وتدري إن في سلمنا من كبنا لازم نكبه
بس أنا وشلون اكبك وأنت ضيقي وانشراحي

داخلٍ بالله عليك من الجفا ماني بحبه
المواصل ود عيني والجفا موتٍ ذحاحي

ياوجودي لاتدانا الليل ثم اللحق مشبه
وجد ساحة قلطة الشعار من فرقا الرياحي .

‏عاد لك فالبال ذكرى وفـ الخافق مكان
‏يابعد عمر السنين الشحاح الممحلة

‏ماتنسيني لياليك .. طيّات الزمان
‏وأنت في يوم من الأيام سيّد مرحله .

أبفصح عن غلاك أكثر و لو إني كثير الصمت
‏أحب الصمت في كل الأمور إلا الذي غالي .

على الله ورحمته كنّي الورق والندى
حتى نسيم الهوى يقدر هبوبه علي

أن كدر الليل صحوه فـ العيون وهدا
في دبرة اللي ما غيره والي ولا ولي

جعل قليل إجتهادي ما يروّح سدى
يشملني الله بمغفرته ويشمل هلي

الناس حتى رضاها صار يبغي جِدا
وأنا ما عندي جِدا ـ ولا فؤادي خليّ

مغنيني الله من مراضى عباده عدا
اللي يدوّر رضاي ولا يحب زْعلي .

ما تعمي الخيبة قلوب الأصيلين
‏لو ذاقت الخذلان تبقى نقيّة

‏ولا يشوّهنا جحود المغلّين
‏الضلع شامخ ، و المطيّة ، مطيّة .

‏لا تخلّين الأماني تعلن استسلامِك
وإنتي كبار الهقاوي جيتي أكبَر منها .

‏اللهُ أكبر وحده النافع الضار
آمنت به حتى ولو ما نظرته

سبحانه اتقرب له بورد الأذكار
لا ضاقت الدنيا عليّه ذكرته

جل وتعالى ما بتخفاه الأسرار
يعلم خفيّ السر واللي جهرته

فـ لا إله الا أنت أجرني من النار
وقتي بذكرك يا إلهي عمرته .

‏من ريبة النفس وإلّا شرهة أحبابي
‏ملَّت عيون السحاب وسالت الدمعة

‏يا الله لا تاه الكلام وضاقت رحابي
‏سخَّر لي إنسان يدعي لي مع الجمعة .

يالله بنفحات جودً كل مامرت
يمر معها فرج ربي وتوفيقه .

‏- ولكن المحبه ما تعزّ القلب يا راعيه -
‏ولا تعمي عن طعون الشموخ عيون شماته

‏ مكانٍ ما تمنتني دروبه مت قبل أجيه
‏لو انها بوصلةْ قلبي تلفت باتجاهاته .

أحن وأشتاق لكن ما أنطعن مرتين
‏لو جنة العاشقين قطوفها دانيه

‏واللي جفوني وردّتهم عليّ السنين
‏لايمكن أخوض معهم تجربه ثانيه .

‏بس أنا مثل ما أعزك أحب الوقـار
‏ لو تجـور الليالي .. ما تـوسّلتها .

‏لنا على قولة سهالات منوال
‏ويمرّنا حشد الخطأ ويتعدّى

‏الله خلقنا من وقار وسعة بال
‏حتّى مع اللي نكرمه ويتردّى .

ترى الشجاعة صملة أنسان مرتاع
‏وترى المعزة خطوة بدرب يقهر

‏ومن ذاق طعم العز من بعد الأوجاع
‏يعاف قطف السهل لا شافه أزهر .

رزيّنه مثل حزني .. مثل بحرٍ هادي الأمواج
‏مثل ذاك السكون اللي تهبّ العاصفه بعده .

وريمية الوادي ذعرها الصوت واخذتها الليال
من جوف صدرٍ ذيرت من مرتعه ريم الفلا

مدري خذاها الطيش من بعد القصايد والدلال
ولا تبي تقفي وتختبر المحبه والغلا

خلتني أبدع في مجال الفقد لا جاله مجال
واقاول المشراف والدربيل وفجوج الخلا

امر مدهال اللقى واقرى مراسيل الوصال
واعزم انساها ولا عزمت جددت الولا

ودي بعد طول البطى مره تعاود الاتصال
وتسمع قصيدة ، ياحبيب الروح ، قلبي ماسلا

وإن شدت رحال الجفى لـ البعد شديت الرحال
و ودعتها اللي ماتضيع وداعته جل وعلا .

‏اللي تبينه على خشمي وجعله فداك
والطعنة اللي تجيني من يدك جايزة

إن كان هذا تغلي مايغرك غلاك
وإن كان هذا تحدي فـ أنتي الفايزة .

تلدّين العيون و تسرقين القلب و الألباب
‏ يا ليتك يوم قالوا لك كبرتي ما تكبرتي .

‏يا صاحبي عدٍ يهين النفس ما أبيه
ماااا أبيه لو الكبد مشفيةٍ على ماه

و اللي ترا هذا أوله .. ينعاف تاليه
يعافه اللي ما يعيش إلاّ بـ يمناه

و ما قدّر الخالق على المخلوق يأتيه
و أرضى بـ مقدوره عليّ و الحمدلله

حمداً كثيراً طيباً مباركاً فيه
كما يحبه ربي و ربك و يرضاه .

‏المواقف كلبوها تطلب إستسلامي
بس لا يمكن على ماهي تحب أعطيها

ماشيه .. لو المسافه دربها مترامي
لين أشوف أحلامي توّقف على رجليها .

‏عشانك حرّ .. من ماكر حرار و مبتغاك صعيب
تخوض الحرب من شيمه ولا تبغى غنايمها .