انا همومي جهال وترضع دموع
أكضي الليل الولي وما يهيدون

الكبر منهم فطمته وياكل ضلوع
شسوي نوب لو كلهم يكبرون؟

خسارة طين هاي الناس
تدور للنهر شوباش
ما تدري الوطن مطعون من مايه
أثاري العمى مو للشوف، للنيه
الجرح مو فطن
بس يندل بياهو يطيح
ليش نسودن التواب
ونچمله بذنب مغبون
شراع بليس ماصلى
خلونا نعرف حسين
حتى نعرف ياهو الله
أهي ركضة عمايم ونفس ممحل
كضى عمره الشهيد يعيش عالحيطان
كافي تخلف امي وتنطي للگيعان
وطن وعره تجاعيده
مايغسل حزنها الدم
تيجان السفن تنهان
من يكسر خشمها الماي
نرخص .. والخشب شراي
هذول احنا بلايه گلوب
من دور علينا الموت
لبدنه بسد رسايلنه
ولوحدنه
شما يلصف ذراع الخوف
تتگطع معاضدنه
ياخذنه ضمى النسيان لأخر اخ
ويردنه لوحدنه
أبچي عالقصيدة
المشت مرعوبة بنوايه الناس
ليمت يستحي التاريخ
ويرگد الحلم براس
لهسه فلاحة التابوت
تحصد بالثكالى عيون
وليلية السجن عريس
والزفه شليل نحور
ياهو الستر عرض الگاع
من حبلن بنات الهور؟
كل فرة خصر ملجوم
يثمل شارب السجان
وين الگالي عفة شوگ
تغبش للتراچي زلوف
وأحنيها بشمس روحي
انا بضعن الكمر فارس
بس هيه الگماري الوان
شسوي لگصه العاهر ولا تعرگ
مادم الجدم ناطور
مايثبت جدم للطيف
النجمة الماحظت بهلال
تسجد گنطره لباچر
ونوبات الكتب عاجر
تغص عين الشعر ويموت
بكل صفنة ثنعش شاعر
سبحانك يالمرصع ضوى وبلور
ساكت والدعاء كادود خمس اوكات
چا يمتى تفك الباب
يهلبت من سماواتك عذر يسوى
چم زمزم شربنا متاع
من طاح العطش سجيل
لاصرنا ربع لبليس
ولاصرنا ربع جبريل

تعجبني من تنجرح
مو دم نزيفك، ورد

جنح بيه نكسر والثاني مخلوع
وطرت گوه على عناد اليكرهون

أيها الشاعر الكبير هاشم العربي.
رحلتَ، لكنك تركت خلفك نصوصًا لا ترحل، ما زالت تدور في مخيلتي وتعود إليّ كلما اشتقتُ إلى الشعر كنتَ رسّامًا أكثر من كونك شاعرًا؛ ترسم بالكلمات صورًا تبقى عالقة في الذاكرة
رحمك الله رحمةً واسعة، والمغفرة لروحك الطاهرة، ولتبقَ كلماتك حيّةً ما بقي من يقرأها ويشعر بها.

النهر عايش لان ضفتينه زعلانات
يموت من يتلاگن ضفه وي ضفه

شوف حالك واعتبر روحك غريب
مو حبيبك بعد انا
دوّر لروحك حبيب

وسألت الحزن؟
ليش تمرني وانا بعيد
جاوبني بهمس عوضني عن صوته
شد عين النوارس للشواطي تروح
وشد عين الاغراب يروح للموته

تچيت مردي شوگك ساعة ويروح
مو شبگة هطر لمتون الأشباب

أستاحشيت أگعد بصفك
والزم أجفوفك وأغني
ودي اكلك هاك اخذني
وين ماتبرد ازنودك
أشعل اضلوعي كواغد
آخ لو تدري بوحشتك
بيش أساجيها غربتك
انته رايح .. بعد رايح
ماخذت جرحي بجنطتك

ناصر البدري

أبيض شراع السفينة شكد جبان
قبل لا يبحر رفع راية صلح

ميثم فالح

من دگيت بابك مو ضعف چان
خاف تگول ما وفة بكلمته
شوصفلك ببابك واگف شلون
أحس الموت يم الباب شفته
صدك أمنت بابك كومة أسرار
لذلك ثكل من بابك دفعته
ما دگيت بابك صاحك الباب
لزمت الباب چف الباب بسته
گبل لا أدخل الكم گلبي الك راح
مدري شچان يصرخ ما سمعته
أظن أهلك دور هالعني ضموك
وجهك من ورا الحيطان شفته
خفت تغلط عيوني تجيب طاريك
لهذا الشوف يم الباب عفته
وخفت يغلط الساني وبأسمك يصيح
وهذا لسان شاعر صعبة أسكته
اطلعت من بيتكم
لو جبته وياي
ما أدري الجسد بالبيت عفته
مدام بوجه الأبيض خلصت وياك
حمدت الله على صار وشكرته

ميثم فالح

بعد مادورك حلم
لو ردت أنام
لا ولا أريدك تمر بأحلامي

وعلي يرفس بكلبي من يسلم
اعلى ربي ومايمد إيده عليه

من مات الهوى
صاحبت الشراع

ميثم فالح

أذا نيتك ورد وتلاگي صحراء
لا تتعجب من تصير ذابل