【單車徑元洲仔路口 改善工程諮詢】

吐露港元洲仔一帶向來都係單車遊勝地，假日特別係好天嘅時候，元洲仔公園近大王爺廟嘅路口經常都有大量單車遊客聚集，亦都發生過唔少意外，以及經常有人車爭路情況；加上有廣宏居民反映，如果要行過去元洲仔公園，就只可以行落元洲仔里嘅車路，要一眼關七咁睇曬有無汽車同埋單車駛過，險象環生。早前我哋同運輸署嘅官員反映過呢個問題，到近日運輸署提出一系列改善建議，我哋整咗幾張圖講解運輸署嘅方案，重點如下：
(1) 草叢位置加設行人路
(2) 加設過單車路設施及將鐵欄改為膠護柱
(3) 分叉口增設往大美督指示牌
(4) 擴寬部分行人路及更改路面標示

以上幾個改動大致上都滿足咗廣宏街坊安全行過去元洲仔公園嘅需求，以及避免人車爭路以及減少遊客盪失路嘅情況。唔知大家又點睇呢？如果你對上述幾個改動有意見，歡迎你喺星期五之前回覆！

#人車爭路 #元洲仔 #單車 #宏福苑 #廣福邨 #大埔 #工程諮詢 #運輸署