هذا البوت يحتوي على الملازم الوزاريّة

كل اللي عليك، تبحث بالبوت عن اسم خالد الحيالي، وتطلعلك جميع وزاريات المواد على شكل ملزمة PDF

@EDIRQBot

الخطة الدراسيّة، السادس دفعة 27 .

بالبداية، انطيك تعليمات، لازم تلتزم بيهم

اولاً_ الالتزام باليومي، يعني ما يعبر يوم وانتَ ما تقرا، راح تحس انُ هالشي صعب، لكن لا! إذا سويت نظام لنفسك، راح يكون سهل !

ثانياً_ شلون اسوي لنفسي نظام؟
يعني تخلي وقت للدراسة، وقت تتونس بي، وقت استراحة، بختصار نظم وقتك، لا تصير عشوائي نهائياً، ممكن تستهزئ بهاي التفاصيل، لكن خلال خبرتي ويَ الطلاب، شفت النظامي شلون هادئ وملتزم وباله مرتاح، وشفت العشوائي شلون مخربط ومبهذل وما يلتزم ولا يقرأ و24 ساعة ما الحگ وما الحگ
فَ ضروري تكون نظامي، ولا تصير عشوائي .

ثالثاً_ قرايتك يومياً لازم تكون من 2-5 ساعات، كافي و زايد هم .

رابعاً_ لا تگول ما الحگ، واترك السلبيات، والتزم باليومي، تعريف واحد لا تأجلة على باچر، واترك سالفة انُ باچر ابلش، لأن باچر يجر باچر، وتخلص السنة وجنابك كلشي ما مسوي، فَ بكل بساطة، كون هادئ والوضع طبيعي وابد ماكو لا خوف ولا قلق، ولا تنطي الموضوع اكبر من حجمة

خامساً_ لا تتهاون ويَ أي مادة، ترى كارثة التهاون هوَ اللي وگع هواي طلاب وخله البعض يعيد والبعض يطيح معدلة، فَ أي مادة تشوفها انتَ سهله بالعكس ادرسها و ركز عليها اكثر حتى تضمن بيها درجة .

سادساً_ خطك ثم خطك ثم خطك ثم خطك
صدگني بالوزاري لو مو جوابك صح، إذا خطك مو زين يحطلك صفر بدون ما يناقشك عليها .

تعليمات عن المواد .

الاسلامية.
تعتمدها ملزمة ويُفضل على ملزمة ساجد العگيلي، ولازم اسبوع موضوعين والأسبوع اللي بعده ثلاث مواضيع، بهيج طريقة، خلال 10 اسابيع تختم الاسلامية .

ادب العربي.
نفس الطريقة، الاسبوع الاول ثلاث مواضيع مواضيع، الاسبوع الثاني موضوعين .
ارتبلك الوضع اكثر، الجمعة والسبت لا تقرا ادب او اسلامية، قرائتك تكون، يوم ادب ويوم اسلامية، لكن تركز، الاسبوع الاول موضوعين ادب، وثلاث مواضيع اسلامية، الاسبوع الثاني، ثلاث مواضيع ادب، وموضوعين اسلامية

قواعد العربي .
ضروري ورقة وقلم!
لازم تلخص القواعد بيدك، شلون الخص؟ بختصار، المدرس اللي انتَ تقرا عليه، تكتب اللي هوَ يكتبه الك، ورا ما تكمل، تبدي تحل وزاريات، راح تگلي هواي ؟
اول شي لازم تحل بنفسك كم سؤال، والبقية من تشوف بيهم فكرة، اكتبها على شكل ملاحظة لا تحل السؤال، هاي افضل طريقة للقواعد .

الانگليزي .
اعتمادك الكُلي على كتاب النشاط
قطع الكتاب، الادب، التوصيلات، الاسقاطات التمارين إلى أخره، ما يجيك شي خارجي بالامتحان الوزاري
اما بالنسبة للقواعد، ايضاً لازم تلخصهم ورقة وقلم، فائدة الك صدگني، لازم تدرس نفسك على الكتابه لأن الانگليزي غدار حتى لو حافظ الكلمة يمكن ما تعرف تكتبها، فَ تدرب على هذا الشي .
والتلخيص يكون، إذا انگليزيتك ضعيفة، فَ تلخص من محاضرات الاستاذ اللي تقرا عليه
واذا انگليزيتك قوية، تلخص من الملزمة وبالدفتر، والأفضل الك تعتمد على ملزمة محمد العبيدي لان ما بيها نقص حرف، راح تگول جا ليش الخص إذا ملزمة، تكدر ما تلخص بس لازم تدرب ايدك على كتابة الانگليزي

الرياضيات .
كلش حلوة هاي المادة، وسهلة اسهل حتى من الاسلامية، فقط اللي عليك شي واحد، اول شي اختار استاذ صح، وموجودة بملزمة كل الاساتذة أمثلة لازم وضروري منك تحلها، كـ نصيحة، ملزمة حيدر عبدالائمة افضل خيار لهذا الشي، يعني تحل الاسئلة اللي بيها، لان جامعلك كل الافكار بملزمته، وبقية الاساتذة ايضاً ما مقصرين ومسوين هاي الحركة
لكن المهم منك تحل بيدك، لازم تحل ورقة وقلم إذا بس تباوع كلشي ما راح تستفاد

تعليمات عن المواد .

الكيمياء .
مسائلها لازم تلخصهن ورقة وقلم، لأن هواي والأفضل الك هذا الشي، صح مسائلها سهله وبسيطة، بس مشكلتها هواي، فَ الأفضل الك لخص القوانين وطرق الحل ورقة وقلم، وبعدها أي موضوع تقرا لازم تحل اسئلته بيدك، منين تجيب الاسئلة؟ ايضاً ملازم الاساتذة ما مقصرين حاطين الك مسائل بجميع الافكار، عندك الاستاذ حيدر عباس او حسين الهاشمي وغيرها
وبالنسبة لـ الكلاميات، ما بيهن شي، قليلات وسهلات كلش، تعتمد على ملزمة استاذك، وتذكر نقطة مهمة، الكلاميات تجي بس وزاريات نادراً كلش يجيب افكار جديدة، اصلاً صارت مستحيلة وما يجيب بس وزاريات بشكل عام بالكيمياء .

الاحياء .
هاي المادة لازم فهم، بدون فهم كلش ما تستفاد، واكو اساتذة خير من الله يفهمونك بكل الطرق، ابرز استاذ هوَ مصطفى الحافظ، يفصلك الموضوع تفصال، وما مقصر بشرحة نهائياً، وتگدر على ملزمته او ملزمة سالم المنصور، لكن انتبه على نقطة! ورا ما تقرا أي موضوع وتكملة لازم تقرا وزارياته، الأفضل على وزاريات خالد الحيالي، اللي موجودة بالبوت تحصله بالقناة فوگ .

الفيزياء .
اكثر مادة تنتبه عليها!
هاي المادة تعثرك فَ كلش انتبه و ركز عليها، يعني اول شي المسائل، حيل سهله بس اول ثلاث افصل شويه بيهن لوفات، لكن بقية الافصل مال ابتدائية وكلش بسيطات، المهم لازم تقرا أساسيات المسائل ولازم تلخص القوانين والملاحظات بورقة وقلم حتى تخفف على نفسك ضغط، ولازم تحل الاسئلة بيدك، منين اجيب الاسئلة؟ ملزمة الاستاذ حسين محمد بيها مسائل تحلهن، واكيد الملزمة تحصلها داخل البوت اللي موجود فوگ، والكلاميات ركز اكثر شي على الوزاريات واسئلة الفصل، ولازم الوزاريات تكون من 2013 فما فوق بحكم انُ المنهج تغير، اصلاً ماكو استاذ حاط وزاريات سابقة لان بعد ما تجي، إلا الاهم ياخذون بس افكار بسيطة منهم .

اول سنة الك بالسادس
او مُعيد، لكن تداوم مدرسة .

بعد تلتزم ويَ مدرستك، وعلى جدولهم، وشنو تاخذة بالمدرسة، ترجع تقرا بالبيت وضروري تراجعة اكثر من مرة !

الموضوع اللي تقرا، لازم تقرا جميع وزارياته! الفائدة من الوزاريات تخليك تتعود على نمط الامتحان الوزاري حتى ما تستغرب من تدخل الامتحان وما تكول اكو سؤال خارجي .

لازم تتقدم على مدرستك، من خلال هاي الطريقة، قريت المواضيع اللي اخذتها بالمدرسة؟ ضبطتها؟ قريت وزارياته؟
تحول على الموضوع اللي بعده، ايضاً بنفس الطريقة، تفهم الموضوع وتحل وزارياته، حتى من تروح للمدرسة، راح تكون بس مراجعة الك، لان انتَ قريته وفهمته، وتلتزم بهذا الشي، و راح تتقدم اكثر واكثر بالمادة إذا التزمت، وبنفس الوقت المدرسة راح تكون بس مراجعة للمواضيع اللي قريتها .

اول سنة الك وتريد تسوي انتساب .

هنا راح تحتاج ساعات دراسة اكثر، بحكم انك ما راح تداوم مدرسة، فَ ساعات قرايتك 8-10 ساعات، ايضاً مو هواي إذا جزئتهن، ساعتين الصبح، ساعتين الظهر، ساعتين العصر، ساعتين الليل، وتگدر تزيد لكن لا تنقص!

بحكم انتَ اول سنة، فَ لازم تقرا محاضرات اساسية، خاصة إذا انتَ ما قاري، فَ هلشي كلش راح يساعدك إذا سويت انتساب و التزمت باليومي .

لازم تسوي جدول تثبت عليه لنهاية السنة، وطبعاً تطمن راح اعلمك تسوي جدول يناسبك وجدول قوي هم وبدون ضغط .

بدايتك إذا كانت صح، النهاية راح تكون جميلة، يعني لا تتهاون ويَ المواد، اقرا على راحتك، وحل الوزاريات، وافهم المواد و كررهن اكثر من مرة، والتزم باليومي، ولخص مثل ما ذكرتلك سابقاً حتى توفر على نفسك وقت وجهد

مُعيد وتريد انتساب .

إذا انتَ مُعيد وعندك فكرة عن المواد فَ هذا الكلام الك، بينما إذا ماعندك فكرة عن المواد او ما قاري بالشكل المضبوط، فَ تتبع الخطة السابقة

اما انتَ مُعيد وعندك فكرة عن المادة وطبيعتها وضغطها، انتَ هنا ما راح تحتاج تقرا محاضرات اساسية
تحتاج اولاً تضبط اساسيات المواد
يعني اساسيات العربي والانگليزي والرياضيات والكيمياء والفيزياء

وبعدها تعتمد على المراجعات المركزة، أسهلك وابسطلك وخاصة مراجعات دفعة 26، مراجعات مضبوطة بنسبة 100% وكلش راح تناسبك .

ايضاً تتبع طريقة التلخيص وتحل الوزاريات بعد ما تنتهي وعلى فكرة هيج تكدر تضبط المادة بشكل اقوى حتى من المحاضرات الأساسية، وهلشي راح يساعدك، ويوفر عليك وقت و جهد وتعب، لكن أنبهك على شغلة
من توگف عد موضوع وتحس نفسك مو فاهمة، كل اللي عليك تروح على المحاضرة الأساسية لهذا الموضوع و تقراها وبس، وماكو أي مشكلة

اما بالنسبة للجدول .

جدولك يُفضل يكون كل يوم مادتين

+ ثابت يوم اسلامية و يوم ادب مثل ما اتفقنا سابقاً، وگلنا الاسلامية والادب فقط من الأحد إلى الخميس، لكن ماكو الجمعة والسبت

+ الجمعة مُراجعة شاملة لكُل شي اخذته وقريته خلال الأسبوع، وهلشي ثابت بدون نقاش! لأن إذا ما تكرر، كلشي ما تستفاد من قرايتك

ونقطة مهمة ‼️
مادتين كل يوم، يعني المادة من 3-4 محاضرات .

توضيح اكثر .

من السبت إلى الخميس
كل يوم مادتين

من الأحد إلى الخميس اسلامية وادب فقط

وبالنسبة للأساتذة (مُجرد رأي)

الاسلامية، ساجد العگيلي
العربي، مازن الهلالي
الانگليزي، محمد العبيدي
الرياضيات، حيدر عبدالائمة
الكيمياء، حيدر عباس
الفيزياء، حسين محمد
الاحياء، مصطفى الحافظ + ملزمة سالم المنصور

هذول اكفئ اساتذة السادس، ينطون المادة حقها و زايد هم .

تنويه بسيط ‼️

• اللي يگلك فلان استاذ عنده نقص
فَ هذا جاي يسوي اعلان براسك
ماكو مُدرس عنده نقص بشرحة .

• ماكو شي اسمة انتَ تقرا على جدول، ومدرستك جدول، تلتزم ويَ جدول مدرستك لا تخربط من البداية وتضّيع نفسك .

• الحگ لو ما الحگ
هاي الكلمة لو طلعت منك، لا تحلم بحياتك انُ تنجح بالسادس، مو انوب تطلع معدل، انتَ يعني استغفرالله عندك علم الغيب واحنا ما ندري؟

• ماكو شي اسمة السادس حظ
السادس التزام، تلتزم تجيب احلى وأعلى معدل، بس ما تلتزم وتسخت وما تقرا بصورة صح، ما راح تجيب مُعدل

الافصل والوحدات اللي لازم تكملهم قبل نصف السنة .

•الاسلامية
الوحدة الاولى والثانية والثالثة

•العربي
الاستفهام والنفي وأدب الجزء الاول
* البعض ياخذ التوكيد

•الانگليزي
الوحدة الاولى والثانية والثالثة والرابعة

•الاحياء
الفصل الاول والثاني والثالث
* البعض ياخذ الرابع لأن يُعتبر فصل قصير

•الرياضيات
الفصل الاول والثاني والثالث
* البعض ياخذ السادس

•الكيمياء
الفصل الاول والثاني والثالث

•الفيزياء
الفصل الاول والثاني والثالث والرابع
* البعض ياخذ الفصل الخامس

مُبادرة جداً حلوة من الاستاذ حيدر عباس
و راح تفيد هواي طلاب، وطبعاً كل سنة الاستاذ يثبت امكانيته بالمادة لا يعقد الامور ولا محاضرات مطوله .

https://youtu.be/pkAAdu7k40M?si=BWLxMPCKWNOVYHGU

حبيت أحفزكم شويه، بعد تدرون بيه احبكم🫰🏻.

طريقة المهام، افضلك من الجدول
ومُفيدة اكثر وتصلح لجميع الطلاب

يعني تكتب بورقة وقلم، المواد اللي تريد تقراها و المواضيع او المحاضرات اللي راح تقراها، راح تكون عندك مهمة انُ لازم تخلص هاي المواضيع .

هاي طريقتي تگدر تتبعها وتگدر تتبع الجدول
فَ الك حرية الاختيار .

0️⃣التربية النيابية: المدارس الإلكترونية حل بديل للطالب عن ترك مقاعد الدراسة.

نگدر نگول حالياً، انتهى الامل انُ الانتساب يرجع مجاني

ما مضوجني إلا الأشخاص اللي طلعوا يبررون وانُ عادي سجلوا بالمدرسة الإلكترونية، لكن البي حظ صدگ ما يرضخ للوزارة ولا يسجل عدهم .

ملاحظة سريعة ‼️

هذا الكلام مو مني، وانما توصيات وزارة التربية للمدارس انُ لازم قبل نصف السنة مكملين هاي المادة، حتى أبري ذمتي لأن ما شاء الله كمية المسبات اللي جاي تجيني بسبب هذا الشي لا تُعد ولا تُحصى

عموماً الله يهدي ويسامح الجميع و ربي يكتبلكم التوفيق بحق محمد وآل محمد .