‏أنا كنت أحسب إن راحة العبد فيما أختار
‏وأثر خيرة المولى .. لعبده مسنّعته .

‏تمطر و أحس إن الثرى أصبح عطر
و يصير أحلى شي فالكون السحاب

جو المطر ، ريح المطر ، وقع المطر
يا رب سُقيا رحمة لا سُقيا عذاب..

‏ترا الضايق اللي من وجيه الخلايق ملّ
ليا هلّت الامطار .. تتبدّل احواله

تبسّامة القيعان بعد المطر ما هلّ
تبسّام شايب .. يفخر بـ سمعة عياله .

لاتنطوي نفسك على نفسك و تذبل مادريت
خل المطر يمطر عليها . . و الهبوب تهبّها .

اي قلب دامه يتبع الصدق ماضاع
‏في كل نبضاته اثر من وضوحي

‏لاهبت رياح الألم صدري شراع
‏لاوجاعي اتصدى واداوي جروحي

‏عزيت نفسي لين ما أعطيت الأطماع
‏ظهري وبقيت الشامخه في صروحي

‏من كثر ماصرت اترفع عن القاع
‏مافيه أحد يوصل لـ قمة طموحي .

يا قلب خفّف من عتبك شويّ
‏رحيب حلمك ما لحقت أقصاه

‏يمكن عوض صبرك يكون بـ شيّ
‏أحسن من اللي .. كنت تتمنّاه .

الصمت عن بعض الحكاوي فراسه
إما تقول العذب او صمتك العذب .

ناقم على نفسي اللي : بالغلا زلّت
‏شعوري إنّي أحبّك ويش سوّا لي ؟

‏أي والله انّي عرفت إن قيمتك قلّت
‏من يوم قفّلت عنك إشعار جوالي .

صحيح إني رقيقة قلب ويتعبني الوداع أحيان
‏ولكن من تخيّر في بعادي ما يهد حيلي

‏بيدرك كثرة أحبابي بيدرك من هو الخسران
‏وأنا يكفي القلوب الطيّبة تشري مواصيلي .

سمَحت من المحبّة وأنت سامحني على التّقصير
وصلنا آخر حدود العشرة اللّي  . .  مالها خانه .

‏ يا رب من غيرك عليه الأتكال
‏لا جيت لك من غير حيل ولا جِدا

‏شايل على متني من ذنوبي جبال
‏ولا أمل إلا أنت .. لو طال المدى

‏ما كنت مستغني و أحب الأعتدال
‏و مساوئي تقصير ماهي من ردى

‏ليتي مع الصحبة و أردد مع بلال
‏و إذا النبي ردد .. تحضنت الصدى .

يا رب والعمر نجهل شره وخيره
‏ندعيك وأنت الكريم اللي لك المنّة

‏لو ننحرم من فرح نلقى فرح غيره
‏لكن يا ربي لا تحرمنا من الجنة .

‏طالبك يا الله حي .. وطالبك ميّت
‏بدعوة قفا من محبٍ في عصر جمعه .

يا وجود اللي أخلفت الأيام ظنه
شافـها قباله ولا حـوله مْعـشى

مهـرةٍ من دونـها : شد الأعنه
ماهي بـ سرٍ مع العالم تفشى

حسن وجه وطيب ماتقفيه منّه
عزوة اللي لا إنصى غدّى وعشى

تستحي إن هب الهوى وتصد عنه
وظلهـا ، لا من تغافلها : تغـشى

كن فيـها  يوم عدّت : ريـح جنه
وكن رجليها على الرمضى تمشى

واحدٍ مرّت قبـاله .. أشـهد أنـه
نـام ذاك الليل ..  لكن ما تعشى .

مشاعري هتّان صوتك زرعها
حتى تدلّت حُب عنقود عنقود

‏مرّت محاصيلك .. ولكن منعها
‏الدين والعادات وعيُونك السود .

خذانا هوى اللي يوخذ المسك من دمه
بعد ما نوينا نعتق الصيد بانواعه .

‏ ياربّ .. يارب الرضا والجنّه
‏النفس عن حب الحياة إصرفها

‏ويا جعل نفسي دايماً ممتنّه
‏لأفضالك اللي بعضها ما أعرفها

‏والكلمة اللي ماهي بـ منعنّه
‏ماتطرق ببالي ولا أسولفها

‏والوقفة اللي في طرفها منّه
‏ماهي توقَّف لي .. ولا أوقّفها .

‏ كيف ما أحيا ولي رب ٍدعيته
‏ليه أخاف الليل والغفران ضوّه

‏أسجد بدمعي ليا مني عصيته
‏وكل ما أسجد تحت يدهْ ازداد قوّة .

‏يا ربّ و أحلامي تبي منك تدبير
‏خلقتها مثلي وجّت مثلـي كبار .

صاحبي ماعاد في الأيام من دونك غناه
‏العوض رأسك ولاني والله بمعتاض فيك

‏ماعبس وجه الزمان إلا لقيتك من وراه
‏ضحكةٍ تطرد سراب الخوف وتغيث الدريك

‏يوم أفكر في سوالفنا وفي ظروف الحياه
‏ودي أضحك منك دايم بس ما أبكي عليك .

نطيح من عين الردي مابها عيب
‏ولا همنا لو قال ما قال فينا

‏مادام نسكن في محاجر هل الطيب
‏و منزالنا في عيونهم ما علينا .