【社區雪櫃計劃】

香港社會嘅資源其實好多，但總係不患寡而患不均，而呢個情況喺「疫情」底下更加嚴重，有好多人手停口停，話要強檢就無人工；同時又有好多人有剩餘物資，但唔知可以畀邊個。辦事處不時都收到查詢，話「我有少少口罩，唔知可以畀邊個」，其實我哋都唔一定知，因為最有需要嘅人總係會礙於標籤，礙於唔好意思而無尋求其他人協助；性格內向嘅人就更加慘，更加唔敢開聲，但就往往因為咁而reach唔到最有需要嘅群體。

參考唔同計劃嘅做法後，我哋決定推出「社區雪櫃計劃」，希望將資源更加有效咁分享、運用，同時促進社群互助。由今日開始，所有街坊都可以攞走喺社區雪櫃入面嘅物資，攞幾多唔會有人話，總之攞自己需要嘅份量就可以。（為防止有人一次過攞曬去賣或者擺啲害人嘅嘢入去，都唯有用CCTV睇住...）

而非常歡迎街坊、有心人希望擺低自己一啲物資，以達至社群互助互愛，但擺低之前請留意以下條件：
（1）擺物資之前請告知辦事處職員，我哋會幫手睇睇有咩物資同埋點擺放；如果你可以恆常畀物資呢個計劃嘅話，歡迎Pm聯絡我哋再傾

（2）雪櫃係無駁電嘅，所以唔可以擺任何需要冷凍儲存或者會變壞嘅物品；根據經驗，以下嘅物品會比較有需要：
- 抗疫物資（例如未開封/獨立包裝口罩、搓手液）
- 乾糧（例如罐頭、即食麵等）
- 乾貨（例如文具、棋類、書本）*
*請注意，因為雪櫃容量有限，衣服、玩具或者小說、運程書等書本就唔好擺社區雪櫃喇～

（3）呢個計劃將會同 @滿櫃膳糧 合作，雪櫃未來亦會有裝飾，敬請留意！

（4）有需要嘅街坊唔會無啦啦知道呢個計劃，所以就算你無多餘物資，都希望你可以share呢個計劃畀附近街坊，等社區雪櫃可以幫到真正有需要嘅朋友！

#大埔扎根 #攜手革新 #社區雪櫃 #廣福邨 #政府無情 #民間仍可有愛 #社區計劃