صباح الخير يا إنسان

عادي تضيع وتحس بالسوء بس تذكر انُ اكو بوصلة موجودة بداخلك هي وحدها الي تعرف الطريق ، فحاول ترجع لبوصلتك الداخلية ♥

حاوطوا نفسكم بالناس اللي يفرحون لفوزكم من كل قلبهم
مو اللي يصفقون كِدامكم ويتمنّون تعثركم من اقل موقف يصير
خلي نفسكم ويا الي يشوف نجاحك كأنه نجاحه، وبصعودك يحس إنه صعد وياك، مو تهديد إله
الدنيا متعبة، والطريق طويل، وإحنا ما نكدر نكمّله وحدنا إذا حوالينا ناس تتغذى على إحباطنا، أو تنزعج من نورنا
الفوز يحتاج عيون صادقة تباوع النا بحب وكلمات تشجّع وقلوب ما تحسد وتحقد تدعي
الناس اللي يريدونك تفوز هم أمانك، هم ظهرك وقت التعب، وهم اللي إذا ضعفت يوم، يذكرّوك شكد أنت قوي جنت وعديتها لا تستهينون بهالشي، لان اختيار الناس حولك مو تفصيل هذا قرار يحدد شلون تعيش، وشكد تريد تكمل وتوصل لهذا خلي نفسكم ويا الي يريدك تفوز لأن الفوز الحقيقي ما يجي
إلا ويا ناس صافية ♥

شلون احنا مرات نغسل وجعنا بدموعنا بس يبقى أثر الملح بخدودنا تدرون الله من يحب عبد يخلي الخيرة بوسط الضيق اللي هو بي يعني تظن إن الدنيا سدت بوجهك كل البوب بس الحقيقة هو ديهيئك لـ باب واحد باب بي رزقك وراحتك وجمالك اللي يشبهك
​"وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ" ♥️
​قبل فترة جنت محتارة بشغلة تخص مستقبلي والكل جان يضغط عليه بجهة وعقلي يكولي روحي بغير جهة والناس جانت تحجي وتكول هذا الماشي وهذا الصح جنت أحس روحي ضايعة بين اللي أريده وبين اللي يفرضه الواقع عليه وبساعة هدوء شمرت كل شي ورا ظهري وكلت يارب دبرني فإني لا أحسن التدبير
​بلحظتها حسيت براحة غريبة وكأنو اكو إيد خفية طمنت قلبي وكالتلي لا تخافين وفعلاً ورا أيام قليلة انفتحت بوجهي سكة عمري ما جنت أتخيلها سكة تشبهني وتشبه أحلامي البسيطة اللي محد جان مقدرها هناك عرفت إن الخفايا مو بس أسرار الخفايا هي تدابير الله اللي يضمها النا لحد ما نكون مستعدين نستلمها بفرحة
​يا بنات لا تغركم المظاهر ولا كلمات الناس اللي تحاول تبروز حياتكم بإطارات مو الكم عيشوا فطرتكم وخلوا بوصلتكم هي رضا الله لأن اللي يترتب بعين الله يفرشله القبول بالأرض كلها والله من يرضى على عبد يخلي حتى جروح القديمة تورد وتصير هي مصدر قوته صيروا ويه الله وشوفوا شلون الخفايا الحلوة راح تطلع بدربكم وحدة ورا الثانية وتخليكم تبتسمون وتكولون الحمد لله اللي اختارلي الأحسن ♥️

صباح الخير لروحك

لا تنسى بوسط هاي الهوسة إنك إنسان، ومن حقك تتعب ومن حقك تأخذ استراحة محارب هالأيام الصعبة والركض اللي جاي تركضه مو ضايع ربك جاي يكتبلك عوض ويليق بكل سهرة سهرتها وأنت تعبان

​شد حيلك يا بطل هي شدة وتزول وما يبقى منها غير فخرك بنفسك إنك ما استسلمت ♥️♥️

مرات تحس كلبك صغير
أصغر من أن يتحمل كل هذا الي تمر بي ، أصغر واترف من أن ينوجع هلكد وأنتَ وياه راح تنصدمون من الصبر الي راح يصبه رب العالمين عليك ، وكلبك الصغير يصير يشيل دنيا من الوجع يعدي ويعيش ويكبر ♥️♥️♥️

كلشي راح يعدي ، ومحد يدري بشي

​هذا التعب اللي بداخلك الخوف اللي يرجف گلبك بنص الليل والركض اللي ركضته ومحد طبطب على كتفك بسببه كله راح يمر بسلام مو لازم الناس تعرف شكد حاولت المهم إنك بعدك تحاول وبس لأنك 'تحاول' أنت بطل بعين روحك العوض الجاي راح يمسح على گلبك وينسيك حتىّ شلون چان شكل الوجع فـ طمن بالك ، ربك يدري وهذا كافي

لا تزعلون على أنفسكم

​مو نهاية الدنيا إذا خسرتوا أو رسبتوا أو وگعتوا بوسط الطريق تذكروا إنُّه اكو ناس ما حاولت من الأساس بقوا بمكانهم يتفرجون خايفين حتىّ من الخطوة الأولى بس أنتوا چانت عندكم الشجاعة إنكم تبلشون وتغلطون وتتعلمون الاستمرار بحد ذاته هو الانتصار، وهالتعب اللي تحسون بيّ هسة هو اللي جاي يبني روحكم من جديد ♥️

أنس جان ديحچي عن الانفتاح العاطفي بالحلقة مالته وي فتحي وكال " صرنا نشجع على الانفتاح العاطفي والتعبير عن المشاعر والضحك والبكاء ، بس مو وي كل حد .. يعني انت مو توكف يم الكاشير وتحجيله عن حياتك ومشاكلك لان مايهمه (فأختار الي جاهز يسمعلك )" ♥♥♥
وهو ديحچي تذكرت المرات الي شاركت بيها مشاعر خاصة شلون اختاريت الاشخاص الي جاهزين ويهمهم يسمعوني بعناية ، لان تعلمت اكو فرق چبير مابين شخص يسمعلك بحظور وبين شخص ينتظرك تكمل بس حتىّ يرد عليك وممكن نص الحچيته ما سمعه
احنه حرفياً ما نحتاج شخص يكول النا عبارات تخديرية وتأكيد على قوتنا بكد ما نحتاج شخص يأكدلنا انه حاسس بضعفنا وشايفة ومتوقع من عدنا راح نتخطى بقوة ♥♥

اتذكر كل شخص اختار يشاركني مشاعره الخاصة اول كلمة اكولها اله والي فعلاً تطمنه وتطمني " احجي الي تريده ، مراح احكم عليك ولا اقاطعك "
وهل الشي علمني قيمة الاستماع لان البعض مايكونون محتاجين ردك بكد ما محتاجين اصغائك الهم ♥

كل هالسهر والخوف والركض راح يمر ويصير سوالف تفتخر بيها لا تستهين بجهدك ولا بدموعك ♥️

يارب النصيب الحلو من كلشي

​من الراحة والرزق والناس اللي تشبهنا ومن الأيام الدافية يارب لا تمررنا بظرف صعب إلا وهو خير إلنا ولا تخلّينا نختار درب عاقبته مو طمأنينة وسعادة يارب كون ما نخيب ولا نكسر خاطر أحد ولا ننكسر بوسط هالركض واجعل لكل خطوة نمشيها توفيق وفرحة چبيرة تسعدنا أكثر من كلشي تمنيناه وبچينا عليّ بنص الليل ♥

أقسى شيء لما أحد يحاول يخلّيك شخص ثاني
مو لأنك غلط ، بس لأن صورتك الحقيقية ما ناسبت توقعاته
ومع الوقت تتعب وأنت تمثل نسخة مو أنت
لحد ما تضيع ملامحك وأنت تحاول ترضي غيرك

أحب الدباديب 😂😔♥️♥️♥️
من @Henih_1

هيّ مو المشكلة بالخسارة ولا بالطريقة اللي انتهت بيها السالفة

​الأذية الصدكية هيّ إنها چانت المرة الأولى اللي تفتح بيها كلبك بهالشكل
المرة الأولى اللي تآمن بـ أحد وتأمنله وتلغي كل دفاعاتك كدامه
الأذية إنك چنت حاط كل نقاوتك وطيبتك بهالمكان، وعيونك چانت تلمع بلمعة عمرها ما صارت لغيره
صعبة من تكتشف إنُّه أول شخص تمنيت تنهي ويا كل حروبك وتستقر يمه صار هو أكبر خيبة تداريها عن عيون الناس

فـ هاردلك لـ كلوبنا الصادقة تعلمنا هسة شلون نحب أنفسنا أولاً ♥️

أيامكم سعيدة وعيدكم مبارك بالخير والبركة

​عساكم من عواده بإيام تفيض بالرضا وتترس بيوتكم سعادة وراحة بال ربي يجعل هالعيد فاتحة خير لكل أمنية ضميتوها بگلوبكم ويستجيب لدعواتكم اللي صعدت للسماء ، ويقضي حوائجكم ويفرحكم بشوفة أمانيكم حقيقة كدام عيونكم
كل عام وأنتم بألف خير، محاطين بالناس اللي تعزّوهم وبأحسن حال ♥️♥️♥️♥️♥️

الدنيا ما توكف على شي أو أحد
​بس اللي يوكف صدك هي چم شغلة عزيزة بداخلنا خساراتنا الصغيرة، ذكرياتنا، والأشياء اللي چنا حاطين بيها كل كلبنا
ميخالف إذا أنت توگف وياهن همين شوية تاخذ نفس، تبچي يمهن، تزعل عليهن براحتك، وتنطي لروحك الحق تضعف وبعدين تغسل وجهك وتكمل الدرب ♥️

هاي الورده ألكم لأن بعدكم تحاولون ♥️

واني داقرا فصل الخوف بكتاب (شهرزاد اون فاير ) اكتشفت انو مخاوفي الي مشبعة بشكل لا واعي بعقلي والي بسببها ياخذ جسمي وضعية الدفاع اكثر هل المخاوف مو حقيقية وما جاية من تهديد مباشر
هذا مايعني انو ماعندي مخاوف حقيقية بس حتى نميز هل شعور الخوف الداحسه حاليا هو خوف حقيقي لو خوف جاي من مجرد فكرة ؟؟؟
فتعلمت من الكتاب انو لما احس بخوف من اي موقف اسئل نفسي هل الاسئلة ( هل الشيء الخايفة منه موجود بالحقيقة او بس بالخيال ؟ هل باللحظة الحالية اكو خطر حقيقي يهددني بالمحيط لو بس مجرد افكار داخل عقلي ؟ هل اني بهل اللحظة مو بأمان ؟ لو خايفة من شي بالمستقبل ؟)
زين شنو الغرض من هل الاسئلة واني بعدني خايفة ؟
من تحدد انت من شنو خايف كلش راح يسهل عليك تتعامل وي الموضوع مو بس مجرد شعور بالخوف والهلع ولا انت عارف مصدره ولا انت عارف تتعامل ويا
الكاتب gavin de becker ضرب مثال بسيط يوضح هل الجانب كال مثلاً لو وحدة نزلت من العمارة بوقت متاخر بالليل و واكفة كدام المصعد ومن انفتح باب المصعد لكت رجال لوحدة بالمصعد لسبب ما ممكن اول شعور تحسه البنية هو الخوف من انو تصعد ويا بالمصعد لوحدهم بس هل الخوف الي دتحسه البنية هذا حقيقي ؟ هل الرجال أمان انو تصعد ويا لوحدهم بهل الوقت المتاخر ؟
بصراحة الذات الحقيقية للبنية خايفة من خطر حقيقي بس على الاغلب البنية حتصعد للمصعد رغم خوفها حتى متتفشل وتضل ذاتها الاجتماعية تكوللها عيب صعدي
الغرض من هل المثال انو لو انت حاس بخطر حقيقي اخذ رد فعل بناء على الموقف حتى لو رد فعلك راح يحرجك شوي او تحس انك مو مقبول ♥️♥️♥️

صباح الخير

هيّ صح صعبة بس راح تخلص وتعدي ♥