اجيتك مِن بعد غُربة
اجيت بليلة گمرية
هذاك اني نَبع صافي
يخايب دغش ما بيه..
اجيت انثر عتب بالعين
عَتب عاشِگ بحنية
واگلك هَجرَك شسَوه
لون أدري فلا أهوى.

شلون ما كل جو اله طقس معين او اكله معينة
الليالي المقمرة بالصيف طقسها هاي الأغنية وشرط بدندنة ناصية بالحديقة وصفنات مُطولة ع السما وعلى منظر البدر..

ومرات أغنية "حَبينا ضَي الگمر
والگمر ناسينا.. احنا الگضينا العمر عمرين بسنينه"

قبل ٥ سنوات تقريبا جنت اطلع اتمشى وي بابا وماما من تصير گمرة ويتلطف الجو بالليل
وبابا ياخذنا لمنطقة مفتوحة نتمشى بيها ويمها نهر
تبقى مسافة بيني وبين اهلي أبقى اتمشى على كيف وادندن بهل أغاني وكلشي داير مدايري يكون ساحر لدرجة عبالك مو حقيقي رغم بساطته
صوت الأزيز مال حشرات الليل
ونعومة التراب اليدخل من الصندل
الظلمة الي ما كاسرها غير ضوه الگمر الخفيف والسما الواضحة وريحة الماي..
شگد جانت نفسي صافية وتحب الحياة بفترتها!
شوكت صار كل هذا مادري ومنين دخلت كل هالسنين المُتعبة.

كان يكفي أن تمسحي شفتيَّ بطرف سبابتكِ لكي لا يعذّبني النطق.
بسام حجار.

خل احچيلكم بموضوع قبل لا أنام.. اعتبروه مقال عابِر
أو سوالف قبل النوم، او حتى راديو عشوائي يشتغل وره ١٢
(چان حلمي اشتغل براديو واحجي بمواضيع🤣)

"الحُب بمنظور نَفسي وقرآني والعلاقة الصِحية"

هسه تكولون اهو هم حُب هي شنو الحياة مابيها غير طركاعة الحب.. اتفق وياكم تمامًا لكن ما ننكر ان الإنسان دائما بحاجة للعاطفة ويبحث عنها بشكل مستمر حتى وإن كان لا يعاني من أي مشكلة بهل جانب يبقى يفتقر لأنيس أو شريك
وبما انه اغلب الي بنسيمي بنوتات وناس دتجرب الحياة ستوها وناس بعُمر تعتبر هالمشاعر هي كُل الحياة وكل الوجود
ف گلت اشارك وياكم الي مقتنعة بي والأشياء الي تعلمتها بخصوص هالجانب

نبدي بسم الله..

قصة إمراة العزيز لمن انذكر لفظ الحب بالقرآن انذكر بهل صيغة

﴿قَد شَغَفها حُّبًا﴾
فانذكر هنا على انه حالة اندفاع غيبت عقل امرأة العزيز
ولو نجي نباوع ع الحب نفسه ف ح نلگه انه الحب نفسه عبارة عن اندفاع عبارة عن إدمان سلوكي
(مرة نشرت بنسيم موضوع انه تأثير الانفصال يشبه تأثير الإقلاع عن المخدرات)

ف المعنى الديني والعلمي لهل آية قد شغفها حبا
الشغاف هنا هو غطاء رقيق يغطي الگلب
يعني دخلت مشاعر الحب واخترقت الگلب والشعور والإدراك الي يخلينا نفكر ونتخذ قرارات سليمة
والنتيجة النفسية والحياتية الي عادت على إمرأة العزيز بسبب هالشعور
فقدت مكانتها الاجتماعية تماما
عمت، وخسرت كلشي بحياتها تقريبا
فالاندفاع والمشاعر والحب هذا
خلاها تراوغ، وتكذب وتظلم.. الخ

فحبها هنا سوه تغييب لعقلها
اندفعت سلوكيا انعمت قراراتها السليمة وتعلقت تعلق مرضي..

من ناحية ثانية رب العالمين شيگول بغير آية

﴿وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً﴾

ف خل نجي نحللها ونعرف شنو الركائز الأساسية الي تنبني عليها العلاقة
اكو نظرية نفسية إسمها مثلث الحُب، وهي نظرية قائمة على ٣ أضلع رئيسية وبدونها ماكو علاقة صحية

الأول : الأمان البايلوجي
انو جهازك العصبي يكون مستقر وبحالة أمان تام وي هذا الشخص
ولو تجي تربطها بالآية الكريمة حتلگى انه هو هذا "السَكن"
بهل حالة من يسترخي جهازك العصبي، العصب الحائر ح يدز اشارات للجسم بأفراز هرمونات الراحة وتقليل هرمون الكورتيزول او هرمون التوتر
وهالشي عكس حالة الحب الي گلنا عليها "حالة اندفاع"

بحالة الحُب حيصير افراز عالي للدوبامين والادرينالين فتحس گلبك يدگ سريع وانك متوتر
وتظل تجيك شكوك ومخاوف
خوف من زوال الشعور او غياب الشخص وشعور غياب السَكينة.

الضلع الثاني لنظرية مثلث الحُب هو المَودة
ومثل ما ذاكرتلكم تعريف المَودة قبل هي ما سَكن القلب من شعور وبان في السلوك
يعني أني اودك معناها انت عزيز عليه مو فقط بالكلام وانما بسلوكي وبكل تصرفاتي
واسوي كلشي يثبتلك هالشي من مراعاة وتقدير واحترام واحتواء

والضلع الأخير هو الرَحمة:
الرحمة هي شبكة الأمان لمن تنهار المشاعر
المشاعر مُتقلبة ومُتغيرة ومو ثابتة، تتغير بتغير الهرمونات أو الظروف او هواي أشياء
ممكن تبهت وممكن تتعب
والرحمة هنا هي صمام الأمان للعلاقة
يعني حنبقى رحيمين وعطوفين ببعض حتى بأسوء الحالات
والرحمة بالعلاقة هي قدرة الطرف الآخر على استيعابك واحتوائك حتى بأوقات انطفاءك.

والدقة الألهية هنا گال لتسكنوا إليها ما كال لتسكنوا معها

مع يعني المُجاورة يعني هم سوه مجاورين في الزمان والمكان ولكن منفصلين نفسيًا
وهالشي نشوفه بهواي علاقات
انهم بعيدين رغم قرب المسافات بينهم ورغم يوميا سوه بس كل واحد بعالم

لكن لتسكنوا إليها
إلى هنانه هي انتهاء الغاية والاندماج التام
ف سكنت اليه يعني چنت بحالة تعب وحركة ومجهود وضغط
واجيت لهذا الشخص سِكنت اله
يعني لگيت سكينتي يمه
معناها هو الملجأ والملاذ من كل تعب الدنيا الي يرتاح يمه كلشي بيه.

ف قبل ما ندور قصة حُب ملحمية تستنزف كلشي بينا
خل نفكر، هل هذا الشخص الي اگول اني دا احبه
هو شخص أكدر الگى سكينتي يمه؟
ترتاح يمه روحي بنص هوسة الدنيا؟

وتعيشون وتسلمون..

-"إلهي
في المرة المقبلة
اجعلني نهرًا أخضرَ الضفاف
شجرةً تحطّ عليها العصافير
صلاةً في ليل الأمهات
‏أو لحظة استجابة."

لَيْسَ الغَريبُ غَريبَ الشَّامِ واليمنِ
إِنَّ الغَريبَ غَريبُ اللَّحدِ والكَفَنِ
إِنَّ الغَريِبَ لَهُ حَقٌّ لِغُرْبَتهِ
على الْمُقيمينَ في الأَوطانِ والسَّكَنِ

نسيت اكتب انه الابيات للإمام زين العابدين عليه السلام

وهالأبيات هنه أساس قصتي القصيرة الجديدة ان شاء الله

هاي قصتي السابقة بالمناسبة، فزت بيها بالمركز الأول على جامعتي.