អភិបាលខេត្តកំពង់ចាម ដឹកនាំប្រតិភូ អញ្ជើញដាក់កម្រងផ្កាគោរពវិញ្ញាណក្ខន្ធរបស់សាស្ត្រាចារ្យ ឧបាសក សួស ថន

(ស្វាយរៀង) នារសៀលថ្ងៃទី១២ ខែវិច្ឆិកាឆ្នាំ២០២៦ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានដឹកនាំប្រតិភូខេត្ត អញ្ជើញដាក់កម្រងផ្កាគោរពវិញ្ញាណក្ខន្ធរបស់សាស្ត្រាចារ្យ ឧបាសក សួស ថន ដែលបានទទួលមរណភាពនៅថ្ងៃចន្ទ ១៤រោច ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៩ ខែវិច្ឆិកា ឆ្នាំ២០២៦ វេលាម៉ោង ១២:៣០នាទីយប់ ក្នុងជន្មាយុ ៩០ឆ្នាំ ដោយជរាពាធ។

ក្នុងនាមក្រុមប្រឹក្សា គណៈអភិបាលខេត្តកំពង់ចាម មន្ត្រីរាជការ កងកម្លាំងប្រដាប់អាវុធ និងក្នុងនាមខ្លួនឯកឧត្តមផ្ទាល់ ឯកឧត្តមអភិបាលខេត្តកំពង់ចាម ពិតជាមានសេចក្តីតក់ស្លុត និងក្តុកក្តួលរំជួលចិត្តយ៉ាងក្រៃលែង ក្រោយពីបានទទួលដំណឹងមរណភាពរបស់ សាស្ត្រាចារ្យ ឧបាសក សួស ថន ដែលត្រូវជាឳពុកបង្កើតរបស់ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ។

ក្នុងឱកាសប្រកបដោយសមានទុក្ខដ៏ក្រៀមក្រំនេះ ឯកឧត្តម អ៊ុន ចាន់ដា និងប្រតិភូ សូមចូលរួមរំលែកមរណទុក្ខដ៏សែនក្រៀមក្រំ និងសម្តែងនូវក្តីសោកស្តាយ ស្រណោះអាឡោះអាល័យជាទីបំផុត ជាមួយឯកឧត្តម និងក្រុមគ្រួសារ ចំពោះមរណភាពរបស់សាស្ត្រាចារ្យ ឧបាសក សួស ថន។ មរណភាពរបស់លោក គឺជាការបាត់បង់ឪពុកបង្កើត ឪពុកក្មេក ជីតា និងជីតាទួត ជាទីគោរពស្រឡាញ់ និងប្រកបដោយព្រហ្មវិហារធម៌ចំពោះកូនៗ ចៅៗ ចៅទួត និងក្រុមគ្រួសារទាំងមូល។ ជាមួយគ្នានេះ ក៏ជាការបាត់បង់នូវឥស្សរជនមួយរូប ដែលបានលះបង់កម្លាំងកាយចិត្ត ប្រាជ្ញាស្មារតី និងតស៊ូយ៉ាងសកម្មក្នុងការបំពេញការងារដោយឆន្ទៈ និងមនសិការខ្ពស់ ដើម្បីបម្រើឧត្តមប្រយោជន៍ជាតិ មាតុភូមិ និងប្រជាជន។ លើសពីនេះ លោកបានបន្សល់ទុកនូវស្នាដៃ និងសមិទ្ធផលជាច្រើន តាមរយៈការចូលរួមចំណែកកសាង និងអភិវឌ្ឍន៍ទាំងក្នុងវិស័យពុទ្ធចក្រ និងអាណាចក្រ ព្រមទាំងជាពុទ្ធសាសនិកមួយរូប ដែលបានប្រតិបត្តិខ្ជាប់ខ្ជួនតាមគន្លងព្រះពុទ្ធសាសនា។

ឯកឧត្តម អភិបាលខេត្ត និងប្រតិភូ សូមឧទ្ទិសបួងសួងដល់ដួងវិញ្ញាណក្ខន្ធរបស់សាស្ត្រាចារ្យ ឧបាសក សួស ថន សូមបានទៅកាន់សុគតិភព កុំបីឃ្លៀងឃ្លាតឡើយ។

ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ផ្ញើសារលិខិតជូនពរ គោរពជូនសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ក្នុងឱកាសនៃពិធីបុណ្យចម្រើនអាយុវឌ្ឍនៈមង្គល