អភិបាលស្រុកចំការលើ ដឹកនាំប្រតិភូរដ្ឋបាលស្រុក អញ្ជើញដាក់កម្រង គោរពវិញ្ញាណក្ខន្ធ លោកវរៈសេនីយ៍ត្រី យ៉ែម លឹង

(ស្រុកចំការលើ)៖ នាព្រឹកថ្ងៃពុធ ទី២៣ ខែកញ្ញា ឆ្នាំ២០២៦ លោកបណ្ឌិត សំ ពិសិដ្ឋ អភិបាលនៃគណៈអភិបាលស្រុកចំការលើ បានដឹកនាំប្រតិភូរដ្ឋបាលស្រុក អញ្ជើញដាក់កម្រងផ្កា គោរពវិញ្ញាណក្ខន្ធ លោកវរៈសេនីយ៍ត្រី យ៉ែម លឹង យុទ្ធជនក្រុមទី២ វរសេនាតូចលេខ៣៩២ កងពលតូចអន្តរាគមន៍លេខ៩ កងពលធំអន្តរាគមន៍លេខ៣ កងទ័ពជើងគោក ដែលបានទទួលមរណភាពនៅថ្ងៃទី២០ ខែកញ្ញា ឆ្នាំ២០២៦ វេលាម៉ោង ០០:១០ នាទី រំលងអធ្រាត្រ ក្នុងជន្មាយុ ៤៧ឆ្នាំ ដោយសារត្រូវផ្សែងពុលនៅសមរភូមិមុំបី។

កម្មវិធីបុណ្យសពបានប្រារព្ធធ្វើឡើងនៅគេហដ្ឋាននៃសព ស្ថិតនៅភូមិស្រឡៅតូង ឃុំបល្ល័ង្ក ស្រុកបារាយណ៍ ខេត្តកំពង់ធំ។

ក្នុងឱកាសដ៏ក្រៀមក្រំនេះ លោកបណ្ឌិតអភិបាល និងគណៈប្រតិភូ បានសម្តែងនូវការចូលរួមរំលែកទុក្ខយ៉ាងសោកសៅ និងគោរពចំពោះវីរភាព និងការលះបង់របស់យុទ្ធជនដែលបានបូជាជីវិតក្នុងបុព្វហេតុការពារជាតិ និងបូរណភាពទឹកដី។

លោកបណ្ឌិតអភិបាលស្រុក សូមបួងសួងឱ្យវិញ្ញាណក្ខន្ធរបស់លោកវរៈសេនីយ៍ត្រី យ៉ែម លឹង បានទៅកាន់សុគតិភព។