ليه الإسم دا؟ .. وإيـه «مَشْرُوعْ قُدُسِيَّةْ» دا أصلاً؟ .. بسم الله ..

-القدس بالنسبة لى حلم وهدف وغاية .. القدس كـ مدينة وكـ أهل وكـ كيان .. هناك بتلاقيهم رغم كل اللى بيتعرضوله ثابتين .. رغم كل التحديات ماتكسروش ولا استسلموا .. هناك الأطفال رجالة وعارفين هدفهم في الحياة .. وشايلين هم الدين عَ أكتافهم .. من زمان وعَ مر العصور وهو المسجد الأقصى بيعتبر «ترمومتر» قوة الإسلام .. فـ لو المسجد الأقصي كان تحت سلطة الإسلام وفي حماه .. يبقي الإسلام في العصر دا قوى وعزيز وله هيمنة .. ولما يقع تحت الإحتلال المدة دى كلها يبقي دا معناه إن الأمة فيها صدوع وخلل كبير ..

خلينا نفكر بـ منهجية .. طب وإحنا نقدر نعمل إيه؟ ..
- نقدر نصلح نفسنا ونفوق من غفلتنا .. ونشيل الدين من تانى عشان نُصْلح اللى حوالينا .. ولما نيجى نختار شريك حياة نختاره صالح مُصلح .. فا تبنوا أسرة صالحة مُصْلحة يكون بيها قوام الأمة واسترداد المسجد الأقصى من تانى بإذن الله .. وهو دا بالظبط هدفى من القناة ..

وطبعاً عشان أحاول إن أبقا «قُدُسِيَّةْ» الهدف .. فـ يكون القدس دايما قدامى .. وأحاول أنصره لازم أصلح من نفسي .. عشان زى ماتمنع المطر والرزق عن بنى إسرائيل أيام سيدنا موسى عليه السلام عشان ذنب راجل منهم .. ممكن جداً يكون ذنوبي هى سبب الحال اللى وصله الأمة دلوقتى .. عشان كدا لما أفكر أحط قدامى poster يشجعنى عَ المذاكرة هحط للمسجد الأقصى .. لما أحط شعار يحفزنى إنى أقوم من نومى يبقي «بُنَىّ! .. لكَ أقصيٰ في هـٰذا العالَم فـانهضْ» ..


أى مشروع يلزمه (فكرة/مجهود/حافز يخليك تستمر) .. الفكرة وضحتها .. والمجهود بإذن الله هنقدمه كلنا مش أنا بس .. والحافز اللى يخلينا نستمر إنك تفكر إن إنتَ مش جاى عَ الأرض عبثًا .. إنت نازل وليك هدف ولازم تسعاله .. و«ياله من دين لو أن له رجال»! .. الدين لازم يكون أكبر همك وإنك تبقي عايز تعرفه وتفهمه وتوصله للى حواليك .. لِهذا خُلِقت إنسان ..

ودا كدا معنى الإسم اللى بعتبره كنيته الخاصة ليا ٣ سنين .. «مَشْرُوعْ قُدُسِيَّةْ» دا شعارى وحافزى وسيظل بإذن الله ..

دا لينك القناة ..

http://t.me/Mashro3_kodoseiia


#مشروع_قدسية

قاله رد على الكلمة دى عشان تبقي القصاص وإلا استعديت بالنبى .. فـ سيدنا ربيعة بن كعب رضي الله عنه رفض بردو وقاله « لا والله ما أنا بقائل لك إلا خيرا » .. راح أبو بكر للنبى ﷺ وحكاله .. فالنبى بعت لسيدنا ربيعة يتلوه .. ويسمع منه ويحكم بينهم ..

فـ الناس من بنى أسلم قابلوه وهو رايح .. وبدأو يكتروا في الكلام ويقولوا لسيدنا ربيعة بن كعب رضي الله عنه « يرحم الله أبا بكر .. هو الذي قال ما قال .. ويستعدي عليك » .. هو أبو بكر هو اللى زعلك وقالك كلمة تكرهها وكمان هو اللى رايح يشكيك .. شوفوا بقا أخلاق سيدنا ربيعة في رده عليهم .. قالهم « أتدرون من هذا ؟ .. هذا أبو بكر .. هذا ثاني اثنين .. هذا ذو شيبة المسلمين .. إياكم لا يلتفت فيراكم تنصروني عليه .. فيغضب فيأتي رسول الله ﷺ فيغضب لغضبه .. فيغضب الله لغضبهما فيهلك ربيعة » .. شايفين الأخلاق اللى خلته بالرغم من إنه زعلان بس ما ينقصش من قدر أبو بكر بردو ..

وراح للنبى ﷺ وسأله « ياربيعة .. مالك والصديق؟ » .. فـ حكاله هو كمان .. فـ النبى ﷺ قاله إنه يرد عليه كلمته ويقوله نفس الكلام اللى أبو بكر رضى الله عنه قاله بس هو فضل رافضو .. فقال رسول الله ﷺ « أجل .. فلا تقل له مثل ما قال .. ولكن قل يغفر الله لك يا أبا بكر » .. فـ دعا سيدنا ربيعة بن كعب رضي الله عنه لسيدنا أبو بكر الصديق رضى الله عنه بالمغفرة ... فـ خرج الصديق من عند النبى ﷺ وهو يبكي .. 

وفضل حياته كلها صاحب النبيّ صَلَّى الله عليه وسلم في المدينة وفي السفر والحضر .. فـ يغزو معاه ويروح ويجى معاه .. لحد ما قُبض رسول الله صَلَّى الله عليه وسلم .. فـ ما طاقش يقعد في المدينة من غير ما يكون النبى صلى الله عليه وسلم فيها .. فـ خرج ربيعة رضى الله عنه من المدينة ونزل عند يـَيْنَ وهي من بلاد أسلم .. فـ رجع تانى إلى مسقط رأسه .. كان يتردد فيها ويصلي في مسجدها المبارك .. ويتذكر النبي ويبكي رضي الله عنه ويبكي اللى حوله .. وفضل الحال عَ كدا لحد سنة ٦٣ هجريا .. وفي نهاية السنة توفي سيدنا ربيعة بن كعب الأسلمي رضي الله عنه ..

رضي الله عن ربيعة بن كعب الأسلمى خادم الرسول ومحبه وألحقنا به عَلى خير .. وأقول قولى هذا وأستغفر الله العظيم لى ولكم ..

#غدا_نلقى_الأحبة
#محمدا_وصحبه
#مشروع_قدسية

مواقفه مع زوجاته وعطفه وحنيته عليهم .. مواقف غيرة عائشة رضي الله عنها .. ومواقف اشتياقه لخديجة رضي الله عنها بعد وفاتها .. والدعابات اللطيفة اللى بيتفق فيها عائشة بنت الصديق وحفصة بنت الفاروق رضي الله عنهما .. مواقف انتشار الإسلام واتساعه .. يوم فتح مكة بقا .. أول آذان من سيدنا بلال بن رباح رضي الله عنه وقتها .. شعور الفرحة اللى ملك قلوب المسلمين وقتها .. لأ مش عايزة أتفرج عَ الأفلام التاريخية الفكسانة دى .. أنا عايزة أشوف الحقيقة يارب .. بقا بالله عليكم ذنب إيه في الدنيا يستاهل نضيع قعدة زى دى من إيدينا .. دا مجرد التخيل القلب بيطير من الفرحة والله .. مابالكم بـ لما نعيشها بإذن الله .. القعدة دى أنا مستعدة أدفع عمرى كله وأضحى بأى شيئ مقابل إن أقعدها .. الناس اللى مش متخيلة ازاى مش هنحس!

مش متخيلين يعنى إيه مش هيحسوا بملل في الجنة .. طب إحنا لو قعدنا مع الناس دول ملل إيه اللى نحسه بالله عليكم ! .. الملل دا اللى بنحسه هنا في الدنيا دلوقتى في وسط كل العك والناس اللى مش تمام والمصائب والفتن اللى كل مدى مابتكبر وتكتر علينا .. هى فعلاً « الدنيا سجن المؤمن .. جنة الكافر » .. إحنا مش طايقينها ولا عايزينها بس لازم نفضل فيها .. بس عشان نقدر نجيب تمن الجنة .. لكن بيتنا الحقيقى في الفردوس بإذن الله .. صاحبوا الناس اللى تذكركم بهدفكم الحقيقى كل شوية .. صاحبوا اللى الجنة قدام عينيه دايما .. اعرفوا عن حياة النبى والصحابة عشان يبقي نفسك تشوفهم هناك .. مش تقابلهم هناك وماتعرفيش هم مين دول .. اسمعوا عن الجنة عشان الكلام عن الجنة جنة💙

#غدا_نلقى_الأحبة
#محمدا_وصحبه
#مشروع_قدسية

طب محتاجين صحبة صالحة .. نلاقيهم فين؟

اسمعوا الإجابة بقا في درسين قمة في الجمال د.محمد الغليظ عَ اللينك دا ..

=درس شروط الصحبة الصالحة
https://t.me/Sawteyyat_Mashro3_Kodoseyya/87

=درس مراعاة حقوق الصحبة الصالحة
https://t.me/Sawteyyat_Mashro3_Kodoseyya/88

#مشروع_قدسية

النية الأولى لعبادة الدعاء .. يعنى أول حاجة مثلاً فكرت فيها .. إن المفروض يكون فيه نية لـ ذكر الحمد في يومك .. اسمها نية الحمد لله على نعمة العشر الأوائل من ذي الحجة .. فاكرين لما د.محمد الغليظ كان بيقول الحمد لله إن ربنا هو ربنا؟ .. افتكرته وأنا بفكر وقلت لنفسي .. طب ما العشر كمان نعمة .. لما كنا في رمضان كنا بنقوم ونصوم ونقرأ قرآن .. ودا كان سبب إن إيمانياتنا كان بتعلى .. لكن بعد رمضان؟ .. بدأنا نقل تانى .. طب الله عز وجل الكريم هيتركنا؟ .. حاشاه والله .. رزقنا بعدها بشهرين بس أفضل أيام الدنيا .. ١٠ ذى الحجة أفضل أيام الدنيا أهو .. كأنه سبحانه وتعالى بيقولك .. ماتريحيش وتضيع اللى تعبته في رمضان .. فـ تلحق نفسك وإيمانك تانى بسرعة ..

فـ أنا حسيت بينى وبين نفسي إنها نية عظيمة .. محتاجين نستشعرها في كل صلاة وإحنا بنقول الحمد لله رب العالمين .. وفي أذكار بعد الصلاة .. وإحنا بنقول .. سبحان الله والحمد لله ولا إله إلا الله وهكذا .. تقول « الحمد لله » بقا دى براحة .. وتستحضر نية الحمد لله على نعمة العشر الأوائل من ذي الحجة أفضل أيام الدنيا ..

طب ولما إحنا فهمنا إنها نعمة .. يبقي واجب عليك شكر الله عز وجل عليها .. زى إنك كل يوم بتصلى ركعتين الضحى بـ نية شكر لله عز وجل على نعمة كل سلامى في جسمك .. شكر النعمة يكون باستغلالها فى رضا الله .. طب ازاى؟

يعنى الله عز وجل من عليكِ بـ نعمة الأم أو الأب أو الإتنين .. شكر النعمة دى إنك تبريهم وتحسنى ليهم .. من عليكِ بـ نعمة الأسلوب الجميل وطلاقة اللسان يبقي شكر دا إنك تستخدميهم في الدعوة إلى الله عز وجل .. من عليكِ بـ نعمة البصر يبقي شكر النعمة إنك ماتبصيش على حاجة تغضبه سبحانه وتعالى ..

عشان كدا لما من عليكِ بـ ٣٦٠ سلامى في جسمك .. بـ تشكريه عليهم بإنك تقومى تصلى بالسلامى ركعتين ضحى يوميا .. أو تطلعى ٣٦٠ صدقة من تسبيح وتكبير وتهليل وهكذا .. لما تيجى بقا للعشر تانى نشوف إنى قلت حاجتين .. قلت الحمد والشكر .. طب هو فيه فرق بينهم؟ .. طبعا فيه أومال الله عز وجل اسمه الحميد والشكور ليه ! ..

#نوايا
#الدعاء
#مشروع_قدسية

الشكر بيكون على إحسان حصل من قبل .. يعنى لو اتكلمنا مثلاً في علاقاتنا هنقول .. لما حد يعملك حاجة بتشكره عليها .. ولله المثل الأعلى .. شكر الله عز وجل بيكون على سابق نعمة ليه سبحانه وتعالى .. والمعنى دا بقا بنفهمها من آيات كثيرة على سبيل المثال « ولئن شكرتم لأزيدنكم » .. « وقليل من عبادى الشكور » .. قول النبى صلى الله عليه وسلم « من لم يشكر الناس لم يشكر الله » .. وبردو حديث عجبا لأمر المؤمن لما قال فيه « وإن أصابته سراء شكر فـ كان خيراً له » .. شكر النعمة بقا بيبقي باستخدام النعمة فيما يرضيه .. الشكر بيكون من جنس النعمة .. يعنى لما أحب أشكر الله عز وجل على عشر ذى الحجة .. أجتهد وأقطع نفسي عبادة فيهم وأستعد من قبلها .. ولما أشكر على نعمة عرفة يبقي أجهز دعواتى وأعمل ورد دعاء يومى من النهاردة إن شاء الله ..

الحمد دا بقا مرتبة عالية عن الشكر .. هو إنك تشكر الله عز وجل في السراء والضراء .. عشان كدا أعلى مراتب الصبر على الإبتلاء .. إنك تحمد الله عز وجل على الإبتلاء وتعتبره نعمة .. مش هو بيكفرلك ذنوبك؟ يبقي نعمة .. ودا بقا اتقال فيه قول النبى صلى الله عليه وسلم « إن الله يحب المحامد » ..

وهنا بقا يستحضرنا قول بنقوله في الصلاة بدون مشاعر وهو « سمع الله لمن حمده .. ربنا ولك الحمد » .. مافيش والشكر دى بدعة ولا تجوز قولها .. ربنا بيسمع للحامدين .. يعنى لو عايزة دعواتك تستجاب اتعلمى تبقي من الحامدين .. ودى « المعلومة الأولى » لينا في الدعاء .. ابدأى دعائك بالحمد واقرأى تانى آية في الفاتحة بهدوء ..

وعشان تبقي من الحامدين كمان .. ممكن تعملى تطبيق عملى جميل جدا .. هاتى ورقة مجوز يعنى أربع أوجه .. واكتبى عليها ورقة النعم ..

الورقة الأولى النعم الدنيوية الظاهرة زى مثلا « جمالك/ صحتك/ مامتك » .. الثانية النعم الدنيوية الباطنة زى مثلاً « طيبة قلبك/ تسامحك / سلامة صدرك » .. الثالثة النعم الدينية الظاهرة زى مثلا « النقاب أو الخمار أو الحجاب / ولادتك في أسرة مسلمة / وجود علم شرعى متاح » .. الرابعة النعم الدينية الباطنة زى مثلاً « العشر ذى الحجة / رمضان/ الصحبة الصالحة » .. وكل ما الله عز وجل يفتح عليكِ في نعمة اكتبيها .. واقرأيها قبل كل صلاة عشان آية ٢ في الفاتحة .. واعملى ورد حمد لو حتى ٥ دقائق واقرأيها قبلها ..

#معلومات
#الدعاء
#مشروع_قدسية

1)المكتب بحط الحاجة عليه .. مش محتاجة ذكاوة يعنى .. لكن ممكن أوقات أجيب مخدة فايبر كبيرة وأستخدمها كـ مكتب .. وممكن أفرد الحاجة علي السرير .. وطبعا دا في حالة إن أمى مش موجودة في البيت .. ماحدش يتهور ويعملها وهى موجودة .. بس قعدتك علي المكتب نفسها بتعلمك « التنظيم »

2) الأقلام بكتب بيها رسائل صغيرة بستخدمها فيما بعد لما بحب أعمل رسايل دعوية .. والرسايل دى بحطها في شنطتى لما أتعرف ع حد جديد أخليه يختار واحدة .. أو بستفاد منها لما نعمل أنا وأصحابي ورش لتنظيم حاجات للعيد .. بيبقي من ضمنها الرسائل دى .. هى مفيدة جداً في « الحركات الدعوية » عموماً ..

3) الألوان بظلل الجمل اللى شدتنى في الكلام اللى بقرأه .. وغالبا الجمل دى هى اللى بحطها في الرسايل الورقية .. أو ممكن أحطها شعار ليا في حاجة معينة .. أو ممكن أنزلها استورى واتس .. أو ممكن أحطها علي ورق في أوضتى عشان تحمسنى مثلاً .. يعنى بعتبرها « جمل شعارات » شوية ..

4)كشكول التفريغ .. بحط فيه خلاصة المعلومات اللى قرأتها من الكتاب .. يعنى غالبا بنقل فيه الكتاب حسب فهمى وبضيف عليه التاتش بتاعى .. يعنى ممكن أزود حاجة في دماغى قرأتها قبل كدا أو استنتجتها من كلام تانى وممكن أضيفها لكلام الكتاب .. وممكن أعمل من الكلام دا « ورق دعوى » أو « بوستات للفيس » .. أو علي الأقل ممكن أصوره وأديه لأصحابى .. وبعد ما أموت هتبقي« صدقة جارية »

5) كشكول المعلومات التطبيقية .. بحط فيه خلاصة المعلومات اللى أنا محتاجاها من اللى فرغته .. ومحتاجة أسقط الكلام دا علي شخصيتى .. عشان أبقا أستفيد من الكتاب بجد ويضيف ليا حاجة .. باخد العناوين وأهم النقاط بس .. وببدأ أعمل « خطة إصلاح ليا »من خلالهم ..

6) ببقي جايبة كتاب التفسير دا للسعدى رحمه الله مثلا .. يعتبر أبسط كتاب تفسير .. الطبيعى إن الكاتب هيستشهد في كلامه بآيات وأحاديث ومواقف للنبي .. أنا بقا مابحبش حرف يعدى عليا من غير استفادة .. بعد ما أخلص الكتاب كله .. ببقي مظللة الإستشهادات دى باللون البرتقالي دايما .. ببحث عن الأيات دى بقا في تفسير السعدى .. بقرأها .. بفهمها .. بطبقها .. وأصلى بيها قيام .. وأكررها في صلاة الفروض .. وكدا أبقا اكتسبت « حفظ آيات جديدة » كمان ..

7) طب بالنسبة للأحاديث ومواقف النبي صلي الله عليه وسلم .. ببحث علي جوجل في المواقع الموثوقة بس .. أو على اليوتيوب للمشايخ الثقة بردو .. ممكن تكون الآيات دى أو الأحاديث ليها قصة كبيرة .. ممكن يكون في درس كامل اتعمل على الأية أو الأيتين دول .. وكدا بردو أبقا استفدت منه في فكر الشحن وهو « سماع الدروس » ..

8)الخطوات دى بتتاخد بالترتيب زى ما كتبتها كدا .. ممكن كتاب ١٠٠ صفحة ياخد منى شهر أو أكتر .. بس أبقا أتقنت كل حرف فيه .. وخلال الخطوات دى ماهى شغالة ببدأ أشتغل علي نفسي معاها .. وأشارك استفاداتى دى ع الواقع وعلي النت طول مابقرأ لسة .. وأهو بردو نبقي استفدنا من الكتاب في « الدعوة »

9) دا إنت رايقة أوى .. إيه الخطوات دى كلها؟ .. ولا رايقة ولا حاجة والله .. إنت ممكن تخصصى القراءة دى يوميا من بعد الفجر لحد بعد الشروق بربع ساعة .. وتصلى الضحى وتكملى يومك .. يعنى أقل من ساعتين وكمان بداية اليوم والدنيا هادية ولذيذة .. وأهو نبقى استفدنا كمان« جلسة ضحى » ..

10) تعليق صغير .. مش شرط الكتاب اللى بقرأه يكون ورقى .. ممكن جدًا يكون pdf .. ومش شرط يكون كتاب كبير وباللغة العربية .. أنا بدايتى كانت كتب اللغة العامية .. زى كتب د. مصطفى زايد .. أو تفريغات د. حازم شومان والكتب بتاعته .. يعنى الكتب الصغيرة اللى بالعامية دى .. اشتغل بالمتاح ليك .. اقرأ عشان تبقي إنسان راقى وتختلف عن باقي المخلوقات بجد .. واعرف وافهم دينك وطبقه عشان تقدر تنشره كويس ..

**

#مشروع_قدسية

@Mashro3_kodoseiia

ولسان المرابطين في باحات الأقصى الآن تردد:

"سنظل في جبل الرماة وخلفنا .. صوت النبي يهزنا لا تبرحوا"

- مقتبس
#مشروع_قدسية
#وأن_سعيه_سوف_يرى

تغطية مباشرة للأحداث على هذه القنوات .. فـ تابعوا الأخبار مباشر من هنا :

قناة القسطل
https://t.me/AlQastalps

إعلام فلسطين
https://t.me/Gaza65N

سلاح الإشارة
https://t.me/sellahaleshara


وكالة شهاب
https://t.me/ShehabTelegram

القدس تألمها الجراح
https://t.me/alqodsstj

محمود الشريف
https://t.me/Elshareef_mahmoud

حسن اصليح
https://t.me/hpress

ميدان القدس
https://t.me/MaydanAlquds


@Mashro3_kodoseiia

#مشروع_قدسية

خلينا نستغل التهاب الأحداث وندل الناس علي مصادر يفهموا منها اللي بيحصل ويكونوا علي وعي بالقضية الفلسطينية عشان مش يومين وتلاتة والمسلمين يناموا تاني ..

بوست تلخيص لقصة فلسطين

كتب ودروس عن قضية فلسطين

#مشروع_قدسية

لو نفسك بجد تحرر الأقصي ..

حرر نفسك من احتلال هواك.

#مشروع_قدسية

خلينا نستغل التهاب الأحداث وندل الناس علي مصادر يفهموا منها اللي بيحصل ويكونوا علي وعي بالقضية الفلسطينية عشان مش يومين وتلاتة والمسلمين يناموا تاني ..

استغلوا الأحداث دي وفوقوا للقضية وانشغلوا بيها .. ابحثوا واقرأو واعرفوا إيه اللي بيحصل وازاي نواجهه وإيه دورك في الموضوع .. لازم تخلي ليك وقت حتي لو أسبوعي تقرأ فيه أو تسمع عن أمتك .. النبس صلي الله عليه وسلم قال « من لم يهتم بأمر المسلمين فليس منهم » .. دول إخواتنا .. لحمنا ودمنا .. لازم نفهم ازاي ننصرهم ودا مش هنعرف نعمله غير بعد وعي لأبعاد القضية ..

حالا هات ورقة وقلم وحدد هتختار كتاب إيه أو درس إيه هتبدأ تتعرف علي تاريخ أمتك من خلاله .. وحدد وقت ثابت من اللحظة دي .. وخليها عادة عليك أسبوعيا .. دلوقتي فلسطين وبعدها هات تاريخ الأندلس عشان التاريخ بيعيد بعضه .. وبعدها ابدأ شوف إيه اللي بيحصل في سوريا وبورما والشيشان والإيغور والمسلمين في كل مكان ..

انشروا البوست دا في كل مكان وخلي شباب الأمة يفوقوا .. لعل حد يشوف عن طريقك ويفوق وهو اللي يفتح الأقصي علي إيده .. جاهدوا معهم ما استطعتم.

بوست تلخيص لقصة فلسطين

كتب ودروس وسلاسل عن قضية فلسطين

#مشروع_قدسية

هنبدأ في إعداد العُدة من جديد💪🏻

رمضان خلص بس لسه معانا ذي الحجة ، لسه في فرصة للي ضيع رمضان إنه يعوض ولسه في فرصة للي اسثمر رمضان إنه يزيد .

العشر أيام دول أهم من رمضان بل أهم مافي حياتك.

قال رسول اللـه : "ما من أيامٍ العملُ الصَّالحُ فيها أحبّ إلى اللهِ من هذه الأيام
قالوا : يا رسول الله، ولا الجهادُ في سبيلِ اللهِ ؟ قالَ : ولا الجهادُ في سبيلِ اللهِ
إلا رجلٌ خرجَ بنفسِهِ ومالِهِ ثمَّ لم يرجِعْ من ذلكَ بشَيءٍ" رواه البخاري

كل يوم الأثنين والخميس هنزل هنا علي القناة .. مقطع نتربي فيه علي عبادة الذكر والدعاء ونعرف أسرارهم .. والمقطع هيكون من ربع ساعة لنص ساعة .. وممكن يكون معاه تفريغ كتابي للمقطع .. بحيث تكون حاجات خفيفة زي كدا ومناسبة مع فترة الآمتحانات دي ..

فـ هل من مشمر ؟

@Mashro3_kodoseiia

#مشروع_قدسية

https://t.me/Mashro3_kodoseiia/4032
شوية كلام عن المذاكرة إنمااا ايييي، يخلوك تاكل الكتاب اكل 😌😹💚.

مجلس شامل وكافي نقطة الغيبة اللهم بارك .. ركزو فيه جدا وورقة وقلم اكتب كلامه كدا .. وخد قرارات هتكلم مين تستسمحه ومين هتتصدق عنه ومين هتدعيله .. لازم يطبق بما إننا في شعبان وهترفع أعمالنا وصحائف السنة فيها ..

جزي الله د.أحمد العربي خيرًا علي هذا المجلس الطيب ونفعكم به ..

اللي هيبادر بقرارات طيبة في نقطة الغيبة وإحنا في شهر شعبان كدا يفرحنا ويشجعنا علي البوت ..

#مشروع_قدسية

@Mashro3_kodoseiia

تعليقًا علي البوست دا عشان كم التعارض اللي حاصل من ساعة ما نزلته .. هقول رأيي بالأدلة ومش هدخل في نقاش مع حد تاني فضلًا.

لما سُئلت السيدة فاطمة الزهراء رضي الله عنها : ما خيرٌ للمرأة؟

قالت : (ألا ترى الرجال ولا يراها الرجال)!
فأكيد من بابِ أولى للمرأة إنها ماتنشُرش صور للرجال ..


أولًا : حكم التصوير ونشر صور الرِّجال والنّساء دون مصلحة ولا حاجة .. قال عنه ابن عثيمين رحمه الله في الفتاوى رقم : 136378

« أن التصوير في الأصلِ عليهِ خلاف ، فإن كان التصوير فيه خلاف ، فنشر الصور بلا فائدة هذا جدير بالمنع لما قد يترتب عليها من مفاسد ..

ولقول رسول الله صلى الله عليهِ وسلّم :
يا عليُّ ! .. لا تُتبعِ النَّظرةَ النَّظرَةَ، فإنَّ لَكَ الأولى ، ولَيسَتْ لَكَ الآخرَة »

الأولى هي اللي بتشوفيها دون إرادتك .. مش اللي تفعليها بكامل رغبتك .. زي إنك فجأة في مكانٍ ما فيقع بصرك على رجل أو يقع بصر رجل علي امرأة دون قصد ..
بِخلاف إنك تعرفي إن المكان دا فيه رجل فتبصي ليه بكامل رغبتك.


ثانيًا : حكم احتفاظ المرأة بصور الرجال على التليفون [ حتّى لو كان شيخ أو داعية أو علَّامة ] ونشرها الصور دي ..

قال ابن عثيمين والشيخ عبدالعزيز الطريفي
لا يجوز ذلك .. ونشرها لـ دا يؤدي إلى فتنة غيرها فتبدأ مرحلة الأعجاب والتعلّق وإطلاق البصر ..


وفي النِّهاية ..
لو رجعنا لمفهوم غضّ البصر :
فهو يعني منع العين من النظر والتأمل ..
فـ ازاي أتأمّل حال فلان .. وشكله .. وملامح وجهه .. وقد إيه باين علي ملامحه الأسي والظلم وبعدين أقول ( أغض البصر عنه) ؟

إن كُنتِ تأمنين الفتنة .. فانشريها لكِ فقط .. فغيرك يُجاهد نفسه ألا يُفتن ..

ثمّ .. إيه الفائدة في نشر الصور دي؟
تُحرر سجين ؟
تنقذ غريق ؟
هتنفعك بإيه ؟
تضاف إلى صحيفتك حسنات ولا سيئات من وجهة نظرك يعني ؟

الرسول ﷺ لما سألوه عن نظر الفجأة .. قال: اصرف بصرك ..

وإنتو تنشروا صورة حتي لو حزينة وتُطيلوا النظر فيها بكامل الرغبة ازاي ؟

وزي ماقال الشيخ محمد الغليظ :

أسمى مجاهدة هي مجاهدة غض البصر .. لإنها بتطهر القلب .. إنتِ بإطلاق البصر تعتبري أسيرة الشهوات.

وإطلاق البصَر يسلبُ منك حلاوة الإيمَان.

أي بنت بتجادل في نقطة غض البصر دي باركَ الله فيها ولكن الشيخ أو الداعية أو العلّامة أو السجين مش تايه عشان ننشر صوره فندور عليه.

#مشروع_قدسية

@Mashro3_kodoseiia

اسألوا عَ دين بعض من وقت للتانى يا جماعة .. الزمان دا كفيل بتغيير أي قلب مهما كان ثبات صاحبه!

كنت بكلم صديقة ليا في التليفون الصبح .. وهى أخت ليا كنت بغير جدا من صلاحها وعطائها للدين .. فـ لمست في كلامها تهاون وفي دينها كثير من اللين .. وأغلب سقطاتها بدأت في تهاونات الخطبة ..

وزارني أخت ليا أحسبها ع خير كانت لا تتهاون في النوافل تماما .. اللهم بارك سنن رواتب وسنن غير مؤكدة .. وتلاقي كل فرض تصلى سنن قبله وبعده غالبا .. والضحى ٨ ركعات والقيام الثلث الأخير كله حرفيا .. وجاتلى تشتكيلى من نفسها إنها وصل بيها الأمر إنها تجمع الصلوات آخر اليوم ..

وصديقة كانت معايا في ثانوى مختمرة وأحسبها ع خير .. ماشفتهاش من زمن واتقابلنا .. شفت في وجهها انطفاءة لم أعهدها من قبل .. ومجرد ما اتكلمنا سوا قعدت تبكى وتشكيلى إنها فضلت تقع في فيديوهات وبعدها رجعت للأفلام وبعد كدا مسلسلات .. وتهاونات كتير لحد ما حاليا أدمنت الأفلام الإباحية وبتتفرج عليها شبه يوميا ..

وطبعا ناهيك عن كثير من أحبتنا اللى زاد ترخُّصهم في أمور الدين عموما .. والفتن اللى عمالة توقعهم ورا بعض .. لحد ما بقيت مرعوبة وأصبح جل دعائي من كتر اللى بيواجهنى : اللهم ثبتنا وسلم يارب سلم ..

ولما رجعت لـ نفسي لقيت المشكلة سببها حاجتين .. إما إن الواحد كان سايب نفسه بدون ما يتسند على شيء يمنعه من التمرغ في وحل الفتن .. وما حصنش نفسه بجدار إيمانى كويس زى ارتباطه بدار تحفيظ أو معهد علوم شرعية أو صحبة صالحة ..

أو السبب الثاني انشغال المصلحين عن بعضهم .. لدرجة إن ما بقاش فيه كلمات إخواتنا في الله اللى كانت بتذكرنا بالله عز وجل .. ولا رسائلهم اللى تفوقنا من الغفلة .. مابقيناش نتصل بعت رسائل ونهتم بدين بعض .. فـ تلاقى اللى كان ثابت امبارح وعنده لياقة إيمانية اللهم بارك بقا ضعيف جدا وبيثبت نفسه بالعافية .. ومش قادر يعين حد أصلا ..

السلف رحمهم الله كانوا يسألوا ع إخوانهم كل شوية .. يسأله عن آخرته خوفا عليه من ضياع الإيمان .. ويسأله عن دنيته خوفا عليه إنه يكون محتاج شيئ أو عايز حاجة وهو في وسط الأحباب والإخوان!

ورحم الله عمر بن الخطاب رضي الله عنه .. لما عرف إن صاحب ليه تدنى في إيمانه لحد ما شرب الخمر .. بعتله بدايات سورة غافر وقعد يذكره بالله عز وجل لحد ما رجع ..

اطمئنوا على بعضكم .. وتفقدوا إخواتكم .. هاتوا ورقة وقلم واكتبى أسمائهم كلهم .. وقسميهم خلال الشهر إنك تكلمى كل واحدة مرة ١٥ دقيقة في الشهر حتى .. لو لقيتيها على الطريق اللهم لك الحمد ثبتيها .. ولو لقيتيها بدأت تتزعزع اسنديها لحد ماتقف تانى وتثبت .. وإن لقيتيها وقعت في وحل الذنوب خالص ذكريها برحمة ربنا سبحانه وتعالى ومغفرته ..

لو عملتى يوميا الـ ١٥ دقيقة دى .. اللى يعرفك وكلمتيه هيشوفك سند .. لو في يوم من الأيام لقي نفسه بيقع هتكونى أول واحدة تفكر تلجألها عشان تعينها ع نفسها .. هتكون مكالمتك دعوة إلى الله وتعاون ع البر والتقوى .. ومحبة في الله وإيثار من باب لا يؤمن أحدكم حتى يحب لأخيه ما يحب لنفسه .. ونوايا عظيمة جدا .. ومع ثباتك على المكالمة دى هتلاقي ربنا بيزيدك ثبات بكل كلمة ثبتى بيها واحدة من صاحباتكم .. وكفاية عليكِ أوى أن الجنة لا يطيب نعيمها إلا وإنتم مع بعض .. لأننا بنحشر « زُمُــــرًا » يعنى جماعات وإخوة ..


فما آخاك أخوك لتلاطفه وتؤاكله وتمازحه عند النعماء .. وإنما لتؤازره في أمر دينه ودنياه عند الشدائد والأنواء!

#مشروع_قدسية

@Mashro3_kodoseiia