នាព្រឹកថ្ងៃទី៩ ខែកញ្ញា ឆ្នាំ២០២៦ លោកជំទាវ ប៉ាង ដានី អភិបាលរងខេត្ត តំណាងដ៏ខ្ពង់ខ្ពសឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីក្នុងសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល ២០២៧-២០២៩ របស់រដ្ឋបាលក្រុង និងសង្កាត់ នៅសាលាក្រុងកំពង់ចាម។

សិក្ខាសាលានេះ មានការចូលរួមពីថ្នាក់ដឹកនាំក្រុង តំណាងមន្ទីរ-អង្គភាព ចៅសង្កាត់ទាំង៤ អង្គការសង្គមស៊ីវិល និងសប្បុរសជនផងដែរ។

សិក្ខាសាលាមានគោលបំណងពិនិត្យ និងកំណត់តម្រូវការអភិវឌ្ឍន៍នៅមូលដ្ឋាន សម្របសម្រួលគម្រោង និងធនធាន ព្រមទាំងកៀរគរការគាំទ្រពីមន្ទីរ-អង្គភាព អង្គការដៃគូ វិស័យឯកជន និងសប្បុរសជន ដើម្បីឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ ស្របតាម យុទ្ធសាស្ត្របញ្ចកោណ ដំណាក់កាលទី១។
មានប្រសាសន៍ក្នុងឱកាសនោះ លោកស្រី ប៉ាង ដានី បានបញ្ជាក់ថា កម្មវិធីវិនិយោគបីឆ្នាំរំកិល មិនមែនគ្រាន់តែជាឯកសារបច្ចេកទេស ឬបញ្ជីគម្រោងនោះទេ ប៉ុន្តែជាឧបករណ៍សម្រាប់កំណត់អាទិភាពអភិវឌ្ឍន៍ កៀរគរធនធាន និងតាមដានការអនុវត្ត ឱ្យស្របនឹងតម្រូវការរបស់ប្រជាពលរដ្ឋ។
លោកស្រីបានស្នើឱ្យរដ្ឋបាលក្រុង និងសង្កាត់ យកចិត្តទុកដាក់លើរាល់គម្រោង ដោយពិនិត្យឱ្យបានច្បាស់ថា គម្រោងនោះឆ្លើយតបនឹងបញ្ហាអ្វី អ្នកណាជាអ្នកទទួលផលប្រយោជន៍ មានប្រភពធនធានពីណា អាចអនុវត្តបានឬទេ និងផ្តល់ផលប្រយោជន៍អ្វីខ្លះដល់ប្រជាពលរដ្ឋ។

ជាលទ្ធផល សិក្ខាសាលាទទួលបានការគាំទ្រគម្រោងសរុប ២៦៥គម្រោង ក្នុងនោះ ការគាំទ្រចំនួន ៩៥គម្រោង ស្មើនឹង ១៣,៩៦%។ មន្ទីរជំនាញមាន ៣១គម្រោង និងក្រៅ ៤២គម្រោង អង្គការមាន ៦គម្រោង និងក្រៅ ១៦គម្រោង ខណៈសប្បុរសជន មិនទាន់មានគម្រោងគាំទ្រ។ ដោយឡែក គម្រោងរបស់រដ្ឋបាលក្រុងទទួលបានការគាំទ្រ ៩៧គម្រោង ក្នុងនោះក្នុង ៣១គម្រោង ស្មើនឹង ២៦,៨០%។