【廣惠樓強檢】

政府（又）發出強制檢測公告，呢兩個禮拜逗留過喺廣福邨廣惠樓兩個鐘嘅人，就要喺今日或者聽日去檢測中心做檢測。如果你喺醫院留醫或者喺社區隔離設施，就喺嗰度檢測就得，唔使去檢測中心。

Q：邊度檢測？
A：廣福邨入面係無㗎，最近要去到大埔墟鄉事會街籃球場（8am-8pm），或者大埔體育館（10am-8pm）、太和體育館（8am-1:30pm; 2:30pm-8pm）。

Q：我中咗好返/屋企人中咗，係咪都要驗？
A：根據政府個標準，近三個月中過（包括快測陽性，上報咗嘅話），以及現時正在遵守檢疫令（例如同住家人中咗）嘅就無須去驗。不過如果有人追查，你就要出示到中過嘅證明，包括政府SMS、報完快測嘅隔離令。正在檢疫嘅無須去，公告都無話需要有證明先可以唔去。

Q：係咪一定要去撩鼻？樽仔得唔得？
A：係，除非係3歲以下小朋友以及有醫生證明唔可以撩鼻嘅人。3歲以下理論上要去攞大便樽，最近可以攞嘅地點係粉嶺社會衞生科（粉嶺健康中心 6 樓）。如果有特殊需要係用樽仔，我哋辦事處有少量，歡迎索取。

#強制檢測 #廣福邨 #廣惠樓 #苛政