យើងជាថ្នាក់ដឹកនាំ ត្រូវធ្វើការងារឱ្យបានច្រើន និងទទួលខុសត្រូវឱ្យបានខ្ពស់ជាងមន្រ្តីក្រោមឱវាទរបស់ខ្លួន ដែលនេះជាទស្សនៈរួម សម្រាប់យើងទាំងអស់គ្នាត្រូវយកចិត្តទុកដាក់

ប្រសាសន៍ចង្អល់ដឹកនាំរបស់លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម ក្នុងកិច្ចប្រជុំបូកសរុបសភាពការណ៍ លទ្ធផលកិច្ចប្រតិបត្តិការរក្សាសន្តិសុខសង្គម ការងារនគរបាល សមាគមន៍ប្រចាំខែតុលា ឆ្នាំ២០២៦ និងលើកទិសដៅបន្ដ ដែលប្រព្រឹត្តទៅ នាព្រឹកថ្ងៃព្រហស្បតិ៍ ទី២២ ខែតុលា ឆ្នាំ២០២៦ ក្រោមការអនុវត្តតាមអនុសាសន៍ដ៏ខ្ពង់ខ្ពស់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ។

ដោយកិច្ចប្រជុំនេះ មានការអញ្ជើញចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរង លោកអនុប្រធានផែន លោកនាយការិយាល័យជំនាញ លោកអធិការ-អធិការរង និងលោកនាយប៉ុស្តិ៍នគរបាលរដ្ឋបាល ឃុំ/សង្កាត់ ទាំង១០៩ ។

នៅក្នុងកិច្ចប្រជុំនេះដែរ លោកឧត្តមសេនីយ៍ទោ ហេង វុទ្ធី បានលើកទឹកចិត្ដដល់កងកម្លាំង ត្រូវបន្ដខិតខំបំពេញតួនាទីស្នូលរបស់អង្គភាព និងត្រូវបន្ដលើកកម្ពស់គុណភាពការងារជំនាញបន្ថែមទៀត ។

ទន្ទឹមនឹងនេះ ត្រូវបន្តជម្រុញ ខិតខំឆ្លើយតបឱ្យបានទាន់ពេលវេលាចំពោះការផ្ដល់សេវាសាធារណៈ ពិសេសសេវារដ្ឋបាល ប្រកបដោយគុណភាព តម្លាភាព និងទទួលបានជំនឿទុកចិត្តពីប្រជាពលរដ្ឋ ក្នុងមូលដ្ឋានរបស់ខ្លួន ។

ជាមួយគ្នានេះ ក៏ត្រូវបន្ដការផ្សព្វផ្សាយអនុក្រឹត្យ លេខ០៣ អនក្រ.បក របស់រាជរដ្ឋាភិបាល ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ និងបន្តស្រាវជ្រាវទីតាំងស្នាក់នៅរបស់ជនបរទេសលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) គឺមិនអនុញ្ញាតឱ្យកើតមានឡើង ក្នុងភូមិសាស្ត្រខេត្តកំពង់ចាម ជាដាច់ខាត ។

លោកឧត្តមសេនីយ៍ស្នងការ បានបន្ថែមទៀតថា គ្រប់កម្លាំងជំនាញ ត្រូវបង្កើនសមត្ថភាពគ្រប់គ្រងតាមដានក្តាប់ សភាពការណ៍ការងារសន្តិសុខ ឲ្យបានម៉ឺងម៉ាត់ ជាពិសេសរាល់មុខសញ្ញាបង្កចលាចលសង្គម និងមុខសញ្ញាចោរ លួច ឆក់ប្លន់ ក្មេងទំនើង ដើម្បីដាក់ចេញវិធានការបង្ការទប់ស្កាត់ ឲ្យមានប្រសិទ្ធភាព។

ដោយឡែក កម្លាំងនគរបាលចរាចរណ៍ ត្រូវបន្ដយកចិត្តទុកដាក់ ដោះស្រាយសម្រួលចរាចរណ៍ នៅតាមគោលដៅ ដែលប្រឈមកកស្ទះ និងបន្ដការប្រើវិធានការ រឹតបន្តឹងច្បាប់ចរាចរណ៍ផ្លូវគោក ដើម្បីបង្កើនសុវត្ថិភាពខ្ពស់លើដងផ្លូវ ។

ជាចុងក្រោយ លោកឧត្តមសេនីយ៍ទោ ហេង វិទ្ធី បានដាក់បទបញ្ជាឱ្យកម្លាំងអន្តរាគមន៍ពិសេស ត្រៀមលក្ខណៈជួយសង្គ្រោះចំពោះសំណូមពរពីបងប្អូនប្រជាពលរដ្ឋ ២៤/២៤ម៉ោង ។

ជាចុងក្រោយ លោកឧត្តមសេនីយ៍ទោ ហេង វុទ្ធី បានផ្ដល់ជាទស្សនៈរួមមួយដល់គ្រប់ថ្នាក់ដឹកនាំ នៃស្នងការដ្ឋាននគរបាលខេត្តកំពង់ចាមថា "យើងជាថ្នាក់ដឹកនាំ ត្រូវធ្វើការងារឱ្យបានច្រើន និងទទួលខុសត្រូវឱ្យបានខ្ពស់ជាងមន្រ្តីក្រោមឱវាទរបស់ខ្លួន ដែលនេះជាទស្សនៈរួម សម្រាប់យើងទាំងអស់គ្នាត្រូវយកចិត្តទុកដាក់" ៕

នាព្រឹកថ្ងៃទី២២ ខែតុលា ឆ្នាំ២០២៦ លោកជំទាវ ប៉ាង ដានី អភិបាលរងខេត្ត និងជាប្រធានលេខាធិការដ្ឋានខេត្តប្រយុទ្ធប្រឆាំងអំពើជួញដូរមនុស្ស បានអញ្ជើញចូលរួមកិច្ចប្រជុំពិភាក្សាផែនការ ការរៀបចំសំណើគម្រោងពេញលេញ និងគម្រោងដែលកំពុងអនុវត្តន៍សកម្មភាព នៅក្នុងខេត្ត កំពង់ចាម ជាមួយ អង្គការសម្ព័ន្ធចាប់ដៃ ។

កិច្ចប្រជុំធ្វើនៅសាលាខេត្ត មានការអញ្ជើញចូលរួមដោយលោកស្រី Kerry Fox តំណាងរដ្ឋាភិបាលប្រទេស New Zealand, លោកស្រី នាយិការង រដ្ឋបាលខេត្ត , តំណាងស្នងការរដ្ឋាននគរបាលខេត្ត , លោក ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត , លោកប្រធានមជ្ឈមណ្ឌលបណ្ដុះបណ្ដាលវិជ្ជាជីវៈខេត្ត និងបុគ្គលិក-ក្រុមការងារអង្គការសម្ព័ន្ធចាប់ដៃ សរុបចំនួន ១១នាក់។

គោលបំណងកិច្ចប្រជុំ៖ ដើម្បីពង្រឹងកិច្ចសហការ, ការកំណត់ក្រុមគោលដៅ ការផ្ដល់សេវាជួយដល់គ្រួសារសហគមន៍ ពិនិត្យលទ្ធភាព ប្រមូលទិន្នន័យ វាយតម្លៃសមត្ថភាពដៃគូ និងសិក្សាជាក់ស្តែង (លើការងារ បណ្តុះបណ្តាល TVET ជីវភាពរស់នៅ និងលក្ខណៈខុសគ្នារវាងខេត្តព្រៃវែង និងកំពង់ចាម) ព្រមទាំងកំណត់រចនាសម្ព័ន្ធ ហានិភ័យ និងថវិកា ដើម្បីរៀបចំចងក្រងសំណើគម្រោងពេញលេញ។