مرات نعمة چبيرة تكون لَمن ما تحصل كُلشي تريده بالحياة.
لأن نفرض اليوم لو إجاك طفل وشايل بيده بطل كلور وعباله مشروب غازي وگلك "ممكن تفتحلي البطل؟"
انتَ هنا تسأله وتگله "شنو راح تسوي بالبطل؟" ،أكيد راح يجاوبك ويگلك "اريد اشربه" ،فَـ تقرر انتَ ما تفتحله البطل
الطفل بطبيعة الحال راح يزعل ويضوج لأن عاجبة يشرب من هالبطل بس انتَ راح تكون مُصر على مَوقفك لأنك تعرف أكثر منه
نفس الشي بعلاقتك ويه رب العالمين ،لأنه يعرف كُلشي وعنده علم بأي شي هنا هو ما راح ينطيك الي انتَ تريده "وإنما الي تحتاجه".

هواي ناس من تسمع كلمة "عطاء"، أول شي يجي ببالها هو الفلوس، الهدايا، أو المساعدات المادية. بس الحقيقة، اكو نوع من العطاء "بلاش" بس قيمته أغلى من الذهب، وهو الإنصات.

من تسمع لشخص بتركيز، أنت كأنما دتگوله: "حچيك يهمني، ومشاعرك مقدرة عندي".

اللي يسمع أكثر مما يحچي، دائماً تكون إله هيبة ومكانة خاصة. مثل ما يگولون أهلنا: "إذا كان الكلام من فضة، فالسكوت من ذهب".

"الناس راح تنسى أنت شگلت، وراح تنسى أنت شسويت، بس ما راح ينسون أبداً شلون خليتهم يحسون براحة من سمعتهم."

بصراحة ماكو شي فايتك ،ولا أي شي راح عليك
السوشيل ميديا والمحيط الي انتَ عايش بي يحسسوك انُ انتَ فايت عليك شي ،بس إذا تجي للواقع…انتَ ما فايتك أي شي ،لأن الله سبحانه
يگول : (ورزقكم في السماء وما توعدون)
بالنهاية الأرزاق يم رب العالمين
ما يحددها البشر ولا الوقت.

گاعد أقره قرآن فـ لفتتني آيه تگول (ذَلك بِأن الله لم يَك مُغيراً نِعمة أَنْعمها على قومٍ حتى يُغيروا ما بأنفسهم وإن الله سميعٌ عَليم)
صفنت بيها شو وعرفت انُ التغيير الحقيقي ما يبدي من الظروف…يبدي من داخل الإنسان
هواي من الناس يگولون لو الظروف تتغير أتغير
بس هاي الآية تگول العكس ؛ تغيّر أنت أولاً…حتى تتغير الظروف
يعني الإنسان هو مثل المفتاح إذا صلّح نفسه ،أفكاره ونيته….العالم حوله يبدأ يتبدل تدريجياً
بالنهاية الإنسان إذا خرّب داخله ،ما تنفعه ألف نعمة برا
وإذا صلح داخله ،حتى القليل يصير بركة.

حاول تغمض عيونك وتصفن شويه وتتخيل وياي نفسك بعد عَشر سنين، لا أحلامك، ولا أمانيك تحققت
انتَ بنفس المكان، تنطي نفس الأعذار وتحس بنفس الخوف، تشوف الناس الي حواليك، الي بيهم سبقك، والي بيهم نساك، والي بيهم صاروا ذكرى
بالصدفة تفتح تلفونك، تلگالك صورة قديمة إلك من قبل عشر سنين ،تبتسم لمن تشوفها، لأن عينك چانت مليانة أمل وگلبك چان مصدگ انُ انتَ راح تصير شي…وتحس بغصة، مو لأنك فشلت، بس لأنك خذلت روحَك، وتحضن التلفون والدمعة بعينك وتگول "يارب بس فرصة وحدة، رجعني وأوعدك انُ ما راح اضيعها"

إفتح عينك هسه، تحققت أُمنيتك، رجعت عشر سنين لورا
وبعد ما تم تحقيق أُمنيتك عندي سؤال الك
هل راح تضطر تدعي نَفس الدُعاء بعد عشر سنين؟

تقبّل الله منا ومنكم صالح الأعمال، وتقبّل صيامنا وصيامكم، وأعاده الله علينا وعليكم بالخير والبركة يا ربّ العالمين.
اللهم اجعلنا من أهل رمضان القادم بإذن الله تعالى.
اللهم إنك عفوٌّ تحبّ العفو فاعفُ عنا، إنك أنت خير الراحمين.

كل عام وأنتم بألف ألف خير وصحّة وسلامة، وعيدكم مبارك، وأعاده الله عليكم بالخير والبركة، ويرحم شهداءنا، ويعمّ الأمن والأمان على عراقنا🇮🇶♥️.

لا تحاول تشوف الناس إنك فهمت لعبتهم، ولا تبين إنك شايف شنو دا يضمّون، خليهم يفكرون أو يعتقدون نفسهم أذكى وإنك مو منتبه، لأن إذا واجهت أو عاتبت، فجأة يگلبون نفسهم ضحية ويحاولون يرمون الغلط عليك. فالأحسن تمشي بهدوء وكأنُ انتَ ما فاهم شي، لأن القوة الحقيقية مرات تكون بالسكوت والانسحاب.
واللي يلعب حتى يخسّرك، خليّه يفوز.

صباح الخير ✨
بحياتك راح تقابل هواي أشخاص الي يشوفك
أطيب الناس بعيونه ، والي يشوفك أسواهُم ،
ناس تنسى الف موقف حلو سويته وياهم بس
لأن قصرة مره وحده ، وناس تدور لك على
احلى الأشياء حتى تشوف شكثر أنتَ شي حلو
بنظرهم ، راح تقابل ناس تتعمد تنتقدك
وتظهر عيوبك ونُقاط ضعفك ، وناس تخلص
كل الكلام الحلو حتى يوصفونك ..
وبنهاية أنت نفس الشخص؟ بس الفرق كل
عين تشوفك على قدر محبتها الك وكل
واحد ينظرلك من الزاوية الي يشوفها بنظره
مو بمواقفك وياه .

احس القرار الصح دائماً يكون عكس رغباتنا بس مثل الي مجبورين عليه ولازم نسوي
ف انتَ لمن تختار الشي الصح
مُمكن راح تتنازل عن شي نفسك چانت بيه او تحبه والقرار الصح يعني إنك تمشي عكس مشاعرك، هنا عقلك يگلك عفيه هذا الصح وگلبك يگلك لا ماريد هالشي وتخيلها هيچ
القرار الصح مثل الدواء المُر يشفيك على المدى الطويل والقرار الغلط يشبه شي تحبه مريح ومؤقت بس ممكن يأذيك بعدين
وخلي ببالك
القرار الصح يكون صعب لإن راح يبني شخصية اقوى، يعني اذا تأذينه لإن تخذنا قرار صعب معناها جاي نكبر ونسوي شي ناضج …..لا تخاف .

أكبر سرّ للراحة النفسية والبهجة الدائمّة هوَ إنْ گلبّك يعرف شلون يفرح لغيره.
مِن تشوف نعمة بيد غيرك وتگول ما شاء الله، ربي يزيدها عَليْهُم.
انتِ هنا دتفتح أبوب الرزق لروحك وگلبّك.
أحَبّ الناس الّلي ما يستكثرون الفرحة علّى أحد، الناس الّلي وجوهُم تضحك مِن يسمعون خبر خير لـغيرهُم، الرزق مو سباق ابدًا والدُنيا مو حَلبّة مُصارعة، الرزق نصيب إين كان، مكتوب لكُل واحد بينا وبوقته المُناسب.
مِن تتعلم تفرّح الغيرك، حـتكتشف إنْ الرحمٰن ديفتحها بوجهّك مِن زاوية ما چنت حاسب إلها حساب،
الوجع والتشنچ مِن رزق الناس يخلّي الروح تذبل ثقوا بالرحمٰن، بَس المُباركة والدُعاء والكلمة الطَيّبة تخلّي الروح تزهر وتفيض طاقة وحُبّ، حَبّ الغيرك الّلي تحَبّة النفسك، وحـتشوفه بين ايديك بدون تخطيط.

گعدنا اليوم وچان الجَو مو صافـي وغُيوم وشِوية مُطر
شوي شوي، ضَوااا الشَمس صار عالي والجَو صار صافي وحلو والهوا تغَير، والمَلامح صارت أوضح وكل لحظة تثـبت إنُ الحال ما يثبت علىٰ شكل واحد
فَـ اللي يبدل الجَـو بهالسرعة
قادر يبدل حالك بلحظة ما تتوقعها
فَـلا تخلي فكرة تاخذك لمكان مو إلك
ولا تخلي الخَوف يكبر أكثر من حجمه لان يمكن كل اللي تحتاجه هسة شوية صبر وشوية يقين وايمان
وتتركها تمشـي مثل ما الله كاتبها لأن مَرات التفكير يضيعك بس التوكّل على الله يرجعك لنفسك .

اليَـوم يُصادف ولادة الأمام الرِضـا ( عَليه السَلام ) ويگولون أي امنـية تتمنوها راح تتحـقق حَـتـىٰ يسَمون هَاليـوم يوم الامنـيات اتمنوا أمنـية وان شاء الله بأذن رب العالمين تـتحقق الكُم ♥️.

حتى تعيش مرتاح بحياتك العاطفية وما تكسر گلبك بيدك، أكو قواعد ذهبية للإمام علي (عليه السلام) لازم تخليها حلقة بإذنك،
أولاً: لا تنطي كل مشاعرك دفعة وحدة.
"أحبب حبيبك هوناً ما".. يعني لا تندفع بزيادة وتخلي كُل مفاتيح سعادتك بيد شخص، حتى لو تغيرت الظروف بيوم، ما تنكسر كسرة ما تگوم منها، خلي عندك توازن.
ثانياً: حتى بِالزعل، خليك راقي.
"وأبغض بغيضك هوناً ما".. لا تحول خلافك ويه أحد لكره مطلق وعداوة، لأن الأيام دوارة والناس تتغير، وممكن بيوم يرجع الغالي غالي، فلا تخسر خط الرجعة.
ثالثاً: كرامتك خط أحمر.
أي علاقة تحسها "تگص" من قيمتك أو تهينك، انسحب منها بكرامتك. تذكر دائماً إنُ كرامتك أهم من أي ارتباط، والي ميعرف قديرك لا تضيع وقتك وياه.
رابعاً: لا تجلب بشخص ميهتم بيك.
من حكمه: "من كَرمت عليه نفسه هانت عليه شهواته".
الشخص الي يعرف قيمة نفسه صدك، مستحيل يركض ورا واحد ما مهتم بوجوده أو مامنطيه حقه، بالنهاية.. حب بعقلك قبل گلبك، وعِز نفسك حتى الكُل يعزك.

صبـاح الخـير ✨
لا تحجي بكل خططك للناس مو كل شخص يسمعك يتمنالك الخير، اكو ناس من تشوفك تبين نفسك ، تبتسم بوجهك ويغارون بـ كلوبهم ،اشتغل بصمت وخلي نتائجك تحجي عنك مو لازم كل خطوة تنعرض ،بعض الأحلام تكبر أكثر من تبقى بعيد عن عيون البشر واذا تعبت بالطريق لا توقف ،ترى كل شخص ناجح مرٍ بايام صعبه حس بيها يريد يترك كلشي بس الفرق إنهم كملوا، لا تستعجل النجاح
الشجرة ما تطلع ثمر بيوم وليلة ،كل تعب اليوم، باجر يتحول لشي تفتخر بي وخلك دائما شخص ثقيل لا تركض ورا اهتمام أحد الي يقدرك يجيك بنفسه، والي ما يعرف قيمتك لا تتعب نفسك وياه🤍."

الله سبحانه وتعالى وصف طبيعة الإنسان بهاي الايه ( لا يَسْأَمُ الإِنسَانُ مِن دُعَاء الْخَيْرِ وَإِن مَّسَّهُ الشَّرُّ فَيَؤُوسٌ قَنُوطٌ )
يعني الإنسان ما يمل من طلب الخير... يبقى يريد أكثر، يدعي، يتمنى، ويسعى، مال، راحة، نجاح، حب، حياة أفضل... وهذا الشي بطبيعته مو غلط بس المشكلة مو بطلب الخير، المشكلة إن بعض البشر أول ما يمر بضيق أو مشكلة... ينهار بسرعة، ويتصرف وكأن الدنيا انتهت.
يوم الأمور تكون زينة، يحس نفسه قوي ومطمئن بس أول ابتلاء صغير، يبدأ اليأس يدخل لقلب ويكول: "ليش أني؟"
"ماكو أمل"
"كلشي انتهىّ
مع إن نفس الإنسان اللي كان يطلب الخير بدون تعب، مطلوب منه يصبر شوي إذا مرّ بالشر
الإيه تعلمنا ان الإنسان بطبيعته الراحه ويكره الألم بس الإيمان الحيفي يبان وقت الشدة، مو وقت الراحة
لأن المؤمن مو هذا اللي يعبد اللّٰه فقط بوقت النعمة، المؤمن الحقيقي هو اللي إذا تعب... ما ييأس، وإذا ضاقت عليه الدنيا... يبقى عنده أمل بالله.
اللّٰه سبحانِه يكول بآية ثانية
(إِنَّهُ لَا يَيْأَسُ مِن رَوْحَ اللّهُ إِلَّا الْقَوْمُ الْكَافِرُونَ)
يعني اليأس مو حل، لأن رحمَة اللّٰه أكبر من أي ضيق نمر بيه ،الإمام علي عليه السلام يكول:
«عند تناهي الشدة تكون الفرجة»
يعني مرات الفرج يكون قريب جداً... بس الإنسان يستسلم قبل لا يشوفه ولا أول خسارة تخليك تظن ان الحياة انتهت ، الدنيا يوم إلك ويوم عليك، وماكو حال يدوم إذا جاء الخير، احمد اللّٰه...
وإذا جاء التعب، اصبر وثق إن بعده فرج لأن الإنسان إذا عاش بين الشكر وقت النعمة، والصبر وقت الشدة...
راح يعيش مطمئن مهما تغيّرت الظروف"

صباح الخير 🌞
الحَياة مو فوضـى مثل ما نحس أحياناً ، كلشـي مَحسوب، كل خُطوة إلها وقتها وكل باب ينفتح بوقته المناسب ، مو لأنك تأخرت يعنـي معناها خسرت، ومو لأن غيرك سبقك يعنـي أنت متأخر للأبد ،أكو أشياء تنولد بوقتها الصَحيح حتـى لو تعبنا من الانتظار، وأكو أشياء تنشال من طريقنا حتى لو چنا نتمناها بقوة، لأن الله شايف النهاية مالتها مو البدايات بس ، فَـ ترتاح الفكرة بداخل گلبك إنُ ماكو شـي راح يفوتك إذا مكتوب إلك وماكو شـي راح يبقى إلك إذا مو من نصيبك .

البلوگر تطلع تحسسج انُ زواجج فاشل وانُ هو ماديحاول علمودچ وانُ انتِ مو سعيدة لإن ما جابلج كيه حمل تارسها ورد
واحد لابس بدلة يسولف بالعقارات يحسسك انتَ فاشل وبدل ما تصرف فلوسك على المطاعم تگدر تشتري قطعة أرض تبعد عن اليرموك ٣ دقايق
صفحة مال مصورين لو منظمين حفلات يحسسوكم انُ المشاية الي ترفع الراس ان يجيج برتل تاهوات وعمامة هواي والشارع يسدونه وبيكيسي النجف
واحد عنده ورث وغني يطلع يحسسك انتَ فاشل لان عمرك ٢٥ وما اشتريت البيت الابيض وحولته لمطعم
يجي واحد ابو تداول يگلك انتَ فقير لان تشتغل موظف ، لازم تبطل وتشتغل بالتداول
والكثير من الكلام الفارغ الي يجيب تفاعل لان يستفز مشاعرك ويحسسك بالدونية والنقص والفشل!
وهنا الناس تصير قسمين ، قسم عنده فلوس يعيش هاي الشكليات الفارغة
وقسم ثاني ياكل بنفسه من القهر لان ديحس انُ الحياة الطبيعية ان تكون مثلهم!
بس بالاخير تكتشف ان البلوگر المطاعم تتصدق عليها وابو البدلة مأجرها والعنده ورث وغني هذا الشمس مضاربته وميعرف شلون يجيب الفلس اما الصفحات الي تنشر هيج ديضحكون على الناس علمود يجيبون تفاعل..بالتالي نست الناس شلون تعيش حياتها الصافية من الفخفخة والتشهير.

كُل عام وأنتم بألف خير ينعاد عليكم بالصحة والعافية ويارب تديم النعم عليكم جميعاً مع الموفقية والنَجاح الدائم 🩶.