
تسهر معاك الليل..
وتحل محل والديك؟؟؟

حا تبقى ليك زيي؟؟؟؟؟!!
حاتكون حنينة عليك؟؟؟

أصبحتا بي مية وجع
والوجعة زاتا خشم بيوت

وجعة قريب
ودي أخير قبل ما تجيك
تموت..

وجعة حبيب..
بتشحتف الروح بالسنين
لامن تهج روحك تفوت ..

وجعة صحاب ..
خانوا العهود ..ديل
خوتن كانت ركيكة
متل خيوط العنكبوت ..

تواهة في دنيا الظروف
غدارة يوم وهدبني ضي
حكمت على النور بالخفوت

وانا يوت بزيد في همي يوت

وانا يوت بشيل مية وجع
وبخت ألف من فرحي يوت

وأنا يوت بلوك مر الصبر
وحلوهو ليه مابيني يوت؟!

حتى الحروف بخلت علي
يوم جيتا مكسورة قلم
بادرني ردها بالسكوت

جبارة يا عيون الخلق
شايفاني بتألم وأئن
بس مابية تسمعي مني صوت ..

في حاجة إسمها (النِفيسة)
يعني لما نفسك تخش في حاجة..
زمان لما تقع منك لقمة.. بقولوا ليك شماها الشيطان أو إتنفس فيها الشيطان... أو في زول نفسوا دخلت فيها...وفي حالة زي دي المفروض ترفعها وتسمي عليها تلاتة مرات وتاكلا عادي..

عارفين؟! نفس الزول أكعب حاجة.. أكعب من العين والحسد... وزي ما النفيسة ممكن تكون في الاكل.. ممكن تخش في حاجات تانية.. ملابس.. ساعات.. سفر.. لمة... الخ ودي تعتبر نفيسة حميدة.. لانها بي يدنا.. ممكن نسافر وممكن نشتري الملابس وممكن نعمل لمة وغيرو...

لكن النفيسة الكعبة لما تشتهي حاجة زول غيرك وما تقدر تجيب زيها ..لما تتنفس في أكلو وهدومو وحاجاتو..لما تتنفس فيهو هو زاتو..
ودي أخطر نوع إنك تتنفس في زول..(دي ما زي الأكل حا تسمي عليهو وتاكلو.. دي فيها متاهات وذنوب ومصائب ممكن تحصل للزول وليك)..

فعليكم الله ما تتنفسوا في حاجات الناس ولا تتنفسوا في غيركم... خليكم قنوعين ومفتنعين بالعندكم.. رضيانين بي قسمة ربنا... فرحانين بي أقساكم..

لانو النفيسة دي زي ما هي بتوقع الأكل من يدك.. كمان لما تخش في زول بتعَكس حياتو ... بتحسسو بالإكتئاب... والمرض.. وممكن تغير شكلو.. وممكن تخليو عايش براو معزول عن الناس..وممكن تجننو عديل...
عشان كدا الزول لما يشوف شي عجبو او زول سمح يقول ما شاء الله ولو الشي عجبو شديد يشتري او يعمل زيو..او يقنع منو بي رضى تام..
ولو عجبو الزول زاتو ... طوالي يكلمو بي انو معجب بيهو ويكلموا انو يتحصن ويدعي ليو بالخير.. ع الاقل يقلل من خطر نفسو الدخلت في غيرو...ويحاول يتجنبو ويتجنب التفكير فيهو وما يعاين ليو (لأنو النظرة الأولى ليك والتانية عليك)... وكمان يعاين لي سلبيات الزول المقصود عشان يقلل نسبة خطر تأثير النفيسة..

أتمنى إنو كلامي دا يكون مفهوم.. لاني مهما إتكلمتا ما حا أقدر أوصل الفكرة الانا عايزة أصل ليها.. (المهم إنو أسوأ شي في الدنيا النفس)..
.
.
(ويااااااااااااارب تكفينا شر أنفسنا وأنفس خلقك فينا وفيما نملك)..
.
.
وأنا نفسي في طينة بحر..
وأنا نفسي جد أمشي
وأقعد أجدع في الحجار
وأجدع حجر ووراو حجر
وآخر حجر بطبع عليو
أجمل صور
صورة أبوي.. أمي وأخوي
صورة حبيبي المنتظر..

يسعد نهاركم

وبالدااااااااااااارجي كدا

في ظاهرة إستفزتني جداً

وانا شايفة انها تستاهل النقاش

لو في واحدة واقفة في الشارع لفترة معينة
سواء كانت واقفة للمواصلات (السيئة دي) او منتظرة زول
دا بعني انها ما بت ناس ؟؟ او بالواضح كدا (واقفة عشان تملح)؟

ما اختلفنا .. في انو في نوعية من البنات كدا .. ودا شئ برجع لي سلوكهم التربوي والبيئة النشأوا فيها او صحبة السؤ الخاربة البلد ..
بس كمان العندو وليات في البيت خايف عليهن ما بقيف ليو لي واحدة في الشارع ماعندو بيها ايي ارتباط ويبقى لايووووووووق ويحرسا ماشي جايي ..
وكمان في واحدين قليلين حياء.. الواحد يجي يتكلم عديييييييل ويعزما (لو ماشة ايي محل بوصلك) او (انا اعجبتا بيك ممكن تركبي وندردش شوية؟) او (شروك واللا شنو ياجميل ..ياخ تعال نحنا تحت الخدمة) او (على وين ياعسل اتفضلي وين ماشة؟) او (لو الوقت كان ليل .. يجي الشفت يقول ليها : الوقت إتأخر وماصاح وقفتك في الشارع )
ههههههههههههههههه عليك النبي؟؟ خايف عليها يعني؟؟.. حنين ياود أمك ..
و....الخ من العزومات.وانواع الحنك..

غايتو ناس تخاف ما تختشيش ...
وزي ديل بجيبو لي القرحة ..

هسة لو طلعت الواحدة دي مجنونة او عندها نفسيات وقامت فلقتك بي طوبة وفرجت عليك خلق الله ..
في حالة زي دي تكوووووووون انت يا اخينا بتستااااااااهل واريتا كان ردمتك طوب زيادة ... واريت كلهن يبقن مجنونات في حالات زي دي ..

اما انتي يا بت امي عديمة الترباية يا البتملحي بدون سابق معرفة ..وتعديها ونسة وتبادل أرقام .... وهلُمجرا ... اخيرلك انقرعي ..
عشان مانجي نقول في النهاية على نفسها جنت براقش ..
الموضوع دا اخير افك شوطو لانو هرد فشفاشي ..
.
.
.
ونرجع نقول يا عاااااااالم إتقو الله ..

قسم سِتاتك
كنداكات أنحن وتسوي إيه إت زاتك؟
ظاهرة سفاهتك آ المنطمسة في بسماتك
وأريت نماتي توصل ليكي في فجاتك

سودانية ست حوبات وبت دغرية
بتقارنيها بيك يا الرمة يا المصرية؟
يا الريحتك تجيب الطير ورب ترميا
عادي تصدي متل الزنكي يا الحليية

عندنا انتي ما بتساوي نص فصاصة
بت طبال وأمك بالكتير رقاصة
إن لاقيتا فوق فرقة المقنبرة راسا
تاخد علقة جااااااامدة وتعقبا الرصاصة

قالت نحن كسلانين وحرس أبواب
ما شافت ولينا الفي عروض تلاب
بت الدينو ساقط وانعرف كضاب
حايمة السوق وناس الحلة بالجلباب

حلبية ومقطعة في البيوت خدامة
تطرقع في اللبان وأحمر خدودا علامة
تتكشم متل نار القصب... بسامة
ترقص عشرة بلدي وفي الكباريه منامة


ما بتعرفنا لا بتعرف حرارة الدم
أنحنا صنج ونحن غنج ونحن الهم
انحن موحدين أخوان واولاد عم
أنحنا النار والعادانا فوقنا شحم

ما بنقبل إهانة ولا كلام في الفاضي
نحن المجني والجاني وانحن القاضي
أخير تعتزري خلي قليبي عنك راضي
قبل ألاقاك وأبقيك فعل ناقص وماضي

إن ما سمعتي بالملة الولا بتنضام
بتعرفينا من هسع ولا قدام
سجلي عندك آ الجاهلة وأصبري؛تمام؟
أمي بنونة وأختي مهيرة وإسمي مرام


لا عرفتنا سمحين طبع وصافين نية ؟!
لا عرفتنا في الاجناس عرب زنحية ؟!
لا شافت جروفنا البي الخدار مكسية ؟!
ياخ أدوها ساكت نبذة تاريخية..

دي اللا شافت الشبال ولا الصقرية
لا خبت النحاس لا العركة لا الجودية
لا بنوت فريقتنا القهوتن ضهرية
لا التقابة لا الليحان ولا الليلية

كان شافت غنا الطنبارة في العصرية
كان لاقتيني بضحك والعيون عسلية
كان شافت أخوي الفنحري أب طاقية
أكيد تتمنى كانت تبقى سودانية
.
.
أكيد تتمنى كانت تبقى سودانية..
.
.
(وأنا بفخر بيك يا طني... حد الترف وحد الشرف.. وأحبك إلى ما بعد النهاية ❤)

أراد رجل أن يعقد على إمرأة ...فقال لها في مجلس العقد :
إني رجل سيء الخلق ...دقيق الملاحظة ...شديد المؤاخذة ...سريع الغضب بطيء الفيء (أي بطيء الرجوع إلى حالة الهدوء ).
فنظرت إليه وقالت :
أسوأ منك خلقا تلك التي تحوجك إلى سوء خلق.
فقال لها : أنتي زوجتي ورب الكعبة ..
فمكث معها عشر سنين ما حدث فيها إلا كل خير ...
ثم وقع بينهما خلاف فقال لها غاضبا :
أمرك بيدك ( أي أنه جعل طلاقها بيدها إن شاءت طلقت نفسها ) .
فقالت له :
أما والله ...لقد كان أمري بيدك عشر سنين فأحسنت حفظه ...فلن أضيعه أنا ساعة من نهار ...وقد رددته إليك ...
فقال لها :
ألا والله إنك أعظم نعم الله علي ❤

تمتلك المرأة مفتاح حل المشكلات و سبل كسب الرجل مهما كانت طباعه ...
فبذكائها تستطيع أن تجعله يلين انصياعا لرقة مشاعرها.
بحبها و تألقها ...بمرحها و عفويتها تستطيع أن تأسر قلبه.
بصبرها و تصرفاتها ...بردود فعلها البسيطة وانتقائها للكلمات تستطيع أن تجعله رقيقا ... ودودا ... حنونا ... عطوفا ... متفهما ... مراجعا لنفسه دائما خوفا من أن يفقدها او يخسرها.

فأيها الرجال ....رفقا بالقوارير
و أيتها القارورة ...رفقا بحاملك

كيفن ننوم ؟!
وأم الشهيد سهرانة

جافاها الغميد ونعاسو
تزرف في الدموع مغبونة
فاقدا ضناها فاقدا أمانا

محروقة حشا وموجووووووعة
مخلوعة خبر مفجوووووعة
نشفت من بكاها دموعا
مقروش صوتا..
صاحية زي التقول حلمانة

مات بي طلقة
خلالا الوجع والحرقة
تتمناو يعود من تاني..
تتمنى الرصاصة المارقة
تغلط وما يجيو نيشانا

وانا ما بين دموعي ودرتا
ببكي وفجأة قمتا سرحتا
إتخيلت نفسي مكانا

طار النوم ومسخت فوق
عيوني الدنيا..
كرهانة البلد والعسكر..
ومولانا الذي غشانا

والترس القبيل حامينا
هسة حجارو زاتا مدانة

الدم أنشكح وإتصفى
ماتوا الماتوا ساكت صدفة
الولد البضحك فينا
زاتو إتوفى..
وأسع بالعقب
بكانا..

وآآآآ حرقة حشاك آيمة
وآآآآ وجعة جناك آ يمة
الله يغتس المِلة البتقتل فينا
والله يخيب الجبخانة

السلام عليكم...
حابة أتكلم عن نقطة..
ظاهرة المنظراتية وعباقرة السياسة الظهرو فجأة ديل..
يصححوا الغلط ويغلطوا الصحيح...
تلقى الواحد ما فاهم أيي شي وبنظر.. وعندو خواء فكري ظاهر من كلامو... وعامل فيها ناقد ومشرع ومحلل سياسي... وهو طيرة ساي..
فئة كدا ظاهرة اليومين دي مثقفاتية زائد واحدين جُداد في السياسة وفرحانين بيها ...همهم كلو البلبلة و تخوين بعض الناس ونشر الفتن.. وعاملين فيها ناقشين أيي شي.. اها دحين حقو الناس تحذر النوعية دي تحديداً... والداير يتكلم او ينظر يا يفتح خشمو بي خير يا يسكت..لانو الوضع ما ناقص..
وياخ بالله شي ما بتفهمو فيهو ما تتحشرو فيهو...وخلو العيش لي خبازو.. في ناس نجاااااااض وعارفين روحهم بقولوا في شنو.. وواثقين من كلامهم...

ودي النقطة التانية :

اللي هي نقطة التِحِشر:
من وجهة نظري.. كتير من الناس إتعرضو للإساءة والإتهام بالتقصير او التخوين...خصوصاً الناس الحازو على إسم شهرة في مجال معين..
ياخ لما تحب زول ؛ مش بتحبو بالفطرة فجأة بدون سبب أو مقدمات ؟!
كذلك حب الوطن والخوف عليهو شي فطري ما بجي بالدفرة والتحريش... وما كل زول عامل فيها وطني هو فعلا وطني.. ياما ناس بتهتف وعاملة شعارات وهي من جوة طالعة للبوبار دا إذا ما كان تحت تحت كدا (مندسين)... وياما ناس قاعدين في بيوتهم بس ببكو الدم على حال البلد وخايفين من العواقب...

نرجع للتحشر والمتحشرين : تحشركم حا يأثر في الناس الضعيفة... لانو الزول القلبو على بلدو وواثق من نفسو ما بتهزو شعرة.. وبواصل مسيرتو رغم الانتقادات..لانو واثق من نفسو ومن تصرفاتو ومن كلامو...وما حيخش في حالة نفسية لانو تفكيرو واحساسو والدافع المحركو هو حبو للوطن...

كتير من الفنانين والشعراء والساسة اتعرضو لهجوم عنيف من بعض المتفلسفين ... وإتحججوا بالحالة النفسية...وانو الشعب عصر عليهم..
الحالة النفسية دي المفروض تختها في البيت وتقفلا في الدولاب..وتقيف مع الناس وتشاركهم الوجعة..لانو كلمة منك او رسالة منك او مجرد خطاب منك ممكن يزيد عددية الناس ويشجع الناس المتخاذلين وبايعين القضية.. المفروض تطلع وتتكلم وتنشر وتشجع وتهتف.... وما تهتم بي راي الناس...لانو كتار من الناس المعروفين الاتعرضو لي اتهامات وهجوم وانتقادات.. بس ولا هماهم..(الكلاب تعوي والقافلة تسير).. وهسة حالياً هم في الشارع ومتصدين للطلقة.. وراجين تحقيق متطلباتهم وما خايفين لامن كلام ناس لا من عسكر.. وبقولوا الحق لو هم جوة النار.. وواقفين مع الشعب..

الطناااااااااش اهم شي.. طالما الزول واثق في نفسو ما يهتم للقيل والقال.. وكتار بيصنعو في الفتن ودايرين المشاكل تحصل والناس تتفتن في بعضها وتتشتت وتتقاضى عن الهدف الرئيسي اللي هو نجاح الثورة ومطالبنا كشعب
.
.
أتمنى إنو كلامي يكون وصل.. اللهم أني قد بلغت اللهم فأشهد..

وربنا يجيرنا من شر أنفنسنا..والله المستعان..
.
.
مرام العبد(الزولة الما سياسية)

في مثل هذا اليوم
الموافق 18/5/2012
توفيت جدتي العزيزة
فاطمة محمد سعد حاج الإمام
لها الرحمة والمغفرة

ﺍﺻﻠﻮ ﺍﻟﻤﻮﺕ ﻻﺑﻦ ﺁﺩﻡ ﻧﻬﺎﻳــــﺘﻮ ﻭﺍﺟـــــﻠﻮ
ﻭﺍﺻﻠﻮ ﺍﻟﻤﻮﺕ ﻫﻮ ﺣﻖ ﻻﺯﻡ ﻭﻻﺑﺪ ﻧﺼﻠﻮ
ﻛﻢ ﻧﺎﺳﺎ ﻋـــﺰﺍﺍﺍﺍﺍﺍﺍﺍﺍﺍﺍﺯ ﻓﺎﺗﻮﻧﺎ ﻣﻨـــﻨﺎ ﺭﺣﻠﻮ
...ﺑﺎﻟﻄــﻴﺐ ﻭﺍﻟﻤﺴﻚ ﻭﺍﻟﺰﻋــــﻔﺮﺍﻥ ﺍﻏﺘﺴــــﻠﻮ

ﻣﻌﺮﻭﻑ ﺍﻟﺰﻣﻦ ﻣﺎ ﻓﻴﻬﻮ ﺧﻴﺮ ﺑﺎﻟﻤﺮﺓ
ﺷﺎﻝ ﺣﺒﻮﺑﺔ ﻣﻨﻨﺎ ﺳﻮﺍ ﻟﻴﻨﺎ ﻣﻀـــــﺮﺓ
ﺳﺖ ﻛﻞ ﺍﻟﺤﺒﺎﻳﺐ ﻓﻲ ﻭﺷﻴﻬﺎ ﻣــﺴﺮﺓ
ﻳﺎﺭﻳﺖ ﻟﻮ ﺑﻌﻮﺩ ﺑﻲ ﺍﻟﺰﻣﻦ ﻭﺍﻧــﺠﺮﺓ

ﻭﺍﺣﻜﻦ ﻳﺎ ﻗﻮﺍﻓـﻲ ﻭﻗﻮﻟــــﻦ ﺍﻟﻤﺂﺯﻳــــﻨﻲ
ﺟﺎﺭﻳﺎﺕ ﺍﻟﺪﻣﻮﻉ ﻃﺎﺭ ﺍﻟﻤﻨﺎﻡ ﻣﻦ ﻋﻴﻨﻲ
ﻋﻠﻲ ﺣﺒﻮﺑﺔ ﺑﺒﻜﻲ ﻭﺯﺍﺩ ﺍﺳﺎﻱ ﻭﺍﻧﻴﻨﻲ
ﻣﻬﺮﻭﺩ ﺍﻟﻘﻠﺐ ﻭﺍﻟﺸﻮﻕ ﻟﻬﻴﺐ ﺻﺎﻟﻴﻨﻲ

ﺣﻠﻴﻞ ﺣﺒﻮﺑﺔ ﻓﻲ ﺍﻟﺘﻜﻞ ﺍﻟﻤــﻮﻭﻗﺪ ﻧــــﺎﺭﻭ
ﺑﻜﺎﻫﺎ ﺍﻟﺤﻲ ﺣﺮﻳﻤﻮ ﺷﺒﺎﺑﻮ ﺣﺘﻰ ﺻﻐﺎﺭﻭ
ﺣﻠﻴﻞ ﺣﺒﻮﺑﺔ ﻳﻮﻡ ﻣﻮﺗﺎ ﺍﻟﺮﺟـﺎﻝ ﺍﻧﻬـــﺎﺭﻭ
ﺣﻠﻴﻼ ﺍﻟﺒﻲ ﺍﻟﻜﺮﻡ ﻓﻴﻬﺎ ﺍﻟﻀﻴﻮﻑ ﺑﺤـﺘﺎﺭﻭ

ﺣﻠﻴﻞ ﺣﺒﻮﺑﺔ ﻭﺍﻟﺴﺒﺤﺔ ﻭﺣﻠﻴﻞ ﻭﺩﻋﺎﺗﺎ
ﺣﻠﻴﻞ ﻫﺪﻣﺎ ﻭﺍﻳﺎﻣﺎ ﻭﺣﻠــﻴﻞ ﺩﻋﻮﺍﺗــــﺎ
ﺩﻱ ﺍﻟﻜﺎﻧﺖ ﻭﻟﻴﻔﺔ ﺍﻟﻜﻞ ﺣﺒﻴﺒﺔ ﺍﺧﻮﺍﺗﺎ
ﺑﺘﻜﻔﻲ ﺍﻟﻀﻴﻮﻑ ﻛﺎﻧﺖ ﺳﻨﺪ ﺟﺎﺭﺍﺗــﺎ

ﺣﻠﻴﻞ ﺣﺒﻮﺑﺔ ﺑـﺘـﺰﻛﺮ ﺷﻠﻮﺧــــﺎ ﺗــــﺮﺍﺭﻱ
ﻭﺑﺘﺰﻛﺮ ﺣﺪﻳﺜﺎ ﺑﺸـــﻴـﺸﻲ ﺗﻤـــﻬﺎ ﻓــــﺎﺭﻱ
ﻟﻮ ﻛﺎﻧﺖ ﺍﻟﺮﻭﻳﺢ ﻣﻌﺮﻭﺿﺔ ﺑﻴﻊ ﻭﺗﺠﺎﺭﻱ
ﻛﻨـﺘﺎ ﺍﺩﻳـــــﺘﺎ ﺭﻭﺣﻲ ﻭﻓﺘﺎ ﺍﻧـــﺎ ﻟﻠﺒـــــﺎﺭﻱ

ﺃﻳﺎ ﻓﺮﺡ ﺍﻟﺪﻳﺎﺭ ﺍﻟﻠﻴﻠﺔ ﻭﻳـــﻦ ﺭﻭﺣﺘــــﻲ
ﺃﻳﺎ ﺍﻡ ﺍﻟﻜﺮﺍﻡ ﻳﺎ ﺍﻟـﺒﻲ ﺣﻨـــﺎﻧﻚ ﻓﺤــــﺘﻲ
ﺷﻔﺘﻚ ﻓﻲ ﺍﻟﻤﻨﺎﻡ ﺑﻲ ﺿﻲ ﺟﺒﻴﻨﻚ ﻟﺤﺘﻲ
ﺑﺠﺰﻡ ﺑﺎﻟﻴﻤﻴﻦ ﻟﻠﺠﻨﺔ ﺍﻧﺘــــﻲ ﺭﺑﺤـــــﺘﻲ

ﺑﺎﻛﻴﺎﻙ ﺍﻟﺪﻳﺎﺭ ﺣﻴــﺸﺎﻧﺔ ﺣﺘﻰ ﺭﻣـــﺎﻟﺔ
ﺑﻌﺪﻙ ﻳﻤﺔ ﺟﺖ ﺣﺎﻟﺘﻨﺎ ﺻﺒــــﺤﺖ ﺣـﺎﻟﺔ
ﺑﺪﻋﻮﻫﻮ ﺍﻻﻟﻪ ﺣــﺒﻮﺑﺔ ﺗـــﻠﻘﻰ ﻣﻨﺎﻟـــﺔ
ﻓﻲ ﻗﺒﺮﻙ ﻳﻬﺐ ﻧﺴﺎﻡ ﺩﻋﺎﺵ ﻭﺻﻼﻟﺔ

ﻭﻛﻢ ﺑﺘﺰﻛﺮﻙ ﻭﺍﻧــﺎ ﺑﻲ ﻫﻮﺍﻙ ﺑﺘﺤﺎﻛـﺔ
ﻳﻮﻡ ﺟﺎﻛﻲ ﺍﻟﻀﻌﻴﻒ ﻗﺘﻴﻠﻮ ﺧﻴﺮﺍ ﺟـﺎﻛﺔ
ﺍﻳﺎ ﺿﻮ ﺍﻟﺒﻴﻮﺕ ﻳﺎ ﺍﻟﻠﻲ ﺍﻟﻔﺮﻳﻖ ﻛـﻨﺪﺍﻛﺔ
ﻳﻮﻡ ﻣﻮﺗﻚ ﺑﻜﺎﻙ ﺍﻟﻤﻦ ﺻﻐﻴﺮ ﻣﺎ ﺍﺗﺒﺎﻛﺔ

ﻭﻳﺎﺭﺏ ﻳﺎ ﻛﺮﻳﻢ ﺍﻧﺎ ﻛـﺎﻥ ﺗﺸــــﻴﻠﻨﻲ ﺑـﺪﺍﻟﺔ
ﻋﻠﻲ ﺣﺒﻮﺑﺔ ﺑﺒــﻜﻲ ﻭﺣﺎﻟـﺘﻲ ﺗﺐ ﺑــــﻄﺎﻟﺔ
ﻏﺎﻟﺒﻨﻲ ﺍﻟﻨـﻀﻢ ﻧﻤـﺎﺗﻲ ﺻـــﺒﺤﺖ ﺿـــﺎﻟﺔ
ﺻﻮﺗﺎ ﺍﻟﻔﻲ ﺟﻮﺍﻱ ﻣﺎ ﺑﻨﺴﻰ ﺍﺻﻠﻲ ﻣﺤﺎﻟﺔ

ﻭﺯﻱ ﺻﺒﺮﻙ ﺟﺰﻡ ﻭﺍﻟﻠﻪ ﻣﺎ ﻻﻗــﺎﻧﻲ
ﻓﺮﺍﻗﻚ ﻳﻤﺔ ﺣﺎﺭ ﻭﻗﻠﺐ ﻋﻠـــﻴﺎ ﻛﻴﺎﻧﻲ
ﻧﻮﺛﺮ ﺟﺮﺣﻮ ﻓﻲ ﺟﻮﺍﻳﺎ ﺯﺍﺩ ﻭﺃﻋﻴﺎﻧﻲ
ﻳﺎﺭﺏ ﻳﺎ ﻛﺮﻳﻢ ﻓﻲ ﺍﻟﺠﻨﺔ ﻟﻤـــﻨﺎ ﺗﺎﻧﻲ

ﻭﻛﻢ ﺳﻨﺪﺕ ﺿﻌﻴﻔﺎ ﻭﻃﻤﻨـﺖ ﻣﻠﻬــــﻮﻑ
ﻭﻛﻢ ﺭﺍﻋﺘﻨﺎ ﺷﺎﻟﺖ ﻣﻦ ﺟﻮﺍﻧــــﺎ ﺍﻟﺨﻮﻑ
ﻳﻮﻡ ﻣﻮﺗﻚ ﺑﻜﻮﻙ ﺍﻟﻨﺎﺱ ﺻﻔﻮﻑ ﻭﺍﻟﻮﻑ
ﻓﺮﺍﻗﻚ ﻳﻤﺔ ﺣﺎﺭﻕ ﻗﻠﺒــــﻲ ﻣﻦ ﺍﻟﺠـــﻮﻑ

ﺃﻳﺎ ﺧﻠﻖ ﺍﻟﻠﻪ ﻫﻮﻱ ﺍﻟﻠﻴﻠﺔ ﻭﻳﻦ ﺣﺒﻮﺑﺔ
ﺣﻠﻴﻠﻮ ﺣﺪﻳﺜﺎ ﻳﺎﺣﻠﻴﻞ ﺳﺒﺤﺘﺎ ﺍﻟﻼﻟﻮﺑﺔ
ﻗﺎﻋﺪ ﻋﻨﻘﺮﻳﺒﺎ ﺑﺮﺍﻫﻮ ﻓﻲ ﺍﻟﺮﺍﻛﻮﺑــﺔ
ﻧﻮﺍﺭﺓ ﺍﻟﻔﺮﻳﻖ ﺑﻴﻦ ﺍﻟﺨﻠﻮﻕ ﻣﺤـﺒﻮﺑﺔ

ﻭﺑﺘﺰﻛﺮ ﺯﻣﺎﻥ ﻭﻛﺘﻴﻦ ﻣﻌﺎﻫﺎ ﺑﻨـــﻔﺰﻉ
ﺑﻨﻤﺸﻲ ﻋﻠﻲ ﺍﻟﺨﻼ ﻭﻛﻞ ﺍﻟﺒﻬﻢ ﺗﺘﻮﺯﻉ
ﻭﻧـﻠﻢ ﺍﻟـــﺤﻄﺐ ﺍﻟﻔﻲ ﻭﻃـــﺎﺗﻮ ﻣﻮﺯﻉ
ﻻ ﻧــﺘﺮﺗﻨﺎ ﻻﻧﻬﺮﺗــــﻨﺎ ﻻﻫﺎ ﺑــــﺘﻠﺰﻉ

ﺣﻠﻴﻞ ﺍﻡ ﺣﺴﺒﻮ ﺍﻟﺼــﺪﻳﻖ ﻭﺍﻣﺎ ﺍﻟﻌــــﺎﺟﺒﺔ
ﺣﻠﻴﻼ ﺍﻟﻔﻲ ﺍﻟﻔﺮﻳﻖ ﻣﻌﺮﻭﻓﺔ ﺩﻳﻤﺔ ﻣﻮﺍﺟﺒﺔ
ﺣﻠﻴﻼ ﺍﻟﻔﻲ ﺟﻮﺍﺭﺍ ﻧﻔﻮﺳﻨﺎ ﺟﺖ ﻣﺘــــﺤﺎﺑﺔ
ﺣﺎﺷﺎﻫﺎ ﺍﻟــــﻨﺒﺬ ﻣﺎ ﺳﻤﻌـــﻨﺎ ﺯﻭﻻ ﻋﺎﺑـــﺔ

ﻭﻳﺎﺣﻠﻴﻞ ﺍﻣﻚ ﺁ ﻋﺎﺷــــﺔ ﻭﻓﺮﺍﻗـﺔ ﺍﻟﻐﺎﻟﻲ
ﻭﻳﺎ ﺣﻠﻴــﻼ ﺍﻟﺘــــﻨﺎﺩﻳﻚ ﻳﺎﻣﺪﻳــــﻨﺔ ﺗﻌﺎﻟﻲ
ﻭﻳﺎﺣﻠﻴﻞ ﺍﻣﻚ ﺁ ﺧﺎﺩﻡ ﺍﻟﻠﻪ ﺟﺎﻭﺑﻲ ﺳﺆﺍﻟﻲ
ﻭﻳﻦ ﺃﻟﻘـﺎﻫﺎ ﺗــــﺎﻧﻲ ﻭﺗﻨــــﺼﻠﺢ ﺍﺣﻮﺍﻟﻲ

ﻭﻣﺎ ﺗﺒﻜﻴـــﻬﺎ ﻳﺎ ﺁﻣــﻨﺔ ﻭﺩﻭﺍﻡ ﺍﺩﻋـــﻴﻼ
ﺩﻱ ﺍﻡ ﺍﻟﻤﺼﻄﻔﻰ ﺍﻟﻄﻴﺒﺔ ﻛﺎﻧﺖ ﻫﻴــﻼ
ﻣﺤﻤﻮﺩﺓ ﺧﺼﺎﻝ ﺻﺎﺩﻗﺔ ﻭﺣﻨﻴﻨﺔ ﻧﺒﻴﻼ
ﺳﺖ ﻛﻞ ﺍﻟﺤﺮﻳﻢ ﻣﻌﺪﻭﻡ ﻭﻣﺎﻓﻲ ﻣﺜـﻴﻼ

ﻭﻳﺎﺭﻳﺖ ﻟﻮ ﺗﻌﻮﺩ ﺍﻳﺎﻣﻨﺎ ﺗﺮﺟﻊ ﺻــﺎﺩﺓ
ﻭﻳﺎﺭﺏ ﻳﺎﻛﺮﻳﻢ ﻭﺳﺪﻫﺎ ﻓﻮﻕ ﺍﻟﺒــــﺎﺭﺩﺓ
ﺩﻱ ﻣﺎ ﻇﻨﻴﺘﺎ ﻟﻴﻬﺎ ﺫﻧﻮﺏ ﻭﺧﻴﺮﺍ ﺯﻳﺎﺩﺓ
ﻓﻲ ﺩﺍﺭ ﺍﻟﻨﻌﻴــــﻢ ﻳﺎﺭﺑﻲ ﺗﻠﻘﻰ ﻣـــﺮﺍﺩﺓ

ﻭﻳﺎﺭﺏ ﻳﺎ ﻛﺮﻳـــــﻢ ﺑﺎﻟﺮﺣﻤﺔ ﺍﺗــــﻮﻻﻫﺎ
ﻭﻓﻲ ﺩﺍﺭ ﺍﻟﺨﻠﻮﺩ ﺣﻘﻖ ﻭﺗــــﻤﻮ ﺭﺟــﺎﻫﺎ
ﺳﺖ ﺍﻟﺤﻜﻤﺔ ﺑﺘﺠﻴـﺐ ﺍﻟﺪﺭﺭ ﻣﻦ ﻓﺎﻫــــﺎ
ﻓﻲ ﺍﻟﻔﺮﺩﻭﺱ ﻫﻨﺎﻙ ﺍﺟﻤﻌﻨﺎ ﻧﺤﻨﺎ ﻣﻌﺎﻫﺎ

ﺍﻟﻠﻬﻢ ﺍﺭﺣﻤﻬﺎ ﻭﺍﻏﻔﺮ ﻟﻬﺎ ﻭﺍﺩﺧﻠﻬﺎ ﻣﻊ ﺍﻟﺸﻬﺪﺍﺀ ﻭﺍﻟﺼﺪﻳﻘين
واجمعنا معها في دار الفردوس الأعلى