【抗爭一年有冇成效？】

二零一九年六月九號，係唔少香港人嘅第一次，有人第一次上街，了解到政權有幾腐敗；第一次咁恐懼，因為連發聲都有罪；第一次咁團結，幾乎全港組成人鏈，為嘅係保住所剩無幾嘅自由。回望過去一年，相信大家都冇後悔為香港嘅自由去抗爭。就等我地回顧呢一年，為抗爭去開闢過嘅路，然後思考我哋應該點樣繼續行落去：

無論你係勇武定和理非，大家都付出咗好多，文宣戰、聯合起同路店家組成黃色經濟圈、大三罷提出訴求、上街保護同路人。有人會覺得無力改變世界，政府只會更腐敗，更積極去滅聲，但事實上，我哋嘅付出並非徒勞無功：我哋引起各國關注，美國國會通過左《香港人權與民主法案》；黑警濫權濫暴被媒體揭發，警黑合作證據確鑿；最重要，我哋成為左同路人，唔再係只求吃喝玩樂嘅港豬，公民意識大大提升。呢啲改變雖然未達到我哋想要嘅結果，但我哋播下嘅革命種子已經喺下一代人嘅心裡面。

我哋要面對嘅係一個極權，我哋嘅能力未必令到中共立即倒台，我哋要面對嘅係惡法，黑暗嘅政治操作，所面對嘅困境只會日益黑暗，但「仁智勇」中我哋有「仁勇」，嚟緊要做嘅就係用「智」去思考如何喺藍圖中達到我哋想要嘅目的。

中共滅到港人嘅肉體，但滅唔到香港人嘅靈魂同文化，只要我哋保存到香港人嘅文化，繼續播下革命種子，中共一定會有倒台嘅一日。而喺呢一日到之前，我哋要積存實際力量：未夠社會嘅持份地位，就要建立同提升；唔再執著追求靚畫面，而去建立有力量同有遠謀嘅組織，傳承文化，改變香港。我哋現時同中共比，一定係冇武力上同財力上嘅優勢，但思想從來不滅，只要每一代都承傳革命思想同香港文化，終有日一定會贏。

#反送中 #反送中一週年 #黑警 #濫捕 #香港人權與民主法案 #國安法 #抗爭 #轉型